ଦୁଇ ଠକ ସଂସ୍ଥା ବିରୋଧରେ ଥାନାରେ ପୁଣି ଅଭିଯୋଗ

କେନ୍ଦ୍ରାପଡ଼ା ଜିଲ୍ଲାର ଭଗବାନପୁର ମାର୍ଶାଘାଇ, ଗରଦପୁର, ଡେରାବିଶ ଅଞ୍ଚଳରୁ ବହୁ ବେକାର ଯୁବକ ଯୁବତୀଙ୍କୁ ଚାକିରି ଲୋଭ ଦେଖାଇ ଠକାମି ଘଟଣାରେ ମିଳୁନି କୌଣସି ସୁଫଳ। ଜିଲ୍ଲାର ବିଭିନ୍ନ ଥାନାରେ ଅଭିଯୋଗ ପରେ ମଧ୍ୟ ନିଆଯାଉନି ପଦକ୍ଷେପ। ଠକାମିକୁ ୩ ବର୍ଷ ବିତିଯାଇଥିଲେ ମଧ୍ୟ ଠକାମିର ଶିକାର ଯୁବକ, ଯୁବତୀ ନା ଫେରିପାଇଛନ୍ତି ସେମାନଙ୍କ ସିକ୍ୟୁରିଟି ମନି, ନାହିଁ ପାଇଛନ୍ତି ୩ ମାସ ଧରି କାମ କରିଥିବା ପ୍ରାପ୍ଯ। ସେପଟେ ଦୁଇ ଠକ ସଂସ୍ଥାର ମାଲିକ ସୋସିଆସ ମିଡିଆରେ ମୌଜମସ୍ତି କରିବାର ଭିଡିଓ ଭାଇରାଲ ହେବାରେ ଲାଗିଛି। ଯାହାକୁ ନେଇ ଠକେଇର ଶିକାରଙ୍କ ସହ ମିଶିଛନ୍ତି ସ୍ଥାନୀୟ ସମାଜ ସେବୀ ସ୍ବରୂପ ରାଉତ। ସେ ମଧ୍ୟ ଏହି ସଂସ୍ଥା ଦ୍ବାରା ଠକାମିର ଶିକାର ହୋଇଥିବା ମୁହଁ ଖୋଲିଛନ୍ତି। କୁଦାନଗର ଥାନାରେ ରାଘବ ସାରଟେକ ସଲୁସନ ପ୍ରାଇଭେଟ ଲିମିଡେଡ୍ ଓ ୱାନ ଟୁ ୱାନ କମ୍ପାନୀ ବିରୋଧରେ ସ୍ବରୂପଙ୍କ ନେତୃତ୍ବରେ ଦୁଇଟି ଅଭିଯୋଗ ହୋଇଛି।

ଏଠାରେ କହି ରଖୁଛୁ କି,ରାଘବ ସାରଟେକ ସଲୁସନ ପ୍ରାଇଭେଟ ଲିମିଡେଡ୍ ଓ ୱାନ ଟୁ ୱାନ କମ୍ପାନୀର ମାଲିକ ପ୍ରତାପ ମହାନ୍ତି ଓ ତାପସ ପାଢୀ କେନ୍ଦ୍ରାପଡାର ପ୍ରାୟ ୧୦୦ରୁ ଅଧିକ ବେକାର ଯୁବକ ଯୁବତୀଙ୍କୁ ଟାଟା ପାୱାରରେ କାମ ଦେବାକୁ କହି ସେମାନଙ୍କଠାରୁ ୩୦ହଜାର ଲେଖା ସିକ୍ୟୁରିଟି ନେଇଥିଲେ। ଏମିତି କି ମିଛ ଆଡି କାର୍ଡ ଓ ପୋଷ୍ଟିଂ ଲେଟର ଦେଇ କାମ କରାଇଥିଲେ। ୩ ମାସ କାମ କରିବା ପରେ କିନ୍ତୁ ଦରମା ମିଳିନ ଥିଲା। ଦରମା ପାଇଁ କମ୍ପାନୀ ମାଲିକଙ୍କୁ ଫୋନ କଲାରୁ ଉଭୟ ଫେରାର ହୋଇଯାଇଥିଲେ.