Blog

ମଧ୍ୟରାତ୍ରିରେ ମହାବିନାଶ! ପାରାଦ୍ଵୀପରେ ନିଆଁର ତାଣ୍ଡବ, ୭୦ ଦୋକାନ ଛାରଖାର

ପାରାଦ୍ଵୀପର ବଡ଼ବଡ଼ିଆ ପରିବା ମାର୍କେଟରେ ବିଳମ୍ବିତ ରାତିରେ ଘଟିଥିବା ଭୟାବହ ଅଗ୍ନିକାଣ୍ଡରେ ୭୦ରୁ ଅଧିକ ପରିବା ଦୋକାନ ଘର ସମ୍ପୂର୍ଣ୍ଣ ଜଳି ଛାରଖାର ହୋଇଯାଇଛି। ପ୍ରାୟ ୩ କୋଟି ଟଙ୍କାରୁ ଅଧିକ ସମ୍ପତ୍ତି ନଷ୍ଟ ହୋଇଥିବା ଅନୁମାନ କରାଯାଉଛି।

ଗତରାତି ପ୍ରାୟ ୨ଟା ସମୟରେ ଏକ ଦୋକାନରୁ ନିଆଁ ଲାଗିଥିବା ବେଳେ ଚାହୁଁଚାହୁଁ ସମଗ୍ର ମାର୍କେଟକୁ ଏହା ବ୍ୟାପିଯାଇଥିଲା। ବାଉଁଶ ଓ ପାଲରେ ତିଆରି ଅସ୍ଥାୟୀ ପିଣ୍ଡି ଥିବାରୁ ନିଆଁ ଦ୍ରୁତଗତିରେ ପ୍ରସାରିତ ହୋଇଥିଲା। ଫଳରେ ପରିବା, ନଗଦ ଟଙ୍କା, ଓଜନକଣ୍ଟା, ସାଇକେଲ, ବାଇକ ଓ ବିଭିନ୍ନ ଆସବାବପତ୍ର ସମ୍ପୂର୍ଣ୍ଣ ଭାବେ ପୋଡ଼ି ନଷ୍ଟ ହୋଇଯାଇଛି।

ଖବର ପାଇ ସତ୍ୱରେ କୁଜଙ୍ଗ ଅଗ୍ନିଶମ ବିଭାଗ ସହ ପାରାଦ୍ଵୀପ ବନ୍ଦର, ପିପିଏଲ, ଇଫକୋ ଓ ଆର୍ସେଲର ମିତ୍ତଲ ନିପ୍ପନ ଷ୍ଟିଲ କାରଖାନାର ମୋଟ ୬ଟି ନିଆଁଲିଭା ଗାଡ଼ି ଘଟଣାସ୍ଥଳରେ ପହଞ୍ଚିଥିଲା। ପ୍ରାୟ ଦୁଇ ଘଣ୍ଟାରୁ ଅଧିକ ସମୟ ଧରି ଅକ୍ଲାନ୍ତ ପ୍ରୟାସ ପରେ ଅଗ୍ନିକୁ ନିୟନ୍ତ୍ରଣ କରାଯାଇଥିଲା।

ରାତିରେ ସମସ୍ତ ବ୍ୟବସାୟୀ ଶୋଇଥିବା ସମୟରେ ଅଗ୍ନିକାଣ୍ଡ ଘଟିଥିବାରୁ କେହି ସାମଗ୍ରୀ କିମ୍ବା ଟଙ୍କା ବଞ୍ଚାଇ ପାରିନଥିଲେ। ବ୍ୟବସାୟୀମାନଙ୍କ କହିବା ଅନୁଯାୟୀ, ଏହି ମାର୍କେଟ ସମଗ୍ର ପାରାଦ୍ଵୀପ ଅଞ୍ଚଳର ପରିବା ଚାହିଦା ପୂରଣ କରୁଥିଲା ଏବଂ ଏପରି ଦୁର୍ଘଟଣା ତାଙ୍କ ଜୀବିକାକୁ ଭାରି ଆଘାତ ଦେଇଛି।

ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। କିଛି ମାସ ପୂର୍ବରୁ ମଧ୍ୟ ଏହି ମାର୍କେଟରେ ରାତ୍ରି ସମୟରେ ଛୋଟ ପରିମାଣର ଅଗ୍ନିକାଣ୍ଡ ଘଟିଥିଲା, କିନ୍ତୁ ସେତେବେଳେ ବଡ଼ କ୍ଷତି ହୋଇନଥିଲା।
ଓଡ଼ିଶା ହାଇକୋର୍ଟଙ୍କ କଡ଼ା ରାୟ: ଅତ୍ୟାଚାର କଲେ ସମ୍ପତ୍ତିରୁ ବେଦଖଲ ହେବେ ପୁଅ-ବୋହୁ

ଗୁରୁତ୍ବପୁର୍ଣ ରାୟ ଦେଲେ ହାଇକୋର୍ଟ। ଅତ୍ୟାଚାର କଲେ ସମ୍ପତିରୁ ବେଦଖଲ ହେବେ ପୁଅ ବୋହୁ। ବୃଦ୍ଧ ବାପା, ମାଆଙ୍କୁ ମାନସିକ ଓ ଶାରିରୀକ ନିର୍ଯାତନା ଦେଉଥିବା ପୁଅ, ବୋହୂଙ୍କ ଉପରେ ହାଇକୋର୍ଟଙ୍କ କଡ଼ା ନିର୍ଦ୍ଦେଶ । ଅଦାଲତ ସ୍ପଷ୍ଟ କରିଛନ୍ତି ଯେ, ମାଙ୍କ ଅର୍ଜିତ ସମ୍ପତ୍ତିରେ ପୁଅ କିମ୍ବା ବୋହୂଙ୍କର କୌଣସି ଆଇନଗତ ଅଧିକାର ନାହିଁ। ମା ଚାହିଁଲେ ନିଜ ସମ୍ପତ୍ତିରୁ ପୁଅ, ବୋହୂଙ୍କୁ ବେଦଖଲ କରିପାରିବେ। ନିଜ ଘରୁ ବାହାର ବି କରିପାରିବେ ବୋଲି ଗୁରୁତ୍ବପୂର୍ଣ୍ଣ ରାୟ ଶୁଣାଇଛନ୍ତି ହାଇକୋର୍ଟ। ଯଦି ସନ୍ତାନମାନେ ବୟସ୍କ ପିତାମାତାଙ୍କୁ ମାନସିକ କିମ୍ବା ଶାରୀରିକ ନିର୍ଯାତନା ଦେଇଥାନ୍ତି, ତେବେ ସେମାନଙ୍କୁ ସମ୍ପତ୍ତିରୁ ବେଦଖଲ କରାଯାଇପାରିବ।

ମାମଲାର ଶୁଣାଣି କରି ବିଚାରପତି ଜଷ୍ଟିସ୍ ଆନନ୍ଦ ଚନ୍ଦ୍ର ବେହେରା କହିଛନ୍ତି ଯେ, ମାଙ୍କ ନାମରେ ଥିବା ଓ ସେ ନିଜେ ଅର୍ଜନ କରିଥିବା ସମ୍ପତ୍ତିରେ ସେହି ମା ହିଁ ପୂର୍ଣ୍ଣ ମାଲିକାଣୀ ଅଧିକାରୀ। ଏହି ପରିସ୍ଥିତିରେ ପୁଅ ବୋହୂଙ୍କର ସେଠାରେ ବସୋବାସ କରିବାକୁ କୌଣସି ବାଧ୍ୟତାମୂଳକ ଆଇନଗତ ଦାବି ନାହିଁ। ଅଦାଲତ ଆଉ କହିଛନ୍ତି, ବୃଦ୍ଧ ପିତାମାତାଙ୍କ ସୁରକ୍ଷା ଓ ସମ୍ମାନ ସୁନିଶ୍ଚିତ କରିବା ଆଇନର ମୂଳ ଉଦ୍ଦେଶ୍ୟ। ଯେପରି ସନ୍ତାନମାନେ ଅତ୍ୟାଚାର କରିବେ, ସେମାନେ ସମ୍ପତ୍ତିରେ ରହିବା ଅଧିକାର ହରାଇପାରିବେ। ଏହି ରାୟକୁ ବୃଦ୍ଧ ପିତାମାତାଙ୍କ ପକ୍ଷରେ ଏକ ଦୃଢ଼ ବାର୍ତ୍ତା ଭାବେ ଦେଖାଯାଉଛି।
ହାଇଦ୍ରାବାଦରେ ବିରିୟାନି ବ୍ୟବସାୟରେ ୭୦ ହଜାର କୋଟିର ଟିକସ୍ ଠକେଇ ଅଭିଯୋଗ, ୩୦ ସ୍ଥାନରେ ଆୟକର ଚଢାଉ

ହାଇଦ୍ରାବାଦରେ ବିରିୟାନି ବ୍ୟବସାୟକୁ ନେଇ ବଡ଼ ଧରଣର ଟିକସ୍ ଠକେଇ ଅଭିଯୋଗ ସାମ୍ନାକୁ ଆସିଛି। ପ୍ରାୟ ୭୦ ହଜାର କୋଟି ଟଙ୍କାର ଟିକସ୍ ଫାଙ୍କି ହୋଇଥିବା ସନ୍ଦେହ କରାଯାଉଛି। ଏହି ଘଟଣାକୁ ନେଇ Income Tax Department ପକ୍ଷରୁ ସହରର ପ୍ରାୟ ୩୦ଟି ସ୍ଥାନରେ ଚଢାଉ କରାଯାଇଛି।

ତଦନ୍ତରେ ପ୍ରାଥମିକ ଭାବେ ଜଣାପଡ଼ିଛି ଯେ କିଛି ପ୍ରମୁଖ ରେଷ୍ଟୁରାଣ୍ଟ ଓ ବିରିୟାନି ଆଉଟ୍ଲେଟ୍‌ମାନେ ବିଲିଂ ସିଷ୍ଟମ୍‌ରେ ହେରଫେର କରି ଆସଲ ଆୟ ଲୁଚାଇଥିଲେ। ଗ୍ରାହକଙ୍କୁ ଦିଆଯାଉଥିବା ବିଲ୍ ଓ ଆକାଉଣ୍ଟ ବହିରେ ଦର୍ଶାଯାଉଥିବା ଆୟ ମଧ୍ୟରେ ମେଳ ନଥିବା ସନ୍ଦେହରୁ ଏହି ତଦନ୍ତ ଆରମ୍ଭ ହୋଇଥିଲା। କିଛି ସ୍ଥାନରେ ଡିଜିଟାଲ ବିଲିଂ ସଫ୍ଟୱେର୍‌କୁ ବଦଳାଇ ଆୟ କମ୍ ଦର୍ଶାଇବା ପ୍ରଣାଳୀ ବ୍ୟବହାର ହୋଇଥିବା ଅଭିଯୋଗ ମଧ୍ୟ ଆସିଛି।

ବିଭାଗୀୟ ସୂତ୍ର ଅନୁସାରେ, ଦୀର୍ଘଦିନ ଧରି ଏହି ଅନିୟମିତତା ଚାଲିଆସୁଥିବା ସନ୍ଦେହ ରହିଛି। ଗତବର୍ଷ ନଭେମ୍ବର ମାସରେ ମଧ୍ୟ ଏହିପରି ଅଭିଯୋଗ ଆଧାରରେ ଚଢାଉ କରାଯାଇଥିଲା। ସେତେବେଳେ କିଛି ଦଲିଲପତ୍ର ଓ ଡିଜିଟାଲ ତଥ୍ୟ ଜବତ ହୋଇଥିଲା, ଯାହାର ଆଧାରରେ ଏଥର ବ୍ୟାପକ ତଦନ୍ତ ଆରମ୍ଭ ହୋଇଛି। ଚଢାଉ ସମୟରେ କମ୍ପ୍ୟୁଟର୍ ହାର୍ଡଡିସ୍କ, ସର୍ଭର୍ ଡାଟା, ଆର୍ଥିକ ଲେନଦେନ ସମ୍ବନ୍ଧୀୟ ରେକର୍ଡ ଓ ବ୍ୟାଙ୍କ ଡକ୍ୟୁମେଣ୍ଟ ଜବତ କରାଯାଇଛି। ବିଭାଗ ପକ୍ଷରୁ ହିସାବ କିତାବ ଖତିଆନ କରାଯାଉଛି ଏବଂ ଟିକସ୍ ଚୁକାନା ନକରିଥିବା ରାଶିର ସଠିକ୍ ପରିମାଣ ନିର୍ଣ୍ଣୟ କରାଯିବ ବୋଲି ସୂଚନା ମିଳିଛି।

ଏହି ଘଟଣା ପରେ ସହରର ଖାଦ୍ୟ ବ୍ୟବସାୟ ମହଳରେ ଚର୍ଚ୍ଚା ବୃଦ୍ଧି ପାଇଛି। ବିରିୟାନି ବ୍ୟବସାୟ ହାଇଦ୍ରାବାଦର ଅର୍ଥନୀତିର ଏକ ମୁଖ୍ୟ ଅଂଶ ହେବା ସତ୍ତ୍ୱେ, ଏପରି ବଡ଼ ମାପର ଟିକସ୍ ଠକେଇ ଅଭିଯୋଗ ରାଜ୍ୟ ଓ କେନ୍ଦ୍ର ସରକାରଙ୍କ ଆର୍ଥିକ ନିୟମ ପାଳନ ନେଇ ପ୍ରଶ୍ନ ଉଠାଇଛି। ତଦନ୍ତ ଚାଲିଥିବାରୁ ଆଗାମୀ ଦିନରେ ଆହୁରି ତଥ୍ୟ ସାମ୍ନାକୁ ଆସିପାରେ।
ଚାଷୀ ପ୍ରସଙ୍ଗରେ ଲଗାତାର ୪ଥ ଦିନ ତେଜ ରାଜନୀତି: ସାଢେ ୧୧ଟା ଯାଏଁ ମୁଲତବୀ ଓଡ଼ିଶା ବିଧାନସଭା

ଆଜି ବି ପୁଣିଥରେ ଓଡ଼ିଶା ବିଧାନସଭାର କାର୍ଯ୍ୟ ସ୍ବାଭାବିକ ଭାବେ ଚାଲିପାରିଲା ନାହିଁ। ଚାଷୀମାନଙ୍କ ସମସ୍ୟାକୁ କେନ୍ଦ୍ର କରି ବିରୋଧୀ ଦଳର ଲଗାତାର ଚତୁର୍ଥ ଦିନର ହଙ୍ଗାମା ଫଳରେ ଗୃହର କାର୍ଯ୍ୟକ୍ରମ ପୁଣିଥରେ ବାଧାପ୍ରାପ୍ତ ହେଲା। ସକାଳୁ ଗୃହ ଆରମ୍ଭ ହେବା ସହିତ ବିରୋଧୀ ସଦସ୍ୟମାନେ ଚାଷୀଙ୍କ ଦୁର୍ଦଶା ନେଇ ଜୋରଦାର ପ୍ରତିବାଦ ଆରମ୍ଭ କରିଥିଲେ।

ମୁଣ୍ଡରେ କଳା ପଟି ବାନ୍ଧି ଏବଂ ହାତରେ ପ୍ଲାକାର୍ଡ ଧରି ସଦସ୍ୟମାନେ ଗୃହ ମଧ୍ୟଭାଗକୁ ଆସି ନାରାବାଜି କରିଥିଲେ। “କାନ୍ଦୁଛି ଚାଷୀ, କାନ୍ଦେ ଜନତା”, “କୁଆଡ଼େ ଗଲା ତୁମ ଓଡ଼ିଆ ଅସ୍ମିତା” ପରି ସ୍ଲୋଗାନ୍‌ରେ ସମଗ୍ର ପରିସର କମ୍ପିଉଠିଥିଲା। ପରିସ୍ଥିତି ଏପରି ଅଣାୟତ୍ତ ହୋଇଯାଇଥିଲା ଯେ ଗୃହରେ ନିୟମିତ କାର୍ଯ୍ୟ ସମ୍ପାଦନ କରିବା ପ୍ରାୟ ଅସମ୍ଭବ ହୋଇପଡ଼ିଥିଲା।

ବାଚସ୍ପତି ସୁରମା ପାଢୀ ପକ୍ଷରୁ ପୁନଃପୁନି ଶାନ୍ତି ରକ୍ଷା ପାଇଁ ଅନୁରୋଧ କରାଯାଇଥିଲେ ମଧ୍ୟ ବିରୋଧୀ ସଦସ୍ୟମାନେ ଶାନ୍ତ ହୋଇନଥିଲେ। ଫଳସ୍ୱରୂପ, ପ୍ରଶ୍ନକାଳ କେବଳ ପାଞ୍ଚ ମିନିଟ୍ ପର୍ଯ୍ୟନ୍ତ ଚାଲିପାରିଥିଲା। ଗୃହକାର୍ଯ୍ୟ ସଠିକ୍ ଭାବେ ଚାଲିନଥିବାରୁ ବାଚସ୍ପତି ଶେଷରେ ଗୃହକୁ ସାଢେ ୧୧ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ।

ଚାଷୀଙ୍କ ସମସ୍ୟା ନେଇ ସରକାର ଓ ବିରୋଧୀଙ୍କ ମଧ୍ୟରେ ମତଭେଦ ତିବ୍ର ହେଉଥିବା ବେଳେ, ଲଗାତାର ଚାରିଦିନ ଧରି ଗୃହର କାର୍ଯ୍ୟ ବାଧାପ୍ରାପ୍ତ ହେବାରୁ ରାଜ୍ୟର ରାଜନୈତିକ ପରିସ୍ଥିତି ଉପରେ ଚର୍ଚ୍ଚା ବୃଦ୍ଧି ପାଇଛି। ଏପରି ପରିସ୍ଥିତି ଚାଲିଥିଲେ ଆଗାମୀ ଦିନରେ ବିଧାନସଭାର କାର୍ଯ୍ୟସୂଚୀ ଉପରେ ଆହୁରି ପ୍ରଭାବ ପଡ଼ିପାରେ ବୋଲି ରାଜନୈତିକ ବିଶ୍ଳେଷକମାନେ ମତ ପ୍ରକାଶ କରୁଛନ୍ତି।
ବାଲିଆପାଳ ମାଛ ଚାଷୀଙ୍କୁ ଠିକିଦେଲା ସାମୁଦ୍ରିକ ମତ୍ସ୍ୟ ବିଭାଗ, ଡଙ୍ଗା ତିଆରି ପାଇଁ କାର୍ଯ୍ୟାଦେଶ ଦେଲା ହେଲେ ଟଙ୍କା ଦେଲାନି, ଚିନ୍ତାରେ ମତ୍ସ୍ୟଜୀବୀ

ସରକାର ମତ୍ସ୍ୟଜିବୀ ମାନଙ୍କ ପାଇଁ ବିଭିନ୍ନ ପ୍ରକାରର ଯୋଜନା କରିଛନ୍ତି, ମାତ୍ର କିଛି ଦୁର୍ନୀତିଗ୍ରସ୍ତ ଅସାଧୁ ଅଧିକାରୀ ମାନଙ୍କ ପାଇଁ ଏହି ଯୋଜନା ହେଉଛି ବାଟବଣା,ସମୁଦ୍ରରୁ ମାଛ ମାରି ଜୀବିକା ନିର୍ବାହ କରୁଥିବା ମତ୍ସ୍ୟଜୀବୀ ମାନେ ଡଙ୍ଗା ତିଆରି ସହାୟତା ପାଇଁ ମନୋନୀତ ହୋଇଥିଲେ ମଧ୍ୟ ଅଧିକାରୀ ମାନଙ୍କୁ ହାତଗୁଞ୍ଜା ଦେଇ ନପାରି ସହାୟତା ପାଇବାରୁ ବଞ୍ଚିତ ହୋଇଛନ୍ତି । ବାଲେଶ୍ବର ବାଲିଆପାଳ ରୁ ଦେଖନ୍ତୁ ଏହି ରିପୋର୍ଟ।

ଦୁର୍ନୀତିଗ୍ରସ୍ତ ଅଧିକାରୀଙ୍କ ପାଇଁ ରୃଣ ଭାରରେ ବୁଡ଼ିଲେ ମତ୍ସ୍ୟଜୀବୀ, ସରକାରଙ୍କ ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନାରୁ ଡଙ୍ଗା ତିଆରି ପାଇଁ କାର୍ଯ୍ୟାଦେଶ ପାଇଲେ,ମାତ୍ର ହାତଗୁଞ୍ଜା ଦେଇ ନପାରିବାରୁ ଟଙ୍କା ପାଇଲେନି, ଯାହା ଫଳରେ ଡଙ୍ଗା ତିଆରି ପାଇଁ କରିଥିବା ଋଣ ପରିଶୋଧ କରି ନପାରି ୠଣ ଭରରେ ବୁଡ଼ି ରହିଛନ୍ତି, ଏଭଳି ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ସମୁଦ୍ର ଉପକୂଳବର୍ତ୍ତୀ ଚୈମୁଖ ଏବଂ ଡଗରା ଅଞ୍ଚଳରେ,୨୦୨୨-୨୩ ଆର୍ଥିକ ବର୍ଷରେ ଏହି ଅଞ୍ଚଳରେ ୬ ଜଣ ମତ୍ସ୍ୟଜୀବୀଙ୍କୁ ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନାରେ ଯନ୍ତ୍ରଚାଳିତ ଡଙ୍ଗା ତିଆରି ପାଇଁ ବିଭାଗୀୟ ଅଧିକାରୀ କାର୍ଯ୍ୟାଦେଶ ଦେଇଥିଲେ, ହିତାଧିକାରୀ ମାନେ ବ୍ୟାଙ୍କ ଋଣ ଏବଂ ଧାର ଉଧାରି କରି ଡଙ୍ଗା ତିଆରି କରି ବିଭାଗୀୟ ଅଧିକାରୀ ଙ୍କ ନିକଟକୁ ଦୈଡି ଦୈଡି ନୟାନ୍ତ ହୋଇଥିଲେ ମଧ୍ୟ ଏଥିପ୍ରତି ଅଧିକାରୀ କର୍ଣ୍ଣପାତ କରୁ ନାହାନ୍ତି କି ଜିଓ ଟ୍ୟାଗ କରୁ ନାହାନ୍ତି,ଯାହା ଫଳରେ ଉଧାର ଟଙ୍କା ଫେରସ୍ତ କରି ନପାରି ଚିନ୍ତାରେ ପଡ଼ିଛନ୍ତି ।

ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନାରେ ଡଗରା ଏବଂ ଚୈମୁଖ ଅଞ୍ଚଳରୁ ୨୦ ଜଣ ମତ୍ସ୍ୟଜୀବୀଙ୍କୁ ଯନ୍ତ୍ରଚାଳିତ ଡଙ୍ଗା ତିଆରି କରି କାର୍ଯ୍ୟାଦେଶ ମିଳିଥିଲା, ବାଲିଆପାଳ ରେ ସାମୁଦ୍ରିକ ମତ୍ସ୍ୟ ବିଭାଗ କାର୍ଯ୍ୟାଳୟ ଥାଇ ମଧ୍ୟ ଚନ୍ଦନେଶ୍ୱର ସାମୁଦ୍ରିକ ମତ୍ସ୍ୟ ବିଭାଗ କାର୍ଯ୍ୟାଳୟ ମାଧ୍ୟମରେ ୧୪ ଜଣକ ଭେରିଫିକେସନ ହୋଇ ଟଙ୍କା ମିଳିଲା ମାତ୍ର ବର୍ତ୍ତମାନ ସୁଦ୍ଧା ୬ ଜଣଙ୍କର ଭେରିଫିକେସନ ହେଲା ନାହିଁ କି ଟଙ୍କା ମିଳିଲା ନାହିଁ, ସୁଚନା ଅନୁସାରେ ଚନ୍ଦନେଶ୍ୱର ସାମୁଦ୍ରିକ ମତ୍ସ୍ୟ ବିଭାଗ ଅଧିକାରୀ ଅଧିନରେ ଥିବା ବିଲ୍ଡର ମଧ୍ୟରେ ୩୦ ପ୍ରତିଶତ ହାତଗୁଞ୍ଜା ଯେଉଁ ମାନେ ଦେଉଛନ୍ତି ସେମାନଙ୍କୁ ଡଙ୍ଗା ତିଆରି ବାବଦରେ ଟଙ୍କା ମିଳୁଛି ଯେଉଁ ମାନେ ହାତଗୁଞ୍ଜା ଦେବାକୁ ବାରଣ କରିଛନ୍ତି ସେମାନଙ୍କୁ ଟଙ୍କା ମିଳୁନାହିଁ ବୋଲି ଅଭିଯୋଗ ହୋଇଛି, ଯାହାଫଳରେ ବାଲିଆପାଳ ୬ ଜଣ ମତ୍ସ୍ୟଜୀବୀଙ୍କୁ ବର୍ତ୍ତମାନ ସୁଦ୍ଧା ସେମାନଙ୍କ ଟଙ୍କା ମିଳୁନାହିଁ,ପୁଣି ୨୦୨୩ -୨୪ ଆର୍ଥିକ ବର୍ଷରେ ବାଲିଆପାଳ ର ୨୭ ଜଣ ଏବଂ ଚନ୍ଦନେଶ୍ୱର ର ୨୧ ଜଣ ଡଙ୍ଗା ତିଆରି କରିବା ପାଇଁ ଆବେଦନ କରିଥିଲେ ମାତ୍ର ଚନ୍ଦନେଶ୍ୱର ର ୧୪ ଜଣକୁ ଡଙ୍ଗା ତିଆରି ପାଇଁ କାର୍ଯ୍ୟାଦେଶ ମିଳିଥିଲା ବେଳେ ବାଲିଆପାଳ ର କାହାକୁ ବି କାର୍ଯ୍ୟାଦେଶ ମିଳି ନଥିଲା,ଯାହାକୁ ନେଇ ରାଜ୍ୟ ମତ୍ସ୍ୟ ନିର୍ଦ୍ଦେଶାଳୟ ଙ୍କ ନିକଟରେ ଅଭିଯୋଗ ହୋଇଥିଲା,ଗତ ୨୦୨୫ ସେପ୍ଟେମ୍ବର ମାସରେ ଚନ୍ଦନେଶ୍ୱର ସାମୁଦ୍ରିକ ମତ୍ସ୍ୟ ଅଧିକାରୀ ଅନନ୍ତ ଜେନା ଏବଂ ବାଲେଶ୍ବର ସାମୁଦ୍ରିକ ମତ୍ସ୍ୟ ଅଧିକାରୀ ସିଏଚ୍ ପଲ୍ଲବୀ ଙ୍କ ବିରୁଦ୍ଧରେ ଅନୁସନ୍ଧାନ ପାଇଁ ନିର୍ଦ୍ଦେଶ ଦେଇଥିଲେ କଟକ ମତ୍ସ୍ୟ ନିର୍ଦ୍ଦେଶାଳୟ, ମାତ୍ର ତାର କୈଣସି କାର୍ଯ୍ୟାନୁଷ୍ଠାନ ହେଉ ନଥିବା ଅଭିଯୋଗ ହୋଇଛି, ତେବେ ଜିଲ୍ଲା ସାମୁଦ୍ରିକ ମତ୍ସ୍ୟ ଅଧିକାରୀ ସିଏଚ୍ ପଲ୍ଲବୀ ଏବଂ ଡଗରା ଅଞ୍ଚଳର ଜଣେ ମତ୍ସ୍ୟଜୀବୀ ନାରାୟଣ ବେହେରା ଙ୍କ ମଧ୍ୟରେ ଫୋନ୍ ଯୋଗେ ହୋଇଥିବା କଥାବାର୍ତ୍ତା ରୁ ଜଣା ପଡୁଛି ଅଧିକାରିଣୀ ଶ୍ରୀମତୀ ପଲ୍ଲବୀ ବୁଲେଇ ବଙ୍କେଇ କହୁଥିବା କଥାରୁ ପିସି କଥାକୁ ସ୍ବୀକାର କରୁଛନ୍ତି ବୋଲି ଜଣାପଡ଼ୁଛି । ସାମୁଦ୍ରିକ ମତ୍ସ୍ୟ ବିଭାଗ ଅଧିକାରୀ ଏନେଇ ବାଲିଆପାଳ ସାମୁଦ୍ରିକ ମତ୍ସ୍ୟ ବିଭାଗ ଅଧିକାରୀଙ୍କୁ ପଚାରିବାରୁ ସେମାନଙ୍କ ଜିଓ ଟ୍ୟାଗ ହୋଇ ନଥିବାରୁ ସେମାନଙ୍କୁ ଡଙ୍ଗା ନିର୍ମାଣ ଅର୍ଥ ମିଳିବ ନାହିଁ ବୋଲି କହିଛନ୍ତି,ତେବେ କାହିଁକି ଜିଓ ଟ୍ୟାଗ ହୋଇନାହିଁ ବୋଲି ପଚାରିବାରୁ ସନ୍ତୋଷଜନକ ଉତ୍ତର ଦେଇ ପାରିନଥିଲେ, ତେବେ ଆସନ୍ତା ୧୫ ଦିନ ମଧ୍ୟରେ କୌଣସି ପଦକ୍ଷେପ ଗ୍ରହଣ କରା ନଗଲେ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ମତ୍ସ୍ୟଜୀବୀ।
ବର୍ଷାରେ ବଦଳିଗଲା ସମୀକରଣ: ଟି-୨୦ ବିଶ୍ୱକପ୍ ୨୦୨୬ରୁ ଅଷ୍ଟ୍ରେଲିଆ ବିଦାୟ

ଠିକ୍ ତିନି ବର୍ଷ ପୂର୍ବେ, ୧୯ ନଭେମ୍ବର ୨୦୨୩ରେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମ ଠାରେ ଭାରତକୁ ପରାଜିତ କରି ଅଷ୍ଟ୍ରେଲିଆ କ୍ରିକେଟ ଦଳ ଦିନିକିଆ ବିଶ୍ୱକପ୍ ଜିତିଥିଲା। ସେତେବେଳେ ଅଷ୍ଟ୍ରେଲିୟ ଖେଳାଳି ମିଚେଲ ମାର୍ଶଙ୍କ ଟ୍ରଫି ଉପରେ ଦୁଇ ଗୋଡ ରଖିଥିବାର ଏକ ଫଟୋ ସୋସିଆଲ୍ ମିଡିଆରେ ବେଶ ଭାଇରଲ ହୋଇଥିଲା |

ଏବେ କିନ୍ତୁ ସମୟର ପରିବର୍ତନ ହୋଇଛି । ଟି-୨୦ ବିଶ୍ୱକପ୍ ୨୦୨୬ରେ ଅଷ୍ଟ୍ରେଲିଆର ଅଭିଯାନ ବର୍ଷା ଯୋଗୁଁ ଅସ୍ଥିର ହୋଇପଡ଼ିଛି। ଶ୍ରୀଲଙ୍କାର ପାଲେକେଲେ ଷ୍ଟାଡିୟମରେ ଜିମ୍ବାୱେ ଓ ଆୟରଲ୍ୟାଣ୍ଡ ମଧ୍ୟରେ ହେବାକୁଥିବା ମ୍ୟାଚ୍ ଲଗାତାର ବର୍ଷାରେ ବାତିଲ ହୋଇଯାଇଥିଲା। ଟସ୍‌ ମଧ୍ୟ ହୋଇପାରିନଥିବାରୁ ଉଭୟ ଦଳକୁ ଗୋଟିଏ କରି ପଏଣ୍ଟ ଦିଆଯାଇଥିଲା।

ଏହା ସହିତ ଜିମ୍ବାୱେ ୫ ପଏଣ୍ଟ ପାଇ ସୁପର-୮ ପାଇଁ କ୍ୱାଲିଫାଇ କରିଛି। ଅନ୍ୟପଟେ ଅଷ୍ଟ୍ରେଲିଆ ଓ ଆୟରଲ୍ୟାଣ୍ଡ ଟୁର୍ଣ୍ଣାମେଣ୍ଟରୁ ବିଦାୟ ନେଇଛନ୍ତି। ଗ୍ରୁପ୍ ରେ ଜିମ୍ବାୱେ ସହ ଦକ୍ଷିଣ ଆଫ୍ରିକା ଓ ୱେଷ୍ଟଇଣ୍ଡିଜ୍ ପରି ଶକ୍ତିଶାଳୀ ଦଳ ଅଛନ୍ତି। ଫେବ୍ରୁଆରି ୨୬ରେ ଚେନ୍ନାଇରେ ଜିମ୍ବାୱେ ତା’ର ପ୍ରଥମ ସୁପର-୮ ମ୍ୟାଚ୍ ଭାରତ ବିପକ୍ଷରେ ଖେଳିବ। କ୍ରିକେଟ୍‌ରେ ପରିଣାମ ସବୁବେଳେ ଅନିଶ୍ଚିତ। ୨୦୨୩ର ବିଜୟରୁ ୨୦୨୬ର ବିଦାୟ ପର୍ଯ୍ୟନ୍ତ ଅଷ୍ଟ୍ରେଲିଆର ଏହି ଯାତ୍ରା ଦେଖାଉଛି ଯେ ଖେଳରେ ସଫଳତା ଓ ବିଫଳତା ଦୁହିଁଟି ଅଂଶ ଅଟେ।
ମଣ୍ଡି ଅବ୍ୟବସ୍ଥାରେ ହନ୍ତସନ୍ତ ଚାଷୀ

କେନ୍ଦ୍ରାପଡାର ରାଜନଗର ବ୍ଲକରେ ମିଲରଙ୍କ ମନମାନି ନେଇ ଅଭିଯୋଗ |

କେନ୍ଦ୍ରାପଡା ଜିଲ୍ଲାର ରାଜନଗର ବ୍ଲକରେ ମଣ୍ଡି ଅବ୍ୟବସ୍ଥା ଯୋଗୁଁ ଚାଷୀମାନେ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ମିଲରମାନଙ୍କ ମନମୁଖୀ କାର୍ଯ୍ୟକଳାପ ଓ ଧାନ ଉଠାଣିରେ ବିଳମ୍ବ ହେବାରୁ ମାସ ମାସ ଧରି ମଣ୍ଡିରେ ଚାଷୀଙ୍କ ଧାନ ପଡ଼ି ରହିଛି ବୋଲି ଅଭିଯୋଗ ହୋଇଛି। ଚାଷୀମାନେ ଟୋକନ ପାଇବା ପରେ ନିଜ ମୁଣ୍ଡ ଝାଳକୁ ତୁଣ୍ଡରେ ମାରି ଚାଷ କରିଥିବା ଧାନକୁ ମଣ୍ଡିକୁ ଆଣିଥିଲେ। ନିୟମ ଅନୁସାରେ ମିଲରମାନେ ଗାଡ଼ି ପଠାଇ ଧାନ ସଂଗ୍ରହ କରିବା କଥା ହେଲେ ଟାର୍ଗେଟ୍ ନାହିଁ ବୋଲି କହି ମଣ୍ଡିକୁ ଆସୁନାହାନ୍ତି। ଫଳରେ ଚାଷୀମାନେ ଖରା, ଶୀତ ଓ କାକର ମଧ୍ୟରେ ଦିନରାତି ଧାନକୁ ଜଗି ରହିଛନ୍ତି।

ଦୀର୍ଘଦିନ ଧରି ଖୋଲା ଆକାଶ ତଳେ ପଡ଼ି ରହିବାରୁ ଅନେକ ଧାନ ଶଣ୍ଢ ଓ ମୂଷା ଖାଇ ନଷ୍ଟ କରୁଛି। କେତେକ ସ୍ଥାନରେ ଧାନ ଗଜା ହୋଇଯାଇଥିବା ମଧ୍ୟ ଦେଖାଯାଇଛି। ଚାଷୀମାନେ ଶୀଘ୍ର ଧାନ ଉଠାଣି ଓ ମଣ୍ଡି ବ୍ୟବସ୍ଥା ସୁଧାର ପାଇଁ ପ୍ରଶାସନଙ୍କ ହସ୍ତକ୍ଷେପ ଦାବି କରିଛନ୍ତି।
ବିଧାନସଭାରେ ଆଜି ଅର୍ଥନୈତିକ ସର୍ଭେ ପ୍ରସ୍ତୁତି: ଚାଷୀ ପ୍ରସଙ୍ଗରେ ଗୃହ ହୁଲସ୍ତୁଲ

ଆଜି ବିଧାନସଭାରେ ଉପସ୍ଥାପନ ହେବ ଗୁରୁତ୍ୱପୂର୍ଣ୍ଣ ଅର୍ଥନୈତିକ ସର୍ଭେ ରିପୋର୍ଟ। ଆସନ୍ତାକାଲି ରାଜ୍ୟ ବଜେଟ୍ ପ୍ରସ୍ତୁତି ପୂର୍ବରୁ ଏହି ସର୍ଭେ ରିପୋର୍ଟ ରାଜ୍ୟର ଅର୍ଥନୈତିକ ଅବସ୍ଥା, ବିକାଶ ହାର ଓ ବିଭିନ୍ନ ଖାତାର କାର୍ଯ୍ୟଦକ୍ଷତା ସମ୍ପର୍କରେ ଏକ ସମଗ୍ର ଚିତ୍ର ପ୍ରଦାନ କରିବ। ତେବେ ବଜେଟ ଅଧିବେଶନର ତୃତୀୟ ଦିନରେ ବି ବେସ୍ ସରଗରମ ରହିବ ଗୃହ। ଆଜି ବି ଚାଷୀ ପ୍ରସଙ୍ଗକୁ ନେଇ ଗୃହ ହୁଲସ୍ତୁଲ ହୋଇପାରେ। ରାଜ୍ୟରେ ଧାନ କିଣାରେ ଅବ୍ୟବସ୍ଥା, ମଣ୍ଡି ସମସ୍ୟା ଓ କଟନୀ-ଛଟନୀ ଅଭିଯୋଗକୁ ବିରୋଧୀ ଦଳ ଜୋରଦାର ଭାବେ ଉଠାଇପାରନ୍ତି।
ଯଦି ଗୃହ ସ୍ବଭାବିକ ହୁଏ ତେବେ ପ୍ରଶ୍ନକାଳରେ ଜଳ ସମ୍ପଦ, ରାଜସ୍ୱ ଓ ବିପର୍ଯ୍ୟୟ ପରିଚାଳନା, ଲୋକସମ୍ପର୍କ, ବାଣିଜ୍ୟ ଓ ପରିବହନ ବିଭାଗ ସମ୍ପର୍କିତ ପ୍ରଶ୍ନଉତ୍ତର କାର୍ଯ୍ୟକ୍ରମ ହେବ।ଉଭୟ ବିରୋଧୀ ଓ ଶାସକ ଦଳର ସଦସ୍ୟମାନେ ଗୃହରେ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଇ ପାରନ୍ତି। ଅପରାହ୍ନରେ ରାଜ୍ୟପାଳଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନା ସମୟରେ ମୁଖ୍ୟମନ୍ତ୍ରୀ ମୋହନଚରଣ ମାଝୀ ଗୃହରେ ନିଜ ବିବୃତି ରଖିବେ।
ଆଜିଠୁ ଆରମ୍ଭ ହେଉଛି ଓଡ଼ିଶାର ମାଟ୍ରିକ ପରୀକ୍ଷା: ୩୦୮୨ କେନ୍ଦ୍ରରେ କଢ଼ା ସୁରକ୍ଷା ବ୍ୟବସ୍ଥା

ଆଜିଠୁ ଆରମ୍ଭ ହେଉଛି ଓଡ଼ିଶାର ମାଟ୍ରିକ ପରୀକ୍ଷା। BOARD OF SECONDARY EDUCATION ODISHA ଅଧୀନରେ ଆୟୋଜିତ ହେଉଥିବା ଏହି ପରୀକ୍ଷା ଛାତ୍ରଜୀବନର ସବୁଠୁ ଗୁରୁତ୍ୱପୂର୍ଣ୍ଣ ମାଇଲସ୍ଟୋନ୍‌ ଭାବେ ପରିଗଣିତ। ପରୀକ୍ଷାକୁ ସ୍ୱଚ୍ଛ, ଶୃଙ୍ଖଳିତ ଓ ତ୍ରୁଟିଶୂନ୍ୟ ଭାବେ ସମାପ୍ତ କରିବା ବୋର୍ଡ କର୍ତ୍ତୃପକ୍ଷ ଓ School and Mass Education Department Odisha ପାଇଁ ଏକ ବଡ ଆହ୍ୱାନ। ଚଳିତ ବର୍ଷ ରାଜ୍ୟର ୫ଲକ୍ଷ ୬୧ ହଜାର ୯୭୯ ଛାତ୍ରଛାତ୍ରୀ ପରୀକ୍ଷା ଦେବେ । ୩୦୮୨ କେନ୍ଦ୍ରରେ ହେବ ପରୀକ୍ଷା। ପରୀକ୍ଷାକୁ ଶୃଙ୍ଖଳିତ ଭାବେ ସାରିବା ବଡ ଆହ୍ବାନ ହୋଇଥିବାରୁ ସରକାରଙ୍କ ପକ୍ଷରୁ ଏଥର ସ୍ବତନ୍ତ୍ର ବ୍ୟବସ୍ଥା କରଯାଇଛି ।
ନୋଡ଼ାଲ ସେଣ୍ଟର ସହ ପରୀକ୍ଷା କେନ୍ଦ୍ରଗୁଡ଼ିକ ସିସିଟିଭି ସର୍ଭେଲାନ୍ସରେ ରଖାଯାଇଛି । କଣ୍ଟ୍ରୋଲ୍ ରୁମ୍‌ରୁ ସ୍ବତନ୍ତ୍ର ଭାବେ ମନିଟରିଂ କରାଯିବ । ୧୩୬୪ କେନ୍ଦ୍ରରୁ ଲାଇଭ୍ ଷ୍ଟ୍ରିମିଂ ବ୍ୟବସ୍ଥା ମଧ୍ୟ କରାଯାଇଛି । ପ୍ରଶ୍ନପତ୍ର ହବ୍ ଗୁଡିକ ଏଆଇ କ୍ୟାମେରା ନଜରରେ ରଖାଯାଇଛି। ସବୁ କେନ୍ଦ୍ରକୁ ଜଗିଛି ପୋଲିସ। ସେହିପରି ପରୀକ୍ଷାରେ କପି ରୋକିବା ପାଇଁ ତ୍ରିସ୍ତରୀୟ ସ୍କ୍ୱାଡ୍ ବ୍ୟବସ୍ଥା କରାଯାଇଛି।
JEE Main ରେ ଯାଜପୁର ରୋଡ Aakash Institute ର ସଫଳତା

ଚଳିତ ବର୍ଷ JEE Main ପରୀକ୍ଷାରେ ଯାଜପୁର ରୋଡ ଅବସ୍ଥିତ Aakash Institute ଛାତ୍ରଛାତ୍ରୀମାନେ ସଫଳତା ଅର୍ଜନ କରିଛନ୍ତି।

ଦ୍ୱିତୀୟ ବର୍ଷରେ ପ୍ରବେଶ କରିଥିବା ଏହି ସଂସ୍ଥାରୁ ତିନିଜଣ ଛାତ୍ରଛାତ୍ରୀ 90 ଶତକଡାରୁ ଅଧିକ ନମ୍ବର ପାଇ ସଂସ୍ଥାର ଗୌରବ ବଢ଼ାଇଛନ୍ତି। ଯାଜପୁର ରୋଡ ଶାଖାର ମୁଖ୍ୟପରିଚାଳକ ଅସିତ ବରଣ ଏହି ସୂଚନା ଦେଇଛନ୍ତି।

ଚଳିତ ବର୍ଷର ଫଳାଫଳରେ ତେଜସ୍ୱନୀ ବେହେରା 98.99%, ସାଂସ୍କୃତି ଭାଇରଗେଡ଼ 90.77% ଏବଂ ସନ୍ଦୀପ ସୌରଭ 90.63% ନମ୍ବର ରଖି ସଫଳ ହୋଇଛନ୍ତି। ଏହି ଅବସରରେ ସଂସ୍ଥା ପକ୍ଷରୁ ସେମାନଙ୍କୁ ସମ୍ବର୍ଦ୍ଧନା ଜଣାଇ ମିଠା ବଣ୍ଟନ କରାଯାଇଥିଲା।

୩୭ ବର୍ଷର ପୁରାତନ ଏହି ଶିକ୍ଷାନୁଷ୍ଠାନ ସର୍ବଭାରତୀୟ ସ୍ତରରେ ପ୍ରାୟ ୪୦୦ଟି ଶାଖା ସହ କାର୍ଯ୍ୟରତ। ରାଜ୍ୟରେ ୨୨ ବର୍ଷ ଧରି ଶିକ୍ଷାଦାନ କରି ଏହା ଅନେକ ସଫଳତା ହାସଲ କରିଛି ବୋଲି ଡାଇରେକ୍ଟର ତାପସ ନନ୍ଦ କହିଛନ୍ତି। ଅଧ୍ୟାପିକା ନିତୁ ଜେନ ସହିତ ସମସ୍ତ କର୍ମଚାରୀଙ୍କ ସହଯୋଗରେ ଏହି ସଫଳତା ସମ୍ଭବ ହୋଇଥିବା ସଂସ୍ଥା ପକ୍ଷରୁ କୁହାଯାଇଛି।

ଚଳିତ ଶିକ୍ଷାବର୍ଷରେ ପ୍ରାୟ ୫୦୦ ଜଣ ଛାତ୍ରଛାତ୍ରୀଙ୍କ ଭର୍ତ୍ତି ପାଇଁ ପ୍ରୟାସ ଚାଲିଥିବା ସୂଚନା ମିଳିଛି।