ନାବାଳିକା ଯୌନ ନିର୍ଯାତନା ଅଭିଯୋଗ ମାମଲାରେ ବଳିଷ୍ଠ ପ୍ରମାଣ ନାହିଁ । ତେଣୁ WFI ମୁଖ୍ୟ ବ୍ରିଜ୍ଭୂଷଣ ଶରଣ ସିଂହଙ୍କ ନାଁରେ ଲାଗୁ ‘ପୋକ୍ସୋ’ ମାମଲାକୁ ଖାରଜ କରିବା ଲାଗି ଦିଲ୍ଲୀ ପୋଲିସ ପକ୍ଷରୁ ରିପୋର୍ଟ ଦାଖଲ କରାଯାଇଛି । ପଟିଆଲା ହାଉସ୍ କୋର୍ଟରେ ୫୦୦ ପୃଷ୍ଠା ବିଶିଷ୍ଟ ରିପୋର୍ଟ ଦାଖଲ କରିଛନ୍ତି ଦିଲ୍ଲୀ ପୋଲିସ ଅଧିକାରୀ । ଏହି ମାମଲାର ପରବର୍ତ୍ତୀ ଶୁଣାଣି ଜୁଲାଇ ୪ ତାରିଖରେ କରାଯିବା ଲାଗି ଦିନ ଧାର୍ଯ୍ୟ କରିଛନ୍ତି କୋର୍ଟ ।
ଏଥିସହ ବ୍ରିଜ୍ଭୂଷଣ ଶରଣ ସିଂହଙ୍କ ନାଁରେ ମହିଳା କୁସ୍ତିଯୋଦ୍ଧାମାନେ ଫାଇଲ୍ କରିଥିବା ଯୌନ ନିର୍ଯାତନା ମାମଲାରେ ୧୦୦୦ ପୃଷ୍ଠା ସମ୍ବଳିତ ଚାର୍ଜସିଟ୍ ଦାଖଲ କରିଛି ଦିଲ୍ଲୀ ପୋଲିସ । ସୂଚନା ଅନୁସାରେ ବ୍ରିଜ୍ଭୂଷଣ ଶରଣ ସିଂହଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଥିଲେ ଜଣେ ନାବାଳିକା । ଏବେ ସେ ନିଜର ବୟାନ୍ ବଦଳାଇ ଦେଇଛନ୍ତି । ସେ କଠିନ ପରିଶ୍ରମ କରି ମନୋନୀତ ହୋଇନଥିଲେ । ଖୁବ୍ ହତାଶ ଲାଗିବାରୁ ସେ ରାଗି ଯାଇଥିଲେ । ମନୋନୀତ କରାଯାଇନଥିବାରୁ ରାଗରେ ସେ WFI ମୁଖ୍ୟଙ୍କ ନାଁରେ ଏତଲା ଦେଇଥିଲେ ।
ପୋଲିସ ତଦନ୍ତ ଶେଷ କରି ୧୫ ତାରିଖ ସୁଦ୍ଧା ରିପୋର୍ଟ ଦାଖଲ କରିବ ବୋଲି ପୂର୍ବରୁ କହିଥିଲେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର । ଆଜି ରିପୋର୍ଟ ଦାଖଲ ସହ ନିଜ ବୟାନ୍ ରଖିଛି ଦିଲ୍ଲୀ ପୋଲିସ । ରେସଲର ସଂଘ ଲାଗି ମୁକ୍ତ ଓ ଅବାଧ ନିର୍ବାଚନ, ବ୍ରିଜ ଭୂଷଣଙ୍କ ଗିରଫ ସମେତ ଆନ୍ଦୋଳନକାରୀମାନେ ଅନ୍ୟାନ୍ୟ ଦାବି ରଖିଥିଲେ । ପ୍ରମାଣ ଅଭାବରୁ ପୋକ୍ସୋ ମାମଲା ଖାରଜ କରିବା ଲାଗି ରିପୋର୍ଟ ଦାଖଲ ପରେ ବ୍ରିଜ୍ଭୂଷଣ ଶରଣ ସିଂହଙ୍କୁ ଆଶ୍ୱସ୍ତି ମିଳିଛି ।
