Blog

ଅନୁଗୁଳରେ ଆଇନ-ଶୃଙ୍ଖଳାକୁ ଚାଲେଞ୍ଜ, ପୁଲିସ ଅଧିକାରୀଙ୍କ ଉପରେ ହତ୍ୟା ଉଦ୍ୟମ

ଅନୁଗୁଳ ଜିଲ୍ଲାରେ ଆଇନ-ଶୃଙ୍ଖଳାକୁ ନେଇ ଗମ୍ଭୀର ପ୍ରଶ୍ନ ଉଠାଇଛି ଏକ ଚାଞ୍ଚଳ୍ୟକର ଘଟଣା। ଗତ ୧୮ ତାରିଖ ରାତିରେ ଅନୁଗୁଳ ସାଇବର ଥାନା ଅଧିକାରୀ ଇନ୍ସପେକ୍ଟର ଖଲେଶ୍ୱର ସେଠୀଙ୍କ ଉପରେ ହତ୍ୟା ଉଦ୍ୟମ ହୋଇଥିବା ଅଭିଯୋଗ ଆସିଛି। ଏହି ଘଟଣାକୁ ନେଇ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ସୂଚନା ଅନୁଯାୟୀ, ଇନ୍ସପେକ୍ଟର ଖଲେଶ୍ୱର ସେଠୀ ଗତ ୧୮ ତାରିଖ ରାତି ପ୍ରାୟ ସାଢେ ୧୧ଟା ସମୟରେ ଡ୍ୟୁଟି ସାରି ଥାନାରୁ ନିଜ ଘରକୁ ଫେରୁଥିଲେ। ଏହି ସମୟରେ ବୁଢ଼ୀ ଠାକୁରାଣୀ ଛକ ନିକଟରେ ହଠାତ୍‌ ଏକ ବସ୍‌ ତାଙ୍କ ଦିଗକୁ ଦ୍ରୁତ ଗତିରେ ଆସିଥିଲା। ଡ୍ରାଇଭର୍‌ ତାଙ୍କୁ ଗାଡ଼ି ଚଢ଼ାଇ ହତ୍ୟା କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ତେବେ ଇନ୍ସପେକ୍ଟର ସେଠୀ ସଚେତନ ହୋଇ ରାସ୍ତା କଡ଼କୁ ଚାଲିଯିବାରୁ ଅଳ୍ପକେ ଜୀବନରକ୍ଷା ପାଇଥିଲେ।

ଘଟଣା ପରେ ବସ୍‌ରୁ ଡ୍ରାଇଭର୍‌ ସହ ଅନ୍ୟ ଦୁଇ ଜଣ ସହଯୋଗୀ ଓହ୍ଲାଇ ତାଙ୍କୁ ଗାଳିଗୁଲଜ କରିବା ସହ ଜାତିକୁ ନେଇ ଆକ୍ଷେପ କରିଥିବା ଅଭିଯୋଗ ମଧ୍ୟ ହୋଇଛି। ଏହା ପରେ ଇନ୍ସପେକ୍ଟର ସେଠୀ ତୁରନ୍ତ ଅନୁଗୁଳ ଥାନାକୁ ଘଟଣା ସମ୍ପର୍କରେ ସୂଚନା ଦେଇଥିଲେ। ପୁଲିସ ଟିମ୍‌ ତୁରନ୍ତ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରିଥିଲା।

ଏହି ଘଟଣାକୁ ନେଇ ପୁଲିସ ଥାନାରେ ଏତଲା ଦାଖଲ ହେବା ପରେ ଏକ ମାମଲା ରୁଜୁ କରାଯାଇଛି। ଅଭିଯୁକ୍ତମାନଙ୍କ ପରିଚୟ ଓ ଘଟଣାର ପୃଷ୍ଠଭୂମି ଖୋଜିବା ପାଇଁ ପୁଲିସ ତଦନ୍ତ ଜୋରଦାର କରିଛି।
ସନ୍ଦେହଜନକ ଖାଦ୍ୟରେ ଅନୁଗୋଳରେ ଅଭାବନୀୟ ଘଟଣା

ଢେଙ୍କାନାଳ ଜିଲ୍ଲାରୁ ଏକ ମର୍ମାନ୍ତିକ ଘଟଣା ସାମ୍ନାକୁ ଆସିଛି। ସନ୍ଦେହଜନକ ଖାଦ୍ୟ ଖାଇବା ପରେ ଗୋଟିଏ ପରିବାରର ତିନିଜଣଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ଏହି ଦୁଃଖଦ ଘଟଣା ଢେଙ୍କାନାଳ ଜିଲ୍ଲାର କଣ୍ଟାବଣିଆ ଥାନା ଅନ୍ତର୍ଗତ ଇଟାପା ଗାଁରେ ଘଟିଛି। ଘଟଣା ପରେ ସମଗ୍ର ଗାଁରେ ଶୋକର ପରିବେଶ ଦେଖାଦେଇଛି।

ସୂଚନା ଅନୁଯାୟୀ, ରବିବାର ବିଳମ୍ବିତ ରାତିରେ ଅନ୍ତର୍ଯ୍ୟାମୀ ସାହୁଙ୍କ ପରିବାର ଚିକେନ୍ ସହ ପାଳଙ୍ଗ ଶାଗ ରନ୍ଧି ଖାଇଥିଲେ। ଖାଇବା ପରେ ସମସ୍ତେ ଶୋଇପଡ଼ିଥିଲେ। କିନ୍ତୁ ସକାଳ ହେଲେ ମଧ୍ୟ ଘରର କବାଟ ଖୋଲା ନହେବାରୁ ପଡୋଶୀମାନଙ୍କର ସନ୍ଦେହ ବଢ଼ିଥିଲା। ପଡୋଶୀମାନେ କବାଟ ଖୋଲି ଭିତରକୁ ପ୍ରବେଶ କରିବା ପରେ ତିନିଜଣଙ୍କୁ ଗୁରୁତର ଅବସ୍ଥାରେ ପଡ଼ିଥିବା ଦେଖିଥିଲେ।

ତୁରନ୍ତ ତିନିଜଣଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ହେଲେ ସେତେବେଳେକୁ ବହୁତ ବିଳମ୍ବ ହୋଇସାରିଥିଲା। ଡାକ୍ତରମାନେ ଅନ୍ତର୍ଯ୍ୟାମୀ ସାହୁଙ୍କ ପତ୍ନୀ ଓ ତାଙ୍କ ଦୁଇ ପୁଅ ପିଣ୍ଟୁ ସାହୁ ଓ ଲିଣ୍ଟୁ ସାହୁଙ୍କୁ ମୃତ ଘୋଷଣା କରିଥିଲେ।

ବର୍ତ୍ତମାନ ସମସ୍ତଙ୍କ ମୃତଦେହ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ରଖାଯାଇଛି। ବ୍ୟବଚ୍ଛେଦ ପରେ ମୃତଦେହଗୁଡ଼ିକୁ ପରିବାର ଲୋକଙ୍କୁ ହସ୍ତାନ୍ତର କରାଯିବ। ଏହା ଖାଦ୍ୟ ବିଷାକ୍ତତା (ଫୁଡ୍ ପଏଜନିଂ) ଯୋଗୁଁ ଘଟିଛି କିମ୍ବା ଅନ୍ୟ କୌଣସି କାରଣ ରହିଛି, ତାହା ସ୍ପଷ୍ଟ ହୋଇନାହିଁ।

ଘଟଣାକୁ ନେଇ ଅନୁଗୋଳ ଓ କଣ୍ଟାବଣିଆ ପୋଲିସ ପକ୍ଷରୁ ତଦନ୍ତ ଜାରି ରହିଛି। ବ୍ୟବଚ୍ଛେଦ ରିପୋର୍ଟ ଓ ପ୍ରାଥମିକ ତଦନ୍ତ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ପୋଲିସ କହିଛି।
ଚାପମୁକ୍ତ ଜୀବନ ପାଇଁ ଧ୍ୟାନ,ଆଜି ବିଶ୍ୱ ଧ୍ୟାନ ଦିବସ

ବିଶ୍ୱ ଧ୍ୟାନ ଦିବସ (World Meditation Day) ପ୍ରତିବର୍ଷ ସାରା ବିଶ୍ୱରେ ମାନସିକ ଶାନ୍ତି, ଆତ୍ମିକ ସନ୍ତୁଳନ ଓ ସୁସ୍ଥ ଜୀବନ ଶୈଳୀ ପ୍ରତି ଜନସାଧାରଣଙ୍କୁ ସଚେତନ କରିବା ଉଦ୍ଦେଶ୍ୟରେ ପାଳନ କରାଯାଏ। ଆଧୁନିକ ଜୀବନରେ ମନୁଷ୍ୟ ଅତ୍ୟଧିକ ଚାପ, ଅସ୍ଥିରତା ଓ ମାନସିକ ରୋଗର ସମ୍ମୁଖୀନ ହେଉଥିବାରୁ ଧ୍ୟାନକୁ ଏକ ଆବଶ୍ୟକ ଆତ୍ମିକ ଅଭ୍ୟାସ ଭାବେ ଗ୍ରହଣ କରାଯାଇଛି।

ଧ୍ୟାନ ହେଉଛି ଏକ ମନୋନିୟନ୍ତ୍ରଣ ପ୍ରକ୍ରିୟା, ଯାହା ମାନବ ମନକୁ ଅଶାନ୍ତିରୁ ଶାନ୍ତି ଦିଗକୁ ନେଇଯାଏ। ଧ୍ୟାନର ବିଭିନ୍ନ ପ୍ରକାର ରହିଛି—ଯେପରିକି ଧ୍ୟାନ ଯୋଗ, ମନ୍ତ୍ର ଧ୍ୟାନ, ଶ୍ୱାସ-ପ୍ରଶ୍ୱାସ ଧ୍ୟାନ ଓ ମାଇଣ୍ଡଫୁଲନେସ୍ ଧ୍ୟାନ। ଏହି ସମସ୍ତ ପ୍ରକାର ଧ୍ୟାନ ମାନବ ମନକୁ ଏକାଗ୍ର କରିବାରେ ସାହାଯ୍ୟ କରେ।

ନିୟମିତ ଧ୍ୟାନ ଅଭ୍ୟାସ ମାଧ୍ୟମରେ ମାନସିକ ଚାପ କମେ, କ୍ରୋଧ ଓ ଉତ୍ତେଜନା ନିୟନ୍ତ୍ରଣରେ ଆସେ ଏବଂ ଧୈର୍ଯ୍ୟ ବୃଦ୍ଧି ପାଏ। ଶାରୀରିକ ଦୃଷ୍ଟିରୁ ଧ୍ୟାନ ରକ୍ତଚାପ ନିୟନ୍ତ୍ରଣ, ହୃଦୟ ସ୍ୱାସ୍ଥ୍ୟ ସୁଧାର ଓ ନିଦ୍ରା ସମସ୍ୟା ଦୂର କରିବାରେ ଲାଭଦାୟକ। ମାନସିକ ଓ ଶାରୀରିକ ସ୍ୱାସ୍ଥ୍ୟର ସମନ୍ୱୟ ଧ୍ୟାନ ଦ୍ୱାରା ସମ୍ଭବ।

ଧ୍ୟାନର ସାମାଜିକ ଗୁରୁତ୍ୱ ମଧ୍ୟ ଅତ୍ୟଧିକ। ଧ୍ୟାନ ଅଭ୍ୟାସ କରୁଥିବା ବ୍ୟକ୍ତି ଅଧିକ ସହନଶୀଳ ଓ ସମବେଦନଶୀଳ ହୁଏ। ଏହା ଦ୍ୱାରା ପରିବାର, ସମାଜ ଓ କାର୍ଯ୍ୟକ୍ଷେତ୍ରରେ ସକାରାତ୍ମକ ପରିବେଶ ଗଢ଼ି ଉଠେ।

ବିଶ୍ୱ ଧ୍ୟାନ ଦିବସର ମୂଳ ଉଦ୍ଦେଶ୍ୟ ହେଉଛି ଧ୍ୟାନକୁ ଦୈନିକ ଜୀବନର ଏକ ଅଂଶ କରିବା ପାଇଁ ଲୋକମାନଙ୍କୁ ପ୍ରେରିତ କରିବା। ଏହି ଦିବସ ମାଧ୍ୟମରେ ଶାନ୍ତି, ସହଅବସ୍ଥାନ ଓ ମାନବତାର ବାର୍ତ୍ତା ସାରା ବିଶ୍ୱରେ ପ୍ରସାରିତ ହୁଏ। ସେହିପରି, ବିଶ୍ୱ ଧ୍ୟାନ ଦିବସ ମାନବ ଜୀବନରେ ଧ୍ୟାନର ଆବଶ୍ୟକତାକୁ ଉଦ୍‌ଘାଟିତ କରିଥାଏ ଏବଂ ଏକ ସୁସ୍ଥ, ଶାନ୍ତ ଓ ସନ୍ତୁଳିତ ସମାଜ ଗଠନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ।
ପ୍ରଦୂଷଣ କଲେ ପେଟ୍ରୋଲ୍ ବନ୍ଦ, ନୂଆ ନିୟମ

ରାଜ୍ୟରେ ବଢ଼ୁଥିବା ବାୟୁ ପ୍ରଦୂଷଣକୁ ରୋକିବା ଓ ପରିବେଶ ସୁରକ୍ଷାକୁ ମଜବୁତ କରିବା ଲକ୍ଷ୍ୟରେ ରାଜ୍ୟ ପରିବହନ ପ୍ରାଧିକରଣ (STA) ଏକ କଡ଼ା ଓ ଚରମ ପଦକ୍ଷେପ ନେଇଛି। ଏହି ନୂଆ ନିୟମ ଅନୁସାରେ, ବୈଧ ପ୍ରଦୂଷଣ ପ୍ରମାଣପତ୍ର ଅର୍ଥାତ୍ PUCC (Pollution Under Control Certificate) ନଥିବା କୌଣସି ଯାନକୁ ପେଟ୍ରୋଲ୍ କିମ୍ବା ଡିଜେଲ୍ ଦିଆଯିବ ନାହିଁ। ଏନେଇ STA ପକ୍ଷରୁ ସମସ୍ତ ତୈଳ କମ୍ପାନୀଙ୍କୁ ଆଧିକାରିକ ଭାବେ ଚିଠି ଲେଖାଯାଇଛି।

STA ସୂତ୍ରରୁ ମିଳିଥିବା ସୂଚନା ଅନୁଯାୟୀ, ରାଜ୍ୟରେ ପରିବହନ ଯୋଗୁଁ ବାୟୁ ପ୍ରଦୂଷଣ ଦିନକୁ ଦିନ ଗମ୍ଭୀର ରୂପ ନେଉଛି। ବିଶେଷକରି ପୁରୁଣା ଓ ନିୟମିତ ରକ୍ଷାବେକ୍ଷଣ ନହୋଇଥିବା ଯାନମାନେ ଅଧିକ ପରିମାଣରେ ଧୂଆଁ ଛାଡ଼ି ପରିବେଶକୁ ଦୂଷିତ କରୁଛନ୍ତି। ଏହାର ପ୍ରଭାବ ସାଧାରଣ ଜନଜୀବନ ଓ ଲୋକଙ୍କ ସ୍ୱାସ୍ଥ୍ୟ ଉପରେ ପଡ଼ୁଛି।

ଏହି ପରିସ୍ଥିତିକୁ ଦୃଷ୍ଟିରେ ରଖି STA ଏଭଳି କଡ଼ା ନିଷ୍ପତ୍ତି ନେଇଥିବା କହିଛି। ଆଗାମୀ ଦିନରେ ପେଟ୍ରୋଲ୍ ପମ୍ପରେ ଯାନ ମାଲିକଙ୍କୁ PUCC ପ୍ରମାଣପତ୍ର ଦେଖାଇବାକୁ ପଡ଼ିପାରେ। ଯଦି ପ୍ରମାଣପତ୍ର ବୈଧ ନଥାଏ, ତେବେ ତେଲ ଦିଆଯିବ ନାହିଁ।

ଏହାସହ ସମସ୍ତ ଟୋଲଗେଟରେ ଥିବା ଇ-ଡିଟେକ୍ସନ ବ୍ୟବସ୍ଥାରେ ମଧ୍ୟ PUCC ଯାଞ୍ଚକୁ ସାମିଲ କରାଯାଇଛି। ମୋଟର ଯାନ ଆଇନ ଉଲ୍ଲଙ୍ଘନ କରି ପ୍ରଦୂଷଣ କରୁଥିବା ଯାନମାନଙ୍କ ବିରୋଧରେ ଜରିମାନା ସହ କଡ଼ା କାର୍ଯ୍ୟାନୁଷ୍ଠାନ ନିଆଯିବ।

ରାଜ୍ୟ ସରକାର ଆଶା କରୁଛନ୍ତି ଯେ, ଏହି ନୂଆ ବ୍ୟବସ୍ଥା ଦ୍ୱାରା ଓଡ଼ିଶାର ବିଭିନ୍ନ ଜିଲ୍ଲାରେ ବାୟୁ ଗୁଣାବତ୍ତାରେ ସୁଧାର ଆସିବ ଏବଂ ପରିବହନ କ୍ଷେତ୍ରରୁ ହେଉଥିବା ପ୍ରଦୂଷଣ ଅନେକ କମିବ। STA ପକ୍ଷରୁ ଯାନ ମାଲିକମାନଙ୍କୁ ସମୟ ସମୟରେ ନିଜ PUCC ନବୀକରଣ କରି ନିୟମ ମାନିବାକୁ ଅନୁରୋଧ କରାଯାଇଛି।
ପୁଣି ଝୁଣି ଖାଇଲେ ମଣିଷ ରୁପି ରାକ୍ଷସ,ଧଉଳି ପରେ ସହିଦନଗରରେ ସମାନ ଘଟଣା

ରାଜଧାନୀ ଭୁବନେଶ୍ୱର ପୁଣି ଏକ ଲଜ୍ଜାଜନକ ଘଟଣାରେ କମ୍ପି ଉଠିଛି। ଲିଙ୍ଗିପୁର ଦୟା ନଦୀପଠା ଘଟଣାର ଆଘାତ ସରିନଥିବାବେଳେ ସହିଦନଗର ଅଞ୍ଚଳରୁ ଆସିଥିବା ଗଣଦୁଷ୍କର୍ମ ଅଭିଯୋଗ ରାଜଧାନୀର ସୁରକ୍ଷା ବ୍ୟବସ୍ଥାକୁ ପୁଣି ପ୍ରଶ୍ନବିଦ୍ଧ କରିଛି। ଚାକିରି ଦେବା ନାମରେ ଜଣେ ନାବାଳିକାଙ୍କୁ ଭୁବନେଶ୍ୱରକୁ ଡାକି ଅମାନବୀୟ କାଣ୍ଡ ଘଟାଯାଇଥିବା ଅଭିଯୋଗ ସାମ୍ନାକୁ ଆସିଛି।

ସୂଚନା ଅନୁଯାୟୀ, ପୀଡ଼ିତା ଜଣେ ଅଭିଯୁକ୍ତଙ୍କୁ ପୂର୍ବରୁ ଜାଣିଥିଲେ। ସେ ଡାଟା ଏଣ୍ଟ୍ରି ଅପରେଟର ଚାକିରି କରାଇଦେବାର ପ୍ରଲୋଭନ ଦେଖାଇ ନାବାଳିକାଙ୍କୁ ଭୁବନେଶ୍ୱର ଡାକିଥିଲା। ଗତ ୧୮ ତାରିଖରେ ସହିଦନଗର ଅଞ୍ଚଳରେ ଥିବା ଏକ ଭଡ଼ାଘରକୁ ନେଇ ତାଙ୍କ ସହ ଗଣଦୁଷ୍କର୍ମ କରାଯାଇଥିବା ନେଇ ପୀଡ଼ିତା ଅଭିଯୋଗ କରିଛନ୍ତି।

ଅଭିଯୋଗ ଅନୁଯାୟୀ, ଅଭିଯୁକ୍ତମାନେ ଚାକିରି ଦେବାର ଆଶା ଦେଖାଇ ନାବାଳିକାଙ୍କୁ ଫାନ୍ଦରେ ପକାଇଥିଲେ। ଘଟଣା ପରେ ପୀଡ଼ିତା କୌଶଳକ୍ରମେ ସେଠାରୁ ପଳାଇ ଆସି ସହିଦନଗର ଥାନାରେ ପହଞ୍ଚି ଅଭିଯୋଗ କରିଥିଲେ। ଅଭିଯୋଗ ପାଇ ସହିଦନଗର ଥାନାର ପୋଲିସ ତତ୍ପରତା ପ୍ରଦର୍ଶନ କରି ୨ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି।

ପୋଲିସ ସାଇଣ୍ଟିଫିକ୍ ଟିମ୍ ସହାୟତାରେ ଘଟଣାସ୍ଥଳରୁ ପ୍ରମାଣ ସଂଗ୍ରହ କରିଛି ଏବଂ ମାମଲାର ସମସ୍ତ ଦିଗକୁ ଗଭୀର ଭାବେ ତଦନ୍ତ କରାଯାଉଛି। ରାଜଧାନୀରେ ପୁଣି ଏପରି ଘଟଣା ଘଟିବା ସାଧାରଣ ଲୋକଙ୍କ ମଧ୍ୟରେ ଭୟ ଓ ଅସନ୍ତୋଷ ସୃଷ୍ଟି କରିଛି। ନାବାଳିକାଙ୍କ ସୁରକ୍ଷା ଓ ଚାକିରି ଲୋଭ ଦେଖାଇ, ହେଉଥିବା ଅପରାଧ ଉପରେ କଠୋର ପଦକ୍ଷେପ ନେବାକୁ ସମସ୍ତ ମହଲରୁ ଦାବି ହେଉଛି।
ଶାଶୁକୁ ମାରିଦେଲେ ବୋହୂ ସମୁଦୁଣୀ, ଅଭିଯୋଗ ଆଣିଲା ପୁଅ

ମୋ ମା’କୁ ମାରିଦେଲେ । ମୁଁ ଘରେ ନଥିଲାବେଳେ ମୋ ସ୍ତ୍ରୀ ଆଉ ଶାଶୁ ମିଶି ମୋ ମା’କୁ ମାରି ଦେଇଛନ୍ତି । ମୁଁ ଘରକୁ ଆସିବା ପରେ ମା’କୁ ଖୋଜିଲି । ବହୁତ ସମୟ ଖୋଜିବା ପରେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ମା’କୁ ପାଇଲି ସତ କିନ୍ତୁ ତା ଦେହରେ ଆଉ ଜୀବନ ନଥିଲା । ମୋ ସ୍ତ୍ରୀ ଆଉ ଶାଶୁ ହିଁ ମୋ ମା’ର ଜୀବନ ନେଇଛନ୍ତି । ଏମିତି କୋହଭରା କଣ୍ଠରେ ଅଭିଯୋଗ ଆଣିଛନ୍ତି ମୃତକଙ୍କ ପୁଅ ।

ଅନୁଗୁଳ ସଦର ଥାନା ଅନ୍ତର୍ଗତ ଖଲାରୀ ଜାମୁବନ୍ଧ ଛକ ନିକଟରେ ଘଟିଛି ଭୟଙ୍କର ହତ୍ୟାକାଣ୍ଡ । ପଥରରେ ଛେଚି ଜଣେ ମହିଳାଙ୍କ ହତ୍ୟା କରାଯାଇଛି । ସବୁଠାରୁ ଆଶ୍ଚର୍ଯ୍ୟର କଥା ହେଉଛି ଘରର ବୋହୂ ନିଜ ମା’ ସହ ମିଶି ଶାଶୁଙ୍କୁ ହତ୍ୟା କରିଥିବା ଅଭିଯୋଗ ହୋଇଛି । ଜାମୁବନ୍ଧ ଛକ ନିକଟରେ ଏକ ଭଡା ଘରେ ସଦର ପୋଲିସ ଜଣେ ମହିଳାଙ୍କ ମୃତଦେହ ଉଦ୍ଧାର କରିବା ପରେ ସାରା ଗାଁରେ ଖେଳିଯାଇଛି ଚାଞ୍ଚଲ୍ୟ । ମୃତ ମହିଳା ଜଣଙ୍କ କୁନି ନାୟକ ବୋଲି ଜଣା ପଡିଛି । ପୋଲିସର ପ୍ରାଥମିକ ତଦନ୍ତରୁ କୁନିଙ୍କୁ ହତ୍ୟା କରାଯାଇଥିବା ଜଣାପଡ଼ିଛି I ଏହି ଘଟଣାରେ କୁନିଙ୍କ ବୋହୂ ଏବଂ ସମୁଦୁଣିଙ୍କୁ ଅଟକ ରଖିଛି ପୋଲିସ ।

ସୂଚନା ଅନୁସାରେ, ଗତ କାଲି ରାତି ୧୦ଟା ବେଳେ କୁନିଙ୍କ ପୁଅ କାହ୍ନୁ ନାୟକ ନିଜ ମା’ଙ୍କୁ ଖାଇବା ପାଇଁ ଡାକିଥିଲେ । କିନ୍ତୁ ଘରର କବାଟ ବନ୍ଦ ରହିଥିବା ବେଳେ କୌଣସି ଉତ୍ତର ଦେଇନଥିଲେ କୁନି । ସନ୍ଦେହ ହେବାରୁ କବାଟ ଖୋଲି ଦେଖିଥିଲେ କାହ୍ନୁ । ରକ୍ତ ଜୁଡୁବୁଡ଼ୁ ଅବସ୍ତାରେ ମା’ ତଳେ ପଡ଼ିଥିବା ଦେଖି ତାଙ୍କ ପାଦ ତଳୁ ଯେମିତି ମାଟି ଖସିଗଲା । ସଙ୍ଗେ ସଙ୍ଗେ ସଦର ପୋଲିସକୁ କାହ୍ନୁ ଖବର ଦେଇଥିଲେ । ପରେ ପୋଲିସ ଘଟଣାସ୍ଥଳରେ ପହଁଚି ଆରମ୍ଭ କରିଛି ତଦନ୍ତ I ଆଜି ସକାଳୁ ସାଇଣ୍ଟିଫିକ ଟିମ୍ ଏବଂ ସନ୍ଧାନୀ କୁକୁର ଆସି ଅଧିକ ପଚରାଉଚରା କରିବା ସହ ମୃତଦେହକୁ ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଇଛି ।

ମାକୁ ଖୋଜି ଖୋଜି ପାଉନି ପୁଅ। କୋହଭରା କଣ୍ଠରେ ଡାକୁଛି ମା କୁଆଡେ ଗଲୁ ମା’କୁ ପାଇଲା ବେଳକୁ ମା’ର ନଥିଲା ଜୀବନ। ଏଭଳି ମର୍ମାହତ ଦୃଶ୍ୟ ଦେଖିବାକୁ ମିଳିଛି ଅନୁଗୁଳ ସଦର ଥାନା ଅନ୍ତର୍ଗତ ଖଲାରୀ ଜାମୁବନ୍ଧ ଛକ ନିକଟରେ । ହତ୍ୟାକାରୀ କେହି ପର ଲୋକ ନୁଁହନ୍ତି ନିଜ ଝିଅ ଭଳି ଭାବୁଥିବା ବୋହୂ ଆଉ ନିଜର ସମୁଦୁଣୀ । ଶାଶୁ ପାଇଁ କଲା ସାଜିଲା ବୋହୂ ।
ତେବେ କୁନିଙ୍କ ହତ୍ୟା ପଛରେ କିଏ ଦାୟୀ ? ସତରେ କଣ ବୋହୂ ଏମିତି ହତ୍ୟାକାଣ୍ଡ କରିଛି ନା ଆଉ କିଏ ଏଥିରେ ସାମିଲ ଅଛି । ତେବେ ଘରୋଇ କଳିରୁ ଏମିତି ହୋଇଥିବା ସନ୍ଦେହ କରାଯାଉଛି ସତ କିନ୍ତୁ ତଦନ୍ତ ପରେ ହିଁ ସବୁ ସତ ପଦାକୁ ଆସିବ ।
‘ଡକାୟତ’ଫିଲ୍ମର ଟିଜର ରିଲିଜ୍, ଆକ୍ସନ ମୋଡ଼ରେ ନଜର ଆସିଲେ ଆଦିବି ସେଶ୍ ଏବଂ ମୃଣାଲ ଠାକୁର

ଶୋନେଲ ଦେବଙ୍କ ଫିଲ୍ମ ‘ଡାକଇଟ୍’ର ଟିଜର ବର୍ତ୍ତମାନ ସାମ୍ନାକୁ ଆସିଛି । ଏହି ଫିଲ୍ମରେ ଆଦିବି ସେଶ୍ ଏବଂ ମୃଣାଲ ଠାକୁରଙ୍କୁ ମୁଖ୍ୟ ଭୂମିକାରେ ଦେଖିବାକୁ ମିଳିଛି । ଏହି ଫିଲ୍ମରେ ଅନୁରାଗ କଶ୍ୟପଙ୍କୁ ମଧ୍ୟ ଏକ ଗୁରୁତ୍ବପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି । ଯାହା ତେଲୁଗୁ ଫିଲ୍ମର ଡେବ୍ୟୁ । ଏହି ଟିଜରଟି ସେଶଙ୍କ ଜନ୍ମଦିନର ଗୋଟିଏ ଦିନ ପୂର୍ବରୁ ରିଲିଜ ହୋଇଥିଲା । ଏଥିସହ ନାଗାର୍ଜୁନଙ୍କ ଏକ କମେଡ଼ି ମଧ୍ୟ ଦେଖିବାକୁ ମିଳିବ ।

ଏହି ଟିଜରରେ ସେଶ୍ ଏବଂ ମୃଣାଲଙ୍କ ଚରିତ୍ରରେ ସେମାନଙ୍କର ବ୍ରେକ୍ଅପ୍ ୱାଲା ଲଭ୍ ଷ୍ଟୋରୀ ଦେଖିବାକୁ ମିଳୁଛି । ଏହି ଟିଜରର ଆରମ୍ଭ ସେଶ ତାଙ୍କର ଜଣେ ବନ୍ଧୁଙ୍କ ସହିତ କଥା ହେଉଥିବା ସମୟରେ ମୃଣାଲ ତାଙ୍କ ପ୍ଲାନରେ ସାମିଲ ହୋଇଛନ୍ତି । କିନ୍ତୁ ସେ ପ୍ରପୋଜ୍ କରିବା ମାତ୍ରେ ଟିଜର ଆକ୍ସନ ମୋଡ଼କୁ ଯାଇଛି । ଦୁଇଜଣ ଡକାୟତଙ୍କ ଭୂମିକାରେ ଡକାୟତମାନେ ଡକାୟତି କରୁଛନ୍ତି । ଅନୁରାଗ କଶ୍ୟପ, ପ୍ରକାଶ ରାଜ, ଅତୁଲ କୁଲକର୍ଣ୍ଣି ଏବଂ ସୁନୀଲଙ୍କୁ ମଧ୍ୟ ଫିଲ୍ମରେ ଦେଖିବାକୁ ପାଇବେ ଦର୍ଶକ । ଟିଜରଟି ସାମ୍ନାକୁ ଆସିବା ପରେ ପ୍ରଶଂସକମାନେ ଫିଲ୍ମ ଦେଖିବାକୁ ନେଇ ଉତ୍ସାହର ସହିତ ଅପେକ୍ଷା କରିଛନ୍ତି ।

ଯଦି ଫିଲ୍ମ ରିଲିଜ କଥା କୁହାଯାଏ ତେବେ ୧୯ ମାର୍ଚ୍ଚ ୨୦୨୬ରେ ରିଲିଜ ହେବ ବୋଲି କୌଣସି ଏକ ସୂତ୍ରରୁ ଜଣାପଡିଛି ।
ଘର ଭଡା ଦେବା ପଡିଲା ମହାଙ୍ଗା, ମାଲିକାଣୀଙ୍କ ଜୀବନ ନେଲେ ଭଡ଼ାଟିଆ

ଭଡ଼ା ଟଙ୍କା ମାଗିବାକୁ ଯାଇଥିଲେ ଯେ ଭଡ଼ାଟିଆଙ୍କ ହାତରେ ମାଲିକାଣୀଙ୍କ ଜୀବନ ଗଲା । ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଘଟଣା ପୁରା ସତ । ଉତ୍ତର ପ୍ରଦେଶର ଗାଜିଆବାଦ ଜିଲ୍ଲାରୁ ଆସିଛି ଏଭଳି ଏକ ଆଶ୍ଚର୍ଯ୍ୟଜନକ ଘଟଣା । ନନ୍ଦଗ୍ରାମ ପୋଲିସ ଷ୍ଟେସନ ଅଞ୍ଚଳର ରାଜନଗର ଏକ୍ସଟେନସନ ସ୍ଥିତ ପଶ ଔରା କାଇମେରା ସୋସାଇଟିରେ ହୋଇଛି ହତ୍ୟାକାଣ୍ଡ । ଭଡା ବିବାଦକୁ ନେଇ ଜଣେ ଘର ମାଲିକାଣୀଙ୍କୁ ନିର୍ମମ ଭାବରେ ହତ୍ୟା କରାଯାଇଛି । ଆଉ ମହିଳାଙ୍କୁ ହତ୍ୟା କରି ତାଙ୍କ ମୃତଦେହକୁ ଏକ ସୁଟକେସରେ ଭର୍ତ୍ତି କରି ଖଟ ତଳେ ଲୁଚାଇ ଦେଇଥିଲେ ଅଭିଯୁକ୍ତ ।

ଔରା କାଇମେରା ସୋସାଇଟିର ଏମ୍-୧୦୫ ନିବାସୀ ଉମେଶ ଶର୍ମାଙ୍କ ପତ୍ନୀ ଦୀପଶିଖା ଶର୍ମା ହୋଇଛନ୍ତି ହତ୍ୟାର ଶିକାର । ପୋଲିସ କହିବା ଅନୁଯାୟୀ, ଦୀପଶିଖା ଶର୍ମାଙ୍କ ଫ୍ଲାଟରେ ଅଜୟ ଗୁପ୍ତା ଏବଂ ଆକ୍ରିତି ଗୁପ୍ତା ନାମକ ଏକ ଦମ୍ପତି ଭଡାଟିଆ ଭାବରେ ରହୁଥିଲେ । ବକେୟା ଭଡାକୁ ନେଇ ଉଭୟଙ୍କ ମଧ୍ୟରେ ଦୀର୍ଘ ଦିନ ଧରି ବିବାଦ ଚାଲିଥିଲା । ଆଉ ଏହି ବିବାଦ ଯେ ଦୀପଶିଖାଙ୍କ ଜୀବନ ନେଇଯିବ କେହି କେବେ କଳ୍ପନା କରି ନଥିଲେ । ଦୀପଶିଖା ଭଡ଼ାଟିଆଙ୍କ ଠାରୁ ଭଡ଼ା ଟଙ୍କା ଆଣିବାକୁ ଯାଇଥିଲେ । କିନ୍ତୁ ବିଳମ୍ବିତ ରାତି ପର୍ଯ୍ୟନ୍ତ ଘରକୁ ନଫେରିବାରୁ ଘରେ ରହୁଥିବା ଚାକରାଣୀର ସନ୍ଦେହ ବଢ଼ିଥିଲା । ଦୀପଶିଖାଙ୍କୁ ଖୋଜି ଖୋଜି ଭଡ଼ାଟିଆଙ୍କ ଘରେ ପହଞ୍ଚିଥିଲେ ସେ । ଯେଉଁଠାରେ ଦୀପଶିଖା ଶର୍ମାଙ୍କ ମୃତଦେହ ଏକ ଲାଲ ସୁଟକେସରୁ ମିଳିଥିଲା ।

ଡିସେମ୍ବର ୧୭ ତାରିଖ ରାତି ପ୍ରାୟ ୧୧.୧୫ ସମୟରେ ନନ୍ଦଗ୍ରାମ ପୋଲିସ ଷ୍ଟେସନକୁ ଔରା କାଇମେରା ସୋସାଇଟିରେ ମହିଳାଙ୍କ ହତ୍ୟା ନେଇ ଖବର ଆସିଥିଲା । ସୂଚନା ପାଇ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା । ପୋଲିସ ସୋସାଇଟିର ସିସିଟିଭି ଫୁଟେଜ୍ ଯାଞ୍ଚ କରିଥିଲା, ଯେଉଁଥିରେ ଦୀପଶିଖା ଶର୍ମା ସନ୍ଧ୍ୟାରେ ଫ୍ଲାଟ ଆଡକୁ ଚାଲି ଚାଲି ଯାଉଥିଲେ କିନ୍ତୁ ଆଉ ଫେରି ନଥିଲେ । ଏହା ପରେ ଭଡାଟିଆ ଦମ୍ପତିଙ୍କ ଉପରେ ସନ୍ଦେହ ଆହୁରି ବଢ଼ିଥିଲା ।
ସୁନା ଦର ଦେଖି ଲୋକେ ଛାନିଆ

ଗହଣା କିଣିବା ପୂର୍ବରୁ ନଜର ପକାନ୍ତୁ କେଉଁ ସହରରେ କେତେ ରହିଛି ସୁନା ଦର । ତେବେ ଯଦି ଆପଣ ଆଜି ସୁନା କିଣିବାକୁ ଚାହୁଁଛନ୍ତି ବା ଯୋଜନା କରିଛନ୍ତି ତେବେ ପ୍ରଥମେ ଜାଣି ନିଅନ୍ତୁ ଆଜିର ସୁନା ଦର ।

ଆଜି ଭାରତୀୟ ବଜାରରେ ୨୪ କ୍ୟାରେଟ ସୁନା ୧,୩୪,୮୪୦ ଟଙ୍କା ରହିଛି । ସେହିପରି ୨୨ କ୍ୟାରେଟ ସୁନା ଦର ୧,୨୩,୬୦୦ ଟଙ୍କା ଛୁଇଁଛି । ସେହିପରି ରାଜଧାନୀ ଭୁବନେଶ୍ବରରେ ୨୪ କ୍ୟାରେଟ୍ ସୁନା ମୂଲ୍ୟ ୧୦ ଗ୍ରାମ ପିଛା ୧,୩୪,୮୪୦ ଟଙ୍କା ରହିଥିବା ବେଳେ ୨୨ କ୍ୟାରେଟ୍ ସୁନାର ମୂଲ୍ୟ ହଜାର ୧,୨୩,୬୦୦ ଟଙ୍କାକୁ ପହଞ୍ଚିଛି । ସେହିପରି ମୁମ୍ବାଇରେ ୨୪ କ୍ୟାରେଟ୍ ମୂଲ୍ୟ ୧,୩୫,୭୧୦ ଟଙ୍କା ଓ ୨୨ କ୍ୟାରେଟ୍ ମୂଲ୍ୟ ୧,୨୪,୪୦୦ ଟଙ୍କା ରହିଛି । ନୂଆଦିଲ୍ଲୀରେ ୨୪ କ୍ୟାରେଟ୍ ୧,୩୪,୯୯୦ ଟଙ୍କା ଓ ୨୨ କ୍ୟାରେଟ୍ ୧,୨୩,୭୫୦ ଟଙ୍କା ରହିଛି । ଦକ୍ଷିଣ ଭାରତର ପ୍ରମୁଖ ସହର ଚେନ୍ନାଇରେ ୨୪ କ୍ୟାରେଟ ମୂଲ୍ୟ ୧,୩୪,୭୩୦ ଟଙ୍କା ଥିବା ବେଳେ ୨୨ କ୍ୟାରେଟ ମୂଲ୍ୟ ୧,୨୩,୫୦୦ ଟଙ୍କା ରହିଛି । ପୂର୍ବ ଭାରତର ପ୍ରମୁଖ ସହର କୋଲକାତାରେ ଯଥାକ୍ରମେ ୧,୩୪,୮୪୦ ଓ ୧,୨୩,୬୦୦ ଟଙ୍କା ରହିଛି । ଅନ୍ୟପଟେ ରୁପା ମୂଲ୍ୟ କିଲୋ ପିଛା ୨,୧୧,୦୦୦ ଟଙ୍କା ହୋଇଛି ।

ସୁନା ଦରକୁ ନେଇ ଅନେକ ଲୋକଙ୍କ ମନରେ ଆଶଙ୍କା ସୃଷ୍ଟି ହୋଇଛି । ବଡୁଛି ଯେପରି ଦିନ ସେମିତି ବଢୁଛି ସୁନା ଦର । ସୁନା ଦରକୁ ନେଇ ମଧ୍ୟବିତ୍ତ ପରିବାର ଲୋକ ବହୁତ ଚିନ୍ତିତ ଅଛନ୍ତି। ଗୋଟେ ମଧ୍ୟବିତ୍ତ ପରିବାରର ମା ତାର ଝିଅକୁ ବାହା ଦେଇପାରୁନି। ସୁନା ଦର ହୋ ହୋ ହୋଇ ବଢ଼ିବାରେ ଲାଗିଛି । ଲୋକମାନଙ୍କର ସମସ୍ୟା ବୁଝିବାକୁ ସରକାର ନାରାଜ । ସୁନା ଦାରାକୁ ନେଇ ମାଝୀ ବାବୁ କାହିଁକି ଚୁପ ବସିଛନ୍ତି । ଏହା କେବଳ ଓଡ଼ିଶାରେ ନୁହେଁ ବରଂ ରାଜ୍ୟ ଏବଂ ରାଜ୍ୟ ବାହାରେ ସୁନା ଦରକୁ ନେଇ ଅନେକ ଲୋକ ଚିନ୍ତା ଗ୍ରସ୍ତରେ ଜୀବନଯାପନ କରୁଛନ୍ତି । ଏହାକୁ ନେଇ ରାଜ୍ୟ ସରକାର ନା କେନ୍ଦ୍ର ସରକାର କାହାର ପାଟି ଫିଟୁନି।
ଦିଲ୍ଲୀ ଗସ୍ତ ପରେ ରାଜ୍ୟ ବିଜେପିର ବଡ଼ ବୈଠକ

ଆଜି ରାଜ୍ୟ ରାଜନୀତିରେ ବିଜେପିର ବଡ଼ ଦିନ। ଭୁବନେଶ୍ୱର ସ୍ଥିତ ବିଜେପି ପାର୍ଟି ମୁଖ୍ୟାଳୟରେ ସକାଳ ୧୦ଟାରେ ଦଳର ଗୁରୁତ୍ୱପୂର୍ଣ୍ଣ ବୈଠକ ବସିବ। ଏହି ବୈଠକରେ ଦଳର ସମସ୍ତ ବିଧାୟକ, ସମସ୍ତ ମନ୍ତ୍ରୀ, ମୁଖ୍ୟମନ୍ତ୍ରୀ ମୋହନ ମାଝୀ ଓ ରାଜ୍ୟ ବିଜେପି ସଭାପତି ମନମୋହନ ସାମଲ ଉପସ୍ଥିତ ରହିବେ। ଦଳର ଶୀର୍ଷ ନେତୃତ୍ୱ ଏକେ ମଞ୍ଚରେ ଥିବାରୁ ବୈଠକଟିକୁ ନେଇ ରାଜନୈତିକ ମହଳରେ ବିଶେଷ ଆଗ୍ରହ ସୃଷ୍ଟି ହୋଇଛି।

କୁହାଯାଉଛି, ଏହି ବୈଠକ କେବଳ ସାଧାରଣ ଆଲୋଚନା ପାଇଁ ନୁହେଁ, ବରଂ ସରକାର ଓ ସଂଗଠନ ମଧ୍ୟରେ ସମନ୍ୱୟ ମଜବୁତ କରିବା, ତଳସ୍ତରର ସ୍ଥିତି ସମୀକ୍ଷା କରିବା ଓ ଆଗାମୀ ଦିନର ରାଜନୈତିକ ରଣନୀତି ତୟାରି କରିବା ପାଇଁ ଗୁରୁତ୍ୱ ଦିଆଯିବ। ନିକଟରେ ରାଷ୍ଟ୍ରୀୟ ସଂଗଠନ ମନ୍ତ୍ରୀଙ୍କ ଦ୍ୱାରା ହୋଇଥିବା ରୁଦ୍ଧଦ୍ୱାର ବୈଠକ ଏବଂ ଦିନକ ତଳେ ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତ ପରେ, ଆଜିର ବୈଠକକୁ ଏକ ଫଲୋ-ଅପ୍ ମନ୍ଥନ ଭାବରେ ଦେଖାଯାଉଛି।

ବୈଠକରେ ସରକାରୀ କାର୍ଯ୍ୟକ୍ରମଗୁଡ଼ିକୁ କିପରି ଦ୍ରୁତ ଭାବେ ଲୋକଙ୍କ ପର୍ଯ୍ୟନ୍ତ ପହଞ୍ଚାଯିବ, ସଂଗଠନକୁ କିପରି ଆଉ ସକ୍ରିୟ କରାଯିବ ଓ ଦଳୀୟ ଶିଷ୍ଟାଚାର ନେଇ କଣ ପଦକ୍ଷେପ ନିଆଯିବ—ସେଥିରେ ମଧ୍ୟ ଆଲୋଚନା ହେବାର ସମ୍ଭାବନା ରହିଛି। ସେଥିସହ ଜନସମ୍ପର୍କ, ମାଇଦାନୀ କାର୍ଯ୍ୟ ଓ ସରକାର–ଦଳ ସମନ୍ୱୟ ଉପରେ ନୂଆ ନିର୍ଦ୍ଦେଶ ଆସିପାରେ।

ସମଗ୍ର ଭାବେ, ଆଜିର ବୈଠକକୁ ରାଜ୍ୟ ବିଜେପିର ଭବିଷ୍ୟତ ଦିଗନିର୍ଦ୍ଦେଶ ନିର୍ଣ୍ଣୟ କରୁଥିବା ଏକ ଗୁରୁତ୍ୱପୂର୍ଣ୍ଣ ମଞ୍ଚ ଭାବରେ ଦେଖାଯାଉଛି।