Category: ରାଜ୍ୟ ଖବର

ଯାତାୟାତ ସୁଧାର ପାଇଁ ପୁରୀ ପୋଲିସର କାର୍ଯ୍ୟ

ପୁରୀର ସର୍ବସାଧାରଣ ରାସ୍ତାଗୁଡ଼ିକୁ ବ୍ୟବସ୍ଥିତ କରି ଯାତାୟାତ ଜାମ ହ୍ରାସ କରିବା ଉଦ୍ଦେଶ୍ୟରେ ପୁରୀ ପୋଲିସ ପକ୍ଷରୁ ଆଜି ଏକ ବିଶେଷ ଅଭିଯାନ ଆରମ୍ଭ କରାଯାଇଛି | ଏହି ଅଭିଯାନରେ ସହରର ବିଭିନ୍ନ ଛକ, ବଜାର ଓ ବ୍ୟସ୍ତ ରାସ୍ତାରୁ ଦୀର୍ଘ ସମୟ ଧରି ପାର୍କ କରି ରଖାଯାଇଥିବା ୨୬ଟି ପୁରୁଣା ଓ ଅବ୍ୟବହୃତ ଯାନବାହନକୁ ହଟାଯାଇଛି। ସବୁ ଯାନଗୁଡ଼ିକ ମଧ୍ୟରୁ ଅନେକ ଯାନ ଅଚଳ ଅବସ୍ଥାରେ ଥିଲେ, ଯାହା ଯାତାୟାତରେ ବିକଳ୍ପହୀନ ବାଧା ସୃଷ୍ଟି କରୁଥିଲା। ବିଶେଷତଃ ଧାର୍ମିକ ଓ ପର୍ଯ୍ୟଟନ ସହର ପୁରୀ ଦିନକୁ ଦିନ ଭିଡ଼ ବୃଦ୍ଧି ପାଉଥିବାରୁ ଏହି ଅବ୍ୟବସ୍ଥିତ ଯାନପାର୍କିଂ ଆମ୍ବୁଲାନ୍ସ, ଅଗ୍ନିଶମ ବାହିନୀ ପରି ଆପତ୍କାଳୀନ ସେବାକୁ ମଧ୍ୟ ବାଧା ସୃଷ୍ଟି କରୁଥିଲା |

ଏସ୍‌ପି ପୁରୀ ପ୍ରତୀକ ସିଂଙ୍କ ନିର୍ଦ୍ଦେଶରେ ଟ୍ରାଫିକ ପୋଲିସ ଏହି କାର୍ଯ୍ୟାନୁଷ୍ଠାନ ନେଇଛନ୍ତି | ସେ ଜଣାଇଛନ୍ତି ଯେ, ସହରର ଯାତାୟାତ ବ୍ୟବସ୍ଥାକୁ ସୁଚାରୁ କରିବା ପାଇଁ ଏପରି ଅଭିଯାନ ନିୟମିତ ଭାବରେ ଜାରି ରହିବ।

ପୁରୀ ପୋଲିସ ନାଗରିକଙ୍କୁ ଅନୁରୋଧ କରିଛି ଯେ , ଦୀର୍ଘ ସମୟ ପର୍ଯ୍ୟନ୍ତ ସାର୍ବଜନିକ ରାସ୍ତାରେ ଯାନବାହନ ପାର୍କ କରି ରଖିବେ ନାହିଁ। କୌଣସି ଯାନ ଦୀର୍ଘ ସମୟ ଧରି ରାସ୍ତାରେ ରହିଥିଲେ, ସେଥିପାଇଁ ସହରବାସୀ 9438916388 ନମ୍ବରରେ ଟ୍ରାଫିକ ଥାନାକୁ ସୂଚନା ଦେଇପାରିବେ। ପୋଲିସର ମତାନୁସାରେ, ସମସ୍ତଙ୍କ ସହଯୋଗ ଦ୍ୱାରା ପୁରୀକୁ ଆହୁରି ସୁଚାରୁ, ସୁରକ୍ଷିତ ଓ ଯାତାୟାତମୁକ୍ତ ସହର ରୂପେ ଗଢ଼ି ତୋଳାଯାଇପାରିବ।
କୋରେଇର ବିକାଶ ପାଇଁ ‘କୋରେଇ ଭିଜନ ସମ୍ମିଳନୀ’ — ସମାଜିକ ଓ ପ୍ରାଶାସନିକ ସହଯୋଗର ପ୍ରତିଶ୍ରୁତି

କୋରେଇ ଉନ୍ନୟନ ପରିଷଦର ମିଳିତ ପ୍ରୟାସରେ ଯାଜପୁର ରୋଡ଼ ର ‘ହୋଟେଲ୍ ରୟାଲ୍ କଳିଙ୍ଗ’ ପରିସରରେ କୋରେଇ ଭିଜନ ସମ୍ମିଳନୀ ଆୟୋଜିତ ହୋଇଛି। ମୁଖ୍ୟ ଉପଦେଷ୍ଟା ମନୋଜ ଜେନାଙ୍କ ତତ୍ତ୍ୱାବଧାନରେ ହୋଇଥିବା ଏହି ସମ୍ମିଳନୀରେ କୋରେଇର ବିକାଶ, ଅବହେଳିତ ଗ୍ରାମଞ୍ଚଳ, ଓ ସମାଜର ପଛୁଆ ଶ୍ରେଣୀକୁ ସୁବିଧା ସୁଯୋଗ ଦେବା ବିଷୟରେ ଗଭୀର ଆଲୋଚନା କରାଯାଇଛି |

ଅତିଥି ଭାବେ ଯୋଗ ଦେଇଥିବା କଟକ ବାରବାଟୀର ପୂର୍ବତନ ବିଧାୟକ ମହମଦ ମୋକିମ, ଓଡ଼ିଶା ସୂଚନା ଅଧିକାର ଆନ୍ଦୋଳନର ମୁଖ୍ୟ ଆବାହକ ପ୍ରଦୀପ ପ୍ରଧାନ, ଓଡ଼ିଶା ଅଭିଭାବକ ମହାସଂଘର ଅଧ୍ୟକ୍ଷ ବାସୁଦେବ ଭଟ ଓ କୋରେଇ ଉନ୍ନୟନ ପରିଷଦର ସଭାପତି ଶ୍ରୀଧର ଦାସ ଉପସ୍ଥିତ ଥିଲେ।ସମ୍ମିଳନୀରେ କୋରେଇର ପଛପଡ଼ା ବ୍ୟବସ୍ଥା, ଅବହେଳିତ ଅଞ୍ଚଳରେ ସରକାରୀ ଯୋଜନାର ଅଭାବ, ଶିକ୍ଷା,ସ୍ୱାସ୍ଥ୍ୟ,ଯାତାୟାତ ଓ ଯୁବ ଉନ୍ନତିକୁ ନେଇ ଗୁରୁତ୍ୱପୂର୍ଣ୍ଣ ମତପ୍ରକାଶ ପାଇଥିଲା |

ମୁଖ୍ୟ ଉପଦେଷ୍ଟା ମନୋଜ ଜେନା ନିଜ ବକ୍ତବ୍ୟରେ କହିଥିଲେ ଯେ, କୋରେଇର ଅନେକ ଗାଁ ବହୁ ବର୍ଷ ଧରି ଅବହେଳିତ ହେଉଛନ୍ତି ଏବଂ ଏହି ଅଞ୍ଚଳର ହକର ଲଢ଼େଇ ଆଗାମୀ ଦିନରେ ଆଉ ବି ଯୋରଦାର ହେବ। ପୂର୍ବତନ ବିଧାୟକ ମହମଦ ମୋକିମ କହିଥିଲେ ଯେ, କୋରେଇ ଓ ପାଶ୍ୱର୍ବତୀ ଅଞ୍ଚଳର ଅବହେଳା ସଂପର୍କରେ ସରକାରକୁ ଉଚିତ ଉତ୍ତର ଦେବା ଆବଶ୍ୟକ। ସେ କୋରେଇବାସୀଙ୍କୁ ନିଜ ହକ ପାଇଁ ଏକତାବଦ୍ଧ ହେବା ପରାମର୍ଶ ଦେଇଥିଲେ।

ଅତିଥିମାନେ ଏକ ସ୍ୱରରେ କହିଥିଲେ ଯେ, ସାଧାରଣ ଲୋକଙ୍କ ସେବା ଓ ସମାଜିକ ଦାୟିତ୍ୱ ପାଳନ ହିଁ ରାଜନୀତି ଓ ସଂଗଠନର ପ୍ରଥମ କର୍ତ୍ତବ୍ୟ। କୋରେଇର ପାଇଁ ଜାରି ଥିବା ଆନ୍ଦୋଳନ ଓ ଉନ୍ନୟନ ଧାରାକୁ ଆଗାମୀ ଦିନରେ ଆଉ ଶକ୍ତିଶାଳୀ କରାଯିବ ବୋଲି ଆଶ୍ୱାସନ ଦିଆଯାଇଛି। କୋରେଇ ଉନ୍ନୟନ ପରିଷଦ ଜଣାଇଛି ଯେ, ଅଞ୍ଚଳର ବିକାଶ ପାଇଁ ଗଠନାତ୍ମକ ପ୍ରୟାସ, ନୂଆ ଯୋଜନା ଓ ସାମୁଦାୟିକ ସହଯୋଗ ଜାରି ରହିବ।
ଓଡ଼ିଶା ହାଇକୋର୍ଟଙ୍କ କଡ଼ା ରାୟ: ଅତ୍ୟାଚାର କଲେ ସମ୍ପତ୍ତିରୁ ବେଦଖଲ ହେବେ ପୁଅ-ବୋହୁ

ଗୁରୁତ୍ବପୁର୍ଣ ରାୟ ଦେଲେ ହାଇକୋର୍ଟ। ଅତ୍ୟାଚାର କଲେ ସମ୍ପତିରୁ ବେଦଖଲ ହେବେ ପୁଅ ବୋହୁ। ବୃଦ୍ଧ ବାପା, ମାଆଙ୍କୁ ମାନସିକ ଓ ଶାରିରୀକ ନିର୍ଯାତନା ଦେଉଥିବା ପୁଅ, ବୋହୂଙ୍କ ଉପରେ ହାଇକୋର୍ଟଙ୍କ କଡ଼ା ନିର୍ଦ୍ଦେଶ । ଅଦାଲତ ସ୍ପଷ୍ଟ କରିଛନ୍ତି ଯେ, ମାଙ୍କ ଅର୍ଜିତ ସମ୍ପତ୍ତିରେ ପୁଅ କିମ୍ବା ବୋହୂଙ୍କର କୌଣସି ଆଇନଗତ ଅଧିକାର ନାହିଁ। ମା ଚାହିଁଲେ ନିଜ ସମ୍ପତ୍ତିରୁ ପୁଅ, ବୋହୂଙ୍କୁ ବେଦଖଲ କରିପାରିବେ। ନିଜ ଘରୁ ବାହାର ବି କରିପାରିବେ ବୋଲି ଗୁରୁତ୍ବପୂର୍ଣ୍ଣ ରାୟ ଶୁଣାଇଛନ୍ତି ହାଇକୋର୍ଟ। ଯଦି ସନ୍ତାନମାନେ ବୟସ୍କ ପିତାମାତାଙ୍କୁ ମାନସିକ କିମ୍ବା ଶାରୀରିକ ନିର୍ଯାତନା ଦେଇଥାନ୍ତି, ତେବେ ସେମାନଙ୍କୁ ସମ୍ପତ୍ତିରୁ ବେଦଖଲ କରାଯାଇପାରିବ।

ମାମଲାର ଶୁଣାଣି କରି ବିଚାରପତି ଜଷ୍ଟିସ୍ ଆନନ୍ଦ ଚନ୍ଦ୍ର ବେହେରା କହିଛନ୍ତି ଯେ, ମାଙ୍କ ନାମରେ ଥିବା ଓ ସେ ନିଜେ ଅର୍ଜନ କରିଥିବା ସମ୍ପତ୍ତିରେ ସେହି ମା ହିଁ ପୂର୍ଣ୍ଣ ମାଲିକାଣୀ ଅଧିକାରୀ। ଏହି ପରିସ୍ଥିତିରେ ପୁଅ ବୋହୂଙ୍କର ସେଠାରେ ବସୋବାସ କରିବାକୁ କୌଣସି ବାଧ୍ୟତାମୂଳକ ଆଇନଗତ ଦାବି ନାହିଁ। ଅଦାଲତ ଆଉ କହିଛନ୍ତି, ବୃଦ୍ଧ ପିତାମାତାଙ୍କ ସୁରକ୍ଷା ଓ ସମ୍ମାନ ସୁନିଶ୍ଚିତ କରିବା ଆଇନର ମୂଳ ଉଦ୍ଦେଶ୍ୟ। ଯେପରି ସନ୍ତାନମାନେ ଅତ୍ୟାଚାର କରିବେ, ସେମାନେ ସମ୍ପତ୍ତିରେ ରହିବା ଅଧିକାର ହରାଇପାରିବେ। ଏହି ରାୟକୁ ବୃଦ୍ଧ ପିତାମାତାଙ୍କ ପକ୍ଷରେ ଏକ ଦୃଢ଼ ବାର୍ତ୍ତା ଭାବେ ଦେଖାଯାଉଛି।
ଚାଷୀ ପ୍ରସଙ୍ଗରେ ଲଗାତାର ୪ଥ ଦିନ ତେଜ ରାଜନୀତି: ସାଢେ ୧୧ଟା ଯାଏଁ ମୁଲତବୀ ଓଡ଼ିଶା ବିଧାନସଭା

ଆଜି ବି ପୁଣିଥରେ ଓଡ଼ିଶା ବିଧାନସଭାର କାର୍ଯ୍ୟ ସ୍ବାଭାବିକ ଭାବେ ଚାଲିପାରିଲା ନାହିଁ। ଚାଷୀମାନଙ୍କ ସମସ୍ୟାକୁ କେନ୍ଦ୍ର କରି ବିରୋଧୀ ଦଳର ଲଗାତାର ଚତୁର୍ଥ ଦିନର ହଙ୍ଗାମା ଫଳରେ ଗୃହର କାର୍ଯ୍ୟକ୍ରମ ପୁଣିଥରେ ବାଧାପ୍ରାପ୍ତ ହେଲା। ସକାଳୁ ଗୃହ ଆରମ୍ଭ ହେବା ସହିତ ବିରୋଧୀ ସଦସ୍ୟମାନେ ଚାଷୀଙ୍କ ଦୁର୍ଦଶା ନେଇ ଜୋରଦାର ପ୍ରତିବାଦ ଆରମ୍ଭ କରିଥିଲେ।

ମୁଣ୍ଡରେ କଳା ପଟି ବାନ୍ଧି ଏବଂ ହାତରେ ପ୍ଲାକାର୍ଡ ଧରି ସଦସ୍ୟମାନେ ଗୃହ ମଧ୍ୟଭାଗକୁ ଆସି ନାରାବାଜି କରିଥିଲେ। “କାନ୍ଦୁଛି ଚାଷୀ, କାନ୍ଦେ ଜନତା”, “କୁଆଡ଼େ ଗଲା ତୁମ ଓଡ଼ିଆ ଅସ୍ମିତା” ପରି ସ୍ଲୋଗାନ୍‌ରେ ସମଗ୍ର ପରିସର କମ୍ପିଉଠିଥିଲା। ପରିସ୍ଥିତି ଏପରି ଅଣାୟତ୍ତ ହୋଇଯାଇଥିଲା ଯେ ଗୃହରେ ନିୟମିତ କାର୍ଯ୍ୟ ସମ୍ପାଦନ କରିବା ପ୍ରାୟ ଅସମ୍ଭବ ହୋଇପଡ଼ିଥିଲା।

ବାଚସ୍ପତି ସୁରମା ପାଢୀ ପକ୍ଷରୁ ପୁନଃପୁନି ଶାନ୍ତି ରକ୍ଷା ପାଇଁ ଅନୁରୋଧ କରାଯାଇଥିଲେ ମଧ୍ୟ ବିରୋଧୀ ସଦସ୍ୟମାନେ ଶାନ୍ତ ହୋଇନଥିଲେ। ଫଳସ୍ୱରୂପ, ପ୍ରଶ୍ନକାଳ କେବଳ ପାଞ୍ଚ ମିନିଟ୍ ପର୍ଯ୍ୟନ୍ତ ଚାଲିପାରିଥିଲା। ଗୃହକାର୍ଯ୍ୟ ସଠିକ୍ ଭାବେ ଚାଲିନଥିବାରୁ ବାଚସ୍ପତି ଶେଷରେ ଗୃହକୁ ସାଢେ ୧୧ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ।

ଚାଷୀଙ୍କ ସମସ୍ୟା ନେଇ ସରକାର ଓ ବିରୋଧୀଙ୍କ ମଧ୍ୟରେ ମତଭେଦ ତିବ୍ର ହେଉଥିବା ବେଳେ, ଲଗାତାର ଚାରିଦିନ ଧରି ଗୃହର କାର୍ଯ୍ୟ ବାଧାପ୍ରାପ୍ତ ହେବାରୁ ରାଜ୍ୟର ରାଜନୈତିକ ପରିସ୍ଥିତି ଉପରେ ଚର୍ଚ୍ଚା ବୃଦ୍ଧି ପାଇଛି। ଏପରି ପରିସ୍ଥିତି ଚାଲିଥିଲେ ଆଗାମୀ ଦିନରେ ବିଧାନସଭାର କାର୍ଯ୍ୟସୂଚୀ ଉପରେ ଆହୁରି ପ୍ରଭାବ ପଡ଼ିପାରେ ବୋଲି ରାଜନୈତିକ ବିଶ୍ଳେଷକମାନେ ମତ ପ୍ରକାଶ କରୁଛନ୍ତି।
ବାଲିଆପାଳ ମାଛ ଚାଷୀଙ୍କୁ ଠିକିଦେଲା ସାମୁଦ୍ରିକ ମତ୍ସ୍ୟ ବିଭାଗ, ଡଙ୍ଗା ତିଆରି ପାଇଁ କାର୍ଯ୍ୟାଦେଶ ଦେଲା ହେଲେ ଟଙ୍କା ଦେଲାନି, ଚିନ୍ତାରେ ମତ୍ସ୍ୟଜୀବୀ

ସରକାର ମତ୍ସ୍ୟଜିବୀ ମାନଙ୍କ ପାଇଁ ବିଭିନ୍ନ ପ୍ରକାରର ଯୋଜନା କରିଛନ୍ତି, ମାତ୍ର କିଛି ଦୁର୍ନୀତିଗ୍ରସ୍ତ ଅସାଧୁ ଅଧିକାରୀ ମାନଙ୍କ ପାଇଁ ଏହି ଯୋଜନା ହେଉଛି ବାଟବଣା,ସମୁଦ୍ରରୁ ମାଛ ମାରି ଜୀବିକା ନିର୍ବାହ କରୁଥିବା ମତ୍ସ୍ୟଜୀବୀ ମାନେ ଡଙ୍ଗା ତିଆରି ସହାୟତା ପାଇଁ ମନୋନୀତ ହୋଇଥିଲେ ମଧ୍ୟ ଅଧିକାରୀ ମାନଙ୍କୁ ହାତଗୁଞ୍ଜା ଦେଇ ନପାରି ସହାୟତା ପାଇବାରୁ ବଞ୍ଚିତ ହୋଇଛନ୍ତି । ବାଲେଶ୍ବର ବାଲିଆପାଳ ରୁ ଦେଖନ୍ତୁ ଏହି ରିପୋର୍ଟ।

ଦୁର୍ନୀତିଗ୍ରସ୍ତ ଅଧିକାରୀଙ୍କ ପାଇଁ ରୃଣ ଭାରରେ ବୁଡ଼ିଲେ ମତ୍ସ୍ୟଜୀବୀ, ସରକାରଙ୍କ ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନାରୁ ଡଙ୍ଗା ତିଆରି ପାଇଁ କାର୍ଯ୍ୟାଦେଶ ପାଇଲେ,ମାତ୍ର ହାତଗୁଞ୍ଜା ଦେଇ ନପାରିବାରୁ ଟଙ୍କା ପାଇଲେନି, ଯାହା ଫଳରେ ଡଙ୍ଗା ତିଆରି ପାଇଁ କରିଥିବା ଋଣ ପରିଶୋଧ କରି ନପାରି ୠଣ ଭରରେ ବୁଡ଼ି ରହିଛନ୍ତି, ଏଭଳି ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ସମୁଦ୍ର ଉପକୂଳବର୍ତ୍ତୀ ଚୈମୁଖ ଏବଂ ଡଗରା ଅଞ୍ଚଳରେ,୨୦୨୨-୨୩ ଆର୍ଥିକ ବର୍ଷରେ ଏହି ଅଞ୍ଚଳରେ ୬ ଜଣ ମତ୍ସ୍ୟଜୀବୀଙ୍କୁ ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନାରେ ଯନ୍ତ୍ରଚାଳିତ ଡଙ୍ଗା ତିଆରି ପାଇଁ ବିଭାଗୀୟ ଅଧିକାରୀ କାର୍ଯ୍ୟାଦେଶ ଦେଇଥିଲେ, ହିତାଧିକାରୀ ମାନେ ବ୍ୟାଙ୍କ ଋଣ ଏବଂ ଧାର ଉଧାରି କରି ଡଙ୍ଗା ତିଆରି କରି ବିଭାଗୀୟ ଅଧିକାରୀ ଙ୍କ ନିକଟକୁ ଦୈଡି ଦୈଡି ନୟାନ୍ତ ହୋଇଥିଲେ ମଧ୍ୟ ଏଥିପ୍ରତି ଅଧିକାରୀ କର୍ଣ୍ଣପାତ କରୁ ନାହାନ୍ତି କି ଜିଓ ଟ୍ୟାଗ କରୁ ନାହାନ୍ତି,ଯାହା ଫଳରେ ଉଧାର ଟଙ୍କା ଫେରସ୍ତ କରି ନପାରି ଚିନ୍ତାରେ ପଡ଼ିଛନ୍ତି ।

ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନାରେ ଡଗରା ଏବଂ ଚୈମୁଖ ଅଞ୍ଚଳରୁ ୨୦ ଜଣ ମତ୍ସ୍ୟଜୀବୀଙ୍କୁ ଯନ୍ତ୍ରଚାଳିତ ଡଙ୍ଗା ତିଆରି କରି କାର୍ଯ୍ୟାଦେଶ ମିଳିଥିଲା, ବାଲିଆପାଳ ରେ ସାମୁଦ୍ରିକ ମତ୍ସ୍ୟ ବିଭାଗ କାର୍ଯ୍ୟାଳୟ ଥାଇ ମଧ୍ୟ ଚନ୍ଦନେଶ୍ୱର ସାମୁଦ୍ରିକ ମତ୍ସ୍ୟ ବିଭାଗ କାର୍ଯ୍ୟାଳୟ ମାଧ୍ୟମରେ ୧୪ ଜଣକ ଭେରିଫିକେସନ ହୋଇ ଟଙ୍କା ମିଳିଲା ମାତ୍ର ବର୍ତ୍ତମାନ ସୁଦ୍ଧା ୬ ଜଣଙ୍କର ଭେରିଫିକେସନ ହେଲା ନାହିଁ କି ଟଙ୍କା ମିଳିଲା ନାହିଁ, ସୁଚନା ଅନୁସାରେ ଚନ୍ଦନେଶ୍ୱର ସାମୁଦ୍ରିକ ମତ୍ସ୍ୟ ବିଭାଗ ଅଧିକାରୀ ଅଧିନରେ ଥିବା ବିଲ୍ଡର ମଧ୍ୟରେ ୩୦ ପ୍ରତିଶତ ହାତଗୁଞ୍ଜା ଯେଉଁ ମାନେ ଦେଉଛନ୍ତି ସେମାନଙ୍କୁ ଡଙ୍ଗା ତିଆରି ବାବଦରେ ଟଙ୍କା ମିଳୁଛି ଯେଉଁ ମାନେ ହାତଗୁଞ୍ଜା ଦେବାକୁ ବାରଣ କରିଛନ୍ତି ସେମାନଙ୍କୁ ଟଙ୍କା ମିଳୁନାହିଁ ବୋଲି ଅଭିଯୋଗ ହୋଇଛି, ଯାହାଫଳରେ ବାଲିଆପାଳ ୬ ଜଣ ମତ୍ସ୍ୟଜୀବୀଙ୍କୁ ବର୍ତ୍ତମାନ ସୁଦ୍ଧା ସେମାନଙ୍କ ଟଙ୍କା ମିଳୁନାହିଁ,ପୁଣି ୨୦୨୩ -୨୪ ଆର୍ଥିକ ବର୍ଷରେ ବାଲିଆପାଳ ର ୨୭ ଜଣ ଏବଂ ଚନ୍ଦନେଶ୍ୱର ର ୨୧ ଜଣ ଡଙ୍ଗା ତିଆରି କରିବା ପାଇଁ ଆବେଦନ କରିଥିଲେ ମାତ୍ର ଚନ୍ଦନେଶ୍ୱର ର ୧୪ ଜଣକୁ ଡଙ୍ଗା ତିଆରି ପାଇଁ କାର୍ଯ୍ୟାଦେଶ ମିଳିଥିଲା ବେଳେ ବାଲିଆପାଳ ର କାହାକୁ ବି କାର୍ଯ୍ୟାଦେଶ ମିଳି ନଥିଲା,ଯାହାକୁ ନେଇ ରାଜ୍ୟ ମତ୍ସ୍ୟ ନିର୍ଦ୍ଦେଶାଳୟ ଙ୍କ ନିକଟରେ ଅଭିଯୋଗ ହୋଇଥିଲା,ଗତ ୨୦୨୫ ସେପ୍ଟେମ୍ବର ମାସରେ ଚନ୍ଦନେଶ୍ୱର ସାମୁଦ୍ରିକ ମତ୍ସ୍ୟ ଅଧିକାରୀ ଅନନ୍ତ ଜେନା ଏବଂ ବାଲେଶ୍ବର ସାମୁଦ୍ରିକ ମତ୍ସ୍ୟ ଅଧିକାରୀ ସିଏଚ୍ ପଲ୍ଲବୀ ଙ୍କ ବିରୁଦ୍ଧରେ ଅନୁସନ୍ଧାନ ପାଇଁ ନିର୍ଦ୍ଦେଶ ଦେଇଥିଲେ କଟକ ମତ୍ସ୍ୟ ନିର୍ଦ୍ଦେଶାଳୟ, ମାତ୍ର ତାର କୈଣସି କାର୍ଯ୍ୟାନୁଷ୍ଠାନ ହେଉ ନଥିବା ଅଭିଯୋଗ ହୋଇଛି, ତେବେ ଜିଲ୍ଲା ସାମୁଦ୍ରିକ ମତ୍ସ୍ୟ ଅଧିକାରୀ ସିଏଚ୍ ପଲ୍ଲବୀ ଏବଂ ଡଗରା ଅଞ୍ଚଳର ଜଣେ ମତ୍ସ୍ୟଜୀବୀ ନାରାୟଣ ବେହେରା ଙ୍କ ମଧ୍ୟରେ ଫୋନ୍ ଯୋଗେ ହୋଇଥିବା କଥାବାର୍ତ୍ତା ରୁ ଜଣା ପଡୁଛି ଅଧିକାରିଣୀ ଶ୍ରୀମତୀ ପଲ୍ଲବୀ ବୁଲେଇ ବଙ୍କେଇ କହୁଥିବା କଥାରୁ ପିସି କଥାକୁ ସ୍ବୀକାର କରୁଛନ୍ତି ବୋଲି ଜଣାପଡ଼ୁଛି । ସାମୁଦ୍ରିକ ମତ୍ସ୍ୟ ବିଭାଗ ଅଧିକାରୀ ଏନେଇ ବାଲିଆପାଳ ସାମୁଦ୍ରିକ ମତ୍ସ୍ୟ ବିଭାଗ ଅଧିକାରୀଙ୍କୁ ପଚାରିବାରୁ ସେମାନଙ୍କ ଜିଓ ଟ୍ୟାଗ ହୋଇ ନଥିବାରୁ ସେମାନଙ୍କୁ ଡଙ୍ଗା ନିର୍ମାଣ ଅର୍ଥ ମିଳିବ ନାହିଁ ବୋଲି କହିଛନ୍ତି,ତେବେ କାହିଁକି ଜିଓ ଟ୍ୟାଗ ହୋଇନାହିଁ ବୋଲି ପଚାରିବାରୁ ସନ୍ତୋଷଜନକ ଉତ୍ତର ଦେଇ ପାରିନଥିଲେ, ତେବେ ଆସନ୍ତା ୧୫ ଦିନ ମଧ୍ୟରେ କୌଣସି ପଦକ୍ଷେପ ଗ୍ରହଣ କରା ନଗଲେ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ମତ୍ସ୍ୟଜୀବୀ।
ମଣ୍ଡି ଅବ୍ୟବସ୍ଥାରେ ହନ୍ତସନ୍ତ ଚାଷୀ

କେନ୍ଦ୍ରାପଡାର ରାଜନଗର ବ୍ଲକରେ ମିଲରଙ୍କ ମନମାନି ନେଇ ଅଭିଯୋଗ |

କେନ୍ଦ୍ରାପଡା ଜିଲ୍ଲାର ରାଜନଗର ବ୍ଲକରେ ମଣ୍ଡି ଅବ୍ୟବସ୍ଥା ଯୋଗୁଁ ଚାଷୀମାନେ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ମିଲରମାନଙ୍କ ମନମୁଖୀ କାର୍ଯ୍ୟକଳାପ ଓ ଧାନ ଉଠାଣିରେ ବିଳମ୍ବ ହେବାରୁ ମାସ ମାସ ଧରି ମଣ୍ଡିରେ ଚାଷୀଙ୍କ ଧାନ ପଡ଼ି ରହିଛି ବୋଲି ଅଭିଯୋଗ ହୋଇଛି। ଚାଷୀମାନେ ଟୋକନ ପାଇବା ପରେ ନିଜ ମୁଣ୍ଡ ଝାଳକୁ ତୁଣ୍ଡରେ ମାରି ଚାଷ କରିଥିବା ଧାନକୁ ମଣ୍ଡିକୁ ଆଣିଥିଲେ। ନିୟମ ଅନୁସାରେ ମିଲରମାନେ ଗାଡ଼ି ପଠାଇ ଧାନ ସଂଗ୍ରହ କରିବା କଥା ହେଲେ ଟାର୍ଗେଟ୍ ନାହିଁ ବୋଲି କହି ମଣ୍ଡିକୁ ଆସୁନାହାନ୍ତି। ଫଳରେ ଚାଷୀମାନେ ଖରା, ଶୀତ ଓ କାକର ମଧ୍ୟରେ ଦିନରାତି ଧାନକୁ ଜଗି ରହିଛନ୍ତି।

ଦୀର୍ଘଦିନ ଧରି ଖୋଲା ଆକାଶ ତଳେ ପଡ଼ି ରହିବାରୁ ଅନେକ ଧାନ ଶଣ୍ଢ ଓ ମୂଷା ଖାଇ ନଷ୍ଟ କରୁଛି। କେତେକ ସ୍ଥାନରେ ଧାନ ଗଜା ହୋଇଯାଇଥିବା ମଧ୍ୟ ଦେଖାଯାଇଛି। ଚାଷୀମାନେ ଶୀଘ୍ର ଧାନ ଉଠାଣି ଓ ମଣ୍ଡି ବ୍ୟବସ୍ଥା ସୁଧାର ପାଇଁ ପ୍ରଶାସନଙ୍କ ହସ୍ତକ୍ଷେପ ଦାବି କରିଛନ୍ତି।
ବିଧାନସଭାରେ ଆଜି ଅର୍ଥନୈତିକ ସର୍ଭେ ପ୍ରସ୍ତୁତି: ଚାଷୀ ପ୍ରସଙ୍ଗରେ ଗୃହ ହୁଲସ୍ତୁଲ

ଆଜି ବିଧାନସଭାରେ ଉପସ୍ଥାପନ ହେବ ଗୁରୁତ୍ୱପୂର୍ଣ୍ଣ ଅର୍ଥନୈତିକ ସର୍ଭେ ରିପୋର୍ଟ। ଆସନ୍ତାକାଲି ରାଜ୍ୟ ବଜେଟ୍ ପ୍ରସ୍ତୁତି ପୂର୍ବରୁ ଏହି ସର୍ଭେ ରିପୋର୍ଟ ରାଜ୍ୟର ଅର୍ଥନୈତିକ ଅବସ୍ଥା, ବିକାଶ ହାର ଓ ବିଭିନ୍ନ ଖାତାର କାର୍ଯ୍ୟଦକ୍ଷତା ସମ୍ପର୍କରେ ଏକ ସମଗ୍ର ଚିତ୍ର ପ୍ରଦାନ କରିବ। ତେବେ ବଜେଟ ଅଧିବେଶନର ତୃତୀୟ ଦିନରେ ବି ବେସ୍ ସରଗରମ ରହିବ ଗୃହ। ଆଜି ବି ଚାଷୀ ପ୍ରସଙ୍ଗକୁ ନେଇ ଗୃହ ହୁଲସ୍ତୁଲ ହୋଇପାରେ। ରାଜ୍ୟରେ ଧାନ କିଣାରେ ଅବ୍ୟବସ୍ଥା, ମଣ୍ଡି ସମସ୍ୟା ଓ କଟନୀ-ଛଟନୀ ଅଭିଯୋଗକୁ ବିରୋଧୀ ଦଳ ଜୋରଦାର ଭାବେ ଉଠାଇପାରନ୍ତି।
ଯଦି ଗୃହ ସ୍ବଭାବିକ ହୁଏ ତେବେ ପ୍ରଶ୍ନକାଳରେ ଜଳ ସମ୍ପଦ, ରାଜସ୍ୱ ଓ ବିପର୍ଯ୍ୟୟ ପରିଚାଳନା, ଲୋକସମ୍ପର୍କ, ବାଣିଜ୍ୟ ଓ ପରିବହନ ବିଭାଗ ସମ୍ପର୍କିତ ପ୍ରଶ୍ନଉତ୍ତର କାର୍ଯ୍ୟକ୍ରମ ହେବ।ଉଭୟ ବିରୋଧୀ ଓ ଶାସକ ଦଳର ସଦସ୍ୟମାନେ ଗୃହରେ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଇ ପାରନ୍ତି। ଅପରାହ୍ନରେ ରାଜ୍ୟପାଳଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନା ସମୟରେ ମୁଖ୍ୟମନ୍ତ୍ରୀ ମୋହନଚରଣ ମାଝୀ ଗୃହରେ ନିଜ ବିବୃତି ରଖିବେ।
ଆଜିଠୁ ଆରମ୍ଭ ହେଉଛି ଓଡ଼ିଶାର ମାଟ୍ରିକ ପରୀକ୍ଷା: ୩୦୮୨ କେନ୍ଦ୍ରରେ କଢ଼ା ସୁରକ୍ଷା ବ୍ୟବସ୍ଥା

ଆଜିଠୁ ଆରମ୍ଭ ହେଉଛି ଓଡ଼ିଶାର ମାଟ୍ରିକ ପରୀକ୍ଷା। BOARD OF SECONDARY EDUCATION ODISHA ଅଧୀନରେ ଆୟୋଜିତ ହେଉଥିବା ଏହି ପରୀକ୍ଷା ଛାତ୍ରଜୀବନର ସବୁଠୁ ଗୁରୁତ୍ୱପୂର୍ଣ୍ଣ ମାଇଲସ୍ଟୋନ୍‌ ଭାବେ ପରିଗଣିତ। ପରୀକ୍ଷାକୁ ସ୍ୱଚ୍ଛ, ଶୃଙ୍ଖଳିତ ଓ ତ୍ରୁଟିଶୂନ୍ୟ ଭାବେ ସମାପ୍ତ କରିବା ବୋର୍ଡ କର୍ତ୍ତୃପକ୍ଷ ଓ School and Mass Education Department Odisha ପାଇଁ ଏକ ବଡ ଆହ୍ୱାନ। ଚଳିତ ବର୍ଷ ରାଜ୍ୟର ୫ଲକ୍ଷ ୬୧ ହଜାର ୯୭୯ ଛାତ୍ରଛାତ୍ରୀ ପରୀକ୍ଷା ଦେବେ । ୩୦୮୨ କେନ୍ଦ୍ରରେ ହେବ ପରୀକ୍ଷା। ପରୀକ୍ଷାକୁ ଶୃଙ୍ଖଳିତ ଭାବେ ସାରିବା ବଡ ଆହ୍ବାନ ହୋଇଥିବାରୁ ସରକାରଙ୍କ ପକ୍ଷରୁ ଏଥର ସ୍ବତନ୍ତ୍ର ବ୍ୟବସ୍ଥା କରଯାଇଛି ।
ନୋଡ଼ାଲ ସେଣ୍ଟର ସହ ପରୀକ୍ଷା କେନ୍ଦ୍ରଗୁଡ଼ିକ ସିସିଟିଭି ସର୍ଭେଲାନ୍ସରେ ରଖାଯାଇଛି । କଣ୍ଟ୍ରୋଲ୍ ରୁମ୍‌ରୁ ସ୍ବତନ୍ତ୍ର ଭାବେ ମନିଟରିଂ କରାଯିବ । ୧୩୬୪ କେନ୍ଦ୍ରରୁ ଲାଇଭ୍ ଷ୍ଟ୍ରିମିଂ ବ୍ୟବସ୍ଥା ମଧ୍ୟ କରାଯାଇଛି । ପ୍ରଶ୍ନପତ୍ର ହବ୍ ଗୁଡିକ ଏଆଇ କ୍ୟାମେରା ନଜରରେ ରଖାଯାଇଛି। ସବୁ କେନ୍ଦ୍ରକୁ ଜଗିଛି ପୋଲିସ। ସେହିପରି ପରୀକ୍ଷାରେ କପି ରୋକିବା ପାଇଁ ତ୍ରିସ୍ତରୀୟ ସ୍କ୍ୱାଡ୍ ବ୍ୟବସ୍ଥା କରାଯାଇଛି।
JEE Main ରେ ଯାଜପୁର ରୋଡ Aakash Institute ର ସଫଳତା

ଚଳିତ ବର୍ଷ JEE Main ପରୀକ୍ଷାରେ ଯାଜପୁର ରୋଡ ଅବସ୍ଥିତ Aakash Institute ଛାତ୍ରଛାତ୍ରୀମାନେ ସଫଳତା ଅର୍ଜନ କରିଛନ୍ତି।

ଦ୍ୱିତୀୟ ବର୍ଷରେ ପ୍ରବେଶ କରିଥିବା ଏହି ସଂସ୍ଥାରୁ ତିନିଜଣ ଛାତ୍ରଛାତ୍ରୀ 90 ଶତକଡାରୁ ଅଧିକ ନମ୍ବର ପାଇ ସଂସ୍ଥାର ଗୌରବ ବଢ଼ାଇଛନ୍ତି। ଯାଜପୁର ରୋଡ ଶାଖାର ମୁଖ୍ୟପରିଚାଳକ ଅସିତ ବରଣ ଏହି ସୂଚନା ଦେଇଛନ୍ତି।

ଚଳିତ ବର୍ଷର ଫଳାଫଳରେ ତେଜସ୍ୱନୀ ବେହେରା 98.99%, ସାଂସ୍କୃତି ଭାଇରଗେଡ଼ 90.77% ଏବଂ ସନ୍ଦୀପ ସୌରଭ 90.63% ନମ୍ବର ରଖି ସଫଳ ହୋଇଛନ୍ତି। ଏହି ଅବସରରେ ସଂସ୍ଥା ପକ୍ଷରୁ ସେମାନଙ୍କୁ ସମ୍ବର୍ଦ୍ଧନା ଜଣାଇ ମିଠା ବଣ୍ଟନ କରାଯାଇଥିଲା।

୩୭ ବର୍ଷର ପୁରାତନ ଏହି ଶିକ୍ଷାନୁଷ୍ଠାନ ସର୍ବଭାରତୀୟ ସ୍ତରରେ ପ୍ରାୟ ୪୦୦ଟି ଶାଖା ସହ କାର୍ଯ୍ୟରତ। ରାଜ୍ୟରେ ୨୨ ବର୍ଷ ଧରି ଶିକ୍ଷାଦାନ କରି ଏହା ଅନେକ ସଫଳତା ହାସଲ କରିଛି ବୋଲି ଡାଇରେକ୍ଟର ତାପସ ନନ୍ଦ କହିଛନ୍ତି। ଅଧ୍ୟାପିକା ନିତୁ ଜେନ ସହିତ ସମସ୍ତ କର୍ମଚାରୀଙ୍କ ସହଯୋଗରେ ଏହି ସଫଳତା ସମ୍ଭବ ହୋଇଥିବା ସଂସ୍ଥା ପକ୍ଷରୁ କୁହାଯାଇଛି।

ଚଳିତ ଶିକ୍ଷାବର୍ଷରେ ପ୍ରାୟ ୫୦୦ ଜଣ ଛାତ୍ରଛାତ୍ରୀଙ୍କ ଭର୍ତ୍ତି ପାଇଁ ପ୍ରୟାସ ଚାଲିଥିବା ସୂଚନା ମିଳିଛି।
ଆଜିଠୁ ଯୁକ୍ତ ଦୁଇ ପରୀକ୍ଷା ଆରମ୍ଭ, ୪ ଲକ୍ଷରୁ ଅଧିକ ଛାତ୍ରଛାତ୍ରୀ ଦେଉଛନ୍ତି ପରୀକ୍ଷା

ଭୁବନେଶ୍ବର : ରାଜ୍ୟରେ ଆଜିଠୁ ଯୁକ୍ତ ଦୁଇ ପରୀକ୍ଷା ଆରମ୍ଭ ଯାଇଛି | ସିଏଚଏସଇ (Council of Higher Secondary Education Odisha ) ପକ୍ଷରୁ ଆୟୋଜିତ ଏହି ପରୀକ୍ଷାରେ ମୋଟ ୪ ଲକ୍ଷ ୧୬ ହଜାର ୨୩ ଜଣ ଛାତ୍ରଛାତ୍ରୀ ଅଂଶ ଗ୍ରହଣ କରିଛନ୍ତି |

ବିଭାଗ ଅନୁଯାୟୀ, କଳାରେ ୨,୫୬,୭୦୭ ଛାତ୍ରଛାତ୍ରୀ , ବିଜ୍ଞାନରେ ୧,୧୪,୩୬୩ ଛାତ୍ରଛାତ୍ରୀ , ବାଣିଜ୍ୟରେ ୨୪,୬୨୧ ଛାତ୍ରଛାତ୍ରୀ ଏବଂ ଧନ୍ଦାମୂଳକ ଶିକ୍ଷାରେ ୫,୯୩୨ ଛାତ୍ରଛାତ୍ରୀ ପରୀକ୍ଷା ଦେଉଛନ୍ତି। ସାରା ରାଜ୍ୟରେ ୧୩୫୭ଟି ପରୀକ୍ଷା କେନ୍ଦ୍ରରେ ୨୩ଟି ସିଟିଂରେ ପରୀକ୍ଷା ଫେବ୍ରୁଆରି ୨୮ ପର୍ଯ୍ୟନ୍ତ ଚାଲିବ। ପରୀକ୍ଷା ସକାଳ ୧୦ଟାରୁ ଆରମ୍ଭ ହୋଇ ଅପରାହ୍ନ ୧ଟାରେ ଶେଷ ହେବ।

ଏବେ ପ୍ରଥମଥର ପାଇଁ ପରୀକ୍ଷା ପରିଚାଳନା ହବ୍‌ରେ AI ମାଧ୍ୟମରେ ନଜର ରଖିବାର ବ୍ୟବସ୍ଥା କରାଯାଇଛି। ହବ୍‌କୁ କେହି ପ୍ରବେଶ କରେ ତେବେ ମୁଖ୍ୟାଳୟକୁ ଆଲର୍ଟ ହୋଇଯିବ । ସିଏଚଏସଇ କାର୍ଯ୍ୟାଳୟରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍‌ ଖୋଲାଯାଇଛି। ଷ୍ଟ୍ରଙ୍ଗରୁମ୍‌ରେ ଗୋଟିଏମାତ୍ର ପ୍ରବେଶ ପଥ ରହିବ ଓ ସେଠାରେ ଗ୍ରିଲ୍ ସହ କବାଟ ବ୍ୟବସ୍ଥା ରହିଛି। ହବ୍‌ ଓ ବାହାରେ ପୋଲିସର କଡା ପ୍ରହରା ବ୍ୟବସ୍ଥା କରାଯାଇଛି।

ପରୀକ୍ଷା କେନ୍ଦ୍ରରେ ପ୍ରବେଶ ପୂର୍ବରୁ ଛାତ୍ରଛାତ୍ରୀମାନେ ମୋବାଇଲ ଫୋନ୍‌ ସୁପରିଟେଣ୍ଡେଣ୍ଟଙ୍କ ପାଖରେ ଜମା ଜମା କରିବେ । ଘଣ୍ଟି ବାଜିବା ପୂର୍ବରୁ କେହି କେନ୍ଦ୍ର ଛାଡି ପାରିବେ ନାହିଁ ଓ ପ୍ରଶ୍ନପତ୍ର ବାହାରକୁ ନେଇ ପାରିବେ ନାହିଁ । ସକାଳ ସାଢେ ୮ଟା ମଧ୍ୟରେ ପ୍ରଶ୍ନପତ୍ର ପ୍ୟାକେଟ କେନ୍ଦ୍ରରେ ପହଞ୍ଚିବ ଓ କେନ୍ଦ୍ର ସୁପରିଟେଣ୍ଡେଣ୍ଟ, ପର୍ଯ୍ୟବେକ୍ଷକ, ପରୀକ୍ଷା ନୀରିକ୍ଷକ ଏବଂ ଜିଲ୍ଲା ପ୍ରଶାସନ ପ୍ରତିନିଧିଙ୍କ ଉପସ୍ଥିତିରେ ଖୋଲାଯିବ। ଦ୍ୱି-ସ୍ତରୀୟ ଯାଞ୍ଚ ପରେ ପରୀକ୍ଷାର୍ଥୀଙ୍କୁ କେନ୍ଦ୍ରକୁ ପ୍ରବେଶ କରାଯିବା |