ପୁଣି ଚିତାର ମୃତ୍ୟୁ । ପୁଣି ଦୁଇଟା ଚିତା ପ୍ରାଣ ହରାଇଲେ । ଏଭଳି ଘଟଣା ଦେଖିବାକୁ ମିଳିଛି ମଧ୍ୟପ୍ରଦେଶର କୁନୋ ନ୍ୟାସନାଲ୍ ପାର୍କରେ । ଗତ ୨୪ ଘଣ୍ଟାରେ ୨ଟି ଚିତା ଛୁଆ ପ୍ରାଣ ହରାଇଛନ୍ତି ।
ଏବେ ମେ’ ମାସ ଚାଲିଥିବାରୁ ଦେଶର ସବୁଠି ପ୍ରବଳ ଗରମ ଓ ଗୁଳୁଗୁଳି । ତେଣୁ ପ୍ରବଳ ଉତ୍ତାପ ସହି ନପାରି ୨ ଚିତା ଛୁଆଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଗୋଟିଏ ଚିତା ଛୁଆର ମୃତ୍ୟୁର ୨ ଦିନ ପରେ ଆଉ ଗୋଟିଏ ଛୁଆର ମୃତ୍ୟୁ ହୋଇଛି । ଗତ ୨୩ ତାରିଖରେ ପ୍ରଥମେ ଗୋଟିଏ ଛୁଆର ମୃତ୍ୟୁ ପରେ ୨୫ ତାରିଖରେ ଆଉ ଏକ ଛୁଆ ପ୍ରାଣ ହରାଇଲା ଯାହାକୁ ନେଇ ଚିନ୍ତା ବଢ଼ିବାରେ ଲାଗିଛି । ଗତ ମାର୍ଚ୍ଚରେ ନାମିବ୍ୟାରୁ ଆସିଥିବା ଚିତାଙ୍କ ଠାରୁ ୪ଟି ଛୁଆ ଜନ୍ମ ନେଇଥିଲେ । ହେଲେ ଏଯାଏ ୩ଟି ଛୁଆଙ୍କ ମୃତ୍ୟୁ ଘଟିସାରିଲାଣି ।
କୁନୋ ନ୍ୟାସନାଲ ପାର୍କରେ ତାପମାତ୍ରା ୪୫ରୁ ୪୭ ଡିଗ୍ରୀ ରହୁଛି । ସେହି ଉତ୍ତାପ ସହିନପାରି ଛୁଆଙ୍କ ଜୀବନ ଯାଇଛି । ଅନ୍ୟ ଚିତାଙ୍କ ସୁରକ୍ଷା ଲାଗି ନାମିବ୍ୟା ଓ ଦକ୍ଷିଣ ଆଫ୍ରିକା ଚିତା ବିଶେଷଜ୍ଞଙ୍କ ସହ ଆଲୋଚନା କରିଛନ୍ତି କୁନୋ ପାର୍କ କର୍ତ୍ତୃପକ୍ଷ । କୁନୋ ପାର୍କରେ ବାରମ୍ବାର ଚିତା ବାଘର ମୃତ୍ୟୁ ହେଉଛି । ଏହି ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି । ଗତ କିଛି ଦିନ ପୂର୍ବେ ଏହି ଘଟଣାକୁ ନେଇ ଉଦବେଗ ପ୍ରକାଶ କରିଥିଲେ ସୁପ୍ରିମକୋର୍ଟ । ତେଣୁ ଚିତାଙ୍କୁ ରାଜସ୍ଥାନ ସ୍ଥାନାନ୍ତର କରିବା ପାଇଁ କେନ୍ଦ୍ର ସରକାରଙ୍କୁ ପରାମର୍ଶ ଦେଇଥିଲେ ସୁପ୍ରିମକୋର୍ଟ ।