Blog

ପାରାଦୀପରେ ସଲଫ୍ୟୁରିକ୍ ଏସିଡ ପ୍ଲାଣ୍ଟ -୩ ଉଦଘାଟନ କଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା

ପାରାଦ୍ଵୀପ ଇଫକୋ କାରଖାନା ପରିସରରେ ତିଆରି ହୋଇଥିବା ସଲଫ୍ୟୁରିକ୍ ଏସିଡ ପ୍ଲାଣ୍ଟ -୩ କୁ ଉଦଘାଟନ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହା। ୭୫୦ କୋଟି ଟଙ୍କାରେ ନିର୍ମିତ ଏହି ପ୍ଲାଣ୍ଟ ଦୈନିକ ୨ ହଜାର ମେଟ୍ରିକ୍ ଟନ୍ ଉତ୍ପାଦନ କ୍ଷମତା ରଖିଛି। ଏହି ପ୍ଲାଣ୍ଟ ଯୋଗୁଁ ଇଫକୋ କାରଖାନା ଅନ୍ୟ ଦେଶରୁ ସଲଫ୍ୟୁରିକ୍ ଏସିଡ ଆମଦାନୀ ବନ୍ଦ କରିବ ବୋଲି କୁହାଯାଇଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ଏହି ପ୍ଲାଣ୍ଟ ଦ୍ବାରା ପ୍ରଦୁଃଷଣ ର ମାତ୍ରା ମଧ୍ୟ କମ ହେବ। କିନ୍ତୁ ଏହି ପ୍ଲାଣ୍ଟ କେବଳ ଇଫକୋ ର ଆବଶ୍ୟକତା କୁ ପୂରଣ କରିବା ପାଇଁ ନୁହେଁ, ଦେଶର ଅନ୍ୟ କମ୍ପାନୀ ଗୁଡ଼ିକୁ ଆବଶ୍ୟକ ହେଉଥିବା ସଲଫ୍ୟୁରିକ୍ ଏସିଡକୁ ଇଫକୋ ଯୋଗାଇବାର ସଙ୍କଳ୍ପ ନେବାକୁ ଆହ୍ବାନ ଦେଇଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା।

ଏହି କାର୍ଯ୍ୟକ୍ରମରେ ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀ ଯୋଗଦେଇ ପାରାଦ୍ଵୀପ ହେଉଛି ଓଡ଼ିଶା ବିକାଶ ର ଏକ ମୁଖ୍ୟ ଆଧାର। ଏବେ ଏହାର ଉନ୍ନତିକରଣର ଆରମ୍ଭ ହୋଇଛି, ଆଗକୁ ଅଧିକ କାରଖାନା ସହିତ ସ୍ବତନ୍ତ୍ର ଆର୍ଥିକ କରିଡ଼ର ଦ୍ବାରା ପରିବହନ, ପର୍ଯ୍ୟଟନ କୁ କ୍ରୀୟାଶୀଳ କରିବାର ବ୍ୟବସ୍ଥା ଜାରି ରହିଛି ବୋଲି ପ୍ରକାଶ କରିଥିଲେ। ଏହି ଲୋକାର୍ପଣ କାର୍ଯ୍ୟକ୍ରମ ରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ସ୍ଥାନୀୟ ବିଧାୟକ ତଥା ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁ, ଜଗତସିଂହପୁର ସାଂସଦ ବିଭୁପ୍ରସାଦ ତରାଇ, ଜଗତସିଂହପୁର ବିଧାୟକ ଅମରେନ୍ଦ୍ର ଦାସ, ଇଫକୋ ଅଧ୍ୟକ୍ଷ ଦିଲ୍ଲୀପ ସିଙ୍ଘାଣିଆ, ଇଫକୋ ପ୍ରବନ୍ଧ ନିର୍ଦେଶକ କେ ଜେ ପଟେଲ୍ ଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ।
ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କୁ ସ୍ମରଣ କଲା ପାରାଦ୍ଵୀପ, ବିଜେଡି ପକ୍ଷରୁ ବିଭିନ୍ନ କାର୍ଯ୍ୟକ୍ରମ

ପାରାଦ୍ଵୀପ କେବେ ବି ଭୁଲିବନି ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କୁ। ତାଙ୍କର ସଙ୍କଳ୍ପ ଓ ଦୂରଦୃଷ୍ଟି ସମ୍ପନ୍ନ ଚିନ୍ତାଧାରା ଯୋଗୁଁ ଆଜି ପାରାଦ୍ଵୀପ ଭାରତର ଏକ ନମ୍ବର ମେଜର ପୋର୍ଟ ର ମାନ୍ୟତା ହାସଲ କରିଛି। ସେହିପରି ଓଡ଼ିଶା ଓ ଓଡ଼ିଶାର ମହିଳା ମାନଙ୍କ ଙ୍କ ପାଇଁ ବିଜୁ ବାବୁ ଦେଖିଥିବା ସ୍ବପ୍ନ ତାଙ୍କର ସୁପୁତ୍ର ନବୀନ ପଟ୍ଟନାୟକ ପୂରଣ କରିବାରେ ସଫଳ ହୋଇଛନ୍ତି।

୨୪ ବର୍ଷ ମଧ୍ୟରେ ନବୀନ ପଟ୍ଟନାୟକ ମା ମାନଙ୍କୁ ସ୍ବାବଲମ୍ବୀ କରିବାରେ ସଫଳ ହୋଇଛନ୍ତି। ଆଜି ପ୍ରବାଦ ପୁରୁଷ ବିଜୁ ପଟ୍ଟନାୟକ ଙ୍କ ୧୧୦ ତମ ଜନ୍ମ ଜୟନ୍ତୀ ଅବସରରେ ପାରାଦ୍ଵୀପ ବିଜୁ ଜନତା ଦଳ ଓ ବିଜୁ ପଟ୍ଟନାୟକ ଟ୍ରଷ୍ଟ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ଏହି ମତ ଦେଇଛନ୍ତି ବିଜୁ ପ୍ରେମୀ। ଦଳ ପକ୍ଷରୁ ସକାଳୁ ଅଠରବାଙ୍କି ସ୍ଥିତ ବିଜୁ ପଟ୍ଟନାୟକ ଙ୍କ ପ୍ରତିମୂର୍ତ୍ତି ରେ ମାଲ୍ୟାର୍ପଣ କରାଯିବା ସହିତ ମେଡିକାଲ ରେ ଫଳ ବଣ୍ଟନ, ଅସହାୟ ମାନଙ୍କୁ ଖାଦ୍ୟ ବଣ୍ଟନ କରାଯାଇଥିବା ବେଳେ ସନ୍ଧ୍ୟାରେ ଏକ ସଭାର ଆୟୋଜନ କରାଯାଇଥିଲା।

ଏଥିରେ ପୂର୍ବତନ ବିଧାୟକ ସମ୍ବିତ ରାଉତରାୟ, ନଗର ବିଜେଡି ସଭାପତି କୁମରବର ନାୟକ , ମ୍ୟୁନିସିପାଲଟି ଅଧ୍ୟକ୍ଷ ବସନ୍ତ ବିଶ୍ବାଳ, ମହିଳା ନେତ୍ରୀ ସବିତା ମହାପାତ୍ର ଙ୍କ ସମେତ ବହୁ ବିଜେଡି ନେତା ଓ ପାରିଷଦ ଯୋଗଦେଇ ବିଜୁ ପଟ୍ଟନାୟକଙ୍କ ଜୀବନୀ ସମ୍ପର୍କରେ ଆଲୋଚନା କରିଥିଲେ। ଏହି କାର୍ଯ୍ୟକ୍ରମରେ ପାରାଦ୍ଵୀପ ର ୧୯ ଟି ଓ୍ବାର୍ଡ ର ଶତାଧିକ ମହିଳା ଓ ପୁରୁଷ ସାମିଲ ହୋଇଥିଲେ।
୧୬ ବର୍ଷରୁ କମ୍ ପିଲାଙ୍କ ପାଇଁ ସୋସିଆଲ୍‌ ମିଡିଆ ବ୍ୟାନ୍‌, କର୍ଣ୍ଣାଟକର ବଡ଼ ନିଷ୍ପତ୍ତି

ସାମାଜିକ ଗଣମାଧ୍ୟମ ବ୍ୟବହାରକୁ ନେଇ ବଡ଼ ପଦକ୍ଷେପ। ଦକ୍ଷିଣ ଭାରତର ରାଜ୍ୟ କର୍ଣ୍ଣାଟକରେ ଛୋଟ ପିଲାଙ୍କୁ ଗଣମାଧ୍ୟମ ଠୁ ଦୂରେଇରଖିବା ପାଇଁ କୁହାଯାଇଛି। ୧୬ ବର୍ଷରୁ କମ୍‌ ବୟସର ପିଲାଙ୍କ ପାଇଁ ସୋସିଆଲ୍‌ ମିଡିଆ ବ୍ୟବହାର ଉପରେ ପ୍ରତିବନ୍ଧ ଲଗାଇବାକୁ ରାଜ୍ୟ ସରକାର ପ୍ରସ୍ତୁତି ନେଉଛନ୍ତି। ରାଜ୍ୟର ମୁଖ୍ୟମନ୍ତ୍ରୀ Siddaramaiah ଶୁକ୍ରବାର ୨୦୨୬–୨୭ ଆର୍ଥିକ ବର୍ଷର ବଜେଟ୍‌ ପ୍ରସ୍ତୁତି ସମୟରେ ଏହି ଘୋଷଣା କରିଛନ୍ତି। ଛୋଟ ପିଲାମାନଙ୍କ ମଧ୍ୟରେ ସ୍ମାର୍ଟଫୋନ୍‌ ବ୍ୟବହାର ବୃଦ୍ଧି, ଅନଲାଇନ୍‌ ନିରାପତ୍ତା ସମସ୍ୟା ଏବଂ ଦୀର୍ଘ ସମୟ ଧରି ମୋବାଇଲ୍‌ ବ୍ୟବହାର କରିବା ନେଇ ଚିନ୍ତା ପ୍ରକଟ କରି ସରକାର ଏହି ପଦକ୍ଷେପ ନେବାକୁ ଠିକ୍‌ କରିଛନ୍ତି।

ସରକାରଙ୍କ ମତାନୁସାରେ, ଅପ୍ରାପ୍ତବୟସ୍କ ପିଲାମାନେ ସୋସିଆଲ୍‌ ମିଡିଆରେ ଅନେକ ଅସୁରକ୍ଷିତ ପରିସ୍ଥିତିରେ ପଡ଼ୁଛନ୍ତି ଓ ତାଙ୍କର ମନୋସ୍ୱାସ୍ଥ୍ୟ ଓ ପଢ଼ାଶୁଣା ଉପରେ ମଧ୍ୟ ପ୍ରଭାବ ପଡ଼ୁଛି। ଏହି କାରଣରୁ ୧୬ ବର୍ଷରୁ କମ୍‌ ବୟସର ପିଲାମାନଙ୍କୁ ସୋସିଆଲ୍‌ ମିଡିଆରୁ ଦୂରେ ରଖିବାକୁ ଏକ ନୂଆ ନୀତି ଆଣିବା ପାଇଁ ପଦକ୍ଷେପ ନିଆଯାଉଛି। ଏହା ଲାଗୁ ହେଲେ କର୍ଣ୍ଣାଟକ ଦେଶରେ ଏପରି ପଦକ୍ଷେପ ନେବାରେ ପ୍ରଥମ ରାଜ୍ୟ ହେବ। ଏହା ପୂର୍ବରୁ ଆନ୍ଧ୍ର ପ୍ରଦେଶ ଓ ଗୋଆ ସରକାର ମଧ୍ୟ ଛୋଟ ପିଲାଙ୍କ ସୋସିଆଲ୍‌ ମିଡିଆ ବ୍ୟବହାର ଉପରେ କଟକଣା ଲଗାଇବା ନେଇ ଚିନ୍ତା କରୁଥିଲେ। ରାଜ୍ୟର ଆଇଟି ଓ ବାୟୋଟେକ୍ନୋଲୋଜି ମନ୍ତ୍ରୀ Priyank Kharge ମଧ୍ୟ ପୂର୍ବରୁ ଏହି ବିଷୟରେ ସରକାର ଚିନ୍ତା କରୁଥିବା କଥା କହିଥିଲେ। ଏହି ପ୍ରସ୍ତାବ ଲାଗୁ ହେଲେ ଛୋଟ ପିଲାମାନଙ୍କ ଅନଲାଇନ୍‌ ସୁରକ୍ଷା ନେଇ ଏକ ନୂଆ ମଡେଲ୍‌ ସୃଷ୍ଟି ହେବ ବୋଲି ମନେ କରାଯାଉଛି।
ମୋବାଇଲ୍ ଫୋନ୍ ଛଡ଼ାଇ ନେବା ପରେ ଯୁବତୀଙ୍କ ହିଂସାତ୍ମକ ପ୍ରତିକ୍ରିୟା

ଭାଗଲପୁର ସହରର ସାଣ୍ଡିସ୍ କମ୍ପାଉଣ୍ଡ ପଡ଼ିଆରେ ଏକ ମୋବାଇଲ୍ ଫୋନ୍ ଛିନତାଇ ଘଟଣା ସାମ୍ନାକୁ ଆସିଛି । ଖବର ଅନୁଯାୟୀ, ଜଣେ ଯୁବକ ଘଟଣାସ୍ଥଳରେ ଉପସ୍ଥିତ ଜଣେ ଯୁବତୀଙ୍କଠାରୁ ମୋବାଇଲ୍ ଫୋନ୍ ଛଡ଼ାଇ ନେଇ ଦୌଡିବାକୁ ଲାଗିଲା । ତେବେ, ମହିଳା ଏବଂ କିଛି ଦେଖଣାହାରୀ ତୁରନ୍ତ ଅଭିଯୁକ୍ତଙ୍କୁ ପିଛା କରି କାବୁ କରିଥିଲେ।

ଧରାପଡ଼ିବା ପରେ, ମହିଳା ଏବଂ ଅନ୍ୟମାନେ ତାକୁ ପ୍ରବଳ ମାଡ଼ ମାରିଥିଲେ। ଏହି ସମୟରେ ମହିଳାଙ୍କ କ୍ରୋଧ ଏବଂ ପ୍ରତିକ୍ରିୟା ବହୁତ ତୀବ୍ର ହେବା ଦେଖାଯାଇଥିଲା । ତଦନ୍ତ ସମୟରେ, ଅଭିଯୁକ୍ତ ପ୍ରକାଶ କରିଥିଲା ଯେ ସେ ଚୋରି ମୋବାଇଲ୍ ଫୋନ୍‌ଟିକୁ ନିକଟସ୍ଥ ବୁଦାରେ ଫିଙ୍ଗି ଦେଇଥିଲା। ସ୍ଥାନୀୟ ବାସିନ୍ଦାଙ୍କ ଦ୍ୱାରା ଚିହ୍ନଟ ହେବା ପରେ ବୁଦାରୁ ମୋବାଇଲ୍ ଫୋନ୍‌ଟି ଉଦ୍ଧାର କରାଯାଇଥିଲା।

ଏହା ପରେ ଅଭିଯୁକ୍ତକୁ ତିଲକା ମାଞ୍ଝି ପୋଲିସ ଷ୍ଟେସନକୁ ହସ୍ତାନ୍ତର କରାଯାଇଥିଲା। ପୋଲିସ କହିଛି ଯେ ସମ୍ପୂର୍ଣ୍ଣ ମାମଲାର ତଦନ୍ତ ଚାଲିଛି ଏବଂ ଯୁବତୀ ଏବଂ ସ୍ଥାନୀୟ ବାସିନ୍ଦାଙ୍କ ବୟାନ ରେକର୍ଡ କରାଯାଉଛି।

ଘଟଣା ପରେ ସ୍ଥାନୀୟ ବାସିନ୍ଦା ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇ କହିଛନ୍ତି ଯେ ପଡ଼ିଆ ଏବଂ ଆଖପାଖ ଅଞ୍ଚଳରେ ପ୍ରାୟତଃ ଭିଡ଼ ହୁଏ, ଯାହା ଫଳରେ ମହିଳା ଏବଂ ଯୁବପିଢ଼ିଙ୍କ ପାଇଁ ଏପରି ଘଟଣା ଘଟିବାର ସମ୍ଭାବନା ଅଧିକ।

ବିଶେଷଜ୍ଞଙ୍କ କହିବା କଥା ଯେ ମୋବାଇଲ ଛିନତାଇ ଏବଂ ରାସ୍ତାରେ ଏପରି ଅପରାଧ କ୍ରମାଗତ ଭାବରେ ବୃଦ୍ଧି ପାଉଛି, ତେଣୁ କେବଳ ପୋଲିସ ସତର୍କ ରହିବା ଉଚିତ ନୁହେଁ ବରଂ ନାଗରିକମାନେ ମଧ୍ୟ ସତର୍କ ରହିବା ଉଚିତ ଏବଂ ସେମାନଙ୍କର ମୋବାଇଲ୍ ଫୋନ୍ ଏବଂ ମୂଲ୍ୟବାନ ଜିନିଷଗୁଡ଼ିକୁ ସୁରକ୍ଷିତ ରଖିବା ଉଚିତ।
ବାଲ୍ୟ ବିବାହ ରୋକିବାକୁ ଯାଇ ଆକ୍ରମଣର ଶିକାର ପ୍ରଶାସନ

କେନ୍ଦ୍ରାପଡ଼ା ଜିଲ୍ଲା ସଦର ଥାନା ଅନ୍ତର୍ଗତ ମଧୁବନିଆ ଗାଁର ୪୦ ବର୍ଷୀୟ ଜଟାଧାରୀ ଜେନା, ମାର୍ଶାଘାଇ ଅଞ୍ଚଳର ଜଣେ ୧୬ ବର୍ଷୀୟା ନାବାଳିକାଙ୍କୁ ବିବାହ କରିବାକୁ ଯୋଜନା କରିଥିଲେ। ଅଭିଯୋଗ ଅନୁଯାୟୀ, ନାବାଳିକାର ପରିବାରକୁ ଅର୍ଥର ପ୍ରଲୋଭନ ଦେଖାଇ ଏହି ଅସମାନ ବିବାହ ସ୍ଥିର କରାଯାଇଥିଲା। ଜିଲ୍ଲାପାଳଙ୍କ ପାଖରେ ବାଲ୍ୟ ବିବାହ ନେଇ ସୂଚନା ପହଞ୍ଚିବା ପରେ, ସେ ତୁରନ୍ତ ଶିଶୁ ସୁରକ୍ଷା ବିଭାଗକୁ ଘଟଣାସ୍ଥଳକୁ ଯିବାକୁ ନିର୍ଦ୍ଦେଶ ଦେଇଥିଲେ। ଶିଶୁ ସୁରକ୍ଷା ଅଧିକାରୀ ଓ ସଦସ୍ୟାମାନେ ସଖିବଟରେ ପହଞ୍ଚି ବିବାହ ବନ୍ଦ କରିବାକୁ ଚେଷ୍ଟା କରିଥିଲେ। ମାତ୍ର ସେଠାରେ ଉପସ୍ଥିତ ଥିବା କନ୍ୟା ପକ୍ଷର ଲୋକେ ଉତ୍ୟକ୍ତ ହୋଇ ଅଧିକାରୀଙ୍କୁ ଗାଳିଗୁଲଜ କରିବା ସହ ଠେଲାପେଲା କରିଥିଲେ।

ପ୍ରଶାସନ ଓ ପୋଲିସର କଡ଼ା ଆଭିମୁଖ୍ୟ ଦେଖି ୪୦ ବର୍ଷୀୟ ବର ଜଟାଧାରୀ ଘଟଣାସ୍ଥଳରୁ ଚମ୍ପଟ ମାରିଥିଲା। ପରବର୍ତ୍ତୀ ସମୟରେ ପୋଲିସ ପହଞ୍ଚିବା ବେଳକୁ ନାବାଳିକା କନ୍ୟାକୁ ମଧ୍ୟ ସେଠାରୁ ହଟାଇ ଦିଆଯାଇଥିଲା। ଏହି ଘଟଣା “ବାଲ୍ୟ ବିବାହ ନିଷେଧ ଆଇନ” ର ଖୋଲାଖୋଲି ଉଲ୍ଲଂଘନ ଅଟେ। ବାଲ୍ୟ ବିବାହ ଏକ ସାମାଜିକ ଅପରାଧ। ଯଦି ଆପଣଙ୍କ ପାଖପାଖରେ ଏପରି କିଛି ଘଟୁଥାଏ, ତେବେ ତୁରନ୍ତ Childline Help Number 1098 କୁ କଲ୍ କରନ୍ତୁ। ଏହି ଘଟଣାରେ ପୋଲିସ ଏବେ ଜଟାଧାରୀ ଜେନା ଏବଂ କନ୍ୟା ପକ୍ଷର କିଛି ଲୋକଙ୍କୁ ଖୋଜୁଛି। ପ୍ରଶାସନିକ ଅଧିକାରୀଙ୍କ ଉପରେ ହୋଇଥିବା ଆକ୍ରମଣକୁ ବିଭିନ୍ନ ମହଲରେ ନିନ୍ଦା କରାଯାଇଛି।
ସଞ୍ଜୁ ଓ ଶିବମଙ୍କ ଛକା, ଇଂଲଣ୍ଡ ହକାବକା

2026 T-20 ବିଶ୍ୱକପର ଦ୍ୱିତୀୟ ସେମିଫାଇନାଲରେ ଭାରତ ୭ ରନରେ ବିଜୟୀ ହୋଇଛି । ଟିମ୍ ଇଣ୍ଡିଆ ଦ୍ୱାରା ଧାର୍ଯ୍ୟ ୨୫୪ ରନର ଲକ୍ଷ୍ୟକୁ ପିଛା କରି ଇଂଲଣ୍ଡ ୨୪୬ ରନରେ ପହଞ୍ଚିଥିଲା କିନ୍ତୁ ବିଜୟ ପାଇଁ ମାତ୍ର ୭ ରନ ପଛରେ ରହିଯାଇଥିଲା। ଏହି ରୋମାଞ୍ଚକର ମ୍ୟାଚରେ ଜାକବ ବେଥେଲ ୧୦୫ ରନର ଶତକ ହାସଲ କରିଥିଲେ। ଏହା ପୂର୍ବରୁ ସଞ୍ଜୁ ସାମସନ ୮୯ ରନ କରିଥିଲେ ଏବଂ ମୋଟ ଉପରେ ଏହି ସେମିଫାଇନାଲ ମ୍ୟାଚରେ ୪୯୯ ରନ ହୋଇଥିଲା। ଆରମ୍ଭରୁ ଶେଷ ପର୍ଯ୍ୟନ୍ତ, ଭାରତ ବନାମ ଇଂଲଣ୍ଡ ସେମିଫାଇନାଲ ମ୍ୟାଚରେ ପାଞ୍ଚଟି ପ୍ରମୁଖ ରେକର୍ଡ ଭାଙ୍ଗିଥିଲା।

2026 ଟି20 ବିଶ୍ୱକପ୍ ମ୍ୟାଚ୍‌ରେ ସର୍ବାଧିକ ରନ୍ – ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିବା ସେମିଫାଇନାଲ ମ୍ୟାଚ୍‌ରେ ମୋଟ 499 ରନ୍ ହୋଇଥିଲା। ଏହା ଇତିହାସରେ ଗୋଟିଏ ଟି20 ବିଶ୍ୱକପ୍ ମ୍ୟାଚ୍‌ରେ ସର୍ବାଧିକ ସ୍କୋର। ପୂର୍ବ ରେକର୍ଡ 459 ରନ୍ ଥିଲା, ଯାହା 2016 ଇଂଲଣ୍ଡ ବନାମ ଦକ୍ଷିଣ ଆଫ୍ରିକା ମ୍ୟାଚ୍‌ରେ କରାଯାଇଥିଲା।

ଜାକବ ବେଥେଲଙ୍କ ବିଶ୍ୱ ରେକର୍ଡ – ଜାକବ ବେଥେଲ ୪୫ ବଲ୍ ରେ ତାଙ୍କର ଶତକ ପୂରଣ କରିଥିଲେ। ଏହା ଟି-୨୦ ବିଶ୍ୱକପ୍ ଇତିହାସରେ ଇଂଲଣ୍ଡ ପାଇଁ ଦ୍ରୁତତମ ଶତକ। ସେହି ମ୍ୟାଚ୍ ରେ ସେ ୧୯ ବଲ୍ ରେ ତାଙ୍କର ଅର୍ଦ୍ଧଶତକ ପୂରଣ କରିଥିଲେ, ଯାହା ଟି-୨୦ ବିଶ୍ୱକପ୍ ରେ ଇଂଲଣ୍ଡ ପାଇଁ ସବୁଠାରୁ ଦ୍ରୁତତମ ଅର୍ଦ୍ଧଶତକ।

ଗୋଟେ ଟି-୨୦ ବିଶ୍ୱକପ୍ ମ୍ୟାଚ୍‌ରେ ସର୍ବାଧିକ ଛକା – ଭାରତ ବନାମ ଇଂଲଣ୍ଡ ସେମିଫାଇନାଲ୍ ମ୍ୟାଚ୍‌ରେ ମୋଟ ୩୪ଟି ଛକା ମାରିଥିଲା। ଭାରତର ଇନିଂସରେ ୧୯ଟି ଏବଂ ଇଂଲଣ୍ଡର ଇନିଂସରେ ୧୫ଟି ଛକା ଥିଲା। ଏହା ଟି-୨୦ ବିଶ୍ୱକପ୍ ମ୍ୟାଚ୍‌ରେ ସର୍ବାଧିକ ଛକା। ପୂର୍ବ ରେକର୍ଡ ଥିଲା ୩୧ଟି ଛକା, ଯାହା ସମାନ ଟୁର୍ଣ୍ଣାମେଣ୍ଟର ୱେଷ୍ଟଇଣ୍ଡିଜ୍ ବନାମ ଜିମ୍ବାୱେ ମ୍ୟାଚ୍‌ରେ ମାରିଥିଲା।

ଟି-୨୦ ବିଶ୍ୱକପ୍‌ରେ ସର୍ବାଧିକ ଛକା (ଦଳ) – ଗୋଟିଏ ଟି-୨୦ ବିଶ୍ୱକପ୍‌ ଟୁର୍ଣ୍ଣାମେଣ୍ଟ୍‌ରେ ସର୍ବାଧିକ ଛକା ମାରିବାର ରେକର୍ଡ ଭାରତୀୟ ଦଳନିଜ ନାମରେ କରିଛି । ଏପର୍ଯ୍ୟନ୍ତ, ଭାରତ ଏହି ବିଶ୍ୱକପ୍‌ରେ ୮୮ଟି ଛକା ମାରିଛି, ଏବଂ ୱେଷ୍ଟଇଣ୍ଡିଜ୍‌କୁ ପଛରେ ପକାଇ ଦେଇଛି, ଯିଏ ସମାନ ଟୁର୍ଣ୍ଣାମେଣ୍ଟ୍‌ରେ ୭୬ଟି ଛକା ମାରିଥିଲା।

ପୁରୁଷ ଟି-୨୦ କ୍ରିକେଟରେ ସର୍ବାଧିକ ୨୫୦+ ରନ – ଏହା ଷଷ୍ଠ ଥର ପାଇଁ ଭାରତ ପୁରୁଷ ଟି-୨୦ କ୍ରିକେଟରେ ୨୫୦ ରୁ ଅଧିକ ସ୍କୋର କରିଛି। ଏହା ନିଜେ ଏକ ବିଶ୍ୱ ରେକର୍ଡ। ୱେଷ୍ଟଇଣ୍ଡିଜ୍ ଏବଂ ଜିମ୍ବାୱେ ଏହି ତାଲିକାରେ ଦ୍ୱିତୀୟ ସ୍ଥାନରେ ଅଛନ୍ତି, ପ୍ରତ୍ୟେକେ ତିନି ତିନି ଥର ଏହି ସଫଳତା ହାସଲ କରିଛନ୍ତି।
ଚା’ରେ ଚିନି କମ କଲେ କଣ ହୁଏ? ଜାଣନ୍ତୁ ଏହାର ଫାଇଦା

ଦୈନନ୍ଦିନ ଜୀବନରେ ଆମେ ପିଉଥିବା ଚା’ରେ ଚିନିର ପରିମାଣ କମାଇବା ବଡ଼ କଥା ନ ଲାଗିପାରେ, କିନ୍ତୁ ଏହା ଆମ ଶରୀର ପାଇଁ ଅନେକ ଉପକାରୀ। ଅଧିକ ଚିନି ଖାଇବା ଶରୀରରେ ଅନେକ ସମସ୍ୟା ସୃଷ୍ଟି କରେ, ତେଣୁ ଚା’ରେ ଚିନି କମ କରିବା ସ୍ୱାସ୍ଥ୍ୟ ପାଇଁ ଭଲ ପଦକ୍ଷେପ ହୋଇପାରେ। ଆରମ୍ଭରେ ଚିନି କମ କରିବା କିମ୍ବା ଛାଡ଼ିବା କିଛିଟା ଆହ୍ବାନପୂର୍ଣ୍ଣ ଲାଗିପାରେ। କାରଣ ଆମର ଜିହ୍ବା ଓ ମସ୍ତିଷ୍କ ଚିନିର ମିଠା ସ୍ୱାଦ ସହ ଅଭ୍ୟସ୍ତ ହୋଇଯାଇଥାଏ। ତେଣୁ ଚିନି କମ କରିବା ପରେ କେତେକ ଲୋକ ଚିନି ପାଇଁ ଆକାଂକ୍ଷା, ଶକ୍ତି ହ୍ରାସ କିମ୍ବା ସାମାନ୍ୟ ମୁଣ୍ଡବିନ୍ଧା ଅନୁଭବ କରିପାରନ୍ତି।

ଏହାର କାରଣ ହେଉଛି ଶରୀର ପୂର୍ବରୁ ଅଭ୍ୟସ୍ତ ହୋଇପଡ଼ିଥିବା ଦ୍ରୁତ ଗ୍ଲୁକୋଜ୍ ବୃଦ୍ଧି ହଠାତ୍ କମିଯିବା। ଶରୀର ଏହି ପରିବର୍ତ୍ତନ ସହ ଖାପ ଖୁଆଇବାକୁ କିଛି ସମୟ ନେଇଥାଏ। ସ୍ୱାସ୍ଥ୍ୟ ବିଶେଷଜ୍ଞ ଓ ଏଣ୍ଡୋକ୍ରାଇନୋଲୋଜିଷ୍ଟମାନଙ୍କ କହିବା ଅନୁସାରେ, ବିନା ଚିନି କିମ୍ବା କମ ଚିନି ସହ ଚା’ ପିବାର ଅଭ୍ୟାସ କରିଲେ ପ୍ରଥମ ସପ୍ତାହ ପରେ ଶରୀରର ରକ୍ତ ଶର୍କରା ସ୍ତର ଧୀରେ ଧୀରେ ସ୍ଥିର ହେବା ଆରମ୍ଭ କରେ। ଚା’ରେ ଚିନି କମ କରିବା ଦ୍ୱାରା ଓଜନ ନିୟନ୍ତ୍ରଣରେ ରହେ, ଶରୀରରେ ଶକ୍ତି ସ୍ତର ସମତୁଳିତ ରହେ ଏବଂ ଦୀର୍ଘମେୟାଦୀ ରୋଗର ଝୁକି ମଧ୍ୟ କମିଥାଏ। ତେଣୁ ଦୈନନ୍ଦିନ ଜୀବନରେ ଚା’ରେ ଚିନିର ପରିମାଣ ହ୍ରାସ କରିବା ଏକ ସରଳ କିନ୍ତୁ ସ୍ୱାସ୍ଥ୍ୟକର ଅଭ୍ୟାସ ହୋଇପାରେ।
ଭାରତୀୟ ବାୟୁସେନାର Su-30MKI ଯୁଦ୍ଧ ବିମାନ ନିଖୋଜ,ବିଚ୍ଛିନ୍ନ ହେଲା ରାଡାରରୁ ସମ୍ପର୍କ

ଭାରତୀୟ ବାୟୁସେନାର ଏକ ସୁଖୋଇ ଲଢ଼ୁଆ ବିମାନ ନିଖୋଜ ହୋଇଯାଇଛି। Su-30 ଜେଟ୍ ଆସାମର ଜୋରହାଟରୁ ଉଡ଼ାଣ ଭରିବା ପରେ କାର୍ବି ଆଙ୍ଗଲଙ୍ଗ ଜିଲ୍ଲା ଉପରେ ହଠାତ୍ ରାଡାରରୁ ଅଦୃଶ୍ୟ ହୋଇଗଲା। ଗୌହାଟୀରେ ପ୍ରତିରକ୍ଷା ମନ୍ତ୍ରଣାଳୟର ଜନସମ୍ପର୍କ ଅଧିକାରୀ କହିଛନ୍ତି ଯେ ଲଢ଼ୁଆ ବିମାନଟି ରାଡାର ସମ୍ପର୍କ ହରାଇଛି।

ଭାରତୀୟ ବାୟୁସେନା ସୋସିଆଲ ମିଡିଆ ପ୍ଲାଟଫର୍ମ X ରେ ନିଖୋଜ ସୁଖୋଇ 30 ବିଷୟରେ ପୋଷ୍ଟ କରି ଜଣାଇଛି। ପୋଷ୍ଟରେ ଲେଖାଯାଇଛି, “ଭାରତୀୟ ବାୟୁସେନାର ଏକ Su-30 MKI ବିମାନ ନିଖୋଜ ହୋଇଥିବା ରିପୋର୍ଟ ହୋଇଛି। ବିମାନଟି ଆସାମର ଜୋରହାଟରୁ ଉଡ଼ାଣ କରିଥିଲା ଏବଂ ସନ୍ଧ୍ୟା 7:42 ରେ ଶେଷ ଥର ପାଇଁ ଯୋଗାଯୋଗ କରାଯାଇଥିଲା। ସୂଚନା ଅନୁଯାୟୀ ସନ୍ଧାନ ଓ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଛି।”

ରାଫେଲ ପରେ, Su-30MKI ହେଉଛି ଭାରତୀୟ ବାୟୁସେନାର ସବୁଠାରୁ ଶକ୍ତିଶାଳୀ ଲଢ଼ୁଆ ବିମାନ। ଏହା ବାୟୁ ପ୍ରତିରକ୍ଷା, ଘାତକ ଆକ୍ରମଣ ଏବଂ ସାମୁଦ୍ରିକ ଅଭିଯାନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ବହନ କରିଥାଏ । ବର୍ତ୍ତମାନ, Su-30MKI ହେଉଛି ଭାରତୀୟ ବାୟୁସେନାର ନୌବାହିନୀର ଏକମାତ୍ର ଲଢ଼ୁଆ ବିମାନ।
ଇରାନ, ଇସ୍ରାଏଲ, ଆମେରିକା ମଧ୍ୟରେ ତିବ୍ର ସଂଘର୍ଷ: ୩୦ଟି ବୁଡ଼ାଜାହାଜ ଧ୍ୱଂସ ଦାବି କଲେ ଡୋନାଲ୍ଡ ଟ୍ରମ୍ପ

ମଧ୍ୟପ୍ରାଚ୍ୟରେ ଯୁଦ୍ଧ ଅବସ୍ଥା ଆହୁରି ତିବ୍ର ହୋଇପଡ଼ିଛି। ଇରାନ, ଇସ୍ରାଏଲ ଓ ଆମେରିକା ମଧ୍ୟରେ ଆକ୍ରମଣ–ପ୍ରତିଆକ୍ରମଣ ଜାରି ରହିଛି। ଏହି ପରିସ୍ଥିତିରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି ଯେ ଆମେରିକୀୟ ସେନା ଏପର୍ଯ୍ୟନ୍ତ ଇରାନର ୩୦ଟି ବୁଡ଼ାଜାହାଜକୁ ଧ୍ୱଂସ କରିଦେଇଛି। ତାଙ୍କ କଥା ଅନୁସାରେ, ଇରାନର ନୌସେନା ଏକ ପ୍ରକାର ପ୍ରାୟ ନଷ୍ଟ ହୋଇସାରିଛି।

ଏହା ସତ୍ତ୍ୱେ ଇରାନ ନିଜର ଆକ୍ରମଣକୁ ଆହୁରି ଜୋରଦାର କରିଛି। ଇରାନ ପକ୍ଷରୁ ଗଲ୍ଫ ଅଞ୍ଚଳର ଦେଶଗୁଡ଼ିକ ଉପରେ ପୂର୍ବପରି କ୍ଷେପଣାସ୍ତ୍ର ଓ ଡ୍ରୋନ୍ ଆକ୍ରମଣ ଜାରି ରହିଛି। ଏହା ସହ ଇସ୍ରାଏଲ ଉପରେ ମଧ୍ୟ କ୍ଷେପଣାସ୍ତ୍ର ଓ ଡ୍ରୋନ୍ ମାଧ୍ୟମରେ ଆକ୍ରମଣ କରୁଛି ଇରାନ। ସେପଟେ United States ଓ ଇସ୍ରାଏଲ ମିଶି ଇରାନର ଅନେକ ସେନା ଆଧାର ଉପରେ ବୋମାମାଡ଼ କରୁଥିବା ଖବର ମିଳିଛି। ଏଭଳି ପରିସ୍ଥିତିରେ ମଧ୍ୟପ୍ରାଚ୍ୟରେ ଏକ ବଡ଼ ଯୁଦ୍ଧର ଆଶଙ୍କା ବଢ଼ିଚାଲିଛି। ଏହି ସମୟରେ ଟ୍ରମ୍ପ କହିଛନ୍ତି ଯେ ପୂର୍ବରୁ ଯୋଜନା କରାଯାଇଥିବା ରଣନୀତି ଅନୁଯାୟୀ ଅପରେସନ ଚାଲିଛି ଏବଂ ଆମେରିକାର ସେନା ପୂର୍ଣ୍ଣ ତୟାରି ସହିତ କାର୍ଯ୍ୟ କରୁଛି।

ଏପଟେ United States House of Representatives ରେ ମଧ୍ୟ ଯୁଦ୍ଧ ଜାରି ରଖିବା ସପକ୍ଷରେ ମତ ପ୍ରକାଶ ପାଇଛି। ଯୁଦ୍ଧ ଜାରି ରଖିବା ପକ୍ଷରେ ୨୧୯ଟି ଭୋଟ୍ ପଡ଼ିଥିବା ବେଳେ ୨୧୨ ଜଣ ସଦସ୍ୟ ଏହାର ବିରୋଧ କରିଥିଲେ। ଏହା ମଧ୍ୟପ୍ରାଚ୍ୟର ପରିସ୍ଥିତିକୁ ଆହୁରି ଗୁରୁତର କରିପାରେ ବୋଲି ବିଶ୍ଳେଷକମାନେ କହୁଛନ୍ତି।
ଡଟ୍ ବଲ୍ ରେ ଡେଇଁଲେ ସାକ୍ଷୀ, ଧୋନି କହିଲେ- ବସିଯାଅ, ବସିଯାଅ!

ଗୁରୁବାର ଦିନ ଭାରତ ଏବଂ ଇଂଲଣ୍ଡ ମଧ୍ୟରେ ଚାଲିଥିବା ରୋମାଞ୍ଚକ ବିଶ୍ୱକପ୍ ସେମିଫାଇନାଲ ପ୍ରତ୍ୟେକଙ୍କ ପଇସାର ମୂଲ୍ୟ ଉଠେଇ ଦେଇଥିଲା। ଏହି ରୋମାଞ୍ଚକର ପ୍ରତିଯୋଗିତା କେବଳ ସାଧାରଣ ଲୋକଙ୍କୁ ନୁହେଁ ବରଂ ସେଲିବ୍ରିଟିମାନଙ୍କୁ ମଧ୍ୟ ମୋହିତ କରିଥିଲା। ଏବଂ ଯେତେବେଳେ ଶେଷ ତିନି ଓଭରରେ ଇଂଲଣ୍ଡକୁ ଜିତିବା ପାଇଁ 45 ରନ ଆବଶ୍ୟକ ଥିଲା, ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କ ପତ୍ନୀ ବୁମରାହଙ୍କ ଏକ ଡ଼ଟବଲରେ ଖୁସିରେ ଡେଇଁ ଉଠିଥିଲେ ସତେ ଯେମିତି ୱିକେଟ ପଡ଼ିଗଲା ବା ଭାରତ ମ୍ୟାଚ୍ ଜିତିଗଲା। ସାକ୍ଷୀଙ୍କ ଏଭଳି ପତିକ୍ରିୟା ଦେଖି ଧୋନି ତାଙ୍କୁ ବସିବାକୁ ଇଙ୍ଗିତ କରିଥିଲେ। ଏହାକୁ ଦେଖି ଧୋନି ଏବଂ ପାଖରେ ଠିଆ ହୋଇଥିବା ତାଙ୍କ ବନ୍ଧୁମାନେ ହସି ରହିପାରିନଥିଲେ ଏବଂ ସାକ୍ଷୀଙ୍କୁ ଚିଡ଼ାଉଥିବାର ମଧ୍ୟ ଦେଖିବାକୁ ମିଳିଥିଲା । ସମସ୍ତେ ହସୁଥିଲେ, ଧୋନି ହାତ ଦେଖାଇ ସାକ୍ଷୀଙ୍କୁ ବସିବାକୁ କହିଲେ, କାରଣ ମ୍ୟାଚ୍ ର ଫଳାଫଳ ଘୋଷଣା ହେବାକୁ ବାକି ଥିଲା।ଏବେ ସାକ୍ଷୀଙ୍କ ମଜାଳିଆ ପ୍ରତିକ୍ରିୟା ସୋସିଆଲ ମିଡିଆରେ ଝଡ଼ ପରି ଭାଇରାଲ ହୋଇଛି,ଏବଂ ପ୍ରଶଂସକମାନେ ଭିଡିଓଟିକୁ ସେୟାର କରି ଉତ୍ସାହର ସହିତ ପ୍ରତିକ୍ରିୟା ଦେଉଛନ୍ତି।