ଶେଷରେ ଇଣ୍ଟରକଣ୍ଟିନେଣ୍ଟାଲ କପ୍ ଜିତିଲା ଭାରତ । ଦ୍ବିତୀୟ ଥର ଲାଗି ଇଣ୍ଟରକଣ୍ଟିନେଣ୍ଟାଲ କପ୍ ହାତେଇଛି ଟିମ୍ ଇଣ୍ଡିଆ । ଭୁବନେଶ୍ବର କଳିଙ୍ଗ ଷ୍ଟାଡିୟମରେ ଚତୁଃରାଷ୍ଟ୍ରୀୟ ଅନ୍ତର୍ଜାତୀୟ ଫୁଟ୍ବଲ୍ ପ୍ରତିଯୋଗିତାର ଫାଇନାଲ୍ରେ ବାଜି ମାରିଛି ଭାରତ । ଭାରତ ୨-୦ ଗୋଲ୍ରେ ନିଜଠୁ ଉଚ୍ଚମାନ୍ୟତାପ୍ରାପ୍ତ ଲେବାନନ୍କୁ ପରାସ୍ତ କରିଛି । ଲିଗ୍ ପର୍ଯ୍ୟାୟରେ ଦମଦାର ପ୍ରଦର୍ଶନ କରି ଶେଷରେ ଫାଇନାଲରେ ଏଣ୍ଟ୍ରି କରିଥିଲା ଦଳ ।
ଅଧିନାୟକ ସୁନିଲ ଛେତ୍ରୀ ଓ ଲାଲଲିଆଞ୍ଜୁଆଲା ଚାଙ୍ଗ୍ଟେ ଦମଦାର ଗୋଲରେ ଘାଇଲା ହୋଇଥିଲା ଲେବାନନ୍ । ଏହି ମ୍ୟାଚରେ ଅଧିନାୟକ ଛେତ୍ରୀ ତାଙ୍କ କ୍ୟାରିୟରର ୮୬ତମ ଅନ୍ତର୍ଜାତୀୟ ଗୋଲ୍ ଦେଇଥିଲେ । କଡ଼ା ସଂଘର୍ଷରେ ପ୍ରଥମାର୍ଦ୍ଧ ଗୋଲ୍ ଶୂନ୍ୟରେ ଶେଷ ହୋଇଥିଲା । ଭାରତ ଆକ୍ରମଣାତ୍ମକ ଖେଳ ଖେଳି ଅନେକ ଥର ଲେବାନନ୍ର ଗୋଲ୍ପୋଷ୍ଟର ନିକଟତର ହୋଇଥିଲେ ସୁଦ୍ଧା ଗୋଲ୍ କରିପାରିନଥିଲା ।
ଦ୍ବିତୀୟାର୍ଦ୍ଧ ଆରମ୍ଭରୁ ହିଁ ଭାରତ ଆଟାକିଂ ମୋଡରେ ଆସିଥିଲେ । ୪୬ ମିନିଟ୍ ବେଳକୁ ଅଧିନାୟକ ସୁନିଲ ଛେତ୍ରୀ ଦଳ ପାଇଁ ପ୍ରଥମ ଗୋଲ ଆଣିଥିଲେ । ଏହା ପରେ ଚାଙ୍ଗ୍ଟେ ୬୫ ମିନିଟରେ ଦଳ ପାଇଁ ଦ୍ୱିତୀୟ ଗୋଲ୍ ଆଣିଥିଲେ । ଲେବାନନ୍ ପ୍ରତି ଆକ୍ରମଣ କରି ଶେଷରେ ପରାସ୍ତ ହେଲା । ଭାରତ ବିରୋଧରେ ଗୋଟିଏ ବି ଗୋଲ୍ କରିପାରିଲାନି ଲେବାନନ୍ । ଚାଙ୍ଗଟେ ଫାଇନାଲ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ ହୋଇଥିବା ବେଳେ ସନ୍ଦେଶ ଝିଙ୍ଗାନ ପ୍ରତିଯୋଗିତାର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ । ଉଦ୍ଯାପନୀ ଉତ୍ସବରେ ମୁଖ୍ୟ ଅତିଥିଭାବେ ମୁଖ୍ୟମନ୍ତ୍ରୀ ଯୋଗଦେଇ ବିଜେତା ଦଳକୁ ଟ୍ରଫି ପ୍ରଦାନ କରିଥିଲେ । ଏଥିସହ ଭାରତୀୟ ଦଳ ପାଇଁ ଏକ କୋଟି ଟଙ୍କାର ପୁରସ୍କାର ରାଶି ଘୋଷଣା କରିଥିଲେ ନବୀନ ।
