Blog

ଇରାନର ନିଶ କାଟିଦେଲା ଇସ୍ରାଏଲ, ଘରେ ପଶି ହମାସ ମୁଖ୍ୟ ଇସମାଇଲ ହନିୟେର ନେଲା ପ୍ରାଣ

ଅକ୍ଟୋବର ୭, ୨୦୨୩ ତାରିଖରେ ଦକ୍ଷିଣ ଇସ୍ରାଏଲ ଉପରେ ହୋଇଥିବା ଅମାନବୀୟ ଆକ୍ରମଣର ପ୍ରତିଶୋଧ ନେଲା ଇସ୍ରାଏଲ । ଇରାନର ରାଜଧାନୀ ତେହରାନରେ ପଶି ଇସଲାମିକ ରିଭୋଲ୍ୟୁସନାରୀ ଗାର୍ଡ କର୍ପସ ର (IRGC) ନାକ ତଳେ ଲୁଚିଥିବା ଆତଙ୍କବାଦୀ ସଂଗଠନ ହମାସର ମୁଖ୍ୟ ଇସମାଇଲ ହନିୟେକୁ ମାରିଲା ଇସ୍ରାଏଲର ଗୁପ୍ତଚର ସଂସ୍ଥା ମୋସାଦ (MOSSAD) । ଖବର ର ପୁଷ୍ଟି କରିଛି ନିଜେ ଇରାନର ଇସଲାମିକ ରିଭୋଲ୍ୟୁସନାରୀ ଗାର୍ଡ କର୍ପସ ।

ଖାଲି ହନିୟେ ନୁହନ୍ତି, ଆକ୍ରମଣରେ ତାଙ୍କ ଅଙ୍ଗରକ୍ଷୀଙ୍କର ମଧ୍ୟ ମୃତ୍ୟୁ ଘଟିଛି । ହନିୟେଙ୍କ ମୃତ୍ୟୁ ହମାସ ପାଇଁ ଘୋର ଲଜ୍ଜା ଓ ପରିତାପର ବିଷୟ ବୋଲି କୁହାଯାଉଛି, କାରଣ ହନିୟେଙ୍କୁ ବିଶ୍ୱର ସବୁଠାରୁ ଚର୍ଚିତ ଆତଙ୍କବାଦୀ ସଂଗଠନର ନେତା କରିଥିବା ଇରାନ ତାଙ୍କୁ ନିଜ ରାଜଧାନୀ ତେହରାନରେ ମଧ୍ୟ ସୁରକ୍ଷା ପ୍ରଦାନ କରିପାରିଲା ନାହିଁ । ହନିୟେ (୬୨), ତେହରାନରେ ରହି ଇସ୍ରାଏଲ ଉପରେ ଆକ୍ରମଣ କରୁଥିବା ହମାସର ନେତୃତ୍ୱ ନେଉଥିଲା । ତେବେ ଏଠାରେ ପ୍ରଶ୍ନ ଉଠୁଛି, ଯଦି ଇରାନ ନିଜେ ତିଆରି କରିଥିବା ଆତଙ୍କବାଦୀ ସଂଗଠନର ମୁଖିଆଙ୍କୁ ବଂଚାଇ ପାରିଲା ନାହିଁ ତେବେ ଇସ୍ରାଏଲ ଉପରେ ବିଷୋଦ୍ଗାର କରୁଥିବା ନିଜ ନେତାଙ୍କୁ କିପରି ରକ୍ଷା କରିବ?

ଏଠାରେ ଉଲ୍ଲେଖଯୋଗ୍ୟ, ମଙ୍ଗଳବାର ଦିନ ଶପଥ ଗ୍ରହଣ କରିଥିବା ଇରାନର ନୂତନ ରାଷ୍ଟ୍ରପତି ମାସୁଦ ପେଜେଶକିଆନଙ୍କ ଉଦ୍ଘାଟନୀ ସମାରୋହରେ ଅଂଶଗ୍ରହଣ କରିବା ପରେ ହିଁ ହନିୟେଙ୍କ ମୃତ୍ୟୁ ଘଟିଛି । ଶପଥ ଗ୍ରହଣ ଉତ୍ସବରେ ରାଷ୍ଟ୍ରପତି ମାସୁଦଙ୍କ ସହ ସାକ୍ଷ୍ୟାତ କରିବାର ଅଳ୍ପ ସମୟ ମଧ୍ୟରେ ପ୍ରାଣ ହରାଇଥିଲେ ହନିୟେ । ତେବେ ଘଟଣାର ପ୍ରତିଶୋଧ ନେବ ବୋଲି କହିଛି ହମାସ ।

ଆଇଆରଜିଟିସିର ଲୋକସମ୍ପର୍କ ବିଭାଗ କହିଛି ଯେ ଏହି ଆକ୍ରମଣ ବୁଧବାର ସକାଳେ ଘଟିଥିଲା ଘଟଣାର ଏବଂ ତଦନ୍ତ ଚାଲିଛି। ଆଇଆରଜିସି ପାଲେଷ୍ଟାଇନ, ମୁସଲମାନ ଜଗତ ଏବଂ ପ୍ରତିରୋଧ ଫ୍ରଣ୍ଟକୁ ସମବେଦନା ଜଣାଇଛି । ହନିୟେଙ୍କ ମୃତ୍ୟୁ ପାଇଁ ଇସ୍ରାଏଲ୍ ସେନା ବାହିନୀ ଦାୟୀ ବୋଲି ହମାସ୍ କହିଛି।

ଅନ୍ୟ ଏକ ଘଟଣାରେ ଇସ୍ରାଏଲ, ହିଜବୁଲ ନେତା ଫଉଦ ଶୁକୁରଙ୍କୁ ହତ୍ୟା କରିଥିବା କୁହାଯାଉଛି । ଫଉଦ ଶୁକୁର ୧୯୮୩ ମସିହାରେ ବେରୁଟରେ ଥିବା ୟୁଏସ୍ ମେରାଇନ୍ସ ସୈନ୍ୟମାନଙ୍କୁ ନିଶାଣକରି ଏକ ମାରାତ୍ମକ ବୋମା ବିସ୍ଫୋରଣ କରିଥିଲା ବୋଲି ଆମେରିକା କହିଛି ।

ଆଇଆରଜିସିର ସେପା ନ୍ୟୁଜ୍ ୱେବସାଇଟରେ ପ୍ରକାଶିତ ବିବୃତ୍ତି ଅନୁଯାୟୀ, ହାମାସ ଇସଲାମିକ ପ୍ରତିରୋଧର ରାଜନୈତିକ କାର୍ଯ୍ୟାଳୟର ମୁଖ୍ୟ ଇସମାଇଲ ହନିହେଙ୍କ ବାସସ୍ଥାନ ତେହେରାନରେ କ୍ଷେପଣାସ୍ତ୍ର ମାଡ ହୋଇଥିଲା ଏବଂ ଫଳ ସ୍ୱରୂପ ସେ ଏବଂ ତାଙ୍କର ଜଣେ ଅଙ୍ଗରକ୍ଷୀ ମୃତ୍ୟୁବରଣ କରିଥିଲେ ।

ପ୍ରଥମ ପାଲେଷ୍ଟାଇନ ବିଦ୍ରୋହକୁ ଦମନ କରି ଇସ୍ରାଏଲ ୧୯୮୯ ରେ ହନିୟେଙ୍କୁ ତିନି ବର୍ଷ ପାଇଁ କାରାଗାରରେ ରଖିଥିଲେ। ଏହା ପରେ ସେ ୧୯୯୨ ରେ ଇସ୍ରାଏଲ୍ ଏବଂ ଲେବାନନ୍ ମଧ୍ୟରେ ଥିବା ଏକ ସ୍ଥାନକୁ ନିର୍ବାସିତ ହୋଇଥିଲେ। ତା’ ପରେ, ୧୯୮୦ ଦଶକର ଶେଷ ଭାଗରେ ହାମାସ ଆନ୍ଦୋଳନର ଜଣେ ପ୍ରମୁଖ ସଦସ୍ୟ ହୋଇଥିଲେ ହନିୟେ।

ହାମାସର ଶୀର୍ଷ ପଦରେ ନିଯୁକ୍ତ ହେବା ପରେ, ୨୦୧୭ ରେ, ହନିୟେ ତୁର୍କୀ ଏବଂ ଦୋହା ମଧ୍ୟରେ ଯାତ୍ରା କରୁଥିଲେ । ଏପ୍ରିଲ ୧୦, ୨୦୨୪ ତାରିଖରେ ଇସ୍ରାଏଲ ତରଫରୁ ହୋଇଥିବା କ୍ଷେପଣାସ୍ତ୍ର ଆକ୍ରମଣରେ ହନିୟେଙ୍କ ୪ ପୁଅ — ହଜିମ, ଅମୀର ଏବଂ ମହମ୍ମଦ ମୃତ୍ୟୁବରଣ କରିଥିଲେ । ଖାଲି ଏତିକି ନୁହେଁ, ଏହି ଆକ୍ରମଣରେ, ହନିୟେ ତାଙ୍କର ତିନି ଜଣ ନାତୁଣୀ ଏବଂ ଜଣେ ନାତୀଙ୍କୁ ମଧ୍ୟ ହରାଇଥିଲେ ।
ଆବର୍ଜନାର ସମୁଦ୍ର ଭସାଇ ନେଲା ସବୁକିଛି, ଭାସୁଥିଲା ଶବ ପୋତିଯାଇଥିଲା ଶତାଧିକ ଘର

ନଦୀରେ ଭାସୁଥିବା ଶବ, ଭଙ୍ଗା ରାସ୍ତା ଏବଂ ବ୍ରିଜ୍… ଏହା କେରଳର ୱାୟାନାଡରେ ବିନାଶର ଦୃଶ୍ୟ । ଏଠାରେ ଭୀଷଣ ଭୂସ୍ଖନ ଯୋଗୁଁ ପ୍ରାୟ ୨୦୦ ଘର ପ୍ରଭାବିତ ହୋଇଛି । ବର୍ତ୍ତମାନ ସୁଦ୍ଧା ୮୪ରୁ ଅଧିକ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଶହ ଶହ ଲୋକ ଏବେ ବି ଅଳିଆ ଆବର୍ଜନାରେ ଫସି ରହିଥିବା ଆଶଙ୍କା ରହିଛି । ଅଳିଆ ଆବର୍ଜନାରେ ଫସି ରହିଥିବା ଲୋକଙ୍କ ପାଇଁ ସେନା ଏୟାରଲିଫ୍ଟ କରିବାକୁ ଯୋଜନା କରୁଛି । ଏଥିପାଇଁ ସେନା ହେଲିକପ୍ଟର ଗୁଡ଼ିକ ୱାୟାନାଡ ଅଭିମୁଖେ ଯାତ୍ରା କରିଛି । ଅନ୍ୟପକ୍ଷରେ ପ୍ରଧାନମନ୍ତ୍ରୀ ମୋଦୀ ଏବଂ ୱାୟାନାଦ ସାଂସଦ ରାହୁଲ ଗାନ୍ଧୀ ଏହି ଦୁର୍ଘଟଣାରେ ଦୁଃଖ ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ ମଧ୍ୟ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଲେଖାଏଁ ଆର୍ଥିକ ସହାୟତା ଘୋଷଣା କରିଛନ୍ତି ।

କେରଳର ୱାୟାନାଡରେ ଲଗାତାର ପ୍ରବଳ ବର୍ଷା ହେତୁ ମଙ୍ଗଳବାର ଦିନ ୪ ଘଣ୍ଟା ମଧ୍ୟରେ ୩ଟି ବଡ ଭୂସ୍ଖଳନ ଘଟିଛି । ମୁଣ୍ଡକ୍କଇ, ଚୁରଲମାଲା, ଅଟାମାଲା ଏବଂ ନୋଲପୁଜା ଭୂସ୍ଖଳନ କବ୍ଜାରେ ରହିଥିଲା । ଏହି ଗ୍ରାମ ଗୁଡିକରେ ଶହ ଶହ ଘର ଭୂସ୍ଖଳନ ହେତୁ ଆବର୍ଜନା ତଳେ ପୋତି ହୋଇ ଧ୍ବଂଶ ହୋଇଯାଇଛି । କେବଳ ଚୁରଲମାଲାରେ ୨୦୦ ଘର କ୍ଷତିଗ୍ରସ୍ତ ହୋଇଛି ।

କେରଳ ରାଜ୍ୟ ବିପର୍ଯ୍ୟୟ ପରିଚାଳନା ପ୍ରାଧିକରଣ KSDMA କହିଛି ଯେ, ଅଗ୍ନିଶମ ବାହିନୀ ଏବଂ NDRF ଟିମ୍ ନିୟୋଜିତ ହୋଇଛନ୍ତି । ଏହା ବ୍ୟତୀତ ଅଧିକ NDRF ଟିମ୍ ମଧ୍ୟ ୱାୟାନାଡରେ ପହଞ୍ଚୁଛନ୍ତି । ଏହା ବ୍ୟତୀତ କନ୍ନୁର ପ୍ରତିରକ୍ଷା ସୁରକ୍ଷା କର୍ପସକୁ ଉଦ୍ଧାର କାର୍ଯ୍ୟରେ ସାହାଯ୍ୟ କରିବାକୁ ୱାୟାନାଦ ଯିବାକୁ ନିର୍ଦ୍ଦେଶ ଦିଆଯାଇଛି । ତେବେ ପ୍ରବଳ ବର୍ଷା ହେତୁ ଉଦ୍ଧାର କାର୍ଯ୍ୟ ମଧ୍ୟ ଠିକ୍ ଭାବେ ହୋଇପାରୁନାହିଁ ।
ଏବେବି ବଞ୍ଚି ରହିଛି ମାନବିକତା, ଉଦାହରଣ ସାଜିଲେ ଯୁବ ସାମ୍ବାଦିକ

ଦୂର୍ଘଟଣା ଗ୍ରସ୍ତ ହୋଇ ରାସ୍ତା ଉପରେ ପଡ଼ି ରହିଥିବା ଆହତ ବ୍ୟକ୍ତିକୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କଲେ ସମାଜସେବୀ ତଥା ଯୁବ ସାମ୍ବାଦିକ ନିଲେଶ ଅନିରୁଦ୍ଧ ନାୟକ। ସୂଚନା ଅନୁସାରେ ଦେବଗଡ଼ ଜିଲ୍ଲା ରିଆମାଳ ବ୍ଲକ ରେଙ୍ଗାଲପାଲି ଗ୍ରାମର କାଳିଆ ସେଠୀ ନିଜ ବାଇକ୍ ଯୋଗେ ନିଜ ଗାଁ ରେଙ୍ଗାଲପାଲି ରୁ ଖିଲେଇ ଅଭିମୁଖେ ଯାଉଥିବା ବେଳେ । ହାଡସଙ୍ଖା ପଳସମା ରାସ୍ତା ବାବାଜୀମଠ ଛକ ନିକଟରେ ଭାରସାମ୍ୟ ହରାଇ ବାଇକ୍ ସହିତ ରାସ୍ତା ଉପରେ ପଡ଼ି ରହିଥିବା ଦେଖିବାକୁ ମିଳିଥିଲା। ରକ୍ତ ଯୁଡୁବୁଡୁ ଅବସ୍ଥାରେ ପଡ଼ି ରହିଥିଲେ ମଧ୍ୟ କୈାଣସି ପଥଚାରୀ ତାଙ୍କୁ ସାହାଯ୍ୟ କରି ନଥିଲେ। ଦୂର୍ଘଟଣାର ପ୍ରାୟ ଅଧଘଣ୍ଟା ପରେ ସେହି ରାସ୍ତାରେ ଖବର ସଂଗ୍ରହ କରି ଯାଉଥିବା ଯୁବ ସାମ୍ବାଦିକ ତଥା ସମାଜସେବୀ ନିଲେଶ ଅନିରୁଦ୍ଧ ନାୟକ ଉକ୍ତ ଦୂର୍ଘଟଣା ଗ୍ରସ୍ତ ସ୍ଥାନରେ ନିଜ ବାଇକ୍ ରଖି ୧୦୮ ଆମ୍ବୁଲାନ୍ସ ଯୋଗେ ଛତାବର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିବା ଦେଖିବାକୁ ମିଳିଥିଲା। ପରେ ଡାକ୍ତରଖାନାରେ କାଳିଆ ସେଠୀଙ୍କ ପରିବାର ପହଁଞ୍ଚିବା କ୍ଷଣି ଆହତ କାଳିଆ ସେଠୀଙ୍କ ବାଇକ୍ ମୋବାଇଲ ଓ ତାଙ୍କ ମୋର୍ନୀପୋର୍ସ ଇତ୍ୟାଦି ତାଙ୍କ ପରିବାରକୁ ହସ୍ତାନ୍ତର କରିଥିଲେ। ନିଲେଶ ଅନିରୁଦ୍ଧ ନାୟକଙ୍କ ଏଭଳି କାର୍ଯ୍ୟ କୁ ବୁଦ୍ଧିଜୀବୀ ମହଲରେ ଭୁୟସୀ ପ୍ରଶଂସା କରୁଥିବା ଦେଖିବାକୁ ମିଳିଛି। ନିଲେଶ ପୂର୍ବରୁ ମଧ୍ୟ ଅନେକ ଅସହାୟ ଗରିବ ଭିନ୍ନକ୍ଷମଙ୍କୁ ସାହାଯ୍ୟ ଠାରୁ ଆରମ୍ଭ କରି ଡାକ୍ତରଖାନାରେ ରକ୍ତ ଯୋଗାଡ଼ ପର୍ଯ୍ୟନ୍ତ ଦେବଦୂତ ହୋଇ ପହଞ୍ଚି ଯାଇଥାଆନ୍ତି। ରୋଗୀଙ୍କୁ ଉତ୍ତମ ଚିକିତ୍ସା କେମିତି କରା ଯାଇ ପାରିବ ସେ ବିଷୟରେ ମଧ୍ୟ ଡାକ୍ତରଖାନାରେ ଡାକ୍ତରଙ୍କ ସହିତ ପରାମର୍ଶ କରିଥାନ୍ତି। ନିଲେଶ ଦେବଗଡ଼ ଜିଲ୍ଲାର ଜଣେ ଭଲ ସ୍ବେଚ୍ଛାସେବୀ ଭାବେ ଅନେକ ପୁରସ୍କାର ପାଇଥିବା ସୂଚନା ମିଳିଛି ।
ପୋଖରୀରେ ବୁଡ଼ି ୩ଶିଶୁ ମୃତ

ପୋଖରୀରେ ବୁଡ଼ି ୩ଶିଶୁଙ୍କ ଶୋଚନୀୟ ମୃତ୍ୟୁ I କେନ୍ଦୁଝର ଜିଲ୍ଲା ସୋସୋ ଥାନା ଅଧୀନ ଆତୁରିକଣା ଗାଁରେ ଅଘଟଣ, ପୋଖରୀରେ ବୁଡ଼ି ୩ଶିଶୁଙ୍କର ମୃତ୍ୟୁ ହୋଇଛି l ପଢ଼ିଆରିପଲ୍ଲୀ ପଞ୍ଚାୟତ ଡ଼ାହି ସାହି ଅଙ୍ଗନୱାଡ଼ିଂ କେନ୍ଦ୍ର ନିକଟରେ ଥିବା ପୋଖରୀ ନିକଟକୁ ୩ଜଣ ଶିଶୁ ଆସି ଖେଳୁଥିବା ସମୟରେ ଦୁର୍ଘଟଣା ବଶତଃ ବୁଡ଼ି ଯାଇଥିଲେ l ସ୍ଥାନୀୟ ଲୋକ ଭାସମାନ ଅବସ୍ଥାରେ ଶିଶୁଙ୍କୁ ଉଦ୍ଧାର କରି ଆଗରପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିବା ବେଳେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ l ମୃତ ଶିଶୁ ସାଢେ଼ ତିନି ବର୍ଷୀୟ ଲିପ୍ସା ପାତ୍ର, ପାୟଲ ପାତ୍ର (୪),ଭାରତୀ ପାତ୍ର ୪ ହୋଇଥିବା ଜଣା ପଡ଼ିଛି l
ବିଭିନ୍ନ ଉପକରଣ, ଭତ୍ତା ବାଣ୍ଟିବା ସହ ମୋଟ ୮୮ଟି ଅଭିଯୋଗ ଶୁଣିଲେ ଜିଲ୍ଲାପାଳ

ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକରେ ମିଳିତ ଜନ ଅଭିଯୋଗ ଶୁଣାଣୀରେ ମୋଟ ୮୮ଟି ଅଭିଯୋଗ ଶୁଣିଲେ ଜିଲ୍ଲାପାଳ। ଚାନ୍ଦବାଲି ବ୍ଲକ କନଫରେନ୍ସ ହଲରେ ଜିଲ୍ଲା ପାଳ ଓ ଏସ.ପି.ଙ୍କ ମିଳିତ ଜନ ଅଭିଯୋଗ ଶୁଣାଣୀ ଶିବିର ଚଳିତ ମାସ ଶେଷ ସୋମବାର ରେ ଅନୁଷ୍ଠିତ ହୋଇଯାଇଛି। ବ୍ୟକ୍ତିଗତ ସମସ୍ୟା ଭିତ୍ତିକ ୭୩ଟି ଓ ସାମୁହିକ ସମସ୍ୟା ଭିତ୍ତିକ ୧୫ଟି ଅଭିଯୋଗ ଥିଲା। ସେଥିମଧ୍ୟରୁ ରେଡକ୍ରସ ସମ୍ବନ୍ଧୀୟ ଥିବା ୧ଟି ଆବେଦନର ଶୁଣାଣୀ କରି ଜିଲ୍ଲାପାଳ ଆବେଦନକାରୀ ପ୍ରୀୟମ୍ବଦା ପୋଥାଳ ତାଙ୍କ ସ୍ବାମୀଙ୍କର ଅଧିକ ଚିକିତ୍ସା ପାଇଁ ରେଡକ୍ରସ ପାଣ୍ଠି ରୁ ୧୫ହଜାର ଟଙ୍କା ର ଆର୍ଥିକ ସହାୟତାରେ ରାଶି ପ୍ରଦାନ କରିଛନ୍ତି। ସବୁ ଠାରୁ ବଡ଼କଥା ଗୋପିନାଥ ପୁର ପଞ୍ଚାୟତର ତିନିଶହ ପଚାଶ ଜଣଙ୍କ ରାସନ୍ ସାମଗ୍ରୀ ତିନି ମାସରୁ ଉର୍ଦ୍ଧ୍ବ ହେଲାଣି କାର୍ଡ ଧାରୀ ମାନେ ପାଇ ନାହାଁନ୍ତି, ତିନି ସହ ପଚାଶ ଜଣ ମହିଳା,ପୁରୁଷ ଏକାଠି ହୋଇ ବ୍ଲକ ପରିସରରେ ହୋହାଲ୍ଲା କରିଥିଲେ ମଧ୍ୟ କିଛି ସୁଫଳ ମିଳିନାହିଁ ବୋଲି ହିତାଧିକାରୀ ମାନେ କହିଛନ୍ତି।

ତେବେ ଏହି ଅଭିଯୋଗ ଶୁଣାଣି ସିବିରରେ ସାମାଜିକ ସୁରକ୍ଷା ଯୋଜନା ରେ ୧୫ଜଣ ଙ୍କୁ ଦିବ୍ଯାଙ୍ଗ ଓ ବିଧବା ଭତ୍ତା ,୫ଜଣଙ୍କୁ ତିନି ଚକିଆ ସାଇକେଲ, ତିନିଜଣଙ୍କୁ ବସ୍ ପାସ୍, ଦୁଇଜଣଙ୍କୁ କ୍ରଚେସ ଏବଂ ଜଣକୁ ୱକିଂ ଷ୍ଟିକ୍ ଜିଲ୍ଲାପାଳ ବଣ୍ଟନ କରିଥିଲେ।
ଗୋଟିଏ ଅଲମ୍ପିକ୍ସରେ ଦୁଇଟି ପଦକ ଜିତିବାରେ ପ୍ରଥମ ଭାରତୀୟ

ଅଲିମ୍ପିକ୍ସରେ ହରିୟାଣାର ସୁଟର ମନୁ ଭାକର ଇତିହାସ ସୃଷ୍ଟି କରିଛନ୍ତି। ୧୨ ବର୍ଷ ପରେ ଭାରତକୁ ସୁଟିଂରେ ମିଳିଛି ଅଲିମ୍ପିକ୍ସ ପଦକ । ଗତ କାଲି ମନୁ ଭାକର ୧୦ ମିଟର ସୁଟିଂରେ ବ୍ରୋଞ୍ଜ ମେଡାଲ ଜିତି ଅଲିମ୍ପିକ୍ସରେ ଭାରତର ପ୍ରଥମ ମହିଳା ସୁଟର ଭାବେ ଏକ ଐତିହାସିକ ରେକର୍ଡ କରିଥିଲେ ଏବଂ ଏବେ ପୁଣି ଭାକର ମଙ୍ଗଳବାର ଅମ୍ବାଲାର ସରବଜୋତ ସିଂଙ୍କ ସହ ମିଶ୍ରିତ ଦଳ 10 ମିଟର ଏୟାର ପିସ୍ତଲ ଫାଇନାଲରେ ବ୍ରୋଞ୍ଜ ପଦକ ପ୍ରଦାନ କରିଛନ୍ତି। ଏହି ମେଡ଼ାଲ ପରେ ସେ ପ୍ରଥମ ଭାରତୀୟ ଭାବେ ଗୋଟିଏ ଅଲମ୍ପିକ୍ସରେ ୨ପଦକ ବିଜେତାର ରେକର୍ଡ ମଧ୍ୟ ସ୍ଥାପନ କରିଛନ୍ତି । ଏହାକୁ ନେଇ ତାଙ୍କୁ ସାରା ଭାରତରୁ ଛୁଟିଛି ପ୍ରସଂଶାର ଲହରୀ।
ହିମାଂଶୁ ସାହୁଙ୍କ ନେତୃତ୍ବରେ ବିଜେପିରେ ଯୋଗଦେଲେ ୧୩ ସମିତିସଭ୍ୟ, ୮ ସରପଞ୍ଚ

ଧର୍ମଶାଳାରେ ‘ମିଶ୍ରଣ ପର୍ବ’ ପରେ ଆରମ୍ଭ ହୋଇଛି ୨୪ ବର୍ଷ ଧରି ନିରବଛିନ୍ନ ଭାବେ କ୍ଷମତାରେ ରହିଥିବା ବିଜେଡିର ‘ପତନ ପର୍ବ’ । ନିର୍ବାଚନରେ ଶୋଚନୀୟ ପରାଜୟ ପରେ, ଧର୍ମଶାଳାରେ ଭୁଶୁଡ଼ିଛି ବିଜେଡି ଗଡ଼। ଧର୍ମଶାଳାରେ ବିଜେପି ତରଫରୁ କାର୍ଗିଲ ବିଜୟ ଦିବସ ପାଳନ କରିବାର ଠିକ ଦିନକ ପରେ ଅର୍ଥାତ ରବିବାର ଦିନ, ବିଧାୟକ ହିମାଂଶୁ ସାହୁଙ୍କ ନେତୃତ୍ବରେ, ବିଜେପିରେ ଯୋଗ ଦେଇଛନ୍ତି ରସୁଲପୁର ଓ ଧର୍ମଶାଳା ପଞ୍ଚାୟତ ସମିତିର ବିଜେଡି ସମର୍ଥିତ ୧୩ ସମିତିସଭ୍ୟ ଓ ୮ ସରପଞ୍ଚ ।

ହିମାଂଶୁଙ୍କ ଦୃଢ଼ ନେତୃତ୍ୱ ଓ ସାଙ୍ଗଠନିକ ଶକ୍ତି ଆଗରେ ଫିକା ପଡିଯାଇଛି ବିଜେଡିର ସାଙ୍ଗଠନିକ ଶକ୍ତି, ଦେଖାଯାଉନାହାନ୍ତି ଏକଦା ପ୍ରଭାବଶାଳୀ ଓ ବିଜେଡିର ସାଙ୍ଗଠନିକ ସମ୍ପାଦକ ‘ବବି ଭାଇ’ ଓ ପୂର୍ବତନ ବିଧାୟକ ପ୍ରଣବ କୁମାର ବଳବନ୍ତରାୟ। ତେବେ, ରାଜନୈତିକ ଦୃଷ୍ଟିରୁ ସବୁଠାରୁ ଗୁରୁତ୍ୱପୂର୍ଣ କଥା ହେଉଛି, ସଂଖ୍ୟାଧିକ ସମିତିସଭ୍ୟ ବିଜେଡିଠାରୁ ଦୂରେଇ ଯିବା ପରେ କମୁଛି ପୂର୍ବତନ ବିଧାୟକ ପ୍ରଣବ କୁମାର ବଳବନ୍ତରାୟଙ୍କ ପତିଆରା । ଶୁଣିବାକୁ ମିଳୁଛି, ବର୍ତ୍ତମାନ ପଞ୍ଚାୟତ ସମିତି ଅଧ୍ୟକ୍ଷ ଥିବା ପ୍ରଣବଙ୍କ ଭାଇ ପ୍ରଭାତ କୁମାର ବଳବନ୍ତରାୟଙ୍କ ବିରୋଧରେ ଅନାସ୍ଥା ପ୍ରସ୍ତାବ ପାରିତ ହେବ ଏକ ପ୍ରକାର ନିଶ୍ଚିତ।

ଆସନ୍ତୁ ଦେଖିବା ରସୁଲପୁର ଓ ଧର୍ମଶାଳାର କେଉଁ ନେତା ଧରିଲେ ପଦ୍ମ —

ଜାରକା(କୁମାରୀ)ସ୍ଥିତ ବିଜେପି କାର୍ଯ୍ୟାଳୟରେ ଅନୁଷ୍ଠିତ ହୋଇଥିବା ‘ମିଶ୍ରଣ ପର୍ବ’ ରେ ରସୁଲପୁର ବ୍ଲକ୍ ନଠୁଆବର ପଞ୍ଚାୟତ ସମିତିସଭ୍ୟ କୁଞ୍ଜଲତା ପଣ୍ତା, ସିଂହାପୁର ପଞ୍ଚାୟତ ସରପଞ୍ଚ ହୃଦାନନ୍ଦ ସାହୁ, ଧର୍ମଶାଳା ବ୍ଲକ୍ ଦେଓଦା ପଞ୍ଚାୟତ ସମିତିସଭ୍ୟ ଅନନ୍ତ ତରାଇ, ଆରୁହାଁ ସମିତି ସଭ୍ୟା ମମତା ମାଝୀ, ପୂର୍ବତନ ସରପଞ୍ଚ ପିତାମ୍ବର ନାୟକ, ମଙ୍ଗଳପୁର ସରପଞ୍ଚ ପ୍ରମୋଦ କୁମାର ଜେନା, ଚହଟା ସରପଞ୍ଚ ସୁମିତ୍ରା ସ୍ବାଇଁ, ସମିତିସଭ୍ୟା ସସ୍ମିତା ନାୟକ, ମିର୍ଜାପୁର ସମିତିସଭ୍ୟଙ୍କ ସ୍ବାମୀ ବୃନ୍ଦାବନ ବେହେରା, ଭବାନୀପୁର ସମିତିସଭ୍ୟା ସରୋଜିନୀ ମହାନ୍ତି ପ୍ରମୁଖ ଯୋଗଦାନ କରିଥିଲେ ।

ଏହାସହ, ସୁନ୍ଦୁରିଆ ସରପଞ୍ଚ ନିର୍ମଳ କୁମାର ଦାସ, ବିଜେଡି ପଞ୍ଚାୟତ ସଭାପତି ହେମନ୍ତ ଜେନା, ସମିତିସଭ୍ୟ ନିତ୍ୟାନନ୍ଦ ବିଶ୍ବାଳ,, ମହିସରା ସରପଞ୍ଚ ସଫଳା ବେହେରା, ସମିତିସଭ୍ୟ ପବିତ୍ର ବେହେରା, ମଧୁସୂଦନପୁର ସମିତିସଭ୍ୟ ବିଦ୍ୟାଧର ମଲିକ, ହରିଦାସପୁର ସରପଞ୍ଚ ବିକ୍ରମ ବିଶ୍ବାଳ, ସମିତିସଭ୍ୟା ସବିତା ସାମଲ, ଗଙ୍ଗାଧରପୁର ସମିତିସଭ୍ୟା ତିଳୋତ୍ତମା ବରାଳ, ବିଜେଡି ପଞ୍ଚାୟତ ସଭାପତି ଡ. ସିତାଂଶୁ ଶେଖର କର, , କ୍ଷେତ୍ରପାଳ ନାଏବ ସରପଞ୍ଚ ସୁବାସ ଚନ୍ଦ୍ର ଜେନା, ଯୁବ ବିଜେଡି ସାଧାରଣ ସମ୍ପାଦକ ସ୍ମୃତିରଂଜନ ବେହେରା, ଜିଲ୍ଲା ଛାତ୍ର ସମ୍ପାଦକ ସପ୍ତସାଗର ଦାସ, ଦେବବ୍ରତ ରାଉତ, ସ୍ବାଗତ ଦାସ, ପ୍ରତାପ ଦାସ,, ଶୈଳେନ୍ଦ୍ର ସାହୁ, ସରୋଜ ସାହୁ, ଅଭିଜିତ ଭୂୟାଁ,, ବିଜେଡି ନେତା କୃଷ୍ଣଚନ୍ଦ୍ର ରାଉତଙ୍କ ସମେତ ଅନ୍ୟ ଦଳର ଶତାଧିକ କର୍ମୀ ବିଜେପିରେ ଯୋଗ ଦେଇଥିଲେ।

ନବାଗତମାନଙ୍କୁ ବିଧାୟକ ହିମାଂଶୁ ସାହୁ ଦଳୀୟ ଉତ୍ତରୀୟ ଓ ଟୋପି ପିନ୍ଧାଇ ସ୍ବାଗତ କରିଥିଲେ। ବିଜେପି ଯୁବନେତା ସବ୍ୟସାଚୀ ସୁନ୍ଦରାୟଙ୍କ ସଭାପତିତ୍ବରେ ଅନୁଷ୍ଠିତ କାର୍ଯ୍ୟକ୍ରମକୁ ବିଜେପି ନେତା ସର୍ବେଶ୍ବର ବେହୁରା, ଶ୍ରୀକାନ୍ତ ସାହୁ, ଉପେନ୍ଦ୍ର କର, ପ୍ରକାଶ ସାମଲ, ଅଧରକାନ୍ତ ଜେନା ଓ ଆଲୋକ ଲେଙ୍କା ସଂଚାଳନ କରିଥିଲେ। ଯୁବନେତା ସିବୁଲି ଧୀର, ନାରାୟଣ ମଲିକ, ରବୀନ୍ଦ୍ର ବରାଳ, ରାଜେଶ କୁମାର ପାଳ, ଗୌତମ କୁମାର ସାହୁ, ବିଶ୍ବଜିତ ପୃଷ୍ଟି, ସୁଧୀର ବେହେରା, ଅଂଶୁମାନ ରଥ, ରାଜକିଶୋର ସ୍ବାଇଁ, ଲୋକନାଥ ମହାନ୍ତି, ବିଭୁରଂଜନ ରାଉତ ପ୍ରମୁଖ ସହଯୋଗ କରିଥିଲେ।
ଠକ ଶିଷ୍ୟଙ୍କ ପାଇଁ ବାବାଙ୍କୁ ପଡିଲା ମହଙ୍ଗା,କାଟୁ କଲାନି ପ୍ରେମ ପାଇଁ ଗୁଣି-ଗାରେଡି,ପରେ ଖାଇଲେ ନିର୍ଧୁମ ଛେଚା

ଏକ ପ୍ରେମ ପ୍ରତାରଣା ବ୍ୟାପାର ରେ ପ୍ରେମିକା କୁ ଗୁଣି ଗାରେଡି ମlଧ୍ୟମ ରେ ହତାଶ ପ୍ରେମିକ ପାଖକୁ ତା ପ୍ରେମିକା କୁ ଫେରାଇ ଆଣିବାକୁ ପ୍ରତିଶୃତି ଦେଇ ବିଫଳ ହୋଇଥିଲେ ଗୁଣିଆ ଶିଷ୍ୟ ଓ ତାଙ୍କ ଗୁରୁ ତଥା ଜଣେ ବାବା. ଏ ନେଇ ବାବା ଙ୍କ ଶିଷ୍ୟ ଗୁଣି ଗାରେଡି ପୂଜା ଓ ସାମଗ୍ରୀ ପାଈଁ ଲକ୍ଷାଧିକ ଟଙ୍କା ନେଇଥିଲେ.. କିନ୍ତୁ ଗୁଣି ଗାରେଡି କାଟୁ କଲାନି.ତେଣୁ ହତାଶ ପ୍ରେମିକ ବଳଭଦ୍ର ସିଂ ଓ ତା ସାଥି ମାନେ ରାଗି ଯାଇ ବାବା ଓ ତାଙ୍କ ଶିଷ୍ୟ ଙ୍କୁ ଆଶ୍ରମରୁ ଟେକି ନେଇ ନିର୍ଧୁମ ଛେଚିଲେ.

ଡେରାବିଶ ବ୍ଲକ ଚାନ୍ଦୋଳ ଫାଣ୍ଡି ଅନ୍ତର୍ଗତ ଇନ୍ଦାଳ ପଞ୍ଚାୟତ ଅଢଙ୍ଗା ଗାଁ ର ହରିଆ ମିଶ୍ର(ଗଣେଶ) ନାମକ ଯୁବକ ନିଶ୍ଚିନ୍ତ କୋଇଲି ଥାନା ଅସୁରେଶ୍ୱର ଅଞ୍ଚଳ ର ବଳଭଦ୍ର ସିଂ ଙ୍କ ଏକ ପ୍ରେମ ଜନିତ ସମସ୍ୟା ର ଗୁଣି ଗାରେଡି ମାଧ୍ୟମ ସମାଧାନ କରିବେ ବୋଲି କହି ତାଙ୍କ ଗୁରୁ ତଥା ହରିଅଙ୍କ ଅଞ୍ଚଳ ର ଜଣେ ବାବା କୈଳାସ ଦାସ ଙ୍କ ସହ ଯୋଗାଯୋଗ କରାଇଥିଲା. କୈଳାସ ମଧ୍ୟ ପୂର୍ବରୁ ଝଡା ଫୁଙ୍କା ମାଧ୍ୟମ ରେ ନିଜ ଗୁଜୁରାଣ ମେଣ୍ଟାନ୍ତି.ଗୁଣି ଗାରେଡି ପାଈଁ ଲକ୍ଷାଧିକ ଟଙ୍କା ଖର୍ଚ୍ଚ ହେବ କହି ଶିଷ୍ୟ ହରିଆ ମିଶ୍ର(ଗଣେଶ) ବଳଭଦ୍ର ସିଂ ଙ୍କ ଠାରୁ ଅନେକ ସମୟରେ ଟଙ୍କା ନେଇଥିଲେ. ଲକ୍ଷେ ରୁ ଅଧିକ ଟଙ୍କା ନେଵା ପରେ ଗୁଣି ଗାରେଡି କାର୍ଯ୍ୟ ବିଫଳ ହେବାରୁ ବଳଭଦ୍ର ସିଂ ଓ ତା ସାଥି ମାନେ ରାଗିଯାଇ ହରିଅଙ୍କ ସ୍ଥିତ ଆଶ୍ରମ ରୁ ବାବା କୈଳାସ ଦାସ ଙ୍କୁ ଅପହରଣ କରି ନେଇଥିଲେ ଓ ଶିଷ୍ୟ ହରିଆ ମିଶ୍ର(ଗଣେଶ) କୁ ମଧ୍ୟ ଅଢ଼ଙ୍ଗା ହନୁମାନ ପଡା ସ୍ଥିତ ନିଜ ଘରୁ ଗତ ମଙ୍ଗଳ ବାର ଦିନ ଉଠାଇ ନେଇ ଥିଲେ. ବାବା ଓ ଶିଷ୍ୟ ଙ୍କୁ ଅସୁରେଶ୍ୱର କୁଳଗାଁଈଶାଳ କୁ ନେଇ ବଳଭଦ୍ର ସିଂ ଓ ତା ସାଥି ମାନେ ନିସ୍ତୁକ ମାଡ଼ ମାରି ଲହୁଲୁହାଣ କରିଦେଲେ. ପ୍ରାଣାନ୍ତକ ଆକ୍ରମଣ କରି ବାବା ଶିଷ୍ୟ ଦୁହିଁଙ୍କୁ ବେହୋସ କରିଦେଲେ.ନିକଟସ୍ତ କେନ୍ଦ୍ରାପଡ଼ା କେନାଲ ରେ ଦୁଇ ବାବା ଓ ଶିଷ୍ୟ ଙ୍କୁ ଅଚେତ ଅବସ୍ଥା ରେ ଫୋପାଡ଼ି ଦେଲେ. କିଛି ସମୟ ପରେ ସ୍ଥାନୀୟ ଲୋକ କେନାଲ କୂଳ ରୁ ବାବା କୈଳାସ ଦାସ ଓ ଶିଷ୍ୟ ହରିଆ ମିଶ୍ର(ଗଣେଶ) କୁ ଉଦ୍ଧାର କରି ନିକଟସ୍ଥ ସ୍ୱାସ୍ଥ୍ୟ କେନ୍ଦ୍ର ରେ ଭର୍ତି କରିବା ପରେ ନିଶ୍ଚିନ୍ତ କୋଇଲି ପୋଲିସ ତଦନ୍ତ ଆରମ୍ବ କରିଥିଲେ. ଆହତ ଶିଷ୍ୟ ହରିଆ ମିଶ୍ର(ଗଣେଶ)ଙ୍କ ଅଭିଯୋଗ କ୍ରମେ ଆକ୍ରମଣକାରି ବଳଭଦ୍ର ସିଂ ଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛନ୍ତି. ତେବେ ବିଫଳ ପ୍ରେମିକ ର ଆକ୍ରୋଶ ର ଶିକାର ହୋଇଛନ୍ତି ଗୁଣି ଗାରେଡି ନା ରେ ଭାଣ୍ଡାମି କରୁଥିବା ଶିଷ୍ୟ. ହେଲେ ଆହତ ବାବା କୈଳାସ ଦାସ ଶିଷ୍ୟ ହରିଆ ମିଶ୍ର ର ଠକାମୀ କୁ ସ୍ୱୀକାର କରିଵା ସହ ଶିଷ୍ୟ ପାଈଁ ସେ ଫସିଯାଇଥିବା କହଛନ୍ତି. କୈଳାସ ଦାସ ଙ୍କ ପରିବାର ଲୋକେ ମଧ୍ୟ ଠକ ଶିଷ୍ୟ ହରିଆ ମିଶ୍ର ବାବା ଙ୍କୁ ଫସେଇ ଦେଇଥିବା କହିଛନ୍ତି
ନଡ୍ଡାଙ୍କୁ ରକ୍ତରେ ଚିଠି ଲେଖିଲେ ଯୋଗୀଙ୍କ ସମର୍ଥକ, ମୁଖ୍ୟମନ୍ତ୍ରୀ ପଦରୁ ହଟାଇଲେ ବିଜେପି କାର୍ଯ୍ୟାଳୟ ସମ୍ମୁଖରେ ଏଭଳି କରିବାକୁ ଚେତାବନୀ ଦେଲେ…

ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇଲେ ବିଜେପି କାର୍ଯ୍ୟାଳୟ ସମ୍ମୁଖରେ ନିଜ ଜୀବନ ଦେବାକୁ ଧମକ ଦେଇଛନ୍ତି ଯୋଗୀଙ୍କ ସମର୍ଥକ ସୋନୁ ଠାକୁର । ନିଜ ରକ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କୁ ଏକ ଚିଠି ଲେଖି ଚେତାବନୀ ଦେଇଛନ୍ତି ସୋନୁ।

ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଜଣେ ବଡ଼ ସମର୍ଥକ ଏବେ ଖବର ଶିରୋନାମାରେ ରହିଛନ୍ତି। ଗତ କିଛି ଦିନ ଧରି ଉତ୍ତରପ୍ରଦେଶରେ ରାଜନୈତିକ ସ୍ଥିତିକୁ ନେଇ ଦେଶରେ ଚର୍ଚ୍ଚା ହେଉଛି। କେତେକ ରାଜନୈତିକ ସମୀକ୍ଷକ ଯୋଗୀଙ୍କୁ ମୁଖ୍ୟମନ୍ତ୍ରୀ ପଦରୁ ହଟା ଯିବା ନେଇ ମଧ୍ୟ କହୁଛନ୍ତି। ପୂର୍ବରୁ ଏ ସମ୍ପର୍କରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ମଧ୍ୟ ପୂର୍ବାନୁମାନ କରିଥିଲେ।

ତେବେ ଯୋଗୀଙ୍କୁ ପଦରୁ ହଟାଇଲେ ସୋନୁ ଠାକୁର ନାମକ ଜଣେ ସମର୍ଥକ କହିଛନ୍ତି ସେ ନିଜ ଜୀବନ ଦେବେ। ସେ ନିଜ ରକ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କୁ ଏକ ଚିଠି ଲେଖିଛନ୍ତି।

ସୋନୁ ଠାକୁର କହିଛନ୍ତି ଯଦି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇ ଦିଆଯାଏ, ତେବେ ଭାରତୀୟ ଜନତା ପାର୍ଟି ରାଜ୍ୟ କାର୍ଯ୍ୟାଳୟ ସାମ୍ନାରେ ମୁଁ ନିଜ ଜୀବନ ଦେବି। ସୋନୁଙ୍କୁ ଏଭଳି ରକ୍ତ ଚିଠି ନେଇ ସୋସିଆଲ ମିଡ଼ିଆରେ ଚର୍ଚ୍ଚା ଆରମ୍ଭ ହୋଇଛି।
କାଉଡିଆଙ୍କ ଉପରେ ମାଡ଼ିଗଲା କାର, ଚାଲିଗଲା ଦୁଇ କାଉଡ଼ିଆଙ୍କ ଜୀବନ

ଶ୍ରାବଣ ସୋମବାର ପାଇଁ ରାସ୍ତାରେ କାଉଡିଆଙ୍କ ଭିଡ ଲାଗିଥିବା ବେଳେ ଏକ ଅଭାବନିଅ ଘଟଣା ସାମ୍ନାକୁ ଆସିଛି । ସୂଚନା ମୁତାବକ କଟକ ଚାନ୍ଦବାଲି ରାସ୍ତାର ନିଶ୍ଚିନ୍ତକୋଇଲି ତହସିଲ ଛକ ନିକଟରେ ଗତକାଲି ରାତି ପ୍ରାୟ ୧୧ଟା ୪୫ ମିନିଟ ରେ ଏକ କାର୍ ଧକାରେ ଦୁଇଜଣ କାଉଡିଆ ପ୍ରାଣ ହରାଇଛନ୍ତି । ଦୁର୍ଘଟଣାରେ ୩ ଜଣ କାର ଆରୋହୀ ମଧ୍ୟ ଆହାତ ହୋଇଥିବା ସୂଚନା ମିଳିଛି । ସୂଚନା ଅନୁଯାୟୀ ଯେ ନିଶ୍ଚିନ୍ତକୋଇଲି ବ୍ଲକ ବଶପଦା ଗ୍ରାମର ଚିନ୍ମୟୀ ବେହେରା ଓ ଝାରପଡା ଗ୍ରାମର ଜ୍ୟୋତିରଞ୍ଜନ ରାଉତ ବଡ଼ପଡାରୁ ପାଣିଭାର ନେଇ ଜିଗ୍ନିପୁରସ୍ଥିତ ଏକ ଶୈବପୀଠକୁ ଯାଉଥିଲେ। ଗୁରୁତର ଅବସ୍ଥାରେ ସେମାଙ୍କୁ ନିଶ୍ଚିନ୍ତକୋଇଲି ଗୋଷ୍ଠୀସ୍ଵାସ୍ତ୍ୟକେନ୍ଦ୍ର କୁ ନିଆ ଯାଇଥିଲା ସେଠାରେ ଡାକ୍ତର ଚିନ୍ମୟୀ ଙ୍କୁ ମୃତ୍ଯୁ ଘୋଷଣା କରିଥିବା ବେଳେ ଅନ୍ୟ ଜଣଙ୍କୁ କଟକ ବଡ ମେଡିକାଲ କୁ ସ୍ତାନାନ୍ତର କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଜ୍ୟୋତିରଞ୍ଜନ ମଧ୍ୟ ପ୍ରାଣ ହରାଇଥିବା ସୂଚନା ମିଳିଛି ।