IPLରେ ଆଉ ମାତ୍ର ଗୋଟିଏ ମ୍ୟାଚ୍ । ମୈଦାନରେ ପାଖାପାଖି ୨ ମାସର ମୁକାବିଲା । ଏବେ ଟାଇଟଲ୍ ପାଇଁ ଲଢ଼ିବେ ଚେନ୍ନାଇ ସୁପର କିଙ୍ଗସ ଓ ଗୁଜରାଟ ଟାଇଟନ୍ସ । ମୁମ୍ବାଇକୁ ୬୨ ରନରେ ହରାଇ ଦ୍ୱିତୀୟ ଟିମ୍ ଭାବେ ଏଣ୍ଟ୍ରି କରିଛି ଗୁଜରାଟ । IPL ଟ୍ରଫି ଉପରେ ଏବେ ସମସ୍ତଙ୍କ ନଜର ।
ଦିନକ ପରେ ବିଦାୟ ନେବ ୨୦୨୩ IPL । ମେ’ ୨୮ରେ ଟ୍ରଫି ପାଇଁ ଲଢ଼ିବେ ଚେନ୍ନାଇ ଓ ଗୁଜରାଟ । ଚେନ୍ନାଇ ପରେ ଗୁଜରାଟକୁ ମିଳିଛି ଫାଇନାଲ୍ ଟିକେଟ୍ । ଗତବର୍ଷ IPLରେ ଏଣ୍ଟ୍ରି କରିଥିଲା ଗୁଜରାଟ ଟାଇଟନ୍ସ । ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ପ୍ରଥମ ଟାଇଟଲ୍ ବି ଜିତିଥିଲା ଦଳ । ଏଥର ବି ପୁରା ଦମରେ ଅଛନ୍ତି ଖେଳାଳି । ଆରମ୍ଭରୁ ଚମତ୍କାର ପ୍ରଦର୍ଶନ କରିଛି ଦଳ । ଦ୍ୱିତୀୟ କ୍ୱାଲିଫାଏରରେ ଗୁଜରାଟର ପରଫରମାନ୍ସ ବେଶ୍ ପ୍ରଶଂସନୀୟ ଥିଲା । ଶକ୍ତିଶାଳୀ ମୁମ୍ବାଇ ବିପକ୍ଷରେ ବିଶାଳ ୨୩୩ ରନ୍ କରିଥିଲା ଗୁଜରାଟ । ଶେଷରେ ୬୨ ରନରେ ଦଳ ବିଜୟୀ ହୋଇଥିଲା । ଇନଫର୍ମ ଶୁବମନ୍ ଗିଲ୍ ବିସ୍ଫୋରକ ବ୍ୟାଟିଂ କରି ଶତକ ହାସଲ କରିଥିଲେ । ପୁରା ଟୁର୍ଣ୍ଣାମେଣ୍ଟରେ ବିସ୍ଫୋରକ ବ୍ୟାଟିଂ କରିଛନ୍ତି ଗିଲ୍ ।
୩ଟି ଶତକ ଏବଂ ୪ଟି ଅର୍ଦ୍ଧଶତକ ସହ ୮୫୧ ରନ୍ କରି ଟପରେ ଅଛନ୍ତି ଏହି ଓପନର । ତାଙ୍କ ବ୍ୟାଟ୍ ଚାଲିଲେ ବିଜୟ ନିଶ୍ଚିତ । ତାଙ୍କୁ ସାଥ୍ ଦେଉଛନ୍ତି ହାର୍ଦ୍ଦିକ ପାଣ୍ଡ୍ୟା, ମିଲର, ବିଜୟ ଶଙ୍କରଙ୍କ ପରି ବ୍ୟାଟସମ୍ୟାନ । ବୋଲିଂ ସହ ବ୍ୟାଟିଂରେ କମାଲ କରୁଛନ୍ତି ଅଲରାଉଣ୍ଡର ରସିଦ ଖାନ । ଅଭିଜ୍ଞ ସାମି, ମୋହିତ ଶର୍ମାଙ୍କ ଭଳି ବୋଲର ଅନ୍ୟମାନଙ୍କ ପାଇଁ ଘାତକ ସାଜୁଛନ୍ତି । ମୁମ୍ବାଇ ବିପକ୍ଷ ମୁକାବିଲାରେ ୫ ୱିକେଟ ନେଇ ଚେନ୍ନାଇକୁ ସତର୍କ କରିଛନ୍ତି ମୋହିତ । ଆସନ୍ତାକାଲି ଫାଇନାଲରେ ଉନ୍ନତ ପ୍ରଦର୍ଶନ କରିବାକୁ ଦଳ ଲକ୍ଷ୍ୟ ରଖିଛି ।
ସେପଟେ, ଗୁଜରାଟ ରାସ୍ତାରେ ବାଧକ ସାଜିପାରେ ଚେନ୍ନାଇ । କାରଣ IPL ଇତିହାସରେ ସବୁଠୁ ସଫଳ ଏବଂ ଅଭିଜ୍ଞ ଅଧିନାୟକ ଧୋନି ତାଙ୍କ ବିପକ୍ଷରେ ଲଢ଼ିବେ । ଗୁଜରାଟ ପରି ଚେନ୍ନାଇ ବି ବଢ଼ିଆ ପ୍ରଦର୍ଶନ କରୁଛି । ଓପନର କନୱେ ଏବଂ ଗାଏକୱାଡ ପୁରା ଫର୍ମରେ ଅଛନ୍ତି । ମିଡିଲ୍ ଅର୍ଡରରେ ରାହାଣେ ଏବଂ ଡୁବେଙ୍କ ବିସ୍ଫୋରକ ବ୍ୟାଟିଂ ଦେଖିବାକୁ ମିଳୁଛି । ଶେଷ ଭାଗରେ ମୋଇନ୍ ଅଲ୍ଲୀ, ଜାଡେଜା ଏବଂ ଧୋନିଙ୍କ ଦ୍ରୁତ ରନ୍ ଦଳ ପାଏ ପ୍ଲସ୍ ପଏଣ୍ଟ ହୋଇଛି । ବୋଲିଂ ଡିପାର୍ଟମେଣ୍ଟରେ ଦୀପକ ଚହର,ତୁଷାର ଦେଶପାଣ୍ଡେ, ପଥିରାନାଙ୍କ ସମେତ ମୋଇନ୍ ଏବଂ ଜାଡେଜା ଅଛନ୍ତି । ପାୱାର ପ୍ଲେ’ରେ ହିଁ ଶକ୍ତ ଧକ୍କା ଦିଅନ୍ତି ଚହର । ପୁରାପୁରି ଫର୍ମରେ ଥିବାରୁ ଗୁଜରାଟ ପାଇଁ ଅଡୁଆ ହୋଇପାରେ ।
୨୦୦୮ରେ ଫଟାଫଟ୍ କ୍ରିକେଟ୍ IPLର ସୃଷ୍ଟି । ଚେନ୍ନାଇ ସବୁଠୁ ସଫଳ ଟିମ୍ ହୋଇଥିବା ବେଳେ ଧୋନି ସଫଳ ଅଧିନାୟକ । ଏଯାଏ ୯ ଥର ଫାଇନାଲରେ ଏଣ୍ଟ୍ରି କରି ୪ ଥର ଟାଇଟଲ୍ ହାସଲ କରିଛି ଦଳ । ଏବେ ୧୦ନଂ ଥର ପାଇଁ ଫାଇନାଲ୍ ଖେଳିବ ଚେନ୍ନାଇ ସୁପର କିଙ୍ଗସ । ପଞ୍ଚମ ଟ୍ରଫି ହାସଲ କରିବାକୁ ଦଳ ଲକ୍ଷ୍ୟ ରଖିଛି । ପୁଣି ଅଧିନାୟକ ଧୋନି IPLକୁ ବାୟ ବାୟ କରିପାରନ୍ତି । ତେଣୁ ଚାମ୍ପିଅନ୍ ହୋଇ ତାଙ୍କୁ ବିଦାୟକାଳୀନ ଗିଫ୍ଟ ଦେବାକୁ ଦଳ ସମସ୍ତ ବଳ ପ୍ରୟୋଗ କରିବ । ସେପଟେ, ଗତଥର ଏଣ୍ଟ୍ରି କରିଥିବା ଗୁଜରାଟ ଆରମ୍ଭରୁ ହିଁ ଟାଇଟଲ୍ ଜିତିଛି । ଲଗାତାର ଦ୍ୱିତୀୟ ଥର ଟ୍ରଫି ନିଜ ନାଁରେ କରିବା ପାଇଁ ଲଢ଼େଇ କରିବ ପାଣ୍ଡ୍ୟା ଆଣ୍ଡ କୋ ।
