ଚଳିତ ବର୍ଷା ପୁଣି ଉଜ୍ଜିବିତ କରିଛି କେଦାରନାଥ ଟ୍ରାଜେଡି। ୧୦ ବର୍ଷ ପୂର୍ବେ କଦାରନାଥ ଦୁର୍ବିପାକ ସମୟରେ ଏମିତି ବାଦଲ ଫଟା ବର୍ଷା ଦେଖିବାକୁ ମିଳିଥିଲା। ଆଜି ମଧ୍ୟ ସମାନ ସ୍ଥିତି ହିମାଚଳ ଆକାଶରେ। ଭୟ ଓ ଆତଙ୍କରେ ଏହି ପାହାଡି ରାଜ୍ୟର ଜନତା। କେଉଁଠି ପୋଲ ଭାସି ଗଲାଣି ତ ପୁଣି କେଉଁଠି ଧୋଇଗଲାଣି ରାସ୍ତା, ଅବା ପୁଣି କେଉଁଠି ପାହାଡରୁ ଖସୁଛି ପଥର ବା ବହୁତଳ କୋଠାକୁ ବୋହି ନେଉଛି ଭୟଙ୍କର ପାଣି ସୁଅ। ତା ଉପରେ ପୁଣି ଭୂସ୍ଖଳନ ସାଜିଛି ଦାଉ। ଶନିବାରଠାରୁ ଆକାଶରୁ ଅନବରତ ବର୍ଷୁଛି ମୁଷଳ ଧାରା। ତଳେ ଛୁଟିଛି ପାଣିର ପ୍ରଖର ସୁଅ।ଯାହା ବେହାଲ କଲାଣି ଏହି ପାହାଡି ରାଜ୍ୟକୁ। ମଣ୍ଡି, ପଞ୍ଚକୁଲା, ଚାମ୍ବା, କୁଲ୍ଲୁ, ମନାଲି ପରି ସ୍ଥାନରେ ବନ୍ୟା ସ୍ରୋତ ପ୍ରଖର ବେଗରେ ବହିଚାଲିବା ସହ ବୋହି ନେଉଛି ଘରବାଡି, ଗାଡି।
ବ୍ୟାସ, ପାର୍ବତୀ, ସତଲେଜ ନଦୀ ଜଳରେ ପ୍ଲାବିତ ରାଜ୍ୟର ଅଧିକାଂଶ ସ୍ଥାନ। ରାଜ୍ୟରେ ତିନୋଟି ପୃଥକ ଭୂସ୍ଖଳନରେ ଗଲାଣି ୫ ଜୀବନ। ଚାମ୍ବା, କାଙ୍ଗର, ମଣ୍ଡି, ଉନା, ହମିରପୁର, ବିଲାସପୁର ଜିଲ୍ଲାରେ ସ୍ଥିତି ନକହିବା ଭଲ। ରବିବାର ମଣ୍ଡିରେ ହୋଇଥିବା ଭୂସ୍ଖଳନ ପରେ ଚଣ୍ଡିଗଡ-ମନାଲି ରାଜପଥର କିଛି ଅଂଶ ଧୋଇଯାଇଛି। ଶିମଲା ଜିଲ୍ଲାର କୋଟଗଡ ଅଞ୍ଚଳରେ ଭୂସ୍ଖଳନ ହେତୁ ଗୋଟିଏ ଘର ଭୁଶୁଡ଼ି ପଡ଼ିବାରୁ ପରିବାରର ତିନିଜଣ ସଦସ୍ୟଙ୍କ ମୃତ୍ୟୁ ଘଟିଥିବା ବେଳେ କୁଲୁ ଏବଂ ଚାମ୍ବା ଜିଲ୍ଲାରୁ ପ୍ରତ୍ୟେକଙ୍କର ମୃତ୍ୟୁ ହୋଇଥିବା ସୂଚନା ରହିଛି। ହିମାଚଳ ପ୍ରଦେଶର ଲାହୁଲ ଏବଂ ସ୍ପିଟିରେ ଚନ୍ଦ୍ରତଲରେ ପ୍ରାୟ ୨୦୦ ଲୋକ ପାଣି ଘେରରେ ଫସି ରହିଥିବା ବେଳେ ସେମାନଙ୍କୁ ସୁରକ୍ଷିତ ଉଦ୍ଧାର କରିଛି ଏସଡିଆରଫଏ ଟିମ। ବ୍ୟାସ ନଦୀରେ ଜଳସ୍ତର ବୃଦ୍ଧି ହେତୁ ଚଣ୍ଡିଗଡ଼-ମନାଲି ରାଜପଥର ଏକ ଅଂଶ ଧୋଇ ହୋଇଯାଇଛି। ମନାଲିରେ ଦୋକାନଗୁଡିକ ଧୋଇ ଯାଇଥିବା ବେଳେ କୁଲୁ, କନ୍ନୋର ଏବଂ ଚାମ୍ବାରେ ଡ୍ରେନ ପାଣି ଭରିବା ସହ ପ୍ରଖର ସୁଅରେ ଗାଡି ସବୁ ଭାସି ଯିବାର ଦୃଶ୍ୟ ସାମ୍ନାକୁ ଆସିଛି। ମଣ୍ଡି ଜିଲ୍ଲାରେ ନଦୀ କୂଳରେ ଥିବା ଏକ ବହୁତଳ କୋଠା ନଦୀର ପ୍ରଖର ସୁଅ ମାଡରେ ଖସି ପଡିଥି ତାସ ଘର ପରି।
ଏପରି ସ୍ଥିତିକୁ ନେଇ ରାଜ୍ୟ ଦେଇ ଯାତାଯାତ କରୁଥିବା ୧୭ ଟ୍ରେନକୁ ବାତିଲ କରାଯାଇଥିବା ବେଳେ ୧୨ଟିର ରୁଡ ପରିବର୍ତ୍ତନ କରାଯାଇଛି। ସରକାର ରାଜ୍ୟର ସମସ୍ତ ସ୍କୁଲକୁ ଜୁଲାଇ ୧୦ଓ୧୧ ପାଇଁ ବନ୍ଦ କରି ଦେଇଛନ୍ତି। ରାଜ୍ୟର ତିନୋଟି ଜାତୀୟ ରାଜପଥ ସମେତ ୭୦୦ରୁ ଅଧିକ ରାସ୍ତା ବନ୍ଦ ପଡିଛି। ଭାରି ବର୍ଷା କାରଣରୁ ବିଦ୍ୟୁତ୍ ସରବରାହରେ ଦେଖାଦେଇଛି ବିଭ୍ରାଟ। ପ୍ରାୟ ୧୮୦୦ ପାୱାର ଟ୍ରାନ୍ସଫର୍ମର ବିଫଳ ହୋଇଛି।
ତେବେ ଖାଲି ହିମାଚଳ ପ୍ରଦେଶ ନୁହେଁ ଏମିତି ସ୍ଥିତି ଦେଖାଦେଇଛି ଉତ୍ତରାଖଣ୍ଡ, ଦିଲ୍ଲୀ, ପଞ୍ଜାବ, ଉତ୍ତର ପ୍ରଦେଶରେ। ଦେଶର ରାଜଧାନୀରେ ରବିବାର ହୋଇଥିବା ବର୍ଷା ୪୦ ବର୍ଷର ରେକର୍ଡ ଭାଙ୍ଗିଦେଇଛି। ରାସ୍ତା ଘାଟ ସବୁ ଜଳମୟ। ସେପଟେ ଉତ୍ତରାଖଣ୍ଡର ଋଷିକେଶ-ବଦ୍ରିନାଥ ଜାତୀୟ ରାଜପଥର ଗୁଲାର ନିକଟରେ ଭୂସ୍ଖଳନ ହେତୁ ଏକ ଜିପ୍ ନଦୀରେ ଖସିପଡିଥିଲା ଗଙ୍ଗା ନଦୀକୁ। ସତେବେଳେ ଜିପରେ ୧୧ ଜଣ ଥିଲେ। ସମସ୍ତେ ନଦୀ ଜଳରେ ଭାସିଯାଇଥିଲେ। ରାଜ୍ୟ ବିପର୍ଯ୍ୟୟ ମୁକାବିଲା ବାହିନୀ ଦ୍ୱାରା ପାଞ୍ଚ ଜଣଙ୍କୁ ଉଦ୍ଧାର କରାଯାଇଥିବାବେଳେ ତିନି ଜଣଙ୍କ ମୃତଦେହ ଉଦ୍ଧାର କରାଯାଇଛି ଓ ବାକି ତିନିଜଣଙ୍କ ସନ୍ଧାନ ଜାରି ରହିଛି। ସେପଟେ ପାଣିପାଗ ବିଭାଗ ହିମାଚଳ ପ୍ରଦେଶକୁ ରେଡ ଆଲର୍ଟ ଜାରି କରିଥିବା ବେଳେ ଦିଲ୍ଲୀ, ପଞ୍ଜାବ, ଉତ୍ତରାଖଣ୍ଡ ପାଇଁ ଜାରି କରିଛି ଅରେଞ୍ଜ ୱାର୍ନିଂ।