ଖୋର୍ଦ୍ଧା ଜିଲ୍ଲା କାଇପଦର ଟାଙ୍ଗେଣି ମୁଣ୍ଡିଆ ଖଣିରୁ ମୃତଦେହ ଜବତ୍ ଘଟଣାର ରହସ୍ୟ ଉନ୍ମୋଚନ କରିଛି ପୋଲିସ । ଗତ ଅକ୍ଟୋବର ୬ ତାରିଖରେ ଖୋର୍ଦ୍ଧା ସଦର ଥାନା କାଇପଦର ଟାଙ୍ଗେଣି ମୁଣ୍ଡିଆ ପାଣିରୁ ଏକ ମୃତଦେହ ପୋଲିସ ଉଦ୍ଧାର କରିଥିଲା । ଏନେଇ ପ୍ରଥମେ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଥିଲା । ପରବର୍ତ୍ତି ଅନୁସନ୍ଧାନରେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ପୋଲିସ ଜାଣିବାକୁ ପାଇଲା । ଏହାପରେ ତଦନ୍ତ ପ୍ରକ୍ରିୟାକୁ ଜୋରଦାର କରିବା ସହ ପରିଶେଷରେ ସଫଳତା ହାସଲ କରିଥିଲା ପୋଲିସ । ଏହି ହତ୍ୟାକାଣ୍ଡରେ ସମ୍ପୃକ୍ତ ୬ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ଗତକାଲି ଖୋର୍ଦ୍ଧା ଆରକ୍ଷୀ ଅଧୀକ୍ଷକ ସାଗରିକା ନାଥ ହତ୍ୟାକାଣ୍ଡର ରହସ୍ୟ ଉନ୍ମୋଚନ କରିଛନ୍ତି ।
ଗତ ୬ ତାରିଖରେ ଏକ ଅଜଣା ମୃତଦେହ ପାଣିରେ ଭାସୁଥିବା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ପୋଲିସ ମୃତଦେହକୁ ଜବତ୍ କରିଥିବା ବେଳେ ମୃତକଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ଦେଖିବାକୁ ପାଇଥିଲେ । କେହି ଦୁର୍ବୁତ୍ତ ମୃତକଙ୍କ ଦୁଇ ହାତକୁ ବାନ୍ଧି ପାଣିରେ ଫୋପାଡି ଦେଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଥିଲା । ଘଟଣାର ଦୁଇ ଦିନ ପରେ ମୃତକଙ୍କ ପରିଚୟ ନିଶିକାନ୍ତ ବେହେରା ଓରଫ୍ ରାଜା ବୋଲି ଜଣାପଡିଲା । ପରବର୍ତ୍ତି ସମୟରେ ରାଜାଙ୍କ ବାପା ନିଳମଣୀ ବେହେରାଙ୍କ ଅଭିଯୋଗ କ୍ରମେ ପୋଲିସ ଏକ ହତ୍ୟା ମାମଲା ରୁଜ୍ଜୁ କରିଥିଲା । ତଦନ୍ତରେ ରାଜା ପ୍ରାୟ ଦଶ ମାସ ହେଵ ରାଜା ବାଘମାରି ଥାନା ପତନିବର ଗ୍ରାମରେ ରହୁଥିବା ବେଳେ ତାଙ୍କ ପରିବାର ଟାଙ୍ଗୀ ଥାନା ବଳରାମପୁର ସାହିରେ ରହୁଥିବା ପୋଲିସ ଜାଣିବାକୁ ପାଇଥିଲା ।
ତେଣୁ, ପୋଲିସ ହତ୍ୟାକାଣ୍ଡ ପଛରେ ପତନିବର ଗ୍ରାମର କେତେକ ଦୁର୍ବୁତଙ୍କୁ ସନ୍ଦେହ କରିଥିଲା । ଶେଷରେ ସଦର ପୋଲିସ ହତ୍ୟାକାଣ୍ଡର ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏହି ହତ୍ୟାକାଣ୍ଡ ଘଟଣାର ମୁଖ୍ୟ ଅଭିଯୁକ୍ତ ବାଘମାରି ଥାନା ପତନିବର ଗ୍ରାମର ୨୩ ବର୍ଷିୟ ବିଶ୍ଵନାଥ ପ୍ରଧାନ ଓ ଶୁଭାଶିଷ ବଳିୟାର ସିଂହକୁ ପୋଲିସ ଗିରଫ କରିଛି । ହତ୍ୟାକାଣ୍ଡରେ ସହାୟତା କରିଥିବା ପତନିବର ଗ୍ରାମର ସୁକାନ୍ତ ପ୍ରଧାନ, ଅମୀୟ ରଂଜନ ବଳିୟାର ସିଂହ ଓ ଆଶୁତୋଷ ବଳିୟାର ସିଂହଙ୍କୁ ଗିରଫ କରାଯାଇଥିବା ବେଳେ ଜଣେ ନାବାଳକକୁ ଜୁଭେନାଲ ଜଷ୍ଟିସ କୋର୍ଟରେ ହାଜର କରାଯାଇଥିବା ଜଣାପଡିଛି । ସେହିପରି ହତ୍ୟାକାଣ୍ଡରେ ବ୍ୟବହୃତ ଦୁଇଟି ବାଇକ୍, ପଥର, କପଡା, ମୋବାଇଲ ଓ ମୃତକଙ୍କ ୪ ଚକିଆ ଗାଡ଼ିକୁ ଜବତ୍ କରାଯାଇଛି । ତେବେ ରାଜାଙ୍କୁ ପଥରରେ ଛେଚି ହତ୍ୟା କରାଯାଇଥିବା ଜଣାପଡିଛି ।