ଦୈବୀ ଶକ୍ତି ଆଗରେ ମୁଣ୍ଡ ନୁଆଁଇଛି ଜଳ ତାଣ୍ଡବ। ହିମାଚଳ ପ୍ରଦେଶ ସମେତ ଜମ୍ମୁ କାଶ୍ମୀର, ଉତ୍ତରାଖଣ୍ଡ, ଦିଲ୍ଲୀରୁ ଆସୁଛି ବନ୍ୟା ଜଳର ତାଣ୍ଡବ ଲୀଳା। ବାଦଳ ଫଟା ବର୍ଷାରେ ପାହାଡୀ ଜଳ ସ୍ରୋତ କୋଠା, ଗାଡି, ପୋଲ, ରାସ୍ତା, ପାହାଡ ସବୁକୁ ବୁହାଇ ନେଇ ହାହାକାର ମଚାଇଥିବା ବେଳେ କିନ୍ତୁ ମୁଣ୍ଡ ନୁଆଁଇଛି ଦେବ ଦେବ ମହାଦେବଙ୍କ ନିକଟରେ। ଶନିବାରରୁ ଉତ୍ତର ଭାରତରେ ହୋଇଥିଲା ଆକାଶୀ ପ୍ରଳୟରେ ସବୁଠାରୁ ଆଧିକ ପ୍ରଭାବିତ ହୋଇଛି ହିମାଚଳ ପ୍ରଦେଶ। ରାଜ୍ୟର ୧୧ ଜିଲ୍ଲାରେ ଖେଳିଯାଇଥିଲା ହାହାକାର। କେଦାରନାଥ ଟ୍ରାଜେଡିର ପୁନରାବୃତ୍ତି ଆଶଙ୍କାରେ ଆତଙ୍କିତ ହୋଇଉଠିଥିଲେ ରାଜ୍ୟବାସୀ।
ବାଦଲ ଫଟା ବର୍ଷାରେ ରାଜ୍ୟରେ ସୃଷ୍ଟି ହୋଇଥିବା ବନ୍ୟାରେ ୫୪ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ୯୨ ଜଣ ଆହତ ହୋଇଛନ୍ତି। ପାହାଡରୁ ପ୍ରଖର ଗତିରେ ଆଗେଇ ଆସୁଥିବା ଜଳ ସ୍ରୋତରେ କୋଠା ବାଡି ସବୁ ଧୋଇ ଯାଇଛି। ରାଜ୍ୟର ଅନେକ ସ୍ଥାନରେ ପୋଲ, ରାଜପଥ ଧୋଇଯାଇଛି ବନ୍ୟା ଜଳରେ। ଏଥିରେ ମଣ୍ଡି, ଉନା, ବିଳାଶପୁର, ହମିରପୁର, କୁଲ୍ଲୁ, ମନାଲି ଅଧିକ ପ୍ରଭାବିତ ହୋଇଥିବା ଜଣାପଡିଛି। ବହୁ ଘର ପାଣିରେ ସମ୍ପୂର୍ଣ୍ଣ ବୁଡି ଧସେଇ ପଡିଥିବା ବେଳେ ପୁଣି କେଉଁଠି ସୁଅରେ ଭାସି ଯାଇଛି।
ରାଜ୍ୟବ୍ୟାପୀ ସବୁଠି ଜଳ ତାଣ୍ଡବ ନୂଆ ପୁରୁଣା ବହୁ କୋଠାକୁ ଧୋଇନେଇଥିବା ବେଳେ କିନ୍ତୁ ମଣ୍ଡିର ପଞ୍ଚବକ୍ତ୍ର ମହାଦେବ ମନ୍ଦିରର କୌଣସି କ୍ଷତି କରି ପାରିନାହିଁ। ବ୍ୟାସର ବନ୍ୟା ସୁଅ ପ୍ରାରମ୍ଭିକ ଅବସ୍ଥାରେ ଯେତେବେଳେ କୋଠା ବାଡିକୁ ଧୋଇନେଉଥିଲା ସେତେବେଳେ ଲୋକେ ଭ୍ବାବିଥିଲେ ଏହି ସୁଅରୁ ରକ୍ଷା ପାଇବେନି ପଞ୍ଚବକ୍ତ୍ରେଶ୍ବର। ମନ୍ଦିରର ମୁଖଶାଳା ସମ୍ପୂର୍ଣ୍ଣ ବୁଡି ଯାଇଥିବା ବେଳେ ଗର୍ଭ ଗୃହରେ ବନ୍ୟା ଜଳ ଖେଳେଇଥିଲା ଭଉଁରୀ। କିନ୍ତୁ ବର୍ଷା ଥମିବା ସହ ଯେତେବେଳେ ହ୍ରାସ ପାଇଥିଲା ବନ୍ୟା ଜଳ ସମସ୍ତେ ଆଶ୍ଚର୍ଯ୍ୟ ଚକିତ ରହିଯାଇଥିଲେ। କାରଣ ମନ୍ଦିର ପୂର୍ବବତ ଠିଆହୋଇଥିଲା ତା ଜାଗାରେ।
ମନ୍ଦିର ପରିସରରେ ନିର୍ମିତ ସିମେଣ୍ଟ ବେଞ୍ଚକୁ ପାଣି ସୁଅ କ୍ଷତି ପହଞ୍ଚାଇ ଥିବା ବେଳେ କିନ୍ତୁ ମନ୍ଦିର, ଗର୍ଭଗୃହ, ମନ୍ଦିରର ମୂର୍ତ୍ତି ରାଜି ସବୁ କିଛି ସୁରକ୍ଷିତ ରହିଥିଲା। ଠିକ ୧୦ ବର୍ଷ ତଳ କେଦାରନାଥ ମନ୍ଦିର ପରି। ମନ୍ଦାକିନୀର ଜଳପ୍ରଳୟ ଗାଁ ଗଣ୍ଡା, ସହର, ବଜାର ସବୁ ସଫା କରିଦେଇଥିବା ବେଳେ ଯେମିତି କେଦାରନାଥ ମନ୍ଦିରର କୌଣିସ କ୍ଷତି କରି ପାରି ନ ଥିଲା ସେମିତି ମଣ୍ଡିରେ ପ୍ରଳୟ ଖେଳାଇଥିବା ବ୍ୟାସ ନଦୀର ପ୍ରଳୟଙ୍କାରୀ ସୁଅ ହାର ମାନିଲା ପଞ୍ଚବକ୍ତ୍ରେଶ୍ବର ମହାଦେବଙ୍କ ନିକଟରେ। କେବଳ ପଞ୍ଚବକ୍ତ୍ରେଶ୍ୱର ମନ୍ଦିର ନୁହେଁ, ରାଜ୍ୟର ବାବା ବଢୋଲିୟା ମନ୍ଦିର, ରେଣୁକାଜୀ ସିରମୌର ମନ୍ଦିରର ମଧ୍ୟ ଏହି ଜଳ ତାଣ୍ଡବ କୌଣସି କ୍ଷତି କରିପାରି ନାହିଁ। ପୁଣି ଥରେ ପ୍ମମାଣିତ କରିଦେଲା- ଆସୁରିକ ଶକ୍ତିଠାରୁ ବହୁ ଊର୍ଦ୍ଧ୍ୱରେ ଦୈବୀ ଶକ୍ତି। ସେପଟେ ବ୍ୟାସ, ପାର୍ବତୀ, ସତଲେଜ ଆଦି ନଦୀ ଜଳ ତାଣ୍ଡବରେ ରାଜ୍ୟର ୪ହଜାର କୋଟି ଟଙ୍କାର କ୍ଷୟକ୍ଷତି ହୋଇଥିବା ମୁଖ୍ୟମନ୍ତ୍ରୀ ସୁଖବିନ୍ଦର ସୁଖୁ ପ୍ରାରମ୍ଭିକ ରିପୋର୍ଚ ଆଧାରରେ କହିଛନ୍ତି।