ମଣ୍ଡିରେ ବିକ୍ରି କରି ଏଯାଏ ଧାନ ମୂଲ୍ୟ ପାଇନାହାଁନ୍ତି ଚାଷୀ । ପ୍ରଶାସନିକ ଅଧିକାରୀଙ୍କ ନିକଟକୁ ଦୌଡ଼ି ଦୌଡ଼ି ନୟାନ୍ତ ହେଲେଣି ତଥାପି ବାହାରିପାରୁନି ସମାଧାନ ରାସ୍ତା । କେବେ ମିଳିବ ବକେୟା ଟଙ୍କା ସେ ନେଇ ଚିନ୍ତାରେ ଚାଷୀ ସଂଘ ।
ଯାଜପୁରରେ ବଢୁଛି ଚାଷୀଙ୍କ ଅସନ୍ତୋଷ । ନା ମିଳୁଛି ବକେୟା ଟଙ୍କା ନା ପ୍ରତିଶ୍ରୁତି । କେବଳ ଦୌଡ଼ି ଦୌଡ଼ି ନିରାଶ ହେଉଛନ୍ତି ଚାଷୀ । ଗତବର୍ଷ ମାର୍ଚ୍ଚ ମାସରେ ଯାଜପୁର ଦଶରଥପୁର ବ୍ଲକ ଛତ୍ରପଡ଼ା ସେବା ସମବାୟ ସମିତି ମଣ୍ଡିରେ ଧାନ ବିକ୍ରି କରିଥିଲେ ଚାଷୀ । ହେଲେ ଏଯାଏ ଧାନ ବିକ୍ରି ଟଙ୍କା ମିଳିନି । ଏ ନେଇ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା ଯୁବ ଭାରତ କୃଷକ ସଙ୍ଘ । କୋର୍ଟଙ୍କ ନିର୍ଦ୍ଦେଶରେ ଜିଲ୍ଲାପାଳ ଆଲୋଚନା କରିଥିଲେ ସୁଦ୍ଧା କୌଣସି ନିଷ୍କର୍ଷ ବାହାରିପାରିନଥିଲା । ଶେଷରେ ଏହାର ସମାଧାନ ପାଇଁ ଜିଲ୍ଲା ଯୋଗାଣ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ସେପଟେ ତୁରନ୍ତ ପ୍ରାପ୍ୟ ପ୍ରଦାନ ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି ସଂଘ ।
ଚାଷୀ କଠିନ ପରିଶ୍ରମ କରି ବିଲରୁ ଧାନ ଉତ୍ପାଦନ କରିଥାଏ । ପରିବାର ପ୍ରତିପୋଷଣ ପାଇଁ ଧାନ ବିକ୍ରି କରି ଦି ପଇସା ପାଇବାକୁ ଲକ୍ଷ୍ୟ ରଖିଥାଏ । ହେଲେ ଦୀର୍ଘ ୧୫ ମାସ ହେଲା ଧାନ ମୂଲ୍ୟ ପାଇବାରୁ ସେମାନେ ବଞ୍ଚିତ । ଏଭଳି ଘଟଣାକୁ ନିନ୍ଦା କରାଯିବା ସହ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି ।