Blog

ଶ୍ରୀମନ୍ଦିରକୁ ଉଡ଼ାଇଦେବାର ଆସିଲା ଧମକ

ପୁରୀ ଶ୍ରୀମନ୍ଦିରକୁ ବୋମାରେ ଉଡ଼ାଇଦେବାକୁ ଫେସବୁକରେ ପୋଷ୍ଟ ଏକ ମାଧ୍ୟମରେ ଧମକ ଦିଆଯାଇଛି | ଏହି ଘଟଣାକୁ ନେଇ ଏବେ ଚାଞ୍ଚଲ୍ୟକର ପରିସ୍ଥିତି ସୃଷ୍ଟି ହୋଇଯାଇଛି | ଏହି ଘଟଣାରେ ପୋଲିସ ଏକାଧିକ ଲୋକଙ୍କୁ ଅଟକ ରଖି ପଚରାଉଚରା କରୁଥିବା ସୂଚନା ମିଳିଛି |

ପୁରୀ ଏସପି ସୂଚନା ଦେଇଛନ୍ତି ଯେ , ସୁରକ୍ଷା ଦୃଷ୍ଟିକୋଣରୁ ଶ୍ରୀମନ୍ଦିର ସୁରକ୍ଷା ବାହିନୀ ସହ STU ଓ ସମସ୍ତ ସୁରକ୍ଷା ଫୋର୍ସଙ୍କୁ କଡ଼ା ନିର୍ଦ୍ଦେଶ ଦିଆଯାଇଛି | ଶ୍ରୀମନ୍ଦିର ପରିସରରେ ବୋମା ନିଷ୍କ୍ରିୟକାରୀ ଦଳ ସଜାଗ ରହିଥିବାବେଳେ , ସିଟି ଡିଏସପିଙ୍କ ନେତୃତ୍ୱରେ ଏକ ବିଶେଷ ଟିମ୍ ଗଠନ କରାଯାଇଛି | ଯାହା ଦ୍ୱାରା ସମ୍ପୂର୍ଣ୍ଣ ଅଞ୍ଚଳରେ ତଲାଶି ଓ ଯାଞ୍ଚ ଚାଲି ରହିବ |

ପୋଲିସ କହିଛି, ‘ଜୁଲି ରାଣୀ ପଣ୍ଡା’ ନାମରେ ଥିବା ଫେସବୁକ୍ ଆଇଡି କିଏ ଅପରେଟ୍ କରୁଥିଲେ ଓ କେଉଁ ସ୍ଥାନରୁ ଏହା ଚାଲୁହୋଇଥିଲା , ସେ ସମ୍ପର୍କରେ ତଦନ୍ତ ଜାରି ରହିଛି | ଫେସବୁକ୍ URL ମାଧ୍ୟମରେ ଆବଶ୍ୟକ ତଥ୍ୟ ସଂଗ୍ରହ କରାଯାଉଛି |

ପ୍ରଥମେ ସେହି ଫେସବୁକ୍ ଆଇଡିରୁ ଏକ ୱେବ୍ ଚ୍ୟାନେଲ ମାଲିକଙ୍କୁ ଧମକ ଦିଆଯାଇଥିଲା | ସେହି ଏତଲାକୁ ଭିତ୍ତି କରି ପୁରୀ ବାସେଳୀ ଥାନା ପୋଲିସ ତଦନ୍ତ ଆରମ୍ଭ କରିଥିଲା | ସେହିପରି ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆଙ୍କୁ ଦିଆଯାଇଥିବା ଧମକକୁ ମଧ୍ୟ ହାଲକା ଭାବେ ନିଆଯାଇନାହିଁ ବୋଲି ପୁରୀ ଏସପି ସ୍ପଷ୍ଟ କରିଛନ୍ତି | ବର୍ତ୍ତମାନ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣରେ ରହିଥିବା ବେଳେ, ପୋଲିସ ଓ ସୁରକ୍ଷା ଏଜେନ୍ସିମାନେ ସଜାଗ ଅଛନ୍ତି।
ଗାଁରେ ପଶିଲା ଗୋଠ ଛଡା ଦନ୍ତା

ସୁନ୍ଦରଗଡ଼ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ବାରିଲେପଟା ବୋଡକାଟଲା ଗାଁରେ ଗୋଠ ଛଡା ଦନ୍ତା ହାତୀର ଆତଙ୍କ ଦେଖାଦେଇଛି | ଆଜି ସକାଳ ପ୍ରାୟ ୭ଟା ସମୟରେ ହାତୀଟି ଗାଁଭିତରକୁ ପଶିଯାଇ ଭୟଙ୍କର ଆତଙ୍କ ସୃଷ୍ଟି କରିଥିଲା | ହାତୀ ଆକ୍ରମଣରେ ୪୨ ବର୍ଷୀୟ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଛି | ମୃତକଙ୍କ ପରିଚୟ ଲୋବୋ ସିଂ ବୋଲି ଜଣା ପଡିଛି | ଗାଁରେ ପଶିଥିବା ହାତୀର ସାମ୍ନାରେ ଯିଏ ପଡ଼ୁଛି, ତାଙ୍କୁ ଆକ୍ରମଣ କରୁଥିବାର ସୂଚନା ମିଳିଛି |

ଏହି ଘଟଣା ପରେ ବିଶ୍ରା ବନଖଣ୍ଡକୁ ଲାଗିରହିଥିବା ଗାଁଗୁଡ଼ିକର ଲୋକମାନେ ଭୟଭୀତ ଅବସ୍ଥାରେ ରହିଛନ୍ତି | ହାତୀକୁ ଦେଖି ଗାଁ ଲୋକେ ତୁରନ୍ତ ବନ ବିଭାଗକୁ ସୂଚନା ଦେଇଥିଲେ|
ସୂଚନା ପାଇ ଘଟଣାସ୍ଥଳରେ ବିଶ୍ରା ବନବିଭାଗର କର୍ମଚାରୀ ପହଞ୍ଚି ହାତୀକୁ ଘଉଡ଼ାଇବା ପାଇଁ ପ୍ରୟାସ ଜାରି ରଖିଛନ୍ତି | ସୁରକ୍ଷା ଦୃଷ୍ଟିକୋଣରୁ ଗାଁ ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି | ଏପର୍ଯ୍ୟନ୍ତ ସେ ଅଞ୍ଚଳରେ ଭୟଙ୍କର ପରିସ୍ଥିତି ସୃଷ୍ଟି ହେଉଥିବାବେଳେ ବନବିଭାଗ ପକ୍ଷରୁ ପରିସ୍ଥିତି ନିୟନ୍ତ୍ରଣ ପାଇଁ ଉଦ୍ୟମ ଚାଲିଛି |
ଆଜି ମହାପ୍ରଭୁଙ୍କ ଦିବ୍ୟ ଦୁର୍ଲଭ ପଦ୍ମବେଶ

ଆଜି ମହାପ୍ରଭୁ ଶ୍ରୀଜଗନ୍ନାଥଙ୍କର ଅତ୍ୟନ୍ତ ଦୁର୍ଲଭ ଓ ରାମଣୀୟ ପଦ୍ମବେଶ ଅନୁଷ୍ଠିତ ହୋଇଛି | ମାଘ ମାସ ଶୁକ୍ଳ ପକ୍ଷ ପ୍ରତିପଦା ଠାରୁ ଶ୍ରୀ ପଞ୍ଚମୀ ମଧ୍ୟରେ ପଡୁଥିବା ପ୍ରଥମ ବୁଧବାର ଏହି ପାରମ୍ପରିକ ବେଶ ପାଳିତ ହୋଇଥାଏ |
ପରମ୍ପରାନୁସାରେ ବଡ଼ଛତା ମଠ ପକ୍ଷରୁ ପ୍ରତିବର୍ଷ ଏହି ବେଶ ପାଇଁ ଆବଶ୍ୟକ ସମସ୍ତ ସରଞ୍ଜାମ ଯୋଗାଇ ଦିଆଯାଇଥାଏ | ସୋଲ, କଦଳୀ ପାଟୁକା, ଜରି, ଜମ୍ବୁରା ସହ ପାରମ୍ପରିକ ରଙ୍ଗ ଓ ଅଠା ବ୍ୟବହାର କରି ପଦ୍ମବେଶ ପ୍ରସ୍ତୁତ କରାଯାଇଥାଏ |
ଏହି ବେଶ ପ୍ରଭୁଙ୍କ ନିମନ୍ତେ ତିଆରି କରିବା ପାଇଁ ନିଯୁକ୍ତ ସେବକମାନେ ହବିଷ ଅନ୍ନ ଖାଇବା ସହ ଶୁଦ୍ଧତା, ଶ୍ରଦ୍ଧା ଓ ଭକ୍ତିଭାବ ସହ ମହାପ୍ରଭୁଙ୍କ ଉଦ୍ଦେଶ୍ୟରେ ଏହାକୁ ସମ୍ପନ୍ନ କରିଥାନ୍ତି |
ବର୍ଷକୁ କେବଳ ଗୋଟିଏ ଦିନ ବଡ଼ସିଂହାର ନୀତିରେ ମହାପ୍ରଭୁ ପଦ୍ମବେଶରେ ପହୁଡ଼ ହୁଅନ୍ତି | ପରଦିନ ମଙ୍ଗଳା ଆଳତୀ ପର୍ଯ୍ୟନ୍ତ ଭକ୍ତମାନେ ଏହି ଦିବ୍ୟ ବେଶର ଦର୍ଶନ ଲାଭ କରିଥାନ୍ତି |
ପୁରାଣ କଥାନୁସାରେ ଭକ୍ତ ମନହର ଦାଶଙ୍କର ମନବାଞ୍ଛା ପୂରଣ ପାଇଁ ମହାପ୍ରଭୁ ଏହି ପଦ୍ମବେଶ ଧାରଣ କରିଥିବାରୁ ଏହି ପରମ୍ପରା ବହୁ ଦିନରୁ ଚାଲିଆସୁଛି |
ପାରାଦ୍ୱୀପରେ ନିଆଁର ତାଣ୍ଡବ: ପାଳଗଦାରୁ ଆରମ୍ଭ ହୋଇ ଜଳିଗଲା ଘର

ପାରାଦ୍ୱୀପରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି | ପାରାଦ୍ୱୀପ ଲକ୍ ଥାନା ଅନ୍ତ୍ରଗର୍ତ ପିପ୍ପଳ ଗ୍ରାମରେ ଏକ ଅଭାବନୀୟ ଅଗ୍ନିକାଣ୍ଡ ଘଟି ଜଣେ ମହିଳାଙ୍କ ମୃତ୍ୟୁ ହୋଇଯାଇଛି | ପାଳଗଦାରେ ନିଆଁ ଲାଗି ଚାଳଘର ସହ ସମ୍ପୂର୍ଣ୍ଣ ଜଳିଯାଇଥିବା ବେଳେ, ଘର ଭିତରେ ରୋଷେଇ କରୁଥିବା ମହିଳା ଜଣକ ପୋଡ଼ି ହୋଇଯାଇଥିଲା ଯାହା ଫଳରେ ତାଙ୍କର ଜୀବନ ଚାଲିଯାଇଥିଲା | ମୃତକ ମହିଳାଙ୍କ ପରିଚୟ ରିନି କୁମାରୀ ଦଳାଇ ବୋଲି ଜଣ ପଡିଛି |
ଘଟଣା ସମୟରେ ଘରେ ମୃତକ ମହିଳା, ତାଙ୍କର ଏକ ଛୋଟ ଶିଶୁ ଓ ଅସୁସ୍ଥ ଶଶୁର ଥିଲେ | ମହିଳା ଜଣକ ତାଙ୍କ ଛୁଆକୁ ଶଶୁରଙ୍କ ପାଖରେ ଛାଡି, ରୋଷେଇ କରିବା ପାଇଁ ଚାଳଘରକୁ ଯାଇଥିଲେ | ଅନ୍ୟ ପରିବାର ସଦସ୍ୟ ବାହାରେ ଥିଲେ |

ହଠାତ୍ କୌଣସି କାରଣରୁ ଚାଳଘର ନିକଟରେ ଥିବା ପାଳଗଦାରେ ନିଆଁ ଲାଗିଯାଇଥିଲା | ସେହି ସମୟରେ ନିଆଁ ଚାଳଘରକୁ ଧରିନେଇ ସମ୍ପୂର୍ଣ୍ଣ ଘରକୁ ଗ୍ରାସ କରିଥିଲା | ନିଆଁର ତୀବ୍ରତା ଏତେ ଅଧିକ ଥିଲା ଯେ, ଚାଳଘର ମଧ୍ୟରେ ଥିବା ରିନି କୁମାରୀ ଦଳାଇ ପୋଡ଼ି ହୋଇ ଘଟଣାସ୍ଥଳରେ ହିଁ ମୃତ୍ୟୁ ହୋଇଯାଇଥିଲା |

ଖବର ପାଇ ତୁରନ୍ତ କୁଜଙ୍ଗ ଅଗ୍ନିଶମ ବିଭାଗ ଓ ପାରାଦ୍ୱୀପ ଲକ୍ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଅଗ୍ନିନିର୍ବାପଣ କାର୍ଯ୍ୟ ଆରମ୍ଭ କରିଥିଲେ | ତେବେ ସେତବେଳକୁ ଘରଟି ସମ୍ପୂର୍ଣ୍ଣ ଭାବେ ଜଳି ନଷ୍ଟ ହୋଇଯାଇଥିଲା | ଏହି ଦୁଃଖଦ ଘଟଣା ପରେ ସମଗ୍ର ପିପ୍ପଳ ଗ୍ରାମ ଓ ଆସପାସ ଅଞ୍ଚଳରେ ଶୋକର ଛାୟା ଖେଳିଯାଇଛି | ପୋଲିସ ମୃତଦେହକୁ ଜବତ କରି ପୋଷ୍ଟମଟମ ପାଇଁ ପଠାଇଥିବା ସହ ଅଗ୍ନିକାଣ୍ଡର ସଠିକ୍ କାରଣ ଜାଣିବା ପାଇଁ ତଦନ୍ତ ଜାରି ରଖାଯାଇଛି |ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ |
ରାଇରଙ୍ଗପୁରରେ ଆୟୁର୍ବେଦର ଉତ୍ସବ: ୫ ଦିନିଆ ହାର୍ବାଲ ମେଳା ଆରମ୍ଭ

ରାଇରଙ୍ଗପୁର କଚେରୀ ପଡ଼ିଆରେ ରବିବାର ସନ୍ଧ୍ୟା ୬ ଘଟିକା ସମୟରେ ଓଡ଼ିଶା ଜଙ୍ଗଲ ବିଭାଗ ପକ୍ଷରୁ ୫ ଦିବସୀୟ ଆଞ୍ଚଳିକ କଳିଙ୍ଗ ହାର୍ବାଲ ମେଳାର ଭବ୍ୟ ଉଦଘାଟନ ହୋଇଯାଇଛି | ଏହି ମେଳାର ଉଦଘାଟନୀ କାର୍ଯ୍ୟକ୍ରମରେ ରାଜ୍ୟ ଜଙ୍ଗଲ, ପରିବେଶ ଓ ଶ୍ରମ କଲ୍ୟାଣ ମନ୍ତ୍ରୀ ଇଂ. ଗଣେଶ ରାମ ସିଂ ଖୁଣ୍ଟିଆ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ|

ଅନ୍ୟାନ୍ୟ ଅତିଥିମାନଙ୍କ ମଧ୍ୟରେ ମୟୂରଭଞ୍ଜ ଲୋକସଭା ସାଂସଦ ନବ ଚରଣ ମାଝୀ, ରାଜ୍ୟସଭା ସାଂସଦ ମମତା ମହାନ୍ତ, ଜିଲ୍ଲା ପରିଷଦ ସଦସ୍ୟା ମୀନା ସୋରେନ, କରଞ୍ଜିଆ ବନଖଣ୍ଡ ଅଧିକାରୀ ବୈଦ୍ୟନାଥ ମାଝୀ, ଏସିଏଫ୍ ପ୍ରଭାକର ମଲ୍ଲିକ ପ୍ରମୁଖ ଯୋଗ ଦେଇଥିଲେ | ରାଇରଙ୍ଗପୁର ବନଖଣ୍ଡ ଅଧିକାରୀ ସୁବ୍ରତ ପାତ୍ର ସଭାପତିତ୍ୱ କରିଥିଲେ। ଅଧ୍ୟାପିକା ଡଃ ତନ୍ମୟ ରଥ ମଞ୍ଚ ପରିଚାଳନା କରିଥିଲେ | ଅତିଥିଗଣ ତାଙ୍କ ଭାଷଣରେ କହିଥିଲେ ଯେ, ପ୍ରକୃତି ଭଗବାନଙ୍କ ସର୍ଜନା | ବୃକ୍ଷ, ଲତା, ଗୁଳ୍ମ ଓ ଔଷଧୀୟ ଉଦ୍ଭିଦ ମାନବ ଜୀବନ ଏବଂ ଜୀବଜନ୍ତୁଙ୍କ ସୁସ୍ଥ ସ୍ୱାସ୍ଥ୍ୟ ପାଇଁ ଏକ ଅମୂଲ୍ୟ ଦାନ | କମ୍ ଖର୍ଚ୍ଚରେ ଦୀର୍ଘକାଳୀନ ସୁସ୍ଥତା ପାଇଁ ଆୟୁର୍ବେଦ ହିଁ ସର୍ବଶ୍ରେଷ୍ଠ ବିକଳ୍ପ ବୋଲି ସେମାନେ ମତ ପ୍ରକାଶ କରିଥିଲେ |

ବୃକ୍ଷର ଚେର , ମୂଳ, ଡାଳ, ପତ୍ର ଓ ଗୁଳ୍ମରୁ ପ୍ରାଚୀନ ପରମ୍ପରା ଅନୁଯାୟୀ ଦୀର୍ଘବର୍ଷର ସାଧନା ଓ ପରୀକ୍ଷା ମାଧ୍ୟମରେ ବିଦ୍ୱାନ ବୈଦ୍ୟମାନେ ବିଭିନ୍ନ ରୋଗ ନିରାକରଣ ପାଇଁ ଔଷଧ ପ୍ରସ୍ତୁତ କରିଆସୁଛନ୍ତି | ଏହି ଔଷଧ ସେବନ କରି ଅନେକ ଲୋକ ନିଜ ଜୀବନକୁ ସୁରକ୍ଷିତ କରିପାରୁଛନ୍ତି |
ଏହି ଆଞ୍ଚଳିକ କଳିଙ୍ଗ ହାର୍ବାଲ ମେଳାର ମୂଖ୍ୟ ଉଦ୍ଦେଶ୍ୟ ହେଉଛି ବୈଦ୍ୟମାନଙ୍କ ଦ୍ୱାରା ପ୍ରସ୍ତୁତ ବିଭିନ୍ନ ପ୍ରକାର ଔଷଧ, ଚେରିମୂଳି ଆଧାରିତ ଉପଚାର ପ୍ରଣାଳୀକୁ ସାଧାରଣ ଲୋକଙ୍କ ମଧ୍ୟରେ ପହଞ୍ଚାଇବା, ଆୟୁର୍ବେଦ ପ୍ରତି ବିଶ୍ୱାସ ଓ ସଚେତନତା ସୃଷ୍ଟି କରିବା ଏବଂ ଔଷଧୀୟ ବୃକ୍ଷ ମାଧ୍ୟମରେ ଜୀବନ ଓ ଜୀବିକାକୁ ଆଗକୁ ବଢେଇବା | ସରକାର ମଧ୍ୟ ଔଷଧୀୟ ବୃକ୍ଷ ରୋପଣ, ଔଷଧ ପ୍ରସ୍ତୁତି ପାଇଁ ପ୍ରୋତ୍ସାହନ ରାଶି ଏବଂ ଔଷଧୀୟ ବଗିଚା ସୃଷ୍ଟି ଉପରେ ଗୁରୁତ୍ୱ ଦେଉଛନ୍ତି | ଆୟୁର୍ବେଦ ଚିକିତ୍ସାରେ କୌଣସି ପାର୍ଶ୍ୱ ପ୍ରତିକ୍ରିୟା ନଥିବା ସହ କମ୍ ଖର୍ଚ୍ଚରେ ସୁସ୍ଥ ଜୀବନ ରକ୍ଷା ସମ୍ଭବ ବୋଲି ଅତିଥିମାନେ କହିଥିଲେ |

ଏହି ହାର୍ବାଲ ମେଳାରେ ଓଡ଼ିଶାର ବିଭିନ୍ନ ଜିଲ୍ଲା ସହିତ ବଲାଙ୍ଗୀର, ସମ୍ବଲପୁର, ରାଉରକେଲା, ଖୋର୍ଦ୍ଧା, କଟକ, ଭୁବନେଶ୍ୱର, ବାଲେଶ୍ୱର, ଭଦ୍ରକ, ମୟୂରଭଞ୍ଜ, କେନ୍ଦୁଝର ଆଦି ଅଞ୍ଚଳରୁ ୬୦ରୁ ଅଧିକ ପ୍ରସିଦ୍ଧ ବୈଦ୍ୟ ନିଜ ନିଜ ଷ୍ଟଲ୍‌ରେ ଔଷଧ ପ୍ରଦର୍ଶନ କରୁଛନ୍ତି ଏବଂ ଲୋକମାନଙ୍କୁ ସଚେତନ କରାଉଛନ୍ତି | ରାଇରଙ୍ଗପୁର ବନବିଭାଗର ରେଞ୍ଜର ଜ୍ୟୋତି ରଞ୍ଜନ ସେନାପତିଙ୍କ ସମେତ ସମସ୍ତ ରେଞ୍ଜର ଓ ବନ କର୍ମଚାରୀ ୫ ଦିବସୀୟ ଏହି କାର୍ଯ୍ୟକ୍ରମକୁ ସଫଳ କରିବା ପାଇଁ ଦିନରାତି ପରିଶ୍ରମ କରୁଛନ୍ତି |
ବିଜେଡିରେ ଏବେ ବଡ଼ ହଲଚଲ : ଯାଜପୁର ନେତାଙ୍କ ବୈଠକ ପରେ ନବୀନ ନିବାସରୁ ଆସିଲା ଡାକରା

ବିଜୁ ଜନତା ଦଳରେ ବଡ଼ ରାଜନୈତିକ ହଲଚଲ ଦେଖିବାକୁ ମିଳିଛି | ଅରବିନ୍ଦ ମହାପାତ୍ର ଓ ସନାତନ ମହାକୁଡ଼ଙ୍କୁ ହଠାତ୍ ଦଳରୁ ନିଲମ୍ବନ କରାଯାଇଥିବାବେଳେ, ପରେ ଦଳ ଭିତରେ ଅସନ୍ତୋଷ ତେଜିଉଠିଛି | ଏହି ପରିସ୍ଥିତି ମଧ୍ୟରେ ବରିଷ୍ଠ ବିଜେଡି ନେତ୍ରୀ ପ୍ରମିଳା ମଲ୍ଲିକଙ୍କ ସହ ଯାଜପୁରର ବରିଷ୍ଠ ନେତାମାନଙ୍କର ଭୁବନେଶ୍ୱର ବାସଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା, ଯାହା ରାଜ୍ୟ ରାଜନୀତିକୁ ଅଧିକ ଉତ୍ତେଜିତ କରିଛି |

ଏହି ବୈଠକରେ ପ୍ରଣବ ପ୍ରକାଶ ଦାସ, ପ୍ରଣବ ବଳବନ୍ତରାୟ, ପ୍ରୀତିରଞ୍ଜନ ଘଡ଼େଇ, ରାଜନାରାୟଣ ମହାପାତ୍ର, ବିଧାୟକ ବିଶ୍ୱରଞ୍ଜନ ମଲ୍ଲିକ ଓ ସୁଜାତା ସାହୁ ସାମିଲ ହୋଇଥିଲେ| ବୈଠକ ଚାଲିଥିବା ସମୟରେ ହିଁ ଅଚାନକ ନବୀନ ନିବାସରୁ ବରିଷ୍ଠ ନେତାମାନଙ୍କୁ ଡାକରା ଆସିଥିଲା | ଏହା ପରେ ପ୍ରମିଳା ମଲ୍ଲିକ, ସଞ୍ଜୟ ଦାସବର୍ମା ଓ ପ୍ରତାପ ଜେନା ନବୀନ ନିବାସରେ ପହଞ୍ଚିଥିଲେ |

ବୈଠକ ପରେ ବିଜେଡି ନେତା ପ୍ରୀତିରଞ୍ଜନ ଘଡ଼େଇ ଦଳ ଭିତରେ ଅସନ୍ତୋଷକୁ ସ୍ପଷ୍ଟ କରି ଏକ ବଡ଼ ବୟାନ ଦେଇଛନ୍ତି | ସେ କହିଛନ୍ତି ଯେ ଦଳରେ ଏବେ ନୂଆ ନେତୃତ୍ୱର ଆବଶ୍ୟକତା ରହିଛି | ପୂର୍ବରୁ ନିଜକୁ ‘ବାଘ’ ବୋଲି କହୁଥିବା କିଛି ନେତା ଆଜି ‘କାଗଜ ବାଘ’ ବୋଲି ପ୍ରମାଣିତ ହୋଇଛନ୍ତି ବୋଲି ସେ କଟାକ୍ଷ କରିଛନ୍ତି | ଯେତେ ଜଲଦି ଦଳ ରେ ନୂଆ ନେତୃତ୍ୱ ଆସିବ ନାହିଁ, ତେବେ ତାହାର ସିଧାସଳଖ ପ୍ରଭାବ ଆଗାମୀ ପଞ୍ଚାୟତ ନିର୍ବାଚନ ଉପରେ ପଡ଼ିବ ବୋଲି ସେ ଚେତାବନୀ ଦେଇଛନ୍ତି |

ଏହା ସହ ପ୍ରମିଳା ମଲ୍ଲିକ ମଧ୍ୟ ବିଜୟ ମହାପାତ୍ରଙ୍କୁ ନିଶାନା କରି କଠୋର ବୟାନ ଦେଇଛନ୍ତି | ସେ କହିଛନ୍ତି, ବିଜୟ ମହାପାତ୍ର ପୂର୍ବରୁ ବିଜୁ ବାବୁଙ୍କୁ ହରାଇବା ପାଇଁ ଚେଷ୍ଟା କରିଥିଲେ ଓ ପରେ ନବୀନ ପଟ୍ଟନାୟକଙ୍କ ବିରୋଧରେ ଚକ୍ରାନ୍ତ କରିଥିଲେ | ଏବେ ପୁଣି ବିଜେଡିକୁ ଦୁର୍ବଳ କରିବା ପାଇଁ ଚେଷ୍ଟା ଚାଲିଛି ବୋଲି ସେ ଅଭିଯୋଗ କରିଛନ୍ତି |

‘ବାପାଠୁ ପୁଅ ଅଲଗା କି?’ ବୋଲି ପ୍ରଶ୍ନ ଉଠାଇ ପ୍ରମିଳା ପରୋକ୍ଷ ଭାବେ କହିଛନ୍ତି ଯେ ବିଜୟ ମହାପାତ୍ରଙ୍କ ପାଇଁ ହିଁ ତାଙ୍କ ପୁଅ ଅରବିନ୍ଦ ମହାପାତ୍ରଙ୍କୁ ଦଳରୁ ନିଲମ୍ବନ କରାଯାଇଛି | ତେବେ ଏହି ସମସ୍ତ ଅଭିଯୋଗ ନେଇ ଅରବିନ୍ଦ କିମ୍ବା ବିଜୟ ମହାପାତ୍ରଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ମିଳିପାରିନି|

ସମଗ୍ର ଘଟଣାକ୍ରମ ବିଜେଡି ଭିତରେ ଗଭୀର ଅସନ୍ତୋଷ ଓ ନେତୃତ୍ୱ ସଂକଟର ସ୍ପଷ୍ଟ ଇଙ୍ଗିତ ଦେଉଥିବାବେଳେ, ଆଗାମୀ ଦିନରେ ଦଳ କେଉଁ ମୁହାଁ ହେବ , ସେଥିପାଇଁ ସବୁଙ୍କ ନଜର ନବୀନ ନିବାସ ଉପରେ ରହିଛି |
ନୀତିନ ନବୀନ ଜୀ ମୋର ମାଲିକ, ନୂତନ ବିଜେପି ସଭାପତିଙ୍କୁ ଏହିପରି ସ୍ୱାଗତ କଲେ ପ୍ରଧାନମନ୍ତ୍ରୀ ମୋଦୀ

ଭାରତୀୟ ଜନତା ପାର୍ଟି ନିତିନ ନବୀନଙ୍କୁ ନିରପେକ୍ଷ ଭାବରେ ରାଷ୍ଟ୍ରୀୟ ସଭାପତି ଭାବରେ ନିର୍ବାଚିତ ହୋଇଛନ୍ତି । ମଙ୍ଗଳବାର ଦିନ, ନିତିନ ନବୀନ ଦିଲ୍ଲୀର ବିଭିନ୍ନ ଧାର୍ମିକ ସ୍ଥଳରେ ପ୍ରାର୍ଥନା କରିଥିଲେ ଏବଂ ପୂର୍ବାହ୍ନ ୧୧:୩୦ ରେ ବିଜେପି ମୁଖ୍ୟାଳୟରେ ଆନୁଷ୍ଠାନିକ ଭାବରେ ଦାୟିତ୍ୱ ଗ୍ରହଣ କରିବେ ନିତିନ ନବୀନ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଅମିତ ଶାହ ଏବଂ ରାଜନାଥ ସିଂହଙ୍କ ସମେତ ଅନେକ ବରିଷ୍ଠ ନେତା ଏହି ଉତ୍ସବରେ ଉପସ୍ଥିତ ରହିବେ ଏବଂ ତାଙ୍କୁ ପ୍ରେରଣା ଯୋଗାଇବେ। ଭାରତୀୟ ଜନତା ପାର୍ଟି ଭିତରେ ନବୀନଙ୍କର ନୂତନ ଅଧ୍ୟାୟ ଆରମ୍ଭ ହୋଇଛି।

କିଛି ସମୟ ପରେ ବିଜେପିର କାର୍ଯ୍ୟକାରୀ ସଭାପତି ନୀତିନ ନବୀନ ଆନୁଷ୍ଠାନିକ ଭାବରେ ଦଳର ନୂତନ ରାଷ୍ଟ୍ରୀୟ ଅଧ୍ୟକ୍ଷ ଭାବରେ ଦାୟିତ୍ୱ ଗ୍ରହଣ କରିବେ। ବିଜେପି ରାଷ୍ଟ୍ରୀୟ ଅଧ୍ୟକ୍ଷ ପଦ ଗ୍ରହଣ କରିବା ପୂର୍ବରୁ, ନୀତିନ ନବୀନ ମଙ୍ଗଳବାର ସକାଳେ ଦିଲ୍ଲୀର ବିଭିନ୍ନ ଧାର୍ମିକ ସ୍ଥଳ ପୂଜା ଏବଂ ପରିଦର୍ଶନ କରିବାର କାର୍ଯ୍ୟକ୍ରମ ରହିଛି। ରିପୋର୍ଟ ଅନୁସାରେ, ନବୀନ ପ୍ରଥମେ ସକାଳ 8ଟାରେ ଝଣ୍ଡେୱାଲାନ ମନ୍ଦିର ପରିଦର୍ଶନ କରିଥିଲେ। ତା’ପରେ ସେ ବାଲ୍ମିକି ମନ୍ଦିର ପରିଦର୍ଶନ କରିଥିଲେ ଏବଂ ହନୁମାନ ମନ୍ଦିରରେ ପ୍ରାର୍ଥନା କରିଥିଲେ। ତା’ପରେ ସେ ବଙ୍ଗଳା ସାହିବ ଗୁରୁଦ୍ୱାରରେ ପୂଜା କରିଥିଲେ। ରିପୋର୍ଟ ଅନୁସାରେ, ବଙ୍ଗଳା ସାହିବରେ ପୂଜାର୍ଚ୍ଚନା କରିବା ପରେ, ନୀତିନ ନବୀନ ବିଜେପି ମୁଖ୍ୟାଳୟକୁ ଯାତ୍ରା କରିଛନ୍ତି, ଯେଉଁଠାରେ ସେ ପୂର୍ବାହ୍ନ ୧୧:୩୦ ରେ ଆନୁଷ୍ଠାନିକ ଭାବରେ ରାଷ୍ଟ୍ରୀୟ ଅଧ୍ୟକ୍ଷ ପଦ ଗ୍ରହଣ କରିବେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଗୃହମନ୍ତ୍ରୀ ଅମିତ ଶାହ, ପୂର୍ବତନ ରାଷ୍ଟ୍ରପତି ଜେ.ପି. ନଡ୍ଡା, ନୀତିନ ଗଡକରୀ, ବିଭିନ୍ନ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀ, ରାଜ୍ୟ ବିଜେପି ସଭାପତି ଏବଂ ସଂଗଠନ ମନ୍ତ୍ରୀମାନେ ଉତ୍ସବରେ ଉପସ୍ଥିତ ରହିବେ।
ଜଳିଗଲା ଭୁବନେଶ୍ୱର ୟୁନିଟ୍–୧ ହାଟ :ଜଳି ପୋଡି ନଷ୍ଟ ୪୦ରୁ ଅଧିକ ଦୋକାନ, କୋଟି କୋଟି ଟଙ୍କାର କ୍ଷତି

ରାଜଧାନୀ ଭୁବନେଶ୍ୱରର ୟୁନିଟ୍–୧ ହାଟରେ ଭୟାବହ ଅଗ୍ନିକାଣ୍ଡ ଘଟି ୪୦ରୁ ଅଧିକ ଦୋକାନ ଜଳି ପାଉଁଶ ହୋଇଯାଇଛି | ଏହି ଅଗ୍ନିକାଣ୍ଡରେ କୋଟି କୋଟି ଟଙ୍କାର ସାମଗ୍ରୀ ନଷ୍ଟ ହୋଇଯାଇଛି | ଦୀର୍ଘ ୩ ଘଣ୍ଟାର ଅକ୍ଲାନ୍ତ ପରିଶ୍ରମ ପରେ ଅଗ୍ନିଶମ ବିଭାଗ ନିଆଁକୁ ଆୟତ୍ତ କରିଥିଲା|
ଖବର ଅନୁଯାୟୀ , ପ୍ରଥମେ କ୍ୟାପିଟାଲ ଥାନା ପାଖରେ ଥିବା ଗୋଟିଏ ମୂର୍ତ୍ତି ଦୋକାନରେ ନିଆଁ ଲାଗିଥିଲା | ତାହା ପରେ ଦୋକାନ ସମ୍ମୁଖରେ ଥିବା ଗୋଟିଏ ସ୍କୁଟିରେ ନିଆଁ ଲାଗି ବିସ୍ଫୋରଣ ଘଟିବା ପରେ ଅଗ୍ନିକାଣ୍ଡ ଆହୁରି ଭୟାବହ ହୋଇଯାଇଥିଲା | ପରେ ଗୋଟିଏ ଦୋକାନରେ ଥିବା ଗ୍ୟାସ ଟାଙ୍କି ବ୍ଲାଷ୍ଟ ହେବାରୁ ନିଆଁ ଦ୍ରୁତଗତିରେ ସମଗ୍ର ମାର୍କେଟକୁ ବ୍ୟାପିଯାଇଥିଲା |

ଅଗ୍ନିକାଣ୍ଡ ନିର୍ବାପନ ପାଇଁ ୧୩ଟି ଦମକଳ ଗାଡ଼ି, ରୋବୋଟିକ୍ ମନିଟର, କେମିକାଲ ଫୋମ୍, ଫାୟାର ପ୍ରକ୍ସିମିଟି ସୁଟ୍ ଓ ଜେସିବି ମେସିନ ବ୍ୟବହାର କରାଯାଇଥିଲା| ୭୦ଜଣରୁ ଅଧିକ ଅଗ୍ନିଶମ କର୍ମଚାରୀ ସହ ୨ୟୁନିଟ୍ ଷ୍ଟ୍ରାଇକିଂ ଫାୟାର ଫୋର୍ସ ଘଟଣାସ୍ଥଳରେ ଆସି ନିଆଁକୁ ଆୟତ କରିଥିଲେ |
ଅଗ୍ନିକାଣ୍ଡରେ କ୍ୟାପିଟାଲ ଥାନାର ଏସି କମ୍ପ୍ରେସର ଓ ଝରକା ମଧ୍ୟ ଫାଟିଯାଇଥିବା ଜଣାପଡ଼ିଛି | ସୌଭାଗ୍ୟବଶତଃ ରାତି ସମୟ ଥିବାରୁ କାହାରି ଜୀବନ ଯାଇନାହିଁ , ଯଦିଓ ଦୁଇଜଣଙ୍କୁ ଆଘାତ ଲାଗିଥିଲେ ମଧ୍ୟ , ଅଳ୍ପକେ ବଞ୍ଚିଯାଇଥିବାର ଖବର ମିଳିଛି |ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ସ୍ପଷ୍ଟ ଭାବେ ଜଣାପଡି ନାହିଁ , ସିସିଟିଭି ଫୁଟେଜ ଯାଞ୍ଚ ସହ ଘଟଣାର ତଦନ୍ତ କ୍ୟାପିଟାଲ ଥାନା ପୋଲିସ ଓ ଅଗ୍ନିଶମ ବିଭାଗ ପକ୍ଷରୁ ଆରମ୍ଭ କରାଯାଇଛି।
ସାଇବର ଠକେଇ ମାମଲା, ଧର୍ମଶାଳା ପୋବଳ ଗାଁରେ କ୍ରାଇମବ୍ରାଞ୍ଚ ଓ ପୋଲିସ ର ରେଡ

ସାଇବର ଠକେଇ ମାମଲାରେ ଯାଜପୁର ଜିଲ୍ଲା ଧର୍ମଶାଳା ଥାନା ଅଞ୍ଚଳରେ ବଡ଼ଧରଣର ପୁଲିସ ରେଡ୍ ହୋଇଛି। ଗତକାଲି ମଧ୍ୟରାତ୍ରିରେ ଧର୍ମଶାଳା ଥାନା ଅଧୀନ ପୋବଳ ଗାଁରେ କଟକ କ୍ରାଇମବ୍ରାଞ୍ଚ ଟିମ ଓ ଧର୍ମଶାଳା ପୁଲିସ ମିଳିତ ଭାବେ ଚଢ଼ାଉ କରିଥିଲେ। ସୂଚନା ଅନୁସାରେ, ଦୀର୍ଘଦିନ ଧରି ସାଇବର ଠକେଇ ଚକ୍ର ସକ୍ରିୟ ଥିବା ଖବର ପାଇ ପୁଲିସ ଏହି ଅଭିଯାନ ଆରମ୍ଭ କରିଥିଲା। ଚଢ଼ାଉ ସମୟରେ କିଛି ସନ୍ଦେହଜନକ ଯୁବକଙ୍କୁ ପୁଲିସ ଧରିଥିବା ସୂଚନା ମିଳିଛି। ଘଟଣାସ୍ଥଳରୁ ମୋବାଇଲ ଫୋନ, ଲ୍ୟାପଟପ, ସିମ୍ କାର୍ଡ ଓ କିଛି ଡିଜିଟାଲ ଡକ୍ୟୁମେଣ୍ଟ ଜବତ କରାଯାଇଥିବା କୁହାଯାଉଛି।

ପୁଲିସ ସୂତ୍ରର କହିବା ଅନୁଯାୟୀ, ଅନଲାଇନ୍ ଲୋନ୍, ନକଲି କଲ୍ ସେଣ୍ଟର ଓ ବ୍ୟାଙ୍କ ଠକେଇ ସହିତ ଜଡିତ ଏକ ବଡ଼ ନେଟୱର୍କର ସନ୍ଧାନ ମିଳିଛି। ଧରାପଡ଼ା ଯୁବକଙ୍କୁ ପଚରାଉଚରା ଜାରି ରହିଥିବାବେଳେ ଅଧିକ ଗିରଫ ଓ ଖୋଲାସା ହେବାର ସମ୍ଭାବନା ରହିଛି।
ପିଲାଙ୍କ ମୋବାଇଲ୍ ବ୍ୟବହାର ଉପରେ ନଜର ..ଅଶ୍ଲୀଳ କଣ୍ଟେଣ୍ଟ୍ ରୋକିବାକୁ ଏହି ୫ଟି ଆବଶ୍ୟକୀୟ ସେଟିଂ

ଆଜିର ଡିଜିଟାଲ୍ ଯୁଗରେ ସ୍ମାର୍ଟଫୋନ୍ ପିଲାମାନଙ୍କ ଜୀବନର ଏକ ଅବିଚ୍ଛେଦ୍ୟ ଅଂଶ ହୋଇପଡିଛି | ଯେଉଁ ଥିରେ କି ଅନଲାଇନ୍ କ୍ଲାସ, ପ୍ରୋଜେକ୍ଟ କାମ ଓ ଶିକ୍ଷାଗତ ଆବଶ୍ୟକତା ପାଇଁ ମୋବାଇଲ୍ ବ୍ୟବହାର ଅଧିକ ହୋଇଥିବା ବେଳେ, ଏହା ବାପାମାଙ୍କ ପାଇଁ ଏକ ବଡ଼ ଚିନ୍ତାର କାରଣ ପାଲଟିଗଲାଣି |

ଭାରତରେ ପ୍ରାୟ ୭୩% ଲୋକ AI ବ୍ୟବହାର କରୁଥିବା ବେଳେ, ଏଥିରେ Gen-Z ର ଭାଗିଦାରି ୬୫% ରହିଛି ବୋଲି ଏକ ସର୍ଭେରୁ ଜଣାପଡିଛି | କିନ୍ତୁ ପ୍ରଯୁକ୍ତିବିଦ୍ୟାର ଏହି ଦ୍ରୁତ ଅଗ୍ରଗତି ସହିତ ଡିପ୍ଫେକ୍, ଫେକ୍ ନ୍ୟୁଜ୍ ଓ ଆପତ୍ତିଜନକ କଣ୍ଟେଣ୍ଟ୍ ଭଳି ଗଭୀର ବିପଦ ମଧ୍ୟ ସାମ୍ନାକୁ ଆସିଛି |

ଖବର ଅନୁଯାୟୀ , ଆମେରିକାରରେ ଜଣେ ୧୪ ବର୍ଷୀୟ ବାଳକ AI ଚାଟବଟ୍ ସହ ଦୀର୍ଘ ସମୟ ଧରି କଥାବାର୍ତ୍ତା କରିବା ପରେ ଆତ୍ମହତ୍ୟା କରିଥିବା ଘଟଣା ସମଗ୍ର ବିଶ୍ୱକୁ ଚକିତ କରିଦେଇଛି |ଏଥିରୁ ଆମେ ସ୍ପଷ୍ଟ ଭାବେ ଜଣାପଡୁଛି ଯେ ଯଥାଯଥ ନିୟନ୍ତ୍ରଣ ନ ଥିଲେ ଡିଜିଟାଲ୍ ଦୁନିଆ ପିଲାମାନଙ୍କ ପାଇଁ ଅସୁରକ୍ଷିତ ହୋଇପାରେ | Grok ଭଳି AI ପ୍ଲାଟଫର୍ମରେ ମଧ୍ୟ ଆପତ୍ତିଜନକ ବିଷୟବସ୍ତୁ ବୃଦ୍ଧି ପାଉଥିବା ନେଇ ରିପୋର୍ଟ ଆସିଛି।

ବିଶେଷଜ୍ଞମାନଙ୍କ କହିବା ଅନୁସାରେ, ବାପାମା ପିଲାମାନଙ୍କ ଉପରେ ନଜର ଦେବାବାକୁ ପଡିବ | ଯାହାକି ତାଙ୍କ ସ୍ୱାଧୀନତାର ଉଲ୍ଲଂଘନ ଭାବିବା ଉଚିତ ନୁହେଁ, ବରଂ ଏହାକୁ ସୁରକ୍ଷାର ଆବଶ୍ୟକ ପଦକ୍ଷେପ ଭାବରେ ଦେଖିବା ଦରକାର | ‘ୱାଚର’ ଭଳି ପାରେଣ୍ଟାଲ୍ କଣ୍ଟ୍ରୋଲ୍ ଆପ୍ ପିଲାଙ୍କ ଡିଜିଟାଲ୍ କାର୍ଯ୍ୟକଳାପ, ଆପ୍ ବ୍ୟବହାର ସମୟ ଓ ଲାଇଭ୍ ଲୋକେସନ୍ ଟ୍ରାକ୍ କରିବାରେ ସହାୟକ ହୋଇପାରୁଛି |

ପିଲାମାନେ ChatGPT ଓ Google Gemini ଭଳି AI ଟୁଲ୍‌କୁ ପଢ଼ା ପାଇଁ ବ୍ୟବହାର କରୁଥିବାରୁ ଏଠାରେ ଅଭିଭାବକ ନିୟନ୍ତ୍ରଣ ଅତ୍ୟନ୍ତ ଜରୁରୀ| ସୋସିଆଲ ମିଡିଆ ମଧ୍ୟରୁ YouTube ପିଲାମାନଙ୍କ ମଧ୍ୟରେ ସବୁଠାରୁ ଲୋକପ୍ରିୟ | YouTube ର Family Center ମାଧ୍ୟମରେ ପିଲାଙ୍କ ପାଇଁ ଅଲଗା ପ୍ରୋଫାଇଲ୍ ତିଆରି କରିବା ସହ Google Family Link ଦ୍ୱାରା ଅପତ୍ତିଜନକ ସନ୍ଧାନ ଓ ସୁପାରିଶକୁ ସମ୍ପୂର୍ଣ୍ଣ ଭାବରେ ଅବରୋଧ କରାଯାଇପାରେ। ବିଶେଷକରି ୧୨ ବର୍ଷରୁ କମ୍ ବୟସ୍କ ପିଲାମାନଙ୍କ ପାଇଁ ଏହା କଡ଼ାକଡ଼ି ଭାବେ ଲାଗୁ ହେବା ଉଚିତ |

ଏହା ସହିତ Instagram ର “Supervision Mode” ମଧ୍ୟ ଏକ ପ୍ରଭାବଶାଳୀ ବ୍ୟବସ୍ଥା | ଏହା ମାଧ୍ୟମରେ ପିତାମାତା ପିଲା କେଉଁ ଆକାଉଣ୍ଟ, କଣ୍ଟେଣ୍ଟ୍ ଓ AI କ୍ୟାରେକ୍ଟର ସହ ଯୋଗାଯୋଗ କରିପାରିବେ, ସେଥିରେ ନିୟନ୍ତ୍ରଣ ରଖିପାରିବେ। ଅପମାନଜନକ କୀୱାର୍ଡ ଅବରୋଧ କରି ପିଲାଙ୍କ ଫିଡ୍‌କୁ ଅଧିକ ସୁରକ୍ଷିତ କରାଯାଇପାରିବ| ଡିଜିଟାଲ୍ ସୁବିଧା ସହ ସୁରକ୍ଷା ,ଏହି ଦୁଇଟି ମଧ୍ୟରେ ସନ୍ତୁଳନ ବଜାୟ ରଖିବା ହେଉଛି ଆଜିକା ଦୁନିଆ ପାଇଁ ଅତ୍ୟନ୍ତ ଜରୁରୀ |