Blog

କଟକ: ତାଳଦଣ୍ଡା କେନାଲକୁ ଖସିଲା କାର୍, ଜଣଙ୍କ ମୃତ୍ୟୁ
ବେଲାରୁଷ ରାଷ୍ଟ୍ରପତିଙ୍କ ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ

ବେଲାରୁଷ୍‌ର ରାଷ୍ଟ୍ରପତି ଆଲେକ୍‌ଜେଣ୍ଡର୍‌ ଲୁକାସେଙ୍କୋ ଗୁରୁତର। ରୁଷ ରାଷ୍ଟ୍ରପତି ଭ୍ଲାଦିମିର୍‌ ପୁଟିନ୍‌ଙ୍କୁ ଭେଟିବା ପରେ ଗୁରୁତର ଅସୁସ୍ଥ ଲୁକାସେଙ୍କୋଙ୍କୁ ମସ୍କୋର ଏକ ଡାକ୍ତରଖାନାରେ ଭର୍ତ୍ତି କରାଯାଇଛି। ଏନେଇ ବେଲାରୁଷ୍‌ ବିରୋଧୀ ଦଳ ନେତା ଭାଲେରି ସେପ୍‌କାଲୋ ଟୁଇଟ କରି କହିଛନ୍ତି। ତେବେ ସୁକାସେଙ୍କୋଙ୍କୁ ବିଷ ଦିଆଯାଇଥିବା କୁହାଯାଉଛି। ସେପ୍‌କାଲୋଙ୍କ ତଥ୍ୟ ଆନୁଯାୟୀ , ପୁଟିନ୍‌ଙ୍କୁ ଭେଟିବା ପରେ ଲୁକାସେଙ୍କୋଙ୍କ ସ୍ବାସ୍ଥ୍ୟାବସ୍ଥା ବିଗିଡି ଯାଇଥିଲା ଓ ତାଙ୍କୁ ତୁରନ୍ତ ମସ୍କୋର ସେଣ୍ଟ୍ରାଲ୍‌ କ୍ଲିନିକାଲ୍‌ ହସ୍ପିଟାଲରେ ଭର୍ତ୍ତି କରାଯାଇଛି। ସେଠାରେ ତାଙ୍କ ସ୍ଥିତି ସଙ୍କଟାପନ୍ନ ରହିଛି।

ପ୍ରାଥମିକ ସୂଚନା ଅନୁସାରେ, ପୁଟିନଙ୍କ ସହିତ ରୁଦ୍ଧଦ୍ବାର ବୈଠକ ପରେ ଲୁକାସେଙ୍କୋଙ୍କୁ ତତ୍‌କ୍ଷଣାତ୍‌ ମସ୍କୋର ‘ସେଣ୍ଟ୍ରାଲ୍‌ କ୍ଲିନିକାଲ୍‌ ହସ୍ପିଟାଲ୍‌’କୁ ନିଆଯାଇଥିଲା। ସମ୍ପ୍ରତି ସେ ଚିକିତ୍ସାଧୀନ ଅଛନ୍ତି। ବରିଷ୍ଠ ଡାକ୍ତରମାନେ ତାଙ୍କୁ ବଞ୍ଚାଇବାକୁ ଆପ୍ରାଣ ଉଦ୍ୟମ ଜାରି ରଖିଛନ୍ତି। ସେଠାରେ ତାଙ୍କ ରକ୍ତ ପରିଷ୍କରଣ ପ୍ରକ୍ରିୟା ଜାରି ରହିଛି ଓ ବର୍ତ୍ତମାନ ସେ ହସ୍ପିଟାଲରୁ ମୁକୁଳିବା ଅବସ୍ଥାରେ ନ ଥିବା କହିଛନ୍ତି ସେପକାଲୋ।

ସେ ଆଗକୁ ଆହୁରି କହିଛନ୍ତି କି, ବେଲାରୁଷ୍‌ର ଏକଚ୍ଛତ୍ରବାଦୀ ରାଷ୍ଟ୍ରପତି ଲୁକାସେଙ୍କୋଙ୍କ ଜୀବନ ରକ୍ଷା ପାଇଁ ବ୍ୟାପକ ବ୍ୟବସ୍ଥା କରାଯାଇଛି। କେହି ତାଙ୍କୁ ବିଷ ଦେଇଥିବା ସନ୍ଦେହ କରାଯାଉଥିବା ବେଳେ ଏଥିରେ କ୍ରେମ୍‌ଲିନ୍‌ଙ୍କ ସମ୍ପୃକ୍ତି ଥିବା କୁହାଯାଉଛି। ତେବେ ଗତ କିଛି ଦିନ ହେବ ବେଲାରୁଷ ରାଷ୍ଟ୍ରପତି ଅସୁସ୍ଥ ଥିବା ବିଭିନ୍ନ ଗଣମାଧ୍ୟମରେ ଚର୍ଚ୍ଚା ହେଉଛି। ସେଠାକାର ଗଣମାଧ୍ୟମ ତଥ୍ୟ ମୁତାବକ, ମେ ୯ ତାରିଖରେ ଲୁକାସେଙ୍କୋ ରୁଷ୍‌ ବିଜୟ ଦିବଲ ପାରେଡରେ ଯୋଗ ଦେବାକୁ ଯାଇଥିଲେ। ପରେଡ୍‌ ଶେଷ ହେବା କ୍ଷଣି ସ୍ବଦେଶକୁ ଫେରିଆସିଥିଲେ। ସେ କ୍ଲାନ୍ତ ଓ ଅବସ ଦେଖାଯାଉଥିଲେ। ତାଙ୍କ ଡାହାଣ ହାତରେ ବ୍ୟାଣ୍ଡେଜ୍‌ ଗୁଡ଼ା ହୋଇଥିଲା।

କିନ୍ତୁ, ସେଦିନ ମସ୍କୋରୁ ଫେରିବା ପରେ ନିଜ ଦେଶରେ ବିଜୟ ଦିବସ ପାଳନ ଅବସରରେ ଲୁକାସେଙ୍କୋ କହିଥିଲେ, ବନ୍ଧୁଗଣ, ମୁଁ ମରି ଯିବିନାହିଁ। ଆଗକୁ ମୋ ସହିତ ଆପଣମାନଙ୍କୁ ବହୁଦିନ ଧରି ସଂଗ୍ରାମ କରିବାକୁ ପଡ଼ିବ। ମତେ ସାମାନ୍ୟ ଥଣ୍ଡା ହୋଇଛି। ଭଲ ହେବା ପାଇଁ ୩ ଦିନ ଲାଗିବ।

ସୂଚନା ଯୋଗ୍ୟ, ରୁଷ –ୟୁକ୍ରେନ ଯୁଦ୍ଧ ପାଇଁ ସାରା ବିଶ୍ୱର ବିଭିନ୍ନ ଦେଶ ରୁଷକୁ ବିରୋଧ କରୁଥିବା ବେଳେ କିନ୍ତୁ ବେଲାରୁଷ ପୁଟିନଙ୍କୁ ସମର୍ଥନ କରୁ ଆସୁଥିଲେ। ଏମିତି କି, ୟୁକ୍ରେନ ସହ ଯୁଦ୍ଧ ପାଇଁ ଲୁକାସେଙ୍କୋ ବେଲାରୁଷକୁ ରୁଷର ଲଞ୍ଚ ପ୍ୟାଡ ଭାବେ ବ୍ୟବହାର କରିବାକୁ ଅନୁମତି ଦେଇଥିଲେ। କିନ୍ତୁ ବର୍ତ୍ତମାନ ତାଙ୍କ ସ୍ୱାସ୍ଥ୍ୟାବସ୍ଥା ପାଇଁ କୁହାଯାଉଛି କି, ରୁଷର ସିକ୍ରେଟ ସର୍ଭିସ ପକ୍ଷରୁ ତାଙ୍କୁ ବିଷ ଦିଆଯାଇଛି। ଏଥିରେ ଷଡଯନ୍ତ୍ର ଥିଓରି କାମ କରୁଥିବା କୁହାଯାଉଛି।

୧୯୯୪ରୁ ବେଲାରୁଷର ରାଷ୍ଟ୍ରପତି ଭାବେ କାର୍ଯ୍ୟ କରୁଛନ୍ତି।
ସଂସଦ ଭବନକୁ ନେଇ ପ୍ରଧାନମନ୍ତ୍ରୀଙ୍କୁ କଟାକ୍ଷ କଲେ କପିଲ ସିବଲ

ନୂତନ ସଂସଦ ଭବନର ଉଦଘାଟନୀ ଉତ୍ସବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଟିପ୍ପଣୀକୁ ନେଇ କଟାକ୍ଷ କରିଛନ୍ତି ରାଜ୍ୟସଭା ସାଂସଦ କପିଲ ସିବଲ । ସେ କହିଛନ୍ତି ଯେ, ଇଟା ଏବଂ ଗୁଡିରେ ନୁହେଁ, ବରଂ ୧୪୦ କୋଟି ଲୋକଙ୍କ ଚିନ୍ତାଧାରା ଏବଂ ଆକାଂକ୍ଷା ସହିତ ସ୍ୱାଧୀନତାର ବିଚାର ଏକ “ନୂତନ ଭାରତ”ର ଗଠନ କରିପାରିବ ।

ନୂତନ ସଂସଦ ଭବନର ଉଦଘାଟନକୁ ଦେଶର ବିକାଶ ଯାତ୍ରାରେ ଏକ ଅମର ମୁହୂର୍ତ୍ତ ବୋଲି ବର୍ଣ୍ଣନା କରି ପ୍ରଧାନମନ୍ତ୍ରୀ ମୋଦୀ ରବିବାର ଦିନ ଦାବି କରିଛନ୍ତି ଯେ, ଏହା ଏକ ଆତ୍ମନିର୍ଭରଶୀଳ ତଥା ବିକଶିତ ଭାରତର ପ୍ରଭାତକୁ ଚିହ୍ନିତ କରିବ ଯାହା ଅନ୍ୟ ଦେଶର ବିକାଶ ପାଇଁ ପ୍ରେରଣା ଯୋଗାଇବ । ପ୍ରଧାନମନ୍ତ୍ରୀ ମୋଦୀ ସମ୍ବୋଧିତ କରି କହିଥିଲେ ଯେ, ନୂତନ ସଂସଦ ଗୃହ “ନୂତନ ଭାରତ”ର ଶିଖର ହାସଲ କରିବା ଦିଗରେ କାର୍ଯ୍ୟ କରିବାକୁ ଇଚ୍ଛା ଏବଂ ସଂକଳ୍ପକୁ ପ୍ରତିଫଳିତ କରିଛି ।

ଉଦ୍ଘାଟନୀ ସମାରୋହରେ ପ୍ରଧାନମନ୍ତ୍ରୀଙ୍କ ମନ୍ତବ୍ୟକୁ ଦର୍ଶାଇ ସିବଲ କହିଛନ୍ତି ଯେ, ସ୍ବାଧୀନତାର ଚିନ୍ତାଧାରା ମୋର ନୂତନ ଭାରତକୁ ଇଟା, ମାଟିରେ ନୁହେଁ, ବରଂ ୧୪୦ କୋଟି ଲୋକଙ୍କ ଚିନ୍ତାଧାରା ଏବଂ ଆକାଂକ୍ଷା ଦ୍ୱାରା ନିର୍ମାଣ ହୋଇପାରିବ । ଯେଉଁଠାରେ ନୂତନ ଚିନ୍ତାଧାରା ବିକଶିତ ହୋଇଥାଏ ଏବଂ ସମସ୍ତ ପ୍ରକାରର ରଙ୍ଗ ବୁଣି ହୋଇଥାଏ । କିନ୍ତୁ ଅସହିଷ୍ଣୁ, ଗେରୁଆ ଆଉ ହିଂସା ନୁହେଁ ।

ସଂଯୁକ୍ତ ପ୍ରଗତିଶୀଳ ଆଲାଏନ୍ସର ପ୍ରଥମ ଏବଂ ଦ୍ୱିତୀୟ ସରକାର ସମୟରେ କେନ୍ଦ୍ର ମନ୍ତ୍ରୀ ଥିବା ସିବଲ ଗତ ବର୍ଷ ମେ ମାସରେ କଂଗ୍ରେସ ଛାଡିଥିଲେ । ସମାଜବାଦୀ ପାର୍ଟିର ସମର୍ଥନରେ ସିବଲ ରାଜ୍ୟସଭାର ଜଣେ ସ୍ୱାଧୀନ ସଦସ୍ୟ ଭାବରେ ନିର୍ବାଚିତ ହୋଇଥିଲେ । ନିକଟରେ ସେ ‘ଇନସାଫ୍’ ନାମକ ଏକ ପ୍ଲାଟଫର୍ମ ଆରମ୍ଭ କରିଛନ୍ତି । ତାଙ୍କ କହିବାନୁସାରେ, ଏହି ପ୍ଲାଟଫର୍ମର ଉଦ୍ଦେଶ୍ୟ ହେଉଛି ଅନ୍ୟାୟ ବିରୁଦ୍ଧରେ ଲଢିବା ।
ଜୁଲାଇରେ ଲଞ୍ଚ ହେବ ଚନ୍ଦ୍ରାୟନ-୩, ଆବଶ୍ୟକ ପରୀକ୍ଷଣ ଶେଷ

ଇଣ୍ଡିଆନ ସ୍ପେସ ରିସର୍ଚ୍ଚ ଅରଗାନାଇଜେସନ ବା ଇସ୍ରୋ ପକ୍ଷରୁ ଆଉ ଏକ ପଦକ୍ଷେପ । ଆସନ୍ତା ଜୁଲାଇରେ ଲଞ୍ଚ ହେବ ଚନ୍ଦ୍ରାୟନ-୩ । ଏହାକୁ ଲଞ୍ଚ କରିବା ପାଇଁ ଜୋରଦାର ପ୍ରସ୍ତୁତି କରିଛି ଇସ୍ରୋ । ଚନ୍ଦ୍ରାୟନ-୨ ମିଶନରୁ ଯାହା ଶିକ୍ଷା ମିଳିଛି ଏବଂ ବିଶ୍ବସ୍ତରୀୟ ବିଶେଷଜ୍ଞଙ୍କ ପରାମର୍ଶକୁ ଆଧାର କରି ଚନ୍ଦ୍ରାୟନ-୩ର ପରୀକ୍ଷଣ କରାଯାଇଛି । ଚନ୍ଦ୍ରାୟନ-୨ ମିଶନ ବେଳେ ଲ୍ୟାଣ୍ଡର ବିକ୍ରମ ଲୁନାର ସରଫେସରେ କ୍ରାସ୍‌ ହୋଇଯାଇଥିଲା । ସମସ୍ତ ଉଦ୍ୟମ ଫେଲ୍ ମାରିଥିଲା । ହେଲେ ଚନ୍ଦ୍ରାୟନ-୨ରେ ଚନ୍ଦ୍ର ପୃଷ୍ଠକୁ ପଠାଯାଇଥିବା ଅର୍ବିଟର ଏବେ ବି ସଫଳତାର ସହ କାର୍ଯ୍ୟ କରୁଛି ବୋଲି ଇସ୍ରୋ ପକ୍ଷରୁ କୁହାଯାଇଛି ।

ଚନ୍ଦ୍ରାୟନ-୩ର ଲଞ୍ଚ ପୂର୍ବରୁ ସମସ୍ତ ପରୀକ୍ଷଣ ଶେଷ ହୋଇଛି । ଆସନ୍ତା ଜୁଲାଇରେ ଲଞ୍ଚ ହେବା ଯୋଜନା ରଖାଯାଇଛି । ଏ ନେଇ ସୂଚନା ଦେଇଛନ୍ତି ଇଣ୍ଡିଆନ ସ୍ପେସ ରିସର୍ଚ୍ଚ ଅରଗାନାଇଜେସନ ବା ଇସ୍ରୋ ମୁଖ୍ୟ ଏସ୍ ସୋମନାଥ । LVM3 ରକେଟ ଯୋଗେ ଆନ୍ଧ୍ରପ୍ରଦେଶ ଶ୍ରୀହରିକୋଟାରୁ ଉତକ୍ଷେପଣ କରାଯିବ ବୋଲି ସେ ସୂଚନା ଦେଇଛନ୍ତି । ଦୀର୍ଘ ଚାରି ବର୍ଷ ପରେ ପୁଣି ଥରେ ଚନ୍ଦ୍ର ଅଭିମୁଖେ ଯାତ୍ରା ଆରମ୍ଭ କରିବ ଭାରତ ।
୧୩ ଦିନ ବେଦି ଜଗିବା ପରେ ଫେରାର କନିଆ ନେଇ ବର ଫେରିଲା ଘରକୁ

ଗୋଟିଏ ବିବାହକୁ କେତେ ଦିନ ଲାଗେ ପଚରା ଗଲେ ସମସ୍ତେ କହିବେ ଦିନେ କି ଦୁଇ ଦିନ। ହେଲେ ରାଜସ୍ଥାନର ପାଲିରେ ଗୋଟିଏ ବିବାହ ସରି ବିଦାବିଦିକୁ ଲାଗିଗଲା ୧୩ ଦିନ। ୩ ତାରିଖରେ ବାହାଘରର ଅଧା କର୍ମ ସରିଥିଲେ ବି କନ୍ୟା ବିଦା ହେଲା ୧୬ ତାରିଖରେ। ଭାବୁ ଥିବେ କେଉଁଠି କିଛି ଅଘଟଣ ହେଇଗଲା କି? ହେଲେ ସେମିତି କିଛି ହେଉ ନ ଥିଲା। ବରଂ ଅଧା ବାହାଘରରୁ କନିଆ ହୋଇଯାଇଥିଲା ଫେରାର। ତା ପରେ ବରର ଜିଦି ପରେ କନ୍ୟାକୁ ଖୋଜିବାକୁ ଲାଗିଥିଲା ୧୩ ଦିନ। ଏହି ଘଟଣାକୁ ନେଇ ରାଜ୍ୟବ୍ୟାପୀ ଚାଲିଛି ଚର୍ଚ୍ଚା।

ରାଜସ୍ଥାନର ପାଲି ଜିଲ୍ଲା ସୈଣା ଗାଁର ସକାରାମଙ୍କ ଝିଅ ମନିଷଙ୍କ ବିବାହ ମଣାଦର ଗାଁର ଶ୍ରବଣ କୁମାରଙ୍କ ସହ ସ୍ଥିର ହୋଇଥିଲା। ୩ ତାରିଖରେ ବିବାହ ପାଇଁ ଶ୍ରବଣ କୁମାର ବର ବେଶରେ ଯାଇ ପହଞ୍ଚିଥିଲେ କନ୍ୟା ଘରେ। ବିବାହ କର୍ମ ବି ବିଧି ମୁତାବକ ଆରମ୍ଭ ହୋଇଥିଲା। ବିଳମ୍ବିତ ରାତିରେ ବିବାହ କାର୍ଯ୍ୟ ଆରମ୍ଭ ହୋଇଥିବା ବେଳେ ସକାଳେ ସାତ ଫେରା ରୀତି ଆରମ୍ଭ ହୋଇଥିଲା।

କର୍ମ ଅଧା ହୋଇଛି, ହାତଗଣ୍ଠି ବାକି ଅଛି। ହେଲେ କନିଆର ମିଳିନଥିଲା ଖୋଜ ଖବର। ବୁଝୁ ବୁଝୁ ନିଜ ପ୍ରେମିକ ସହ ଫେରାର ହୋଇ ଯାଇଛି। ହେଲେ ବର ଥିଲା ନଛୋଡ ବନ୍ଧା। କନ୍ୟା ନେବାକୁ ଆସିଛି ତ କନ୍ୟାକୁ ନେଇ ଯିବ। ତେଣୁ ସେମିତି ବେଦି ଉପରେ ବର ବେଶରେ ବସି ରହିଲା ବର। ବରର ଜିଦି ଦେଖି କନ୍ୟାଘର ଲୋକେ କଣ କରିବେ ବୋଲି ଭାଳେଣି ପଡିଲା। ଆରମ୍ଭ ହେଲା କନ୍ୟା ଖୋଜା ଅଭିଯାନ।

୧୩ ଦିନ କାଳ ବହୁ ଖୋଜାଖୋଜି କରିବା ପରେ କନ୍ୟା ପରିବାର କନ୍ୟାକୁ ଠାବ କରିବାରେ ସକ୍ଷମ ହୋଇଥିଲେ ଓ ଆସି ସିଧା ପହଞ୍ଚିଥିଲେ ବେଦି ନିକଟରେ। ଆଉ ୧୫ ତାରିଖରେ ଅଧା ଥିବା କର୍ମ ପୂରା କରାଗଲା ଓ ପଡ଼ିଲା ହାତଗଣ୍ଡି। ଆଉ ତା ପରଦିନ ଶ୍ରବଣ ନିଜ ପତ୍ନୀଙ୍କୁ ସାଙ୍ଗରେ ନେଇ ଖୁସି ଖୁସି ଘରକୁ ଫେରିଥିଲେ।

ଏହି ବାହା ଘରକୁ ନେଇ ଲୋକେ ନାନା କଥା ହେଉଛନ୍ତି। ଅନେକଙ୍କୁ ଶ୍ରବଣଙ୍କ ନିଷ୍ପତ୍ତି ଆଶ୍ଚର୍ଯ୍ୟ ଚକିତ କରିଛି।
ଇର୍ଷାରେ ପୋଖରୀରେ ପକାଇଦେଲେ ବିଷ, ସ୍ୱୟଂ ସହାୟକ ଗୋଷ୍ଠୀ ମହିଳାଙ୍କ ମୁଣ୍ଡରେ ଚଡକ

ପୋଖରୀରେ ଭାଶୁଛି କୁଢକୁଢ ମାଛ । ଲକ୍ଷ ଲକ୍ଷ ଟଙ୍କାର ମାଛ ମରିବା ଦ୍ବାରା ଚାଷୀଙ୍କୁ ଲାଗିଛି ଶକ୍ତ ଝଟକା । ଏଭଳି ଏକ ଘଟଣା ଘଟିଛି କଟକ ଜିଲ୍ଲା ନିଶ୍ଚିନ୍ତକୋଇଲି ବ୍ଲକ ଅନ୍ତର୍ଗତ ନତକାଇ ଗ୍ରାମରେ । ଯାହାକୁ ନେଇ ମହିଳା ଚାଷୀ ତଥା ସ୍ଥାନୀୟ ଲୋକେ ଏହାକୁ ନେଇ ଉଦବେଗ ପ୍ରକାଶ କରିଛନ୍ତି ।

ନିଶ୍ଚିନ୍ତକୋଇଲି ଥାନାରେ ହୋଇଥିବା ଅଭିଯୋଗ ଅନୁଯାୟୀ, ଏହି ଗ୍ରାମରେ ଥିବା ବାଘୁଆ ପଦ୍ମ ପୋଖରୀକୁ ସେହି ଗାଁର ମା ବୁଢ଼ୀ ଜାଗୁଳାଇ ସ୍ୱୟଂ ସହାୟକ ଗୋଷ୍ଠୀର ମହିଳା ମାନେ ନିଲାମ ନେଇ ମାଛ ଚାଷ କରିଥିଲେ । ୩ ଲକ୍ଷରୁ ଉର୍ଦ୍ଧ୍ବ ଟଙ୍କା ବ୍ୟୟ କରି ସେମାନେ ମାଛ ଚାଷ କରିଥଲେ । ତେବେ ସେହି ଗାଁର କିଛି ବ୍ୟକ୍ତି ଇର୍ଷା ପରାୟଣ ହୋଇ ଏଭଳି ଅମାନୁଷିକ କାର୍ଯ୍ୟ କରିଛନ୍ତି । ରାତି ଅଧିଆ ପୋଖରୀରେ ବିଷ ପକାଇବା ଫଳରେ ମାଛ ସହ ବହୁ ଜଳଜୀବ ମଧ୍ୟ ମରି ଭାସୁଥିବା ସ୍ୱୟଂ ସହାୟକ ଗୋଷ୍ଠୀର ମହିଳା ମାନେ ଅଭିଯୋଗ କରିଛନ୍ତି । ଥାନାରେ ଏତେଲା ପରେ ନିଶ୍ଚିନ୍ତକୋଇଲି ପୋଲିସ ଏହାର ତଦନ୍ତ ଆରମ୍ଭ କରିଛି ।
ବିଜେପି ନେତାଙ୍କ ସ୍ବପ୍ନ ହେଲା ସାକାର, ମନସ୍କାମନା ପୂରଣ ପାଇଁ କଲେ ମହିମା ମେଳା

କଟକ ମାହାଙ୍ଗା ଠାରେ ଚାଲିଛି ମହିମା ମେଳା । ବାଜା, ଘଣ୍ଟି ଆଉ ଶଙ୍ଖ ଧ୍ବନୀରେ ଫାଟିପଡୁଛି ପୂରା ପରିବେଶ । ଏହି ମେଳା କୌଣସି ସର୍ବସାଧାରଣ ମେଳା ନୁହେଁ ବରଂ ଜଣେ ବିଜେପି ନେତା ଏହାର ଆୟୋଜନ କରିଛନ୍ତି । ବାସ୍ତବରେ କଥା ହେଉଛି ବିଜେପି ନେତା ଶାରଦା ପ୍ରଧାନ ଏବେ ମହିମା ଆଲେଖଙ୍କ ଶରଣରେ । ଯାହାକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି । ସେପଟେ ଶାରଦା କିନ୍ତୁ, କହିଛନ୍ତି ସେ ମହିମା ଆଶ୍ରିତ ଜଣେ ସାଧାରାଣ ଭକ୍ତ । ପିଲାଦିନୁ ଆଶ୍ରମକୁ ସନ୍ୟାସୀ ହୋଇ କିଛି ଦିନ ପଳେଇ ଯାଇଥିଲେ । ବହୁ ବର୍ଷ ହେଲାଣି ମନରେ ମେଳାଟିଏ କରିବାର ତାଙ୍କର ଆଗ୍ରହ ଥିଲା । ତେବେ ଏ ବର୍ଷ ମହିମା ଗୋସାଇଁଙ୍କ କୃପା ହେବାରୁ ଅଖଣ୍ଡ ବତୀ ମହିମା ମେଳା ହୋଇପାରିଛି । ଏଥିରେ ବିଶ୍ୱ କଲ୍ୟାଣ ସହ ମହାଙ୍ଗାବାସୀଙ୍କ କଲ୍ୟାଣ କାମନା ବିନା ତାଙ୍କର କୌଣସି ରାଜନୈତିକ ଉଦ୍ଦେଶ୍ୟ ନାହିଁ ବୋଲି ସେ କହିଛନ୍ତି ।

ମହିମା ଧର୍ମର ମୁଖ୍ୟ ବାବା ନିତ୍ୟାନନ୍ଦ ଦାସଙ୍କ ସହ ରାଜ୍ୟର ବିଭିନ୍ନ ପ୍ରାନ୍ତରୁ ବହୁ ମହିମା ସନ୍ୟାସୀ ଏହି ମେଳାରେ ଯୋଗଦେଇ ବ୍ରହ୍ମଧୁନି ଅଖଣ୍ଡ ଦୀପ ସ୍ଥାପନ କାରିଥିଲେ । ସନ୍ଧ୍ୟାର ସାମୁହିକ ପ୍ରସାଦ ସେବନରେ ମଧ୍ୟ ସନ୍ୟାସୀ ମାନଙ୍କ ସହ ଶାରଦା, ପ୍ରସାଦ ସେବନ କରିଥିଲେ । ଏହି କାର୍ଯ୍ୟକ୍ରମରେ ବହୁ ମହିମା ଅନୁଗାମୀମାନେ ଯୋଗ ଦେଇଥିଲେ।
୧୮ ବର୍ଷରୁ କମ୍ ଲୋକଙ୍କୁ ଗୁପଚୁପ୍ ଖାଇବା ମନା !

ସମଗ୍ର ବିଶ୍ୱରେ ଖାଦ୍ୟପ୍ରେମୀଙ୍କ ଅଭାବ ନାହିଁ । ଏହାର କାରଣ ହେଉଛି, ଖାଦ୍ୟ ସମ୍ବନ୍ଧରେ ପ୍ରତ୍ୟେକ ବ୍ୟକ୍ତିଙ୍କ ସ୍ୱାଦକୁ ଧ୍ୟାନରେ ରଖି ଅଧିକରୁ ଅଧିକ ସ୍ୱାଦିଷ୍ଟ ଖାଦ୍ୟ ସାମଗ୍ରୀ ବଜାରରେ ଆସୁଛି । ଅନ୍ୟପକ୍ଷରେ, ଆଜିକାଲି ଷ୍ଟ୍ରିଟ୍ ଫୁଡ୍ ବିକ୍ରେତାମାନେ ମଧ୍ୟ ନୂତନ ସ୍ୱାଦର ସନ୍ଧାନରେ ଖାଦ୍ୟ ସହିତ ପରୀକ୍ଷା କରିବାଠାରୁ ଦୂରେଇ ଯାଆନ୍ତି ନାହିଁ । ଯଦିଓ ସମସ୍ତଙ୍କ ପସନ୍ଦ ଖାଦ୍ୟ ଭିନ୍ନ ହୋଇପାରେ, ପିଲାମାନଙ୍କ ଠାରୁ ବୃଦ୍ଧ ପର୍ଯ୍ୟନ୍ତ, କିନ୍ତୁ ଗୋଟିଏ ଜିନିଷ ଅଛି ଯାହା ସମସ୍ତଙ୍କ ପ୍ରିୟ ଗୁପଚୁପ । ଯାହା ପାଇଁ ଲୋକମାନେ ଲମ୍ବା ଧାଡିରେ ଛିଡା ହୁଅନ୍ତି । ତେବେ ଏହି ଗୁପଚୁପକୁ ଭିଡିଓ ଭାଇରାଲ ହେବାରେ ଲାଗିଛି । ଯାହା ଦେଖି ଆପଣ ଆଶ୍ଚର୍ଯ୍ୟ ହୋଇଯିବେ ଏବଂ ଆପଣ ହସି ହସିବେ । ତେବେ ଘଟଣାଟି କିଛି ଏପରି ଗୁପଚୁପ ଖାଇବା ପାଇଁ ଆଧାର କାର୍ଡ ଆବଶ୍ୟକ | ଆପଣ ଏପରି ଦୋକାନର ନାମ କେବେ ଶୁଣିଛନ୍ତି କି,ଯେଉଁମାନେ ଆଧାର କାର୍ଡ ଦେଖାଇବା ପରେ ହିଁ ଗୁପଚୁପ ଖାଇବାକୁ ଦିଅନ୍ତି? ଯଦି ଆପଣଙ୍କର ଉତ୍ତର ନା, ତେବେ ଜଣି ରଖନ୍ତୁ ସୋସିଆଲ ମିଡିଆରେ ଏକ ଭିଡିଏ ଭାଇରାଲ ହେଉଛି । ଏଥିରେ ଦେଖିବାକୁ ମିଳିଛି ଯେ ଏକ ଗୁପୁଚୁପ ଠେଲା ଗାଡିରେ କିଛି କୈାତୁକିଆ ଲେଖା ରହିଛି । ସେଥିରେ ଲେଖା ହୋଇଛି କି ୬ ଟି ଗୁପୁଚୁପ କୁ ୨୦ ଟଙ୍କା । ତେବେ ସବୁଠାରୁ ଆଶ୍ଚର୍ଯ୍ୟର କଥା, ହେଲା ଗୁପୁଚୁପ ଏଠାରେ କେବଳ ପୁରୁଷମାନଙ୍କୁ ଖାଇବାକୁ ଦିଆଯାଏ | ଠେଲାରେ ଲେଖା ହୋଇଛି ଯେ , ଗୁପୁଚୁପ ୧୮ ବର୍ଷରୁ କମ୍ ଲୋକଙ୍କୁ ଖାଇବାକୁ ଦିଆଯିବ ନାହିଁ | ଏବଂ ଆଧାରକର୍ଡ ଦେଖାଇବକୁ ପଡିବ ।
ଗର୍ଭଧାରଣ ପାଇଁ ଜବରଦସ୍ତି, କ୍ଷୁନ୍ନ କରୁଛି ମହିଳାଙ୍କ ମୌଳିକ ଅଧିକାର

ଦୁଷ୍କର୍ମ ପୀଡ଼ିତାଙ୍କୁ ଗର୍ଭପାତ ପାଇଁ ମିଳିଲା ଅନୁମତି । ୨୩ ସପ୍ତାହର ଗର୍ଭାବସ୍ଥା ପରେ ମାନସିକ ସ୍ତରରେ ପ୍ରସ୍ତୁତ ନ ଥିବାରୁ ମହିଳାଙ୍କୁ ଗର୍ଭପାତ ପାଇଁ ଅନୁମତି ଦେଇଛନ୍ତି ବମ୍ବେ ହାଇକୋର୍ଟ। କୋର୍ଟ ତାଙ୍କ ରାୟରେ କହିଛନ୍ତି କି, ସମସ୍ତଙ୍କର ବଞ୍ଚିବାର ଅଧିକାର ଅଛି। ତେଣୁ ଜଣେ ମହିଳାଙ୍କ ଇଚ୍ଛା ବିରୋଧରେ ତାଙ୍କୁ ପ୍ରସବ ପାଇଁ ବାଧ୍ୟ କରାଯାଇ ପାରିବ ନାହିଁ।

ଏକେ ତ ପୀଡ଼ିତା ଦୁଷ୍କର୍ମର ଫଳ ସ୍ୱରୂପ ଗର୍ଭବତୀ ହୋଇଛନ୍ତି, ତା ଉପରେ ତାଙ୍କୁ ଗର୍ଭଧାରଣ ପାଇଁ ଜବରଦସ୍ତି କରିବା ତାଙ୍କ ମୌଳିକ ଅଧିକାରକୁ କ୍ଷୁନ୍ନ କରିବା ସହ ସମାନ । ବ୍ୟକ୍ତିର ନିଜ ଶରୀର ଉପରେ ସମ୍ପୂର୍ଣ୍ଣ ଅଧିକାର ରହିଛି। ତେଣୁ ଗର୍ଭଧାରଣ ଓ ଗର୍ଭପାତ ସମ୍ପୂର୍ଣ୍ଣ ରୂପେ ବ୍ୟକ୍ତିଗତ ପସନ୍ଦ। ଏଥିନିମନ୍ତେ କେହି ଜବରଦସ୍ତି କରି ପାରିବେ ନାହିଁ ବୋଲି କହିଛନ୍ତି ଜଷ୍ଟିସ ଅଭୟ ଆହୁଜା ଓ ମିଲିନ୍ଦ ସତ୍ୟେ।

ଗର୍ଭପାତକୁ ନେଇ ବମ୍ବେ ହାଇକୋର୍ଟରେ ଦାୟର ଯାଚିକା ଅନୁଯାୟୀ, ୨୦୧୬ ମସିହାରୁ ଯାଚିକାକର୍ତ୍ତା ଓ ଜନୈକ ପୁରୁଷଙ୍କ ମଧ୍ୟରେ ପ୍ରେମ ସମ୍ପର୍କ ଗଢିଉଠି ଥିଲା। କିନ୍ତୁ, ୨୦୧୮ ମସିହାରେ ପୀଡ଼ିତା ଅନ୍ୟତ୍ର ବିବାହ କରିଥିଲେ ଓ ତାଙ୍କର ପୁଅଟିଏ ଅଛି। ଗତ ବର୍ଷ ନିଶାସକ୍ତ ସ୍ୱାମୀଙ୍କ ନିର୍ଯାତନାରେ ଅତିଷ୍ଠ ହୋଇ ପୀଡିତା ମହିଳା ପୂର୍ବତନ ପ୍ରେମିକଙ୍କୁ ଫୋନ କରି ସବୁ କଥା କହିଥିଲେ ଓ ତାଙ୍କର ତଥା ତାଙ୍କ ପିଲାର ଜୀବନ ପ୍ରତି ତାଙ୍କ ସ୍ୱାମୀଠାରୁ ବିପଦ ଥିବା ଜଣାଇଥିଲେ। ଏହା ଜାଣି ପ୍ରେମିକ ତାଙ୍କୁ ନିଜ ଘରେ ଆଶ୍ରୟ ଦେବାକୁ କହିଥିଲେ।

ପ୍ରେମିକଙ୍କ ପ୍ରତିଶ୍ରୁତି ପରେ ଯାଚିକାକର୍ତ୍ତା ନିଜ ଛୁଆକୁ ଧରି ଚାଲି ଯାଇଥିଲେ ପ୍ରେମିକଙ୍କ ଘରକୁ। ସମୟକ୍ରମେ ପ୍ରେମିକ ପୀଡିତାଙ୍କୁ ବିବାହ ପ୍ରତିଶ୍ରୁତି ଦେଇ ତାଙ୍କ ସହ ଜୋର ଜବରଦସ୍ତି ଶାରୀରିକ ସମ୍ପର୍କ ରଖିଥିଲେ। କିନ୍ତୁ ମହିଳା ଗର୍ଭବତୀ ହେବାରୁ ପ୍ରେମିକ ବିବାହ ପାଇଁ ରାଜି ହୋଇ ନ ଥିଲେ ଓ ସେମାନଙ୍କ ସମ୍ପର୍କ ବିଷୟରେ କାହାରିକୁ କହିଲେ ହତ୍ୟା କରିବାକୁ ଧମକ ଦେଇଥିଲେ।

ଯାହାକୁ ନେଇ ଗତ ଏପ୍ରିଲ ୨୮ ତାରିଖରେ ମହିଳା ଯୁବକଙ୍କ ବିରୋଧରେ ବଳାତ୍କାର ଅଭିଯୋଗ କରିବା ସହ ସେ ୨୩ ସପ୍ତାହର ଗର୍ଭବତୀ ଥିବାରୁ ଗର୍ଭପାତ ପାଇଁ ଅପିଲ କରିଥିଲେ। ତାଙ୍କ ମାନସିକ ସ୍ଥିତି ଭଲ ନ ଥିବାରୁ ଆଉ ଏକ ପିଲାକୁ ଜନ୍ମ ଦେବାକୁ ପ୍ରସ୍ତୁତ ନ ଥିବା କୋର୍ଟଙ୍କ ନିକଟରେ ଜଣାଇଥିଲେ। ଏନେଇ କୋର୍ଟ ମେଡିକାଲ ବିଶେଷଜ୍ଞଙ୍କ ରାୟ ଜାଣିବାକୁ ଚାହିଁବାରୁ, ଗର୍ଭପାତ ନିମନ୍ତେ ମହିଳା ଜଣକ ମାନସିକ ଭାବେ ପ୍ରସ୍ତୁତ ଥିବା ମୁମ୍ବାଇର ଜେଜେ ହସ୍ପିଟାଲ ବୋର୍ଡ କୋର୍ଟଙ୍କୁ ଅବଗତ କରିଥିଲା।

ସନ୍ତାନ ଜନ୍ମ କରିବା ସମ୍ପୂର୍ଣ୍ଣ ଭାବେ ମହିଳାଙ୍କ ବ୍ୟକ୍ତିଗତ ଇଚ୍ଛା । ମହିଳାଙ୍କର ନିଜ ଶରୀର ଉପରେ ସମ୍ପୂର୍ଣ୍ଣ ଅଧିକାର ଥିବାରୁ ନିଜ ଇଚ୍ଛା ଅନୁଯାୟୀ ଗର୍ଭପାତର ଅଧିକାର ବି ଅଛି ବୋଲି ୨୦୦୯ ମସିହାରେ ସୁପ୍ରିମକୋର୍ଟ ରାୟ ପ୍ରକାଶ କରିଥିଲେ। ସେହିପରି ପୂର୍ବରୁ ୨୦ ସପ୍ତାହର ଗର୍ଭ ନଷ୍ଟ କରିବାକୁ ଅନୁମତି ମିଳିଥିଲା। ଏହାପରେ ୨୦୨୧ ମସିହାରେ ଏହି ସମୟ ସୀମାକୁ ବଢ଼ାଇ ୨୪ ସପ୍ତାହ କରାଯାଇଛି।
ରାଜ୍ୟ କ୍ୟାବିନେଟରେ ୧୮ ପ୍ରସ୍ତାବକୁ ମଞ୍ଜୁରୀ,’ମୋ ଘର’ରେ ମୋହର

ରାଜ୍ୟ କ୍ୟାବିନେଟ ବୈଠକରେ ୧୮ଟି ପ୍ରସ୍ତାବକୁ ଅନୁମୋଦନ ମିଳିଛି । ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ଏଥିରେ ‘ମୋ ଘର’ ଯୋଜନାରେ ମୋହର ଲାଗିଛି । ମୋ ଘର ନୂଆ ଯୋଜନାର ଶୁଭାରମ୍ଭ କରିଛନ୍ତି ରାଜ୍ୟ ସରକାର । ଏଥିରେ ଗ୍ରାମୀଣ ଲୋକଙ୍କୁ ଘର ତିଆରି ପାଇଁ ସହାୟତା ଦେବେ ସରକାର ।

ଯେଉଁମାନେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପାଇନାହାଁନ୍ତି,ସେମାନଙ୍କୁ ରାଜ୍ୟ ସରକାର ‘ମୋ ଘର’ ଯୋଜନାରେ ଘର ଯୋଗାଇଦେବେ । ମନ୍ତ୍ରିମଣ୍ଡଳର ଅଦଳବଦଳ ପରେ ଏହା ରାଜ୍ୟ ସରକାରଙ୍କ ପ୍ରଥମ ଗୁରୁତ୍ୱପୂର୍ଣ୍ଣ ବୈଠକ । ଡେଲିଭରୀ ବୟ ଏବଂ ଜ୍ୱିଗୋଟା ଦୁଇଟି ସିନେମାକୁ କର ମୁକ୍ତ କରିଛନ୍ତି ରାଜ୍ୟ ସରକାର । ଜଳକ୍ଲିଷ୍ଟ ଅଞ୍ଚଳ ପାଇଁ ୩୬୪.୪୦ କୋଟି ଟଙ୍କା ମଞ୍ଜୁର ହୋଇଛି ।

ଏକସାଇଜ କ୍ୟାଡରକୁ ଷ୍ଟେଟ୍ କ୍ୟାଡର କରାଯାଇଛି । ସେହିପରି ଓଡ଼ିଶା ସ୍ୱାସ୍ଥ୍ୟ ବିଶ୍ୱବିଦ୍ୟାଳୟ ଖୋଲିବା ପାଇଁ ନିଷ୍ପତ୍ତି ହୋଇଛି । ଏଥିପାଇଁ ୩୩୦.୧୭ କୋଟିର ବ୍ୟୟବରାଦ ପ୍ରସ୍ତାବକୁ ମଧ୍ୟ ମଞ୍ଜୁରୀ ମିଳିଛି । ଶ୍ରୀ ଶଙ୍କର କର୍କଟ ଗବେଷଣା ପ୍ରତିଷ୍ଠାନକୁ ପଞ୍ଜୀକରଣ ଫି’ ଛାଡ଼ କରାଯାଇଛି । ଭିସୁଟ ରୂପାନ୍ତରଣ ପାଇଁ ୨ ହଜାର କୋଟି ବ୍ୟୟରେ IDPକୁ ମଞ୍ଜୁରୀ ଦେଇଛନ୍ତି ରାଜ୍ୟ ସରକାର । ଆଜି ବିଜେଡିର ପଞ୍ଚମ ପାଳି ସରକାରକୁ ୪ ବର୍ଷ ପୂରିଛି । ଏହି ଅବସରରେ ରାଜ୍ୟ ସରକାର ବହୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି ।

https://www.youtube.com/watch?v=8dAS-iHKYG8