Category: ରାଜ୍ୟ ଖବର

ଯାଜପୁର ରୋଡ୍ ରେଳ ଷ୍ଟେସନରେ ବଡ଼ ଧରଣର ଅଘଟଣ ଘଟିଛି । ଟ୍ରେନରେ କଟି ୬ ଜଣଙ୍କ ମୃତ୍ୟୁ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ବର୍ଷାରୁ ରକ୍ଷା ପାଇବା ପାଇଁ ଟ୍ରେନ୍ ତଳେ ଆଶ୍ରୟ ନେବା ସେମାନଙ୍କ ପାଇଁ କାଳ ସାଜିଛି ।

ସୂଚନା ଅନୁସାରେ କାଳବୈଶାଖୀ ବର୍ଷାରୁ ରକ୍ଷା ପାଇବା ପାଇଁ ମାଲବାହୀ ଟ୍ରେନ୍ ବଗିତଳେ ୮ ଜଣ ଆଶ୍ରୟ ନେଇଥିଲେ । ଏହି ସମୟରେ ଟ୍ରେନଟି ଗଡ଼ିଯାଇଥିଲା । ଏଥିରେ ଚାପି ହୋଇ ୬ ଜଣଙ୍କ ମୃତ୍ୟୁ ଘଟିଥିଲା । ଅନ୍ୟ ଦୁଇଜଣ ଗୁରୁତର ହୋଇଥିଲେ । ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ଥିବାରୁ କଟକ ଏସସିବି ସ୍ଥାନାନ୍ତର କରାଯାଇଛି । ଅନ୍ୟ ଜଣଙ୍କୁ ଯାଜପୁର ମେଡିକାଲରେ ଭର୍ତ୍ତି କରାଯାଇଛି । ସମସ୍ତ ମୃତକ ଶ୍ରମିକ ଥିବା ସୂଚନା ମିଳିଛି ।

ରେଳ ଟ୍ରାକ୍ ମରାମତି କାମ ଚାଲିଥିବା ବେଳେ ଶ୍ରମିକମାନେ ବର୍ଷା ପବନ ଆସିବାରୁ ବଗି ତଳକୁ ଚାଲି ଆସିଥିଲେ । ଏହି ବଗିଗୁଡ଼ିକ ଦୀର୍ଘଦିନ ଧରି ଯାଜପୁର ରୋଡ୍ ଷ୍ଟେସନରେ ଅଟକି ରହିଥିବା ବେଳେ ଇଞ୍ଜିନ ସଂଲଗ୍ନ ନଥିଲା । ଶ୍ରମିକମାନେ ଜାଣିନଥିଲେ ଯେ ଏହା ପବନରେ ଆଗକୁ ଗଡ଼ିଯିବ । କାଳବୈଶାଖୀ ପବନରେ ବଗି ଗୁଡ଼ିକ ଆଗକୁ ଗଡ଼ିବାକୁ ଲାଗିଥିଲା । ଶ୍ରମିକମାନେ ତଳୁ ବାହାରିବା ପାଇଁ ଚେଷ୍ଟା କରିବାବେଳେ ବଗିତଳେ ଚାପି ହୋଇ ପ୍ରାଣ ହରାଇଛନ୍ତି । ଘଟଣାସ୍ଥଳରେ ୪ ଜଣଙ୍କ ମୃତ୍ୟୁ ହୋଇଥିଲା । ଅନ୍ୟ ଦୁଇଜଣ ମେଡିକାଲରେ ପ୍ରାଣ ହରାଇଛନ୍ତି । ଆଉ ୨ ଜଣ ଗୁରୁତର ହୋଇ ଚିକିତ୍ସିତ ହେଉଛନ୍ତି । ଜିଆରପି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ମୃତ ଶ୍ରମିକଙ୍କ ପରିଚୟ ମିଳିପାରିନାହିଁ ।

ଗତ ୨ ତାରିଖରେ ବାଲେଶ୍ୱର ବାହାନଗାଠାରେ ବଡ଼ ଧରଣର ଟ୍ରେନ୍ ଦୁର୍ଘଟଣା ଘଟି ୨୮୮ ଜଣଙ୍କ ମୃତ୍ୟୁ ହୋଇଥିଲା । ପରେ ପରେ ବରଗଡ଼ରେ ମାଲବାହୀ ଟ୍ରେନ୍ ଲାଇନଚ୍ୟୁତ ହୋଇଥିଲା । ଏବେ ପୁଣି ଥରେ ଟ୍ରେନରେ କଟି ଲୋକଙ୍କ ଜୀବନ ଗଲା । ତେଣୁ ଟ୍ରେନ୍ ଦୁର୍ଘଟଣାକୁ ନେଇ ସମସ୍ତେ ଭୟଭୀତ ହୋଇଗଲେଣି ।