ଦିଲ୍ଲୀର ଶାସକ ଆମ୍ ଆଦମୀ ପାର୍ଟି ରବିବାର ଦିନ ଐତିହାସିକ ରାମଲିଳା ମୈଦାନରେ ଏକ ବିଶାଳ ଜନ ସମାବେଶ ଆରମ୍ଭ କରି କେନ୍ଦ୍ର ସରକାରଙ୍କ ବିରୋଧରେ ଏକ ମୋର୍ଚ୍ଚା ଖୋଲିଛି । ଏହି ସମୟରେ ଆପ୍ ବିଜେପିକୁ କୌରବଙ୍କ ସହ ତୁଳନା କରି କହିଛି ଯେ, ଆଜିର ଭାରତରେ ମହାଭାରତର ପୁନରାବୃତ୍ତି ହେଉଛି ।
ପାର୍ଟିର ବିଧାୟକ ସୌରଭ ଭରଦ୍ୱାଜ ଏହି ସମାବେଶକୁ ସମ୍ବୋଧିତ କରିବା ବେଳେ କହିଛନ୍ତି, କୌରବ ମାନେ ହସ୍ତିନାପୁରର ଅଧିକାର ଯେଉଁ ପାଣ୍ଡଙ୍କୁ ମିଳିଥିଲା ତାକୁ ଛନ୍ଦ କପଟ କରି କୌରବ ମାନେ ଛଡାଇ ନେବା ସହିତ ପାଣ୍ଡବଙ୍କୁ ୧୨ ବର୍ଷର ବନବାସ ଆଉ ଏକ ବର୍ଷ ଅଜ୍ଞାତବାସକୁ ପଠାଇ ଦେଇଥିଲେ । ଆଜିର ଭାରତରେ ମହାଭାରତର ପୁନରାବୃତ୍ତି କରାଯାଉଛି । ମୋଦୀ ସରକାର ଛଳନା କରି ମନୀଷ ସିସୋଦିଆ ଏବଂ ସତ୍ୟେନ୍ଦ୍ର ଜୈନଙ୍କୁ ଜେଲକୁ ପଠାଇ ଦେଇଛି । ସୁପ୍ରିମକୋର୍ଟର ନିଷ୍ପତ୍ତିକୁ କଳା ଅଧ୍ୟାଦେଶରେ ବଦଳାଇ ଦିଲ୍ଲୀର ଅଧିକାର ଛଡ଼ାଇ ନିଆଗଲା ବୋଲି ସୌରଭ କହିଛନ୍ତି ।
ଏହାପୂର୍ବରୁ ରାଜ୍ୟସଭା ସାଂସଦ କପିଲ ସିବଲ ଦିଲ୍ଲୀର ରାମଲିଳା ମୈଦାନରେ ଆମ୍ ଆଦମୀ ପାର୍ଟିର ରାଲିରେ ସାମିଲ ହୋଇଥିଲେ । ଏହି ଅବସରରେ ସେ କହିଛନ୍ତି ଯେ, ଦେଶର ଲୋକମାନେ ଆଉ କେନ୍ଦ୍ର ସରକାରଙ୍କୁ ପସନ୍ଦ କରନ୍ତି ନାହିଁ । ଜନସାଧାରଣ ବର୍ତ୍ତମାନ ଏକଛତ୍ରବାଦୀ ଶାସନ ବିରୋଧରେ ଠିଆ ହୋଇଛନ୍ତି । ବିରୋଧୀ ଦଳ ଗୁଡିକ କେନ୍ଦ୍ର ସରକାରଙ୍କ ନୀତି ବିରୋଧରେ ଏକଜୁଟ ହେବା ଆବଶ୍ୟକ ।