Blog

କେନ୍ଦ୍ରାପଡ଼ା ଜିଲ୍ଲା ଆଳି ପୋଲିସ ଆଜି ୫ ଜଣ ଆନ୍ତରାଜ୍ୟ ଡକାୟତଙ୍କୁ ଗିରଫ କରିଛି । ସେମାନଙ୍କ ଠାରୁ ମୋଟର ସାଇକେଲ,ବନ୍ଧୁକ, କଟୁରୀ ଆଦି ଜବତ କରିବା ସହ ସେମାନଙ୍କ ନିକଟରୁ ନଗଦ ଟଙ୍କା ଓ ସୁନାଗହଣା ଉଦ୍ଧାର କରିଛି ପୋଲିସ । ଏହି ଲୁଟେରା ମାନେ କିଛିଦିନ ତଳେ ଆଳି ଥାନା ଅନ୍ତର୍ଗତ ଗୋବିନ୍ଦପୁରରେ ଡାକ୍ତର ବଂଶୀଧର ମହାପାତ୍ରଙ୍କ ଘରୁ ଡକାୟତି କରିଥିଲେ । ସେମାନଙ୍କ ଚେର କେତେବାଟ ଲମ୍ବିଛି ତାହା ପଚାଉଚୁରା କରାଯିବ ବୋଲି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି SDPO ସନ୍ଧ୍ୟାରାଣୀ ବେହୁରା ।

ବାସ୍ତବରେ ଘଟଣାଟି ହେଉଛି ଗତ ୧୮ ତାରିଖ ରାତିର । ଡାକ୍ତର ବଂଶୀଧର ମହାପାତ୍ରଙ୍କ ପରିବାର ଲୋକେ ସେଦିନ ଘରେ ଥିବା ବେଳେ ଦୁଇ ଜଣ ଲୁଟେରା ତାଙ୍କ ଘରେ ପଶି ସେମାନଙ୍କୁ ବନ୍ଧୁକ ଦେଖାଇ ଭୟଭୀତ କରିଥିଲେ । ଏହାପରେ ତାଙ୍କ ଘରୁ ଲକ୍ଷାଧିକ ଟଙ୍କାର ସୁନାଗହଣା ଲୁଟିନେବା ସହିତ ଡାକ୍ତରଙ୍କୁ ମାରଣାସ୍ତ୍ରରେ ଆକ୍ରମଣ କରିଥିବା ଅଭିଯୋଗ ହୋଇଥିଲା । ଘଟଣା ସ୍ଥଳରେ ଗ୍ରାମବାସୀ ପହଞ୍ଚିବାରୁ ଲୁଟେରା ମାନେ ଖସିପଳାଇବାକୁ ଚେଷ୍ଟା କରୁଥିବା ବେଳେ ଦୁଇ ଜଣଙ୍କୁ କାବୁ କରି ପୋଲିସର ଜିମା ଦେଇଥିଲେ ଗ୍ରାମବାସୀ । ପରେ ଏହି ରାକେଟକୁ ଗିରଫ କରିଛି ପୋଲିସ । ଏହି ରାକେଟର ଚେର ଆହୁରି ଅନେକ ବାଟ ଲମ୍ବିଥିବା ନେଇ ସୂଚନା ଦେଇଛି ପୋଲିସ ।

କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକର ଅନ୍ୟତମ ଜୀବନରେଖା ହେଉଛି ରାଜନଗର-ତାଳଚୁଆ ପୂର୍ତ୍ତ ବିଭାଗ ରାସ୍ତା । ଏହି ରାସ୍ତାର ନଳିତାପାଟିଆ ଠାରୁ ତାଳଚୁଆ ପ୍ରଯ୍ୟନ୍ତ ପ୍ରାୟ ୧୨ କି.ମି ୪୫୦ ମିଟର ଗ୍ରାମ୍ୟ ଉନ୍ନୟନ ବିଭାଗ ଅଧିନରେ ଥିବା ରାସ୍ତା ର୍ପୂର୍ତ୍ତ ବିଭାଗକୁ ହସ୍ତାନ୍ତର କରାଯାଇଛି । ହେଲେ ଆଜି ବି ଏହି ରାସ୍ତା ବିପଦ ସଙ୍କୁଳ ଅବସ୍ଥାରେ ରହିଛି । ପ୍ରତିଦିନ ଶହ ଶହ ଗାଡିମୋଟର ଯିବା ଆସିବା କରୁଛି । ରାସ୍ତାରେ ସୃଷ୍ଟି ହୋଇଥିବା ଖାଲ ଖମା ଯୋଗୁଁ ଅନେକ ଦୁର୍ଘଟଣା ଘଟୁଛି ଆଉ ଅନେକ ଲୋକଙ୍କ ଜୀବନ ମଧ୍ୟ ଯାଉଛି ।

ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୨୦୧୭ ମସିହାରେ ୬ କୋଟିରୁ ଉଦ୍ଧ୍ବ ଟଙ୍କା ବ୍ୟୟରେ ଏହି ରାସ୍ତା ନିର୍ମାଣ କରାଯାଇଥିଲା । ନିର୍ମାଣ ସରିବାର ମାସଟିଏ ନପୁରୁଣୁ ଏହି ରାସ୍ତା ତାଡି ହୋଇଯାଇଥିଲା । ୬ ବର୍ଷ ପୂରିବାକୁ ବସିଥିଲେ ମଧ୍ୟ ରାସ୍ତା ନିର୍ମାଣ ଶେଷ ନହେବାରୁ ୨ ରୁ ୩ ଫୁଟ ଖାଲ ହୋଇଯାଇଛି, ଯାହା ଅସରାଏ ବର୍ଷା ହେଲେ ଗାଡିଆର ଭ୍ରମ ସୃଷ୍ଟିକରୁଛି । ଏହି ରସ୍ତା ଉପରେ ଖମାରସାହି, ଡାଙ୍ଗମାଳ, କୃଷ୍ଣନଗର, ତାଳଚୁଆ, ବାଘମାରୀ, ରଙ୍ଗଣୀ ଓ କେରୁଆଁପାଳ ପଚାଂୟତର ୪୦ ହଜାରରୁ ଉଦ୍ଧ୍ୱ ଲୋକ ନିର୍ଭର କରିଥାନ୍ତି । ଏଭଳି ଏକ ସମ୍ବେଦନଶୀଳ ରାସ୍ତାରେ ଗ୍ରାମ୍ୟ ଉନ୍ନୟନ ବିଭାଗ କୋଟିକୋଟି ଟଙ୍କାର କାମ କରିଥିଲେ ମଧ୍ୟ ଏହି ରାସ୍ତାରେ ବସ କିମ୍ବା ଟ୍ରକ ଯିବା ତ ଦୂରର କଥା, ବାଇକଟିଏ ଯିବା କଷ୍ଟକର ହୋଇପଡୁଛି । ମେଡିକାଲକୁ ଆମ୍ବୁଲାନ୍ସ ଗର୍ଭବତୀ ମହିଳାଙ୍କୁ ନେଇ ଯାଉଥିବା ବେଳେ ଏହି ରାସ୍ତାରେ ଫସି ଯାଉଛି । କେବଳ ଆମ୍ବୁଲାନ୍ସ ନୁହେଁ, ଅନେକ ସମୟରେ ଯାତ୍ରୀ ବାହୀ ବସ ମଧ୍ୟ ଏହି ରାସ୍ତାରେ ଫସି ଯାଇଥିବା ଦେଖିବାକୁ ମିଳିଛି ।

ତାଳଚୁଆ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରୁ ଆମ୍ବୁଲାନ୍ସ ସେବା ବନ୍ଦ ହୋଇଯାଇଛି । ଗର୍ଭବତୀ ହେଉ କିମ୍ବା ଗୁରୁତର ରୋଗୀ ଡାଙ୍ଗମାଳ ପର୍ଯ୍ୟନ୍ତ ନିଜ ଚେଷ୍ଟାରେ ଆସିବା ପରେ ଆମ୍ବୁଲାନ୍ସ ସେବା ପାଇବ । ଅପରପକ୍ଷେ ଡାଙ୍ଗମାଳ ଠାରୁ ଡାଲଖାଇ ଛକ ଜଙ୍ଗଲ ପାଶ୍ୱ ର୍ପୂର୍ତ୍ତ ବିଭାଗ ରାସ୍ତା ଅବସ୍ଥା କହିଲେ ନସରେ । ମରାମତି ନାମରେ ବିଭାଗ ଲକ୍ଷାଧିକ ଟଙ୍କା ଚଳୁ କରିଦେଇଛି । ବିଭାଗ ଏହି ରାସ୍ତାର ମରାମତି ନାମରେ ଦୁଇଟି ପର୍ଯ୍ୟାୟରେ ୬୫ ଲକ୍ଷ ଟଙ୍କା ଚଳୁ କରିଦେଇଥିବା ଅଭିଯୋଗ ହୋଇଛି । ଏହି ୭ଟି ପଚାଂୟତର ଲୋକେ ରାସ୍ତାର ଦୂରାବସ୍ଥା ନେଇ ବାରମ୍ବାର ଜିଲ୍ଲାପାଳଙ୍କ ଜନଶୁଣାଣୀ ଶିବିରରେ ଅଭିଯୋଗ କରିଆସୁଥିଲେ ମଧ୍ୟ କିଛି ସୁଫଳ ମିଳିନାହିଁ । ଛାତ୍ର ଛାତ୍ରୀ ମାନେ ମଧ୍ୟ ଉଚ୍ଚଶିକ୍ଷାରୁ ବଂଚିତ ହେଉଥିବା ଅଭିଯୋଗ ହେଉଛନ୍ତି ।

ବ୍ଲକ ସଦର ମହକୁମା ଠାରୁ ୪୦କି.ମି ଦୂରରେ ଥିବା ଏହି ଅଂଚଳରେ ସାମୁଦ୍ରୀକ ଥାନା ଗ୍ରାମ୍ୟ ବ୍ୟାଙ୍କ ଓ ସ୍ୱାସ୍ଥ୍ୟକେନ୍ଦ୍ର ଥିବା ବେଳେ ରାଜନଗର ବ୍ଲକ ତହସିଲ, କଲେଜ ଓ ଜିଲ୍ଲା ସଦର ମହକୁମାକୁ ଯିବା ଆସିବା ପାଇଁ ଅସୁବିଧାର ସମ୍ମୁଖିନ ହେଉଛନ୍ତି । ପ୍ରଶାସନ ଯୁଦ୍ଧକାଳୀନ ଭିତିରେ ଏହି ରାସ୍ତା ଅବସ୍ଥା ନସୁଧାରିଲେ, ସଦର ମହକୁମାଠାରୁ ଏହି ଗାଁ ଗୁଡିକ ଆଗାମୀ ଦିନରେ ବିଛିନ୍ନ ହେବାର ଆଶଙ୍କା ସୃଷ୍ଟି ହେଉଛି । ଅପର ପକ୍ଷରେ ଗମନା ଗମନରେ ଏପରି ଅସୁବିଧା ହେଉଥିବାରୁ ସେମାନେ ବିକଳ୍ପ ଭାବରେ ବିପଦ ସଂକୁଳ ଅବସ୍ଥାରେ ନଦୀ ପାର ହୋଇ ଭଦ୍ରକ ଜିଲ୍ଲା ଉପରେ ଅଧିକ ନିର୍ଭର କରୁଥିବା ଜଣାପଡିଛି । ଏନେଇ କେନ୍ଦ୍ରାପଡା ଅତିରିକ୍ତ ଜିଲ୍ଲାପାଳ ପିତାମ୍ବର ସାମଲଙ୍କୁ ପଚାରିବାରୁ ରାସ୍ତାର ଶୋଚନୀୟ ଅବସ୍ଥା ସ୍ୱୀକାର କରିବା ସହ, ଟେଣ୍ଡର ସରିଛି ଖୁବଶୀଘ୍ର ରାସ୍ତା କାର୍ଯ୍ୟ ଆରମ୍ଭ କରାଯିବ ବୋଲି କହିଛନ୍ତି । ହେଲେ ଲୋକଙ୍କ ଭିତରେ ସେହି ଗୋଟିଏ ପ୍ରଶ୍ନ, ଆମ ପ୍ରତିଶୃତି ସବୁବେଳେ ମିଳୁଛି କିନ୍ତୁ ଫଳ କିଛି ମିଳୁନି ।