Blog

ଲୁହାପଥର ଲୁଟ ଉଦ୍ୟମ, ୨ଟି ଟ୍ରକ୍ ଜବତ

ଯୋଡା ଖଣି ମଣ୍ଡଳରେ ଅହେତୁକ ଭାବେ ବୃଦ୍ଧି ପାଇଛି ଚୋରି । ବାରମ୍ବାର ଚୋରି ହେବା ପରେ ମଧ୍ୟ ଖଣି ବିଭାଗ ଚୋରି ରୋକିବାରେ ବିଫଳ ହେଉଛି l ଖଣି ବିଭାଗ ଦ୍ଵାରା ବିଭିନ୍ନ ସ୍ଥାନରେ ଦାବିଦାର ନ ଥିବା ଖଣିଜ କୁ କାଗଜ ପତ୍ରରେ ଜବତ ଦେଖାଇ ବିଭାଗ ବେପରୁଆ ଭାବେ ସେହି ସ୍ଥାନରେ ଛାଡି ଦେଉଛି । ଯାହା ଫଳରେ ଜବତ ଖଣିଜ ଦ୍ରବ୍ୟ ଚୋରି ହେବାରେ ଲାଗିଛି । ଖଣି ଜଗିବା ପାଇଁ ଓ ଖଣିରେ ଅନୁଶାସନ ରଖିବା ପାଇଁ ଖଣି ବିଭାଗ ରହିଛି ।

ଖଣିଜ ଚୋରା ଚାଲାଣ କୁ ରୋକିବା, ଖଣିଜ ବୋଝେଇ ଗାଡ଼ି ଧରିବାରେ ଖଣି ବିଭାଗ କୌଣସି ଆଖିଦୃଶିଆ କାର୍ଯ୍ୟ କରି ପାରୁ ନାହିଁ । ଖଣି ଚୋରିକୁ ପୋଲିସ ଓ ବନ ବିଭାଗ କିଛି ଅଂଶରେ ଆୟତ୍ତ କରୁଛନ୍ତି । ଆଜି ଯୋଡା ବେହେରା ସାହି ଠାରେ ଜବତ ହୋଇ ଗଚ୍ଛିତ ଥିବା ଲୁହାପଥରକୁ ଚୋରା ଚାଲାଣ କରୁଥିବା ଦୁଇଟି ଟ୍ରକ କୁ ଯୋଡା ପୋଲିସ ଧରିଵାରେ ସଫଳ ହେଇଛି । ଏଥିରେ ସଂପୃକ୍ତ ବ୍ୟକ୍ତି ମାନେ ଘଟଣା ସ୍ଥଳରୁ ଫେରାର ହେଇଯାଇଛନ୍ତି ।
ଆନ୍ତର୍ଜାତୀୟ ଶ୍ରୀଜଗନ୍ନାଥ ମହୋତ୍ସବ ୨୦୨୫ ଉଦଘାଟିତ

ନାମାଚାର୍ଯ୍ୟ ଶ୍ରୀମଦ୍ ବାୟାବାବା ଭାଗବତ ପ୍ରଚାର ସମିତି ରାହାମା ଆନୁକୁଲ୍ୟରେ ଆନ୍ତର୍ଜାତୀୟ ଶ୍ରୀଜଗନ୍ନାଥ ମହୋତ୍ସବ-୨୦୨୫ ଉଦଘାଟିତ ହୋଇଯାଇଛି । ପରମହଂସ ପ୍ରଜ୍ଞାନାନନ୍ଦଜୀ ମହାରାଜଙ୍କ କରକମଳରେ ଉଦଘାଟିତ ହୋଇଛି । ଏହି ମହୋତ୍ସବରେ ସାଧୁସନ୍ଥ ମାନଙ୍କ ସହ ପୁରୀ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ତଥା ରାଧାବଲ୍ଲଭ ମଠ ପୁରୀ ମହନ୍ତ ମହାରାଜ ରାମକୃଷ୍ଣ ଦାସ ମହାରାଜ, ଶ୍ରୀଜଗନ୍ନାଥ ସଂସ୍କୃତି ପ୍ରଚାରକ ବ୍ରହ୍ମଚାରୀ ବାବା ସତ୍ୟାନନ୍ଦ ଦାସ ମହାରାଜ, ନାମାଚାର୍ଯ୍ୟ ବାୟାବାବାଙ୍କ ଶିଷ୍ୟ ଶ୍ରୀ ବୈକୁଣ୍ଠନାଥ ଦାସ ପ୍ରମୁଖ ଯୋଗଦେଇଥିଲେ । ଉପସ୍ଥିତ ସମସ୍ତ ସାଧୁସନ୍ଥ ମାନେ ମହୋତ୍ସବ ସ୍ଥଳ ପରିକ୍ରମା କରି ମା’ ବିମଳା, ମା’ ଲକ୍ଷ୍ମୀ, ଚାରିଧାମ ଦର୍ଶନ, ପଞ୍ଚସଖାଙ୍କ ଲୀଳା ପ୍ରଦର୍ଶନ, ବନ୍ଧୁ ମହାନ୍ତି, ଦାସିଆ ବାଉରୀ ଙ୍କ କଳାକୃତି ପ୍ରଦକ୍ଷିଣ କରି ଶ୍ରୀଜଗନ୍ନାଥଙ୍କ ଚବିଶ ବେଶ, ଛପନ ଭୋଗ ଓ ପଞ୍ଚକୁଣ୍ଡୀୟ ବିଶ୍ଵଶାନ୍ତି ମହାଯଜ୍ଞ ପୀଠ ଆଦି ଦର୍ଶନ କରିଥିଲେ ।

ପ୍ରଥମେ ଅନୁଷ୍ଠାନର ମୁଖ୍ୟ ସଂଯୋଜକ ତଥା ସମ୍ପାଦକ ଡ଼ ସୁନାକର ବେହେରା ସମସ୍ତ ସାଧୁସନ୍ଥ ଓ ଅତିଥି ମାନଙ୍କୁ ମଞ୍ଚକୁ ସ୍ବାଗତ କରି ଅନୁଷ୍ଠାନର ଆଧ୍ୟାତ୍ମିକ, ସାମାଜିକ ମୂଲ୍ୟବୋଧ ଓ ଶ୍ରୀଜଗନ୍ନାଥ ସଂସ୍କୃତିର ପ୍ରଚାର କରିବାପାଇଁ ସମସ୍ତଙ୍କ ସହଯୋଗ କାମନା କରିଥିଲେ । ଘଣ୍ଟଘଣ୍ଟା, ବେଦଧ୍ୱନି, ହରିବୋଲ ଓ ହୁଳହୁଳିରେ ପ୍ରକମ୍ପିତ ହୋଇଥିଲା ପରିବେଶ । ମହୋତ୍ସବକୁ ମହାରାଜ ଉଦଘାଟନ କରି ଶ୍ରୀଜଗନ୍ନାଥ ସଂସ୍କୃତି କିପରି ବିପଥଗାମୀ ସମାଜକୁ ଶୃଙ୍ଖଳିତ କରି ପାରିବ ଓ ଗୋମାତାଙ୍କ ସେବାଦ୍ଵାରା କିପରି ଏକ ସୁସ୍ଥ ସମାଜ ଓ ବାତାବରଣ ସୃଷ୍ଟି ହୋଇପାରିବ ତାହା ଉପରେ ଗୁରୁତ୍ୱ ପ୍ରଦାନ କରିଥିଲେ । ମହନ୍ତ ଶ୍ରୀ ରାମକୃଷ୍ଣ ଦାସ ମହାରାଜ ଶ୍ରୀଜଗନ୍ନାଥ ସଂସ୍କୃତିର ସାରସ୍ଵତ ତତ୍ତ୍ୱ ଓ ମାନବ ସମାଜରେ ସଂସ୍କାର ଓ ମାନବିକ ମୂଲ୍ୟବୋଧର ଉତ୍ତରୋତ୍ତର ଉନ୍ନତି କାମନା କରି ଏକ ସଫଳ ଜୀବନକୁ ରୂପାନ୍ତରିତ କରିବାକୁ ଜନସାଧାରଣଙ୍କୁ ଆହ୍ବାନ ଦେଇଥିଲେ ।

ଅନ୍ୟ ଅତିଥି ମାନଙ୍କ ସହ ଶ୍ରୀଜଗନ୍ନାଥ ସଂସ୍କୃତି ଗବେଷକ ଡ଼ ଧୃତିଧର ଦାସ ଓ ପଣ୍ଡିତ ପ୍ରମୋଦ କୁମାର କର ପ୍ରମୁଖ ଯୋଗଦାନ କରି ନିଜ ନିଜର ବକ୍ତବ୍ୟ ଉପସ୍ଥାପନ କରିଥିଲେ । ପରେ ଶ୍ରୀଜଗନ୍ନାଥ ସଂସ୍କୃତିର ପ୍ରଖ୍ୟାତ ପ୍ରବଚକ ବ୍ରହ୍ମଚାରୀ ବାବା ସତ୍ୟାନନ୍ଦ ଦାସ ମହାରାଜ ନିଜର ଧାରାବାହିକ ପ୍ରବଚନ ପ୍ରାରମ୍ଭ କରି ମହାପ୍ରଭୁ ଶ୍ରୀଜଗନ୍ନାଥ, ଯୁଗପୁରୁଷ ଶ୍ରୀକୃଷ୍ଣ ଓ ଶ୍ରୀଭାଗବତ ମହାପୁରାଣର ବ୍ୟାଖ୍ୟା ବର୍ଣ୍ଣନା କରିଥିଲେ । ସମଗ୍ର ଅଞ୍ଚଳକୁ ଦ୍ଵିତୀୟ ଶ୍ରୀକ୍ଷେତ୍ର ବୋଲି ଅଭିହିତ କରି ଏହି ମହାଯଜ୍ଞରେ ସମସ୍ତ ଜନସାଧାରଣ ଭାଗନେବାକୁ ଅନୁରୋଧ କରିଥିଲେ । ଏଥିରେ ସର୍ବଶ୍ରୀ ଶରତ ଚନ୍ଦ୍ର ସାହୁ, ମନୋହର ସ୍ବାଇଁ, ଅକ୍ଷୟ ଉତ୍ତମ ଚରଣ ଦାସ, ଦୁର୍ଯ୍ୟୋଧନ ପାତ୍ର, ସ୍ନେହମୟୀ ଆଚାର୍ଯ୍ୟ, ସରସ୍ବତୀ ଦାସ ପ୍ରମୁଖ ଯୋଗଦାନ କରି ସମସ୍ତ କାର୍ଯ୍ୟକ୍ରମକୁ ସୁପରିଚାଳନା କରିଥିଲେ । ହଜାର ହଜାର ସଂଖ୍ୟାରେ ଉପସ୍ଥିତ ସମସ୍ତ ଶ୍ରଦ୍ଧାଳୁମାନଙ୍କ ପାଇଁ ମହାପ୍ରସାଦ ସେବନ ର ବନ୍ଦୋବସ୍ତ ହୋଇଥିଲା ।
ମା’ ତାରିଣୀ ଦର୍ଶନ କରି ଫେରୁଥିଲେ; ଦୁର୍ଘଟଣା ଘଟି ଗୋଟିଏ ପରିବାରର ୪ ଗୁରୁତର, ଜଣେ ଆହତ

କେନ୍ଦୁଝର ଜିଲ୍ଲା ଘଷିପୁରା ୨୦ନଂ ଜାତୀୟ ରାଜପଥ ମା’ ମଙ୍ଗଳା ହୋଟେଲ ନିକଟରେ କାର ଦୁର୍ଘଟଣାଗ୍ରସ୍ତ ଘଟି ଗୋଟିଏ ପରିବାରର ୪ଜଣ ଗୁରୁତର ଜଣେ ଆହତ ହୋଇଛନ୍ତି I

ସୂଚନା ଅନୁସାରେ, ବାଲେଶ୍ବର ଜିଲ୍ଲାର ସୋର ଅଞ୍ଚଳରୁ ଏକ ପରିବାର ଘଟଗାଁ ମା’ତାରିଣୀ ଦର୍ଶନ ସାରି ଫେରୁଥିବା ବେଳେ କାର ସାମ୍ନାକୁ ଏକ ବାଇକ ଆରୋହୀ ପଲାଇ ଆସିଥିଲେ, ତାଙ୍କୁ ବଞ୍ଚାଇବାକୁ ଯାଇ ଭାରସାମ୍ୟ ହରାଇ ରାସ୍ତା କଡ଼ରେ ଥିବା ପୋଲ ଉପରେ ଧକ୍କା ହୋଇଥିଲା ଯାହା ଫଳରେ ଦୁର୍ଘଟଣା ହୋଇଛି |

ଶିବ ପ୍ରସାଦ ସେଠୀ, ପାର୍ବତୀ ସେଠୀ, ପଦ୍ମାବତୀ ସେଠୀ, ସୁଲୋଚନା ସେଠୀଙ୍କୁ ଗୁରୁତରଙ୍କୁ ଆନନ୍ଦପୁର ଉପଖଣ୍ଡ ମେଡ଼ିକାଲରେ ଭର୍ତ୍ତି କରାଯାଇଛି |
୨୦୨୫ ମସିହାରେ ସୂର୍ଯ୍ୟଗ୍ରହଣ କେବେ ହେବ ଏବଂ ଏହା ଭାରତରେ ଦୃଶ୍ୟମାନ ହେବ କି ନାହିଁ, ଜାଣନ୍ତୁ ଏଠାରେ

ବର୍ଷର ପ୍ରଥମ ଚନ୍ଦ୍ରଗ୍ରହଣ ପରେ, ଏବେ ଲୋକମାନେ ସୂର୍ଯ୍ୟଗ୍ରହଣକୁ ଅପେକ୍ଷା କରିଛନ୍ତି। ଏହି ଗ୍ରହଣ ମଧ୍ୟ ମାର୍ଚ୍ଚ ମାସରେ ହେବାକୁ ଯାଉଛି। ହିନ୍ଦୁ ଧର୍ମରେ ଗ୍ରହଣ ଏକ ଗୁରୁତ୍ୱପୂର୍ଣ୍ଣ ଜ୍ୟୋତିର୍ବିଜ୍ଞାନୀ ଘଟଣା। ଏହି ସମୟ ମଧ୍ୟରେ, ପୂଜା ଇତ୍ୟାଦି କୌଣସି ଶୁଭ କାର୍ଯ୍ୟ କରାଯାଏ ନାହିଁ। ଏହା ସହିତ, ଶାସ୍ତ୍ରରେ ଖାଦ୍ୟ ରାନ୍ଧିବା ଏବଂ ଖାଇବାକୁ ନିଷେଧ କରାଯାଇଛି। ଗ୍ରହଣ ସମୟରେ ଜପ କରିବା ଫଳପ୍ରଦ ବୋଲି ବିବେଚନା କରାଯାଏ। ଏହା କରିବା ଦ୍ୱାରା ଗ୍ରହଣର ଦୂଷିତ କିରଣ ଜୀବନ ଉପରେ ନକାରାତ୍ମକ ପ୍ରଭାବ ପକାଇ ନଥାଏ ବୋଲି ବିଶ୍ୱାସ କରାଯାଏ। ଏପରି ପରିସ୍ଥିତିରେ, ଆସନ୍ତୁ ଜାଣିବା ବର୍ଷର ପ୍ରଥମ ସୂର୍ଯ୍ୟଗ୍ରହଣ କେବେ ହେବ ଏବଂ ଏହା ଭାରତରେ ଦୃଶ୍ୟମାନ ହେବ କି ନାହିଁ…

ବର୍ଷର ପ୍ରଥମ ସୂର୍ଯ୍ୟଗ୍ରହଣ ଚୈତ୍ର ମାସର କୃଷ୍ଣ ପକ୍ଷର ଅମାବାସ୍ୟା ତିଥିରେ ଅର୍ଥାତ୍ ୨୯ ମାର୍ଚ୍ଚ, ୨୦୨୫ରେ ହେବ। ଏହା ଏକ ଆଂଶିକ ସୂର୍ଯ୍ୟଗ୍ରହଣ ହେବ।

ଏହି ଗ୍ରହଣ ଅପରାହ୍ନ୨:୨୧ ରୁ ସନ୍ଧ୍ୟା ୬:୧୪ ପର୍ଯ୍ୟନ୍ତ ରହିବ। କିନ୍ତୁ ୧୪ ମାର୍ଚ୍ଚରେ ଚନ୍ଦ୍ରଗ୍ରହଣ ପରି, ବର୍ଷର ପ୍ରଥମ ସୂର୍ଯ୍ୟଗ୍ରହଣ ମଧ୍ୟ ଭାରତରେ ଦୃଶ୍ୟମାନ ହେବ ନାହିଁ। ଏପରି ପରିସ୍ଥିତିରେ, ଭାରତରେ ସୂତକ କାଳ ବୈଧ ହେବ ନାହିଁ।

ଏହା ବରମୁଡା, ବାରବାଡୋସ, ଡେନମାର୍କ, ଅଷ୍ଟ୍ରିଆ, ବେଲଜିୟମ, ଉତ୍ତର ବ୍ରାଜିଲ, ଫିନଲ୍ୟାଣ୍ଡ, ଜର୍ମାନୀ, ଫ୍ରାନ୍ସ, ହଙ୍ଗେରୀ, ଆୟରଲ୍ୟାଣ୍ଡ, ମରକ୍କୋ, ଗ୍ରୀନଲ୍ୟାଣ୍ଡ, କାନାଡାର ପୂର୍ବ ଅଂଶ, ଲିଥୁନିଆ, ହଲାଣ୍ଡ, ପର୍ତ୍ତୁଗାଲ, ଉତ୍ତର ଋଷ, ସ୍ପେନ, ସୁରିନାମ, ସ୍ୱିଡେନ, ପୋଲାଣ୍ଡ, ପର୍ତ୍ତୁଗାଲ, ନରୱେ, ୟୁକ୍ରେନ, ସ୍ୱିଜରଲ୍ୟାଣ୍ଡ, ଇଂଲଣ୍ଡ ଏବଂ ଆମେରିକାର ପୂର୍ବ ଅଞ୍ଚଳରେ ଦୃଶ୍ୟମାନ ହେବ।

ଯେତେବେଳେ ଚନ୍ଦ୍ର ପୃଥିବୀ ଏବଂ ସୂର୍ଯ୍ୟ ମଧ୍ୟରେ ଆସେ, ଏହି ଖଗୋଳୀୟ ଘଟଣାଟିକୁ ସୂର୍ଯ୍ୟଗ୍ରହଣ କୁହାଯାଏ। ଏହି ସମୟରେ, ଚନ୍ଦ୍ର ସୂର୍ଯ୍ୟଙ୍କ କିରଣ ମଧ୍ୟରେ ଆସିଯାଏ, ଯାହା ଫଳରେ ଚନ୍ଦ୍ରର ଛାଇ ପୃଥିବୀ ଉପରେ ପଡ଼ିଥାଏ।
ସମୁଦ୍ର ସୁନିତାଙ୍କ ପାଇଁ ଯେତେବେଳେ ବିସ୍ତାର କଲା ନିଜ ବାହୁ, ସେତେବେଳେ ଡଲଫିନମାନେ କରିଥିଲେ ସ୍ୱାଗତ

ସତେ ଯେପରି ମନେ ହେଉଥିଲା ସମୁଦ୍ର ମଧ୍ୟ ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନିତା ୱିଲିୟମ୍ସଙ୍କ ସଫଳ ଏବଂ ସୁରକ୍ଷିତ ଅବତରଣ ପାଇଁ ଅପେକ୍ଷା କରିଥିଲା। ଡ୍ରାଗନ୍ କ୍ୟାପସୁଲର ଚାରୋଟି ପାରାଚୁଟ୍ ସମୁଦ୍ର ପୃଷ୍ଠରେ ପହଞ୍ଚିବା ପୂର୍ବରୁ ଆକାଶରେ ଖୋଲିଯାଇଥିଲା। ଏହା ପରେ ସମୁଦ୍ର ପୃଷ୍ଠରେ ଏକ ଚମତ୍କାର ଅବତରଣ ହୋଇଥିଲା। ସମୁଦ୍ରର ଉଛୁଳା ଢେଉ ମଧ୍ୟ ସୁନିତା ୱିଲିୟମ୍ସ ଏବଂ ତାଙ୍କ ସାଥୀ ମହାକାଶଚାରୀଙ୍କୁ ସ୍ୱାଗତ କରିଥିଲା। ସମୁଦ୍ର ପୃଷ୍ଠରେ ସଫଳତାର ସହ କ୍ୟାପସୁଲ ଅବତରଣ କରିବା ମାତ୍ରେ ଉଦ୍ଧାରକାରୀ ଦଳ ସେଠାରେ ପହଞ୍ଚିଥିଲେ। ଧୀରେ ଧୀରେ କ୍ୟାପସୁଲଟିକୁ ଡଙ୍ଗା ଦ୍ୱାରା ଉଠାଇ ଜାହାଜକୁ ଅଣାଗଲା।

ଯେତେବେଳେ କ୍ୟାପସୁଲଟି ପୃଥିବୀର ବାୟୁମଣ୍ଡଳରେ ପ୍ରବେଶ କରେ, ୩୫୦୦ ଡିଗ୍ରୀ ଫାରେନହାଇଟ୍ ଉତ୍ତାପ ଯୋଗୁଁ ଭିତରେ ବସିଥିବା ମହାକାଶଚାରୀଙ୍କୁ ଏହା ଅଗ୍ନି ପିଣ୍ଡୁଳା ପରି ଲାଲ ଦେଖାଯାଏ। ଏହି ଦୃଶ୍ୟ ମଧ୍ୟ ଆଶ୍ଚର୍ଯ୍ୟଜନକ ଯେ କ୍ୟାପସୁଲ ଭିତରେ ବସିଥିବା ଯାତ୍ରୀମାନେ ଏତେ ଉଚ୍ଚ ତାପମାତ୍ରାରେ କିପରି ସୁରକ୍ଷିତ ଭାବରେ ପୃଥିବୀରେ ଅବତରଣ କରନ୍ତି। ପ୍ରକୃତରେ, କ୍ୟାପସୁଲଟି ଏପରି ସାମଗ୍ରୀରେ ତିଆରି ଯାହା ଭିତରେ ତାପମାତ୍ରା ପହଞ୍ଚିପାରେ ନାହିଁ। ତେଣୁ, କ୍ୟାପସୁଲ ଭିତରେ ତାପମାତ୍ରା ବାହାର ଅପେକ୍ଷା ବହୁତ କମ୍ ଥାଏ।

Watch Dragon and Crew-9 return to Earth → https://t.co/ZZEmGU8Aar https://t.co/aqY6RNsEfK
— SpaceX (@SpaceX) March 18, 2025

ବୁଧବାର (୧୯ ମାର୍ଚ୍ଚ) ସକାଳ ୩:୨୭ ରେ (IST) ସ୍ପେସଏକ୍ସ ଡ୍ରାଗନ ମହାକାଶଯାନ ଫ୍ଲୋରିଡା ଉପକୂଳରେ ମହାକାଶଚାରୀମାନଙ୍କୁ ଅବତରଣ କରାଇଥିଲା। ଆଶ୍ଚର୍ଯ୍ୟଜନକ କଥା ହେଉଛି, ପୁନରୁଦ୍ଧାର ଦଳ ଯେତେବେଳେ ମହାକାଶଯାନକୁ ବାହାର କରୁଥିଲେ, ସେତେବେଳେ ଡଲଫିନର ଏକ ଦଳ କ୍ୟାପସୁଲ ଚାରିପାଖରେ ପହଁରୁଥିବାର ଦେଖାଯାଇଥିଲା।

Drogue and main parachutes have deployed pic.twitter.com/X0wiXqFaPt
— SpaceX (@SpaceX) March 18, 2025

ପୁନରୁଦ୍ଧାର ଜାହାଜଟି କ୍ୟାପସୁଲକୁ ପାଣିରୁ ବାହାର କରିଥିଲା ଏବଂ ସେପ୍ଟେମ୍ବର ପରେ ପ୍ରଥମ ଥର ପାଇଁ ଏହାର ପାର୍ଶ୍ୱ ହ୍ୟାଚ୍ ଖୋଲାଯାଇଥିଲା। ତା’ପରେ ଯାତ୍ରୀମାନଙ୍କୁ ସ୍ଥାନାନ୍ତର କରାଯାଇଥିଲା ଏବଂ ତୁରନ୍ତ ହ୍ୟୁଷ୍ଟନକୁ ପଠାଯାଇଥିଲା, ଯେଉଁଠାରେ ସେମାନଙ୍କୁ ୪୫ ଦିନର ଯତ୍ନ ଏବଂ ପୁନର୍ବାସ ପ୍ରକ୍ରିୟାରେ ନିଆଯିବ।

Splashdown of Dragon confirmed – welcome back to Earth, Nick, Suni, Butch, and Aleks! pic.twitter.com/M4RZ6UYsQ2
— SpaceX (@SpaceX) March 18, 2025

ଏହା ମହାକାଶଚାରୀଙ୍କ ସ୍ୱଦେଶ ଫେରିବାର ସବୁଠାରୁ ରୋମାଞ୍ଚକର ମୁହୂର୍ତ୍ତ। ପ୍ରାୟ ୪୬ ମିନିଟ୍ ଯାତ୍ରା ପରେ, ଡ୍ରାଗନ୍ କ୍ୟାପସୁଲ୍ ଏକ ବିଶେଷଜ୍ଞ ପାରାଚୁଟର୍ ପରି ଫ୍ଲୋରିଡା ଉପକୂଳରୁ ସମୁଦ୍ରରେ ଅବତରଣ କଲା। ଏହି ମୁହୂର୍ତ୍ତଟି ସ୍କ୍ରିନରେ ଆସିବା ମାତ୍ରେ ନାସାର ବୈଜ୍ଞାନିକମାନଙ୍କ ମୁହଁ ଖୁସିରେ ଝଲସି ଉଠିଲା।

ନାସାର ଭାଷ୍ୟକାର, ଯିଏ ଏହି ସମ୍ପୂର୍ଣ୍ଣ ମିଶନର ଲାଇଭ୍ ଭାଷ୍ୟକାର କରୁଥିଲେ, ସେ ମଧ୍ୟ ଖୁସି ହୋଇଗଲେ। କିଏ ଜାଣେ କେତେ ଲୋକ ଏହି ସଫଳତାର ‘ଛିଟା’ ନିଜ ଭିତରେ ସମୁଦ୍ରରେ ଅନୁଭବ କରିଥିଲେ। ଯେତେବେଳେ ଆମେରିକା ଆନନ୍ଦିତ ହେଉଥିଲା, ଭାରତରେ ମଧ୍ୟ ବାଣ ଫୁଟାଯାଉଥିଲା।
ବରଗଡ଼ ଜିଲ୍ଲାରେ ରାଜ୍ୟସ୍ତରୀୟ କିଷାନ ମହାପଞ୍ଚାୟତ ଆୟୋଜିତ

କୃଷିନୀତି ପ୍ରତିବାଦରେ ବରଗଡ଼ ଠାରେ ଆରମ୍ଭ ହୋଇଛି ରାଜ୍ୟସ୍ତରୀୟ କିଷାନ ମହାପଞ୍ଚାୟତ | ବରଗଡ଼ ଜିଲ୍ଲା ସୟାଁ ଖେଳ ପଡ଼ିଆଠାରେ ସଂଯୁକ୍ତ କୃଷକ ସଂଗଠନ ପକ୍ଷରୁ ଏହି ରାଜ୍ୟସ୍ତରୀୟ କିଷାନ ମହାପଞ୍ଚାୟତ ଆୟୋଜିତ ହୋଇଛି। ଏହି ମହାପଞ୍ଚାୟତରେ ଅନେକ ଚାଷୀ, ସ୍ବେଚ୍ଛାସେବୀ, ସାମାଜିକ ସଂଗଠନ ସାମିଲ ହୋଇଛନ୍ତି। ଏଥିରେ ଭାରତୀୟ କିଷାନ ୟୁନିଅନର ପ୍ରବକ୍ତା ରାକେଶ ଟିକାୟତଙ୍କ ସମେତ ଅନେକ ରାଷ୍ଟ୍ରୀୟ ସ୍ତରୀୟ କୃଷକ ନେତା ଯୋଗଦାନ କରିଛନ୍ତି। ସରକାରଙ୍କ କୃଷିନୀତି ସମ୍ପୂର୍ଣ୍ଣ ଭାବରେ କମ୍ପାନୀ ଓ ପୁଞ୍ଜିପତିମାନଙ୍କୁ ସୁହାଉଛି। ଅନ୍ୟପକ୍ଷରେ ଯେଉଁ କୃଷକଙ୍କ ପାଇଁ ନୀତି ପ୍ରସ୍ତୁତ କରାଯାଉଛି, ସେମାନେ ଦିନକୁ ଦିନ ଗରିବ ଋଣଗ୍ରସ୍ତ ହୋଇ ଆତ୍ମହତ୍ୟା କରିବାକୁ ବାଧ୍ୟ ହେଉଛନ୍ତି ବୋଲି ସଂଗଠନ ପକ୍ଷରୁ ଅଭିଯୋଗ ହୋଇଛି |

ପୁଞ୍ଜିପତିମାନେ ଯେତିକି ଟଙ୍କା ଋଣ କରି ବିଦେଶକୁ ପଳାଉଛନ୍ତି, ସେତିକି ଟଙ୍କା ଋଣ ଚାଷୀମାନେ ନେଇ ନାହାନ୍ତି। ସେହିପରି ସରକାରମାନେ ଅଧିକ ଅମଳ ପାଇଁ ଉନ୍ନତ ବିହନ,ରାସାୟନିକ ସାର ଓ ଅତ୍ୟାଧୁନିକ ଯନ୍ତ୍ରପାତି ବ୍ୟବହାର ପାଇଁ ପ୍ରୋତ୍ସାହିତ କରୁଥିବା ବେଳେ ଚାଷୀମାନେ ବିନିଯୋଗ ଅର୍ଥ ତୁଳନାରେ ବିକ୍ରି ମୂଲ୍ୟ କମ୍ ପାଉଛନ୍ତି । ଚାଷୀ ମାନଙ୍କ ଉତ୍ପାଦିତ ସମସ୍ତ ଫସଲକୁ ସରକାର କ୍ରୟ ନ କରି ଏକ ତୃତୀୟାଂଶ କିଣୁଛନ୍ତି । ଯାହା ଦ୍ୱାରା ବଳକା ଶସ୍ୟକୁ ଚାଷୀ ଦଲାଲ ଏବଂ ବେପାରୀମାନଙ୍କୁ କମ ମୂଲ୍ୟରେ ବିକ୍ରି କରିବାକୁ ବାଧ୍ୟ ହେଉଛନ୍ତି। ବଜାର ବ୍ୟବସ୍ଥା, ଭିତ୍ତିଭୂମି ଓ ଶୀତଳ ଭଣ୍ଡାର ଅଭାବରୁ ଚାଷୀ କ୍ଷତିଗ୍ରସ୍ତ ଓ ଶୋଷଣର ଶିକାର ହେଉଛନ୍ତି। ବିଭିନ୍ନ ସରକାରମାନେ ଜଳସେଚନ କଥା କହୁଛନ୍ତି ହେଲେ ଆଜି ପର୍ଯ୍ୟନ୍ତ ସମସ୍ତ ଚାଷ ଜମିକୁ ଜଳସେଚିତ କରିପାରୁ ନାହାନ୍ତି। ବରଗଡ଼ ଜିଲ୍ଲାର୍ ୧୨ ବ୍ଲକ ମଧ୍ୟରୁ ୪ ବ୍ଲକ ସମ୍ପୂର୍ଣ୍ଣ ଜଳସେଚିତ ହୋଇଥିବା ବେଳେ ୮ ବ୍ଲକ ଜଳ ବିନା ମରୁଡ଼ିର ସାମ୍ନା କରୁଛନ୍ତି ।

ଠିକ ସମୟରେ ଫସଲବୀମା ପଇସା ପାଉନ ଥିବାରୁ ଚାଷୀମାନେ ଆନ୍ଦୋଳନ କରୁଛନ୍ତି । ବିଭିନ୍ନ କମ୍ପାନୀର କୋଟି କୋଟି ଟଙ୍କା ବିଜୁଳି ବିଲ ଛାଡ଼ କରାଯାଉଥିବା ବେଳେ ଘରୋଇ ଉପଭୋକ୍ତା ଓ ଚାଷୀମାନଙ୍କ ପାଖରୁ ଜୋର ଜବରଦସ୍ତ ବିଜୁଳି ବିଲ ଆଦାୟ କରାଯାଉଛି ବିଲ ନ ଦେଲେ ଲାଇନ କାଟି ଦିଆହେଉଛି ବୋଲି ଅଭିଯୋଗ କରିଛନ୍ତି କୃଷକ ସଂଗଠନ |
ବାୟୁ ପ୍ରଦୁଷଣ ଦାବିରେ ଗ୍ରାମବାସୀଙ୍କ ରାସ୍ତା ରୋକ, ନାଲି ଆଖି ଦେଖାଉଛି ପୋଲିସ

ଧୁଳି ଧୂଆଁରେ ଅସ୍ତବ୍ୟସ୍ତ ଗ୍ରାମବାସୀ । ବାୟୁ ପ୍ରଦୁଷଣ ପ୍ରତିକାର ଦାବୀରେ ରାସ୍ତା ରୋକ କରିଛନ୍ତି ଗ୍ରାମବାସୀ । ରାସ୍ତା ରୋକ ଯୋଗୁଁ ଯୋଡ଼ା ବାମେବାରୀ ରାସ୍ତାରେ ଯାତାୟତ ଠପ ହୋଇଯାଇଛି । କେନ୍ଦୁଝର ଜିଲ୍ଲା ଯୋଡ଼ା ବ୍ଲକ ବଳଦା ପଞ୍ଚାୟତ ବିପ୍ଲଟ ଗ୍ରାମାଞ୍ଚଳରେ ଏହି ଘଟଣା ଦେଖିବାକୁ ମିଳିଛି । ଗାଁରେ ବିଦ୍ୟୁତ ସେବା ମଧ୍ୟ ନାହିଁ ।

ଯୋଡ଼ା ବାମେବାରୀ ରାସ୍ତାରେ ମାତ୍ରାଧିକ ଭାରି ଯାନ ଚଳାଚଳ ଯୋଗୁଁ ଧୁଳି ଧୁଆଁ ରେ ଅତିଷ୍ଠ ହୋଇପଡିଛନ୍ତି ଗ୍ରାମବାସୀ । ଏ ନେଇ ବାରମ୍ବାର ପ୍ରଶାସନ କୁ ଅଭିଯୋଗ କରିଥିଲେ ମଧ୍ୟ ପ୍ରଶାସନ ଗୁରୁତ୍ବ ଦେଉନାହିଁ । ଯେଉଥିପାଇଁ ଆଜି ବାଧ୍ୟ ହୋଇ ଗ୍ରାମ ବାସୀ ରାସ୍ତା ରୋକ କରିଛନ୍ତି । ଛୋଟ ଛୁଆଙ୍କ ଠାରୁ ଆରମ୍ଭ କରି ବୃଦ୍ଧ ବୟସ୍କ ପାର୍ଜୟନ୍ତ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି ।

ବାୟୁ ପ୍ରଦୁଷଣ କାରଣରୁ ନିଶ୍ବାସ ପ୍ରଶ୍ବାସ ନେବାରେ ଅସୁବିଧା ହେବା ସହ ଛୋଟ ଛୁଆ ମାନେ ମଧ୍ୟ ବିଭିନ୍ନ ରୋଗର ଶିକାର ହେଉଛନ୍ତି । ଏହି ଅଞ୍ଚଳ ରେ ଏକାଧିକ ଖଣି କମ୍ପାନୀ କାର୍ଯ୍ୟ କରୁଛି । ହେଲେ ଏହି କମ୍ପାନୀରୁ ଖଣିଜ ଦ୍ରବ୍ୟ ପରିବହନ କାର୍ଯ୍ୟ ଦୈନିକ ହଜାର ହଜାର ଟ୍ରକ ଚଳାଚଳ ଯୋଗୁଁ ଏଭଳି ପରିସ୍ଥିତି ସୣଷ୍ଟି ହୋଇଛି । ତେବେ ଖଣି ପ୍ରଭାବିତ ଅନୁଦାନ ଖଣି ଅଞ୍ଚଳରେ କାର୍ଯ୍ୟ ରେ ଲାଗୁ ନଥିବା ଅଭିଯୋଗ କରି ଗ୍ରାମବାସୀ ରାସ୍ତା ରୋକ କରିଥିବା ଜଣାପଡିଛି । ପ୍ରଦୂଷଣ ବିଭାଗ ଓ ପ୍ରଶାସନ ସବୁ ଜାଣି ମଧ୍ୟ ଚୁପ ରହିଥିବା ଅଭିଯୋଗ ହେଉଛି । ତେବେ ଦେଖିବାକୁ ବାକି ରହିଲା ଏହି ଘଟଣାର କେବେ ସମାଧାନ ହେଉଛି ।
ମହାକାଶରୁ ଫେରିବେ ସୁନିତା ୱିଲିୟମ୍ସ, କିନ୍ତୁ ପୃଥିବୀରେ ପାଦ ରଖିପାରିବେ ନାହିଁ!

ସୁନିତା ୱିଲିୟମ୍ସଙ୍କୁ ଆଣିବା ପାଇଁ NASA SpaceXଏକ୍ସର ଡ୍ରାଗନ କ୍ରୁ କ୍ୟାପସୁଲକୁ ବାଛିଥିଲା। ଏହି କ୍ୟାପସୁଲ ନିର୍ମାଣ ହେବା ପରଠାରୁ ୪୯ ଥର ଉତକ୍ଷେପଣ କରାଯାଇଛି। ଡ୍ରାଗନ୍ କ୍ୟାପସୁଲ୍ ୪୪ ଥର ଅନ୍ତର୍ଜାତୀୟ ମହାକାଶ ଷ୍ଟେସନକୁ ଯାତ୍ରା କରିଛି।

ଖୁବଶିଘ୍ର ପୃଥିବୀକୁ ଫେରିବେ ନାସା ମହାକାଶଚାରୀ ସୁନୀତା ୱିଲିୟମ୍ସ । ଗତ ୯ ମାସ ଧରି ମହାକାଶରେ ଫସିଥିବା ନାସା ମହାକାଶଚାରୀ ସୁନୀତା ୱିଲିୟମ୍ସ ସାଥୀ ମହାକାଶଚାରୀମାନଙ୍କ ସହିତ ମାର୍ଚ୍ଚ ୧୮ ମଙ୍ଗଳବାର ସକାଳ ୮:୧୫ ରେ ସେ ପୃଥିବୀ ଫେରିବା ଲାଗି ପ୍ରସ୍ତୁତି ଆରମ୍ଭ କରିଛନ୍ତି । ଭାରତୀୟ ସମୟ ଅନୁସାରେ ମାର୍ଚ୍ଚ ୧୯ ରେ ପୃଥିବୀରେ ପହଞ୍ଚିବେ ।

କ୍ରୁ-୯ ମେମ୍ବର ପୃଥିବୀ ଫେରିବା ସୁନିଶ୍ଚିତ କରିବା ଲାଗି କ୍ରୁ-୧୦ ମିଶନକୁ ଲଞ୍ଚ କରାଯାଇଥିଲା । ଏହି ମିଶନ ଜରିଆରେ 4ଜଣ ମହାକାଶଚାରୀ ରବିବାର ଅନ୍ତର୍ଜାତୀୟ ସ୍ପେଶ ଷ୍ଟେସନରେ ପହଞ୍ଚିସାରିଛନ୍ତି ।

ସ୍ପେଶ ଷ୍ଟେସନରେ ପହଞ୍ଚିବା ପରେ ସେଠାରେ ଉପସ୍ଥିତ କ୍ରୁ-୯ ସଦସ୍ୟମାନେ ଜୋରଦାର ସ୍ବାଗତ କରିଥିଲେ । ଏବେ କ୍ରୁ-୧୦ମିଶନର ସଦସ୍ୟମାନଙ୍କୁ ସମସ୍ତ କାର୍ଯ୍ୟ ହସ୍ତାନ୍ତର କରିବା ପରେ କମାଣ୍ଡର ସୁନୀତା ପୃଥିବୀ ଅଭିମୁଖେ ବାହାରିବେ ।

ଅନ୍ତର୍ଜାତୀୟ ସ୍ପେଶ୍‌ ଷ୍ଟେସନରୁ ଏଜେନ୍ସିର କ୍ରୁ-୯ ମିଶନକୁ ଫେରିବା ପାଇଁ ଫ୍ଲୋରିଡା ଉପକୂଳରେ ପାଣିପାଗ ଏବଂ ସ୍ପ୍ଲାସଡାଉନ୍ ସ୍ଥିତିର ଆକଳନ ପାଇଁ ନାସା ଏବଂ ସ୍ପେସ୍ ଏକ୍ସ ରବିବାର ଆଲୋଚନା କରିଥିଲେ । ମାର୍ଚ୍ଚ ୧୮ , ମଙ୍ଗଳବାର ସନ୍ଧ୍ୟା ପାଇଁ ପୂର୍ବାନୁମାନ କରାଯାଇଥିବା ଅନୁକୂଳ ପରିସ୍ଥିତି ଉପରେ ଆଧାର କରି ମିଶନ ମ୍ୟାନେଜରମାନେ ପୂର୍ବ କ୍ରୁ-୯ ଫେରିବା ସୁଯୋଗକୁ ଟାର୍ଗେଟ କରୁଛନ୍ତି ।
ଔରଙ୍ଗଜେବଙ୍କୁ ନେଇ ନାଗପୁରରେ ଉଗ୍ରରୂପ ନେଲା ହିଂସା, ପଥର ମାଡ଼, ଭଙ୍ଗାରୁଜା, ୪୦ ରୁ ଅଧିକ ଗିରଫ

ଔରଙ୍ଗଜେବଙ୍କ ସମାଧିସ୍ଥଳକୁ ହଟାଇବା ଦାବି କରି ଏକ ଦକ୍ଷିଣପନ୍ଥୀ ସଂଗଠନର ପ୍ରତିବାଦ ସମୟରେ ଧାର୍ମିକ ଗ୍ରନ୍ଥ ପୋଡ଼ି ଦିଆଯିବ ବୋଲି ଗୁଜବ ପ୍ରଚାର ହେବା ପରେ କେନ୍ଦ୍ରୀୟ ନାଗପୁରରେ ହିଂସା ସୃଷ୍ଟି ହୋଇଥିଲା।

ଔରଙ୍ଗଜେବଙ୍କ ସମାଧି ଉପରେ ଚାଲିଥିବା ବିବାଦ ଯୋଗୁଁ ସୋମବାର ରାତିରେ ମହାରାଷ୍ଟ୍ରର ନାଗପୁର ଜଳିଯାଇଥିଲା। ସହରରେ ସକାଳେ ତାଙ୍କ କ୍ଷତ ଦୃଶ୍ୟମାନ ହୁଏ। ରାସ୍ତାକୁ ଓହ୍ଲାଇଥିବା ଦଙ୍ଗାକାରୀମାନେ ଡଜନ ଡଜନ ଯାନବାହନ ଜାଳି ଦେଇଥିଲେ। ପୋଲିସ କର୍ମଚାରୀଙ୍କ ଉପରେ ପଥର ମାଡ଼ କରାଯାଇଥିଲା। ଯେଉଁଥିରେ ୧୨ରୁ ଅଧିକ ଆହତ ହୋଇଥିଲେ। ପଥର ଫିଙ୍ଗାଳିମାନେ ଘରଗୁଡ଼ିକୁ ମଧ୍ୟ ଟାର୍ଗେଟ କରିଥିଲେ। ଏହି ହିଂସା ଦୁଇ ପ୍ରକାରର ଗୁଜବ ସହିତ ଆରମ୍ଭ ହୋଇଥିଲା। ପ୍ରଥମଟି ହେଉଛି ଏକ ଧାର୍ମିକ ଗ୍ରନ୍ଥକୁ ପୋଡ଼ି ଦେବା। ଏବଂ ଦ୍ୱିତୀୟ କଥା ହେଉଛି ପବିତ୍ର ଚାଦରକୁ ନିଆଁ ଲଗାଇବା। ନାଗପୁରର ପରିବେଶକୁ ବିଷାକ୍ତ କରିବା ପାଇଁ ପ୍ରସାରିତ ଏହି ଗୁଜବ ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଲୋକଙ୍କୁ ଉତ୍ତେଜିତ କରିଥିଲା ଏବଂ ତା’ପରେ ହିଂସାର ଏକ ପର୍ଯ୍ୟାୟ ଆରମ୍ଭ ହୋଇଥିଲା। ଏପର୍ଯ୍ୟନ୍ତ ପ୍ରାୟ ୫୦ ଜଣ ଦଙ୍ଗାକାରୀଙ୍କୁ ଗିରଫ କରାଯାଇଥିବା ସୂଚନା ମିଳିଛି।

ଅଧିକାରୀଙ୍କ କହିବା ଯେ ସୋମବାର ସନ୍ଧ୍ୟା ପ୍ରାୟ ୭.୩୦ ସମୟରେ ମଧ୍ୟ ନାଗପୁରର ଚିଟନିସ୍ ପାର୍କ ଅଞ୍ଚଳରେ ହିଂସା ଘଟିଥିଲା, ପୋଲିସ ଉପରେ ପଥରମାଡ଼ ହୋଇଥିଲା। ପିଟିଆଇ ଅନୁଯାୟୀ, ଏକ ଗୁଜବ ବ୍ୟାପିଥିଲା ଯେ ଔରଙ୍ଗଜେବଙ୍କ ସମାଧି ହଟାଇବାକୁ ଭିଏଚପି-ବଜରଙ୍ଗ ଦଳ ଦ୍ୱାରା ଆନ୍ଦୋଳନ ସମୟରେ ମୁସଲିମ ସମ୍ପ୍ରଦାୟର ପବିତ୍ର ପୁସ୍ତକ ପୋଡ଼ି ଦିଆଯାଇଥିଲା। ତଥାପି, ବଜରଙ୍ଗ ଦଳ ଏହି ଅଭିଯୋଗକୁ ଖଣ୍ଡନ କରି କହିଛି ଯେ ପ୍ରତିବାଦକାରୀମାନେ ଔରଙ୍ଗଜେବଙ୍କ କୁଶପୁତ୍ତଳିକା ଦାହ କରିଛନ୍ତି। ଏହି ହିଂସାରେ ଡିସିପିଙ୍କ ସମେତ ଛଅ ଜଣ ଏବଂ ପାଞ୍ଚ ଜଣ ପୋଲିସ କର୍ମଚାରୀ ଆହତ ହୋଇଛନ୍ତି। ଡିସିପି ନିକେତନଙ୍କ ଉପରେ କୁରାଢ଼ିରେ ଆକ୍ରମଣ କରାଯାଇଥିଲା।

ସୋମବାର ରାତି ପ୍ରାୟ ୧୦.୩୦ ରୁ ୧୧.୩୦ ମଧ୍ୟରେ ପୁରୁଣା ଭଣ୍ଡାରା ରୋଡ୍ ନିକଟସ୍ଥ ହଂସପୁରୀ ଅଞ୍ଚଳରେ ଆଉ ଏକ ସଂଘର୍ଷ ଘଟିଥିଲା। ଅଶାନ୍ତ ଜନତା ସେହି ଅଞ୍ଚଳରେ ଅନେକ ଗାଡ଼ି ପୋଡ଼ି ଦେଇଥିଲେ ଏବଂ ଘର ଏବଂ ଏକ କ୍ଲିନିକ୍ ଭଙ୍ଗାରୁଜା କରିଥିଲେ। ହଂସପୁରୀର ବାସିନ୍ଦା ଶରଦ ଗୁପ୍ତା (୫୦) କହିଛନ୍ତି ଯେ ଭିଡ଼୧୦.୩୦ ରୁ ୧୧.୩୦ ମଧ୍ୟରେ ଆସି ପଥର ଫିଙ୍ଗିବା ଆରମ୍ଭ କରିଥିଲେ ଏବଂ ପରେ ଯାନବାହାନରେ ନିଆଁ ଲଗାଇ ଦେଇଥିଲେ। ସେ କହିଥିଲେ ଯେ ପୋଲିସ ଗୋଟିଏ ଘଣ୍ଟା ପରେ ପହଞ୍ଚିଲା। ଉତ୍ତ୍ୟକ୍ତ ଲୋକମାନେ ଭିଡ଼ ବିରୁଦ୍ଧରେ ତୁରନ୍ତ ପୋଲିସ କାର୍ଯ୍ୟାନୁଷ୍ଠାନ ଦାବି କରିଥିଲେ।

ହିଂସା ବନ୍ଦ କରିବା ଏବଂ ଅଭିଯୁକ୍ତଙ୍କୁ ଖୋଜିବା ପାଇଁ ନାଗପୁର ଗ୍ରାମୀଣ ପୋଲିସକୁ ମଧ୍ୟ ଡକାଯାଇଛି। ଗୁଜବ ପ୍ରସାରକୁ ରୋକିବା ପାଇଁ ସାଇବର ପୋଲିସ କାମ କରୁଛି। ଭାଇରାଲ ଭିଡିଓ ଏବଂ ସିସିଟିଭି ଯାଞ୍ଚ କରିବା ପରେ, ପୋଲିସ ୪୦ ରୁ ଅଧିକ ଦୁର୍ବୃତ୍ତଙ୍କୁ ଅଟକ ରଖିଛି।

ନାଗପୁରରେ ଶାନ୍ତି ବଜାୟ ରଖିବାକୁ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସ ଅପିଲ କରିଛନ୍ତି। ସେ କହିଛନ୍ତି, ‘ନାଗପୁରର ମହାଲ ଅଞ୍ଚଳରେ ପରିସ୍ଥିତି ଯେପରି ଉତ୍ତେଜନାପୂର୍ଣ୍ଣ ହୋଇଗଲା ତାହା ଅତ୍ୟନ୍ତ ନିନ୍ଦନୀୟ।’ କିଛି ଲୋକ ପୋଲିସ ଉପରେ ପଥର ମାଡ଼ ମଧ୍ୟ କରିଥିଲେ, ଏହା ଠିକ ନୁହଁ ।
ନିଖୋଜ ଛାତ୍ରଙ୍କ ମିଳିଲା ମୃତଦେହ

ବରଗଡ଼ ଜିଲା ଭଟଲି ବ୍ଲକ କେଲେଣ୍ଡାପାଲି ପଞ୍ଚାୟତ ଅନ୍ତର୍ଗତ କେନ୍ଦୁଗୁଡିଆ ଗ୍ରାମର ନବମ ଶ୍ରେଣୀ ଛାତ୍ର ସମୀର ପ୍ରଧାନ ରବିବାରରୁ ନିଖୋଜ ଥିଲେ । ବହୁ ଖୋଜାଖୋଜି କରିବା ପରେ ମଧ୍ୟ ପରିବାର ଲୋକେ ସମୀରଙ୍କର କୌଣସି ସନ୍ଧାନ ପାଇ ନ ଥିଲେ ।

ତେବେ ତାଙ୍କ ବାପା ଦିବ୍ୟ ଲୋଚନ ପୁଅ ନିଖୋଜ ନେଇ ଭଟଲି ଥାନାରେ ଏକ ଏତଲା ଦେଇଥିଲେ । ଆଜି ସମୀରଙ୍କ ମୃତଦେହ ଏକ ଜଙ୍ଗଲ ମଧ୍ୟରୁ ଜବତ କରାଯାଇଛି । ତେବେ ମୃତ୍ୟୁର କାରଣ ଜଣାପଡ଼ିନାହିଁ । ଭଟଲି ପୋଲିସ ଏନେଇ ଅଧିକ ତଦନ୍ତ ଜାରି ରଖିଛି ।