ଆମେରିକା ମେକ୍ସିକୋରେ ବଡ଼ ଧରଣର ସଡ଼କ ଦୁର୍ଘଟଣା । ଘାଟିରୁ ଭାରମାସ୍ୟ ହରାଇ ଏକ ଯାତ୍ରୀବାହୀ ବସ୍ ଖାଇକୁ ଖସିପଡ଼ିଛି । ମେକ୍ସିକୋ ସିଟିରୁ ସାଣ୍ଟିଆଗୋ ଡି ୟୋସୋଣ୍ଡୁଆ ନଗରୀ ଅଭିମୁଖେ ଯାଉଥିବା ବେଳେ ଦୁର୍ଘଟଣା ଘଟିଛି ।
ମେକ୍ସିକୋ ଉହାକା ପାହାଡ଼ି ରାସ୍ତାରେ ଯାତ୍ରୀବାହୀ ବସ୍ ଦୁର୍ଘଟଣା ଘଟି ୨୭ ଜଣଙ୍କ ମୃତ୍ୟୁ ହୋଇଛି । ଘଟଣାରେ ୧୭ ଜଣ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ୧୦ ଜଣ ଗୁରୁତର ଅଛନ୍ତି । ଘଟଣାସ୍ଥଳରେ ଉଦ୍ଧାରକାରୀ ଟିମ୍ ପହଞ୍ଚି ସେମାନଙ୍କୁ ମେଡିକାଲ ନେଇଥିଲେ । ତେବେ ମୃତ୍ୟୁ ସଂଖ୍ୟା ବଢ଼ିବା ନେଇ ଆଶଙ୍କା ରହିଛି । ମୃତକଙ୍କ ମଧ୍ୟରେ ୧୩ ଜଣ ପୁରୁଷ ଥିବାବେଳେ ୧୩ ଜଣ ମହିଳା ଏବଂ ଜଣେ ଶିଶୁ ଅଛନ୍ତି ।
ସେପଟେ ସୂଚନା ଅନୁସାରେ, ଘଟଣାସ୍ଥଳରୁ ଯେଉଁ ଫଟୋ ମିଳିଛି ସେଥିରେ ବସଟି ଭାଙ୍ଗିରୁଜି ଚେପା ହୋଇଯାଇଛି । ବସ୍ଟି ପାହାଡ଼ ତଳେ କଡ଼େଇ ହୋଇ ପଡ଼ିଥିବା ବେଳେ ଉଦ୍ଧାରକାରୀମାନେ ଉଦ୍ଧାର ଅଭିଯାନ ଚଳାଇଥିଲେ । ଖାଇରେ ପଡ଼ିଥିବା ବସଟିକୁ କ୍ରେନ୍ ସାହାଯ୍ୟରେ ବସଟିକୁ ଉଠାଯାଇଥିଲା । ବସଟି ପାହାଡ଼ିଆ ଉଚ୍ଚା ରାସ୍ତାରେ ଯାଉଥିବା ବେଳେ ଭାରସାମ୍ୟ ହରାଇ ଖାଇକୁ ଖସିପଡ଼ିଥିଲା । ଯାନ୍ତ୍ରିକ ତ୍ରୁଟି ଯୋଗୁଁ ଦୁର୍ଘଟଣା ଘଟିଛି ବୋଲି କେହି କେହି ସନ୍ଦେହ କରୁଥିବା ବେଳେ ଦୁର୍ଘଟଣାର ପ୍ରକୃତ କାରଣ ଜାଣିବା ଲାଗି ତଦନ୍ତ ଜାରି ରହିଛି ।
