କେନ୍ଦୁଝର ଜିଲ୍ଲା ଆନନ୍ଦପୁରରେ ଅଘଟଣ । ଭାଲୁ ଆକ୍ରମଣରେ ରାମଚନ୍ଦ୍ରପୁର ଥାନା ବରାଙ୍ଗ ଗାଁର ଜଣେ ବୃଦ୍ଧ ଗୁରୁତର ହୋଇଛନ୍ତି । ଚିକିତ୍ସା ପାଇଁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଛି ।
ସୂଚନା ଅନୁସାରେ ଗୁରୁତର ବୃଦ୍ଧଙ୍କ ନାଁ ନିତ୍ୟାନନ୍ଦ ମହାନ୍ତ । ଆଜି ଭୋରରୁ ଗାଁର ୩-୪ ଜଣ ଲୋକଙ୍କ ସହ ମିଶି ସେ ଛତୁ ତୋଳିବାକୁ ବରାଙ୍ଗ ଗାଁ ନିକଟ ଜଙ୍ଗଲକୁ ଯାଇଥିଲେ । ଠିକ୍ ଏତିକିବେଳେ ଏକ ଭାଲୁ ତାର ଦୁଇ ଛୁଆଙ୍କୁ ଧରି ଫେରୁଥିଲା । ଲୋକଙ୍କ ସହ ସାମ୍ନାସାମ୍ନି ହୋଇଥିବା ବେଳେ ଅନ୍ୟାମାନେ ଭାଲୁକୁ ଦେଖି ଦୌଡ଼ି ପଳାଇଥିଲେ । ହେଲେ ନିତ୍ୟାନନ୍ଦ ଦୌଡିନପାରି ଭାଲୁ ଆକ୍ରମଣର ଶିକାର ହୋଇଥିଲେ ।
ଭାଲୁ ଆକ୍ରମଣରେ ନିତ୍ୟାନନ୍ଦ ଗୁରୁତର ଆହତ ହୋଇଛନ୍ତି । ତାଙ୍କୁ ପ୍ରଥମେ ସାଇଁକୁଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ପରେ ଆନନ୍ଦପୁର ଉପଖଣ୍ଡ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।