ମଧ୍ୟ ପୂର୍ବରେ ଇସ୍ରାଏଲ ଶନିବାର ସକାଳେ ଇରାନ ଉପରେ ଆକ୍ରମଣ କରି ପ୍ରତିଶୋଧ ନେଇଥିଲା। ଇସ୍ରାଏଲ୍ ସେନାଙ୍କ ଅନୁଯାୟୀ,ସେମାନେ ତେହେରାନର ଚାରିପାଖରେ ଥିବା ଅନେକ ଇରାନର ସାମରିକ ବେସ ଏବଂ ସହର ଉପରେ ବୋମା ମାଡ଼ କରିଥିଲେ। ଗଣମାଧ୍ୟମର ରିପୋର୍ଟ ଅନୁଯାୟୀ, ଇରାନ ଉପରେ ଆକ୍ରମଣ କରିବା ପାଇଁ ଇସ୍ରାଏଲ ୧୦୦ ରୁ ଅଧିକ ଯୁଦ୍ଧ ବିମାନ ବ୍ୟବହାର କରିଥିଲା | ଆଇଡିଏଫ୍ ଅଧିକାରୀ କହିଛନ୍ତି ଯେ ଇରାନ ଉପରେ ବୋମା ପକାଇଥିବା ସମସ୍ତ ଯୁଦ୍ଧ ବିମାନ ସୁରକ୍ଷିତ ଭାବେ ବେସକୁ ଫେରି ଆସିଛି । ଯେଉଁ ଅପରେସନ୍ ଅଧୀନରେ ଇସ୍ରାଏଲ ଇରାନ ଉପରେ ଆକ୍ରମଣ କରିଥିଲା, ତାହା ହେଉଛି ଡେଜ୍ ଅଫ୍ ରିପେଣ୍ଟେନ୍ସ |
ଇସ୍ରାଏଲ ଇରାନର ୪ଟି ସହର ଉପରେ ଆକ୍ରମଣ କରିଥିଲା। ଆଇଡିଏଫ୍ ଅନୁଯାୟୀ,୧୬୦୦ କିଲୋମିଟର ଦୂରରେ ହୋଇଥିବା ଏହି ଆକ୍ରମଣରେ ଏଫ-35 ଯୁଦ୍ଧ ବିମାନ,ଗୁପ୍ତଚର ବିମାନ ସହିତ ଅନେକ ଇସ୍ରାଏଲ୍ ବାୟୁସେନା ଯୁଦ୍ଧ ବିମାନର ବ୍ୟବହାର କରାଯାଇଥିଲା। ଆଇଡିଏଫ୍ କହିଛି, “ଇସ୍ରାଏଲ ଉପରେ ହୋଇଥିବା ଆକ୍ରମଣ ପାଇଁ ମୂଲ୍ୟ ଦେବାକୁ ହେବ । ଆମେ ଆମର ମିଶନ ପୂରଣ କରିଛୁ।”
ଇସ୍ରାଏଲର ଏହି ଆକ୍ରମଣକୁ ଅକ୍ଟୋବର ୨ ରେ ଇରାନ ଦ୍ୱାରା ହୋଇଥିବା ଏୟାର ଷ୍ଟ୍ରାଇକର ପ୍ରତିଶୋଧ ବୋଲି ଦେଖାଯାଉଛି। ଏହାପୂର୍ବରୁ ହିଜବୁଲ ମୁଖ୍ୟ ହାସନ ନାସରାଲ୍ଲାଙ୍କ ମୃତ୍ୟୁର ପ୍ରତିଶୋଧ ନେବାକୁ ଇରାନ ଇସ୍ରାଏଲ ଉପରେ ପ୍ରାୟ ୨୦୦ ରକେଟ ମାଡ଼ କରିଥିଲା,ଯାହା ପରେ ଇସ୍ରାଏଲ ମଧ୍ୟ ଇରାନକୁ ଧ୍ୱଂସ କରିବାକୁ ଶପଥ ନେଇଥିଲା।
ଆଇଡିଏଫ ମୁଖପାତ୍ର ଡାନିଏଲ ହାଗରୀ କହିଛନ୍ତି, “ବର୍ତ୍ତମାନ ଇସ୍ରାଏଲକୁ ମଧ୍ୟ ଇରାନରେ କାର୍ଯ୍ୟ କରିବାର ସ୍ବାଧୀନତା ମିଳି ଗଲା । ଇରାନ ଦୁଇଥର ଇସ୍ରାଏଲ ଉପରେ ଆକ୍ରମଣ କରିଛି ଏବଂ ଏହାର ମୂଲ୍ୟ ତାକୁ ଦେବାକୁ ପଡିଲା । ଆମେ ଗାଜା ଏବଂ ଲେବାନନରେ ହୋଇଥିବା ଯୁଦ୍ଧ ଉପରେ ଧ୍ୟାନ ଦେଉଥିଲୁ,କିନ୍ତୁ ଇରାନ ଏହି ସମୟରେ ଯୁଦ୍ଧକୁ ପ୍ରୋତ୍ସାହିତ କରିଛି। ” ଇସ୍ରାଏଲ ସେନା ଇରାନକୁ ଚେତାବନୀ ଦେଇଛି ଯେ ଯଦି ସେ ନୂଆ ରଣନୀତି ନେଇ ଯୁଦ୍ଧ ଆରମ୍ଭ କରେ, ତେବେ ତାକୁ ଭାରି ମୂଲ୍ୟ ଦେବାକୁ ପଡ଼ିବ |