ଓଡ଼ିଶା ସିମକାର୍ଡରେ ପାକିସ୍ତାନ ଲିଙ୍କ୍ ରହିଛି । ଏନେଇ ସ୍ପେଶାଲ ଟାସ୍କ ଫୋର୍ସକୁ ସାଂଘାତିକ ତଥ୍ୟ ମିଳିଛି । ତେଣୁ ତନାଘନା ଚଳାଇଛି ଏସଟିଏଫ୍ । ଏହି ମାମଲାରେ ମାଷ୍ଟରମାଇଣ୍ଡ ଥିବା ପଠାଣି ସାମନ୍ତ ଲେଙ୍କା ବିରୋଧରେ ଦେଶଦ୍ରୋହ ଅପରାଧ ଦଫା ଲାଗିବ ବୋଲି STF ପକ୍ଷରୁ ସୂଚନା ଦିଆଯାଇଛି ।
ଆସନ୍ତାକାଲିଠାରୁ ପଠାଣି ସାମନ୍ତ ଲେଙ୍କା ରିମାଣ୍ଡରେ ଯିବ । ୫ ଦିନିଆ ରିମାଣ୍ଡରେ ନେଇ ଆତଙ୍କୀ ଲିଙ୍କ୍ ବାବଦରେ ଖୋଳତାଡ଼ କରିବ ଏସଟିଏଫ୍ । ଦିଲ୍ଲୀ,ରାଜସ୍ଥାନ, ଗୁଜରାଟ ଓ ପଶ୍ଚିମବଙ୍ଗ ଭଳି ରାଜ୍ୟରେ ଜାଲ ବିଛାଇଥିଲା ପଠାଣି ସାମନ୍ତ । ଆଇଏସଆଇ ଏଜେଣ୍ଟଙ୍କ ସମ୍ପର୍କରେ ଥିବା ନେଇ ସୂଚନା ମିଳିଛି । ଆତଙ୍କବାଦୀଙ୍କ ସହ ଲିଙ୍କ୍ ରଖିବାକୁ କେଉଁ କେଉଁ ଅଞ୍ଚଳରୁ ସିମକାର୍ଡ କିଣା ହୋଇଥିଲା । ସେ ନେଇ ତଦନ୍ତ ଜାରି ରଖିଛି ସ୍ପେଶାଲ ଟାସ୍କ ଫୋର୍ସ । ପୂର୍ବରୁ ପଠାଣିଙ୍କ ବିରୋଧରେ ଅଫିସିଆଲ ଡାଟା ଲିକ୍ ନେଇ ଜଲପାଇଗୁଡ଼ି ଥାନାରେ ଅଭିଯୋଗ ହୋଇଥିଲା ।
ପୂର୍ବରୁ ମଧ୍ୟ ପାକିସ୍ତାନ ଲିଙ୍କ୍ ନେଇ ଅନେକ ମାମଲା ଆସିଛି । ବିଭିନ୍ନ ରାଜ୍ୟରେ ଅଧିକାରୀ, ଦଲାଲମାନେ ସାମାନ୍ୟ ଅର୍ଥ ଲୋଭରେ ଦେଶର ଗୁପ୍ତ ତଥ୍ୟ ଦେବାକୁ ପଛାଇ ନାହାଁନ୍ତି । ବିଭିନ୍ନ ସ୍ଥାନର ଦୁର୍ବଳତା, ସେନା ଏବଂ ପୋଲିସର ପଦକ୍ଷେପ ସହ ଅନନ୍ୟା ଗୁପ୍ତ ତଥ୍ୟ ଦେଇଥିବା ଜଣାପଡ଼ିଛି । ବିଳମ୍ବଳରେ ହେଲେ ମଧ୍ୟ ସେମାନଙ୍କୁ ଗିରଫ କରାଯାଇଛି । ଏବେ ସିମ୍ କାର୍ଡରେ ପାକିସ୍ତାନ ଲିଙ୍କ୍ ଥିବାରୁ ସମସ୍ତଙ୍କ ମନରେ ଛନକା ପଶିଛି ।