ସମ୍ଭାବ୍ୟ ବାତ୍ୟା ଦାନା ପ୍ରଭାବକୁ ନଜରରେ ରଖି ସର୍ବଦା ଚଳଚଞ୍ଚଳ ବଡ଼ଦାଣ୍ଡ ଆଜି ଖାଁ ଖାଁ ହୋଇଯାଇଛି । ଦୋକାନ ବଜାର ବନ୍ଦ ରହିଛି । ପିରୀରେ ଗତକାଲି ରାତିରୁ ଝିପି ଝିପି ବର୍ଷା ଲାଗି ରହିଛି । ସମୁଦ୍ରରେ ବଡ ବଡ ଜୁଆର ଲହଡି ମାରୁଥିବା ବେଳେ ତାକୁ ଉପଭୋଗ କରିବାକୁ ପର୍ଯ୍ୟଟକ ଓ ସହର ଅନେକ ଲୋକ ବେଳାଭୂମି ରାସ୍ତାରେ ରୁଣ୍ଡ ହେଉଥିବା ଦେଖିବାକୁ ମିଳିଛି । ତେବେ ସୁରକ୍ଷା ଦାୟିତ୍ୱରେ ନିୟୋଜିତ ସ୍ବେଚ୍ଛାସେବୀ ଓ ଲାଇଫ୍ ଗାର୍ଡ ମାନେ ସ୍ବର୍ଣ୍ଣାଭ ବେଳାଭୂମିକୁ କୌଣସି ବ୍ୟକ୍ତିଙ୍କୁ ଛଡୁନାହାନ୍ତି । ବାତ୍ୟା ମୁକାବିଲା ଲାଗି ବରିଷ୍ଠ ଅଧିକାରୀ ମାନଙ୍କୁ ବିଭିନ୍ନ ବ୍ଲକର ତଦାରଖ ଦାୟିତ୍ୱ ଦିଆଯାଇଛି । ଜିଲ୍ଲା ଦାୟିତ୍ୱରେ ରାଜ୍ୟ ସରକାର ନିୟୋଜିତ କରିଥିବା ବରିଷ୍ଠ ଅଧିକାରୀ ବଲୱନ୍ତ ସିଂ ବିଭିନ୍ନ ସମ୍ଭାବ୍ୟ ବାତ୍ୟା ପ୍ରବଣ ଅଞ୍ଚଳ ଗ୍ରସ୍ତ କରିବା ସହିତ ପ୍ରଶାସନ ପକ୍ଷରୁ କରାଯାଇଥିବା ସମସ୍ତ ବ୍ୟବସ୍ଥାର ସମୀକ୍ଷା କରିଛନ୍ତି ।
ଜିଲ୍ଲାର ୧୭୯ ବହୁମୁଖୀ ଆଶ୍ରୟ ସ୍ଥଳକୁ ପ୍ରସ୍ତୁତ କରାଯାଇଥିବା ବେଳେ ବିକଳ୍ପ ୩୭୦ ଆଶ୍ରୟ ସ୍ଥଳକୁ ପ୍ରସ୍ତୁତ କରାଯାଇଛି । ଓଡ୍ରାଫ ଓ ଏନଡିଆରଏଫର ୨ଟି ଲେଖାଏଁ ଟିମ୍ ଜିଲ୍ଲାରେ ପହଞ୍ଚିଛନ୍ତି । ଅଗ୍ନିଶମର ୧୧ଟି ଟିମ୍ ପ୍ରତି ବ୍ଲକରେ ଥିବା ବେଳେ ଅତିରିକ୍ତ ୬ଟି ଟିମ୍ ଜିଲ୍ଲା ପାଇଁ ରହିଛନ୍ତି । ବାତ୍ୟା ଆଶ୍ରୟ ସ୍ଥଳରେ ଅତ୍ୟାବଶ୍ୟକ ସାମଗ୍ରୀ ମହଜୁଦ ରଖାଯାଇଛି । ଜନସାଧାରଣଙ୍କୁ ସୁରକ୍ଷା ଦେବା ଓ ନିରାପଦ ରଖିବାକୁ ପ୍ରଶାସନ ପକ୍ଷରୁ ସମସ୍ତ ପଦକ୍ଷେପ ନିଆଯିବା ସହ ନିୟନ୍ତ୍ରଣ କକ୍ଷ ଓ ହେଲ୍ପ ଲାଇନ ନମ୍ବର ମଧ୍ୟ ଜାରି କରାଯାଇଛି ।