ବାଲେଶ୍ବର ଜିଲ୍ଲା ବାଲିଆପାଳ ବ୍ଲକ ଅର୍ନ୍ତଗତ ସାଉଡି ପଞ୍ଚାୟତରେ ସରକାରୀ ଯୋଜନାରେ ବ୍ୟାପକ ହେରଫେର ଓ ଦୁର୍ନୀତି ଅଭିଯୋଗ । ବାରଣ ସତ୍ତ୍ୱେ ତରବରିଆ ଭାବେ ରାତାରାତି ପାଇପ ବସାଇବାକୁ ନେଇ ତାତିଲେ ଲୋକେ । ସୂଚନା ଅନୁଯାୟୀ, ସାଉଡି ପଞ୍ଚାୟତର ପାଞ୍ଚ ନମ୍ବର ୱାର୍ଡର ବିରେନ ଛକ ଠାରେ ଲୋକଙ୍କ ପାନୀୟ ଜଳ ସମସ୍ୟା ଦୂର କରିବାକୁ ଏକ ଗଭୀର ନଳକୂପ ଖନନ ପାଇଁ ସରକାରୀ ଅନୁମତି ମିଳିଥିଲା ।
ସ୍ଥାନୀୟ ଅଞ୍ଚଳ ସମୁଦ୍ର କୂଳିଆ ହୋଇଥିବାରୁ ଏଠାରେ ଲୁଣି ପାଣି ମିଳିଥାଏ । ତେଣୁ, ନଳକୂପକୁ ଅଧିକ ଗଭୀର ଭାବେ ଖନନ ପାଇଁ ନିର୍ଦ୍ଦେଶ ଦିଆଯାଇଥିଲା । କିନ୍ତୁ, ଠିକାଦାର ଉପରଠଉରିଆ ଭାବେ ବିନା ଗ୍ରାମବାସୀ ଓ ୱାର୍ଡମେମ୍ବରଙ୍କ ଉପସ୍ଥିତିରେ ୩-୪ ଦିନରେ ଖନନ ଓ ପାଇ ପୋତା କାମ ସାରିଦେଇଛନ୍ତି । ତା ଉପରେ ପୁଣି ୪୯୫ ଫୁଟ ପର୍ଯ୍ୟନ୍ତ ଖନନ ଓ ପାଇପ ବିଛା ଯାଇଥିବା ବେଳେ ୯୦୦ ଫୁଟ ଗଭୀରତାର ବିଲ କରାଯାଇଥିଲା । ଏପରି ଅନିୟମିତତାକୁ ନେଇ ବିଜେପି ସରପଞ୍ଚ ଧରଣୀଧର ମଲ୍ଲିକଙ୍କୁ ବାରମ୍ବାର ଅଭିଯୋଗ ସତ୍ତ୍ୱେ କିଛି ସୁଫଳ ମିଳିନଥିଲା । ତେଣୁ ବାଧ୍ୟ ହୋଇ ୱାର୍ଡ ସଭ୍ୟ ଦୋଣାଙ୍କ ନେତୃତ୍ବରେ ଗ୍ରାମର ବହୁ ଲୋକେ ବିଡିଓ ବିନୋଦ କୁମାର ପଣ୍ଡାଙ୍କୁ ଲିଖିତ ଅଭିଯୋଗ କରିଛନ୍ତି । ସେପଟେ ନଳକୂପ ବସାଯାଇଥିଲେ ମଧ୍ୟ ଲୁଣା ପାଣି ପାଇଁ ଏହା ଗ୍ରାମବାସୀଙ୍କ କୌଣସି କାମରେ ଆସିପାରିବ ନାହିଁ । ତେଣୁ, ବିଲ ଅର୍ଥ ରିଲିଜ ନକରିବାକୁ ଦାବି ହୋଇଛି ।