Blog

ମହାପ୍ରଭୁଙ୍କ ରାତି ଅନିଦ୍ରା ଉପରେ ପ୍ରଶ୍ନ, ଶ୍ରୀମନ୍ଦିର ଖୋଲାକୁ ନେଇ ଚିଠି

ଇଂରାଜୀ ନବବର୍ଷକୁ ନେଇ ଶ୍ରୀମନ୍ଦିର ଖୋଲା ରହିବା ପ୍ରଥା ଉପରେ ପୁଣିଥରେ ବିବାଦ ଆରମ୍ଭ ହୋଇଛି। ଜାନୁଆରି ୧ ରାତିରେ ମଧ୍ୟରାତ୍ରିରେ ଶ୍ରୀମନ୍ଦିର ଖୋଲି ଦର୍ଶନ ବ୍ୟବସ୍ଥା କରାଯିବାକୁ ନେଇ ଅସନ୍ତୋଷ ପ୍ରକାଶ ପାଇଛି। ଏହି ପ୍ରସଙ୍ଗରେ ଶ୍ରୀମନ୍ଦିର ପରିଚାଳନା ସମିତିର ସଦସ୍ୟ ପଣ୍ଡିତ ମହେଶ ସାହୁ, ଗଜପତି ମହାରାଜା, ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ରାଜ୍ୟ ଆଇନ ମନ୍ତ୍ରୀଙ୍କୁ ପତ୍ର ଲେଖି ଏହି ପ୍ରଥାକୁ ବନ୍ଦ କରିବାକୁ ଅନୁରୋଧ କରିଛନ୍ତି।

ଚିଠିରେ ପଣ୍ଡିତ ମହେଶ ସାହୁ ସ୍ପଷ୍ଟ କରିଛନ୍ତି ଯେ, ମହାପ୍ରଭୁ ଶ୍ରୀଜଗନ୍ନାଥ ସନାତନ ହିନ୍ଦୁମାନଙ୍କର ଆସ୍ଥା ଓ ଆରାଧ୍ୟ ଦେବତା। ଶ୍ରୀମନ୍ଦିରର ସମସ୍ତ ନୀତିକାନ୍ତି, ପୂଜାପାଠ ଓ ପରମ୍ପରା ସନାତନ ଧର୍ମଶାସ୍ତ୍ର ଅନୁଯାୟୀ ଚାଲିଆସୁଛି। ଜାନୁଆରି ୧ ଇଂରାଜୀ କ୍ୟାଲେଣ୍ଡର ଅନୁସାରେ ନବବର୍ଷ ହେଲେ ମଧ୍ୟ, ଏହା ସନାତନ ପରମ୍ପରାରେ ନବବର୍ଷ ନୁହେଁ ବୋଲି ସେ ଉଲ୍ଲେଖ କରିଛନ୍ତି।

ଗତ କିଛି ବର୍ଷ ଧରି ଜାନୁଆରି ୧ ରାତିରେ ମଧ୍ୟରାତ୍ରିରେ ଭକ୍ତଙ୍କ ଦର୍ଶନ ପାଇଁ ମନ୍ଦିର ଖୋଲା ରହିବା ଏକ ନିୟମିତ ପ୍ରଥାରେ ପରିଣତ ହୋଇଯାଇଛି। ଏହା ଫଳରେ ମହାପ୍ରଭୁଙ୍କୁ ରାତି ଅନିଦ୍ରାରେ ରଖାଯାଉଛି, ଯାହା ଧାର୍ମିକ ଓ ପରମ୍ପରାଗତ ଦୃଷ୍ଟିକୋଣରୁ ଅନୁଚିତ ବୋଲି ସେ ଦାବି କରିଛନ୍ତି।

ଏହି ଚିଠି ପରେ ଶ୍ରୀମନ୍ଦିରରେ ଇଂରାଜୀ ନବବର୍ଷ ରାତିର ଦର୍ଶନ ବ୍ୟବସ୍ଥା ନେଇ ପୁଣିଥରେ ଚର୍ଚ୍ଚା ଜୋର ଧରିଛି। ଏବେ ମନ୍ଦିର ପ୍ରଶାସନ ଓ ସରକାର ଏନେଇ କେଉଁ ନିଷ୍ପତ୍ତି ନେବେ, ସେଥିପାଇଁ ସମସ୍ତଙ୍କ ନଜର ରହିଛି।
ଦେବାଳିଆ ପାକିସ୍ତାନର ସାଙ୍ଘାତିକ ସ୍ଥିତି

ପାକିସ୍ତାନ ପରିସ୍ଥିତି ୨ ବର୍ଷ ମଧ୍ୟରେ ଡାକ୍ତର, ଇଞ୍ଜିନିୟର ଓ ଆକାଉଣ୍ଟାଣ୍ଟଙ୍କର ବୃହତ୍ତ ପ୍ରବାସ ଦେଖାଯାଇଛି। ସରକାରୀ ରିପୋର୍ଟ ଅନୁଯାୟୀ, ୨୪ ମାସରେ ପାକିସ୍ତାନ ୫,୦୦୦ ଡାକ୍ତର, ୧୧,୦୦୦ ଇଞ୍ଜିନିୟର ଓ ୧୩,୦୦୦ ଆକାଉଣ୍ଟାଣ୍ଟକୁ ହରାଇଛି। ଏହି ପରିସ୍ଥିତି ପାକିସ୍ତାନୀମାନଙ୍କୁ ସରକାର ଓ ସେନା ମୁଖ୍ୟ ଅସୀମ ମୁନିରଙ୍କର ‘ବ୍ରେନ୍ ଗେନ୍’ ଦାବିରେ ଉପହାସର ପାତ୍ର କରିଦେଇଛି।

ପୂର୍ବତନ ସିନେଟର ମୁସ୍ତାଫା ନୱାଜ ଖୋଖର ରିପୋର୍ଟକୁ ଉଲ୍ଲେଖ କରି କହିଛନ୍ତି, “ରାଜନୀତିକୁ ସଜାଡ଼ନ୍ତୁ ତେବେ ଆର୍ଥିକତା ଠିକ୍ ହେବ। ପାକିସ୍ତାନ ଚତୁର୍ଥ ସବୁଠାରୁ ବଡ଼ ଫ୍ରିଲାନ୍ସିଂ ହବ୍ ହେବା ସତ୍ତ୍ୱେ, ଇଣ୍ଟରନେଟ୍ ବନ୍ଦରୁ ୧.୬୨ ଡଲାର ବିଲିୟନ ହାନି ହୋଇଛି ଓ ୨.୩୭ ଲକ୍ଷ ଫ୍ରିଲାନ୍ସିଂ ଚାକିରି ବିପଦରେ ପଡ଼ିଛି।”

ପ୍ରବାସ ତଥ୍ୟ ଅନୁଯାୟୀ, ୨୦୨୪ ମସିହାରେ ୭,୨୭,୩୮୧ ପାକିସ୍ତାନୀ ବିଦେଶରେ ନିଯୁକ୍ତି ପାଇଁ ପଞ୍ଜୀକୃତ ହୋଇଥିଲେ। ୨୦୨୫ ମଧ୍ୟରେ ନଭେମ୍ବର ପର୍ଯ୍ୟନ୍ତ ୬,୮୭,୨୪୬ ଜଣ ପଞ୍ଜୀକୃତ ହୋଇଛନ୍ତି। ବୃହତ୍ତ ପ୍ରବାସ କେବଳ କମାଇ ପାଇଁ ଗଲ୍ଫ ଦେଶକୁ ଯାଉଥିବା ଶ୍ରମିକମାନଙ୍କ ସୀମିତ ନୁହେଁ; ଡାକ୍ତର, ଇଞ୍ଜିନିୟର ଓ ଅନ୍ୟାନ୍ୟ ବୃତ୍ତିଗତମାନେ ମଧ୍ୟ ଦେଶ ଛାଡ଼ୁଛନ୍ତି।

ସ୍ୱାସ୍ଥ୍ୟ କ୍ଷେତ୍ର ସବୁଠାରୁ ଅଧିକ ପ୍ରଭାବିତ ହୋଇଛି। ୨୦୧୧ ରୁ ୨୦୨୪ ମଧ୍ୟରେ, ନର୍ସମାନଙ୍କର ପ୍ରବାସରେ ୨,୧୪୪% ବୃଦ୍ଧି ଘଟିଛି। ଏହା ପାକିସ୍ତାନର ସ୍ୱାସ୍ଥ୍ୟ ବ୍ୟବସ୍ଥାକୁ ଆଉ ଦୁର୍ବଳ କରିଛି।ସେଥିପାଇଁ ୨୦୨୫ ମସିହାରେ ୬୬,୧୫୪ ଯାତ୍ରୀଙ୍କୁ ପାକିସ୍ତାନୀ ବିମାନବନ୍ଦରରୁ ଓହ୍ଲାଇ ଦିଆଯାଇଛି। ଶେହବାଜ ସରିଫ ସରକାର ‘ପେଶାଦାର ଭିକାରୀ’ ଓ ଅସମ୍ପୂର୍ଣ୍ଣ କାଗଜପତ୍ରଥିବା ଯାତ୍ରୀଙ୍କୁ ବିଦେଶକୁ ଯିବାରୁ ନିବୃତ୍ତ କରିଛି।

ଅସୀମ ମୁନିରଙ୍କ ‘ବ୍ରେନ୍ ଗେନ୍’ ଦାବି ସାମ୍ପ୍ରତିକ ତଥ୍ୟ ପରେ ପାକିସ୍ତାନୀମାନଙ୍କ ମଧ୍ୟରେ ଉପହାସର ଶିକାର ହୋଇଛି। ବହୁତ ସୋସିଆଲ୍ ମିଡିଆ ବ୍ୟବହାରକାରୀଙ୍କ ମତରେ, ଏହି ରାଜନୈତିକ ବାଣୀ ସତ୍ୟତା ସହ ସମନ୍ୱୟ ନ ରହିବାର ଉଦାହରଣ। ଏହା ଦେଖାଯାଉଛି ଯେ, ପାକିସ୍ତାନ କେବଳ ଦକ୍ଷ ବୃତ୍ତିଗତଙ୍କ ମଧ୍ୟରେ ଏକ ବ୍ୟବଧାନ ନୁହେଁ, ବରଂ ନେତାଙ୍କର ଭାଷଣ ଓ ବାସ୍ତବ ପରିସ୍ଥିତି ମଧ୍ୟରେ ବହୁତ ଫରକ ରହୁଛି।
କଂସ ଦରବାରରେ ରୋମାଞ୍ଚକ, ଧନୁଯାତ୍ରାରେ ମଥୁରା–ଗୋପପୁର ଲୀଳା

ବରଗଡ଼ର ବିଶ୍ୱପ୍ରସିଦ୍ଧ ଧନୁଯାତ୍ରାରେ ଦ୍ୱିତୀୟ ଦିନ ଧାର୍ମିକ ଓ ନାଟ୍ୟମୟ ଦୃଶ୍ୟରେ ମଥୁରା ଗୋପପୁର ଜୀବନ୍ତ ହୋଇଉଠିଛି। କାରାଗାରରେ ଦେବକୀଙ୍କ ଅଷ୍ଟମ ଗର୍ଭରୁ ଭଗବାନ ଶ୍ରୀକୃଷ୍ଣଙ୍କ ଜନ୍ମ, କାରାଗାର ଦ୍ୱାର ଆପେଆପେ ଖୋଲିଯିବା ଓ ବସୁଦେବଙ୍କ ଗୋପପୁର ଯାତ୍ରା, ଏହି ସମସ୍ତ ଦୃଶ୍ୟ ଦର୍ଶକଙ୍କୁ ବେଶ ମନମୁଗ୍ଧ କରିଛି।

କଂସର ଭୟରେ ଶିଶୁ କୃଷ୍ଣଙ୍କୁ କୋଳରେ ନେଇ ବସୁଦେବ ମଥୁରା କାରାଗାରରୁ ଗୋପପୁର ଦିଗେ ପ୍ରସ୍ଥାନ କରିଥିଲେ। ପଥରେ କଟୁଆଳ ସାଜି ଉଗ୍ରସେନ ବସୁଦେବଙ୍କୁ ଅଟକାଇଥିଲେ ମଧ୍ୟ ଶ୍ରୀକୃଷ୍ଣଙ୍କ ଦେହରେ ଭଗବାନ ବିଷ୍ଣୁଙ୍କ ରୂପ ଦେଖି ସେ ଆତ୍ମବିଭୋର ହୋଇ ପଥ ଛାଡ଼ିଦେଇଥିଲେ। ଯମୁନା ପାରି ହୋଇ ବସୁଦେବ ନନ୍ଦଭବନରେ ଯଶୋଦାଙ୍କ କୋଳରେ ଶ୍ରୀକୃଷ୍ଣଙ୍କୁ ଥୋଇ ଶିଶୁକନ୍ୟାକୁ ନେଇ ପୁଣି ମଥୁରା ଫେରିଥିଲେ। ଏହି ନାଟକୀୟ ଦୃଶ୍ୟକୁ ମଥୁରାବାସୀ ଓ ହଜାରହଜାର ଦର୍ଶକ ବେଶ ଉପଭୋଗ କରିଥିଲେ।

ଧନୁଯାତ୍ରାର ଦ୍ୱିତୀୟ ଦିନରେ ମହାରାଜ କଂସ ନଗର ଭ୍ରମଣରେ ବାହାରି ପ୍ରଜାଙ୍କ ସୁଖଦୁଃଖ ବୁଝିଥିଲେ। ନୀୟମ ମାନୁନଥିବା ଲୋକମାନଙ୍କୁ ରାଜଦଣ୍ଡ ଦେଇ କଂସ ନିଜର ନ୍ୟାୟବ୍ୟବସ୍ଥା ପ୍ରଦର୍ଶନ କରିଥିଲେ। ଏହା ସହ ଜିଲ୍ଲାପାଳ ଆଦିତ୍ୟ ଗୋୟଲ ଓ ସ୍ଥାନୀୟ ବିଧାୟକଙ୍କ ଉପସ୍ଥିତିରେ ଲୋକମଣ୍ଡପ ପଡ଼ିଆରେ ରଂଗମହଲର ଉଦ୍‌ଘାଟନ କରାଯାଇ, ଦର୍ଶକଙ୍କ ମନରଂଜନର ଆରମ୍ଭ ହୋଇଥିଲା।

ପରେ ରାଜଦରବାରକୁ ଫେରି ମହାରାଜ କଂସ ମାତା ଇନ୍ଦୁମତୀଙ୍କ ପ୍ରତି ହୋଇଥିବା ଅତ୍ୟାଚାରର ପ୍ରତିଶୋଧ ସ୍ୱରୂପ ଦୂର୍ମିଳାସୁରକୁ ବଧ କରିଥିଲେ। ଏହି ଦୃଶ୍ୟ ମଧ୍ୟ ଦର୍ଶକଙ୍କ ମଧ୍ୟରେ ବେଶ ଉତ୍ସାହ ସୃଷ୍ଟି କରିଥିଲା।

ଧନୁଯାତ୍ରାର ତୃତୀୟ ଦିନରେ ଶ୍ୟାମେଶ୍ଵର ମହାଦେବଙ୍କ ଦର୍ଶନ, ବିଜୁଳି କନ୍ୟାର ଶୂନ୍ୟବାଣୀ, ନାରଦଙ୍କ ପରାମର୍ଶରେ କଂସଙ୍କ ଦ୍ୱାରା ପୁତନା ରାକ୍ଷସୀ ସହ ଷଡ଼ମଲ୍ଲଙ୍କୁ ଗୋପପୁର ପ୍ରେରଣ ଭଳି ଦୃଶ୍ୟ ଆୟୋଜିତ ହେବ। ଏହା ସହ ଗୋପପୁରରେ କୃଷ୍ଣ ଜନ୍ମ, ନନ୍ଦୋତ୍ସବ ଓ ଗୋପପୁର ଯାତ୍ରା ଆରମ୍ଭ ହେବାକୁ ଥିବାରୁ ଧନୁଯାତ୍ରାର ଉତ୍ସାହ ଆହୁରି ବଢ଼ିବ ବୋଲି ଆଶା କରାଯାଉଛି।
ହାତୀ ଭୟରେ ଫିକା ପଡିଲା ନୂଆବର୍ଷ

ଏଥର ଫିକା ପଡିବ ନୂଆବର୍ଷର ଆନନ୍ଦ। ହାତୀ ଭୟ ଯୋଗୁଁ ଭୁବନେଶ୍ୱରର ପ୍ରମୁଖ ପର୍ଯ୍ୟଟନ ସ୍ଥଳୀ ଶିଖରଚଣ୍ଡୀ ପାହାଡ଼ ବନ୍ଦ କରାଯାଇଛି। ବନ ବିଭାଗ ପକ୍ଷରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଶିଖରଚଣ୍ଡୀ ପାହାଡ଼ର ପ୍ରବେଶ ଗେଟ ବନ୍ଦ ରଖିବାକୁ ସିଦ୍ଧାନ୍ତ ନିଆଯାଇଛି। ଫଳରେ ଏଥର ଶିଖରଚଣ୍ଡୀରେ ନୂଆବର୍ଷ ଭୋଜି ଓ ପର୍ଯ୍ୟଟନ ଆନନ୍ଦ ସମ୍ଭବ ହୋଇପାରିବ ନାହିଁ।

ବନ ବିଭାଗ ସୂଚନା ଅନୁଯାଇ, ଶିଖରଚଣ୍ଡୀ ପାହାଡ଼ ଓ ଆଖପାଖ ଅଞ୍ଚଳରେ ହାତୀଙ୍କ ଚଳପ୍ରଚଳ ବଢ଼ିଥିବାରୁ ପର୍ଯ୍ୟଟକଙ୍କ ସୁରକ୍ଷାକୁ ଦୃଷ୍ଟିରେ ରଖି ଏହି ପଦକ୍ଷେପ ଗ୍ରହଣ କରାଯାଇଛି। କୌଣସି ଅନାପେକ୍ଷିତ ଘଟଣାକୁ ଏଡ଼ାଇବା ପାଇଁ ପର୍ଯ୍ୟଟକଙ୍କୁ ଶିଖରଚଣ୍ଡୀ ପାହାଡ଼କୁ ପ୍ରବେଶ କରିବାକୁ ନିଷେଧ କରାଯାଇଛି।

ଶିଖରଚଣ୍ଡୀ ପାହାଡ଼ ସାଧାରଣ ଦିନରେ ମଧ୍ୟ ପର୍ଯ୍ୟଟକଙ୍କ ଗହଳିରେ ଭରିଥାଏ। ଭଣଭୋଜି, ଜନ୍ମଦିନ ପାଳନ କିମ୍ବା ସାଧାରଣତଃ ବୁଲିବା ପାଇଁ ଲୋକେ ଏଠାକୁ ଆସି ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିଥାନ୍ତି। ବିଶେଷକରି ନୂଆବର୍ଷରେ ଶିଖରଚଣ୍ଡୀରେ ପର୍ଯ୍ୟଟକଙ୍କ ଭିଡ଼ ଦେଖିବାକୁ ମିଳିଥାଏ। କିନ୍ତୁ ଏଥର ହାତୀ ଡରରେ ସମସ୍ତ ଯୋଜନା ଫିକା ପଡିଯାଇଛି।

ବନ ବିଭାଗ ପକ୍ଷରୁ ପର୍ଯ୍ୟଟକମାନଙ୍କୁ ଅନୁରୋଧ କରାଯାଇଛି ଯେ, ସୁରକ୍ଷା ଦୃଷ୍ଟିରୁ ଶିଖରଚଣ୍ଡୀ ପାହାଡ଼କୁ ଯିବାରୁ ବିରତ ରହନ୍ତୁ। ହାତୀ ଚଳପ୍ରଚଳ ସ୍ଥିତି ସାଧାରଣ ହେଲେ ପରେ ପରବର୍ତ୍ତୀ ସୂଚନା ଜାରି କରାଯିବ ବୋଲି ବନ ବିଭାଗ ସୂଚନା ଦେଇଛି।
ଓଡ଼ିଶା ପ୍ରଶାସନର ଶୀର୍ଷ ପଦବୀରେ ପ୍ରଥମ ଥର ଜଣେ ମହିଳା

ବରିଷ୍ଠ ଭାରତୀୟ ପ୍ରଶାସନିକ ଅଧିକାରୀ ଅନୁ ଗର୍ଗ ଓଡ଼ିଶାର ପରବର୍ତ୍ତୀ ମୁଖ୍ୟ ଶାସନ ସଚିବ ଭାବେ ଦାୟିତ୍ୱ ଗ୍ରହଣ କରିବାକୁ ଯାଉଛନ୍ତି। ବର୍ତ୍ତମାନର ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ ଠାରୁ ସେ ଆସନ୍ତା ୩୧ ତାରିଖରେ ଏହି ଗୁରୁଦାୟିତ୍ୱ ଗ୍ରହଣ କରିବେ। ଏହା ସହିତ ଓଡ଼ିଶା ପ୍ରଶାସନିକ ଇତିହାସରେ ଅନୁ ଗର୍ଗ ପ୍ରଥମ ମହିଳା ମୁଖ୍ୟ ଶାସନ ସଚିବ ଭାବେ ଅଭିଷିକ୍ତ ହେବେ।

ଅନୁ ଗର୍ଗଙ୍କ ନିଯୁକ୍ତିକୁ ନେଇ ସାମାଜିକ ଗଣମାଧ୍ୟମ ଠାରୁ ଆରମ୍ଭ କରି ରାଜନୈତିକ ମହଲ ପର୍ଯ୍ୟନ୍ତ ବ୍ୟାପକ ଆଲୋଚନା ଚାଲିଛି। ବରିଷ୍ଠ ଓଡ଼ିଆ ଅଧିକାରୀ ସତ୍ୟବ୍ରତ ସାହୁ ଥିବା ସତ୍ତ୍ୱେ ଅନୁ ଗର୍ଗଙ୍କୁ ଏହି ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତ କରାଯିବା ନେଇ ଭିନ୍ନ ଭିନ୍ନ ମତ ପ୍ରକାଶ ପାଉଛି। ତଥାପି, ପ୍ରଶାସନିକ ଅନୁଭବ, କେନ୍ଦ୍ର-ରାଜ୍ୟ ସମନ୍ୱୟ ଓ ଜନସମ୍ପର୍କ କୌଶଳକୁ ଏହି ନିଯୁକ୍ତିର ପ୍ରମୁଖ ଆଧାର ଭାବେ ଦେଖାଯାଉଛି।

୧୯୯୧ ବ୍ୟାଚ୍ ଓଡ଼ିଶା କ୍ୟାଡର ଆଇଏଏସ୍ ଅଧିକାରୀ ଭାବେ ଅନୁ ଗର୍ଗଙ୍କ ପ୍ରଶାସନିକ ଜୀବନ ଆରମ୍ଭ ହୋଇଥିଲା ପଶ୍ଚିମ ଓଡ଼ିଶାରୁ। ୧୯୯୨ରୁ ୨୦୦୩ ମଧ୍ୟରେ ସେ କଳାହାଣ୍ଡି, ସମ୍ବଲପୁର ଓ ଝାରସୁଗୁଡ଼ାର ଜିଲ୍ଲାପାଳ ଭାବେ କାର୍ଯ୍ୟ କରି ଗ୍ରାମାଞ୍ଚଳ ଓ ସହରାଞ୍ଚଳର ଲୋକମାନଙ୍କ ସମସ୍ୟା ସହ ନିକଟ ସମ୍ପର୍କ ଗଢ଼ିଥିଲେ। ଜିଲ୍ଲାପାଳ ଭାବେ ତାଙ୍କ କାର୍ଯ୍ୟଶୈଳୀ ଓ ସମାଧାନମୂଳକ ପଦକ୍ଷେପ ତାଙ୍କୁ ଜନସାଧାରଣ ମଧ୍ୟରେ ବେଶ୍ ଲୋକପ୍ରିୟ କରିଥିଲା।

ପରେ କେନ୍ଦ୍ରୀୟ ଡେପୁଟେସନରେ ଯାଇ ୨୦୧୨ରୁ ୨୦୧୫ ପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ କାମ କରିଥିଲେ ଅନୁ ଗର୍ଗ। ଏହି ସମୟରେ ସେ ଜନସ୍ୱାସ୍ଥ୍ୟ ନୀତି ପ୍ରଣୟନ ସହିତ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ସୃଷ୍ଟି କରି କେନ୍ଦ୍ର ସରକାରଙ୍କ ଅନେକ ଯୋଜନାର ସଫଳ ରୂପାୟନରେ ଅଗ୍ରଣୀ ଭୂମିକା ନେଇଥିଲେ। ଆମେରିକାର ଜନ୍ ହପକିନ୍ସ ବିଶ୍ୱବିଦ୍ୟାଳୟରୁ ଜନସ୍ୱାସ୍ଥ୍ୟ ଶିକ୍ଷା ତାଙ୍କୁ ଜଣେ ଦକ୍ଷ ସ୍ୱାସ୍ଥ୍ୟ ପ୍ରଶାସକ ଭାବେ ପରିଚିତ କରାଇଥିଲା।

ଦିଲ୍ଲୀରୁ ଫେରିବା ପରେ ଅନୁ ଗର୍ଗ ସ୍ୱାସ୍ଥ୍ୟ ଓ ପରିବାର କଲ୍ୟାଣ, ଜଳସମ୍ପଦ, ମହିଳା ଓ ଶିଶୁ ବିକାଶ, ଯୋଜନା ଓ ସମନ୍ୱୟ ବିଭାଗ ସହିତ ଉନ୍ନୟନ କମିଶନର ଭଳି ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରି ନିଜ ପାରଦର୍ଶିତା ପ୍ରମାଣ କରିଥିଲେ। ‘ମିଶନ ଶକ୍ତି’ ଯୋଜନାର କଳ୍ପନା ଓ ରୂପାୟନରେ ତାଙ୍କ ଭୂମିକା ଏବେ ବି ପ୍ରଶଂସିତ।

୨୦୨୪ ନିର୍ବାଚନ ପରେ ଗଠିତ ମୋହନ ଚରଣ ମାଝୀ ସରକାର ପାଇଁ ୨୦୩୬ ସୁଦ୍ଧା ‘ସମୃଦ୍ଧ ଓଡ଼ିଶା’ ଗଢ଼ିବା ଏକ ବଡ଼ ଲକ୍ଷ୍ୟ। ରାଜ୍ୟର ଅର୍ଥନୀତିକୁ ୫ ବିଲିୟନ ଡଲାର ପର୍ଯ୍ୟନ୍ତ ନେବା, ଶିଳ୍ପ, କୃଷି, ସେବା ଓ ପର୍ଯ୍ୟଟନ କ୍ଷେତ୍ରରେ ସଂସ୍କାର ଓ ବିନିଯୋଗ ବୃଦ୍ଧି ଏସବୁ ଲକ୍ଷ୍ୟ ସାଧନରେ ନୂଆ ମୁଖ୍ୟ ଶାସନ ସଚିବଙ୍କ ଭୂମିକା ନିର୍ଣ୍ଣାୟକ ହେବ।

ସୁଭଦ୍ରା ଯୋଜନା ଓ ମିଶନ ଶକ୍ତିକୁ ଅଧିକ ଲୋକାଭିମୁଖୀ କରି ମହିଳା ସଶକ୍ତିକରଣ, ଶିକ୍ଷା ଓ ସ୍ୱାସ୍ଥ୍ୟ ବ୍ୟବସ୍ଥାର ସୁଧାର ମାଧ୍ୟମରେ ରାଜ୍ୟ ସରକାରଙ୍କ ଲୋକପ୍ରିୟତା ବଢ଼ାଇବା ଦାୟିତ୍ୱ ଅନୁ ଗର୍ଗଙ୍କ କାନ୍ଧରେ ରହିବ। ସହଜ ମିଶୁଆ ସ୍ୱଭାବ ଓ ସ୍ମିତହାସ୍ୟ ଚେହେରାରେ ପରିଚିତ ଅନୁ ଗର୍ଗ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସହ ମିଶି ଲୋକଙ୍କ ମୁଖ୍ୟ ଶାସନ ସଚିବ ଭାବରେ ନିଜକୁ ପ୍ରତିଷ୍ଠିତ କରିପାରିବେ କି ନାହିଁ, ସେଥିପାଇଁ ଏବେ ସମସ୍ତଙ୍କ ଦୃଷ୍ଟି ତାଙ୍କ ଉପରେ।
ସୁରକ୍ଷାବାହିନୀର ବଡ଼ ସଫଳତା: ୧ କୋଟି ପୁରସ୍କାର ମାଓ ନେତା ସହ ୪ ମାଓବାଦୀ ନିହତ

ଓଡ଼ିଶାର କନ୍ଧମାଳ ଜିଲ୍ଲାରେ ସୁରକ୍ଷା ବାହିନୀକୁ ମିଳିଛି ବଡ଼ ସଫଳତା। ଚକାପାଦ ଥାନା ଅଞ୍ଚଳରେ ଚାଲିଥିବା ଏକ ଜଏଣ୍ଟ ଅପରେସନ୍ ସମୟରେ ସୁରକ୍ଷାକର୍ମୀଙ୍କ ଗୁଳିରେ ଦୁର୍ଦ୍ଦାନ୍ତ ଟପ୍ ମାଓ ନେତା ଗଣେଶ ଉଇକେ ସହ ମୋଟ ୪ ଜଣ ମାଓବାଦୀ ନିହତ ହୋଇଛନ୍ତି। ନିହତ ମାଓବାଦୀଙ୍କ ମଧ୍ୟରୁ ୨ ଜଣ ମହିଳା ଥିବା ସୂଚନା ମିଳିଛି।

ସୁରକ୍ଷା ସୂତ୍ର ଅନୁଯାୟୀ, ୬୯ ବର୍ଷୀୟ ଗଣେଶ ଉଇକେ ମାଓବାଦୀ ସଂଗଠନର ସେଣ୍ଟ୍ରାଲ କମିଟିର ଆଗ ଧାଡ଼ିର ସଦସ୍ୟ ଥିଲା। ତାଙ୍କ ନାଁରେ ୧ କୋଟି ୧୦ ଲକ୍ଷ ଟଙ୍କା ପୁରସ୍କାର ଘୋଷଣା ହୋଇଥିଲା। ଦୀର୍ଘ ଦିନ ଧରି ସେ ସୁରକ୍ଷା ବାହିନୀ ପାଇଁ ଏକ ବଡ଼ ଚ୍ୟାଲେଞ୍ଜ ଥିଲେ।

ମାଓବାଦୀ ଲୁଚି ରହିଥିବା ଗୁପ୍ତ ସୂଚନା ମିଳିବା ପରେ SOG, CRPF ଓ BSF ପକ୍ଷରୁ ଚକାପାଦ ଅଞ୍ଚଳରେ ବ୍ୟାପକ କମ୍ବିଂ ଅପରେସନ୍ ଆରମ୍ଭ କରାଯାଇଥିଲା। ଏହି ଅପରେସନ୍‌ରେ SOG–CRPF–BSFର ୨୩ଟି ମିଳିତ ଟିମ୍ ସାମିଲ ଥିଲେ।

କମ୍ବିଂ ବେଳେ ମାଓବାଦୀମାନେ ସୁରକ୍ଷାବାହିନୀ ଉପରକୁ ଅନ୍ଧାଧୁନ ଗୁଳିଚାଳନା କରିଥିଲେ। ଏହାର ପ୍ରତିଉତ୍ତରରେ ସୁରକ୍ଷାକର୍ମୀମାନେ ପାଲଟା ଗୁଳିଚାଳନା କରିଥିଲେ। ଦୀର୍ଘ ସମୟ ଧରି ଚାଲିଥିବା ଏହି ଗୁଳିଯୁଦ୍ଧରେ ମାଓବାଦୀଙ୍କ ମେରୁଦଣ୍ଡ ଭାଙ୍ଗିଯାଇଥିବା ସୁରକ୍ଷା ବିଭାଗ କହିଛି।

ଏହି ସଫଳ ଅପରେସନ୍ ପରେ କନ୍ଧମାଳ ସହ ସମଗ୍ର ଦକ୍ଷିଣ ଓଡ଼ିଶାରେ ମାଓବାଦୀ କାର୍ଯ୍ୟକଳାପକୁ ଏକ ବଡ଼ ଆଘାତ ଲାଗିଛି ବୋଲି ସୁରକ୍ଷା ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ଅଞ୍ଚଳରେ ଏବେ ମଧ୍ୟ ସର୍ଚ୍ଚ ଅପରେସନ୍ ଜାରି ରହିଛି।
କାମ୍ବୋଡିଆ ସୀମା ନିକଟରେ ଭଗବାନ ବିଷ୍ଣୁଙ୍କ ପ୍ରତିମୂର୍ତ୍ତି ଧ୍ଵଂସ

ଥାଇଲାଣ୍ଡ ଓ କାମ୍ବୋଡିଆ ମଧ୍ୟରେ ଚାଲିଥିବା ସୀମା ବିବାଦ ମଧ୍ୟରେ ଏକ ଗୁରୁତର ଘଟଣା ସାମ୍ନାକୁ ଆସିଛି। ସୋମବାର ଦୁଇ ଦେଶର ସୀମା ନିକଟରେ ସ୍ଥାପିତ ଭଗବାନ ବିଷ୍ଣୁଙ୍କ ଏକ ପ୍ରତିମୂର୍ତ୍ତିକୁ ଭାଙ୍ଗି ଦିଆଯାଇଛି। ଏହି ଘଟଣାକୁ ନେଇ ବୁଧବାର ଭାରତ ପକ୍ଷରୁ କଠୋର ପ୍ରତିକ୍ରିୟା ପ୍ରକାଶ ପାଇଛି।

ଭାରତର ବୈଦେଶିକ ବ୍ୟାପାର ମନ୍ତ୍ରାଳୟର ପ୍ରବକ୍ତା ରଣଧୀର ଜୟସ୍ବାଲ କହିଛନ୍ତି ଯେ, ଥାଇ–କାମ୍ବୋଡିଆ ବିବାଦ ମଧ୍ୟରେ ସୀମାଞ୍ଚଳରେ ଥିବା ହିନ୍ଦୁ ଦେବତାଙ୍କ ପ୍ରତିମୂର୍ତ୍ତି ନଷ୍ଟ ହେବା ଅତ୍ୟନ୍ତ ଦୁଃଖଜନକ ଓ ଅସମ୍ମାନଜନକ। ଏହି ପ୍ରତିମୂର୍ତ୍ତି ନିକଟରେ ନିର୍ମିତ ହୋଇଥିଲା ଏବଂ ବର୍ତ୍ତମାନ ସଂଘର୍ଷପୂର୍ଣ୍ଣ ଅଞ୍ଚଳରେ ସ୍ଥାପିତ ଥିଲା।

ସୂଚନା ଅନୁଯାୟୀ, ଏହି ସ୍ଥାନରେ ହିନ୍ଦୁ ଓ ବୌଦ୍ଧ ଧର୍ମାବଲମ୍ବୀ ଉଭୟ ପୂଜାର୍ଚ୍ଚନା କରୁଥିଲେ। ପ୍ରତିମୂର୍ତ୍ତି ଧ୍ଵଂସ ଘଟଣା ସାରା ବିଶ୍ୱରେ ହିନ୍ଦୁ ଧର୍ମାବଲମ୍ବୀଙ୍କ ଭାବନାକୁ ଆଘାତ ପହଞ୍ଚାଇଛି ବୋଲି ଭାରତ କହିଛି।

ଭାରତ ଉଭୟ ଦେଶକୁ ଆଲୋଚନା ଓ କୂଟନୈତିକ ମାର୍ଗରେ ସମସ୍ୟାର ସମାଧାନ କରି ଶାନ୍ତି ପ୍ରତିଷ୍ଠା କରିବାକୁ ଆହ୍ୱାନ କରିଛି। ଉଲ୍ଲେଖଯୋଗ୍ୟ, ୨୦୧୪ ମସିହାରେ ନିର୍ମିତ ଏହି ଭଗବାନ ବିଷ୍ଣୁଙ୍କ ପ୍ରତିମୂର୍ତ୍ତିକୁ ଥାଇଲାଣ୍ଡ ସେନା ଦ୍ୱାରା ଧ୍ଵଂସ କରାଯାଇଥିବା ଅଭିଯୋଗ ହୋଇଛି। ଏହାକୁ ନେଇ କାମ୍ବୋଡିଆ ମଧ୍ୟ ଥାଇଲାଣ୍ଡ ଉପରେ ସମାଲୋଚନା କରିଛି।
କ’ଣ କଲେ ଅନ୍ତନଳୀ ଉପରେ ପ୍ରଭାବ ପଡିବ ନାହିଁ

ବ୍ୟସ୍ତବହୁଳ ଜୀବନରେ ଆମେ ପୃଷ୍ଟିକର ଆବଶ୍ୟକତା କୁ ବହୁତ ଅଣଦେଖା କରିଥାଉ। ଏବଂ ଆମର ସ୍ୱାସ୍ଥ୍ୟ ଜୀବନର ବ୍ୟସ୍ତ ଗତିକୁ ପଛରେ ପକାଇଥାଉ । ଏହା ଅନେକ ରୋଗର କାରଣ ହେଇପାରେ । ଯେତେବେଳେ ପରିସ୍ଥିତି ନିୟନ୍ତ୍ରଣ ବାହାରକୁ ଯାଏ ସେତେବେଳେ ପ୍ରାୟତଃ ଅଣଦେଖା କରାଯାଏ। ଆମେ ପ୍ରାୟତଃ ହାଲୁକା ପେଟ ଯନ୍ତ୍ରଣାକୁ ସାମାନ୍ୟ ବୋଲି ଖାରଜ କରିଥାଉ, କିନ୍ତୁ ଏହାକୁ ଅଣଦେଖା କରିବା ଅନୁଚିତ। ଏହା ପ୍ରକୃତରେ ଖରାପ ଅନ୍ତନଳୀ ସ୍ୱାସ୍ଥ୍ୟର ଏକ ଲକ୍ଷଣ ହୋଇପାରେ, ଯାହା ପରେ ଏକ ଗୁରୁତର ରୋଗରେ ପରିଣତ ହୋଇପାରେ। ଆସନ୍ତୁ ଏହାକୁ ବିସ୍ତୃତ ଭାବରେ ଅନୁସନ୍ଧାନ କରିବା।ଅନ୍ତନଳୀ ଆମ ଶରୀରର ଏକ ଗୁରୁତ୍ୱପୂର୍ଣ୍ଣ ଅଂଶ, ଅପବ୍ୟବହାର ଦୂର କରିବା ପାଇଁ ଦାୟୀ। ଅନ୍ତନଳୀ ସଂକ୍ରମଣର ଅନେକ କାରଣ ଅଛି, ଯେଉଁଥିରେ ମଇଳା ପାଣି ଏବଂ ଦୂଷିତ ଖାଦ୍ୟ ଖାଇବା, ବାରମ୍ବାର ଆଣ୍ଟିବାୟୋଟିକ୍ ବ୍ୟବହାର, ଦୁର୍ବଳ ପାଚନ ପ୍ରଣାଳୀ, ହାତ ନ ଧୋଇ ଖାଇବା, ଜଙ୍କ୍ ଫୁଡ୍ ର ଅତ୍ୟଧିକ ସେବନ ଏବଂ ଚାପ ଅନ୍ତର୍ଭୁକ୍ତ।

ଅନ୍ତନଳୀ ଆମ ଶରୀରର ଏକ ଗୁରୁତ୍ୱପୂର୍ଣ୍ଣ ଅଂଶ, ଅପବ୍ୟବହାର ଦୂର କରିବା ପାଇଁ ଦାୟୀ। ଅନ୍ତନଳୀ ସଂକ୍ରମଣର ଅନେକ କାରଣ ଅଛି, ଯେଉଁଥିରେ ମଇଳା ପାଣି ଏବଂ ଦୂଷିତ ଖାଦ୍ୟ ଖାଇବା, ବାରମ୍ବାର ଆଣ୍ଟିବାୟୋଟିକ୍ ବ୍ୟବହାର, ଦୁର୍ବଳ ପାଚନ ପ୍ରଣାଳୀ, ହାତ ନ ଧୋଇ ଖାଇବା, ଜଙ୍କ୍ ଫୁଡ୍ ର ଅତ୍ୟଧିକ ସେବନ ଏବଂ ଚାପ ଅନ୍ତର୍ଭୁକ୍ତ। ଆୟୁର୍ବେଦ ଅନ୍ତନଳୀର ଯତ୍ନ ପାଇଁ ଅନେକ ଉପାୟ ପରାମର୍ଶ ଦିଏ। ଏଥିପାଇଁ, ଆପଣ ପ୍ରତିଦିନ ମଧ୍ୟାହ୍ନରେ ବଟରମିଲ୍କ ସେବନ କରିପାରିବେ। ବଟରମିଲ୍କ ଅନ୍ତନଳୀ ପାଇଁ ଏକ ଔଷଧ। ଏହାକୁ ହିଙ୍ଗ୍ ଏବଂ ଜିରା ସହିତ ପିଇବା ଦ୍ୱାରା ଅନ୍ତନଳୀର ଜୀବାଣୁ ନଷ୍ଟ ହୋଇଯାଏ। ଡାଳିମ୍ବ ରସ ପିଇବା ଦ୍ୱାରା ଅନ୍ତନଳୀ ସଠିକ୍ ଭାବରେ କାର୍ଯ୍ୟ କରିବାରେ ମଧ୍ୟ ସାହାଯ୍ୟ କରେ।ସବୁଜ ସାଗ, ତରକାରି, ଫଳ, ଡାଲି, ଚୋକା ଧାନ୍ୟ ଖାଆନ୍ତୁ ।
ପାରାଦ୍ୱୀପରେ ଆରମ୍ଭ ହେଲା ୭ ଦିନିଆ ପାରାଦ୍ୱୀପ ମହୋତ୍ସବ

ପୂର୍ବତନ ପ୍ରଧାନମନ୍ତ୍ରୀ ସ୍ୱର୍ଗତ ଅଟଳ ବିହାରୀ ବାଜପେୟୀଙ୍କ ଜନ୍ମ ଜୟନ୍ତୀ ଅବସରରେ ପାରାଦ୍ୱୀପର ଜୟଦେବ ସଦନ ପଡ଼ିଆରେ ଉଦଘାଟିତ ହୋଇଛି ପାରାଦ୍ୱୀପ ମହୋତ୍ସବ। ଦୀର୍ଘ ୭ ଦିନ ଧରି ଚାଲିବାକୁ ଥିବା ଏହି ମହୋତ୍ସବର ଉଦଘାଟନୀ ଉତ୍ସବ ଉତ୍ସାହ ଓ ଉଲ୍ଲାସରେ ପରିପୂର୍ଣ୍ଣ ଥିଲା।

ଉଦଘାଟନୀ ଉତ୍ସବରେ ମୁଖ୍ୟ ଅତିଥି ଭାବେ ରାଜ୍ୟର ଶିଳ୍ପ ମନ୍ତ୍ରୀ ସମ୍ପଦ ସ୍ୱାଇଁ ଯୋଗଦେଇ ମହୋତ୍ସବକୁ ଉଦଘାଟନ କରିଥିଲେ। ମୁଖ୍ୟ ବକ୍ତା ଭାବେ ପାରାଦ୍ୱୀପ ବନ୍ଦର ଅଧ୍ୟକ୍ଷ ପି.ଏଲ୍. ହାରାନାଦ ଉପସ୍ଥିତ ରହି ସ୍ୱର୍ଗତ ଅଟଳ ବିହାରୀ ବାଜପେୟୀଙ୍କ ଜୀବନ ଦର୍ଶନ, ରାଷ୍ଟ୍ରନିର୍ମାଣରେ ତାଙ୍କ ଅବଦାନ ଓ ପ୍ରଧାନମନ୍ତ୍ରୀତ୍ୱ କାଳରେ ଗ୍ରହଣ କରାଯାଇଥିବା ଦୃଢ଼ ପଦକ୍ଷେପ ସମ୍ପର୍କରେ ଆଲୋଚନା କରିଥିଲେ।

ଏହି ଅବସରରେ ପାରାଦ୍ୱୀପ ବନ୍ଦରର ପୂର୍ବତନ ଟ୍ରଷ୍ଟି ତଥା ବିଜେପି ଜିଲ୍ଲା ସଭାପତି ପ୍ରତାପ ମିଶ୍ର, ପୂର୍ବତନ ଜିଲ୍ଲା ସଭାପତି ସତ୍ୟବ୍ରତ ମହାପାତ୍ର ସହ ବିଭିନ୍ନ ଓ୍ୱାର୍ଡର ପାରିଷଦମାନେ ଉପସ୍ଥିତ ରହିଥିଲେ।

ଆସନ୍ତା ୭ ଦିନ ଧରି ଚାଲିବାକୁ ଥିବା ଏହି ମହୋତ୍ସବରେ ପ୍ରତ୍ୟେକ ସନ୍ଧ୍ୟାରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ସହିତ ଓଡ଼ିଶାର ବହୁ ବୁଦ୍ଧିଜୀବୀଙ୍କ ଯୋଗଦାନ କାର୍ଯ୍ୟକ୍ରମ ରହିଛି। ସେହିପରି ଓଡ଼ିଶାର ବିଭିନ୍ନ ଜିଲ୍ଲାରୁ ଆସିଥିବା ବ୍ୟବସାୟୀମାନେ ଘରକରଣା ସାମଗ୍ରୀ ଓ ମନୋରଞ୍ଜନ ସାମଗ୍ରୀର ଷ୍ଟଲ୍ ଖୋଲିଛନ୍ତି।

ଶୀତୁଆ ସନ୍ଧ୍ୟାରେ ପାରାଦ୍ୱୀପବାସୀ ଚଟପଟି ଖାଦ୍ୟର ସ୍ୱାଦ, ଘରକରଣା ସାମଗ୍ରୀର କିଣାକିଣି ଓ ରଙ୍ଗିନ ଆଲୋକରେ ମଞ୍ଚସ୍ଥ ସାଂସ୍କୃତିକ କାର୍ଯ୍ୟକ୍ରମର ଆନନ୍ଦ ନେବା ପାଇଁ ମହୋତ୍ସବ ପଡ଼ିଆକୁ ଭିଡ଼ କରୁଥିବା ଦେଖିବାକୁ ମିଳିଛି। ପରିବାର ସହିତ ଶିଶୁ, ଯୁବ ଓ ବୃଦ୍ଧମାନେ ମହୋତ୍ସବର ମନୋରଞ୍ଜନାତ୍ମକ ପରିବେଶରେ ଖୁସି ମନାଉଥିବା ଦୃଶ୍ୟ ପାରାଦ୍ୱୀପକୁ ଏକ ଉତ୍ସବମୟ ରୂପ ଦେଇଛି।
କମ୍ପ୍ୟୁଟର ପ୍ରାଧ୍ୟାପକଙ୍କୁ ଗୁଳି କରି ହତ୍ୟା

ଉତ୍ତରପ୍ରଦେଶର ଆଲିଗଡ଼ ମୁସଲିମ ବିଶ୍ୱବିଦ୍ୟାଳୟ (AMU) ପରିସରରେ ବୁଧବାର ରାତିରେ ଘଟିଛି ଚାଞ୍ଚଳ୍ୟକର ଗୁଳିକାଣ୍ଡ। ମୌଲାନା ଆଜାଦ ଲାଇବ୍ରେରି ନିକଟରେ କମ୍ପ୍ୟୁଟର ବିଭାଗର ପ୍ରାଧ୍ୟାପକ ରାଓ ଦାନିଶ ଅଲ୍ଲୀଙ୍କୁ ଗୁଳି କରି ନିର୍ମମ ଭାବେ ହତ୍ୟା କରାଯାଇଛି।

ବୁଧବାର ରାତି ପ୍ରାୟ ୯ଟା ସମୟରେ ମୁଖା ପିନ୍ଧିଥିବା ଦୁଇ ଜଣ ବାଇକ୍ ଆରୋହୀ ଦାନିଶଙ୍କୁ ରାସ୍ତାରେ ଅଟକାଇ ଗୁଳି ଚଳାଇଥିଲେ। ସେ ସମୟରେ ଦାନିଶ ତାଙ୍କ ଦୁଇ ଜଣ ସାଙ୍ଗଙ୍କ ସହ ଠିଆ ହୋଇଥିଲେ। ଗୁଳିମାଡ଼ ପରେ ଅଭିଯୁକ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ।

ଗୁରୁତର ଆହତ ଦାନିଶଙ୍କୁ ତୁରନ୍ତ ଜେଏନ ମେଡିକାଲ କଲେଜକୁ ନିଆଯାଇଥିଲା, ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।

ଘଟଣା ପରେ AMU ପରିସରରେ ଭୟ ଓ ଆତଙ୍କର ପରିବେଶ ସୃଷ୍ଟି ହୋଇଛି। ବିଶ୍ୱବିଦ୍ୟାଳୟର ସୁରକ୍ଷା ବ୍ୟବସ୍ଥାକୁ ନେଇ ଗୁରୁତର ପ୍ରଶ୍ନ ଉଠିଛି। ପୁଲିସ ସିସିଟିଭି ଫୁଟେଜ ଖୋଜାଖୋଜି କରୁଥିବା ବେଳେ ଫରେନସିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।

ଏସଏସପି ନୀରଜ ଜାଦୌନ କହିଛନ୍ତି ଯେ, ଅପରାଧୀମାନଙ୍କୁ ଶୀଘ୍ର ଗିରଫ କରାଯିବ। ଏହି ଘଟଣାକୁ ନେଇ ବିରୋଧୀ ଦଳ ସରକାରଙ୍କ ଆଇନ-ଶୃଙ୍ଖଳା ନୀତି ଉପରେ କଠୋର ପ୍ରଶ୍ନ ଉଠାଇଛନ୍ତି।