Blog

ୟୁଜିସିର ନୂଆ ନିୟମକୁ ଚ୍ୟାଲେଞ୍ଜ: ସୁପ୍ରିମକୋର୍ଟ ପିଆଇଏଲ୍‌କୁ ତାଲିକାଭୁକ୍ତ କରିବାକୁ ରାଜି

ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି)ର ନୂଆ ନିୟମକୁ ଚ୍ୟାଲେଞ୍ଜ କରି ହୋଇଥିବା ଜନସ୍ୱାର୍ଥ ମାମଲାର ଶୁଣାଣି କରିବାକୁ ସୁପ୍ରିମକୋର୍ଟ ରାଜି ହୋଇଛନ୍ତି | ବୁଧବାର ଏହି ମାମଲାକୁ ତୁରନ୍ତ ତାଲିକାଭୁକ୍ତ କରିବା ପାଇଁ ଶୀର୍ଷ ଅଦାଲତ ସମ୍ମତି ପ୍ରଦାନ କରିଛନ୍ତି |

ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ସୂର୍ଯ୍ୟକାନ୍ତଙ୍କ ନେତୃତ୍ୱାଧୀନ ଖଣ୍ଡପୀଠ ସମ୍ମୁଖରେ ଆବେଦନକାରୀ ପକ୍ଷରୁ ଦାବି କରାଯାଇଛି ଯେ ୟୁଜିସିର ଏହି ନୂଆ ନିୟମ ସାଧାରଣ ବର୍ଗର ଛାତ୍ରଛାତ୍ରୀଙ୍କ ପ୍ରତି ଭେଦଭାବ ସୃଷ୍ଟି କରାଯାଉଛି |ଏହାକୁ ନେଇ ଦେଶସାରା ତୀବ୍ର ପ୍ରତିବାଦ କରୁଛି | ଗତ ଜାନୁଆରି ୧୩ ତାରିଖରେ ୟୁଜିସି ‘ଉଚ୍ଚଶିକ୍ଷା ପ୍ରତିଷ୍ଠାନରେ ସମାନତା ପ୍ରୋତ୍ସାହନ ନିୟମାବଳୀ ୨୦୨୬’ ନୂଆ ନିୟମକୁ ଦର୍ଶାଇଥିଲା | ଏହି ନିୟମ ଅନୁଯାୟୀ କଲେଜ ଓ ବିଶ୍ୱବିଦ୍ୟାଳୟରେ ଜାତିଭିତ୍ତିକ ଭେଦଭାବ ରୋକିବା ପାଇଁ ସ୍ୱତନ୍ତ୍ର କମିଟି, ହେଲ୍ପଲାଇନ ଓ ନିୟନ୍ତ୍ରଣ କରିବା ପାଇଁ ଟିମ୍ ମଧ୍ୟ ଗଠନ କରିବାକୁ ନିର୍ଦ୍ଦେଶ ଦିଆଯାଇଛି | ଏହି କମିଟିଗୁଡ଼ିକରେ ଏସ୍‌ସି, ଏସ୍‌ଟି, ଓବିସି ଓ ପିଡବ୍ଲ୍ୟୁଡି ବର୍ଗର ସଦସ୍ୟଙ୍କ ସହିତ ମହିଳା ସଦସ୍ୟଙ୍କୁ ମଧ୍ୟ ସାମିଲ କରିବାକୁ କୁହାଯାଇଛି | ଏହି ନୂଆ ନିୟମ ୟୁଜିସିର ପୂର୍ବ ନିୟମକୁ ଉପସ୍ଥାପନ କରିବ |
ଇରାନ ମାମଲାରେ ଆମେରିକାକୁ କୂଟନୈତିକ ଝଟ୍‌କା: ସାଉଦି ଆରବ ଓ ୟୁଏଇର ସ୍ପଷ୍ଟ ‘ନା’

ଇରାନ ଓ ଆମେରିକା ମଧ୍ୟରେ ଚାଲିଥିବା ତୀବ୍ର ଉତ୍ତେଜନା ମଧ୍ୟରେ ଆମେରିକାକୁ ଏକ ବଡ଼ କୂଟନୈତିକ ଝଟ୍‌କା ଲାଗିଛି | ଇରାନ ବିରୋଧରେ କୌଣସି ସାମରିକ କାର୍ଯ୍ୟାନୁଷ୍ଠାନ ପାଇଁ ନିଜ ଦେଶକୁ ଲଞ୍ଚପ୍ୟାଡ୍ ଭାବେ ବ୍ୟବହାର କରିବାକୁ ସାଉଦି ଆରବ ଓ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ସ୍ପଷ୍ଟ ଭାବେ ମନା କରିଦେଇଛନ୍ତି |

ଇରାନର ପରମାଣୁ କାର୍ଯ୍ୟକ୍ରମ ଉଲ୍ଲଂଘନ, ଆଞ୍ଚଳିକ ମିଲିସିଆକୁ ସମର୍ଥନ ଏବଂ ମାନବାଧିକାର ଉଲ୍ଲଂଘନ ଅଭିଯୋଗ ଆଣି ଆମେରିକା ଦୀର୍ଘ ଦିନ ଧରି ଇରାନ ଉପରେ କଟକଣା ଲାଗୁ କରିଆସୁଛି। ତେବେ ଏହାର ପ୍ରତିକ୍ରିୟାରେ ଇରାନ ମଧ୍ୟ ଆମେରିକା ଉପରେ ମଧ୍ୟପ୍ରାଚ୍ୟରେ ହସ୍ତକ୍ଷେପ ଓ ଅର୍ଥନୈତିକ ଦମନର ଅଭିଯୋଗ କରୁଛି | ଗତ କିଛି ମାସ ଧରି ଆମେରିକା ଉପସାଗରୀୟ ଅଞ୍ଚଳରେ ବିମାନ ବାହକ, ଯୁଦ୍ଧଜାହାଜ ଓ ଲଢ଼ୁଆ ବିମାନ ମୁତୟନ କରିଥିବାରୁ ଦୁଇ ଦେଶ ମଧ୍ୟରେ ଉତ୍ତେଜନ ଲାଗି ରହିଛି | ଯୁଦ୍ଧର ଦ୍ୱାରଦେଶରେ ପହଞ୍ଚିଥିବା କଥା କୁହାଯାଉଛି | ଇରାନ ସ୍ପଷ୍ଟ ଭାବେ ଚେତାବନୀ ଦେଇଛି ଯେ, ଯେକୌଣସି ଆକ୍ରମଣକୁ ସେ ଯୁଦ୍ଧ ଭାବେ ଗ୍ରହଣ କରିବ |

ଏହି ଘଟଣା ଉପରେ ଇରାନ ପ୍ରଥମେ ୟୁଏଇ ସହ ଆଲୋଚନା କରିଥିଲା | ଆଲୋଚନା ପରେ ୟୁଏଇ ସ୍ପଷ୍ଟ କରିଥିଲା ଯେ, ଇରାନ ବିରୋଧରେ କୌଣସି ଆକ୍ରମଣାତ୍ମକ କାର୍ଯ୍ୟ ପାଇଁ ନିଜ ବାୟୁସୀମା, ଭୂମି କିମ୍ବା ଜଳସୀମା ବ୍ୟବହାର କରିବା ପାଇଁ ମନ କରିଦେଇଛି | ପରେ ସାଉଦି ଆରବ ସହ ମଧ୍ୟ ଇରାନ ଆଲୋଚନା କରିଥିଲା | ସାଉଦି କ୍ରାଉନ ପ୍ରିନ୍ସ ମହମ୍ମଦ ବିନ୍ ସଲମାନ ଓ ଇରାନ ରାଷ୍ଟ୍ରପତି ମାସୁଦ ପେଶକିୟାନଙ୍କ ମଧ୍ୟରେ ଆଲୋଚନା ପରେ ସାଉଦି ଆରବ ସ୍ପଷ୍ଟ କରିଛି ଯେ, ତେହେରାନ ବିରୋଧରେ କୌଣସି ସାମରିକ ଅଭିଯାନ ପାଇଁ ସେ ନିଜ ଆକାଶସୀମା କିମ୍ବା ଭୂମିକୁ ଲଞ୍ଚପ୍ୟାଡ୍ ଭାବେ ବ୍ୟବହାର କରିବାକୁ ଦେବ ନାହିଁ |

ଅନ୍ୟପକ୍ଷରେ ବୁଧବାର ଦିନ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ଏକ ବଡ଼ ଆମେରିକୀୟ ନୌସେନା ଇରାନ ଅଭିମୁଖେ ଯାତ୍ରା କରୁଛନ୍ତି , ଯଦିଓ ସେ କହିଛନ୍ତି ଯେ ଏହାର ବ୍ୟବହାର କରିବାକୁ ପଡ଼ିବ ନାହିଁ | ସେ ଇରାନକୁ ପରମାଣୁ କାର୍ଯ୍ୟକ୍ରମ ପୁନଃଆରମ୍ଭ ଓ ପ୍ରତିବାଦକାରୀଙ୍କ ଉପରେ ଦମନରୁ ନିବୃତ୍ତ ରହିବାକୁ ଚେତାବନୀ ଦେଇଛନ୍ତି |
ମୌନୀ ଅମାବାସ୍ୟା ଘଟଣାର ପ୍ରଭାବ: ମାଘ ମେଳା ମଧ୍ୟରୁ ଛାଡ଼ି କାଶୀ ଗଲେ ଶଙ୍କରାଚାର୍ଯ୍ୟ

ମୌନୀ ଅମାବାସ୍ୟା ଦିନ ଘଟିଥିବା ବିବାଦକୁ ନେଇ ଅସନ୍ତୋଷ ପ୍ରକାଶ କରି ଶଙ୍କରାଚାର୍ଯ୍ୟ ସ୍ବାମୀ ଅଭିମୁକ୍ତେଶ୍ବରାନନ୍ଦ ମାଘ ମେଳାକୁ ଅଧାରୁ ଛାଡ଼ି କାଶୀ ଅଭିମୁଖେ ଯାତ୍ରା କରିଛନ୍ତି | ବୁଧବାର ସକାଳେ ହଠାତ୍‌ ଏହି ନିଷ୍ପତ୍ତି ନେଇ ସେ ପ୍ରୟାଗରାଜରୁ ବାରାଣସୀ ପ୍ରସ୍ଥାନ କରିଥିବା ଖବର ମିଳିଛି | ମୌନୀ ଅମାବାସ୍ୟା ଦିନ ପୁଲିସ ଓ ପ୍ରଶାସନିକ ଅଧିକାରୀଙ୍କ ସହ ହୋଇଥିବା ବିବାଦ ପରେ ଶଙ୍କରାଚାର୍ଯ୍ୟ ଏହି ବର୍ଷ ସଙ୍ଗମରେ ସ୍ନାନ କରିନଥିଲେ | ଏହା ସହ ସେ ନିଜ ଶିବିରକୁ ଯାଇନଥିଲେ ଏବଂ ୧୧ ଦିନ ଧରି ଶିବିର ବାହାରେ ଧାରଣାରେ ବସି ରହିଥିଲେ |

ଗତକାଲି ମଙ୍ଗଳବାର ବିଳମ୍ବିତ ରାତିରେ ଶଙ୍କରାଚାର୍ଯ୍ୟଙ୍କ ସହ ଆଲୋଚନା ପରେ ମେଳା ଛାଡ଼ିବା ନେଇ ଚୂଡ଼ାନ୍ତ ନିଷ୍ପତ୍ତି ନିଆଯାଇଥିଲା | ପ୍ରଥମ ଥର ପାଇଁ ଶଙ୍କରାଚାର୍ଯ୍ୟ ମାଘ ମେଳାକୁ ଯାଇ ସ୍ନାନ ନ କରି ଫେରିଆସିଥିବା ଘଟଣା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଯାଇଛି | ମାଘ ମେଳା ପ୍ରତିବର୍ଷ ମକର ସଂକ୍ରାନ୍ତିରୁ ମହାଶିବରାତ୍ରି ପର୍ଯ୍ୟନ୍ତ ପ୍ରାୟ ଦେଢ଼ ମାସ ଚାଲିଥାଏ | କିନ୍ତୁ କଳ୍ପବାସୀମାନେ ମକର ସଂକ୍ରାନ୍ତିରୁ ମାଘ ପୂର୍ଣ୍ଣିମା ପର୍ଯ୍ୟନ୍ତ ରହିଥାନ୍ତି | ସାଧୁସନ୍ଥଙ୍କ ଉପରେ ହୋଇଥିବା ଅନ୍ୟାୟ ଓ ଅତ୍ୟାଚାର ବିରୋଧରେ ମାଘ ମେଳା ଶେଷ ପର୍ଯ୍ୟନ୍ତ ଧାରଣାରେ ବସିବେ ବୋଲି ଶଙ୍କରାଚାର୍ଯ୍ୟ ପୂର୍ବରୁ କହିଥିଲେ | ଏହାସହ ନିଜ ପ୍ରାଣ ଉପରେ ବିପଦର ଆଶଙ୍କା ଥିବା ମଧ୍ୟ ସେ ପ୍ରକାଶ କରିଥିଲେ |

ଏହି ଘଟଣାକ୍ରମରେ ରାଜନୈତିକ ଓ ପ୍ରଶାସନିକ ମହଳରେ ମଧ୍ୟ ପ୍ରତିକ୍ରିୟା ଦେଖାଦେଇଛି | ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସମର୍ଥନରେ ଉତ୍ତର ପ୍ରଦେଶର ଜଣେ ବରିଷ୍ଠ ଟିକସ ଅଧିକାରୀ ଇସ୍ତଫା ଦେଇଛନ୍ତି | ଅଯୋଧ୍ୟା ଜିଏସ୍‌ଟି ଡେପୁଟି କମିସନର ପ୍ରଶାନ୍ତ ସିଂହ ରାଜ୍ୟପାଳଙ୍କୁ ଇସ୍ତଫା ପତ୍ର ପଠାଇଥିବା ସହ ସାମାଜିକ ଗଣମାଧ୍ୟମରେ ଭିଡିଓ ଜାରି କରି ନିଜର ମନୋଭାବ ସେଥିରେ ପ୍ରକାଶ କରିଛନ୍ତି |
ଆଜି ଭାରତ–ନ୍ୟୁଜିଲାଣ୍ଡ ଚତୁର୍ଥ ଟି-୨୦: ବିଶାଖାପାଟଣାରେ ହାଇସ୍କୋରିଂ ମ୍ୟାଚ୍ ଆଶା

ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ୫ଟି ମ୍ୟାଚ୍ ବିଶିଷ୍ଟ ଟି-୨୦ ଶୃଙ୍ଖଳାର ଚତୁର୍ଥ ମ୍ୟାଚ୍ ଆଜି ବିଶାଖାପାଟଣାର ଡକ୍ଟର ୱାଏସ୍ ରାଜଶେଖର ରେଡ୍ଡୀ ଏସିଏ ଭିଡିସିଏ କ୍ରିକେଟ ଷ୍ଟାଡିୟମରେ ଖେଳାଯିବ | ମ୍ୟାଚ୍ ସନ୍ଧ୍ୟା ୭ଟାରୁ ଆରମ୍ଭ ହେବକୁ ଯାଉଥିବା ବେଳେ ଟସ୍ ୬ଟା ୩୦ରେ ପଡ଼ିବର ଖବର ମିଳିଛି |

ପୂର୍ବରୁ ଖେଳାଯାଇଥିବା ତିନୋଟି ମ୍ୟାଚ୍ ଭାରତୀୟ ଦଳ ଜିତି ୩–୦ ରେ ଆଗରେ ରହିଛି | ଆଜିର ମ୍ୟାଚ୍ ଜିତି ଭାରତ ଶୃଙ୍ଖଳାକୁ ୪–୦ରେ ପୁରା ମ୍ୟାଚକୁ ଜିତିବା ଲକ୍ଷ୍ୟ ରଖିଛି | ନ୍ୟୁଜିଲାଣ୍ଡ ପାଇଁ ଏହି ମ୍ୟାଚ୍ ‘କର ବା ମର’ ପରିସ୍ଥିତି | ମ୍ୟାଚ ଜିତିବା ପାଇଁ ନ୍ୟୁଜିଲାଣ୍ଡ ବହୁତ ଚାପରେ ରହିଛି | ଭାରତୀୟ ଦଳରେ କିଛି ପରିବର୍ତ୍ତନ ଦେଖିବାକୁ ମିଳିପାରେ ବୋଲି ସୂଚନା ମିଳିଛି | ବିଶେଷକରି ଜସପ୍ରୀତ ବୁମରାଙ୍କୁ ବିଶ୍ରାମ ଦିଆଯାଇପାରେ ବୋଲି ଜଣାପଡିଛି |

ଭିସାଖାପାଟଣା ପିଚ୍ ସାଧାରଣତଃ ବ୍ୟାଟ୍ସମ୍ୟାନ୍‌ମାନଙ୍କ ପାଇଁ ସହଜ ହୋଇଥାଏ | ଏହି ପିଚରେ ଅନେକ ହାଇସ୍କୋରିଂ ମ୍ୟାଚ୍ ଦେଖିବାକୁ ମିଳିଛି | ଏଥିପାଇଁ ଆଜିର ମ୍ୟାଚ୍‌ରେ ମଧ୍ୟ ରନ୍ ବର୍ଷା ହେବାର ଆଶା କରାଯାଉଛି |କ୍ରିକେଟ୍ ପ୍ରେମୀଙ୍କ ପାଇଁ ଆଜିର ସନ୍ଧ୍ୟା ରୋମାଞ୍ଚକର ହେବା ନିଶ୍ଚିତ |
ଭାରତରେ ଭୟାନକ ବିମାନ ଦୁର୍ଘଟଣା: ମହାରାଷ୍ଟ୍ର ଉପମୁଖ୍ୟମନ୍ତ୍ରୀଙ୍କ ମୃତ୍ୟୁ

ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପୱାରଙ୍କ ବିମାନ ଦୁର୍ଘଟଣା ଘଟିଛି | ମହାରାଷ୍ଟ୍ର ବରାମତି ଯାଉଥିବାବେଳେ ଅବତରଣ ସମୟରେ ବଡ଼ ଧରଣର ବିମାନ ଦୁର୍ଘଟଣା ଘଟିଥିବା ଖବର ମିଳିଛି |

ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିମାନ ଦୁର୍ଘଟଣାରେ ମୃତ୍ୟ ହୋଇଛି | ବାରାମତୀ ବିମାନବନ୍ଦରରେ ଅବତରଣ କରିବା ସମୟରେ ଖସି ପଡିଥିଲା ବିମାନ | ଏହି ବିମାନ ଦୁର୍ଘଟଣାରେ ଅଜିତ ପାୱାରଙ୍କ ସମେତ ୫ ଜଣଙ୍କର ମୃତ୍ୟୁ ହୋଇଥିବା ପ୍ରାଥମିକ ସୂଚନା ମିଳିଛି |

ଅଜିତ ପାୱାର ଆଜି ସକାଳେ ଏକ ସ୍ୱତନ୍ତ୍ର ବିମାନରେ ମୁମ୍ବାଇରୁ ବାରାମତୀ ଯାଇଥିଲେ | ଜିଲ୍ଲା ପରିଷଦ ନିର୍ବାଚନ ପାଇଁ ବାରାମତୀରେ ପ୍ରଚାର ସଭା ଆୟୋଜନ କରାଯାଇଥିଲା | କିନ୍ତୁ, ବାରାମତୀ ବିମାନବନ୍ଦରର ରନୱେରେ ବିମାନଟି ଅବତରଣ କରୁଥିବା ସମୟରେ ହଠାତ୍ ଯାନ୍ତ୍ରିକ ତ୍ରୁଟି ଦେଖାଦେଲା | ସେଥିପାଇଁ ପାଇଲଟ ନିୟନ୍ତ୍ରଣ ହରେଇବା ସହ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା | ବିମାନରେ ଅଜିତ ପାୱାରଙ୍କ ସହ ତାଙ୍କ ସୁରକ୍ଷାକର୍ମୀ ମଧ୍ୟ ଯାଉଥିଲେ | ବିମାନରେ ଥିବା ୨ଜଣ କ୍ରିଉଙ୍କ ସହ ୨ ସୁରକ୍ଷାକର୍ମୀଙ୍କ ସମେତ ମୋଟ ୫ ଜଣ ବିମାନରେ ଥିଲେ | ଦୁର୍ଘଟଣା ହେବାରୁ ସମଥିଙ୍କର ମୃତ୍ୟୁ ହୋଇଛି |
ଖଣ୍ଡଗିରି କୁମ୍ଭମେଳା ୨୦୨୬ ପ୍ଲାଷ୍ଟିକମୁକ୍ତ ଅଭିଯାନ ଆରମ୍ଭ

ଭୁବନେଶ୍ୱର ଖଣ୍ଡଗିରି କୁମ୍ଭମେଳା ୨୦୨୬କୁ ପ୍ଲାଷ୍ଟିକମୁକ୍ତ କରିବା ଲକ୍ଷ୍ୟରେ ଭୁବନେଶ୍ୱର ମହାନଗର ନିଗମ (ବିଏମସି) ଆନୁକୂଲ୍ୟରେ ହିନ୍ଦୁସ୍ତାନ କୋକାକୋଲା ଏବଂ ଓଡ଼ିଶା ଡେଭଲପ୍ମେଣ୍ଟ ମ୍ୟାନେଜମେଣ୍ଟ ପ୍ରୋଗ୍ରାମ (ଓଡ଼ିଏମପି)ର ମିଳିତ ଉଦ୍ୟମରେ “ବ୍ୟବହୃତ ପ୍ଲାଷ୍ଟିକ ବୋତଲମୁକ୍ତ ଖଣ୍ଡଗିରି ମେଳା” ଅଭିଯାନ କାର୍ଯ୍ୟକାରୀ କରାଯାଇଛି।

ଏହି ଅଭିଯାନ ଅନ୍ତର୍ଗତ ୨୫ ଜାନୁଆରୀ ୨୦୨୬ ଠାରୁ ୭ ଫେବୃଆରୀ ୨୦୨୬ ପର୍ଯ୍ୟନ୍ତ ଖଣ୍ଡଗିରି କୁମ୍ଭମେଳା ପରିସରରେ ବ୍ୟବହୃତ ପ୍ଲାଷ୍ଟିକ ବୋତଲ ସଂଗ୍ରହ ପାଇଁ ୮୦ ଜଣ ସଫେଇ ସାଥିଙ୍କୁ ନିୟୋଜିତ କରାଯାଇଛି। ମେଳା ପରିସରକୁ ସ୍ୱଚ୍ଛ ଏବଂ ପରିବେଶ-ମୁ ହାଁ ରଖିବା ସହ ପ୍ଲାଷ୍ଟିକ ଦୂଷଣ କମେଇବା ଏହି କାର୍ଯ୍ୟକ୍ରମର ମୂଳ ଉଦ୍ଦେଶ୍ୟ।

ଏହି ଅଭିଯାନର ଉଦ୍ଘାଟନ କରି ଭୁବନେଶ୍ୱର ମହାନଗର ନିଗମ କମିଶନର ଶ୍ରୀଯୁକ୍ତ ଚଞ୍ଚଳ ରଣା କହିଥିଲେ ଯେ, ମେଳାରୁ ସଂଗ୍ରହ କରାଯାଉଥିବା ବ୍ୟବହୃତ ପ୍ଲାଷ୍ଟିକ ବୋତଲକୁ ସଠିକ ଭାବେ ପୃଥକ କରି ପୁନଃଚକ୍ରଣ (ରିସାଇକ୍ଲିଂ) କରାଯିବା ଉପରେ ବିଶେଷ ଧ୍ୟାନ ଦେବା ଆବଶ୍ୟକ। ସାଧାରଣ ଲୋକଙ୍କ ସହଯୋଗ ଓ ସଚେତନତା ଥିଲେ ଏପରି ବୃହତ୍ ଆୟୋଜନକୁ ପ୍ଲାଷ୍ଟିକମୁକ୍ତ କରିବା ସମ୍ଭବ ବୋଲି ସେ କହିଥିଲେ। ଏହି କାର୍ଯ୍ୟକ୍ରମରେ ଅତିରିକ୍ତ କମିଶନର ଶ୍ରୀ ମିଶ୍ରି ରତ୍ନାକର ସାହୁ ଓ କେ.ସି. ଦାସ, ଜୋନାଲ କମିଶନର ଶ୍ରୀ ରାକେଶ ପତ୍ର, ହିନ୍ଦୁସ୍ତାନ କୋକାକୋଲା ପକ୍ଷରୁ ଶ୍ରୀଯୁକ୍ତ ମିଳନ ଲେଙ୍କା ଏବଂ ଓଡ଼ିଏମପିର ଆବାହକ ଶ୍ରୀଯୁକ୍ତ ସୁଶାନ୍ତ କୁମାର ତ୍ରିପାଠୀ ଅତିଥି ଭାବେ ଯୋଗଦେଇ ସଫେଇ ସାଥି ଓ ସ୍ୱେଚ୍ଛାସେବୀଙ୍କୁ ଉତ୍ସାହିତ କରିଥିଲେ। ଏହି ସମଗ୍ର କାର୍ଯ୍ୟକ୍ରମକୁ ଓଡ଼ିଏମପିର ସଂଯୋଜକ ଶ୍ରୀ ଶିବାଶିଷ ମହାପାତ୍ରଙ୍କ ନେତୃତ୍ୱରେ ବିଷ୍ଣୁପ୍ରସାଦ ମିଶ୍ର, ନରେଶ କୁମାର ଦାସ, ଗଜଲ ରେୟାନ, ସରୋଜ ବେହେରା ଓ ରମାକାନ୍ତ ଚିନରା ପ୍ରମୁଖ ସଫଳ ଭାବେ ପରିଚାଳନା କରିଥିଲେ। ପ୍ଲାଷ୍ଟିକମୁକ୍ତ ଖଣ୍ଡଗିରି କୁମ୍ଭମେଳା ଅଭିଯାନ ମାଧ୍ୟମରେ ପରିବେଶ ସୁରକ୍ଷା ସହ ସ୍ୱଚ୍ଛ ଓ ସୁସ୍ଥ ମେଳା ଆୟୋଜନ ପାଇଁ ଏକ ସକାରାତ୍ମକ ସନ୍ଦେଶ ଯାଇଥିବା ନେଇ ସାଧାରଣ ମହଳରେ ପ୍ରଶଂସା ହେଉଛି।
୪୦ କୋଟିର ତମାଖୁ ବିଜ୍ଞାପନ ପ୍ରତ୍ୟାଖାନ କଲେ ଏହି ଅଭିନେତା

ବର୍ତ୍ତମାନ ସମୟରେ ଯେଉଁଠି ଅନେକ ସେଲିବ୍ରିଟି କୋଟି କୋଟି ଟଙ୍କାର ଫିସ୍ ନେଇ ତମାଖୁ ଓ ଗୁଟଖା ଭଳି ନିଶାଦ୍ରବ୍ୟର ପ୍ରଚାର କରୁଛନ୍ତି, ସେଠି ବଲିଉଡ୍ ଅଭିନେତା ସୁନୀଲ ସେଟ୍ଟୀ ଏକ ସକାରାତ୍ମକ ଓ ପ୍ରେରଣାଦାୟକ ପରିଚୟ ସୃଷ୍ଟି କରିଛନ୍ତି | ସମାଜିକ ଦାୟିତ୍ୱକୁ ଆଗରେ ରଖି ସୁନୀଲ କୋଟି କୋଟି ଟଙ୍କାର ତମାଖୁ ବିଜ୍ଞାପନକୁ ସ୍ପଷ୍ଟ ଭାବେ ମନ କରିଦେଇଛନ୍ତି | ଦେଶର ବିଭିନ୍ନ ସ୍ଥାନରେ ସେଲିବ୍ରିଟିମାନଙ୍କ ତମାଖୁ ପୋଷ୍ଟର୍ ଓ ବିଜ୍ଞାପନ ଯୁବପିଢ଼ୀଙ୍କୁ ନକାରାତ୍ମକ ପ୍ରଭାବ ପକଉଥିବାର ଅଭିଯୋଗ ଆସିଛି | ଏହି କାରଣରୁ ସାଧାରଣ ଜନତା ଓ ସୋସିଆଲ୍ ମିଡିଆରେ ପବ୍ଲିକ୍ ଫିଗରମାନଙ୍କ ସାମାଜିକ ଦାୟିତ୍ୱକୁ ନେଇ ଜୋରଦାର ଚର୍ଚ୍ଚା କରୁଛନ୍ତି |

ଏକ ସାକ୍ଷାତକାରରେ ସୁନୀଲ ସେଟ୍ଟୀ କହିଥିଲେ ଯେ, ସେ ନିଜ ଶରୀର ଓ ସ୍ୱାସ୍ଥ୍ୟ ପାଇଁ କୃତଜ୍ଞ। “ଶରୀର ହେଉଛି ମୋର ସବୁଠାରୁ ବଡ଼ ସମ୍ପତ୍ତି। ଯାହା ଲୋକଙ୍କ ସ୍ୱାସ୍ଥ୍ୟକୁ କ୍ଷତି କରେ, ସେପରି ବିଜ୍ଞାପନକୁ ମୁଁ କେବେ ବି ସମର୍ଥନ କରିପାରିବି ନାହିଁ,” | ସୁନୀଲ ସ୍ପଷ୍ଟ କରିଛନ୍ତି ଯେ ସେ ନିଜ ପିଲାମାନଙ୍କ ପାଇଁ ଏକ ଭଲ ଆଦର୍ଶ ହେବାକୁ ଚାହାନ୍ତି | “ମୁଁ ଚାହୁଁଛି ଯେ, ମୋ ପିଲାମାନେ ମୋତେ ଏକ ଭଲ ବାପା ଭାବେ ମାନେ ରଖନ୍ତୁ ,” |

ଯଦିଓ ସୁନୀଲ ସେଟ୍ଟୀ ପୂର୍ବ ପରି ପ୍ରତ୍ୟେକ ଚଳଚ୍ଚିତ୍ରରେ ଦେଖାଯାଉନାହାନ୍ତି, ତଥାପି ୧୭ରୁ ୨୦ ବର୍ଷ ବୟସର ଯୁବପିଢ଼ୀ ମଧ୍ୟରେ ତାଙ୍କ ପ୍ରଭାବ ଏବେ ମଧ୍ୟ ପ୍ରକାଶ ପାଉଛି | ଏହି ସମ୍ମାନକୁ ସେ କେବେ ବି ହରେଇବା କୁ ଚାହୁଁନାହାନ୍ତି | କୋଟି କୋଟି ଟଙ୍କାକୁ ପଛେରେ ପକାଇ ସୁନୀଲ ସେଟ୍ଟୀ ଦେଖାଇଛନ୍ତି ଯେ ଅଭିନୟ ସହିତ ସମାଜିକ ଦାୟିତ୍ୱ ବୋହନ କରିବା ମଧ୍ୟ ଜଣେ ଭଲ ଅଭିନେତାଙ୍କ ପରିଚୟ |
ଭାରତ–ୟୁରୋପୀୟ ସଂଘ ବାଣିଜ୍ୟ ଚୁକ୍ତି ନିକଟରେ

ଭାରତ ଓ ୟୁରୋପୀୟ ସଂଘ (EU) ମଧ୍ୟରେ ଦୀର୍ଘଦିନ ଧରି ଚାଲୁଥିବା ମୁକ୍ତ ବାଣିଜ୍ୟ ଚୁକ୍ତି (FTA) ଏବେ ଶେଷ ପର୍ଯ୍ୟାୟରେ ପହଞ୍ଚିଛି | ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ କଠୋର ଶୁଳ୍କ ନୀତି ପରିପ୍ରେକ୍ଷୀରେ ଏହି ଚୁକ୍ତିକୁ ଗ୍ଲୋବାଲ୍ ବାଣିଜ୍ୟ ପାଇଁ ଏକ ବିକଳ୍ପ ଭାବେ ଦେଖାଯାଉଛି |

୨୦୦୭ରୁ ଆରମ୍ଭ ହୋଇଥିବା ଭାରତ ଓ ଇୟୁ FTA ଆଲୋଚନା ୨୦୧୩ରେ କାର୍, ମଦ ଉପରେ ଶୁଳ୍କ, ବୌଦ୍ଧିକ ସମ୍ପତ୍ତି ଅଧିକାର ଓ ତଥ୍ୟ ସୁରକ୍ଷା ପ୍ରସଙ୍ଗରେ ମତଭେଦ ଯୋଗୁ ବନ୍ଦ ହୋଇଯାଇଥିଲା | ୨୦୨୧ରେ ପୁଣି ଆଲୋଚନାକରି ପୁନରାରମ୍ଭ ହୋଇଥିଲା ଏବଂ ୨୦୨୨ ଜୁନ୍ ଜୁଲାଇରେ ଆନୁଷ୍ଠାନିକ ଭାବରେ ନୂଆ ରାଜନୈତିକ ପ୍ରତିବଦ୍ଧତା ସହ ଆଲୋଚନା ଆଗକୁ ବଢ଼ିଥିଲା| ୨୦୨୫ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ୟୁରୋପୀୟ କମିସନ୍ ଅଧ୍ୟକ୍ଷ ଉର୍ସୁଲା ଭନ୍ ଡେର୍ ଲେଏନ୍ ୨୦୨୫ ଶେଷ ସୁଦ୍ଧା ଆଲୋଚନା ସମାପ୍ତ କରିବାକୁ ସହମତ ହୋଇଥିଲେ | ୨୦୨୬ ଜାନୁଆରିରେ ଡାଭୋସ୍‌ରେ ଉର୍ସୁଲା ଭନ୍ ଡେର୍ ଲେଏନ୍ କହିଥିଲେ ଯେ ଚୁକ୍ତି ଶେଷ ପର୍ଯ୍ୟାୟରେ ଅଛି ଏବଂ “ଆମେ ଏକ ଐତିହାସିକ ଚୁକ୍ତିର ଦ୍ୱାରଦେଶରେ ଅଛୁ |”

ଏହି ଚୁକ୍ତି ଦ୍ୱାରା ଭାରତୀୟ ରପ୍ତାନିକାରୀମାନେ ୨୭ଟି ଇୟୁ ଦେଶର ପ୍ରାୟ ୪୫ କୋଟି ଉଚ୍ଚ ଆୟ ଗ୍ରାହକଙ୍କୁ ପହଞ୍ଚିପାରିବେ | ବୟନଶିଳ୍ପ, ଔଷଧ, ଆଇଟି, ସେବା କ୍ଷେତ୍ର, ଜୋତା ଚମଡା, ରତ୍ନ ଓ ଅଳଙ୍କାର ରପ୍ତାନିରେ ବଡ଼ ବୃଦ୍ଧି ଆଶା କରାଯାଉଛି | ଏହା ସହ ଆମେରିକା ଉପରେ ଭାରତର ବାଣିଜ୍ୟ ନିର୍ଭରଶୀଳତା ହ୍ରାସ ପାଇବ | ଇୟୁ ପାଇଁ ଭାରତ ଏକ ବଡ଼ ଓ ଦ୍ରୁତ ବଢୁଥିବା ମଧ୍ୟବିତ୍ତ ବଜାର। ଚୀନ୍‌ ଉପରେ ଅତ୍ୟଧିକ ନିର୍ଭରଶୀଳତା କମେଇବା ପାଇଁ ଇୟୁ ଭାରତକୁ ଏକ ରଣନୈତିକ ସାଥୀ ଭାବେ ଦେଖୁଛି। ଗାଡ଼ି, ମଦ, ଯନ୍ତ୍ରପାତି, ରାସାୟନିକ ଦ୍ରବ୍ୟ ଓ ସ୍ୱଚ୍ଛ ଶକ୍ତି କ୍ଷେତ୍ରରେ ୟୁରୋପୀୟ ନିବେଶ ବୃଦ୍ଧି ପାଇବ ବୋଲି ଆଶା।
ଏପ୍ରିଲରୁ ଓଡ଼ିଶାରେ ଜନଗଣନାର ପ୍ରଥମ ପର୍ଯ୍ୟାୟ

ଦୀର୍ଘ ଦିନର ଅପେକ୍ଷା ପରେ ଓଡ଼ିଶାରେ ଜନଗଣନା କାର୍ଯ୍ୟ ଆରମ୍ଭ ହେବାକୁ ଯାଉଛି | ଆସନ୍ତା ଏପ୍ରିଲ୍ ମାସରୁ ରାଜ୍ୟରେ ଜନଗଣନାର ପ୍ରଥମ ପର୍ଯ୍ୟାୟ ଆରମ୍ଭ ହେବାକୁ ଯାଉଛି | ଏହି ଜନଗଣନା କାର୍ଯ୍ୟ ଦୁଇଟି ପର୍ଯ୍ୟାୟରେ ସମ୍ପନ୍ନ କରାଯିବ |

ପ୍ରଥମ ପର୍ଯ୍ୟାୟରେ ୧୬ ଏପ୍ରିଲ୍ ରୁ ୧୫ ମେ’ ୨୦୨୬ ପର୍ଯ୍ୟନ୍ତ ୩୦ ଦିନ ମଧ୍ୟରେ ଘର ତାଲିକାକରଣ (House Listing) ଓ ଗୃହ ସମ୍ପର୍କିତ ତଥ୍ୟ ସଂଗ୍ରହ କରାଯିବ | ଏହା ପୂର୍ବରୁ ୧ ଏପ୍ରିଲ୍ ରୁ ୧୫ ଏପ୍ରିଲ୍ ୨୦୨୬ ପର୍ଯ୍ୟନ୍ତ ୧୫ ଦିନର ଆତ୍ମଗଣନା (Self Enumeration) ବିକଳ୍ପ ରହିବ | ଦ୍ୱିତୀୟ ପର୍ଯ୍ୟାୟରେ ଫେବ୍ରୁଆରି ରୁ ମାର୍ଚ୍ଚ ୨୦୨୭ ମଧ୍ୟରେ ଜନସଂଖ୍ୟାଗତ ବିବରଣୀ ସହିତ ମୂଳ ଜନଗଣନା କରାଯିବ | ଏହି ପର୍ଯ୍ୟାୟରେ ପ୍ରତ୍ୟେକ ବ୍ୟକ୍ତିଙ୍କ ଜନାଙ୍କ, ସାମାଜିକ ଓ ଆର୍ଥିକ ଅବସ୍ଥା ସଂଗ୍ରହ କରାଯିବ|

ଖବର ଅନୁଯାୟୀ , ୧ ଏପ୍ରିଲ୍ ରୁ ୩୦ ସେପ୍ଟେମ୍ବର ମଧ୍ୟରେ ଦେଶର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଗୃହ ତାଲିକାଭୁକ୍ତ କାର୍ଯ୍ୟ ସମ୍ପନ୍ନ କରାଯିବ। ଏହାର ୧୫ ଦିନ ପୂର୍ବରୁ ଆତ୍ମଗଣନା ପାଇଁ ବିକଳ୍ପ ମଧ୍ୟ ଦିଆଯିବ | ଏହି କାର୍ଯ୍ୟ ସଫଳ କରିବା ପାଇଁ ଓଡ଼ିଶାରେ ପ୍ରାୟ ଏକ ଲକ୍ଷ ଜନଗଣନା ଗଣନାକାରୀ ନିଯୁକ୍ତ ହେବେ | ଜଣେ ଗଣନାକାରୀଙ୍କୁ ପ୍ରାୟ ୨୦୦ ପରିବାର ଗଣନାର ଦାୟିତ୍ୱ ଦିଆଯିବ | ଛଅ ଜଣ ଗଣନାକାରୀଙ୍କ କାର୍ଯ୍ୟ ଉପରେ ଜଣେ ପର୍ଯ୍ୟବେକ୍ଷକ ନଜର ରଖିବେ | ସରକାରଙ୍କ ପକ୍ଷରୁ ପ୍ରତ୍ୟେକ ଗଣନାକାରୀଙ୍କୁ ସେମାନଙ୍କ ସେବା ପାଇଁ ୨୫ ହଜାର ଟଙ୍କା ଆର୍ଥିକ ପ୍ରୋତ୍ସାହନ ଦେବାକୁ ନିଷ୍ପତ୍ତି ନିଆଯାଇଛି | ଜନଗଣନା ତଥ୍ୟ ଆଧାରରେ ରାଜ୍ୟ ଓ କେନ୍ଦ୍ର ସରକାର ଭବିଷ୍ୟତ ଯୋଜନା, ଉନ୍ନୟନ କାର୍ଯ୍ୟ ଓ ନୀତି ନିର୍ଣ୍ଣୟ କରିବାରେ ସହଜତା ପାଇବେ ବୋଲି ଆଶା କରାଯାଉଛି |
ଭାରତରେ ମୁସଲମାନମାନେ ସୁରକ୍ଷିତ

ଆସାମୀୟ ଦଳ ଅଲ୍‌ ଇଣ୍ଡିଆ ୟୁନାଇଟେଡ୍ ଡେମୋକ୍ରାଟିକ୍‌ ଫ୍ରଣ୍ଟ (ଏଆଇୟୁଡିଏଫ୍‌) ର ମୁଖ୍ୟ ମୌଲାନା ବଦରୁଦ୍ଦିନ୍ ଅଜମଲ କହିଛନ୍ତି, ଭାରତରେ ମୁସଲମାନମାନେ ପୂର୍ବ ଅପେକ୍ଷା ଅଧିକ ସୁରକ୍ଷିତ ରହିଛନ୍ତି। ସେ କହିଛନ୍ତି, ହିନ୍ଦୁମାନେ ସେମାନଙ୍କ ସହିତ ଠିଆ ହୋଇଛନ୍ତି , ଯାହା ଏକ ସାଧାରଣ ସମ୍ପ୍ରଦାୟିକ ସମ୍ପର୍କ ପ୍ରଦର୍ଶନ କରେ |

ଅଜମଲ ହିମନ୍ତ ବିଶ୍ୱ ଶର୍ମାଙ୍କ ମିୟା ରାଜନୀତିକୁ ଆଳୋଚନା କରି, ମୁସଲମାନମାନେ ବିଜେପିକୁ ଭୋଟ ନ ଦେବାକୁ ସୁପାରିଶ କରିଛନ୍ତି ସେ ଚେତାବନୀ ଦେଇଛନ୍ତି ଯେ, ମୁସଲମ ଭୋଟକୁ ବିଭାଜନ କରିବା ଦ୍ୱାରା ସମ୍ପ୍ରଦାୟକୁ ବହୁତ କ୍ଷତି ହୋଇଛି |

କଂଗ୍ରେସ ପୂର୍ବରୁ ନିର୍ବାଚନ ମଣ୍ଡଳୀକୁ ଅଣଦେଖା କରି ବିଜେପିକୁ ପ୍ରାର୍ଥୀ ଦେଇବାରୁ ଏଆଇୟୁଡିଏଫ୍‌ ସମାଲୋଚନା କରିଛି | ଏଆଇୟୁଡିଏଫ୍‌ ଏବେ ବିଧାନସଭା ନିର୍ବାଚନରେ ନିଜ ଅସ୍ତିତ୍ୱ ପାଇଁ ଲଢୁଛି, ମୁସଲମ ଓ ହିନ୍ଦୁ ଭୋଟରଙ୍କର ସମନ୍ୱୟରେ |

ଏଆଇୟୁଡିଏଫ୍‌ ବିଜେପି ଓ କଂଗ୍ରେସକୁ ଟାର୍ଗେଟ କରି ରାଜନୈତିକ ମଞ୍ଚରେ ସମ୍ପ୍ରଦାୟିକ ଏବଂ ରାଜନୈତିକ ସଂବିଧାନରେ ସହଯୋଗ ଲଢ଼ୁଛନ୍ତି। ଏହି ପରିସ୍ଥିତି ଆସାମର ମୁସଲିମ ଓ ହିନ୍ଦୁ ସମ୍ପ୍ରଦାୟମଧ୍ୟରେ ସମ୍ପର୍କ ସୁଦୃଢ କରିବାରେ ସାହାଯ୍ୟ କରିବ।