ମୁଖ୍ୟମନ୍ତ୍ରୀ ‘ପରିଧାନ’ ପୋଷାକ ପିନ୍ଧିବା ଉପଯୋଗୀ ନୁହେଁ

ମୁଖ୍ୟମନ୍ତ୍ରୀ ପରିଧାନ ଯୋଜନାରେ ଛାତ୍ରଛାତ୍ରୀ ଓ ବିଭିନ୍ନ ଗୋଷ୍ଠୀଙ୍କୁ ପୋଷାକ ବିତରଣ କରିବାର ବ୍ୟବସ୍ଥା କରିଛନ୍ତି। ଏହି ଯୋଜନା ଅନୁଯାୟୀ, ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ସରକାରୀ ଉଚ୍ଚ ବାଳିକା ବିଦ୍ୟାଳୟର ନବମ ଓ ଦଶମ ଶ୍ରେଣୀ ଛାତ୍ରୀଙ୍କୁ ଦିଆଯାଇଛି ପୋଷାକ। କିନ୍ତୁ ଛାତ୍ରୀଙ୍କୁ ବଣ୍ଟନ ହୋଇଥିବା ପୋଷାକ ଅତି ନିମ୍ନମାନର ହୋଇଥିବା ସହ ଏଥିରେ ଲୋଗୋ ଓଲଟା ଲଗାଯାଇଥିବା ଅଭିଯୋଗ ହେଉଛି। ଏହାକୁ ପିନ୍ଧି ବାହାରକୁ ଯିବାକୁ ଲଜ୍ଜା ଅନୁଭବ କରୁଛନ୍ତି ଛାତ୍ରୀ। ସେପଟେ ଏସମ୍ପର୍କରେ ବିଇଓଙ୍କୁ ପଚରାଯିବାରୁ ସେ
ସେ କିଛି ଜାଣିନଥିବା କହିଛନ୍ତି।

ତେବେ ପରିଧାନ ଯୋଜନାରେ ହୋଇଥିବା ଅବ୍ୟବସ୍ଥାକୁ ନେଇ ଛାତ୍ରୀ ଓ ଅଭିଭାବକ ମହଲରେ ଅସନ୍ତୋଷ ଦେଖିବାକୁ ମିଳିଛି। ଡ୍ରେସ ପ୍ରସ୍ତୁତି ପାଇଁ କାର୍ଯ୍ୟାଦେଶ ପାଇଥିବା ଗ୍ରୁପ ମନ ଇଛା ଡ୍ରେସ ତିଆରି କରି ଅର୍ଥ ସାଉଁଟୁ ଥିବା ବେଳେ ଏହା ଯେଉଁ ଉଦ୍ଦେଶ୍ୟ ନେଇ କରାଯାଇଛି ତାହା ପୂରଣ ହୋଇପାରୁ ନାହିଁ। ତେଣୁ ଏହା ଉପରେ 5t ସଚିବ ଭି.କେ.ପାଣ୍ଡିଆନ ଦୃଷ୍ଟି ଦେବାକୁ ଦାବି ହେଉଛି।