Category: ରାଜ୍ୟ ଖବର

ନିର୍ବାଚନ ଯେତିକି ପାଖଉଛି, ନେତାଙ୍କ ଦଳ ଡିଆଁ ସେତିକି ପ୍ରବଳ ହେଉଛି। ତେବେ ବିଭିନ୍ନ ଦଳର ବିଦ୍ରୋହୀ ମୁଣ୍ଡିଆଳଙ୍କ ଶଙ୍ଖ ଦଳ ପ୍ରତି ରହିଛି ପ୍ରବଳ ଆକର୍ଷଣ। କାରଣ ଦଳ ଦେଇଛି ଦୀର୍ଘ ଅଢେଇ ଦଶନ୍ଧିର ସ୍ଥିର ସରକାର। କିନ୍ତୁ ଏବେ ଅନ୍ୟ ଦଳରୁ ଆମଦାନୀ ହେଉଥିବା ନେତାଙ୍କୁ ନେଇ ଶଙ୍ଖ ଶିବିରରେ ନାହିଁ ପୂର୍ବର ସେ ସରାଗ ବୋଲି ଚର୍ଚ୍ଚା ହେଉଛି। ଆନୁଷ୍ଠାନିକଭାବେ, ଉପରଠାଉରିଆ କରି ମିଶ୍ରଣ ପର୍ବ ଯେମିତି ପାଳିତ ହେଉଥିବା କୁହାଯାଉଛି। ଯାହା କାଳେ ଶୁକ୍ରବାର ଦିନ ଶଙ୍ଖ ଭବନରେ ଅନୁଷ୍ଠିତ ମିଶ୍ରଣ ପର୍ବରେ ଦେଖିବାକୁ ମିଳିଥିଲା ବୋଲି କହୁଛନ୍ତି ନିନ୍ଦୁକମାନେ । ଶୁକ୍ରବାର ତିର୍ତ୍ତୋଲ କଂଗ୍ରେସର ଆଗଧାଡିର ନେତା ନାରାୟଣ ଜେନା ତାଙ୍କ ଶତାଧିକ ସମର୍ଥକଙ୍କୁ ନେଇ ଶଙ୍ଖ ଦଳରେ ସାମିଲ ହେଲେ। ଶଙ୍ଖ ଶିବିରରେ ଶରଣ ମିଳିଥିବାରୁ କଂଗ୍ରେସ ଛଡା ନେତାଙ୍କ ଭିତରେ ବେଶ ଉତ୍ସାହ ଥିଲା। ହେଲେ ମିଶ୍ରଣ ପର୍ବରେ ଉପସ୍ଥିତ ଶାସକ ଦଳର ନେତୃମଣ୍ଡଳୀଙ୍କ ମଧ୍ଯରେ ନଥିଲା ସରାଗ। ମଞ୍ଚରେ ସାଂସଦ ମାନସ ମଙ୍ଗରାଜ ଓ ପୂର୍ବତନ ମନ୍ତ୍ରୀ ଦେବୀ ମିଶ୍ର ଥିଲେ। ନାରାୟଣଙ୍କ ବେକରେ ଶଙ୍ଖ ଉତ୍ତରୀୟ ପକାଇ ଦେଇଥିଲେ ଦୁଇ ନେତା। ହେଲେ ଉଭୟଙ୍କ ମୁହଁରେ ନ ଥିଲେ ପ୍ରସନ୍ନତା। ତାକୁ ନେଇ ହେଉଛି ଚର୍ଚ୍ଚା। ମୁହଁକୁ ଦେଖି ଲାଗୁଥିଲା ଯେମିତି କେହି ସେମାନଙ୍କ ଶହେ ପଚାଶ ଖାଇଦେଇଛି ବୋଲି କଥା ହେଉଛନ୍ତି। ମିଡିଆ ସମ୍ମୁଖରେ ସୌଜନ୍ୟତା ଦୃଷ୍ଟିରୁ ମଧ୍ୟ କାଳେ ନଥିଲା ସାମାନ୍ୟତମ ସ୍ମିତହାସ୍ୟ। ଆହୁରି ଶୁଣିବାକୁ ମିଳୁଛି ଉଭୟ ମିଶ୍ର ଓ ମଙ୍ଗରାଜଙ୍କୁ ଦେଖି ଲାଗୁଥିଲା ମଣିଷ ନୁହଁନ୍ତି ଦୁଇଟି ରୋବର୍ଟ, ବଡବାବୁଙ୍କ ନିର୍ଦ୍ଦେଶ ପାଳନ କରୁଛନ୍ତି । ଏହାକୁ ନେଇ ବିରୋଧୀ ଶିବିରରେ ଭାରି ଚର୍ଚ୍ଚା। ସେମାନେ କହୁଛନ୍ତି, ଏମିତି ସ୍ଥିତି ଆଗରୁ ନ ଥିଲା। ଆଗରୁ ଦଳରେ ବ୍ଲକସ୍ତରୀୟ ନେତାଟିଏ ସାମିଲ ହେଉଥିବା ବେଳେ ବହୁତ ଉତ୍ସାହ ଦେଖିବାକୁ ମିଳୁଥିଲା ବିଜେଡି ନେତାଙ୍କ ମଧ୍ୟରେ। ଫୁଲ ତୋଡା ଦେଇ ସ୍ବାଗତ କରାଯାଉଥିଲା। ଦଳ ଡିଆଁ ନେତାଙ୍କୁ ମିଶ୍ରଣ ପର୍ବର ପୁରୋଧା ପ୍ରଶଂସାରେ ପୋତିପକାଉଥିଲେ। ଫଟୋ ପାଇଁ ପୋଜ ଦେଉଥିଲେ। ହେଲେ ଶୁକ୍ରବାର ସେମିତି କିଛି ନ ଥିଲା ବୋଲି ଶୁଣିବାକୁ ମିଳିଛି। ଏହାକୁ ନେଇ ରାଜନୀତିରେ ରୁଚି ରଖୁଥିବା ଲୋକେ କହୁଛନ୍ତି, ଦଳରେ ଅନେକ ଦିନରୁ ଅସନ୍ତୁଷ୍ଟଙ୍କ ସଂଖ୍ୟା ବଢୁଥିଲା। ହେଲେ ଗତ ମାସରୁ ଏହା ଚରମରେ ପହଞ୍ଚିଛି। ଦଳ ପାଇଁ ବର୍ଷ ବର୍ଷ ଧରି ଝାଳ ନାଳ ଏକାକାର କରି ସଂଗଠନକୁ ସଜାଡୁଥିବା ନେତାକୁ ନାକଟେକି ଦଳ ସୁପ୍ରିମୋ ଜଣଙ୍କୁ ଦଳର ଅଘୋଷିତ ଉତ୍ତରାଧିକାରୀ କରିବା କେତେଦୂର ଠିକ ବୋଲି କିଛି ପ୍ରଶ୍ନ କରୁଛନ୍ତି। ଏହା ବାଦ ଏବେ କୁଆଡେ ଆଉ ଦଳର କର୍ମକର୍ତ୍ତାଙ୍କର କୌଣସି କାଟତି ନାହିଁ ଦଳରେ। ଯାହା ନିର୍ଦ୍ଦେଶ ଆସୁଛି ତାକୁ ପାଳୁଛନ୍ତି। ଆଉ କିଛି କହୁଛନ୍ତି କି, ପୂର୍ବରୁ ସେମିତି ଦଳରେ ତାର ନିଜସ୍ବ ଅନେକ ମୁଣ୍ଡିଆଳ ହାଉଯାଉ ହେଉଥିଲେ। ତା ଉପରେ ପୁଣି ଗତ ନିର୍ବାଚନରେ ଅନେକ ବାହାରୁ ଆମଦାନୀ ହୋଇଥିଲେ। ସେସବୁ ବାଦ ଅନେକ ବ୍ୟବସାୟୀ କାଳେ ବେଶ ମୋଟା ଅଙ୍କରେ ଦଳରେ ନାଁ ଏଣ୍ଟ୍ରି କରିଥିଲେ ଓ ବିଧାନସଭା ତଥା ସାଂସଦ ଗଲେ। ଏପରି ଅବସ୍ଥାରେ ଏମାନଙ୍କ ଭିତରୁ ଆଗକୁ କିଏ ଟିକେଟ ପାଇବ ଓ କିଏ କାଟ ଖାଇବ ତାକୁ ନେଇ ଦଳରେ ଶୀତଳ ଯୁଦ୍ଧ ଚାଲିଛି। ସମସ୍ତେ ନିଜ ଭବିଷ୍ୟତକୁ ନେଇ ଅନ୍ଧାରରେ। ଏପରି ବେଳରେ ଆଉ କିଏ ଆସିଲେ କୋଉଠି ଆଡଜଷ୍ଟ ହେବ ତାକୁ ନେଇ ଚିନ୍ତାରେ ବିଜେଡି ଦଳିଆ ବୋଲି ଚର୍ଚ୍ଚା ହେଉଛି।