ଦିଲ୍ଲୀ ଶ୍ରଦ୍ଧା ୱାଲକର କେସ୍ ପରି ବିଭତ୍ସ ହତ୍ୟାକାଣ୍ଡ ପୁଣି ଦେଖିବାକୁ ମିଳିଛି ହାଇଦ୍ରାବାଦରେ। ଧାର ଟଙ୍କାକୁ ନେଇ ନିଜ ପ୍ରେମିକାକୁ ହତ୍ୟାକରିବା ପରେ ପଥର କଟା ମେସିନରେ ମୃତଦେହକୁ ଖଣ୍ଡ ଖଣ୍ଡ କରି କାଟିବା ପରେ ଡମ୍ପିଂୟାର୍ଡରେ ପକାଇବାକୁ ଉଦ୍ୟମ କରୁଥିବା ବେଳେ ଧରାପଡିଛି। ପୋଲିସ ଉକ୍ତ ଆଭିଯୁକ୍ତ ପ୍ରେମିକକୁ ଧରି ପଚରା ଉଚରା କରିବା ବେଳେ ସମସ୍ତ କଥା ପଦାକୁ ଆସିଛି। ଘଟଣାରେ ମୃତ୍ୟୁବରଣ କରିଥିବା ପ୍ରେମିକା ଜଣେ ୫୫ ବର୍ଷୀୟା ମହିଳା ହୋଇଥିବା ବେଳେ ହତ୍ୟାକାରୀ ପ୍ରେମିକ ୪୮ ବର୍ଷୀୟ ଚନ୍ଦ୍ରମୋହନ।
ସୂଚନା ମୁତାବକ, ୫୫ ବର୍ଷୀୟା ୟେରମ ଅନୁରାଧା ରେଡ୍ଡି ଦୀର୍ଘ ବର୍ଷରୁ ନିଜ ସ୍ୱାମୀଙ୍କଠାରୁ ଅଲଗା ରହୁଥିଲେ। ଅନୁରାଧା ରହୁଥିବା ଘରର ତଳ ମହଲାରେ ଅଭିଯୁକ୍ତ ପ୍ରେମିକ ଚନ୍ଦ୍ରମୋହନର ପରିବାର ରହୁଥିଲେ। ଅନୁରାଧା ନିସଙ୍ଗ ଜୀବନ ଅତିବାହିତ କରୁଥିବା ବେଳେ ତାଙ୍କଠାରୁ ୭ ବର୍ଷ ଛୋଟ ଚନ୍ଦ୍ରମୋହନ ସହ ପରିଚୟ ହୋଇଥିଲା। ଧୀରେ ଧୀରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢିଉଠିଥିଲା।
ଅନୁରାଧା ଓ ଚନ୍ଦ୍ରମୋହନ ପରସ୍ପରର ସୁଖ ଦୁଃଖରେ ପରସ୍ପର ପାଖରେ ଠିଆ ହେଉଥିଲେ। ୨୦୧୮ ମସିହାରେ ଚନ୍ଦ୍ରମୋହନକୁ ଅର୍ଥର ଆବଶ୍ୟକତା ପଡିଥିଲା ଓ ଅନୁରାଧାଙ୍କଠାରୁ ୭ ଲକ୍ଷ ଟଙ୍କା ଧାର ନେଇଥିଲା। ଏହା ଭିତରେ ୫ ବର୍ଷ ବିତିଯାଇଥିଲେ ମଧ୍ୟ ଚନ୍ଦ୍ରମୋହନ ସେହି ଧାର ଟଙ୍କା ଫେରାଇବା ନାଁ ଧରୁ ନ ଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ସମ୍ପର୍କ ଧୀରେ ଧୀରେ ତିକ୍ତ ହେବାକୁ ଲାଗିଲା।
ଗତ ୧୨ ତାରିଖରେ ଅନୁରାଧା ଟଙ୍କା ମାଗିବାରୁ ଉଭୟଙ୍କ ମଧ୍ୟରେ ଝଗଡା ହୋଇଥିଲା ଓ ଏହା ଭୟଙ୍କର ରୂପ ନେଇଥିଲା। ଏଥିରେ ଉତ୍ତ୍ୟକ୍ତ ହୋଇ ଚନ୍ଦ୍ରମୋହନ ଏକ ଛୁରୀରେ ଅନୁରାଧାଙ୍କୁ ଆକ୍ରମଣ କରିଥିଲେ। ଫଳରେ ଘଟଣାସ୍ଥଳରେ ଅନୁରାଧାଙ୍କର ମୃତ୍ୟୁ ହୋଇ ଯାଇଥିଲା। ଏହା ପରେ ଚନ୍ଦ୍ରମୋହନଙ୍କୁ ମୃତଦେହ ଠିକଣା ଲଗାଇବା ଚିନ୍ତା ଘାରିଥିଲା। ମୃତଦେହକୁ କେଉଁଠି ପକେଇଲେ ପୋଲିସ ତାଙ୍କୁ ପାଇବ, ତେଣୁ ତାଙ୍କ ମୁଣ୍ଡକୁ ଏକ ବୁଦ୍ଧି ଆସିଥିଲା। ସେ ମୃତଦେହକୁ ଯେମିତି ଚିହ୍ନଟ କରାଯାଇ ପାରିବ ନାହିଁ ସେଥିପାଇଁ ଯୋଜନା କଲେ।
ତେଣୁ ଚନ୍ଦ୍ରମୋହନ ଏକ ପଥର କଟା ମେଶିନ ଆଣିଲେ। ମେସିନରେ ଅନୁରାଧାଙ୍କ ଶରୀରକୁ ଖଣ୍ଡ ଖଣ୍ଡ କରିଦେଲେ। ମୁଣ୍ଡଟିରୁ ଯେମିତି ଅନୁରାଧାଙ୍କ ପରିଚୟ ନ ମିଳେ ସେଥିଲାଗି ଚନ୍ଦ୍ରମୋହନ ମୁଣ୍ଡକୁ ମଧ୍ୟ ଗୁଣ୍ଡ କରିଦେଇଥିଲେ ଓ ଖଣ୍ଡ ବିଖଣ୍ଡିତ ଅଂଶକୁ ସବୁ ଛୋଟ ଛୋଟ ଜରିରେ ଭର୍ତ୍ତି କରି ବଡ଼ ଫ୍ରିଜରେ ଭର୍ତ୍ତି କରି ରଖିଲେ।
ମୃତଦେହ ବେଶି ଦିନ ରହିଲେ ଦୁର୍ଗନ୍ଧ ହେବା ସମ୍ଭାବନାକୁ ଦେଖି ସେ ସବୁ ବେଳେ ଘରେ ରୁମ ଫ୍ରେସନର ଓ ଧୂପକାଠି ଲଗାଉଥିଲେ। କିଛି ଦିନ ପରେ ଚନ୍ଦ୍ରମୋହନ ସେସବୁ ଜରିକୁ ଧୀରେ ଧୀରେ ନେଇ ଡମ୍ପିଂୟାର୍ଡରେ ଫୋପାଡ଼ି ଦେଇଥିଲେ। କିନ୍ତୁ ଡମ୍ପିଂୟାର୍ଡରୁ ପ୍ରବଳ ଗନ୍ଧ ବାହାରିବା ପରେ ସେଠାରେ ନିୟୋଜିତ ସଫେଇ କର୍ମଚାରୀ ଯାଞ୍ଚ କରିବାରୁ ଏକାଧିକ ଜରିରେ ନଷ୍ଟ ହୋଇଯାଇଥିବା ମଣିଷ ଶରୀରର ଖଣ୍ଡବିଖଣ୍ଡିତ ଅଂଶ ପାଇଥିଲେ।
ଏହା ପରେ ପୋଲିସକୁ ଖବର ଦିଆଯାଇଥିଲା। ପୋଲିସ ତଦନ୍ତ କରି ଶେଷରେ ପହଞ୍ଚିଥିଲା ଚନ୍ଦ୍ରମୋହନ ନିକଟରେ। ପୋଲିସ ଚନ୍ଦ୍ରମୋହନକୁ ପଚରାଉଚରା ପରେ ସବୁ ତଥ୍ୟ ଜାଣିବା ପରେ ତାଙ୍କୁ ଗିରଫ କରିଛି।