ଅଧାବାଟରେ ଅଟକିଲା ପୁରୀ-ହାୱଡା ବନ୍ଦେ ଭାରତ ଏକ୍ସପ୍ରେସ । ଯାନ୍ତ୍ରିକ ତ୍ରୁଟି ଯୋଗୁଁ ଭଦ୍ରକ ମଞ୍ଜୁରୀ ରୋଡରେ ଟ୍ରେନ୍ ଅଟକିଯିବାରୁ ଯାତ୍ରୀ ହନ୍ତସନ୍ତ । ଦୀର୍ଘ ସମୟ ଧରି ଟ୍ରେନ୍ ଅଟକିବା ସହ ମୁଖ୍ୟଦ୍ୱାର,ଝରକା ଖୋଲୁ ନଥିବାବେଳେ ଶୀତତାପ ନିୟନ୍ତ୍ରଣ ବ୍ୟବସ୍ଥା ମଧ୍ୟ କାମ କରୁନାହିଁ । ତେବେ ଯାତ୍ରୀମାନେ ଜରୁରୀକାଳୀନ ଡୋର ଏବଂ ଝରକା ଖୋଲିଥିବା ସୂଚନା ମିଳିଛି । ଗତ ୧୮ ତାରିଖରେ ଆରମ୍ଭ ଟ୍ରେନର ଦୁରବସ୍ଥାକୁ ନେଇ ସମସ୍ତଙ୍କ ମଧ୍ୟରେ ଉଦବେଗ ସୃଷ୍ଟି କରିଛି । କାଳବୈଶାଖୀ ଯୋଗୁଁ ଗଛ ପଡ଼ି ଏଭଳି ପରିସ୍ଥିତି ସୃଷ୍ଟି ହୋଇଛି ବୋଲି ରେଳ ବିଭାଗ କହିଥିଲେ ସୁଦ୍ଧା ଏହା ପ୍ରକୃତିରେ ବିଭାଗର ଅବହେଳା ବୋଲି ଜଣାପଡ଼ିଛି ।
ଅପରାହ୍ଣ ୪ଟା ୩୦ରୁ ଯାନ୍ତ୍ରିକ ତ୍ରୁଟି କାରଣରୁ ବ୍ରିଜ ଉପରେ ଟ୍ରେନ ଅଟକି ରହିଛି । ଦୀର୍ଘ ୨ ଘଣ୍ଟା ପରେ ମଧ୍ୟ ରେଳ କର୍ମଚାରୀମାନେ ସ୍ବାଭାବିକ ଅବସ୍ଥାକୁ ଫେରାଇ ଆଣିବାରେ ଫେଲ୍ ମାରିଥିଲେ । ବିଳମ୍ବରେ ଘଟଣାସ୍ଥଳକୁ ଏକ ଟେକ୍ନିକାଲ୍ ଟିମ୍ ଯାଇଥିଲା । ଏକ ଡିଜେଲ ଇଞ୍ଜିନ କୋଲକାତାରୁ ଅଣାଯାଇ ଟ୍ରେନକୁ ଟାଣି ନେବା ଲାଗି ବ୍ୟବସ୍ଥା କରାଯାଇଛି । ଏହି ଘଟଣା ଏବେ ବନ୍ଦେ ଭାରତ ଏକ୍ସପ୍ରେସ୍ ଚଳାଚଳ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
