ସବୁଥର ଭଳି ଏଥର ମଧ୍ୟ ଭାରତ ରାସ୍ତାରେ ପ୍ରତିବନ୍ଧକ ସାଜିଲା ଚୀନ । ମିଳିତ ଜାତିସଂଘରେ ଲସ୍କର-ଇ-ତାଏବା ସଦସ୍ୟ ସାଜିଦ ମୀରକୁ ବିଶ୍ୱସ୍ତରୀୟ ଆତଙ୍କବାଦୀ ଘୋଷଣା କରିବାକୁ ଭାରତ ଓ ଆମେରିକା ମିଳିତ ଭାବେ ପ୍ରସ୍ତାବ ରଖିଥିଲେ । ହେଲେ ଏହି ପ୍ରସ୍ତାବ ଉପରେ ରୋକ୍ ଲଗାଇଛି ଚୀନ ।
୨୬/୧୧ ମୁମ୍ବାଇ ହମଲାରେ ସାଜିଦ ମୀର ମଧ୍ୟ ସାମିଲ ଥିଲା । ତେଣୁ ତା ବିରୋଧରେ ଆସିଥିବା ପ୍ରସ୍ତାବକୁ ଭିଟୋ କ୍ଷମତା ବଳରେ ଅଟକାଇ ଦେଇଛି ଚୀନ । ମୀର ବିରୋଧରେ ପ୍ରଥମେ ଆମେରିକା ପ୍ରସ୍ତାବ ଆଣିଥିବା ବେଳେ ସହଯୋଗୀ ରାଷ୍ଟ୍ର ଭାବେ ଭାରତ ଏହାକୁ ସମର୍ଥନ କରିଥିଲା । ଏହାଦ୍ୱାରା ମୀରର ସମସ୍ତ ସମ୍ପତ୍ତି ଜବତ ହୋଇଥାନ୍ତି । ଏଥିସହ ତା’ର ଯାତାୟାତରେ କଟକଣା ଲାଗିଥାଆନ୍ତା କିନ୍ତୁ ସବୁଥର ଭଳି ଏଥର ମଧ୍ୟ ଭାରତ ରାସ୍ତାରେ ମୁଖ୍ୟ ପ୍ରତିବନ୍ଧକ ସାଜିଛି ବେଜିଂ ।
ମିଳିତ ଜାତିସଂଘରେ ଭାରତର ଅଧିକାଂଶ ପ୍ରସ୍ତାବକୁ ଚୀନ ଓ ପାକିସ୍ତାନ ସର୍ବଦା ବିରୋଧ କରି ଆସୁଛନ୍ତି । ଗତବର୍ଷ ସେପ୍ଟେମ୍ବରରେ ଚୀନ, ମୀର ବିରୋଧୀ ପ୍ରସ୍ତାବ ଉପରେ ସ୍ଥଗିତାଦେଶ ଜାରି କରିଥିବା ବେଳେ ଏବେ ସମ୍ପୂର୍ଣ୍ଣ ଭାବେ ରୋକ୍ ଲଗାଇଛି । ଭାରତର ମୋଷ୍ଟ ୱାଣ୍ଟେଡ ଆତଙ୍କବାଦୀ ତାଲିକାରେ ମୀର ନାଁ ରହିଛି । ୨୬/୧୧ ମୁମ୍ବାଇ ଆକ୍ରମଣରେ ସେ ସାମିଲ ଥିଲା ।
ତା’ମୁଣ୍ଡ ଉପରେ ୫ ମିଲିୟନ୍ ଡଲାରର ପୁରସ୍କାର ଘୋଷଣା ହୋଇଛି । ପୂର୍ବରୁ ଟେରର ଫଣ୍ଡିଂ ମାମଲାରେ ମୀରକୁ ୧୫ ବର୍ଷ ଜେଲଦଣ୍ଡରେ ଦଣ୍ଡିତ କରିଥିଲେ ପାକିସ୍ତାନର ଆତଙ୍କବାଦ ନିରୋଧ କୋର୍ଟ । ମୀର ପ୍ରାଣ ହରାଇଥିବା ନେଇ ପାକିସ୍ତାନ ଘୋଷଣା କରିବା ପରେ ପଶ୍ଚିମ ରାଷ୍ଟ୍ର ଗୁଡ଼ିକ ତାର ପ୍ରମାଣପତ୍ର ମାଗିଥିଲେ । ଯେଉଁଥିପାଇଁ ମିଛୁଆ ପାକିସ୍ତାନ ଅଡୁଆରେ ପଡ଼ିଥିଲା । ଏଥିରୁ ଖସିବା ପାଇଁ ଶେଷରେ ମୀର ଜେଲରେ ଥିବା ଖବର ପ୍ରକାଶ କରିଥିଲା ।
