ଜମ୍ମୁ ଓ କଶ୍ମୀରର କଠୁଆ ଜିଲ୍ଲାରୁ PIA ଲୋଗୋ ଥିବା ଗୋଟାଏ ବିମାନ ଆକୃତିର ବେଲୁନ୍ ଉଦ୍ଧାର କରାଯାଇଛି । କଳା ଓ ଧଳା ରଙ୍ଗର ରହସ୍ୟମୟ ବେଲୁନ୍ କଠୁଆ ଜିଲ୍ଲାର ହୀରାନଗର ଅଞ୍ଚଳରୁ ମିଳିଛି । ଗୋଟିଏ ପଡ଼ିଆରେ ପଡ଼ିଥିବା ଅବସ୍ଥାରେ ମିଳିଥିଲା ଏହି ବେଲୁନ୍ । ସୁରକ୍ଷାବାହିନୀ ପକ୍ଷରୁ ଉକ୍ତ ବେଲୁନ୍ ଜବତ କରାଯାଇଛି । ଏହା କେଉଁଠୁ ଏବଂ କିପରି ଆସିଲା ତାହା ଜାଣିବା ଲାଗି ତଲାସୀ ଅଭିଯାନ ଜାରି ରହିଛି ।
ସୂଚନା ଅନୁସାରେ ଚଳିତବର୍ଷ ଫେବ୍ରୁଆରୀରେ ଶିମ୍ଲାର ଏକ ସେଓ ବଗିଚାରୁ ଗୋଟିଏ ବିମାନ ଆକୃତିର ସବୁଜ ଓ ଧଳାରଙ୍ଗର ବେଲୁନ୍ ଉଦ୍ଧାର କରାଯାଇଥିଲା। ସେଥିରେ ମଧ୍ୟ PIAର ଲୋଗୋ ଛାପା ଯାଇଥିଲା । ସେହିପରି,ଚଳିତବର୍ଷ ମେ ୨୦ ତାରିଖରେ ଆଉ ଗୋଟିଏ ଡ୍ରୋନ୍ ଦେଖିବାକୁ ମିଳିଥିଲା । ଅମୃତସରରେ ଗୋଟାଏ ପାକିସ୍ତାନୀ ଡ୍ରୋନ୍କୁ ଗୁଳିମାରି ଖସାଇ ଦିଆଯାଇଥିଲା । ସେଥିରେ ନିଶାଦ୍ରବ୍ୟ ଥିବା ସନ୍ଦେହରେ ବ୍ୟାଗ୍ଟିଏ ମଧ୍ୟ ଜବତ କରାଯାଇଥିଲା । ଡ୍ରୋନ୍ ମିଳିବାର ପୂର୍ବଦିନ ପଞ୍ଜାବ ଅନ୍ତର୍ଗତ ଆନ୍ତର୍ଜାତିକ ସୀମା ଅଞ୍ଚଳରେ ବିଏସ୍ଏଫ୍ ଯବାନମାନେ ୪ଟି ପାକିସ୍ତାନୀ ଡ୍ରୋନ୍ ମଧ୍ୟରୁ ସେଥିରୁ ୩ଟି ଡ୍ରୋନ୍କୁ ଗୁଳିମାରି ଖସାଇ ଦେଇଥିଲେ।