Category: ରାଜ୍ୟ ଖବର

୨୦ ୨୪ ନିର୍ବାଚନ ପୂର୍ବରୁ ଯାଜପୁର ଜିଲ୍ଲା ବରୀରେ ଆରମ୍ଭ ହୋଇଗଲାଣି ବିଜେଡିରେ ବାଦି ପାଲା। ପୂର୍ବରୁ ଦୁଇ ଦୁଇ ଜଣ ନେତାଙ୍କୁ ଦିଆଯାଇଥିଲା ବରୀ ଦାୟିତ୍ବ। ସୁ ନିର୍ବାଚନ ଆଉ କିଛି ମାସ ଥିବା ବେଳେ ଆଉ ଜଣେ ଏଣ୍ଟ୍ରି ମାରିଛନ୍ତି ମୈଦାନକୁ। ଯାହା ଏବେ ବରୀ ନିର୍ବାଚନ ମଣ୍ଡଳୀରେ ମୁଖ୍ୟ ଚର୍ଚ୍ଚାର ପ୍ରସଙ୍ଗ ପାଲଟିଛି। ସୁନନ୍ଦା ଦାସ ବିଧାୟକ ଥିବା ବେଳେ ବିଶ୍ବ ରଞ୍ଜନ ମଲ୍ଲୀକ ମଧ୍ୟ ବେଶ ଆକ୍ଟିଭ ଅଛନ୍ତି। ହେଲେ ଦଳରେ ନଥାଇ ଜଣେ ଦଳୀୟ କର୍ମୀ ସମାବେଶର ଆୟୋଜନ କରିବା ସମସ୍ତଙ୍କୁ ଚକିତ କରିଛି। ଏକଦା ବିଜୁ ଜନତା ଦଳର ସର୍ବେ ସର୍ବା ବୋଲାଉଥିବା ତଥା ପୂର୍ବତନ ବିଧାୟକ ଦେବାଶିଷ ନାୟକଙ୍କ ଡାହାଣ ହାତ ଥିଲେ ସେକ ସଫିକ ଉଦ୍ଦିନ ଓରଫ ଟାଲି। ନିକଟରେ ସେ ଏକ ଶାରଦୀୟ ବନ୍ଧୁ ମିଳନର ଆୟୋଜନ କରିଥିଲେ। ଏଥିରେ ବହୁ ବିଜେଡି ନେତା ଓ କର୍ମକର୍ତ୍ତା ଯୋଗ ଦେଇଥିଲେ। ଏପରି ଆୟୋଜନକୁ ନେଇ ରାଜନୀତିରେ ରୁଚି ରଖୁଥିବା ସ୍ଥାନୀୟ ଲୋକେ ତଟକା ହୋଇଯାଇଛନ୍ତି। କାରଣ ପୂର୍ବରୁ ଟାଲି ଦଳରୁ ବହିଷ୍କୃତ ହୋଇଥିଲେ। ଏବେ ତାଙ୍କ ଦ୍ବାରା ହେଉଛି ଦଳୀୟ କାର୍ଯ୍ୟକ୍ରମ। ସେଥିରେ ଲଗାଯାଇଥିବା ବ୍ୟାନରରେ ବିଜେଡି ସଂଗଠନ ସଂପାଦକ ପ୍ରଣବ ପ୍ରକାଶ ଦାସଙ୍କ ଫଟୋ ମାରିଛନ୍ତି। ଏହା ବ୍ୟତୀତ ଆଗାମୀ ନିର୍ବାଚନରେ ବିଜେଡ଼ି ପାଇଁ କାମ କରିବେ ବୋଲି ଘୋଷଣା କରିଛନ୍ତି ଟାଲି।

ସବୁଠୁ ଗୁରୁତ୍ୱ ପୂର୍ଣ କଥା ହେଉଛି ଯେଉଁ ଟାଲି ଏକଦା ବିଧାୟକ ଦେବାଶିଷଙ୍କ ଖାସ ଥିଲେ, ଏବେ ସେ ଦେବାଶିଷଙ୍କୁ ଜଣେ ବାଚାଳର ଆଖ୍ୟା ଦେଇଛନ୍ତି। ତେବେ ଏପରି ଏକ ଆୟୋଜନକୁ ନେଇ ପୂର୍ବତନ ବ୍ଲକ ଅଧ୍ୟକ୍ଷା ଓ ବର୍ତ୍ତମାନର ସମିତି ସଭ୍ୟ କହିଛନ୍ତି କି, ବରୀରେ ଦୁଇ ଦୁଇ ଜଣ ବଡ ନେତା ଥିବା ବେଳେ କିନ୍ତୁ ଦଳ ଏଠାରେ ଦୁର୍ବଳ ହୋଇଯାଇଛି। ସମସ୍ତେ ନିଜ ନିଜ ସ୍ବାର୍ଥ ସାଧନରେ ବ୍ୟସ୍ତ। ଏପରି ସ୍ଥଳେ ବହୁ ପୁରୁଖା କର୍ମୀ ଅବହେଳିତ ରହିଯାଇଛନ୍ତି। ଏପରି ସମାବେଶ ଦ୍ବାରା ସେମାନଙ୍କୁ ପୁଣି ଆକ୍ଟିଭ କରିବା ସହ ମୁଖ୍ୟମନ୍ତ୍ରୀଙ୍କ ହାତ ମୁଠାକୁ ମଜବୁତ କରିବାକୁ ଲକ୍ଷ୍ଯ ରଖାଯାଇଛି।

ଅନ୍ୟପଟେ ଟାଲି ପୁଣି ଆକ୍ଟିଭ ହେବାକୁ ନେଇ ଚର୍ଚ୍ଚା କି ବିଜେଡିରେ ତାଙ୍କ ପାଇଁ ପଥ ଏବେ ପରିଷ୍କୃତ କରାଯାଇଛି ଆଉ ଏସବୁ ପଛରେ ରହିଛି ପ୍ରଣବ ପ୍ରକାଶଙ୍କ ହାତ । ସେପଟେ ନିର୍ବାଚନ ମଣ୍ଡଳୀରେ ଟାଲି ଙ୍କ ପ୍ରତି ସମର୍ଥନ ଧୀରେ ଧୀରେ ବୃଦ୍ଧି ପାଉଥିବା ମଧ୍ୟ ଲକ୍ଷ୍ୟ କରାଯାଉଛି। ତେଣୁ ଆଗକୁ କଣ ହେବାକୁ ଯାଉଛି ତା ଉପରେ ଏବେ ସମସ୍ତଙ୍କ ନଜର ।