ମୟୂରଭଞ୍ଜ ଯାମଦା ବ୍ଲକରେ ଜଣେ ଜେଇଙ୍କ ବିରୋଧରେ ଦୁର୍ନୀତି ଅଭିଯୋଗ । ତାରଣା ପଞ୍ଚାୟତରେ ଥିବା ମାନବୀର ଗାଁ ଲୋକେ ଜେଇ ଅନିଲ ମହାପାତ୍ରଙ୍କ ବିରୋଧରେ ଏଭଳି ଅଭିଯୋଗ ଆଣିଛନ୍ତି ।
ମାନବୀର ଗାଁରେ ବିଭିନ୍ନ କାମରେ ଅର୍ଥ ହେରଫେର ସହ ଦୁର୍ନୀତି ହେଉଛି । ମାନବୀର ଗାଁରେ ଥିବା ଜାହିରା ବନ୍ଧ ପୁନରୁଦ୍ଧାର କାର୍ଯ୍ୟ ୨୦୧୯ ମସିହା ମାର୍ଚ୍ଚ ୨୮ ତାରିଖରେ ସମ୍ପୂର୍ଣ୍ଣ ହୋଇଥିବା ଦର୍ଶାଯାଇଥିଲା । ପୋଖରୀ ହିଡ଼ ଉପରେ କମ୍ ଖର୍ଚ୍ଚରେ ଆବଶ୍ୟକ ସୁଇଚ୍ ନିର୍ମାଣ କରିବା ବଦଳରେ ୨୦୨୦-୨୧ରେ ଜେଇ ଅନିଲ ମହାପାତ୍ର ଚେକ୍ ଡ୍ୟାମ ନିର୍ମାଣ କରିଥିଲେ । ତେଣୁ ସେ ସନ୍ଦେହ ଘେରକୁ ଆସିଥିଲେ ।
ମାନବୀର ଜାହିରା ନାଳ ଉପରେ ଚେକ୍ ଡ୍ୟାମ୍ ହେବାର ଥିଲା କିନ୍ତୁ ଏହା ନକରି ଜାହିରା ବନ୍ଧ ହିଡ଼ରେ ନିର୍ମିତ ହୋଇଥିଲା ଚେକ୍ ଡ୍ୟାମ୍ । ଏହି ଅର୍ଥକୁ ସେ ହେରଫେର କରିନେଇଥିବା ଅଭିଯୋଗ ହୋଇଛି । ଏନେଇ ପୂର୍ବତନ ଯାମଦା ବ୍ଲକ୍ ଅଧ୍ୟକ୍ଷା ହେଲେନା ବାଗେ ଓ ତାରଣା ପଞ୍ଚାୟତର ନାଏବ ସରପଞ୍ଚ ଜାମ୍ବିରା ବାଗେ ସୁଇଚ୍ ନର୍ମାଣ ଟଙ୍କା ଗଲା କୁଆଡ଼େ ବୋଲି ପ୍ରଶ୍ନ କରିଛନ୍ତି । ଜିଲ୍ଲାପାଳଙ୍କ ନିକଟରେ ଅଭିଯୋଗ ଆଣିଛନ୍ତି ନେତା ଓ ଗାଁ ଲୋକେ । ଘଟଣାର ତଦନ୍ତ କରିବା ସହ ତୁରନ୍ତ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ସେମାନେ ଦାବି କରିଛନ୍ତି । ..
