Blog

ବିଜେପୁର ଅଭିଯୋଗ ଶୁଣାଣିରେ ୭୮ ମାମଲା ପଞ୍ଜିକୃତ

ବଦଳିଛି ସରକାର। ହେଲେ ବଦଳିନି ବ୍ୟବସ୍ଥା। ପୁରୁଣା ସରକାର ଅମଳର ଜିଲ୍ଲାପାଳଙ୍କ ଅଭିଯୋଗ ଶୁଣାଣିକୁ ନୂଆ ସରକାର ଜାରି ରଖିଛନ୍ତି। ଏହିକ୍ରମରେ ବରଗଡ଼ ଜିଲ୍ଲା ବିଜେପୁର ପଞ୍ଚାୟତ ସମିତି କାର୍ଯ୍ୟାଳୟ ପରିସରରେ ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଶିବିର ଅନୁଷ୍ଠିତ ହୋଇଯାଇଛି । ଉକ୍ତ ଶିବିରରେ ଜଳସେଚନ, ବିଦ୍ୟୁତ୍ ଯୋଗାଣ, ଶିକ୍ଷା, ପାନୀୟ ଜଳ ଯୋଗାଣ, ରାସନ କାର୍ଡ, ଧାନ ବିକ୍ରୀ, ଭତ୍ତା , ରାସ୍ତା ନିର୍ମାଣ ଆଦି ସମାସ୍ୟା ଅଧାରିତ ସମୁଦାୟ ୭୮ ଗୋଟି ଅଭିଯୋଗର ଶୁଣାଣି ହୋଇଛି। ସେଥିରୁ ୬୬ଟି ବ୍ୟକ୍ତିଗତ ଏବଂ ୧୨ ଟି ସାମୁହିକ ସମସ୍ୟାର ଅଭିଯୋଗ ଶୁଣାଣି କରାଯାଇଛି। ଲୋକଙ୍କ ସମସ୍ୟା ତୁରନ୍ତ ସମାଧାନ କରିବା ପାଇଁ ବିଭାଗୀୟ ଅଧିକାରୀଙ୍କୁ ଜିଲ୍ଲାପାଳ ନିର୍ଦେଶ ଦେଇଛନ୍ତି । ହେଲେ ଏହି ଅଭିଯୋଗ ଶୁଣାଣି ଶିବିରକୁ ଆସିଥିବା ଲୋକଙ୍କ ମଧ୍ୟରେ ଶିବିରର ବ୍ୟବସ୍ଥାକୁ ନେଇ କେତେକାଂଶରେ ଅସନ୍ତୋଷ ଦେଖିବାକୁ ମିଳିଛି

ଉକ୍ତ ଶିବିରରେ ଜିଲ୍ଲାପାଳ ଆଦିତ୍ୟ ଗୋଏଲ , ଆରକ୍ଷୀ ଅଧିକ୍ଷକ ପ୍ରହଲ୍ଲାଦ ସହାୟ ମୀନା, ପଦ୍ମପୁର ଅତିରିକ୍ତ ଜିଲ୍ଲାପାଳ, ଜିଲ୍ଲା ପରିଷଦ ମୂଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟ ନିର୍ବାହୀ ଅଧିକାରୀ ଏବଂ ପଦ୍ମପୁର ଉପଜିଲ୍ଲାପାଳ ଉପସ୍ଥିତ ରହି ଲୋକଙ୍କ ଅଭିଯୋଗ ଶୁଣିଥିଲେ ।
ଏକାଥରେ ୧୨ ଛାତ୍ରୀ ଅସୁସ୍ଥ, ସମସ୍ତ ଛାତ୍ରୀଙ୍କୁ ଡାକ୍ତରଖାନାରେ ଭର୍ତ୍ତି

ଚାଲିଥିଲା ସ୍କୁଲ୍ , ଏକାଥରେ ଅସୁସ୍ଥ ହେଲେ ୯ମ ଶ୍ରେଣୀ ଓ ଦଶମ ଶ୍ରେଣୀରୁ ମିଶାଇ ୧୨ ଛାତ୍ରୀ । ସମସ୍ତ ଛାତ୍ରୀଙ୍କୁ ଭର୍ତି କରାଯାଇଛି ଡାକ୍ତରଖାନା ରେ । ଏଭଳି ଏକ ଅଭାବନୀୟ ଘଟଣା ଘଟିଛି ଘଷିପୁରା ବ୍ଲକ କେଶଦୁରାପାଳ ଜନମଙ୍ଗଳ ହାଇସ୍କୁଲ ଠାରେ । ପାଖାପାଖି ଦିନ ୧୧ଟା ସୟରେ କ୍ଲାସ୍ ଚାଲିଥିବାବେଳେ ୯ମ ଓ ୧୦ମ ଶ୍ରେଣୀ ରୁ ଜଣକ ପରେ ଜଣେ ୧୨ଜଣ ଛାତ୍ରୀ ଅସୁସ୍ଥ ହୋଇପଡିଲେ । ଛାତିରେ ଯନ୍ତ୍ରଣା ଅନୁଭବ କରିବା ସହ ନିଶ୍ବାସ ନେବାରେ କଷ୍ଟ ଅନୁଭବ ହେବା ସହ ଏକା ସାଙ୍ଗରେ କାନ୍ଦି ଉଠିଲେ ଛାତ୍ରୀ ମାନେ । ତେବେ ବିଦ୍ୟାଳୟ ଶିକ୍ଷକ ମାନେ ତୁରନ୍ତ ଛାତ୍ରୀ ମାନଙ୍କୁ ନିକଟସ୍ଥ କେଶଦୁରପାଳ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲେ ।ସେଠାରୁ ପୁଣିଥରେ ସମସ୍ତ ଛାତ୍ରୀ ଙ୍କୁ ଆମ୍ବୁଲାନ୍ସ ଯୋଗେ ଆନନ୍ଦପୁର ଉପଖଣ୍ଡ ମୁଖ୍ଯ ଚିକିତ୍ସାଳୟ ଠାରେ ଭର୍ତ୍ତି କରାଯାଇଛି l ଗତ ଶନିବାର ଦିନ ଠିକ୍ ଏହିଭଳି ଅସୁସ୍ଥ ଅବସ୍ଥାରେ ୨-୩ ଜଣ ଛାତ୍ରୀ ମେଡିକାଲ ରେ ଭର୍ତି ହୋଇ ସୁସ୍ଥ ହେବାପରେ ଘରକୁ ଫେରିଥିବାବା ବେଳେ ଆଜି ପୂନର୍ବାର ଏଭଳି ଘଟଣା ଘଟିବା ପରେ ଚିନ୍ତା ବ୍ଯକ୍ତ କରିଛନ୍ତି ଅଭିଭାବକ । ତେବେ ଛାତ୍ରୀ ଙ୍କ ସେଭଳି କିଛି ବିଶେଷ ସ୍ବାସ୍ଥଗତ ସମସ୍ଯା ନଥିବା କହିଛନ୍ତି ମେଡିକାଲ ସୁପରିଟେଣ୍ଡେଣ୍ଟ l
ଝାଡାବାନ୍ତିରେ ୧ ମୃତ୍ୟୁ ୫ ଗୁରୁତର

ଝାଡ଼ାବାନ୍ତିରେ ଆକ୍ରାନ୍ତ ହୋଇ ଜଣଙ୍କର ମୃତ୍ୟୁ ହୋଇଥିବା ବେଳେ ପାଞ୍ଚ ଜଣ ମେଡିକାଲେରେ ଚିକିତ୍ସିତ ହେଉଛନ୍ତି। ସୂଚନା ଅନୁଯାୟୀ ରାୟଗଡ଼ା ଜିଲ୍ଲା ମୁନିଗୁଡା ବ୍ଲକ ଅନ୍ତର୍ଗତ ଡ଼ିମିରିଗୁଡା ପଞ୍ଚାୟତର ଭଟାଙ୍ଗପଦର ଗ୍ରାମରେ ଝାଡ଼ାବାନ୍ତିରେ ଆକ୍ରାନ୍ତ ହୋଇ ଚିତ୍ର ସୁନାଙ୍କ ମୃତ୍ୟୁ ହୋଇଥିବା ବେଳେ ଆକ୍ରାନ୍ତଙ୍କ ମଧ୍ୟରୁ ଦୁଇ ଜଣ କ୍ଷିତ ସୁନା ଓ ନୁନୁଗୁଡା ସୂର୍ଯ୍ୟ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଓ ଅନ୍ୟ ତିନିଜଣ ମହିଳା ଗ୍ରାମରେ ଚିକିତ୍ସିତ ହେଉଛନ୍ତି। ମୃତକ ଚିତ୍ର ସୁନା ଗୋଟିଏ ଦିନ ଝାଡାବାନ୍ତିରେ ଆକ୍ରାନ୍ତ ହୋଇ ନିଜ ଘରେ ହିଁ ମୃତ୍ୟୁ ବରଣ କରିଥିବାଳେ ଅନ୍ୟ ଦୁଇ ଯୁବକଙ୍କୁ ଅଧିକ ଚିକିତ୍ସା ପାଇଁ ପ୍ରଥମେ ଅମ୍ବାଦଳା ଓ ପରେ ରାୟଗଡା ଜିଲ୍ଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଗ୍ରାମରେ ଡାକ୍ତରୀ ଟିମ ପହଞ୍ଚି ଆକ୍ରାନ୍ତଙ୍କୁ ଔଷଧ ପ୍ରଦାନ କରିବା ସହ ସଚେତନତା କରା ଯାଇଥିବା ଜଣାପଡ଼ିଛି। ଗ୍ରାମରେ ପ୍ୟାପିଥିବା ଝାଡାଵନ୍ତିର କାରଣ ଦୂଷିତ ପାଣି ବୋଲି ଜଣାପଡ଼ିଥିବା ବେଳେ ପ୍ରଶାସନ ତରଫରୁ ଟ୍ୟାଙ୍କରର ଯୋଗେ ପାନୀୟ ଜଳର ବ୍ୟବସ୍ଥା କରାଯାଇଛି।
ବିଜେଡିର କର୍ମୀ ସମାବେଶରେ ଉଡିଲା ଚେୟାର

ବିଜେଡିର ପରାଜୟ ପରେ କର୍ମୀଙ୍କ ମଧ୍ୟରେ ଥିବା ଅସନ୍ତୋଷ ସାମାନ୍ୟ ଘଟଣାରେ ବିସ୍ଫୋରଣର ରୂପ ନେଉଛି। ଯେମିତି ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଭଞ୍ଜନଗର ନିର୍ବାଚନ ମଣ୍ଡଳୀରେ। ଦୋମୁହାଣୀ ପଂଚାୟତରେ ବିଜେଡିର କର୍ମୀ ସମାବେଶ ବେଳେ ଖଣ୍ଡଯୁଦ୍ଧ ଦେଖିବାକୁ ମିଳିଛି । ବିଜେଡିର ପରାଜୟ ପରେ କର୍ମୀଙ୍କ ମଧ୍ୟରେ ପ୍ରବଳ ଅସନ୍ତୋଷ। ପରାଜୟ ପରେ ନେତୃମଣ୍ଡଳୀଙ୍କର ମଧ୍ୟ ଦେଖାମିଳୁନାହିଁ। କର୍ମୀଙ୍କ ଏତେ ସବୁ ପରିଶ୍ରମ ପରେ ସେମାନଙ୍କୁ ନା ସାନ୍ତ୍ବନା ଦିଆଯାଇଛି, ନାହିଁ ପରାଜୟର ସମୀକ୍ଷା କରୁଛି ଦଳ। ଫଳ ପ୍ରକାଶର ଏକ ମାସ ପରେ ଭଞ୍ଜନଗର ନିର୍ବାଚନ ମଣ୍ଡଳୀର ଦୋମୁହାଣୀରେ ଏକ ଧନ୍ୟବାଦ ସମାବେଶ ଅନୁଷ୍ଠିତ ହୋଇଥିଲା। ବ୍ୟାନରରେ ପୂର୍ବତନ ମନ୍ତ୍ରୀ ବିକ୍ରମ ଆରୁଖଙ୍କ ଫଟୋ ଥିଲା। ସମାବେଶ ପାଇଁ ଦଳର ପ୍ରାୟ ପାଞ୍ଚଶହରୁ ଉର୍ଦ୍ଧ୍ବ କର୍ମୀ ଏକାଠି ହୋଇଥିଲେ। ସଭା ଆରମ୍ଭ ହୋଇଥିଲେ ମଧ୍ୟ ଆରୁଖଙ୍କ ଦର୍ଶନ ନ ଥିଲା। ଯାହାକୁ ନେଇ ତାତିଥିଲେ କର୍ମୀ। ପରସ୍ପର ମଧ୍ୟରେ ଆରମ୍ଭ ହୋଇଥିଲା କଥା କଟାକଟି। ଯାହା ପରବର୍ତ୍ତୀ ସମୟରେ ଉଗ୍ରରୂପ ଧାରଣା କରିଥିଲା । କର୍ମୀଙ୍କ ମଧ୍ୟରେ ପରସ୍ପରକୁ ଠେଲା ପେଲା, ଗାଳିଗୁଲଜ ସହ ଚେୟାର ଫିଙ୍ଗା ଫୋପାଡା ଦୃଶ୍ୟ ଦେଖିବାକୁ ମିଳିଥିଲା। ଯେଉଁ ଭିଜୁଆଲ୍ ଏବେ ସୋସିଆଲ ମିଡିଆରେ ଘୁରି ବୁଲୁଛି । ଖଣ୍ଡଯୁଦ୍ଧ ଖବର ପାଇଁ ପୋଲିସ ସ୍ଥିତିକୁ ନିୟନ୍ତ୍ରଣ କରିଥିଲେ। ତେବେ ଏ ସମ୍ପର୍କରେ ବିଜୁଜନତା ଦଳ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ।
ନିଟ୍ ୟୁଜି ପରୀକ୍ଷାରେ ଅନିୟମିତତା ମାମଲା, ୩ ପକ୍ଷଙ୍କୁ ସୁପ୍ରିମ କୋର୍ଟଙ୍କ ରିପୋର୍ଟ ତଲବ

ନିଟ୍‌ ୟୁଜି ପରୀକ୍ଷା ପେପର ଲିକ୍‌ ଘଟଣାରେ ସୁପ୍ରିମକୋର୍ଟଙ୍କ ତିନି ସଂସ୍ଥାକୁ ରିପୋର୍ଟ ତଲବ। ନିଟ ଅନିୟମିତତା ଘଟଣାର ତଦନ୍ତ ସିବିଆଇ ଆରମ୍ଭ କରିଥିବା ବେଳେ ସର୍ବୋଚ୍ଚ କୋର୍ଟ ସିବିଆଇ, ପରୀକ୍ଷା ଆୟୋଜକ ଏନଟିଏ ଓ କେନ୍ଦ୍ର ସରକାରଙ୍କୁ ଘଟଣାର ପୂର୍ଣ୍ଣ ଷ୍ଟାଟସ ରିପୋର୍ଟ ମାଗିଛନ୍ତି। ମାମଲାରେ ୧୦ ଜୁଲାଇ ସଂଧ୍ୟା ୫ଟା ମଧ୍ୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ରହିଛି। ରିପୋର୍ଟ ଦାଖଲର ଦିନକ ପରେ ଅର୍ଥାତ ଜୁଲାଇ ୧୧ରେ ମାମଲା ପରବର୍ତ୍ତୀ ଶୁଣାଣି ହେବ।

ଗତ ନିଟ-ୟୁଜି ପରୀକ୍ଷାରେ ପେପର ଲିକ ସାରା ଦେଶରେ କେନ୍ଦ୍ର ବିରୋଧରେ ଏକ ଜନ ଆନ୍ଦୋଳନର ରୂପ ନେଇଛି। ପରୀକ୍ଷା ପୁଣି କରିବାକୁ ଏକାଧିକ ପିଟିସନ ସୁପ୍ରିମକୋର୍ଟରେ ଦାଏର କରାଯାଇଛି। ତେବେ କେନ୍ଦ୍ର ସରକାର ପୁନଃ ପରୀକ୍ଷାକୁ ବିରୋଧ କରି ଏହି ଅନିୟମିତତା କିଛି ସ୍ଥାନ ଓ କିଛି ପିଲାଙ୍କ ଦ୍ବାରା ହୋଇଛି। ପୁଣି ପରୀକ୍ଷା ହେଲେ ୨୩ ଲକ୍ଷ ପିଲା ଅସୁବିଧା ଭୋଗିବେ ବୋଲି ସର୍ବୋଚ୍ଚ କୋର୍ଟଙ୍କୁ ଜଣାଇଛି କେନ୍ଦ୍ର। କୋର୍ଟ ମଧ୍ୟ ଆଜି ଶୁଣାଣି ପରେ କେତେକାଂଶରେ ଏହି ମତ ସହ ଏକମତ ହୋଇଛନ୍ତି।

ଜଷ୍ଟିସ ଡିୱାଇ ଚନ୍ଦ୍ରଚୂଡ଼ ପୁନଃ ପରୀକ୍ଷା ପାଇଁ ଆବେଦନକାରୀ କରୁଥିବା ଯୁକ୍ତି ଶୁଣିବା ପରେ କହିଛନ୍ତି, ପେପର ଲିକ ହୋଇଛି ବୋଲି ଆମକୁ ମାନିବାକୁ ପଡ଼ିବ। ତେବେ ପୁନଃ ପରୀକ୍ଷା ଶେଷ ବିକଳ୍ପ। ୨୩ ଲକ୍ଷ ପିଲାଙ୍କ ଭବିଷ୍ୟତ ସହ ଜଡ଼ିତ। ଏହା ପୂର୍ବରୁ ଲିକ୍‌ର ସୀମା ନିର୍ଦ୍ଧାରଣ କରିବାକୁ ପଡ଼ିବ। ଯଦି ସଚ୍ଚୋଟ ଉପାୟରେ ପାସ୍‌ କରିଥିବା ଶିକ୍ଷାର୍ଥୀଙ୍କୁ ଦାଗୀ ପିଲାଙ୍କ ଠାରୁ ଅଲଗା କରାଯାଇ ପାରିବ, ତା’ହେଲେ ରି-ଟେଷ୍ଟର କୌଣସି ଆବଶ୍ୟକ ନାହିଁ ବୋଲି ସୁପ୍ରିମକୋର୍ଟ କହିଛନ୍ତି।
ପାଇକମାଲଠାରେ ବ୍ଲକସ୍ତରୀୟ ସମ୍ପୂର୍ଣ୍ଣତା ଅଭିଯାନର ଶୁଭାରମ୍ଭ

ପ୍ରଧାନ ମନ୍ତ୍ରୀଙ୍କ ନେତୃତ୍ବରେ କୋଟି କୋଟି ଭାରତୀୟଙ୍କ ଜୀବନରେ ପରିବର୍ତ୍ତନ ଆଣିବା ପାଇଁ ଆକାଂକ୍ଷୀ ବ୍ଲକ କାର୍ଯ୍ୟକ୍ରମ ଗତ ୨୦୨୩ ମସିହାରୁ ଆରମ୍ଭ ହୋଇଥିଲା। ନୀତି ଆୟୋଗଙ୍କ ଦ୍ୱାରା ପରିଚାଳିତ ଏହି ଅଭିଯାନ ମାଧ୍ୟମରେ ଦେଶର ୧୧୨ଟି ଜିଲ୍ଲା ଏବଂ ୫୦୦ ବ୍ଲକର ଦୁର୍ଗମ ଓ ଅନୁନ୍ନତ ବ୍ଲକମାନଙ୍କୁ ପ୍ରଗତିର ଶୀର୍ଷରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି । ଏହି ଯୋଜନାରେ ବରଗଡ ଜିଲ୍ଲାର ପାଇକମାଲ ବ୍ଲକ ଅନ୍ତର୍ଭୁକ୍ତ ହୋଇଛି । ଏହି ପରିପ୍ରେକ୍ଷୀରେ ପାଇକମାଲ ବ୍ଲକ ମୁଖ୍ୟାଳୟରେ ସଂପୂର୍ଣ୍ଣତା ଅଭିଯାନ କାର୍ଯ୍ୟକ୍ରମ ଶୁଭାରମ୍ଭ ହୋଇଛି । ସ୍ଥାନୀୟ ସରକାରୀ ଉଚ୍ଚ ବିଦ୍ୟାଳୟରୁ ଧର୍ମଶାଳା ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ଦ୍ଵାରା ପ୍ରଭାତ ଫେରି ଏବଂ ମିନି ମାରାଥନ ମାଧ୍ୟମରେ ଲୋକଙ୍କୁ ସଚେତନ କରାଯାଇଛି। ଉଚ୍ଚ ବିଦ୍ୟାଳୟ ପରିସରରେ ସରକାରୀ ଯୋଜନା ବିଷୟରେ ଲୋକଙ୍କୁ ଅବଗତ କରିବା ପାଇଁ ବିଭିନ୍ନ ବିଭାଗ ଦ୍ଵାରା ପ୍ରଦର୍ଶନୀ ଷ୍ଟଲ କରାଯାଇଛି ।

ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବରଗଡ ସାଂସଦ ପ୍ରଦୀପ ପୁରୋହିତ ଯୋଗ ଦେଇ ଗରିବ, ଯୁବଗୋଷ୍ଠୀ, ଅନ୍ନଦାତା ଏବଂ ନାରୀଶକ୍ତିର ଯତ୍ନ ନେବା ସହ ସେମାନଙ୍କ ସମ୍ମାନ ବିକଶିତ ଭାରତର ଲକ୍ଷ୍ୟ ପୂରଣ ଓ ଜିଲ୍ଲାପାଳଙ୍କ ନେତୃତ୍ୱରେ ବରଗଡ ଜିଲ୍ଲାର ପାଇକମାଲ ବ୍ଲକରେ ସମ୍ପୂର୍ଣତା ଅଭିଯାନର ସମସ୍ତ ମାନଦଣ୍ଡ ପୂର୍ଣ କରି ଭାରତର ପ୍ରଥମ ବ୍ଲକ ହେବା ପାଇଁ ଲକ୍ଷ୍ୟ ରଖିବ। ତେଣୁ ଜିଲ୍ଲାର ସମସ୍ତ ଅଧିକାରୀ ତୃଣମୂଳ ସ୍ତରରେ ଯୋଗ୍ୟ ଲୋକଙ୍କୁ ଯୋଜୋନର ସୁବିଧା ଯୋଗାଇବା ପାଇଁ ନିର୍ଦେଶ ଦେଇଛନ୍ତି ।

ସମ୍ମାନିତ ଅତିଥି ଭାବେ ଯୋଗ ଦେଇଥିବା ନୀତି ଆୟୋଗର ବରିଷ୍ଠ ଅଧିକାରୀ ସୁଶାନ୍ତ କୁମାର ପଟ୍ଟନାୟକ ଯୋଗଦେଇ ଏହି ଅଭିଯାନର ଉଦ୍ଦେଶ୍ୟ ଉପରେ ଆଲୋକପାତ କରିବା ସହ ସମଗ୍ର ବ୍ଲକର ସାମଗ୍ରିକ ବିକାଶ ପାଇଁ ସମସ୍ତେ ନିଷ୍ଠାର ସହ କାର୍ଯ୍ୟ କରିବାକୁ ଅନୁରୋଧ କରିଛନ୍ତି। ଏଥିରେ ଜିଲ୍ଲାପାଳ ଆଦିତ୍ୟ ଗୋଏଲ ସମ୍ପୁର୍ଣତା ଅଭିଯାନ ଅନୁଯାୟୀ ପାଇକମାଲ ବ୍ଲକର ସାମଗ୍ରିକ ବିକାଶ ପାଇଁ ସମସ୍ତ ପ୍ରସ୍ତୁତି ବିଷୟରେ ବୁଝାଇ କହିଥିଲେ।
ମହିଳାଙ୍କ ଋତୁସ୍ରାବ କାଳୀନ ଛୁଟି ସମ୍ବନ୍ଧିତ ଆବେଦନ ସୁପ୍ରିମ କୋର୍ଟରେ ଖାରଜ

ମହିଳାଙ୍କ ମାସିକ ଋତୁସ୍ରାବ କାଳୀନ ଛୁଟି ଆବେଦନ ସମ୍ବନ୍ଧିତ ଯାଚିକା ସୁପ୍ରିମ କୋର୍ଟରେ ରଦ୍ଦ। କୋର୍ଟ ଏହି ଆବେଦନକୁ ରଦ୍ଦ କରିଥିଲେ ମଧ୍ୟ ମହିଳାଙ୍କ ସ୍ବାସ୍ଥ୍ୟ ସମ୍ବନ୍ଧିତ ଏହି ଯାଚିକାର ଗୁରୁତ୍ବ ବୁଝି ଏହା ଉପରେ ରାଜ୍ୟ ଓ କେନ୍ଦ୍ର ସରକାର, ମାନବ ସମ୍ବଳ ବିଭାଗ ସହ ପରାମର୍ଶ କରି ଏକ ନୀତିଗତ ପଦକ୍ଷେପ ନେବାକୁ ଆଦେଶ ଦେଇଛନ୍ତି। କୋର୍ଟ କହିଛନ୍ତି କି, ମହିଳାଙ୍କୁ ଏପରି ଛୁଟି ଦେବା ଉପରେ ଆମର ନିର୍ଣ୍ଣୟ ପ୍ରତିକୂଳ ଓ ହାନିକାରକ ହୋଇପାରେ। ଏପରି ଆଦେଶ ମହିଳାଙ୍କୁ ନିଯୁକ୍ତି ଦେବା ବେଳେ ଏକ ନକାରାତ୍ମକ ଚିନ୍ତାଧାରା ସୃଷ୍ଟି କରିବ ନିଯୁକ୍ତିଦାତାଙ୍କ ଉପରେ ବୋଲି ମୁଖ୍ଯ ବିଚାରପତି ଡି ୱାଇ ଚନ୍ଦ୍ରଚୂଡ ଓ ବିଚାରପତି ଜେ ବି ପାରଦିୱାଲା ଓ ବିଚାରପତି ମନୋଜ ମିଶ୍ରାଙ୍କ ପୀଠ କହିଛନ୍ତି।

ସୁପ୍ରିମ କୋର୍ଟ ଶୁଣାଣି କାଳରେ କହିଛନ୍ତି କି, ଏମିତି ଛୁଟି ଅଧିକାଂଶ ମହିଳାଙ୍କୁ କାର୍ଯ୍ୟକ୍ଷେତ୍ରରୁ ଦୂରେଇ ରଖିବ, ଯାହା କୋର୍ଟ ଚାହୁଁ ନ ଥିବା କହିଛନ୍ତି। ତେଣୁ ଏହା ଉପରେ ମହିଳା ଓ ବାଳ ବିକାଶ ମନ୍ତ୍ରଣାଳୟ ସଚିବ କେନ୍ଦ୍ର ସରକାରଙ୍କ ସଲିସିଟର ଜେନେରାଲ ଐଶ୍ବର୍ଯ୍ୟାଙ୍କ ସହ ଆଲୋଚନା କରିବାକୁ ସ୍ବାଧୀନତା ଦେଇଛନ୍ତି। ଋତୁସ୍ବାବ ସମୟରେ ଅଧିକାଂଶ ମହିଳାଙ୍କୁ ପ୍ରବଳ ଯନ୍ତ୍ରଣା ହେଉଥିବାରୁ କର୍ମକ୍ଷେତ୍ରରେ ମହିଳାଙ୍କୁ ଛୁଟି ଦେବାକୁ ଦାୟର ଏକ ଜନସ୍ବାର୍ଥ ମାମଲାର ଶୁଣାଣି କରି ଏପରି କହିଛନ୍ତି ସର୍ବୋଚ୍ଚ କୋର୍ଟ। ଏହା ଉପରେ ନୀତିଗତ ନିଷ୍ପତ୍ତି ନେବାର କ୍ଷମତା ନ୍ୟାୟପାଳିକାର ନାହିଁ। ତେବେ ବର୍ତ୍ତମାନ କେବଳ ବିହାର ଓ କେରଳରେ ମହିଳାଙ୍କୁ ଋତୁସ୍ରାବ ଛୁଟି ମିଳୁଛି। ମହିଳା କର୍ମଚାରୀଙ୍କୁ ବିହାରର ୨ ଦିନ ଛୁଟି ଦିଆଯାଉଥିବା ବେଳେ କେରଳରେ ୩ ଦିନିଆ ଛୁଟି ବ୍ୟବସ୍ଥା ରହିଛି।
ରଥଯାତ୍ରାରେ ସାଂସଦ ଓ ବିଧାୟକଙ୍କ ବୃକ୍ଷ ରୋପଣ

ପବିତ୍ର ରଥଯାତ୍ରା ଅବସରରେ ଗଞ୍ଜାମ ଖଲ୍ଲିକୋଟ ଏନ ଏ ସି ଅନ୍ତର୍ଗତ ଜୟଦୁର୍ଗା ପାହାଡ଼ ପାଦଦେଶରେ ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ। ପାହାଡ ପାଦଦେଶରେ ଥିବା ମା ବଡ଼ ରାଉଳ ଠାକୁରାଣୀ ମନ୍ଦିର ଆଗରେ ଏହି ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ଆସିକା ସାଂସଦ ଅନିତା ସୁଭଦର୍ଶନୀ ପଟ୍ଟନାୟକ ଓ ଖଲ୍ଲିକୋଟ ବିଧାୟକ ପୂର୍ଣ୍ଣ ଚନ୍ଦ୍ର ସେଠୀ ବୃକ୍ଷ ରୋପଣ କରିଥିଲେ। ବୃକ୍ଷ ଲଗାଇବା ପରେ ଉପସ୍ଥିତ ନେତୃମଣ୍ଡଳୀ ସ୍ଥାନୀୟ ମହିଳା ମାନଙ୍କୁ ଲଗା ଯାଇଥିବା ବୃକ୍ଷକୁ ନିଜ ପିଲା ପରି ଯତ୍ନ ନେଇ ବଡ଼ କରିବା ପାଇଁ ପରାମର୍ଶ ଦେଇଥିଲେ।

ସାଂସଦ ଅନୀତା ପଟନାୟକ ଓ ବିଧାୟକ ସେଠୀ ମନ୍ଦିର ପରିଦର୍ଶନ କରି ପାନୀୟ ଜଳ , ବିଜୁଳି ଓ ଏକ ରୋସେଇଶାଳା ସହିତ ଯାତ୍ରୀ ବିଶ୍ରାମାଗାର ସମେତ ଅନ୍ୟାନ୍ୟ ସମସ୍ୟା ସମ୍ପର୍କରେ ଶ୍ୟାମସୁନ୍ଦରପୁର ଗ୍ରାମବାସୀଙ୍କଠାରୁ ପଚାରି ବୁଝିଥିଲେ। ଏହି କାର୍ଯ୍ୟକ୍ରମରେ ଖଲ୍ଲିକୋଟ ଏନଏସିର ପ୍ରାକ୍ତନ ନଗରପାଳ ଓ ପ୍ରଭାରୀ ଶଙ୍କର ପ୍ରସାଦ ନାହାକ, ପ୍ରାକ୍ତନ ନଗରପାଳ ଜ୍ୟୋସ୍ନା ରାଣୀ ନାହାକ ଓ ଖଲ୍ଲିକୋଟ ନଗର ବିଜେପି ସଭାପତି ସିମାଞ୍ଚଳ ଗୌଡ଼ ଶ୍ୟାମାସୁନ୍ଦରପୁର ୮ ନମ୍ବର କାଉ ନସିଲର ରେମତି ଦାସ ପ୍ରମୁଖ ଅଂଶ ଗ୍ରହଣ କରିଥିଲେ। ଉକ୍ତ ୱାର୍ଡରେ ଦୀର୍ଘ ବର୍ଷ ଧରି ବସବାସ କରି ଆସୁଥିବା ୨୦ ରୁ ଊର୍ଦ୍ଧ୍ୱ ବାସିନ୍ଦା ଘର କରି ରହିଥିବା ବେଳେ ସେମାନଙ୍କ ନାମରେ ଘରବାରି ପଟା ହୋଇ ପାରୁନଥିବାରୁ ସେମାନେ ଆବାସ ଯୋଜନା, ଜାତିଗତ ପ୍ରମାଣ ପତ୍ର ,ବାସିନ୍ଦା ଓ ଆୟ ପ୍ରମାଣ ପତ୍ର ପାଇବାରୁ ବଂଚିତ ସାଂସଦ ଓ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ ।
ସାପ କାମୁଡ଼ାରେ ହଷ୍ଟେଲ ଛାତ୍ରୀଙ୍କ ମୃତ

ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଅଧୀନ ଦର୍ପଙ୍ଗିଆ ରେସିଡେନ୍ସିଆଲ ସ୍କୁଲରେ ଅଘଟଣ। ସାପ କାମୁଡାରେ ଜଣେ ଛାତ୍ରୀଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି। ଛାତ୍ରୀଙ୍କ ମୃତ୍ୟୁକୁ ନେଇ ସ୍କୁଲରେ ଶୋକର ଛାୟା। ସୂଚନା ମୁତାବକ ରବିବାର ରାତିରେ ହଷ୍ଟେଲରେ ଥିବା ଅନ୍ତୋବାସୀ ଖାଇପିଇ ଶୋଇଥିଲେ। ସମସ୍ତେ ଶୋଇଥିବା ଅବସ୍ଥାରେ ଏକ ଚିତି ସାପ ପ୍ରଥମ ଶ୍ରେଣୀର ଛାତ୍ରୀର ବିଛଣାରେ ଚିତି ସାପଟିଏ ତାଙ୍କୁ କାମୁଡି ଦେଇଥିଲା।

ସାପ କାମୁଡିବା ପରେ ଛାତ୍ରୀ ଚିତ୍କାର କରିବା ପରେ ସମସ୍ତେ ନିଦରୁ ଉଠିଯାଇଥିଲେ । ପିଲାଟି ଅନ୍ୟମାନଙ୍କୁ କହିଥିଲା କି କିଛି ଗୋଟିଏ ତାକୁ କାମୁଡି ଦେଲା। ଅନ୍ୟ ଅନ୍ତୋବାସୀ ଖୋଜିବାରୁ ସାପ ସେହି କୋଠରୀରୁ ଯାଉଥିବା ଦେଖି ତାକୁ ମାରିଦେଇଥିଲେ । ହଷ୍ଟେଲର କର୍ମଚାରୀ ତୁରନ୍ତ ସେହି ଛାତ୍ରୀକୁ ଭଞ୍ଜନଗର ମେଡ଼ିକାଲକୁ ନେଇଯାଇଥିଲେ ଓ ବାପା ଗୋବର ସିଂ ପ୍ରଧାନକୁ ସୂଚନା ଦେଇଥିଲେ । ଡାକ୍ତର ତୁରନ୍ତ ଛାତ୍ରୀର ଚିକିତ୍ସା ଆରମ୍ଭ କରିଦେଇଥିଲେ। କିନ୍ତୁ ଡାକ୍ତରଙ୍କ ସମସ୍ତ ଚେଷ୍ଟା ହାରମାନିଥିଲା। ସକାଳ ପ୍ରାୟ ୬ଟା ବେଳେ ତାଙ୍କ ମୃତ୍ୟୁ ହୋଇଥିଲା। ଛାତ୍ରୀଙ୍କ ମୃତ୍ୟୁ ସମ୍ବାଦ ଡାକ୍ତର ଦେବା ପରେ ମେଡ଼ିକାଲରେ କାନ୍ଦ ବୋବାଳି ଆରମ୍ଭ ହୋଇଯାଇଥିଲା।
ଯୋଡ଼ା-ବଡ଼ବିଲରେ ଶ୍ରୀଜୀଉଙ୍କ ଘୋଷଯାତ୍ରା

ମହାପ୍ରଭୁ ଶ୍ରୀଜଗନ୍ନାଥଙ୍କ ଗୁଣ୍ଡିଚାଯାତ୍ରା କେବଳ ପୁରୀରେ ନୂହେଁ, ବିଶ୍ବର କୋଣ ଅନୁକୋଣରେ ପାଳିତ ହେଉଛି। କେନ୍ଦୁଝର ଜିଲ୍ଲାର ଯୋଡ଼ା-ବଡ଼ବିଲ ଓ ଆଖ ପାଖ ଅଂଚଳରେ ଶ୍ରୀଜୀଉଙ୍କ ଘୋଷଯାତ୍ରା ଭକ୍ତିମୟ ପରିବେଶ ମଧ୍ୟରେ ସମ୍ପନ୍ନ ହୋଇଯାଇଛି । ସକାଳୁ ଚତୁର୍ଦ୍ଧାମୂର୍ତିଙ୍କର ସମସ୍ତ ନୀତିକାନ୍ତି ସମ୍ପନ୍ନ ହେବାପରେ ଅପରାହ୍ନରେ ଗୋଟି ପହଣ୍ଡିରେ ଚତୁର୍ଦ୍ଧା ମୂର୍ତି ରଥାରୁଢ଼ କରାଯାଇଥିଲା । ବଡ଼ବିଲରେ ଶ୍ରୀଜୀଉମାନେ ରଥାରୁଢ଼ ହେବାପରେ ତହସିଲଦାର ଡି. ଏସ. ଯୋଶୀ ଛେରାପହଁରା କରିଥିଲେ । ଏହାପରେ ଭକ୍ତିପୂର୍ଣ୍ଣ ପରିବେଶ ମଧ୍ୟରେ ଭକ୍ତମାନେ ହରିବୋଲ ପକାଇ ରଥକୁ ଶ୍ରୀ ଗୁଣ୍ଡିଚା ମନ୍ଦିର ପର୍ଯ୍ୟନ୍ତ ଟାଣି ନେଇଥିଲେ । ବର୍ଷା ଲାଗି ରହିଥିଲେ ବି ଭକ୍ତଙ୍କ ମଧ୍ୟରେ ଉତ୍ସାହ କମ୍ ହୋଇ ନଥିଲା।

ସେହିପରି ଯୋଡ଼ାରେ ମଧ୍ୟ ଭକ୍ତିମୟ ପରିବେଶରେ ରଥଟଣା ଅନୁଷ୍ଠିତ ହୋଇଛି । ରଥାରୁଢ଼ ଶ୍ରୀଜୀଉମାନଙ୍କ ଦର୍ଶନ ପାଇଁ ବହୁ ସଂଖ୍ୟାରେ ଶ୍ରଦ୍ଧାଳୁମାନେ ଘୋଷଯାତ୍ରାରେ ସାମିଲ ହୋଇଥିଲେ । ରଥ ଦଉଡି଼ ଧରି ହରି ବୋଲ, ହୁଳହୁଳି ପକାଇ ରଥକୁ ଟାଣି ନେଇଥିଲେ ଭକ୍ତ । ଶାନ୍ତି ଶୃଙ୍ଖଳା ରକ୍ଷା ପାଇଁ ପୋଲିସ ପ୍ରଶାସନ ତରଫରୁ ବ୍ୟାପକ ବନ୍ଦୋବସ୍ତ କରାଯାଇଥିଲା ।