କେଇଟା ଦିନ ପରେ ବାହୁଡ଼ା ଯାତ୍ରା । ରତ୍ନବେଦୀରୁ ଜନ୍ମବେଦୀକୁ ଫେରିବେ କାଳିଆ ଠାକୁର । ଏଥିପାଇଁ ସେବାୟତଙ୍କ ପକ୍ଷରୁ ପ୍ରତିଦିନ ନୀତିକାନ୍ତି ଜାରି ରହିଛି । ଆଜି ୩ ରଥର ଦକ୍ଷିଣମୋଡ଼ ହେବ । ରଥଯାତ୍ରା ପରଠାରୁ ଶ୍ରୀଗୁଣ୍ଡିଚା ମନ୍ଦିର ସମ୍ମୁଖରେ ଅଟକି ରହିଛନ୍ତି ତିନି ରଥ । ଆଜି ଏହି ରଥ ଦକ୍ଷିଣମୋଡ଼ ନେବେ । ନାକଚଣା ଦ୍ୱାରସ୍ଥିତ ଶରଧାବାଲିରେ ବିଜେ କରିବେ । ଏଥିପାଇଁ ନାକଚଣା ଦ୍ୱାର ସମ୍ମୁଖ ଶରଧାବାଲିକୁ ପୁରାପୁରି ସଫାସୁତରା କରାଯାଇଛି । ଆସନ୍ତାକାଲି ସେବାୟତ ଓ ପୋଲିସ ସହଯୋଗରେ ନାକଚଣା ଦ୍ୱାର ସମ୍ମୁଖ ଶରଧାବାଲିକୁ ନିଆଯିବ ।
ବାହୁଡ଼ାଯାତ୍ରା ପାଇଁ ପୂର୍ବ ପ୍ରସ୍ତୁତି ଆରମ୍ଭ ହୋଇଛି । ରଥଯାତ୍ରା ପରଠାରୁ ୩ ରଥ ଉତ୍ତରମୁହାଁ ହୋଇ ରହିଥିବା ବେଳେ ଆଜି ୩ ରଥକୁ ଦକ୍ଷିଣ ମୋଡ଼ କରି ରଖାଯିବ। ଏଥିପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ୱତନ୍ତ୍ର ନୀତିକାନ୍ତି ହୋଇଛି । ମହାପ୍ରଭୁଙ୍କ ଆଜ୍ଞାମାଳ ବିଜେ ପରେ ତିନି ରଥ ଦକ୍ଷିଣ ମୋଡ଼ ନେବେ । ଶରଧାବାଲିରେ ବାହୁଡ଼ା ଯାତ୍ରା ପାଇଁ ରଥ ଗୁଡ଼ିକୁ ପ୍ରସ୍ତୁତ କରି ରଖାଯିବ । ପରମ୍ପରା ଅନୁଯାୟୀ, ଦକ୍ଷିଣ ମୋଡ଼ ପାଇଁ ପ୍ରଥମେ ଶରଧାବାଲିକୁ ଯିବ ମା’ସୁଭଦ୍ରାଙ୍କ ଦର୍ପଦଳନ ରଥ । ପରେ ବଡ଼ ଠାକୁରଙ୍କ ତାଳଧ୍ୱଜ ଓ ଶେଷରେ ଯିବ ମହାପ୍ରଭୁଙ୍କ ନନ୍ଦିଘୋଷ ରଥ ।
ଆଜି ମଧ୍ୟାହ୍ନ ସାଢ଼େ ୧୨ଟାରେ ରଥ ଆଜ୍ଞାମାଳ ବିଜେ ହେବ । ଅପରାହ୍ଣ ଗୋଟାଏ ସୁଦ୍ଧା ପ୍ରଥମ ଭୋଗମଣ୍ଡପ ଉଠିବା ପରେ ମଇଲମ, ଯାତ୍ରାଙ୍ଗୀ ମହାସ୍ନାନ ସର୍ବାଙ୍ଗ ନୀତି ସାଢ଼େ ୨ଟା ଭିତରେ ଶେଷ ହେବ । ଅପରାହ୍ଣ ୩ଟାରେ ମହାପ୍ରଭୁଙ୍କୁ ନୂଆ ଲୁଗା ଲାଗି ଓ ବେଶ ହେବ । ସନ୍ଧ୍ୟା ୬ଟାରୁ ରାତି ସାଢ଼େ ୯ଟା ପର୍ଯ୍ୟନ୍ତ ମଇଲମ,ବେଶ, ସନ୍ଧ୍ୟା ଆଳତି, ସନ୍ଧ୍ୟାଧୂପ ନୀତି ଅନୁଷ୍ଠିତ ହେବ ବୋଲି ସୂଚନା ମିଳିଛି । ଆଜି ଦକ୍ଷିଣ ମୋଡ଼, ଆଗକୁ ବାହୁଡ଼ା ଯାତ୍ରା । ସେଥିପାଇଁ ଭକ୍ତଙ୍କ ଭିଡ଼ ବି ଜମୁଛି । ପ୍ରଭୁଙ୍କ ଲୀଳା ଦେଖିବା ପାଇଁ ଦୂର ଦୂରାନ୍ତରୁ ଶ୍ରଦ୍ଧାଳୁଙ୍କ ବେଶ୍ ସମାଗମ ହେଉଛି ।
