ନବରଙ୍ଗପର ଜିଲ୍ଲା ଡାବୁଗାଁ ସିଡିପିଓଙ୍କ ଦାଦାଗିରି । ଜଣେ ବୟସ୍କ କିରାଣିଙ୍କୁ ଚୌକିରୁ ଠେଲିଦେଇଥିବା ଅଭିଯୋଗ ହୋଇଛି । ଘଟଣାକୁ ଅତି ଗୁରୁତର ସହ ନେଇ ଜିଲ୍ଲା ସାମାଜିକ ସୁରକ୍ଷା ଅଧିକାରୀଙ୍କ ପକ୍ଷରୁ ତଦନ୍ତ ଆରମ୍ଭ ହୋଇଛି । ସମନ୍ୱିତ ଶିଶୁ ବିକାଶ ଯୋଜନା କାର୍ଯ୍ୟାଳୟରେ ଜିଲ୍ଲା ସମାଜ ମଙ୍ଗଳ ଅଧିକାରୀ ଘଟଣାର ତଦନ୍ତ ଜାରି ରଖିଛନ୍ତି ।
ସୂଚନା ଅନୁସାରେ ଚଳିତ ମାସର ଦରମାକୁ ନେଇ ସରକାରୀ ଅଫିସରେ ପାଟିତୁଣ୍ଡ ହୋଇଥିଲା । ଜଣେ ବୟସ୍କ କିରାଣିଙ୍କୁ ଚୌକିରୁ ତଳକୁ ଗଡ଼ାଇ ଦେଇଛନ୍ତି ନବରଙ୍ଗପର ଜିଲ୍ଲା ଡାବୁଗାଁ ସିଡିପିଓ । ଏବେ ଏହି ଭିଡିଓ ଭାଇରାଲ୍ ପରେ ନିନ୍ଦା କରାଯିବା ସହ ବେଶ୍ ସମାଲୋଚନାର ଶିକାର ହୋଇଛନ୍ତି ସିଡିପିଓ । ନବରଙ୍ଗପର ଜିଲ୍ଲା ଡାବୁଗାଁ ସମନ୍ୱିତ ଶିଶୁ ବିକାଶ ଯୋଜନା କାର୍ଯ୍ୟାଳୟରେ ଏଭଳି ଘଟଣା ଘଟିଛି । ଡାବୁଗାଁ ସିଡିପିଓ କାର୍ଯ୍ୟାଳୟରେ କାର୍ଯ୍ୟରତ ବୟସ୍କ କିରାଣି ସନ୍ତୋଷୀ ମିଶ୍ରଙ୍କୁ ସିଡିପିଓ ଓଫିସରୁ ବାହାରିଯିବା ପାଇଁ କୁହାଯିବା ସହ ତାଙ୍କୁ ଧକ୍କା ମରାଯାଉଛି । ଚୌକିକୁ ଠେଲିଦେବାରୁ ବରିଷ୍ଠ କିରାଣି ସନ୍ତୋଷୀ ସିଟ୍ରୁ ତଳକୁ ପଡ଼ିଯାଇଥିଲେ । ଏହି ଭିଜୁଆଲ୍ ଏବେ ସମସ୍ତଙ୍କ ନିକଟରେ ଘୁରିବୁଲୁଛି ।
ସେପଟେ, ବରିଷ୍ଠ କିରାଣି ସନ୍ତୋଷ ମିଶ୍ର କହିଛନ୍ତି ଯେ ଗତ ମାସର ଇଏଲ ଦରମା କରିବାକୁ ସେ ସିଡିପିଓଙ୍କୁ କହିଥିଲେ। ସିଡିପିଓ ଗୀତାଞ୍ଜଳି ମହାରଣା ରାଗିଯାଇ ତାଙ୍କୁ ଗାଳିଗୁଲଜ କରିଥିଲେ । ଏଥିସହ ତାଙ୍କୁ ଅଫିସରୁ ପଳାଇଯିବା ପାଇଁ କହି ଧକ୍କା ମାରିଥିଲେ । ପୂର୍ବରୁ ଧମକଚମକ ଦେଉଥିବା ବେଳେ ଏବେ ମାଡ଼ ମାରିଛନ୍ତି ଯାହା ସମସ୍ତେ ଦେଖିଲେ । ଦରମା କରୁନାହାଁନ୍ତି, କହିଲେ ମୋତେ ମାଡ଼ ମାରୁଛନ୍ତି । ଜିଲ୍ଲାପାଳଙ୍କ ନିକଟରେ ଏ ନେଇ ଅଭିଯୋଗ କରିବି ବୋଲି କହିଛନ୍ତି ସନ୍ତୋଷୀ ।
