ପାକିସ୍ତାନକୁ ଗୋଟିଏ ପରେ ଗୋଟିଏ ବିପଦ ମାଡ଼ି ଆସୁଛି । ବନ୍ୟା ପରେ ଦରଦାମ୍ ବୃଦ୍ଧି ଲୋକଙ୍କୁ ଟେନସନ୍ ଦେଇଛି । ଏହାପରେ ପାକିସ୍ତାନର ପ୍ରକୃତ ବନ୍ଧୁ କୁହାଯାଉଥିବା ଚୀନର ନାଲିଆଖି, ବିଭିନ୍ନ ପ୍ରସଙ୍ଗରେ ବିଶ୍ୱରେ ନିନ୍ଦିତ ପାକିସ୍ତାନକୁ ଚିନ୍ତାରେ ପକାଇଥିଲା । ସବୁଠୁ ବଳି ଯାଇଥିଲା ଇମ୍ରାନ ସମର୍ଥକଙ୍କ ହିଂସା । ଏବେ ପୁଣି ଏକ ବିପତ୍ତି ଦେଖିବାକୁ ମିଳିଛି ।
ପାକିସ୍ତାନର ଗିଲ୍ଗିଟ୍-ବାଲ୍ତିସ୍ତାନ ଅଞ୍ଚଳରେ ତୁଷାରସ୍ଖଳନ ହୋଇଛି । ଏଥିରେ ୩ ମହିଳାଙ୍କ ସମେତ ୧୦ ଜଣଙ୍କ ମୃତ୍ୟୁ ହୋଇଛି । ଆଉ ୨୫ ଜଣ ଆହତ ହୋଇଥିବା ବେଳେ ମୃତ୍ୟୁ ସଂଖ୍ୟା ବଢ଼ିବା ଆଶଙ୍କା ରହିଛି । ପାର୍ବତ୍ୟାଞ୍ଚଳ ଅନ୍ତର୍ଗତ ଆସ୍ତୋର ଜିଲ୍ଲାର ସୁଣ୍ଟର୍ ଟପ୍ ଅଞ୍ଚଳରେ ଏହି ପ୍ରାକୃତିକ ଦୁର୍ବିପାକ ଘଟିଛି । ପ୍ରଥମେ ସ୍ଥାନୀୟ ଲୋକ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ପରେପରେ ପାକିସ୍ତାନ ସେନାଯବାନମାନେ ଏଥିରେ ସାମିଲ ହୋଇଥିଲେ । ପ୍ରଭାବିତ ଅଞ୍ଚଳରେ ଟିମ୍ ପକ୍ଷରୁ ଉଦ୍ଧାର କାର୍ଯ୍ୟ ଜାରି ଥିବା କହିଛନ୍ତି ଗିଲ୍ଗିଟ୍-ବାଲ୍ତିସ୍ତାନ୍ର ମୁଖ୍ୟ ଶାସନ ସଚିବ ମୋହିଉଦ୍ଦିନ୍ ୱାନି ।
ଏହି ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି ଗିଲ୍ଗିଟ୍-ବାଲ୍ତିସ୍ତାନ୍ର ମୁଖ୍ୟମନ୍ତ୍ରୀ ଖଲିଦ୍ କୁର୍ଶିଦ ଖାଁ । ଉଦ୍ଧାର ଅଭିଯାନକୁ ତ୍ୱରାନ୍ୱିତ କରିବା ପାଇଁ କର୍ତ୍ତୃପକ୍ଷଙ୍କୁ ସେ ନିର୍ଦ୍ଦେଶ ଦେଇଛନ୍ତି । ଜୀବନହାନୀ ଯୋଗୁଁ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ୍ ଶରିଫ୍ ମଧ୍ୟ ଟ୍ୱିଟ୍ କରି ଶୋକବ୍ୟକ୍ତ କରିଛନ୍ତି । ଜଳବାୟୁ ପରିବର୍ତ୍ତନ ଯୋଗୁଁ ପାକିସ୍ତାନରେ ଗୋଟିଏ ପରେ ଗୋଟିଏ ବିପର୍ଯ୍ୟୟ ଘଟୁଛି ।