ଫ୍ରେଞ୍ଚ ଓପନ ଫାଇନାଲରେ ଅଭିଜ୍ଞ ନୋଭାକ୍ ଜୋକୋଭିକ୍ ଓ କାସପର ରୁଡ୍ । ରବିବାର ଅର୍ଥାତ୍ ଆସନ୍ତାକାଲି ଟାଇଟଲ୍ ପାଇଁ ଲଢ଼ିବେ ଦୁଇ ଖେଳାଳି । ସେମିରେ ଦମଦାର ପ୍ରଦର୍ଶନ କରି ବିଜୟୀ ହେବା ପରେ ଏବେ ଚାମ୍ପିଅନ୍ ହେବାକୁ ପ୍ରୟାସ କରିବେ ଦୁଇ ଖେଳାଳି ।
ବିଶ୍ୱର ନମ୍ବର ୱାନ ଖେଳାଳି ତଥା ସ୍ପେନ୍ ତାରକା ଆଲକାରାଜ ଏବଂ ଅଭିଜ୍ଞ ତଥା ସର୍ବିୟା ତାରକା ଜୋକୋଭିକଙ୍କ ମଧ୍ୟରେ ପ୍ରଥମ ସେମି ଖେଳାଯାଇଥିଲା । ଆରମ୍ଭରୁ କଡ଼ା ମୁକାବିଲା ହୋଇଥିବା ବେଳେ ୬-୩ରେ ପ୍ରଥମ ସେଟ୍ ଜିତିଥିଲେ ଜୋକୋଭିକ୍ । ତେବେ ଲଢୁଆ ପ୍ରଦର୍ଶନ କରି ଦ୍ୱିତୀୟ ସେଟକୁ ୭-୫ରେ ଜିତି ନେଇଥିଲେ ଆଲକାରାଜ । ତୃତୀୟ ସେଟ୍ ଆରମ୍ଭରୁ ଆଲକାରାଜ ମାଂସପେଶୀଜନିତ ସମସ୍ୟାରେ ପଡ଼ିଥିଲେ । ତେଣୁ ଏହାର ଫାଇଦା ନେଇ ତୃତୀୟ ଓ ଚତୁର୍ଥ ସେଟ୍ ଜିତି ନେଇଥିଲେ ଜୋକୋଭିକ୍ । ୩-୧ରେ ଆଲକାରାଜଙ୍କୁ ପରାସ୍ତ କରି ଫ୍ରେଞ୍ଚ ଓପନ ଫାଇନାଲରେ ଏଣ୍ଟ୍ରି କରିଛନ୍ତି ଜୋକୋଭିକ୍ ।
ସେପଟେ, ଦ୍ୱିତୀୟ ସେମିରେ ମୁହାଁମୁହିଁ ହୋଇଥିଲେ ଆଲେକଜାଣ୍ଡର ଜିଭେରେଭ ଏବଂ କାସପର ରୁଡ୍ । ଦମଦାର ପ୍ରଦର୍ଶନ କରି ମୁକାବିଲାକୁ ଏକତରଫା କରିଥିଲେ ରୁଡ୍ । ୩-୦ରେ ଜିଭେରେଭଙ୍କୁ ହରାଇ ଲଗାତାର ଦ୍ୱିତୀୟ ଥର ପାଇଁ ଫ୍ରେଞ୍ଚ ଓପନ ଫାଇନାଲରେ ପ୍ରବେଶ କରିଛନ୍ତି ରୁଡ୍ ।
ଏଯାଏ କ୍ୟାରିୟରରେ ୨୨ଟି ଗ୍ରାଣ୍ଡସ୍ଲାମ୍ ଜିତି ନାଡାଲଙ୍କ ସମକକ୍ଷ ଅଛନ୍ତି ଜୋକୋଭିକ । ଫ୍ରେଞ୍ଚ ଓପନ ଜିତି ଇତିହାସ ରଚିବା ଅପେକ୍ଷାରେ ସର୍ବିୟା ତାରକା । ସେପଟେ, ପ୍ରଥମ ଗ୍ରାଣ୍ଡସ୍ଲାମ ଟାଇଟଲ୍ ହାସଲ ଲକ୍ଷ୍ୟରେ ଲଢ଼ିବେ ରୁଡ୍ । ଗତବର୍ଷ ସେ ଫ୍ରେଞ୍ଚ ଓପନ ଏବଂ ୟୁଏସ ଓପନ୍ ରନର୍ସ ଅପ୍ ଥିଲେ ।
