ଆଜିକାଲି ଚୋରି, ଡକାୟତି, ଲୁଟ୍ ଅବା ହତ୍ୟା ଘଟଣା ସାଧାରଣ ହୋଇଗଲାଣି । ଏଥିରେ ରୋକ୍ ଲାଗିବା କଷ୍ଟକର ହେଉଛି । ଲୋକେ ନିଜକୁ ସୁରକ୍ଷିତ ମଣୁନାହାଁନ୍ତି । ଦିନ ହେଉ ଅବା ରାତି, ଖରା ହେଉ ଅବା ବର୍ଷା ଅପରାଧିକ କାର୍ଯ୍ୟକଳାପ ଘଟିଚାଲିଛି । କେତେବେଳେ ଅପରାଧୀ ଧରାପଡୁଛି ତ ଆଉ କେତେବେଳେ ଚମ୍ପଟ ମାରିବାରେ ସକ୍ଷମ ହେଉଛି । ମୟୂରଭଞ୍ଜ ଜିଲ୍ଲା ଜାମଦା ଥାନା ଲକ୍ଷ୍ମୀପୋଷୀ ଅଞ୍ଚଳରେ ଏଭଳି ଘଟଣା ଏବେ ଲୋକଙ୍କ ପାଇଁ ଟେନସନର କାରଣ ହୋଇଛି ।
ଲକ୍ଷ୍ମୀପୋଷୀ ଖେଳ ପଡ଼ିଆ ରାସ୍ତାରେ ଏବେ ଦୁର୍ବୃତ୍ତଙ୍କ ଆଡ୍ଡା ଜମିଛି । ସେମାନଙ୍କ ପାଇଁ ରାସ୍ତାରେ ଲୋକେ ଯାଆସ କରିବା ମୁସ୍କିଲ ହେଲାଣି । ଲୁଚିରହି ଲୋକଙ୍କୁ ମାରଣାସ୍ତ୍ର ଦେଖାଉଛନ୍ତି । କେତେବେଳେ ବନ୍ଧୁକ ତ ଆଉ କେତେବେଳେ ଖଣ୍ଡା ଦେଖାଇ ସର୍ବସ୍ୱ ଲୁଟି ନେଉଛନ୍ତି । ହତ୍ୟା ଧମକ ଦେଇ ଜିନିଷପତ୍ର ଏବଂ ଟଙ୍କା, ସୁନା ଅଳଙ୍କାର ଲୁଟି ନେଉଛନ୍ତି । ହାଟ ବସୁଥିବା ଦିନରେ ଅଧିକ ଲୁଟ୍ ହେଉଥିବା ଅଭିଯୋଗ ହୋଇଛି । ଘଟଣା ସମ୍ପର୍କରେ ଥାନା ଅଧିକାରୀଙ୍କୁ ବାରମ୍ବାର ଅବଗତ କରାଯାଇଛି ମାତ୍ର କୌଣସି ପଦକ୍ଷେପ ନେଉନଥିବାରୁ ଲୋକଙ୍କ ଅସନ୍ତୋଷ ବଢ଼ିବାରେ ଲାଗିଛି ।
ଲୁଟେରାଙ୍କ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି ସାଧରଣ ଜନତା । ଏବେ ଲୁଟେରା, ଚୋର, ଡକାୟତଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଉପରିସ୍ଥ ଅଧିକାରୀଙ୍କୁ ଅନୁରୋଧ କରିଛନ୍ତି ଗାଁ ଲୋକେ । ପୋଲିସ ପାଟ୍ରୋଲିଂକୁ ଜୋରଦାର କରିବାକୁ ମଧ୍ୟ ସ୍ଥାନୀୟ ଲୋକେ ଦାବି କରିଛନ୍ତି ।