ମୟୂରଭଞ୍ଜ ଜିଲ୍ଲା ଯାମଦା ବ୍ଲକ୍ ତାରଣା ପଞ୍ଚାୟତରେ ରାସ୍ତା କାମରେ ବ୍ୟାପକ ଦୁର୍ନୀତି ଅଭିଯୋଗ । ମାନବୀର ପାପାରି ସାହି ଠାରୁ ତାଲା ସାହିକୁ ଗ୍ରେଡ୍-୧ ମେଟାଲ ବିଛାଇବା ପାଇଁ ୪ ଲକ୍ଷ ଟଙ୍କା ମଞ୍ଜୁର ହୋଇଥିଲା । ତେବେ କିଛି ମେଣ୍ଟାଲ ଅଣାଯାଇଥିବା ବେଳେ ତାହା ପଡ଼ି ରହିଛି କିନ୍ତୁ କୌଣସି କାମ ଆରମ୍ଭ ହୋଇନି । ସଂଯୋଜକ ମୌଡସିଂ ନାଏକ ଓ କନିଷ୍ଠ ଯନ୍ତ୍ରୀ ଅନିଲ ମହାପାତ୍ରଙ୍କ ନାଁରେ ଅର୍ଥ ହଡ଼ପ ଅଭିଯୋଗ କରିଛନ୍ତି ଗାଁ ଲୋକେ ।
କୁଦାହାଁସା ଗାଁର ୧୦ ଜଣ,ବଡ଼ସିହାରୁ ୧୬ ଜଣ ଏବଂ ପାହାଡ଼ପୁରରୁ ୨ ଜଣ,ଦିଘିଆବେଡ଼ାରୁ ୧୮ ଜଣ ଓ ମାନବୀର ଗାଁର ୨୨ ଜଣ ନକଲି ଶ୍ରମିକଙ୍କ ନାଁରେ ଟଙ୍କା ଉଠାଯାଇଛି । ୨୦୨୧ ନଭେମ୍ବର ଓ ଡିସେମ୍ବର ମାସରେ ୧ ଲକ୍ଷ ୭୧ ହଜାର ୧୪୦ ଟଙ୍କା ହଡ଼ପ କରାଯାଇଥିବା ଗାଁ ଲୋକେ ଅଭିଯୋଗ କରିଛନ୍ତି ।
ସରପଞ୍ଚ ମାଦୁରୀ ହେମ୍ବ୍ରମଙ୍କ ସହାୟତାରେ ୨୦୨୨ ସେପ୍ଟେମ୍ବରରେ ନାଏବ ସରପଞ୍ଚ ଜାମ୍ବିରା ବାଗେ, ସମିତି ସଭ୍ୟ ଡିକୁଲ ବାଗେ, ୱାର୍ଡ ସଭ୍ୟ ବୁଧିଆ ବାଗେ, ଅଙ୍ଗନବାଡି କର୍ମୀ ଜୁଣ୍ଟା ନାଏକ, ଆଶା କର୍ମୀ ସୁମିତ୍ରା ବିରୁଆ ଓ ଗାଁ ଲୋକେ ଲିଖିତ ଅଭିଯୋଗ କରିଥିଲେ । ବିଡିଓଙ୍କ ନିକଟରେ ଅଭିଯୋଗ ହୋଇଥିଲେ ସୁଦ୍ଧା ଏଯାଏ କୌଣସି ପଦକ୍ଷେପ ନିଆଯାଇନି । ଏପରିକି ଜେଇ ଅନିଲ ମହାପାତ୍ରଙ୍କୁ ଅନ୍ୟତ୍ର ବଦଳି କରି ଏକପ୍ରକାର ନିରବଦ୍ରଷ୍ଟା ସାଜିଛନ୍ତି ବିଡିଓ ।
ପାପାରି ସାହି ଠାରୁ ତାଲାସାହି ଗ୍ରେଡ-୧ ମେଟାଲ କାର୍ଯ୍ୟ ଆରମ୍ଭ କରିବା ପାଇଁ ଜିଲ୍ଲାପାଳଙ୍କ ଜନଶୁଣାଣିରେ ଦାବି ଉପସ୍ଥାପନ କରାଯାଇଛି । ଖୁବଶୀଘ୍ର ଘଟଣାର ତଦନ୍ତ ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ନାଏବ ସରପଞ୍ଚ ଜାମ୍ବିରା ବାଗେ ଦାବି ଉପସ୍ଥାପନ କରିଛନ୍ତି ।