Blog

ଭୁବନେଶ୍ଵରେ ପହଞ୍ଚିଲେ ଅମିତ ଶାହା

ଓଡ଼ିଶାରେ ଅମିତ ଶାହ । ସ୍ବତନ୍ତ୍ର ବାୟୁସେନା ବିମାନରେ ଆସି ପହଞ୍ଚିଲେ ଶାହ । ଦିନିକିଆ ଓଡ଼ିଶା ଗସ୍ତରେ ଆସିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ଭୁବନେଶ୍ବର ବିମାନବନ୍ଦରରେ ପହଞ୍ଚିବା ପରେ ସ୍ବାଗତ ଜଣାଇଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ଉପମୁଖ୍ୟମନ୍ତ୍ରୀ ପ୍ରଭାତି ପରିଡା । ବିମାନବନ୍ଦରରୁ ସିଧାସଳଖ କଟକ ମୁଣ୍ଡଳୀସ୍ଥିତ CISFର ୫୭ତମ ପ୍ରତିଷ୍ଠା ଦିବସ କାର୍ଯ୍ୟକ୍ରମରେ ଯୋଗଦେବେ । ଏହାପରେ ପାରଦୀପ ଗସ୍ତରେ ଯିବେ । ସେଠାରେ ଦିନ ୧ଟା ୪୫ ମିନିଟରେ ସଲଫ୍ୟୁରିକ ଏସିଡ ପ୍ଲାଣ୍ଟର ଲୋକାର୍ପଣ କରିବା ପରେ ପାରାଦୀପରେ କାର୍ଯ୍ୟକ୍ରମ ସାରି ଭୁବନେଶ୍ବର ଫେରିବେ ଗୃହ ମନ୍ତ୍ରୀ । ଭୁବନେଶ୍ୱରରେ ଜାତୀୟ ଫୋରେନସିକ୍ ସାଇନ୍ସ ୟୁନିଭର୍ସିଟି (NFSU) ର ସ୍ଥାୟୀ କ୍ୟାମ୍ପସ ପାଇଁ ଶିଳାନ୍ୟାସ କରିବେ ।

ଏହା ସହିତ ଏହାର ଅସ୍ଥାୟୀ କ୍ୟାମ୍ପସକୁ ମଧ୍ୟ ଉଦଘାଟନ କରିବେ । ଏହି ବିଶ୍ୱବିଦ୍ୟାଳୟ ପାଇଁ ଓଡ଼ିଶା ସରକାର ୪୦ ଏକର ଜମି ଯୋଗାଇ ଦେଇଛନ୍ତି । ସେ କେନ୍ଦ୍ରୀୟ ଫୋରେନସିକ୍ ସାଇନ୍ସ ଲାବୋରେଟୋରୀ (CFSL) ର ମଧ୍ୟ ଭୂମି ପୂଜନ କରିବେ । ଭୁବନେଶ୍ୱରରେ ନୂଆ ନ୍ୟାୟ ସଂହିତା ଉପରେ ଏକ ପ୍ରଦର୍ଶନୀର ଉଦଘାଟନ କରିବା ସହ ଏକ ମୋବାଇଲ୍ ଫୋରେନସିକ୍ ଭ୍ୟାନକୁ ପତାକା ଦେଖାଇ ଶୁଭାରମ୍ଭ କରିବେ । ଏହା ସହ ଭର୍ଚୁଆଲ୍ ମାଧ୍ୟମରେ ଅନେକ ନୂଆ ଥାନା ବିଲଡିଂର ଉଦଘାଟନ କରିବେ । ଏହି ଅବସରରେ IIT ଭୁବନେଶ୍ୱର ଏବଂ ରାଷ୍ଟ୍ରୀୟ ରକ୍ଷା ବିଶ୍ୱବିଦ୍ୟାଳୟ ସହ ବୁଝାମଣାପତ୍ର (MoU) ସ୍ୱାକ୍ଷରିତ ହେବ । ସଂଧ୍ୟାରେ ଦିଲ୍ଲୀ ଫେରିଯିବେ। ଶାହଙ୍କ ଗସ୍ତ ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।
ଟି–୨୦ ବିଶ୍ୱକପ୍ ଫାଇନାଲରେ ଭାରତ : ରୋମାଞ୍ଚକର ସେମିଫାଇନାଲରେ ଇଂଲଣ୍ଡକୁ ୭ ରନରେ ପରାସ୍ତ

ଟି–୨୦ ବିଶ୍ୱକପ୍‌ରେ ଟିମ୍ ଇଣ୍ଡିଆ ଚମତ୍କାର ପ୍ରଦର୍ଶନ କରି ଫାଇନାଲକୁ ପ୍ରବେଶ କରିଛି। ରୋମାଞ୍ଚକର ସେମିଫାଇନାଲ ମ୍ୟାଚ୍‌ରେ ଭାରତ ଇଂଲଣ୍ଡକୁ ୭ ରନରେ ପରାସ୍ତ କରି ଚତୁର୍ଥ ଥର ପାଇଁ ଫାଇନାଲ ଟିକେଟ୍ ପକ୍କା କରିଛି। ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ ଶେଷ ଓଭର ପର୍ଯ୍ୟନ୍ତ ରୋମାଞ୍ଚକର ହୋଇଥିଲା।

ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ନିର୍ଦ୍ଧାରିତ ୨୦ ଓଭରରେ ୨୫୩ ରନର ବିଶାଳ ସ୍କୋର ଛିଡ଼ା କରିଥିଲା। ଟିମ୍ ଇଣ୍ଡିଆ ପକ୍ଷରୁ ସଞ୍ଜୁ ସାମସନ ଶାନଦାର ବ୍ୟାଟିଂ କରି ୮୯ ରନ୍ କରିଥିଲେ, ଯାହା ଦଳକୁ ଏକ ମଜବୁତ ସ୍ଥିତିରେ ପହଞ୍ଚାଇଥିଲା। ଏହା ସହିତ ଇଂଲଣ୍ଡ ସମ୍ମୁଖରେ ୨୫୪ ରନର ଲକ୍ଷ୍ୟ ରଖିଥିଲା ଭାରତ। ଲକ୍ଷ୍ୟ ପଛୁଆ କରିବାକୁ ନାମିଥିବା ଇଂଲଣ୍ଡ ଦଳ ମଧ୍ୟ ଜବରଦସ୍ତ ଲଢ଼େଇ କରିଥିଲା। ଇଂଲଣ୍ଡ ପକ୍ଷରୁ ଜ୍ୟାକବ୍ ବେଥେଲ ଐତିହାସିକ ଶତକୀୟ ପାଳି ଖେଳି ଦଳକୁ ମ୍ୟାଚ୍‌ରେ ରଖିଥିଲେ। କିନ୍ତୁ ଶେଷ ପର୍ଯ୍ୟନ୍ତ ଇଂଲଣ୍ଡ ୨୪୬ ରନ୍ କରିବାରେ ସୀମିତ ରହିଥିଲା।

ମ୍ୟାଚ୍‌ର ଶେଷ ତିନି ଓଭରରେ ଇଂଲଣ୍ଡକୁ ଜିତିବା ପାଇଁ ୪୫ ରନର ଆବଶ୍ୟକତା ଥିଲା। ତେବେ ୧୮ତମ ଓଭରରେ ଜସପ୍ରିତ ବୁମରା ମାତ୍ର ୬ ରନ୍ ଦେଇ ମ୍ୟାଚ୍‌ର ମୋଡ଼ ବଦଳାଇ ଦେଇଥିଲେ। ପରବର୍ତ୍ତୀ ଓଭରରେ ହାର୍ଦ୍ଦିକ ପାଣ୍ଡ୍ୟା ମାତ୍ର ୯ ରନ୍ ଦେବା ସହ ସାମ୍ କରନଙ୍କ ଗୁରୁତ୍ୱପୂର୍ଣ୍ଣ ୱିକେଟ୍ ନେଇ ଭାରତଙ୍କ ବିଜୟକୁ ପ୍ରାୟ ନିଶ୍ଚିତ କରିଦେଇଥିଲେ।

ଶେଷ ଓଭରରେ ଇଂଲଣ୍ଡ ଆଉ ମ୍ୟାଚ୍‌କୁ ଫେରିପାରିନଥିଲା ଏବଂ ଭାରତ ୭ ରନରେ ଜିତି ଫାଇନାଲକୁ ପ୍ରବେଶ କରିଛି। ଏହି ବିଜୟ ସହିତ ସୂର୍ଯ୍ୟକୁମାର ଯାଦବଙ୍କ ନେତୃତ୍ୱାଧୀନ “ସୂର୍ଯ୍ୟସେନା” ଟି–୨୦ ବିଶ୍ୱକପ୍ ଟ୍ରଫିରୁ ମାତ୍ର ଗୋଟିଏ ପଦକ୍ଷେପ ଦୂରରେ ରହିଛି।
ରାଇରଙ୍ଗପୁର ରେ ବିଜେଡି ତରଫରୁ ବିଜୁବାବୁଙ୍କ ୧୧୦ ତମ ଜୟନ୍ତୀ ପାଳିତ

ମୟୂରଭଞ୍ଜ ଜିଲ୍ଲାର ରାଇରଙ୍ଗପୁର ଦୁର୍ଗାମଣ୍ଡପ ଛକରେ ବିଜେଡି ତରଫରୁ ରାଇରଙ୍ଗପୁର ନିର୍ବାଚନ ମଣ୍ଡଳୀ ସ୍ତରୀୟ ରାଇରଙ୍ଗପୁର ସହରସ୍ଥ ଦୁର୍ଗାମଣ୍ଡପ ଛକରେ ଥିବା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୧୧୦ ତମ ଜୟନ୍ତୀ ମହାସମାରୋହରେ ପାଳିତ ହୋଇଯାଇଛି । ଉକ୍ତ କାର୍ଯ୍ଯକ୍ରମରେ ରାଇରଙ୍ଗପୁର ମ୍ଯୁନିସିପାଲିଟି ଅଧ୍ଯକ୍ଷ ଅଭିଷେକ ପଟ୍ଟନାୟକ, ଜିଲ୍ଲା କାର୍ଯ୍ଯକାରୀ ସଭାପତି ରାଇସେନ ମୁର୍ମୁ,୨୬ ନଂ ଜୋନ ଜିଲ୍ଲା ପରିଷଦ ସଭ୍ଯ ଭଗବତୀ ମିଶ୍ର, ଉପାଧ୍ଯକ୍ଷା ମମିତା ଚୌଧୂରୀ, ରାଜ୍ଯ ପରିଷଦ ସଦସ୍ଯ ସୁଶାନ୍ତ ଚୌଧୂରୀ, ତିରିଂ ବ୍ଲକ ଅଧ୍ଯକ୍ଷ ପରମେଶ୍ବର ସାମାଡ,୧୬ ନଂ ଜିଲ୍ଲା ପରିଷଦ ସଭ୍ଯ ବାବଲୁ ଟୁଡୁ, ଜିଲ୍ଲା ଉପସଭାପତି ସୁବାଷ ମଣ୍ଡଳ, ପୂର୍ବତନ ଉପଦେଷ୍ଟା ଦୀପ୍ତିମାନ ବଳ, ସମାଜସେବୀ ପାର୍ବତୀ ବିରୁଆ, ମଟକା ବିରୁଆ, ବହଳଦା ବ୍ଲକ ଅଧ୍ଯକ୍ଷ ହରେକୁଷ୍ଣ ମଣ୍ଡଳ, ଯୁବନେତା ସାଜିଦ ହୁସେନ, କ୍ରିଷ୍ଣା ଶର୍ମା, ଗତିକୁଷ୍ଣ ମହାନ୍ତ, ଓ୍ବାର୍ଡମେମ୍ବର ସୁଶାନ୍ତ ମହାନ୍ତ, ଶୁକଦେବ ବେହେରା, ସୁଶାନ୍ତ ମହାନ୍ତ, ଆରତୀ ମାର୍ଣ୍ଡି, ପୂର୍ଣ୍ଣିମା ମହାନ୍ତ, ସୂର୍ଯ୍ଯମଣି ହାଁସଦାଃ, ବିଜୁ ମହିଳା ଜନତା ଦଳ ଜିଲ୍ଲା ସାଧାରଣ ସମ୍ପାଦକ ପୂର୍ଣ୍ଣିମା ମହାନ୍ତି, ମହିଳା ମୋର୍ଚ୍ଚା ରୁବି ମହାକୁଡ ତଥା ଅନ୍ଯମାନେ ଯୋଗ ଦେଇଥିଲେ l

ଏହାପରେ ସ୍ଥାନୀୟ ପିସିଏମ କଲ୍ଯାଣ ମଣ୍ଡପ ଠାରେ ଏକ ସାଧାରଣ ସଭା ଆୟୋଜିତ ହୋଇଥିଲା l ଏଥିରେ ନେତୁମଣ୍ଡଳୀୟ ଲୋକେ ଦଳକୁ କିଭଳି ଶକ୍ତିଶାଳୀ ଓ ସୁଦୁଢ କରାଯାଇପାରିବ , ଏଥିପାଇଁ ସୁଚିନ୍ତିତ ବକ୍ତବ୍ଯ ଦେବା ସହିତ ଆଗାମୀ ପଞ୍ଚାୟତ ଓ ସାଧାରଣ ନିର୍ବାଚନରେ ଦଳକୁ ଜୟଯୁକ୍ତ କରିବା ପାଇଁ ବଜ୍ରଶପଥ ନେଇଥିଲେ l ଉକ୍ତ ଅବସରରେ ଜିଲ୍ଲା କାର୍ଯ୍ଯକାରୀ ସଭାପତି ରାଇସେନ ମୁର୍ମୁ, ଜିଲ୍ଲା ଉପସଭାପତି ସ୍ବରୂପ ବେହେରା, ସୁବାଷ ମଣ୍ଡଳ, ଜିଲ୍ଲା ସାଧାରଣ ସମ୍ପାଦକ ଉତ୍ତମ ମହାପାତ୍ର, ନବୀନ କିଶୋର ମହାନ୍ତ, ପଙ୍କଜ ଦାସ, ପଙ୍କଜ ରାଉତ, ସଚ୍ଚିନ୍ଦ୍ରନାଥ ମହାନ୍ତ, ଜିଲ୍ଲା ସମ୍ପାଦକ କ୍ଷୀରୋଦ ସି, ଚିତରଂଜନ ମହାନ୍ତ, ରବିନ୍ଦ୍ରନାଥ ମାର୍ଣ୍ଡି, ନାରାୟଣ ମହାନ୍ତି, ଫୁଲସାଇ ଡମାନ ମାର୍ଣ୍ଡି, ସୁଧୀର ସାଓ ଓ ଅନୁପ କୁମାର ମହାନ୍ତିଙ୍କୁ ପୁଷ୍ପଗୁଛ ଓ ଉତ୍ତରୀୟ ଦେଇ ସମ୍ଭନ୍ଧିତ କରାଯାଇଥିଲା l ଉକ୍ତ ସଭାରେ ଜିଲ୍ଲା କାର୍ଯ୍ଯକାରୀ ସଭାପତି ରାଇସେନ ମୁର୍ମୁ, ଉପାଧ୍ଯକ୍ଷା ମମିତା ଚୌଧୂରୀ, ରାଜ୍ଯ ପରିଷଦ ସଦସ୍ଯ ସୁଶାନ୍ତ ଚୌଧୂରୀ, ପୂର୍ବତନ ଉପଦେଷ୍ଟା ଦୀପ୍ତିମାନ ବଳ, ଜିଲ୍ଲା ପରିଷଦ ସଭ୍ଯ ବାବଲୁ ଟୁଡୁ, ବହଳଦା ବ୍ଲକ ଅଧ୍ଯକ୍ଷ ହରେକୁଷ୍ଣ ମଣ୍ଡଳ ଓ ବରିଷ୍ଠ ନେତା ବୁଷ୍ଟିବିଡଜା ମଣ୍ଡଳ ବିଜୁ ଜନତା ଦଳ ଉପରେ ସାରଗର୍ଭକ ବକ୍ତବ୍ଯ ପ୍ରଦାନ କରିଥିଲେ l ଏହି ଭବ୍ଯ ସଭା କୁ ଯୁବ ନେତା ସାଜିଦ ହୁସେନ ପରିଚାଳନା କରିଥିଲା ବେଳେ ଜିଲ୍ଲା ଉପସଭାପତି ସୁବାଷ ମଣ୍ଡଳ ଧନ୍ଯବାଦ ଅର୍ପଣ କରିଥିଲେ ।
ଦିନିକିଆ ପାରାଦୀପ ଗସ୍ତରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା

ଦିନିକିଆ ପାରାଦୀପ ଗସ୍ତରେ ଆସୁଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହା। ପାରାଦୀପ ସ୍ଥିତ ଇଫକୋ ପରିସରରେ ନୂତନ କରି ନିର୍ମିତ ହୋଇଥିବା ୨୦୦୦ ମେଟ୍ରିକ ଟନ ସଲଫ୍ୟୁରିକ ଏସିଡ ପ୍ଲାଣ୍ଟଟକୁ ଜାତି ଉଦ୍ଦେଶ୍ୟରେ ଉତ୍ସର୍ଗୀକୃତ କରିବେ କେନ୍ଦ୍ର ଗୃହମନ୍ତ୍ରୀ। ଆସନ୍ତା କାଲି ଦିନ ୨ଟା ୪୫ ମିନିଟ ସମୟରେ ଇଫକୋ ପରିସରରେ ଥିବା ହେଲିପ୍ୟାଡରେ ଓହ୍ଲାଇବା ପରେ ସଲଫ୍ୟୁରିକ ଏସିଡ ପ୍ଲାଟକୁ ଯିବାର କାର୍ଯ୍ୟକ୍ରମ ରହିଛି। ପରେ ଷ୍ଟାଡିୟମ ପରିସରରେ ଏକ ସଭା କାଯ୍ୟରେ ଯୋଗଦେଇ ଉଦ‌ବୋଧନ ଦେବେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା।

ଶୀତତାପ ନିୟନ୍ତ୍ରଣର ଏହି ସଭାଗୃହରେ ପାଖାପାଖି ୫୦୦୦ ଲୋକଙ୍କ ବସିବା ପାଇଁ ସ୍ଥିର କରାଯାଇଥିବା ବେଳେ ଦିଲ୍ଲୀ ଏବଂ କଲିକତାରୁ ଆସିଥିବା ଟେଣ୍ଟ କାରିଗର ମାନେ ଏବଂ ଇଫକୋ କର୍ମଚାରୀ ମାନଙ୍କ ସହ ଯୋଗରେ ୩ ଦିନ ଭିତରେ ନିର୍ମାଣ କରିବା ଏକ ଚ୍ୟାଲେଞ୍ଜ ଥିଲା ବୋଲି ପାରାଦୀପ ଇଫକୋ ୟୁନିଟ ହେଡ ପି.କେ ମହାପାତ୍ର ପ୍ରକାଶ କରିଛନ୍ତି। ଏହି କାଯ୍ୟକ୍ରମରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଓଡିଶାର ମାନ୍ୟବର ମୁଖ୍ୟମନ୍ତ୍ରୀ ମୋହନ ଚରଣ ମାଝି, ଜଗତସିଂହପୁର ସାଂସଦ ବିଭୂପ୍ରସାଦ ତରାଇ, ଶିଳ୍ପମନ୍ତ୍ରୀ ସମ୍ପଦ ସ୍ପାଇଁ, ବାଣିଜ୍ୟ ଓ ପରିବହନ ମନ୍ତ୍ରୀ ବିଭୁତି ଭୁଷଣ ଜେନା ଙ୍କ ସମେତ ଜଗତସିଂହପୁର ବିଧାୟକ ଅମରେନ୍ଦ୍ର ଦାସ ଆସିବାର କାଯ୍ୟକ୍ରମ ରହିଛି ବୋଲି ପାରାଦୀପ ଇଫକୋ ୟୁନିଟ ହେଡ ପି.କେ ମହାପାତ୍ର ପ୍ରକାଶ କରିଛନ୍ତି।
ପାରାଦୀପ ବନ୍ଦରରେ ୫୫ତମ ଜାତୀୟ ସୁରକ୍ଷା ସପ୍ତାହ ପାଳନ: ପଦଯାତ୍ରା ଓ ଡକ୍ ସୁରକ୍ଷା ତାଲିମ ଆୟୋଜିତ

ପାରାଦୀପ ବନ୍ଦର ପକ୍ଷରୁ ୫୫ ତମ ଜାତୀୟ ସୁରକ୍ଷା ସପ୍ତାହ ପାଳନ ହୋଇଯାଇଛି। ଏହି ଅବସରରେ ଚେନ୍ନାଇ ରାଧା ଇଞ୍ଜିନିୟରିଂ କମ୍ପାନୀ ତରଫରୁ ଆୟୋଜିତ ପଦଯାତ୍ରାକୁ ପାରାଦ୍ବୀପ ବନ୍ଦର ଅଧ୍ୟକ୍ଷ ପି.ଏଲ. ହରନାଦ ସବୁଜ ପତାକା ଦେଖାଇ ଉଦ୍‌ଘାଟନ କରିଥିଲେ। ଏହି ସଚେତନତା ପଦଯାତ୍ରା ପ୍ରଶାସନିକ ଭବନରୁ ବାହାରି ବନ୍ଦରର ୪ ନମ୍ବର ଫାଟକ ନିକଟରେ ପହଞ୍ଚିଥିଲା।ବନ୍ଦର ସୁରକ୍ଷା,ସଠିକ୍ ତାଲିମ, ସୁରକ୍ଷା ପ୍ରତି କର୍ମଚାରୀଙ୍କ ମନୋଭାବ ବଦଳାଇବା ଏବଂ ଉପଯୁକ୍ତ ବ୍ୟକ୍ତିଗତ ପ୍ରତିରକ୍ଷା ଉପକରଣ ଯୋଗାଇବା ଉପରେ ବନ୍ଦର ପ୍ରଶାସନ ସର୍ବଦା ଧ୍ୟାନ ଦେଇଆସିଛି। ଆଗକୁ ବନ୍ଦର ମଧ୍ୟରେ କାର୍ଯ୍ୟ କରୁଥିବା ସମସ୍ତ କର୍ମଚାରୀ ଓ ଶ୍ରମିକ ମାନଙ୍କୁ ସୁରକ୍ଷା ଉପରେ ତାଲିମ ଦିଆଯିବ। ସୁରକ୍ଷା ତାଲିମ ନେଇ ନଥିବା କର୍ମଚାରୀ ବା ଶ୍ରମିକ ମାନଙ୍କୁ ବନ୍ଦର ମଧ୍ୟକୁ ପ୍ରବେଶ କରାଇ ଦିଆଯିବ ନାହିଁ ବୋଲି ବନ୍ଦର ଅଧ୍ୟକ୍ଷ ପି.ଏଲ୍.ହରାନାଦ୍ ପ୍ରକାଶ କରିଛନ୍ତି ।

ଏହାଛଡା ପାରାଦୀପ ବନ୍ଦର ପଣ୍ୟ କାରବାର କ୍ଷେତ୍ରରେ ଦେଶର ସର୍ବ ବୃହତ୍ତମ ବନ୍ଦର ଭାବେ ସୁରକ୍ଷା ଉପରେ ସବୁ ସମୟରେ ଧ୍ୟାନ ଦେଇ ଆସୁଛି। ଏହି ସୁରକ୍ଷା ସପ୍ତାହ ପାଳନ ଅବସରରେ ଶପଥ ପାଠ କରିବା ସହିତ ସବୁ ସମୟରେ ପାରାଦୀପ ବନ୍ଦର ସୁରକ୍ଷା ପ୍ରତି ସଚେତନତା କାର୍ଯ୍ୟକ୍ରମ କରି ଆସୁଛି। ସୁରକ୍ଷା ସପ୍ତାହ କାର୍ଯ୍ୟକ୍ରମରେ ବନ୍ଦର ଅଧ୍ୟକ୍ଷ ପିଏଲ୍ ହାରାନାଦ୍ ଙ୍କ ସମେତ ବନ୍ଦରର ବରିଷ୍ଠ ଅଧିକାରୀ ମାନେ ଉପସ୍ଥିତ ଥିଲେ। ସୁରକ୍ଷା ସପ୍ତାହ କାର୍ଯ୍ୟକ୍ରମରେ ଚେନ୍ନାଇ ରାଧା ଇଞ୍ଜିନିୟରିଂ କମ୍ପାନୀ ଅଧିକାରୀ ଓ କର୍ମଚାରୀ ମାନଙ୍କ ସମେତ ବନ୍ଦର କର୍ମଚାରୀ, ଏବଂ ବନ୍ଦର ବ୍ୟବହାରକାରୀ ସଂସ୍ଥା ଙ୍କୁ ନେଇ ଡକ୍ ସୁରକ୍ଷା ତାଲିମ କର୍ମଶାଳା ଆୟୋଜନ କରାଯାଇଛି। ଆସନ୍ତା ଶୁକ୍ରବାର ଏହା ଉଦଯାପିତ ହେବ ବୋଲି ଚେନ୍ନାଇ ରାଧା ଇଞ୍ଜିନିୟରିଂ ର ଅଧିକାରୀ ଏ. ରମେଶ ପ୍ରକାଶ କରିଛନ୍ତି।
ନିଶା କବଳରେ ଯୁବଗୋଷ୍ଠୀ

ଭାରତର ପ୍ରକୃତ ଶକ୍ତି ହେଉଛନ୍ତି ଏହାର ଯୁବଗୋଷ୍ଠୀ। ହେଲେ ଏହି ମେରୁଦଣ୍ଡକୁ ଦୁର୍ବଳ କରି ଦେଶକୁ କ୍ଷତି ପହଞ୍ଚାଇବା ପାଇଁ ବାହ୍ୟ ଶକ୍ତିମାନେ ଏବେ ଅଣ୍ଟା ଭିଡ଼ିଛନ୍ତି। ପଡ଼ୋଶୀ ଦେଶଗୁଡ଼ିକରୁ ଆସୁଥିବା ଅବୈଧ ଡ୍ରଗ୍ସ ଭାରତୀୟ ଯୁବପିଢ଼ିଙ୍କୁ ପଥଭ୍ରଷ୍ଟ କରିବା ପାଇଁ ଏକ ସୁଚିନ୍ତିତ ଯୋଜନା ବୋଲି ମତ ପ୍ରକାଶ ପାଇଛି। ଏହି ପରିପ୍ରେକ୍ଷୀରେ, ସାମାଜିକ ସଂଗଠନ ‘ୱାଦା’ ପକ୍ଷରୁ ଯୁବଗୋଷ୍ଠୀଙ୍କୁ ସଚେତନ କରିବା ପାଇଁ ଏକ ସ୍ୱତନ୍ତ୍ର କର୍ମଶାଳା ଅନୁଷ୍ଠିତ ହୋଇଯାଇଛି।

ପବିତ୍ର ଦୋଳ ପୂର୍ଣ୍ଣିମା ଓ ହୋଲି ଅବସରରେ ସଂଗଠନର ମୁଖ୍ୟ ଗତୀକୃଷ୍ଣ ଶତପଥୀଙ୍କ ଅଧ୍ୟକ୍ଷତାରେ ଏହି କର୍ମଶାଳା ଓ ଅବିର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ଯୋଗ ଦେଇ ଶ୍ରୀ ଶତପଥୀ କହିଛନ୍ତି ଯେ: “ବାହ୍ୟ ଶକ୍ତିମାନେ ଆମରି ଟଙ୍କାରେ ଆମ ଯୁବପିଢ଼ିଙ୍କୁ ନିଶାଗ୍ରସ୍ତ କରି ଆର୍ଥିକ ଲାଭ କରୁଛନ୍ତି ଏବଂ ସେହି ଅର୍ଥକୁ ପୁଣି ଆମ ବିରୋଧରେ ପ୍ରୟୋଗ କରୁଛନ୍ତି। ତେଣୁ ଯୁବଗୋଷ୍ଠୀଙ୍କୁ ରାଷ୍ଟ୍ରୀୟ ହିତ ସମ୍ପର୍କରେ ଅବଗତ କରାଇବା ସହ ନିଶା କବଳରୁ ସେମାନଙ୍କୁ ଓ ସେମାନଙ୍କ ପରିବାରକୁ ରକ୍ଷା କରିବା ଆମର ମୁଖ୍ୟ ଲକ୍ଷ୍ୟ।”

ବିଭିନ୍ନ ଜିଲ୍ଲାରୁ ଆସିଥିବା ସଂଗଠନର ସଦସ୍ୟ ଓ ସ୍ଥାନୀୟ ଯୁବକମାନେ ଡ୍ରଗ୍ସର କୁପ୍ରଭାବ ଉପରେ ବିସ୍ତୃତ ଆଲୋଚନା କରିଥିଲେ। ବର୍ତ୍ତମାନ ସଂଗଠନ ପକ୍ଷରୁ ଶିକ୍ଷାନୁଷ୍ଠାନଗୁଡ଼ିକରେ ଛାତ୍ରଛାତ୍ରୀଙ୍କୁ ସଚେତନ କରାଯାଉଛି। ଆଗାମୀ ଦିନରେ ବିଭିନ୍ନ ଗ୍ରାମାଞ୍ଚଳରେ ଯୁବଗୋଷ୍ଠୀଙ୍କୁ ଏକତ୍ରିତ କରି ସଚେତନତା ସୃଷ୍ଟି କରିବାକୁ ସଂଗଠନ ଲକ୍ଷ୍ୟ ରଖିଛି। ନିଶାମୁକ୍ତ ସମାଜ ଗଠନ ପାଇଁ ‘ୱାଦା’ ସଂଗଠନର ଏହି ପ୍ରୟାସକୁ ସାଧାରଣରେ ବେଶ୍ ପ୍ରଶଂସା କରାଯାଇଛି।
ଗୋଟିଏ ପରେ ଗୋଟିଏ ଦେଶ ହେଉଛନ୍ତି ରକ୍ତମୁଖା

ଦିନକୁ ଦିନ ବଢ଼ିବାରେ ଲାଗିଛି ଯୁଦ୍ଧ ଘନଘଟା | ଗୋଟିଏ ପଟେ ଇରାନ ଅନ୍ୟପଟେ ଇସ୍ରାଏଲ ଓ ଆମେରିକା | ନିଜ ଦେଶକୁ ସୁରକ୍ଷା ଦେବା ପାଇଁ ଇରାନ ତରଫରୁ ସବୁ ପ୍ରକାର ଚେଷ୍ଟା ସତ୍ୱେ ଦେଶର ସର୍ବୋଚ୍ଚ ନେତାଙ୍କୁ ବଞ୍ଚାଇ ପାରିଲାନି ଇରାନ | କାରଣ ଇରାନ କୁ କେବଳ ଇସ୍ରାଏଲ ନୁହେଁ ବରଂ ପଛପଟୁ ଅନେକ ରାଷ୍ଟ୍ର ଛୁରୀ ମାରୁଥିବା କଥା ଏବେ ସାମ୍ନାକୁ ଆସିଛି | ଆମେରିକା , ସାଉଦି ଅରବିଆ ଭଳି ଅନେକ ରାଷ୍ଟ୍ର ଇସ୍ରାଏଲ କୁ ସମସରଥନ ଦେବା ସହ ପରୋକ୍ଷରେ ଇରାନ ସହ ଯୁଦ୍ଧ ଜାରି ରଖିଛନ୍ତି | ଯାହାର ଭୟଙ୍କର ପରିଣାମ ଭୋଗୁଛି ଇରାନ | ଇରାନ ଉପରେ ଆମେରିକା ଓ ଇସ୍ରାଏଲର ଭୟଙ୍କର ଆକ୍ରମଣ ପରେ ଧ୍ୱଂସ ହେଲା ଇରାନ ର IRGC ମୁଖ୍ୟାଳୟ କରି ଦିଆଯାଇଛି | | ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମନେଇଙ୍କ ମୃତ୍ୟୁ ପରେ ପଶ୍ଚିମ ଏସିଆରେ ଯୁଦ୍ଧ ଭୟଙ୍କର ରୂପ ଧାରଣ କରିଛି। ରବିବାର ଆମେରିକା ଏବଂ ଇସ୍ରାଏଲ ପକ୍ଷରୁ ଇରାନର ସାମରିକ ଘାଟିଗୁଡ଼ିକ ଉପରେ ଏକ ଯୋଜନାବଦ୍ଧ ଓ ବଡ଼ ଧରଣର ଆକ୍ରମଣ କରାଯାଇଛି।

ଆମେରିକୀୟ ସେନା ଇରାନର ଶକ୍ତିଶାଳୀ ‘ଇସଲାମିକ୍ ରିଭଲ୍ୟୁସନରୀ ଗାର୍ଡ କର୍ପସ’ ବା IRGC ର ମୁଖ୍ୟାଳୟକୁ ସମ୍ପୂର୍ଣ୍ଣ ଭାବେ ଧ୍ୱଂସ କରିଥିବା ଦାବି କରିଛି। ଆମେରିକାର କେନ୍ଦ୍ରୀୟ କମାଣ୍ଡ ଏହି ଅପରେସନର ଏକ ଭିଡିଓ ଜାରି କରି କହିଛି ଯେ, ଗତ ୪୭ ବର୍ଷ ମଧ୍ୟରେ ହଜାରେରୁ ଅଧିକ ଆମେରିକୀୟଙ୍କ ମୃତ୍ୟୁ ପାଇଁ IRGC ହିଁ ଦାୟୀ ଥିଲା। ସେଣ୍ଟକମ୍ ଏହି ସଫଳ ଅପରେସନକୁ “ସାପର ମୁଣ୍ଡ କାଟି ଦିଆଯାଇଛି” ବୋଲି ବର୍ଣ୍ଣନା କରିବା ସହ ବିଶ୍ୱକୁ ଚେତାବନୀ ଦେଇଛି ଯେ, ଯୁକ୍ତରାଷ୍ଟ୍ର ଆମେରିକା ପାଖରେ ପୃଥିବୀର ସବୁଠାରୁ ଶକ୍ତିଶାଳୀ ସାମରିକ ବାହିନୀ ରହିଛି। ବର୍ତ୍ତମାନ IRGC ର କୌଣସି ଅସ୍ତିତ୍ୱ ବା ମୁଖ୍ୟାଳୟ ବାକି ନାହିଁ ବୋଲି ଆମେରିକା ଦାବି କରିଛି।

ଅନ୍ୟପଟେ, ଇସ୍ରାଏଲ ସେନା ମଧ୍ୟ ଏହି ଆକ୍ରମଣରେ ସାମିଲ ହୋଇ ଇରାନର ୧୨ରୁ ଅଧିକ ଗୁରୁତ୍ୱପୂର୍ଣ୍ଣ ସାମରିକ କେନ୍ଦ୍ରକୁ ଟାର୍ଗେଟ କରିଛି। ଏଥିମଧ୍ୟରେ IRGC ସହ ଜଡିତ ବିଭିନ୍ନ ଗୁପ୍ତଚର ମୁଖ୍ୟାଳୟ।, IRGC ବାୟୁସେନା କମାଣ୍ଡ ସେଣ୍ଟର, ଓ ଇରାନର ଆଭ୍ୟନ୍ତରୀଣ ସୁରକ୍ଷା ମୁଖ୍ୟାଳୟ ରହିଛି |
ରବିବାର ରାତିରେ ତେହେରାନରେ ବଡ଼ ଧରଣର ବିସ୍ଫୋରଣ ଘଟିଥିବା ବେଳେ, ଇରାନ ମଧ୍ୟ ଚୁପ୍ ବସି ନାହିଁ। ଜବାବରେ ଇରାନ ପକ୍ଷରୁ ଇସ୍ରାଏଲ, ସାଉଦି ଆରବର ରାଜଧାନୀ ରିୟାଦ, ଦୁବାଇ ଏବଂ ଉପସାଗରୀୟ ଅଞ୍ଚଳରେ ଥିବା ଆମେରିକୀୟ ସାମରିକ ଘାଟିଗୁଡ଼ିକ ଉପରକୁ ଶତାଧିକ କ୍ଷେପଣାସ୍ତ୍ର ଓ ଡ୍ରୋନ ନିକ୍ଷେପ କରାଯାଇଛି। ଶନିବାର ଖାମନେଇଙ୍କ ମୃତ୍ୟୁ ପରେ ରବିବାର ଦିନସାରା ଜାରି ରହିଥିବା ଏହି ରକ୍ତାକ୍ତ ସଂଘର୍ଷ ଏବେ ସମଗ୍ର ବିଶ୍ୱ ପାଇଁ ଚିନ୍ତାର ବିଷୟ ପାଲଟିଛି।

ଏହି ବଡ ଆକ୍ରମଣରେ ଇରାନ ର 48 ଜଣ ଶୀର୍ଷ ନେତୃତ୍ୱଙ୍କ ମୃତ୍ୟୁ ହୋଇଥିବା ନେଇ ଦାବି କରିଛି ଆମେରିକା | କେବଳ ସେତିକି ନୁହେଁ , ଆମେ ସାପ ର ମୁଣ୍ଡ କାଟି ଦେଇଛୁ ଅର୍ଥାତ ଇରାନ ସର୍ବୋଚ୍ଚ ନେତୃତ୍ୱଙ୍କୁ ମାରିବା ସହ ବଡ଼ ସାମରିକ ଅନୁଷ୍ଠାନ କୁ ଧ୍ବଂସ କରିଥିବା କଥାକୁ ସେ ପରୋକ୍ଷରେ ମାନିଛନ୍ତି | ତେବେ ଆଗକୁ ଏହି ଯୁଦ୍ଧ 4 ସପ୍ତାହ ଧରି ଚାଲିବା ନେଇ ଆକଳନ କରିଛନ୍ତି ଟ୍ରମ୍ପ | ଆଉ ଏହି 28 ଦିନ ଭିତରେ ପୁରା ଇରାନ ମାଟିରେ ମିଶିଯିବା ନେଇ ଚର୍ଚା ଜୋର ଧରିଛି | ତେବେ ଚୀନ ଓ ରୁଷ ଭଳି ବଡ ବଡ଼ ଦେଶ ମଧ୍ୟ ଏହି ଯୁଦ୍ଧରେ ସାମିଲ ହେବା ନେଇ ଆଶଙ୍କା କରାଯାଉଛି | ତେବେ ଆଗକୁ ଦେଖିବାକୁ ବାକି ରହିଲା ଏହି ଯୁଦ୍ଧ କେଉଁ ଆଡକୁ ଗତି କରୁଛି |
ମୋ ସ୍ବାମୀଙ୍କୁ ମାରିଦେଲା ଶିବା ଚମ୍ପତି!

ୟୁଟୁବର ମୃତ୍ୟୁ ଘଟଣାରେ ସମ୍ନାକୁ ଆସିଲା ଭୟଙ୍କର ସତ। ମୁଁହ ଖୋଲିଲେ ରାହୁଲଙ୍କ ସ୍ତ୍ରୀ ତ୍ରିଶ୍ନା , ଦେଲେ ସାଙ୍ଘାତିକ ବୟାନ। ରାହୁଲଙ୍କ ଫୋନ୍ ରେ ରହିଛି ମୃତ୍ୟୁ ପୂର୍ବର ଭିଡିଓ। ଏହା ମର୍ଡର ନୁହେଁ ଯୋଜନା ବଧ ହତ୍ୟା। ପ୍ରଥମ ୨ ମାସ ନଜର ରଖିଲେ। ସୁଯୋଗ ଦେଖି ମାରିଦେଲେ। ଆଉ ଏ ସବୁର ମାଷ୍ଟର ମାଇଣ୍ଡ ଥିଲେ ଶିବା ଚମ୍ପତି। ଶିବା ଫୋନ କରି ଡାକିଲା ମରିଗଲା ପରେ ଛାଡି ପଳେଇଲା। ମୋ ସ୍ୱାମୀଙ୍କୁ ପ୍ରୀ ପ୍ଲାନ୍ କରି ମାରି ଦେଇଛନ୍ତି। ଯୋଉ ମାନେ ତାଙ୍କ ମୃତ୍ୟୁ ପଛରେ ଅଛନ୍ତି ସେମାନେ ଗୋଟି ଗୋଟି କରି ସାମ୍ନାକୁ ଆସିବେ।

ୟୁଟୁବରଙ୍କ ମୃତ୍ୟୁ ପରେ ପରିବାର ଆଖିରୁ ସୁଖୁନି ଲୁହ। ଛୋଟ ଠାରୁ ବଡ ପର୍ଯ୍ୟନ୍ତ ସମସ୍ତଙ୍କ ଆଖିରେ ଲୁହ। ଚାହୁଁ ଚାହୁଁ ୩ ଦିନ ହେଲାଣି । ମୋ ଧନର ମୁଁହ ମୁଁ ଦେଖିନି। ଖାଇବା କଣ ପାଣି ବୁନ୍ଦବି ଯାଉନି। ଏତିକି କହୁ କହୁ ମା ଙ୍କର ବୁଡି ଯାଉଛି ଚେତା। ଆଉ ସେପଟେ ସ୍ତ୍ରୀ ତ୍ରିଷ୍ଣା ଘରର କୋଣ ଅନୁକୋଣ ଚାହୁଁଛନ୍ତି , ସବୁ ସ୍ମୃତିକୁ ଦେଖୁଛନ୍ତି। ଆଉ କଇଁ କଇଁ ହୋଇ କାନ୍ଦୁଛନ୍ତି। କହୁଛନ୍ତି କାହିକିଁ ଅଧା ବାଟରେ ମତେ ଛାଡିଦେଲ । ୭ ଜନ୍ମ ପାଈଁ କଥା ଦେଇଥିଲ । ଆଜି ଏକା କରିଦେଲ। ମୁଁ କେମିତି ବଞ୍ଚିବି , କାହା ପାଇଁ ବଞ୍ଚିବି ? ଏମିତି କହି କୋହ ସମ୍ଭାଳି ପାରୁନାହାନ୍ତି। ତମେ ବେସ୍ତ ହୁଅନା ମୁଁ ତମକୁ ନିଶ୍ଚିନ୍ତ ନ୍ୟାୟ ଦେବି।

ରାହୁଲଙ୍କ ମୃତ୍ୟୁ ପୁର୍ବରୁ ତାଙ୍କ ଫୋନକୁ ଆସିଥିଲା ଧମକ । କୋଉଠି ଅଛି ଶିବା। ଏତେ ସବୁ ଭିତରେ କାହିଁକି ସାମ୍ନାକୁ ଆସୁନି। ନିଜେ ବିପଦରେ ପଡ଼ିଥିବା ବେଳେ ମୋ ସ୍ବାମୀଙ୍କୁ ଡାକୁଥିଲା। ଆଉ ଏବେ ଦେଇ ସାଙ୍ଗ ମାରିବା ପରେବି ତା ପାଖ ମାଡ଼ିଲାନି। କି ସାମ୍ନାକୁ ଆସି ସାକ୍ଷୀ ବି ଦେଲାନି। ଏମିତି କହି ସଂଘାତିକ ଅଭିଯୋଗ ଆଣିଛନ୍ତି ରାହୁଲଙ୍କ ସ୍ତ୍ରୀ। ଖବର ଅନୁସାରେ ରାଜଧାନୀରେ ୟୁଟ୍ୟୁବର ହତ୍ୟା ମାମଲାରେ ୩ ଜଣଙ୍କୁ ଗିରଫ କରାଯାଇଛି। ଜଣେ ଯବାନ ଓ ତାଙ୍କର ଦୁଇ ପୁତୁରାକୁ କମିଶନରେଟ୍ ପୁଲିସ୍‌ ଗିରଫ କରିଛି। ରସୁଲଗଡ଼ ନିକଟ ଜିଜିପି କଲୋନୀରେ ଶନିବାର ବିଳମ୍ବିତ ରାତିରେ ରାହୁଲଙ୍କୁ ନିର୍ମମ ଭାବେ ହତ୍ୟା କରାଯାଇଥିଲା। ସେ ଜଣେ ୟୁଟ୍ୟୁବ ବ୍ଲଗର। ତେବେ ରାହୁଲଙ୍କୁ ରକ୍ତ ଜଡ଼ୁଜୁଡ଼ୁ ଅବସ୍ଥାରେ ତୁରନ୍ତ ସ୍ଥାନୀୟ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ପରେ ଅବସ୍ଥା ସଙ୍କଟାପର୍ଣ୍ଣ ହେବାରୁ ତାଙ୍କୁ କ୍ୟାପିଟାଲ ହସ୍ପିଟାଲ ସ୍ଥାନାନ୍ତର କରାଯାଇଥିଲା। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ତେବେ କମିଶନରେଟ୍ ପୁଲିସ୍ ଏହି ଘଟଣାରେ ୩ ଜଣଙ୍କୁ ଗିରଫ କରିଛି। ଆଉ ରାହୁଲ ସ୍ତ୍ରୀଙ୍କ ଏଭଳି ବୟାନ ପରେ ଘଟଣା କେଉଁ ମୋଡ଼ ନେଉଛି ତାହା ଦେଖିବାକୁ ବାକି ରହିଲା।
ମୁମ୍ବାଇ ୱାଙ୍ଖଡେ ଷ୍ଟାଡିୟମରେ ଉଚ୍ଚ ତାପମାନର ଟି-୨୦ ବିଶ୍ୱକପ୍‌ ସେମିଫାଇନାଲ୍‌: ୫ ମାର୍ଚ୍ଚରେ ଭାରତ ବିରୁଦ୍ଧ ଇଂଲଣ୍ଡ

ମୁମ୍ବାଇର ଐତିହାସିକ ୱାଙ୍ଖଡେ ଷ୍ଟାଡିୟମ ଆଉ ଏକ ବଡ଼ ମ୍ୟାଚ୍ ପାଇଁ ପ୍ରସ୍ତୁତ। ୨୦୨୬ ଟି-୨୦ ବିଶ୍ୱକପ୍ ର ଦ୍ୱିତୀୟ ସେମିଫାଇନାଲ ଭାରତ ଏବଂ ଇଂଲଣ୍ଡ ମଧ୍ୟରେ ମାର୍ଚ୍ଚ ୫ ତାରିଖରେ ଖେଳାଯିବ। ଉଭୟ ଦଳ ପ୍ରଭାବଶାଳୀ ପ୍ରଦର୍ଶନ ବଳରେ ଏହି ପର୍ଯ୍ୟାୟରେ ପହଞ୍ଚିଛନ୍ତି। ଏବେ ପ୍ରଶ୍ନ ଉଠୁଛି: ଏହି ହାଇ-ଭୋଲଟେଜ୍ ମ୍ୟାଚ୍‌ରେ ଟିମ୍ ଇଣ୍ଡିଆର ପ୍ଲେଇଂ ଇଲେଭେନ୍ କିପରି ପ୍ରଦର୍ଶନ କରିବ ?

ସମ୍ଭାବନା ହେଉଛି ଯେ ଅଭିଷେକ ଶର୍ମା ଏବଂ ସଞ୍ଜୁ ସାମସନ ଭାରତ ପାଇଁ ଇନିଂସ ଓପନିଂ କରିବେ। ସଞ୍ଜୁ ସାମସନ ଗତ ସୁପର 8 ମ୍ୟାଚ୍ ରେ ଚମତ୍କାର 97 ରନ କରି ଦଳକୁ ବିଜୟୀ କରାଇଥିଲେ। ସେ ବର୍ତ୍ତମାନ ପୁରା ଫରମରେ ଏବଂ ଇଂଲଣ୍ଡର ବୋଲରମାନଙ୍କ ପାଇଁ ଘାତକ ହୋଇପାରନ୍ତି। ଅନ୍ୟପକ୍ଷରେ,ଦେଖିବାକୁଗଲେ ଅଭିଷେକ ଶର୍ମା ଏପର୍ଯ୍ୟନ୍ତ ସେମିତି କିଛି ଚମତ୍କାର ଦେଖାଇ ନାହାଁନ୍ତି,ହେଲେ ବଡ଼ ମ୍ୟାଚ୍ ପ୍ରାୟତଃ ବଡ଼ ଖେଳାଳିମାନଙ୍କୁ ସୁଯୋଗ ଦେଇଥାଏ। ସେମିଫାଇନାଲ ତାଙ୍କ ପାଇଁ ପୁନରାଗମନର ପ୍ଲାଟଫର୍ମ ହୋଇପାରେ।
ମଧ୍ୟକ୍ରମ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ ବହନ କରିବ।

ଏହି ଟୁର୍ଣ୍ଣାମେଣ୍ଟରେ ଭାରତର ମଧ୍ୟକ୍ରମ ଦଳ ସବୁଠାରୁ ବଡ଼ ଶକ୍ତି ହୋଇଛି। ଅଧିନାୟକ ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ, ଏଥିରେ ଇଶାନ କିଷାନ, ତିଲକ ବର୍ମା, ଶିବମ ଦୁବେ, ହାର୍ଦ୍ଦିକ ପାଣ୍ଡ୍ୟା ଏବଂ ଅକ୍ଷର ପଟେଲଙ୍କ ଭଳି ଖେଳାଳି ଅଛନ୍ତି। ଆବଶ୍ୟକ ହେଲେ ଏହି ସମସ୍ତ ବ୍ୟାଟସମ୍ୟାନ୍ ଶୀଘ୍ର ସ୍କୋର କରିପାରିବେ। ୱାଙ୍ଖଡେ ପିଚ୍ ବ୍ୟାଟିଂ ପାଇଁ ଅନୁକୂଳ ବୋଲି ବିବେଚନା କରାଯାଏ। ଯଦି ଓପନରମାନେ ଭଲ ଆରମ୍ଭ କରନ୍ତି, ତେବେ ମଧ୍ୟକ୍ରମ ମ୍ୟାଚ୍ କୁ ସମ୍ପୂର୍ଣ୍ଣ ଭାବରେ ଭାରତ ସପକ୍ଷରେ ବଦଳାଇ ପାରିବେ। ହାର୍ଦ୍ଦିକ ପାଣ୍ଡ୍ୟା ଏବଂ ଶିବମ ଦୁବେ ଫିନିସର ଭାବରେ ଗୁରୁତ୍ୱପୂର୍ଣ୍ଣ ପ୍ରମାଣିତ ହୋଇପାରିବେ ଜସପ୍ରିତ ବୁମରାହ ବୋଲିଂ ଆକ୍ରମଣର ନେତୃତ୍ୱ ନେବେ। ବୁମରାହ ସମଗ୍ର ଟୁର୍ଣ୍ଣାମେଣ୍ଟରେ ତାଙ୍କର ଉତ୍କୃଷ୍ଟ ଲାଇନ୍ ଏବଂ ଲେନ୍ଥ ସହିତ ବ୍ୟାଟସମ୍ୟାନମାନଙ୍କୁ ଅସୁବିଧାରେ ପକାଇଛନ୍ତି। ନୂତନ ବଲ୍ ସହିତ ୱିକେଟ୍ ନେବା ପାଇଁ ଅର୍ଶଦୀପ ସିଂହ ତାଙ୍କ ସହିତ ଯୋଗଦାନ କରିବେ।ସେହିଭଳି ସ୍ପିନ୍ ବିଭାଗରେ ବରୁଣ ଚକ୍ରବର୍ତ୍ତୀ ଗୁରୁତ୍ୱପୂର୍ଣ୍ଣ ଭୂମିକା ନେଇପାରନ୍ତି । ଅକ୍ଷର ପଟେଲ ମଧ୍ୟ ମିଡିଅମ ସ୍ପିନର ଚାପ ପକାଇବେ । ଆବଶ୍ୟକ ହେଲେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଅତିରିକ୍ତ ଓଭର ଯୋଗାଇ ପାରିବେ।

ସାମଗ୍ରିକ ଭାବରେ,ଦଳ ସନ୍ତୁଳିତ ଦେଖାଯାଉଛି। ବ୍ୟାଟିଂ ଗଭୀର ଏବଂ ବୋଲିଂ ଅଭିଜ୍ଞ। ଏହି ସମ୍ଭାବ୍ୟ ପ୍ଲେଇଂ ଇଲେଭେନ ଇଂଲଣ୍ଡର ଚ୍ୟାଲେଞ୍ଜକୁ ପରାସ୍ତ କରି ଫାଇନାଲରେ ସ୍ଥାନ ସୁରକ୍ଷିତ କରିପାରିବ କି ନାହିଁ ତାହା ଦେଖିବା ଆକର୍ଷଣୀୟ ହେବ।
ପାଟନା ଛାଡ଼ି ଦିଲ୍ଲୀ ଯିବେ ନୀତୀଶ କୁମାର! ବିହାର ରାଜନୀତିରେ ବଡ଼ ପରିବର୍ତ୍ତନ ସଙ୍କେତ

ବିହାର ରାଜନୀତିରେ ଆସିପାରେ ବଡ଼ ପରିବର୍ତ୍ତନ। ମୁଖ୍ୟମନ୍ତ୍ରୀ ନୀତୀଶ କୁମାର ପାଟନା ଛାଡ଼ି ଦିଲ୍ଲୀ ରାଜନୀତିକୁ ଯିବେ ବୋଲି ଚର୍ଚ୍ଚା ଜୋର ଧରିଛି। ସୂତ୍ର ଅନୁସାରେ ସେ ରାଜ୍ୟସଭାକୁ ପଠାଯାଇପାରନ୍ତି। ଏହା ସହିତ ବିହାରରେ ସରକାରୀ ସଂରଚନାରେ ବଡ଼ ପରିବର୍ତ୍ତନ ହେବାର ସମ୍ଭାବନା ଦେଖାଦେଇଛି।

ଖବର ଅନୁଯାୟୀ, ନୀତୀଶ କୁମାର ଦିଲ୍ଲୀ ଯାଇଥିଲେ ତାଙ୍କ ପୁଅ ନିଶାନ୍ତ କୁମାରଙ୍କୁ ଉପମୁଖ୍ୟମନ୍ତ୍ରୀ ପଦ ଦିଆଯାଇପାରେ। ସେହିପରି ମୁଖ୍ୟମନ୍ତ୍ରୀ ପଦଟି ଭାରତୀୟ ଜନତା ପାର୍ଟି (ବିଜେପି) ହାତକୁ ଯିବା ନେଇ ମଧ୍ୟ ଚର୍ଚ୍ଚା ଚାଲିଛି। ଏହାକୁ ନେଇ ଜନତା ଦଳ (United) କାର୍ଯ୍ୟାଳୟରେ ଗୁରୁତ୍ୱପୂର୍ଣ୍ଣ ବୈଠକ ବସିଥିବା ସୂଚନା ମିଳିଛି।

ଆଜି ନୀତୀଶ କୁମାର ରାଜ୍ୟସଭା ପାଇଁ ନାମାଙ୍କନ ପତ୍ର ଦାଖଲ କରିପାରନ୍ତି ବୋଲି ରାଜନୈତିକ ମହଳରେ ଆଲୋଚନା ଚାଲିଛି। ସେହିପରି ନିତିନ ନବୀନ ମଧ୍ୟ ଆଜି ନାମାଙ୍କନ ଦାଖଲ କରିବେ। ପ୍ରାର୍ଥୀପତ୍ର ଦାଖଲ ସମୟରେ କେନ୍ଦ୍ରୀୟ ଗୃହମନ୍ତ୍ରୀ ଅମିତ ସାହ ଉପସ୍ଥିତ ରହିପାରନ୍ତି ବୋଲି ସୂତ୍ରରୁ ଖବର ମିଳିଛି।ଯଦି ଏହି ପରିବର୍ତ୍ତନ ଘଟେ, ତେବେ ବିହାର ରାଜନୀତିରେ ଏହା ଗୋଟିଏ ବଡ଼ ରାଜନୈତିକ ଘଟଣା ହିସାବରେ ଦେଖାଯିବ।