ହତ୍ୟା ନା ଆତ୍ମହତ୍ୟା, ଲିଭିଗଲା ନବବଧୂର ସିନ୍ଦୁର

ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଲକ ଅନ୍ତର୍ଗତ ତରଜଙ୍ଗା ପଞ୍ଚାୟତ ବାଲିପାଟଣା ଗ୍ରାମରେ ଶୋକର ଛାୟା। ବାହାଘରର ମାସ ୪ଟା ଯାଇନି, ମରଣକୁ ବରଣ କରିନେଇଛି ନବବିବାହିତା। ପେଟରେ ପୁଣି ସେମାନଙ୍କ ପ୍ରେମର ସନ୍ତକ। ନବବିବାହିତାଙ୍କ ଏପରି ଚରମ ପଦକ୍ଷେପ ଶାଶୁଘର ସହ ବାପ ଘରକୁ ମର୍ମାହତ କରି ଦେଇଛି। ସୂଚନା ମୁତାବକ, ଶୁକ୍ରବାର ସକାଳୁ ସବୁ ଦିନ ପରି ନବବିବାହିତା ବୋହୂଟି ଉଠି ପଡିଶା ଘର ଯାଆଙ୍କ ସହ ସକାଳ ପାଇଟି ସାରିଥିଲେ। ଶ୍ବଶୁର ବଜାର ଆଡେ ଗଲେ। ପ୍ରାୟ ଦିନ ୯ଟାରେ ଆସି ଦେଖନ୍ତି ବୋହୂ ମୃତ୍ୟୁକୁ ଆପଣେଇ ନେଇଛି। ବୋହୂର ଏପରି କାର୍ଯ୍ୟରେ ଭାଙ୍ଗି ପଡିଛନ୍ତି ଶ୍ବଶୁର ଅକ୍ଷୟ ସ୍ବାଇଁ।

ସେପଟେ ଝିଅର ମୃତ୍ୟୁ ଖବର ପାଇଁ ବାଲିପାଟଣା ଗାଁରେ ପହଞ୍ଚି ଝିଅର ପରିବାର ଲୋକେ ଆଣୁଛନ୍ତି ହତ୍ୟା ଅଭିଯୋଗ। ବିବାହ ପରେ ଝିଅକୁ ୨ ଲକ୍ଷ ଟଙ୍କା, ଏଲଇଡି ଟିଭି ପାଇଁ ଜ୍ବାଇଁ ମାରଧର କରୁଥିବା ଅଭିଯୋଗ ଆଣିବା ସହ ଝିଅକୁ ତାଙ୍କର ଭଲରେ ଗଣ୍ଡେ ଖାଇବାକୁ ଦେଉନଥିବା ଅଭିଯୋଗ କରିଛନ୍ତି ଝିଅର ଖୁଡି ଓ ମାଇଁ

ପରିବାର ତରଫରୁ ତିର୍ତ୍ତୋଲ ଥାନାରେ ବଧୂ ନିର୍ଯାତନା ଓ ହତ୍ୟା ଅଭିଯୋଗ ଦିଆଯାଇଛି। ପୋଲିସ ଘଟଣାର ତଦନ୍ତ କରୁଛି। ସୂଚନା ଯୋଗ୍ୟ କି, ରାହାମା ଭୁତୁମୁଣ୍ଡାଇ ଅଞ୍ଚଳର ବାବାଜୀ ମହାନ୍ତିଙ୍କ ଝିଅ ମୋନାଲିସା ମହାନ୍ତି ଗତ ମାର୍ଚ୍ଚ ୧୧ ତାରିଖରେ ତିର୍ତ୍ତୋଲ ବାଲିପାଟଣା ଅଞ୍ଚଳର କୈଳାସ ଚନ୍ଦ୍ର ସ୍ବାଇଁ ଙ୍କ ପୁଅ ଅକ୍ଷୟ ସ୍ବାଇଁ ଙ୍କୁ ବୈଦିକ ରିତିରେ ବିବାହ କରିଥିଲେ।