Blog

ପୁରୁଣା ଦ୍ୱାର ହଟାଇ ରୂପା ଜଡିତ ନୂଆ ଦ୍ୱାର ଲାଗିଲା ଶ୍ରୀମନ୍ଦିରରେ

ରୂପାରେ ଝଲସିଲା ଶ୍ରୀମନ୍ଦିର ସିଂହଦ୍ୱାର । ଶ୍ରୀ ମନ୍ଦିର ସିଂହଦ୍ୱାର ରୂପା ଛାଉଣୀ କାମ ଶେଷ ହୋଇଛି । ଶାଗୁଆନ୍ କାଠରେ ନବନିର୍ମିତ କବାଟ ସିଂହଦ୍ୱାରରେ ଲାଗିବା ପରେ ମୁମ୍ବାଇରୁ ଆସିଥିବା କାରିଗରମାନେ ଏହା ଉପରେ ବିଭିନ୍ନ ଡିଜାଇନର ରୂପା ପ୍ଲେଟ ସବୁ ଲଗାଇଛନ୍ତି । ଧାର୍ଯ୍ୟ ସମୟର ବହୁ ଆଗରୁ ଏହି କାମ ଶେଷ ହୋଇଛି । ଶ୍ରୀମନ୍ଦିର ସିଂହ ଦ୍ୱାର ସମ୍ପୂର୍ଣ୍ଣ ଭାବେ ନୂଆ ତିଆରି କରାଯାଇଛି ।

ପୁରୁଣା ଦ୍ୱାରକୁ ହଟାଇ ଶାଗୁଆନ୍ କାଠରେ ନୂଆ ଦ୍ୱାର ଲଗାଯାଇଛି । ମୁମ୍ବାଇରୁ ଆସିଥିବା ୧୩ ଜଣ କାରିଗର ଶାଗୁଆନ କାଠରେ ପୂର୍ବର ସିଂହଦ୍ୱାର ଭଳି ଅବିକଳ ଦ୍ୱାର ନିର୍ମାଣ କରିଛନ୍ତି । ଏହା ଉପରେ ରୂପାର କାରୁକାର୍ଯ୍ୟ ରହିଛି । କବାଟର ଚାରିକୋଣରେ ରୂପାର ପତଳା ପ୍ଲେଟ୍ ଲାଗିବା ପରେ ମଝିରେ ଶଙ୍ଖ, ଚକ୍ର, ଗଦା ଓ ପଦ୍ମ ଡିଜାଇନର ବର୍ଗାକାର ରୂପା ପ୍ଲେଟ୍ ଲଗାଯାଇଛି । ସେହିପରି ଦୁଇ ପାଶ୍ୱର୍ରେ ଦୁଇଟି ସିଂହମୂର୍ତ୍ତି ଲଗାଯାଇଛି । ଏହି ଦ୍ୱାରରେ ମା’ ଲକ୍ଷ୍ମୀ ସାଆନ୍ତାଣୀ ମହାପ୍ରଭୁଙ୍କୁ ଶ୍ରୀମନ୍ଦିରକୁ ଭବ୍ୟ ସ୍ୱାଗତ କରିବେ । ସେପଟେ ନୀଳାଦ୍ରୀ ବିଜେ ପୂର୍ବରୁ ସିଂହଦ୍ୱାର ରଙ୍ଗକାମ ମଧ୍ଯ ଶେଷ ହୋଇଛି।

ସିଂହଦ୍ଵାରର ପୁରୁଣା ପିତ୍ତଳଦ୍ୱାରକୁ ବାହାର କରାଯାଇ ହେରାପଞ୍ଚମୀ ଦିନ ରାତିରେ ଲୁହା ଫ୍ରେମ୍ ରେ ବର୍ମାଟିକ କାଠର କବାଟ ସଂଯୋଗ କରାଯାଇଥିଲା। ତା ଉପରେ ଉତ୍କଳୀୟ ଢାଞ୍ଚାରେ ପ୍ରସ୍ତୁତ ରୂପା ଚଦରକୁ ଛାଉଣୀ କରାଯାଇଥିଲା। ନିତିକାନ୍ତିକୁ ନେଇ ରୂପା ଦ୍ୱାର ସଂଯୋଗ ହେବା ପର୍ଯ୍ୟନ୍ତ ଏକ ଅସ୍ଥାୟୀ ଦ୍ୱାର ଲଗାଯାଇଥିଲା। ସେପଟେ ବର୍ମାଟିକ କାଠରେ ପ୍ରସ୍ତୁତ ଏହି ଦ୍ୱାର ଉପରେ ସମ୍ପୂର୍ଣ୍ଣ ରୂପାଛାଉଣୀ କରାଯାଇଛି। ଏହି ଦ୍ୱାରରେ ମଧ୍ୟ ଏକ ଚୋରା କବାଟ ରହିଛି। ଏହିପଟେ ମନ୍ଦିର ଭିତରେ ରହିଯାଇଥିବା ଭକ୍ତ ଓ ସେବକ ଆସିଥାନ୍ତି।

ସେପଟେ ପୂର୍ବରୁ ଶ୍ରୀମନ୍ଦିର ଭିତରେ ଆଠ ଗୋଟି ଦ୍ୱାର ରୂପା ଛାଉଣୀ ସରିଥିବା ବେଳେ ସିଂହଦ୍ୱାର ରୂପା ଛାଉଣୀ ମୁମ୍ବାଇର ଜଣେ ଦାତାଙ୍କ ଦାନରୁ ସମ୍ଭବ ହୋଇଛି। ଏହି ଦାତା ପୁରୀ ଶ୍ରୀମନ୍ଦିରକୁ ୫ କେଜିର ସୁନା ଦାନ କରିଥିଲେ। ସେହି ରୂପାରେ ଚାଦର ତିଆରି କରି ପାରମ୍ପରିକ ଡିଜାଇନ କରାଯାଇଛି। ନିଳାଦ୍ରୀ ଭକ୍ତ ନିବାସରେ ରୂପାଦ୍ୱାର ନିର୍ମାଣ କରାଯାଇଥିଲା। ଆବଶ୍ୟକୀୟ ଏନଓସି ଏଏସଆଇ ଠାରୁ ଅଣାଯିବା ପରେ ଦୁଆର କାର୍ଯ୍ୟ ହୋଇଚି। ଏଥିସହ ୨୪ ଘଣ୍ଟିଆ ସଶସ୍ତ୍ର ପୋଲିସ ପ୍ରହରା ଓ ସିସିଟିଭି କ୍ୟାମେରା ଲଗାଯାଇ ଶ୍ରୀମନ୍ଦିର ସିଂହଦ୍ଵାର ରୂପା ଛାଉଣୀ କରାଯାଇଥିଲା।‌

ସେହିପରି ମହାପ୍ରଭୁଙ୍କ ରତ୍ନ ପଲଙ୍କର ଆଉ ଏକ ନୂତନ ସେଟ୍ ନିର୍ମାଣ ହେବା ସହ ପୁରୁଣା ରତ୍ନ ପଲଙ୍କର ଆବଶ୍ୟକ ମରାମତି କରାଯିବା ନେଇ ପ୍ରସ୍ତାବ ରହିଛି। ପୁରୁଣା ରତ୍ନ ପଲଙ୍କ ପରି ନୂତନ ରତ୍ନ ପଲଙ୍କର ଓଜନ ସମାନ ରହିବ। ବାହୁଡା ପୂର୍ବଦିନ ରାତି ମଧ୍ୟରେ ହିଁ ସିଂହଦ୍ଵାର ରୂପା ଛାଉଣୀ କାର୍ଯ୍ୟ ଶେଷ କରିବାକୁ ଶ୍ରୀମନ୍ଦିର କୋର କମିଟି ଓ ପରିଚାଳନା କମିଟି ସଦସ୍ୟ ମାନେ ସିଂହଦ୍ଵାର ଅନୁଧ୍ୟାନ କରି ନିସ୍ପତି ନେଇଥିଲେ। ତେବେ

ପୂର୍ବରୁ ଶ୍ରୀମନ୍ଦିରର ଜୟବିଜୟ, ବେହେରଣ ଓ କଳାହାଟ ଦ୍ୱାର ସମେତ ମହାଲକ୍ଷ୍ମୀଙ୍କଗର୍ଭଦ୍ୱାର,ବିମଳା, ସାତପାହାଚ, ନୃସିଂହ ଏବଂ ପଶ୍ଚିମ ଭୋଗମଣ୍ଡପ ଦ୍ୱାରକୁ ମିଶାଇ ମୋଟ ଆଠ ଗୋଟି ଦ୍ଵାରକୁ ରୁପା ଛାଉଣୀ କରାଯାଇଛି। ତେବେ ଆଗାମୀ ଦିନ ରେ ଶ୍ରୀ ମନ୍ଦିର ର ଦକ୍ଷିଣ, ପଶ୍ଚିମ ଓ ଉତ୍ତର ଦ୍ଵାର କୁ ମଧ୍ୟ ରୁପା ଛାଉଣି ପାଇଁ ଯୋଜନା ରହିଛି।
ଭୁବନେଶ୍ୱର: ମନ୍ଦିର ପାଳି ଭୋଗ ଟଙ୍କା ଭାଗବଣ୍ଟାକୁ କେନ୍ଦ୍ରକରି ସଂଘବଦ୍ଧ ଆକ୍ରମଣ !

ଭୁବନେଶ୍ୱର କଳାରାହାଙ୍ଗ ଜଳେଶ୍ୱର ମହାଦେବ ମନ୍ଦିରର ନୀତି ପାଳି ଭୋଗ ଅଧିକାର ଏବଂ ଟଙ୍କା ଭାଗବଣ୍ଟାକୁ ନେଇ ଗଣ୍ଡଗୋଳ । ସଭାପତି ଜନକ ପଣ୍ଡା, ତାଙ୍କ ପୁଅଙ୍କ ସମେତ ୫ ଜଣ, ଅନ୍ୟ ଜଣେ ପୂଜାରୀ ଏବଂ ତାଙ୍କ ପରିବାରକୁ ଆକ୍ରମଣ କରିଥିବା ଅଭିଯୋଗ ହୋଇଛି ।

ସୂଚନା ଅନୁସାରେ ଜଳେଶ୍ୱର ମହାଦେବ ମନ୍ଦିରରେ ୪ ଜଣ ପାଳି ଭୋଗ କରି ଶ୍ରଦ୍ଧାଳୁଙ୍କୁ ସେବା ଯୋଗାଇ ଆସୁଥିଲେ । ଶୀତଳଷଷ୍ଠୀ ଯାତ୍ରା ସରିଯାଇଥିବା ବେଳେ ଏବେ ଭୋଗ ଟଙ୍କା ଭାଗବଣ୍ଟାକୁ ନେଇ ବିବାଦ ଦେଖାଦେଇଛି । ପୂର୍ବ ସର୍ତ୍ତ ଅନୁସାରେ ସନ୍ତୋଷ ପଣ୍ଡାଙ୍କୁ ତାଙ୍କ ଭାଗ ଗତ ୧୭ ତାରିଖରେ ମିଳିବାର ଥିଲା କିନ୍ତୁ ଏହା ନ ମିଳିବା ପରେ ସଭାପତି ଜନକ ପଣ୍ଡାଙ୍କ ନିକଟରେ ଦାବି କରିଥିଲେ ।

ତେବେ ଭାଗ ଟଙ୍କା ନଦେଇ ସନ୍ତୋଷଙ୍କ ଘରେ ପଶି ତାଙ୍କୁ ଆକ୍ରମଣ କରାଯାଇଥିବା ଅଭିଯୋଗ ହୋଇଛି । ଲୁହା ପାଇପ୍ ଏବଂ ରବର ପାଇପରେ ଆକ୍ରମଣ କରାଯିବାରୁ ସନ୍ତୋଷ, ତାଙ୍କ ପତ୍ନୀ ଏବଂ ବାପାଙ୍କୁ ଆଘାତ ଲାଗିଛି ।

ସେମାନଙ୍କ ଆକ୍ରମଣରେ ୩ ଜଣ ଆହତ ହୋଇଛନ୍ତି । ଘରେ ପଶି ଜିନିଷପତ୍ର ଭଙ୍ଗାରୁଜା କରିଛନ୍ତି । ସଭାପତି, ତାଙ୍କ ପୁଅଙ୍କ ସମେତ ୫ ଜଣଙ୍କ ନାଁରେ ମଞ୍ଚେଶ୍ୱର ଥାନାରେ ଅଭିଯୋଗ କରାଯାଇଛି । ପୋଲିସ ଏ ଦିଗରେ ତୁରନ୍ତ ପଦକ୍ଷେପ ନନେଇ ବିଳମ୍ବ କରୁଥିବା କହିଛନ୍ତି ଅଭିଯୋଗକାରୀ ।
‘ଖରାପ ଚିନ୍ତାଧାରା ପାଇଁ ବଳାତ୍କାର ହୋଇଥାଏ’

ଯଦି ଝିଅଟିଏ ନା କହିଦିଏ, ତ ତାର ଅର୍ଥ ହେଉଛି ନା | ସତ୍ୟପ୍ରେମ କି କଥା ଚଳଚ୍ଚିତ୍ରଟି ସମାଜକୁ ଏହି ବାର୍ତ୍ତା ଦେଇଛି। ସମାଜର ଛୋଟ ମାନସିକତା, ଝିଅଙ୍କ ପ୍ରତି ତିଚ୍ଛ ମାନସିକତାକୁ ଏହି ଫିଲ୍ମରେ ବିରୋଧ କରାଯାଇ ଦେଇଛି ଏକ ବଡ ସନ୍ଦେଶ। ଏଥିସହ ଚଳଚ୍ଚିତ୍ରଟି ଆମ ସମାଜକୁ ଦର୍ଶାଇଛି କି, ଛୋଟ ପୋଷାକ ପିନ୍ଧିବା ହେତୁ ନୁହେଁ ବରଂ ଖରାପ ଚିନ୍ତାଧାରା ପାଇଁ ବଳାତ୍କାର ହୋଇଥାଏ।

ଏମିତି କିଛି ବିଷୟ ବସ୍ତୁକୁ ନେଇ ନିର୍ମିତ ହୋଇଛି ସତ୍ୟପ୍ରେମ କି କଥା ଚଳଚ୍ଚିତ୍ରଟି। ଏଥିରେ ମୁଖ୍ୟ ଚରିତ୍ରରେ ରହିଛନ୍ତି କାର୍ତ୍ତିକ ଆର୍ଯ୍ୟନ୍ ଓ ଅଭିନତ୍ରୀ କିଆରା | ପ୍ରେମରେ ବିଫଳ ହୋଇ ହେବା ପରେ କିପରି ପରିବାର ବର୍ଗ ତାଙ୍କ ଉପରେ ବିବାହ ପାଇଁ ଚାପ ପକାଇଛନ୍ତି ତାହା ଫିଲ୍ମରେ ଦେଖିବାକୁ ମିଳିଛି। କିଆରା ଆଡଭାନୀ ଫିଲ୍ମରେ ଏକ ଧନୀ ପରିବାରର ଝିଅ ହୋଇଥିବା ବେଳେ ତାଙ୍କ ବୟଫ୍ରେଣ୍ଡ ତାଙ୍କୁ ଧୋକା ଦିଅନ୍ତି । ହେଲେ ସତ୍ୟପ୍ରେମ କିଆରାଙ୍କ ପ୍ରେମରେ ପଡିଯାଆନ୍ତି। ସତ୍ୟପ୍ରେମ କଥା ବା କିଆରାଙ୍କ ପରିବାର ସହ ସମ୍ପର୍କ ସ୍ଥାପନ କରି ବିବାହ କରନ୍ତି । କିନ୍ତୁ ବିବାହ ପରେ ଏକ ରହସ୍ୟ ଉପରୁ ଉଠିଯାଏ ପରଦା ଆଉ ସତ୍ୟପ୍ରେମଙ୍କ ପ୍ରେମ ଠିଆହୁଏ ଦୁଇଛକିରେ।

ଆଗକୁ କ’ଣ ହେଉଛି, ସେ ସବୁ ଜାଣିବା ପାଇଁ ଆପଣଙ୍କୁ ଯିବାକୁ ପଡିବ ସିନେମା ହଲକୁ I ସାମ୍ପ୍ରତିକ ସ୍ଥିତିରେ ଝିଅ ଟିଏ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟାକୁ ନେଇ ଫିଲ୍ମଟି ନିର୍ମିତ ହୋଇଥିବା ବେଳେ ଏହା ଏକ ହାଲକା ଫୁଲ୍କା ରୋମାଣ୍ଟିକ୍ ଚଳଚ୍ଚିତ୍ର | ଟ୍ରେଲରକୁ ଦେଖି ଲାଗୁନଥିଲା କି ଚଳଚିତ୍ରଟିରେ ଏହି ବାର୍ତ୍ତା ରହିବ, କିନ୍ତୁ ଫିଲ୍ମଟି ଆପଣଙ୍କୁ ଚକିତ କରିବ। କାର୍ତ୍ତିକ ଏବଂ କିଆରାଙ୍କ ପ୍ରଶଂସକମାନେ ସେମାନଙ୍କୁ ଦେଖି ଖୁବ ମଜା ଉପଭୋଗ କରିବେ।

ଏଥିରେ କାର୍ତ୍ତିକଙ୍କ କାମ ଖୁବ ପ୍ରଂସନୀୟ ହୋଇଛି | ଚଳଚିତ୍ରରେ ସେ ଗୁଜୁରାଟୀ ଭାଷାକୁ ଚମତ୍କାର ଭାବରେ ଉପସ୍ଥାପନା କରିଛନ୍ତି | କିଆରା ମଧ୍ୟ କମାଲ ପ୍ରଦର୍ଶନ କରିଛନ୍ତି ଫିଲ୍ମରେ| ସେ କଥାର ଭୂମିକାରେ ସମ୍ପୂର୍ଣ୍ଣ ରୂପେ ଫିଟ୍ ହେବା ସହ , ଗୁଜୁରାଟୀ ଭାଷାରେ ମଧ୍ୟ ଚମତ୍କାରିତା ଦେଖାଇଛନ୍ତି। ଫିଲ୍ମରେ କାର୍ତ୍ତିକଙ୍କ ପିତାମାତା ଭୂମିକାରେ ଗଜରାଜ ରାଓ ଏବଂ ସୁପ୍ରିୟା ପାଠକ ମଧ୍ୟ ଭଲ ଅଭିନୟ କରିଛନ୍ତି। ରାଜପାଲ ଯାଦବଙ୍କୁ ମଧ୍ୟ ଏଥିରେ ଏକ ଛୋଟ କିନ୍ତୁ ଦମଦାର ଭୂମିକାରେ ଦେଖିବାକୁ ମିଳିଛି।
ପାରିବାରିକ କଳହକୁ ନେଇ ମହିଳାଙ୍କ ଆତ୍ମହତ୍ୟା

ପାରିବାରିକ କଳହ ପରେ ଶେଷରେ ଆତ୍ମହତ୍ୟାକୁ ଆପଣାଇ ନେଇଛନ୍ତି ମହିଳା। ବେକରେ ଫାଶୀ ଦେଇ ନିଜ ଜୀବନ ନେବା ପରେ ପରିବାର ବର୍ଗ ହତ୍ୟା ଅଭିଯୋଗ ଆଣିଛନ୍ତି ଶ୍ୱଶୁର ଘର ଲୋକଙ୍କ ବିରୋଧରେ। ଏପରି ଏକ ଅଭାବନୀୟ ଘଟଣା ଘଟିଛି ବାଲେଶ୍ଵର ଜିଲ୍ଲା ବସ୍ତା ଥାନା ଅଧୀନ ମୁଳିଦା ଗ୍ରାମ ରେ।

ସୂଚନା ଅନୁସାରେ ବରୁଣଗଡିଆ ପଞ୍ଚାୟତର ନାଇକୁଡି ଗ୍ରାମର ବରେନ୍ଦ୍ର ନାଥ ଦାସଙ୍କର ପଞ୍ଚମ କନ୍ୟା ଜ୍ଯୋତିଶ୍ରୀ ବ୍ରାହ୍ମଣଦା ପଞ୍ଚାୟତ ଅନ୍ତର୍ଗତ ମୁଳିଦା ଗ୍ରାମର ଝାଡେଶ୍ବର ଦାସ ଅଧିକାରୀଙ୍କ ପୁତ୍ର ଜଗଦୀଶ ଦାସ ଅଧିକାରୀ ଙ୍କୁ ବୈଦିକ ରୀତିରେ ବିବାହ କରିଥିଲେ। ଜଗଦୀଶ ପେସାରେ ଜଣେ ଗାଡ଼ି ଡ୍ରାଇଭର। ଗାଡି ଚଳାଇ ସେ ପରିବାରର ଗୁଜୁରାଣ ବଡ କଷ୍ଟରେ ମେଣ୍ଟାଉ ଥିଲେ। ବିବାହକୁ ଏହା ମଧ୍ୟରେ ଅଢେଇ ବର୍ଷ ବିତି ଗଲାଣି। କିନ୍ତୁ ସବୁ ସମୟରେ ଘରେ ଅଭାବ ଅନାଟନ ଲାଗି ରହୁଥିଲା ଓ ସବୁ ସମୟରେ ଛୋଟ ମୋଟ କଥାକୁ ନେଇ ପରିବାରରେ ସର୍ବଦା ଅଶାନ୍ତି ଲାଗି ରହିଥିଲା। ଜଗଦୀଶ ଓ ଜ୍ୟୋତିଶ୍ରୀଙ୍କ ମଧ୍ୟରେ ପାଟିତୁଣ୍ଡ ହେଉଥିଲା। ଏଥିରେ ପରିବାରର ଅନ୍ୟମାନେ ମଧ୍ୟ ଥିଲେ।

ତେବେ ଗତ ଚାରି ଦିନ ତଳେ ଜଗଦୀଶଙ୍କ ଜଣେ ସମ୍ପର୍କୀୟ ଝିଆରୀରର ଜନ୍ମ ଦିନ ଥିଲା। ବିଭିନ୍ନ କାରଣ ପାଇଁ ଜଗଦୀଶ ଙ୍କ ମା ସେଠାକୁ ଯିବାକୁ ବୋହୂକୁ ମନା କରିଥିଲେ। ହେଲେ ବୋହୂ ଜ୍ୟୋତି ଶାଶୂଙ୍କ ବାରଣ ନ ମାନି ସେଠାକୁ ଚାଲିଯାଇଥିଲେ। ଫଳରେ ଘରେ ଆହୁରି ଅଶାନ୍ତି ସୃଷ୍ଚି ହୋଇଥିଲା ଓ ଜ୍ୟୋତିଙ୍କୁ ସମସ୍ତେ ବହୁ କଥା ଶୁଣାଇଥିଲେ। ଏହାକୁ ନେଇ ଘରେ ଜୋରଦାର ଯୁକ୍ତିତର୍କ ମଧ୍ୟ ଲାଗିରହିଥିଲା।

ତେବେ ଆଜି ଦିନ ବାରଟା ସମୟରେ ଘରେ କେହି ନଥିବା ବେଳେ ଜ୍ୟୋତିଶ୍ରୀ ନିଜର ଶୋଇବା ଘରେ ଲାଗିଥିବା ଫ୍ୟାନରେ ଦଉଡ଼ି ଲଗାଇ ଫାଶୀ ଲଗାଇ ଦେଇଥିଲେ। ଏହା ଜାଣି ଶ୍ବଶୁର, ଦିଅର,ଶାଶୁ ଓ ଗ୍ରାମବାସୀ ମାନେ ମିଶି ଜ୍ଯୋତିଶ୍ରୀକୁ ଉଦ୍ଧାର କରି ବସ୍ତା ମେଡିକାଲକୁ ନେଇଯାଇଥିଲେ। କିନ୍ତୁ ସେତେବେଳକୁ ତାଙ୍କ ମୃତ୍ୟୁ ହୋଇ ସାରିଥିଲା। ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରେ ଜ୍ୟୋତିଙ୍କ ମୃତ୍ୟୁ ନେଇ ତାଙ୍କ ବାପ ଘରକୁ ଖବର ଦିଆଯାଇଥିଲା।

ଏହାକୁ ନେଇ ମୃତ ଜ୍ୟୋତିଙ୍କ ବାପା ଥାନାର ଦ୍ୱାରସ୍ଥ ହୋଇଛନ୍ତି। ତାଙ୍କ ଝିଅକୁ ହତ୍ୟା କରାଯାଇଥିବା ଥାନା ରେ ଲିଖିତ ଅଭିଯୋଗ କରିଛନ୍ତି। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇ ଦେବା ସହ ପ୍ରାଥମିକ ତଦନ୍ତ ଆରମ୍ଭ କରି ଦେଇଛି। ଘଟଣାରେ ମୃତକଙ୍କ ଦିଅରଙ୍କୁ ଥାନାରେ ଅଟକ ରଖି ପଚରା ଉଚରା କରୁଛି ପୋଲିସ।
ନଦୀକୁ ଶୌଚ ହେବାକୁ ଯାଇଥିବା ବେଳେ ବୃଦ୍ଧଙ୍କୁ ଟାଣିନେଲା କୁମ୍ଭୀର

ଶୌଚ ହେବାକୁ ଯାଇ କୁମ୍ଭୀର ମୁହଁରେ ପଡିଲେ ବୃଦ୍ଧ। ମାତ୍ର ୧୫ ଦିନ ଅନ୍ତରରେ ତୃତୀୟ କୁମ୍ଭୀର ଆକ୍ରମଣ ଘଟଣାରେ ହତବାକ ଜିଲ୍ଲାବାସୀ। କେତେବେଳେ କେଉଁଠି କୁମ୍ଭୀର ଟାଣିନେବ ସେ ଭୟରେ ନଦୀକୂଳରେ ବସବାସ କରୁଥିବା ଓ ନଦୀ ଉପରେ ନିର୍ଭର କରି ଜୀବନଯାପନ କରୁଥିବା ଲୋକେ। ଆଜି ଭୋର ସାଢ଼େ ଚାରିଟା ସମୟରେ କେନ୍ଦ୍ରାପଡା ନିକିରାଇ ଥାନା ଅଧୀନ ଘାଗରାଡିଆ ଗାଁର ୫୬ ବର୍ଷୀୟ ଗଙ୍ଗାଧର ତରାଇ ନିକଟସ୍ଥ ବ୍ରାହ୍ମଣୀ ନଦୀ କୂଳକୁ ଶୌଚ ହେବାକୁ ଯାଇଥିଲେ। ଶୌଚ ସାରି ଗାଧୋଇବା ସମୟରେ ଏକ କୁମ୍ଭୀର ତାଙ୍କୁ ଝାମ୍ପ ପକାଇ ନଦୀକୁ ଟାଣି ନେଇଥିଲା। ଗଙ୍ଗାଧର ଚିତ୍କାର କରି ଡାକ ପକାଇଥିଲେ। ତାଙ୍କ ଚିତ୍କାର ଶୁଣି ଶୌଚ ହେଉଥିବା ଦୁଇଜଣ ଲୋକ ଦୌଡ଼ି ଆସିଥିଲେ। କିନ୍ତୁ କୁମ୍ଭୀରକୁ ଦେଖି ଭୟଭୀତ ହୋଇଯାଇଥିଲେ। ପାଟି କରି ଗାଁ ଲୋକଙ୍କୁ ଡାକଛାଡିଥିଲେ। ଗାଁ ଲୋକେ ତୁରନ୍ତ ବିଭାଗୀୟ ଅଧିକାରୀଙ୍କୁ ସୂଚିତ କରିବା ସହ ଡଙ୍ଗା ସହାୟତାରେ ଗଙ୍ଗାଧରଙ୍କୁ ଖୋଜାଖୋଜି କରିଥିଲେ। ଉଦ୍ଧାର କାର୍ଯ୍ୟ ରେ ଅଗ୍ନିଶମ ବାହିନୀ, ବନବିଭାଗ ମଧ୍ୟ ସାମିଲ ହୋଇଥିଲା। କିନ୍ତୁ ଗଙ୍ଗାଧର ମିଳିନଥିଲେ, ମିଳିଥିଲା ତାଙ୍କ ମୃତଦେହ।

ଅଭିଯୋଗ ପାଇ ପଟ୍ଟାମୁଣ୍ଡାଇ ତହସିଲଦାର ଘଟଣାସ୍ଥଳରେ ପହଞ୍ଚିଥିଲେ। | ସେହିପରି ପୂର୍ବତନ ମନ୍ତ୍ରୀ ଗଣେଶ୍ୱର ବେହେରା ଘଟଣାସ୍ଥଳରେ ପହଞ୍ଚି ବନବିଭାଗର ଉଦାସୀନତା ପାଇଁ ମାତ୍ର ୧୫ ଦିନ ଅନ୍ତରରେ ତିନୋଟି ମୂଲ୍ୟବାନ ଜୀବନ ଯାଇଥିବା ଅଭିଯୋଗ କରିଛନ୍ତି। ଏଥିପାଇଁ ବନବିଭାଗ ଉତ୍ତରଦାୟୀ ବୋଲି ଅଭିଯୋଗ କରିଛନ୍ତି।ରାଜ୍ୟ ସରକାର ଏହି ଆକ୍ରମଣ ଯୋଗୁଁ ବନବିଭାଗ କର୍ତ୍ତୃପକ୍ଷଙ୍କୁ ଜବାବତଲବ କରିବା ସହ ନଦୀକୂଳ ଘାଟ ମାନଙ୍କରେ ବ୍ୟାରିକେଡ ବ୍ୟବସ୍ଥା କରିବା ପାଇଁ ଦାବି କରିଛନ୍ତି। ସେପଟେ ପଟ୍ଟାମୁଣ୍ଡାଇ ତହସିଲଦାର ବନବିଭାଗକୁ ପୁର୍ବରୁ ସୂଚନା ଦିଆଯାଇଥିଲେ ସୁଦ୍ଧା ଏହାର ପ୍ରତିକାର ବ୍ୟବସ୍ଥା ନକରିବା କାରଣରୁ ଜୀବନ ହାନି ହେଉଥିବା ସ୍ୱୀକାର କରିଛନ୍ତି। ପୁଣିଥରେ ବନବିଭାଗକୁ ନଦୀକୂଳ ଗାଁ ମାନଙ୍କରେ ମାଇକ ଜରିଆରେ ବ୍ୟାପକ ଜନ ସଚେତନତା ସୃଷ୍ଟି କରାବା ଓ ବ୍ୟାରିକେଡ ବ୍ୟବସ୍ଥା ଖୁବଶୀଘ୍ର କରିବା ଉପରେ ଗୁରୁତ୍ୱାରୋପ କରିଛନ୍ତି ତହସିଲଦାର ଦିଲ୍ଲୀପ ସେଠୀ।

ଏଠାରେ ସୂଚନାଯୋଗ୍ୟ, ରଜର ପ୍ରଥମ ଦିନରେ ଜଣେ ନାବାଳକକୁ ବ୍ରାହ୍ମଣୀ ନଦୀରେ ମାରିଥିଲା କୁମ୍ଭୀର। ସେହିପରି ୨୧ ତାରିଖରେ ମଧ୍ୟ ରାଜନଗର ଚାନ୍ଦି ବାଉଁଶମୂଳ ହାତିଆଗଡ଼ି ଗାଁରେ ଜଣେ ମହିଳା କୁମ୍ଭୀର ଆକ୍ରମଣର ଶିକାର ହୋଇ ମୃତ୍ୟୁବରଣ କରିଥିଲେ। ଆଜି ପୁଣି ସମାନ ଘଟଣା ନଦୀକୂଳିଆ ଲୋକଙ୍କ ଭିତରେ ପୂରାଇଛି ଛନକା ।
ସୁନାବେଶ ପାଇଁ ଶ୍ରଦ୍ଧାଳୁଙ୍କ ଭିଡ଼, ସମୟ ଅନୁସାରେ ଚାଲିଛି ନୀତିକାନ୍ତି

ଆଜି ସନ୍ଧ୍ୟା ୫ଟାରେ ମହାପ୍ରଭୁଙ୍କ ସୁନା ବେଶ ଆରମ୍ଭ ହେବ । ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ ଅନୁଯାୟୀ ଏହି ସମୟ ନିର୍ଦ୍ଧାରଣ କରଯାଇଛି । ରଥ ଉପରେ ବିରାଜମାନ କରିଥିବା ଶ୍ରୀଜିଉଙ୍କ ସମସ୍ତ ନୀତି ଅନୁଷ୍ଠିତ ହେଉଛି । ପରମ୍ପରା ଅନୁଯାୟୀ ରଥ ଉପରେ ଶ୍ରୀଜିଉଙ୍କୁ ଶୁଖିଲା ଭୋଗ ଅର୍ପଣ ହେଉଛି । ସକାଳୁ ମହାପ୍ରଭୁଙ୍କ ମଙ୍ଗଳ ଆଳତୀ ଦର୍ଶନ ପାଇଁ ଭକ୍ତଙ୍କ ଭିଡ଼ ଜମିଥିଲା । ରଥ ସମ୍ମୁଖରେ ଭକ୍ତମାନେ ଦୀପ ଜାଳି ନିଜର ମନ କଥା ମହାପ୍ରଭୁଙ୍କୁ ଜଣାଇଛନ୍ତି । ମହାପ୍ରଭୁଙ୍କ ଚିତାକର୍ଷକ ସୁନା ବେଶ ଦର୍ଶନ ପାଇଁ ରଥ ନିକଟରେ ଭକ୍ତଙ୍କ ଭିଡ଼ ଜମିଲାଣି ।

ଆଜିର ନୀତି ନିର୍ଘଣ୍ଟ ଅନୁଯାୟୀ ସଠିକ୍ ଭାବେ ମହାପ୍ରଭୁଙ୍କ ସମସ୍ତ ନୀତିକାନ୍ତି ଜାରି ରହିଛି । ଅପରାହ୍ମ ୩ଟା ସୁଦ୍ଧା ମହାପ୍ରଭୁଙ୍କ ମଧ୍ୟାହ୍ନ ଧୂପ ଶେଷ ହେବ । ଏହା ପରେ ମଇଲମ, ଶାଢ଼ି, ଖଣ୍ଡୁଷ ଲାଗି, ସନ୍ଧ୍ୟା ଆଳତୀ,ଏକାଦଶୀ ସର୍ବାଙ୍ଗ ନୀତି ଶେଷ ପରେ ସନ୍ଧ୍ୟା ୫ଟାରୁ ସୁନା ବେଶ ଆରମ୍ଭ ହେବ । ରାତି ୧୨ଟାରେ ବଡ଼ ସିଂହାର ବେଶ, ବଡ଼ ସିଂହାର ଭୋଗ ଓ ରାତି ଗୋଟାଏରେ ରାତ୍ର ପହୁଡ଼ ନୀତି ଅନୁଷ୍ଠିତ ହେବ । ଏ ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତିକାନ୍ତି ପୁସ୍ତିକାରେ ସୂଚନା ଦିଆଯାଇଛି। ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖାଯାଇ ବିଳମ୍ୱିତ ରାତି ଯାଏ ମହାପ୍ରଭୁଙ୍କ ସୁନା ବେଶ ଅନୁଷ୍ଠିତ ହେବ ।

ସେପଟେ ଭକ୍ତଙ୍କ ସୁରକ୍ଷା ପାଇଁ ପୁରୀରେ ୯୦ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଛନ୍ତି । ଟ୍ରାଫିକ ବ୍ୟବସ୍ଥାକୁ ଶୃଙ୍ଖଳିତ କରିବା ପାଇଁ ସ୍ଵତନ୍ତ୍ର ଟ୍ରାଫିକ ମୋବିଲିଟି ପ୍ଲାନ୍ କାର୍ଯ୍ୟକାରୀ କରାଯାଇଛି । ଭକ୍ତମାନେ ବଡ଼ ଦାଣ୍ଡ ମାର୍କେଟ ଛକରୁ ବାରିକେଡରେ ଆସି ଶ୍ରୀମନ୍ଦିର ସିଂହ ଦ୍ଵାରରେ ମହାପ୍ରଭୁଙ୍କ ଦର୍ଶନ କରିପାରିବେ ।
ଜୁଲାଇରେ ଉତକ୍ଷେପଣ ହୋଇପାରେ ଚନ୍ଦ୍ରାୟନ-୩: ଇସ୍ରୋ
ଭାରତୀୟ ମହାକାଶ ଅନୁସନ୍ଧାନ ସଂସ୍ଥା ବା ଇସ୍ରୋର ବଡ ଘୋଷଣା। ବହୁ ପ୍ରତୀକ୍ଷିତ ଚନ୍ଦ୍ରାୟନ-୩ ର ଲଞ୍ଚିଂ ତାରିଖ ଘୋଷଣା। ଚନ୍ଦ୍ରାୟଣ-୩ ଉତକ୍ଷେପଣର ସମ୍ଭାବ୍ୟ ସମୟ ଜୁଲାଇ ୧୩, ମଧ୍ୟାହ୍ନ ୨ଟା ୩୦ ଧାର୍ଯ୍ୟ କରାଯାଇଛି। ମହାକାଶ ବିଜ୍ଞାନ କ୍ଷେତ୍ରରେ ଏହା ଭାରତର ହେବ ବଡ ସଫଳତା ବୋଲି ସୂଚନା ଦେଇଛନ୍ତି ଇସ୍ରୋ ଅଧ୍ୟକ୍ଷ ଏସ ସୋମନାଥ। ଚନ୍ଦ୍ରାୟନ ୩ର ସୁରକ୍ଷିତ ଲ୍ୟାଣ୍ଡିଂ ଓ ରୋଭିଂ ଜରିଆରେ ଇସ୍ରୋ ଦୁନିଆ ସମ୍ମୁଖରେ ଉପସ୍ଥାପନ କରିବାକୁ ଯାଉଛି ସ୍ୱଦେଶୀ ଜ୍ଞାନ କୌଶଳ ।

ବାସ୍ତବରେ ଚନ୍ଦ୍ରାୟନ ୩ ହେଉଛି ଚନ୍ଦ୍ରାୟନ ୨ର ଫଲୋଅପ ମିସନ। ଏହି ମିସନରେ ପୂର୍ବର ଭୁଲକୁ ଦୋହରା ଯିବନାହିଁ। ଏହାକୁ ଚନ୍ଦ୍ରପୃଷ୍ଠରେ ସୁରକ୍ଷିତ ଲ୍ୟାଣ୍ଡ କରିବା ଉପରେ ଇସ୍ରୋ ଦେଇଛି ଗୁରୁତ୍ୱ। କାରଣ ଚନ୍ଦ୍ରାୟନ ୨ର ସଫଳ ଲଞ୍ଚି ପରେ ସବୁ କିଛି ଠିକ ଚାଲିଥିବା ବେଳେ କିନ୍ତୁ ଶେଷ ପର୍ଯ୍ୟୟରେ ଲ୍ୟାଣ୍ଡିଂରେ ଦେଖାଦେଇଥିଲା ସମସ୍ୟା। ଚନ୍ଦ୍ର ପୃଷ୍ଠରେ ଅବତରଣର ମାତ୍ର ୩୫୦ ମିଟର ଉଚ୍ଚରୁ ଦ୍ରୁତତା କାରଣରୁ ଜମି ଉପରେ ବାଡେଇ ହୋଇଥିଲା ଚନ୍ଦ୍ରାୟନ ୨। ତେଣୁ ଚଳିତ ଅଭିଯାନରେ ଚନ୍ଦ୍ର ପୃଷ୍ଠରେ ସୁରକ୍ଷିତ ଲ୍ୟାଣ୍ଡିଂ ପାଇଁ ନିଆଯାଇଛି ବ୍ୟାପକ ପଦକ୍ଷେପ।

ଚନ୍ଦ୍ରାୟନ ୩ର ସ୍ପେସ କ୍ରାପ୍ଟ ସମ୍ପୂର୍ଣ୍ଣ ଅଟୋମାଟିକ ହୋଇଥିବା ବେଳେ ଏଥିରେ ଲଗାଯାଇଛି ଶହ ଶହ ସେନ୍ସର, ଯାହା ଯାନର ଅବତରଣ ଓ ଅନ୍ୟାନ୍ୟ କାର୍ଯ୍ୟରେ କରିବ ସହଯୋଗ । ଏଥିରେ ଏପରି ଯନ୍ତ୍ର ସବୁ ସଂଯୋଗ ହୋଇଛି ଯାହା ଆଲୋକ ଓ ଖଣିଜ ତାପ ଆଧାରରେ ଚନ୍ଦ୍ର ପୃଷ୍ଠର ଅଧ୍ୟୟନ କରିବ। ତେଣୁ ଲ୍ୟାଣ୍ଡରରେ ଚନ୍ଦ୍ର ପୃଷ୍ଠ ଥର୍ମୋଫିଜିକାଲ ଏକ୍ସପେରିମେଣ୍ଟ ଲାଗାଯାଇଛି। ଏହା ଚନ୍ଦ୍ର ପୃଷ୍ଠରେ ଥର୍ମଲ କଣ୍ଡକ୍ଟିଭିଟି ଓ ତାପମାତ୍ରାର କରିବ ଅଧ୍ୟୟନ। ସେହିପରି ଚନ୍ଦ୍ରାୟନ୩ ଯାନରେ ଲାଗିଥିବା ଲୁନାର ସିସ୍ମିକ ଆକ୍ଟିଭିଟି ସେଠା ଭୂପୃଷ୍ଠର ଭୂକମ୍ପ ସମ୍ବନ୍ଧିତ ସୂଚନା ସଂଗ୍ରହ କରିବ। ଲ୍ୟାଣ୍ଡରେ ଲାଗିଥିବା ଲେଙ୍ଗମୁର ପ୍ରୋବ ଚନ୍ଦ୍ର ଉପରେ ପ୍ଲାଜମାର ଘନତା ଓ ତାର ଅନ୍ତରକୁ ଯାଞ୍ଚ କରିବ। ଏହା ବ୍ୟତୀତ ନାସା ଏଥିରେ ପ୍ୟାସିଭ ଲେଜର ରେଟ୍ରୋରିଫ୍ଳେକ୍ଟର ଲଗାଇଛି, ଯାହା ଚନ୍ଦ୍ର ପୃଷ୍ଠ ଉପରେ ଲେଜର ଜରିଆରେ ରେଞ୍ଜିଂ ଷ୍ଟଡି କରିବ। ସେହିପରି ରୋବରରେ ଥିବା ଆଲ୍ଫା ପାର୍ଟିକଲ ଏକ୍ସ- ରେ ସ୍ପେକ୍ଟ୍ରୋମିଟର ଓ ଲେଜର ପ୍ରବର୍ତ୍ତିତ ବ୍ରେକଡାଉନ ସ୍ପେକ୍ଟ୍ରୋସ୍କୋପ ଅବତରଣ ସ୍ଥଳରେ ଖଣିଜ, ମାଟି ଓ ସେଠାକାର ରାସାୟନ ମିଶ୍ରଣର ଅଧ୍ୟୟନ କରିବ।

ଚନ୍ଦ୍ରାୟଣ୨ର ଲ୍ୟାଣ୍ଡର ପରି ଏଥିରେ ୫ ଟି ଥ୍ରୋଟଲ ଇଞ୍ଜିନ ବଦଳରେ ଲାଗିଛି ୪ଟି । ଏହା ବ୍ୟତୀତ ଲ୍ୟାଣ୍ଡରରେ ଲେଜର ଡାପ୍ଲୋର ଭେଲୋସିମିଟର ଲଗାଯାଇଥିବା ରହିଛି ସୂଚନା । ଏହା ଦ୍ୱାରା ଲ୍ୟାଣ୍ଡିଂ ସହଜ ହେବ। ଗୋଟିଏ ଲ୍ୟାଣ୍ଡର, ଗୋଟିଏ ରୋଭର ଓ ଗୋଟିଏ ପ୍ରପୁଲସନ ମଡ୍ୟୁଲକୁ ନେଇ ଚନ୍ଦ୍ରାୟଣ ୩ର ଗଠନ। ଏହାର ଓଜନ ୩,୯୦୦ କିଲୋ ହୋଇଥିବା ବେଳେ ପ୍ରପୁଲସନ ମଡ୍ୟୁଲର ଓଜନ ରହିଛି ୨,୧୪୮ କିଲୋ। ଏହା ଲ୍ୟାଣ୍ଡର ଓ ରୋଭରକୁ ୧୦୦ କିଲୋମିଟରର ଚନ୍ଦ୍ର କକ୍ଷକୁ ନେଇଯିବ। ତେବେ ଚନ୍ଦ୍ରାୟନ ୨ ସଦୃଶ ରୋଭର ରହିଛି ଚନ୍ଦ୍ରାୟନ୩ରେ । ଏହାର ଓଜନ ୨୬ କେଜି। ଚନ୍ଦ୍ରାୟନ୩ର ଯନ୍ତ୍ରାଂଶର ପ୍ରପୁଲସନ ମଡ୍ୟୁଲ ୭୫୮ ୱାଟ ବିଜୁଳି ଉତ୍ପାଦନ କରୁଥିବା ବେଳେ ଲ୍ୟାଡର ମଡ୍ୟୁଲ ୭୩୮ ଓ ରୋଭର ୫୦ ୱାଟ ଉତ୍ପନ୍ନ କରିବ। ଚନ୍ଦ୍ରାୟନ ୩ ଲଞ୍ଚିଂର ସମସ୍ତ ପ୍ରସ୍ତୁତି ସରିଛି।
```
ଇସ୍ରୋ ତନ୍ନ ତନ୍ନ କରି ସମସ୍ତ ଉପକରଣରର ଯାଞ୍ଚ କରି ସେଥିରେ ସଫଳ ହୋଇଛି। ତେଣୁ ଏହାକୁ ଆଗାମୀ ୧୩ ତାରିଖରେ ଲଞ୍ଚ କରିବାକୁ ଘୋଷଣା କରାଯାଇଛି। ଇସ୍ରୋ ମୁତାବକ ଚନ୍ଦ୍ରାୟନ ୩ ଆନ୍ଧ୍ରପ୍ରଦେଶର ଶ୍ରୀହରି କୋଟା ସ୍ଥିତ ସତୀଶ ଧବନ ମହାକାଶ କେନ୍ଦ୍ରରୁ  ଲଞ୍ଚ କରାଯିବ। ଏହାକୁ  ପ୍ରକ୍ଷେପଣ ଯାନ ମାର୍କ-3 ଜରିଆରେ ପଠାଯିବ। ବିଶେଷକରି ବେସାମରିକ ବିମାନ ଚଳାଚଳ ଏବଂ ସାମରିକ ଆବଶ୍ୟକତାଗୁଡ଼ିକରେ ପୋଜିସନାଲ୍, ନେଭିଗେସନ୍ ଏବଂ ଟାଇମିଂ ସମ୍ବନ୍ଧିତ ସମସ୍ତ ଆବଶ୍ୟକତା ପୂରଣ କରିବାକୁ ଇସ୍ରୋ ଚନ୍ଦ୍ରାୟଣ୩ର ନାଭିକ ସିଷ୍ଟମକୁ ବିକଶିତ କରିଛି | ପୂର୍ବରୁ ମଧ୍ୟ ଭାରତୀୟ ଆଞ୍ଚଳିକ ନାଭିଗେସନ୍ ସାଟେଲାଇଟ୍ ସିଷ୍ଟମ୍ ବେଶ ଖ୍ୟାତି ରଚନା କରିଛି। ଏବେ ଏହି ମିଶନ ମାଧ୍ୟମରେ ନାଭିକ ସିଷ୍ଟମକୁ ଆହୁରି ବିକଶିତ କରି ଇସ୍ରୋ ଭାରତର ଜ୍ଞାନ କୌଶଳକୁ ବିଶ୍ୱ ଆଗରେ ରଖି ଇତିହାସ ରଚିବାକୁ ରଖିଛି ଲକ୍ଷ୍ୟ। 
```
ନୂଆଦିଲ୍ଲୀ: ଦିଲ୍ଲୀର ଔରଙ୍ଗଜେବ ରାସ୍ତାର ନାମ ପରିବର୍ତ୍ତନ, ଡକ୍ଟର ଅବଦୁଲ କାଲାମ ରୋଡ ନାମରେ ନାମିତ
ଦେଶବ୍ୟାପୀ ବକରି ଇଦ ବା ଇଦ ଉଲ ଆଧା ପାଳିତ, ବିଭିନ୍ନ ମସଜିଦରେ ନମାଜ ପାଠ କରୁଛନ୍ତି ମୁସଲମାନ ଧର୍ମାବଲମ୍ବୀ
ଯାଜପୁର: ଧୁମଧାମରେ ବାହୁଡ଼ା ଯାତ୍ରା ପାଳିତ, ଆନନ୍ଦର ସହ ରଥ ଟାଣିଲେ ଭକ୍ତ

ବିଶ୍ୱପ୍ରସିଦ୍ଧ ଶ୍ରୀକ୍ଷେତ୍ର ପୁରୀରେ ବାହୁଡ଼ା ଯାତ୍ରା ଶେଷ ହୋଇଛି । ଲକ୍ଷଲକ୍ଷ ଭକ୍ତ ମହାପ୍ରଭୁଙ୍କ ଦର୍ଶନ ସମାଗମ ହୋଇଥିଲା । ସେହିପରି ଯାଜପୁର ଜିଲ୍ଲାରେ ମଧ୍ୟ ଏହାର ଝଲକ ଦେଖିବାକୁ ମିଳିଥିଲା । ଦଶରଥପୁର ବ୍ଲକ ଜୟନ୍ତରା ପଞ୍ଚାୟତର କୁଟୁରିଆ ଗାଁରେ ଥିବା ଜଗନ୍ନାଥ ମନ୍ଦିରରେ ବାହୁଡ଼ା ଯାତ୍ରା ଧୁମଧାମରେ ପାଳିତ ହୋଇଯାଇଛି ।

କୁଟୁରିଆ ଗାଁ ଜଗନ୍ନାଥ ମନ୍ଦିର ପରିସରରେ ଘଣ୍ଟ ଓ ହୁଳହୁଳିର ଶବ୍ଦ । ବାହୁଡ଼ା ଯାତ୍ରା ଅବସରରେ ଶ୍ରଦ୍ଧାଳୁଙ୍କ ବେଶ୍ ଭିଡ଼ ଜମିଥିଲା । ପୂଜକ ଗଦାଧର ମିଶ୍ରଙ୍କ ତତ୍ତ୍ୱାବଧାନରେ ଭୋରୁ ଭୋରୁ ଆରମ୍ଭ ହୋଇଥିଲା ତିନି ଠାକୁରଙ୍କ ନୀତିକାନ୍ତି । ପୂଜକମାନେ ଠିକ୍ ସମୟରେ ସମସ୍ତ ନୀତିକାନ୍ତି ସମ୍ପନ୍ନ କରିଥିଲେ । ଚତୁର୍ଦ୍ଧା ମୂର୍ତ୍ତିଙ୍କୁ ପହଣ୍ଡି କରି ରଥାରୁଢ଼ କରାଯାଇଥିଲା । ଏହାପରେ ମନ୍ଦିର ଅଭିମୁଖେ ରଥ ଟାଣିଥିଲେ ଶ୍ରଦ୍ଧାଳୁ ।

ସ୍ଥାନୀୟ ସରପଞ୍ଚ, ମନ୍ଦିର କମିଟି ସଭାପତିଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଏଥିରେ ସାମିଲ ହୋଇଥିଲେ । ବାହୁଡ଼ା ଯାତ୍ରାରେ ଦୂରଦୂରାନ୍ତରରୁ ଭକ୍ତଙ୍କ ସୁଅ ଛୁଟିଥିଲା । ମହାପ୍ରଭୁଙ୍କ ଟିକିଏ ଆଶୀର୍ବାଦ ପାଇବା ପାଇଁ ବ୍ୟଗ୍ର ହୋଇଥିଲେ ଶ୍ରଦ୍ଧାଳୁ । ସମଗ୍ର ଅଞ୍ଚଳରେ ଘଣ୍ଟଘଣ୍ଟା, ହୁଳହୁଳି, ବାଜା ଶବ୍ଦରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିଲା । ମନ୍ଦିର ପ୍ରଶାସନ ପକ୍ଷରୁ ଭକ୍ତମାନଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା କରାଯାଇଥିଲା । ସେପଟେ, ପ୍ରବଳ ଭିଡ଼କୁ ନଜରରେ ରଖି ବ୍ୟାପକ ପୋଲିସ ମୁତୟନ ହୋଇଥିଲେ ।