ପିଟି ପିଟି ମାରିଦେଲା ପୁଅକୁ

ବରଗଡ ଜିଲ୍ଲା ବରପାଲି ଥାନା ଅଧୀନ କୁଶନପୁରୀ ହରିଜନ ବସ୍ତିରେ ଅଭାବନୀୟ ଘଟଣା। ପୁଅକୁ କାଠ ଫାଳିଆରେ ପିଟି ପିଟି ବାପା ମାରିଦେଇଥିବା ଅଭିଯୋଗ । ସୂଚନା ମୁତାବକ, ଗୁରୁବାର ରାତିରେ ରାଜେନ୍ଦ୍ର ନାଗଙ୍କ ୩୮ ବର୍ଷୀୟ ମଝିଆଁ ପୁଅ ଯୋଗେଶ୍ଵର ନାଗ ନିଶାସକ୍ତ ଅବସ୍ଥାରେ ଘରେ ପହଞ୍ଚିବା ପରେ ତାଙ୍କୁ ବାହା କରାଯାଉନଥିବାକୁ ନେଇ ପାଟିତୁଣ୍ଡ କରିଥିଲେ। ଏହାକୁ ନେଇ ରାଜେନ୍ଦ୍ର, ତାଙ୍କ ବଡପୁଅ ଜଗଦୀଶ ନାଗ, ସାନପୁଅ ବୃନ୍ଦାବନ ନାଗ ଓ ମା ସୀତା ନାଗଙ୍କ ମଧ୍ୟରେ ବଚସା ହୋଇଥିଲା।

ପରେ ମାଆ ସୀତା ଓ ସାନପୁଅ ବୃନ୍ଦାବନ ଶୋଇବାକୁ ଚାଲିଯାଇଥିଲେ ଅନ୍ୟଏକ କୋଠରୀକୁ। ହେଲେ ପୁଅର ବ୍ୟବହାରରେ ଉତ୍କ୍ଷିପ୍ତ ହୋଇଯାଇଥିଲେ ରାଜେନ୍ଦ୍ର। ତାଙ୍କୁ ନିଦ ହୋଇନଥିଲା। ସେ ଯୋଗେଶ୍ବର ଶୋଇଥିବା ଘରେ ପହଞ୍ଚି ଏକ କାଠଫାଳିଆରେ ଯୋଗେଶ୍ବରକୁ ପିଟିଚାଲିଥିଲେ। ଏଥିରେ ବଡ ପୁଅ ଜଗଦୀଶ ମଧ୍ୟ ସାମିଲ ହୋଇଥିଲା।

ଉଭୟ ଯୋଗେଶ୍ବରଙ୍କୁ ନିଶାସକ୍ତ ଅବସ୍ଥାରେ ପିଟି ପିଟି ମାରିଦେଇଥିଲେ। ଏହା ପରେ ବାପା, ପୁଅ ମିଶି ଯୋଗେଶ୍ୱରଙ୍କ ମୃତଦେହକୁ ଘର ବାହାରେ ପକାଇଦେଇଥିଲେ ଓ ପ୍ରମାଣ ନଷ୍ଟ କରିବାକୁ ଘରେ ପଡିଥିବା ରକ୍ତ ଛିଟା ପୋଛାପୋଛି କରିଦେଇଥିଲେ। ସକାଳୁ ମା ଓ ସାନଭାଇ ଉଠି ଦେଖିଲା ବେଳକୁ ଯୋଗେଶ୍ଵରଙ୍କ ମୃତଦେହ ଘର ବାହାରେ ପଡିଥିଲା।

ଘଟଣା ପ୍ରଘଟ ହେବା ପରେ ପୋଲିସକୁ ଖବର ଦିଆଯାଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ପୋଲିସ ବାପା ଓ ଦୁଇ ପୁଅଙ୍କୁ ଅଟକ ରଖି ପଚରା ଉଚରା କରିବା ସହ ଶବ ବ୍ୟବଚ୍ଛେଦ ପାଇଁ ପଠାଇଦେଇଛି। ଏଠାରେ କହି ରଖୁଛୁ କି ରାଜେନ୍ଦ୍ର ଗ୍ରାମରଖୀ ଭାବେ କାମ କରୁଛନ୍ତି।