Category: ମୁଖ୍ୟ ଖବର

ମଣିପୁର: ଉତ୍ତ୍ୟକ୍ତ ଲୋକଙ୍କ ଦାବି ଯୋଗୁଁ ଗିରଫ ୧୨ ଉଗ୍ରବାଦୀ ମୁକ୍ତ

ମଣିପୁରରେ ହିଂସା ଥମିବା ବଦଳରେ ବଢ଼ିବାରେ ଲାଗିଛି । କେଉଁଠି ପୋଡ଼ାଜଳା ତ କେଉଁଠି ବିକ୍ଷୋଭ ପ୍ରଦର୍ଶନ । ସୁରକ୍ଷା ବାହିନୀ ଉପରକୁ ଆକ୍ରମଣ କରିବାକୁ ବି ପଛାଉ ନାହାଁନ୍ତି ଦୁର୍ବୃତ୍ତ । ଗତ କିଛି ଦିନ ହେଲା ଲାଗି ରହିଥିବା ହିଂସାକୁ ନେଇ ୧୨ ଜଣ ଉଗ୍ରବାଦୀଙ୍କୁ ଗିରଫ କରିଥିଲେ ସୁରକ୍ଷା ବାହିନୀ । ହେଲେ ପରିସ୍ଥିତି ଏମିତି ହେଲା ଶେଷରେ ସେମାନଙ୍କୁ ମୁକ୍ତ କରିବାକୁ ପଡ଼ିଲା ।

ପୂର୍ବ ଇମ୍ଫାଲ୍‌ ଅନ୍ତର୍ଗତ ଇଥାମ୍‌ ଗାଁରେ ସୁରକ୍ଷାକର୍ମୀଙ୍କୁ ଘେରାଉ କରିଥିଲେ ମହିଳା । ସେମାନଙ୍କ ନେତୃତ୍ବରେ ପ୍ରାୟ ୧୫୦୦ ଉତ୍ତ୍ୟକ୍ତ ଲୋକେ ସୁରକ୍ଷାକର୍ମୀଙ୍କୁ ଛାଡ଼ି ନଥିଲେ । ଶେଷରେ ବାଧ୍ୟ ହୋଇ ‘କାଙ୍ଗ୍‌ଲେଇ ୟାୱଲ୍‌ କାନ୍ନା ଲୁପ୍‌’ (KYKL)ର ୧୨ ଜଣ ଉଗ୍ରବାଦୀଙ୍କୁ ମୁକ୍ତ କରିଥିଲେ ସୁରକ୍ଷାକର୍ମୀ । ଏ ନେଇ ସରକାରୀ ଅଧିକାରୀମାନେ ଗଣମାଧ୍ୟମ ଆଗରେ ସ୍ପଷ୍ଟ କରିଛନ୍ତି । ସାଧାରଣ ନାଗରିକମାନଙ୍କ ଜୀବନ ବିପଦରେ ନ ପକାଇବା ଲାଗି ସେନା ଭାବିଚିନ୍ତି ଏଭଳି ନିଷ୍ପତ୍ତି ଗ୍ରହଣ କରିଛି । ମୁକ୍ତ ଉଗ୍ରବାଦୀମାନେ ଘଟଣାସ୍ଥଳରେ ଜବତ ଅସ୍ତ୍ରଶସ୍ତ୍ର ନେଇ ଚାଲି ଆସିଥିବା ସୁରକ୍ଷାବାହିନୀ ପକ୍ଷରୁ କୁହାଯାଇଛି ।

ଗତକାଲି ଇଥାମ୍‌ ଗାଁରେ ସୁରକ୍ଷା ବାହିନୀ ପକ୍ଷରୁ ଅଭିଯାନ ଆରମ୍ଭ ହୋଇଥିଲା । ଗୋଳାବାରୁଦ ଓ ଅସ୍ତ୍ରଶସ୍ତ୍ର ଜବତ କରିବା ସହ ମଣିପୁରୀ ଉଗ୍ରବାଦୀ ସଙ୍ଗଠନ KYKLର ୧୨ ଜଣ କ୍ୟାଡର୍‌ଙ୍କୁ ଗିରଫ କରଯାଇଥିଲା । ସେପଟେ କୋହିମା ଓ ଇମ୍ଫାଲ୍‌ର ପ୍ରତିରକ୍ଷା ଜନସମ୍ପର୍କ ଅଧିକାରୀ କହିଛନ୍ତି ଯେ କିଛି ମହିଳା ଓ ସ୍ଥାନୀୟ ନେତାଙ୍କ ନେତୃତ୍ବରେ ପ୍ରାୟ ୧୫୦୦ ଉତ୍ତ୍ୟକ୍ତ ଲୋକ ଘଟଣାସ୍ଥଳକୁ ଘେରି ଯାଇଥିଲେ ।

ସୁରକ୍ଷା ବାହିନୀ ପକ୍ଷରୁ ଚାଲିଥିବା ଅଭିଯାନରେ ସେମାନେ ବାଧା ଦେଇଥିଲେ । ବାରମ୍ବାର ଅନୁରୋଧ କରିବା ସତ୍ତ୍ୱେ କୌଣସି ସୁଫଳ ମିଳିନଥିଲା । ଉତ୍ତ୍ୟକ୍ତ ଜନତାଙ୍କ ଉପରେ ଆକ୍ରମଣ ନକରି ଶେଷରେ ୧୨ ଜଣ କ୍ୟାଡର୍‌ଙ୍କୁ ସ୍ଥାନୀୟ ନେତାଙ୍କୁ ହସ୍ତାନ୍ତର କରାଯାଇଥିଲା । ଜନଜାତି ମାନ୍ୟତା ପାଇଁ ଦାବି କରୁଥିବା ମଣିପୁରୀ ସମ୍ପ୍ରଦାୟ ବିରୋଧରେ ମେ’ ୩ ତାରିଖରେ ଆୟୋଜିତ ଟ୍ରାଇବାଲ୍‌ ସଲିଡାରିଟି ମାର୍ଚ୍ଚରେ ହିଂସାକାଣ୍ଡ ଘଟିଥିଲା । ସେବେଠାରୁ ଏଯାବତ୍‌ ମଣିପୁର ରାଜ୍ୟରେ ଅସ୍ଥିରତା ଲାଗି ରହିଛି ।
ବୌଦ୍ଧ: ପୁଣି ମାଓବାଦୀ ସକ୍ରିୟ, ମାଓ ପୋଷ୍ଟରକୁ ନେଇ ଲୋକେ ଭୟଭୀତ

କିଛି ଦିନର ନିରବତା ପରେ ବୌଦ୍ଧ ଜିଲ୍ଲାରେ ପୁଣି ଥରେ ମାଓବାଦୀ ସକ୍ରିୟ ହେଲେଣି । ପୁଣି ସେମାନଙ୍କ ଦବଦବା ଜାହିର କରିବାକୁ ଆଗକୁ ବଢ଼ିଲେଣି । ଏବେ ସେମାନେ ପୋଷ୍ଟର ମାରି ଲୋକଙ୍କୁ ଭୟଭୀତ କରାଇଛନ୍ତି ।

ବୌଦ୍ଧ ଜିଲ୍ଲା ଘଣ୍ଟାପଡ଼ା ଥାନା ଅଞ୍ଚଳରେ ମାଓ ପୋଷ୍ଟର ଦେଖିବାକୁ ମିଳିଛି । ଖୁଣ୍ଟିଗୋରା ମାର୍କଟରେ ଥିବା ଏକ ଗଛରେ ମାଓବାଦୀମାନେ ପୋଷ୍ଟର ମାରିଛନ୍ତି । ସକାଳୁ ସକାଳୁ ସ୍ଥାନୀୟ ଲୋକେ ଏହାକୁ ଦେଖିଥିଲେ । ଏହି ପୋଷ୍ଟରରେ କିଛି ମାଓ ନେତାଙ୍କ ଫଟୋ ରହିଥିଲା । ସେମାନେ ଏନକାଉଣ୍ଟରରେ ପ୍ରାଣ ହରାଇଥିଲେ । ସେହି ମାଓବାଦୀଙ୍କୁ ସହିଦ ଦର୍ଶାଇ ଶ୍ରଦ୍ଧାଞ୍ଜଳି ଜଣାଇଛନ୍ତି ।

ଏମିତିକି ସହିଦଙ୍କ ଶ୍ରଦ୍ଧାଞ୍ଜଳି ବ୍ୟର୍ଥ ଯିବ ନାହିଁ ବୋଲି ମଧ୍ୟ ପୋଷ୍ଟରରେ ଲେଖାଯାଇଛି । ପୋଷ୍ଟରରେ ପୋଲିସର ଦମନ ଏବଂ ମିଥ୍ୟା ଏନକାଉଣ୍ଟର ଘଟଣାକୁ ନିନ୍ଦା କରାଯାଇଛି । ଏହାର ପ୍ରତିଶୋଧ ନିଆଯିବ ବୋଲି ଉଲ୍ଲେଖ ରହିଛି । ପ୍ରତିବାଦରେ କଳାହାଣ୍ଡି,ନୟାଗଡ଼, କନ୍ଧମାଳ, ବୌଦ୍ଧ ଭଳି ଜିଲ୍ଲାରେ ୧୨ ଘଣ୍ଟିଆ ବନ୍ଦ ପାଳନ କରାଯାଇଛି । ଏହାକୁ ସଫଳ କରିବା ପାଇଁ ପୋଷ୍ଟରରେ ଲେଖାଯାଇଛି । ତେବେ ଏସବୁ ପୋଷ୍ଟର ପ୍ରକୃତରେ ମାଓବାଦୀ ମାରିଛନ୍ତି କି ନାହିଁ ତାହା ଏଯାଏ ସ୍ପଷ୍ଟ ହୋଇନି । ଏହାକୁ ନେଇ ସ୍ଥାନୀୟ ଲୋକେ ଭୟଭୀତ ହୋଇଛନ୍ତି । ଏ ନେଇ ଘଣ୍ଟାପଡ଼ା ଥାନା ପୋଲିସ ତଦନ୍ତ ଜାରି ରଖିଛି ।

ଗତ କିଛି ଦିନ ହେଲା ଜିଲ୍ଲାରେ ମାଓବାଦୀଙ୍କ ହିଂସା ହ୍ରାସ ପାଇଥିଲା । ରାଜ୍ୟ ଓ କେନ୍ଦ୍ର ସରକାରଙ୍କ ଆହ୍ୱାନରେ ବହୁ ମାଓବାଦୀ ସମାଜର ମୁଖ୍ୟ ସ୍ରୋତକୁ ଫେରିଲେଣି । ଏବେ ବି ପୋଲିସର ଅଭିଯାନ ଜାରି ରହିଛି । ମାଓବାଦୀଙ୍କ ଦବଦବା ହ୍ରାସ ପାଉଥିବା ବେଳେ ପୁଣିଥରେ ସେମାନେ ସକ୍ରିୟ ହେଲେଣି । ଏହାକୁ ନେଇ ସ୍ଥାନୀୟ ଲୋକଙ୍କ ଚିନ୍ତା ମଧ୍ୟ ବଢ଼ିଛି ।
ଭୁବନେଶ୍ୱର: ଓଃ କି ମାଡ଼! ବାନ୍ଧିଲେ,ଉଲଗ୍ନ କରି ଛେଚିଲେ

ରାଜଧାନୀ ଭୁବନେଶ୍ୱରରେ କଙ୍ଗାରୁ କୋର୍ଟ । ନା କଥା ଶୁଣିଲେ, ନା ଆଇନକୁ ମାନିଲେ । ନିର୍ଯାତନାର ଶେଷ ସୀମା ଉଲ୍ଲଂଘନ କଲେ । ହଁ ଆଜ୍ଞା, ଭିଜୁଆଲ୍ ଦେଖିଲେ ଲୋମ ଟାଙ୍କୁରି ଯିବ । ଯିଏ ଆସିଲା ମାରିଲା । ଲାତ, ଗୋଇଠା, ବିଧା ମାରି ଚାଲିଲେ । ଯୁବକଙ୍କୁ ଉଲଗ୍ନ କଲେ, ନିସ୍ତୁକ ଛେଚିଲେ ।

ରାଜଧାନୀର ପଳାଶୁଣି ହାଟ ନିକଟରେ ପ୍ରାଚୀ ବିହାର ଛକ । ଗତ ଶୁକ୍ରବାର ରାତିରେ ଏଠାରେ ହିଁ ଅମାନବୀୟ କାଣ୍ଡ ଦେଖିବାକୁ ମିଳିଥିଲା । ଜଣେ ଯୁବକ ମୋବାଇଲ୍ ଚୋରି କରିଥିବା ଅଭିଯୋଗରେ ଧରାପଡ଼ିଥିଲେ । ଏଥିରେ କୌଣସି ସତ୍ୟତା ନଥିଲା କି ପ୍ରମାଣିତ ହୋଇନଥିଲେ । କେବଳ ଅଭିଯୋଗରେ ଯୁବକଙ୍କୁ ଧରିଥିଲେ ୪ ଜଣ ଦୁର୍ବୃତ୍ତ । କାହା କଥା ଶୁଣିବାକୁ ନାରାଜ । ଆରମ୍ଭ ହେଲା ନିସ୍ତୁକ ମାଡ଼ । ଛେଚିଲେ, ଚପଲରେ ମାରିଲେ, ଆକ୍ରମଣର ସୀମା ଟପିଲା । ନେହୁରା, ଗୁହାରି ଶୁଣିଲେ ନାହିଁ । ଏତିକିରେ ଶେଷ ହୋଇନଥିଲା ନିର୍ଯାତନା । ଯୁବକଙ୍କୁ ଉଲଗ୍ନ କରି ରାସ୍ତାରେ ଥିବା ଗ୍ରୀଲରେ ବାନ୍ଧିଦେଲେ । ଯିଏ ଆସିଲା ମାରି ଚାଲିଲା । ଯୁବକଙ୍କୁ ଉଦ୍ଧାର କରିବା ବଦଳରେ ଦର୍ଶକ ସାଜିଲେ ଲୋକେ । ଭାଇରାଲ୍ କରିବା ପାଇଁ ଫଟୋ ବି ଉଠାଇଲେ । ଗୋଇଠା, ବିଧା, ଚାପୁଡ଼ା, ଚପଲ ମାଡ଼ରେ ଯୁବକଙ୍କୁ ଆହତ କଲେ । ଖରାପ ଭାଷାରେ ଗାଳିଗୁଲଜ ବି କଲେ । ମଳଦ୍ୱାରରେ ବିୟର ବୋତଲ ପୁରାଇ ହାତଗୋଡ଼ ଭାଙ୍ଗିଦେବାକୁ ଉସୁକାଇଲେ । କାହାରି କଥା ନଶୁଣି କଙ୍ଗାରୁ କୋର୍ଟର ନିୟମ ଫଲୋ କଲେ ।

ନିରୀହ ଯୁବକଙ୍କ କ’ଣ ଥିଲା ଦୋଷ । କେବଳ ତାଙ୍କ ନାଁରେ ମୋବାଇଲ୍ ଚୋରି ଅଭିଯୋଗ କରିଥିଲେ ଆକ୍ରମଣକାରୀ । ନା ମିଳିଥିଲା ମୋବାଇଲ୍ ନା ଅନ୍ୟ କିଛି ପ୍ରମାଣପତ୍ର । ରାଜଧାନୀର ରାଜରାସ୍ତାରେ ମନଇଛା ମାରି ଚାଲିଲେ । ଉଲଗ୍ନ କରି ଇଜ୍ଜତ ନେଲେ । ଆହତ ଯୁବକ ନେହୁରା ହେଲେ, ଗୋଡ଼ ଧରିଲେ । ଉଲଗ୍ନ ନକରି ମାଡ଼ ମାରିବାକୁ କହିଲେ ଯୁବକ । ହେଲେ ଏତିକିରେ ସେମାନଙ୍କ ମନ ଶାନ୍ତ ହେଲାନି । ମାଡ଼ମାରି ବେଶ୍ କିଛି ସମୟ ଉପଭୋଗ କଲେ । ତେବେ ଜଣେ ମହିଳା ବିଳମ୍ବ ନକରି ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ପିସିଆର-୬ ପହଞ୍ଚି ଆହତ ଯୁବକଙ୍କୁ ଉଦ୍ଧାର କରିଥିଲା । ଆହତଙ୍କୁ ମଞ୍ଚେଶ୍ୱର ଥାନା ପୋଲିସକୁ ହସ୍ତାନ୍ତର କରାଯାଇଥିବା ବେଳେ ଘଟଣାର ତଦନ୍ତ ଜାରି ରହିଛି ।

୪ ମାସ ପୂର୍ବେ ମଞ୍ଚେଶ୍ୱର ଥାନା ଅଧୀନ ଜଗନ୍ନାଥ ଲେପର୍ସ କଲୋନୀରେ ଜଣେ ମହିଳାଙ୍କୁ କଙ୍ଗାରୁ କୋର୍ଟର ସାମ୍ନା କରିବାକୁ ପଡ଼ିଥିଲା । ତାଙ୍କୁ ବାନ୍ଧି ମାଡ଼ ମାରିଥିଲେ ଦୁର୍ବୃତ୍ତ । ରାଜଧାନୀରେ ଏଭଳି ଘଟଣା ବାରମ୍ବାର ଘଟୁଥିବା ବେଳେ ପୋଲିସ ଏ ଦିଗରେ ତୁରନ୍ତ ପଦକ୍ଷେପ ନେବା ଜରୁରୀ ହୋଇଛି ।
ମସ୍କୋ: ବେଲାରୁଷର ଏଣ୍ଟ୍ରି,’ୱାଗନର’ର ୟୁ-ଟର୍ଣ୍ଣ, ଅଳ୍ପକେ ବର୍ତ୍ତିଲା ଋଷ

ଋଷରେ ଗୃହଯୁଦ୍ଧ ପରିସ୍ଥିତି । କେତେବେଳେ ଦେଶ ଭିତରେ କ’ଣ ଘଟିବ କହିହେବନି । ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଏବେ ଜୋରଦାର ବିରୋଧ ହେଉଛି । ଋଷରେ ରହୁଥିବା ଲୋକ, ଦେଶର ଖାଉଥିବା ଲୋକ ଏବେ ଋଷକୁ ହିଁ ନଷ୍ଟ କରିବାକୁ ବସିଛନ୍ତି । ପୁଟିନ ବିରୋଧରେ ଦଳେ ଥିବାବେଳେ ଅନ୍ୟ ଗୋଷ୍ଠୀ ସମର୍ଥନରେ ବାହାରିଛନ୍ତି । ମାନେ ପ୍ରାଇଭେଟ୍ ଆର୍ମି ‘ୱାଗନର’, ରାଷ୍ଟ୍ରପତି ପୁଟିନଙ୍କୁ ନିଜ ପଦରୁ ହଟାଇବାକୁ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିଛି । ଏପରିକି କିଛି ସହରକୁ ନିଜ କବଜାକୁ ନେଇଛି । ସେପଟେ ପ୍ରାଇଭେଟ୍ ଆର୍ମି ‘ୱାଗନର’ ଉପରେ କଡ଼ା ନଜର ରଖିଛନ୍ତି ଋଷ ସେନା । ଦୋଷୀକୁ ଦଣ୍ଡ ଦେବା ପାଇଁ ପୁଟିନ ସେନା ସଂକଳ୍ପ ନେଇଛନ୍ତି । ଦେଶଦ୍ରୋହୀ, ବିଶ୍ୱାସଘାତକମାନଙ୍କୁ କେବେ ବି କ୍ଷମା କରାଯିବନି ବୋଲି ପୁଟିନ୍ ରୋକଠୋକ୍ କହିଛନ୍ତି ।

ପ୍ରାଇଭେଟ୍ ଆର୍ମି ‘ୱାଗନର’ମୁଖ୍ୟ ପ୍ରିଗୋଝିନ୍‌, ପୁଟିନଙ୍କୁ ଗାଦିଚ୍ୟୁତ କରିବା ପାଇଁ ଜୋରଦାର ଉଦ୍ୟମ ଆରମ୍ଭ କରିଛନ୍ତି । ଏପରିକି ମସ୍କୋ ଅଭିମୁଖେ ପ୍ରାଇଭେଟ୍ ଆର୍ମି ଯାଉଥିବା ବେଳେ ଏଣ୍ଟ୍ରି ମାରିଛନ୍ତି ବେଲାରୁଷ ରାଷ୍ଟ୍ରପତି । ସେ ମଧ୍ୟସ୍ଥତା ପାଇଁ ‘ୱାଗନର’ମୁଖ୍ୟଙ୍କ ସହ ଆଲୋଚନା କରିବା ପରେ ପ୍ରିଗୋଝିନ୍‌ ସହମତି ପ୍ରକାଶ କରିଛନ୍ତି । ଶାନ୍ତିପୂର୍ଣ୍ଣ ଆଲୋଚନା ପାଇଁ ରାଜି ହେବାରୁ ୟୁ-ଟର୍ଣ୍ଣ ନେଇଛି ୱାଗନର ସେନା । ଶେଷରେ ଋଷରେ ବିଦ୍ରୋହର ଧ୍ୱନି ସାମାନ୍ୟ କମିଛି । ରକ୍ତାକ୍ତ ଯୁଦ୍ଧରୁ ଅଳ୍ପକେ ବର୍ତ୍ତିଛି ଦେଶ ତଥାପି ଆଲର୍ଟ ରହିଛନ୍ତି ଋଷ ସେନା ।

ଋଷ ଏବଂ ୟୁକ୍ରେନ ଯୁଦ୍ଧକୁ ୧୬ ମାସ ପୁରିଲାଣି । ତଥାପି ଏହାର କୌଣସି ନିଷ୍କର୍ଷ ବାହାରୁନି । ସମାଧାନର ରାସ୍ତା କେହି ବି ବାହାର କରୁନାହାଁନ୍ତି । ୟୁକ୍ରେନ ପୁରାପୁରି ଭାବେ ଧ୍ୱସ୍ତବିଧ୍ୱସ୍ତ ହେଲାଣି । ଆମେରିକା ଏବଂ ୟୁରୋପ ମହାଦେଶର ଶକ୍ତିଶାଳୀ ରାଷ୍ଟ୍ରଗୁଡ଼ିକ ଅସ୍ତ୍ରଶସ୍ତ୍ର ଯୋଗାଉଥିବାରୁ ୟୁକ୍ରେନ ଯୁଦ୍ଧ ଜାରି ରଖିଛି । ଋଷକୁ ମଧ୍ୟ ବହୁ କ୍ଷତି ସହିବାକୁ ପଡ଼ିଲାଣି ।

ବାହ୍ୟ ବଳ ସହାୟତାରେ ୟୁକ୍ରେନ୍ ପଛକୁ ହଟୁନି କି ଯୁଦ୍ଧ ବନ୍ଦ କରୁନି । ଏଭଳି ସ୍ଥିତିରେ ଦେଶ ଭିତରେ ହିଁ ପୁଟିନଙ୍କୁ ବିରୋଧର ସାମ୍ନା କରିବାକୁ ପଡ଼ିଛି । ଋଷ ଗୃହଯୁଦ୍ଧ ଉପରେ କଡ଼ା ନଜର ରଖିଛନ୍ତି ଆମେରିକା, ୟୁକ୍ରେନ ପରି ବିରୋଧୀ ରାଷ୍ଟ୍ର । ସେପଟେ ଋଷ ସ୍ଥିତି ନେଇ ଭାରତ ଭଳି ମିତ୍ର ରାଷ୍ଟ୍ର ଗୁଡ଼ିକ ଟେନସନରେ ପଡ଼ିଛନ୍ତି । ଋଷ ସ୍ଥିତି ସମ୍ଭାଳିବା ପାଇଁ ମିତ୍ରରାଷ୍ଟ୍ର ବେଲାରୁଷ ଆଲୋଚନା କରିବାକୁ ପ୍ରସ୍ତାବ ରଖିଛନ୍ତି । ତେଣୁ ଗୃହଯୁଦ୍ଧ ଆଶଙ୍କା ଦୂର ହେବା ସହ ଦେଶରେ ଶାନ୍ତି ବଜାୟ ରହିବ ବୋଲି ଆଶା କରାଯାଉଛି ।
ଆଜି ୩ ରଥର ଦକ୍ଷିଣ ମୋଡ଼, ଅପେକ୍ଷା କରିଛି ଶରଧାବାଲି

କେଇଟା ଦିନ ପରେ ବାହୁଡ଼ା ଯାତ୍ରା । ରତ୍ନବେଦୀରୁ ଜନ୍ମବେଦୀକୁ ଫେରିବେ କାଳିଆ ଠାକୁର । ଏଥିପାଇଁ ସେବାୟତଙ୍କ ପକ୍ଷରୁ ପ୍ରତିଦିନ ନୀତିକାନ୍ତି ଜାରି ରହିଛି । ଆଜି ୩ ରଥର ଦକ୍ଷିଣମୋଡ଼ ହେବ । ରଥଯାତ୍ରା ପରଠାରୁ ଶ୍ରୀଗୁଣ୍ଡିଚା ମନ୍ଦିର ସମ୍ମୁଖରେ ଅଟକି ରହିଛନ୍ତି ତିନି ରଥ । ଆଜି ଏହି ରଥ ଦକ୍ଷିଣମୋଡ଼ ନେବେ । ନାକଚଣା ଦ୍ୱାରସ୍ଥିତ ଶରଧାବାଲିରେ ବିଜେ କରିବେ । ଏଥିପାଇଁ ନାକଚଣା ଦ୍ୱାର ସମ୍ମୁଖ ଶରଧାବାଲିକୁ ପୁରାପୁରି ସଫାସୁତରା କରାଯାଇଛି । ଆସନ୍ତାକାଲି ସେବାୟତ ଓ ପୋଲିସ ସହଯୋଗରେ ନାକଚଣା ଦ୍ୱାର ସମ୍ମୁଖ ଶରଧାବାଲିକୁ ନିଆଯିବ ।

ବାହୁଡ଼ାଯାତ୍ରା ପାଇଁ ପୂର୍ବ ପ୍ରସ୍ତୁତି ଆରମ୍ଭ ହୋଇଛି । ରଥଯାତ୍ରା ପରଠାରୁ ୩ ରଥ ଉତ୍ତରମୁହାଁ ହୋଇ ରହିଥିବା ବେଳେ ଆଜି ୩ ରଥକୁ ଦକ୍ଷିଣ ମୋଡ଼ କରି ରଖାଯିବ। ଏଥିପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ୱତନ୍ତ୍ର ନୀତିକାନ୍ତି ହୋଇଛି । ମହାପ୍ରଭୁଙ୍କ ଆଜ୍ଞାମାଳ ବିଜେ ପରେ ତିନି ରଥ ଦକ୍ଷିଣ ମୋଡ଼ ନେବେ । ଶରଧାବାଲିରେ ବାହୁଡ଼ା ଯାତ୍ରା ପାଇଁ ରଥ ଗୁଡ଼ିକୁ ପ୍ରସ୍ତୁତ କରି ରଖାଯିବ । ପରମ୍ପରା ଅନୁଯାୟୀ, ଦକ୍ଷିଣ ମୋଡ଼ ପାଇଁ ପ୍ରଥମେ ଶରଧାବାଲିକୁ ଯିବ ମା’ସୁଭଦ୍ରାଙ୍କ ଦର୍ପଦଳନ ରଥ । ପରେ ବଡ଼ ଠାକୁରଙ୍କ ତାଳଧ୍ୱଜ ଓ ଶେଷରେ ଯିବ ମହାପ୍ରଭୁଙ୍କ ନନ୍ଦିଘୋଷ ରଥ ।

ଆଜି ମଧ୍ୟାହ୍ନ ସାଢ଼େ ୧୨ଟାରେ ରଥ ଆଜ୍ଞାମାଳ ବିଜେ ହେବ । ଅପରାହ୍ଣ ଗୋଟାଏ ସୁଦ୍ଧା ପ୍ରଥମ ଭୋଗମଣ୍ଡପ ଉଠିବା ପରେ ମଇଲମ, ଯାତ୍ରାଙ୍ଗୀ ମହାସ୍ନାନ ସର୍ବାଙ୍ଗ ନୀତି ସାଢ଼େ ୨ଟା ଭିତରେ ଶେଷ ହେବ । ଅପରାହ୍ଣ ୩ଟାରେ ମହାପ୍ରଭୁଙ୍କୁ ନୂଆ ଲୁଗା ଲାଗି ଓ ବେଶ ହେବ । ସନ୍ଧ୍ୟା ୬ଟାରୁ ରାତି ସାଢ଼େ ୯ଟା ପର୍ଯ୍ୟନ୍ତ ମଇଲମ,ବେଶ, ସନ୍ଧ୍ୟା ଆଳତି, ସନ୍ଧ୍ୟାଧୂପ ନୀତି ଅନୁଷ୍ଠିତ ହେବ ବୋଲି ସୂଚନା ମିଳିଛି । ଆଜି ଦକ୍ଷିଣ ମୋଡ଼, ଆଗକୁ ବାହୁଡ଼ା ଯାତ୍ରା । ସେଥିପାଇଁ ଭକ୍ତଙ୍କ ଭିଡ଼ ବି ଜମୁଛି । ପ୍ରଭୁଙ୍କ ଲୀଳା ଦେଖିବା ପାଇଁ ଦୂର ଦୂରାନ୍ତରୁ ଶ୍ରଦ୍ଧାଳୁଙ୍କ ବେଶ୍ ସମାଗମ ହେଉଛି ।
ED ଓ CBIକୁ ଡରନ୍ତୁ ନାହିଁ, ସତ୍ୟର ସାମ୍ନା କରନ୍ତୁ: ସତ୍ୟପାଲ

ଏବେଠାରୁ ୨୦୨୪ ଲୋକସଭା ନିର୍ବାଚନ ପାଇଁ ଜୋରଦାର ପ୍ରସ୍ତୁତି ଆରମ୍ଭ ହେଲାଣି । ବିଭିନ୍ନ ଦଳ ପକ୍ଷରୁ ବୟାନବାଜି ଜାରି ରହିଛି । ବିରୋଧୀ ଦଳ ଏକତା ରାଜନୀତି ଜୋର ଧରିଛି । ଏଭଳି ସ୍ଥିତିରେ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି ଜମ୍ମୁକାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲ୍ଲିକ । ପୁଣି ଥରେ ସେ ମୋଦି ସରକାରଙ୍କୁ ଟାର୍ଗେଟ୍ କରିଛନ୍ତି । ED ଓ CBIକୁ ନ ଡରିବାକୁ ସେ ସବୁ ନେତାଙ୍କୁ କହିଛନ୍ତି । ସତ୍ୟକୁ ସାମ୍ନା କରନ୍ତୁ, ED ଓ CBI ଟେନସନ୍ ନିଅନ୍ତୁ ନାହିଁ ।

୨୦୨୪ ଲୋକସଭା ନିର୍ବାଚନରେ ଭାରତୀୟ ଜନତା ଦଳର ପରାଜୟ ନିଶ୍ଚିତ ବୋଲି ଟ୍ୱିଟରରେ ଲେଖିଛନ୍ତି ସତ୍ୟପାଲ । ଆଗାମୀ ନିର୍ବାଚନରେ ବିଜେପିର ମୂଳପୋଛ । କେନ୍ଦ୍ର ବିଜେପି ପୁରାପୁରି ଲୋପ ପାଇବ ବୋଲି ସେ କହିଛନ୍ତି । ବିଜେପିର ପରାସ୍ତ ପରେ ପ୍ରଧାନମନ୍ତ୍ରୀ ମୋଦି ଏବଂ ତାଙ୍କ ସହଯୋଗୀମାନଙ୍କ ତଦନ୍ତ କରିବ । ତେଣୁ ଆପଣମାନେ ସାହସର ସହିତ କେନ୍ଦ୍ର ସରକାରଙ୍କ ଏହି ଏଜେନ୍ସିଗୁଡ଼ିକର ସାମ୍ନା କରିବା ଉଚିତ୍ ବୋଲି କହିଛନ୍ତି ସତ୍ୟପାଲ ମଲ୍ଲିକ । ମାତ୍ର ୬ ମାସ ଧୈର୍ଯ୍ୟର ସହ ଅପେକ୍ଷା କରନ୍ତୁ । ବିଜେପିର ପରାଜୟ ନିଶ୍ଚିତ । ଏହାପରେ ସବୁ ଅଧିକାରୀ ପଳାୟନ କରିବେ । ସେମାନେ ଭାବିବେ ଚାଲିଯିବାର ସମୟ ଆସିଗଲାଣି । ତେଣୁ କାର୍ଯ୍ୟରୁ ବିଦାୟ ନେବେ । ତେଣୁ ସେମାନଙ୍କ ବିରୋଧରେ କିଛି କରିବାର ଆବଶ୍ୟକତା ନାହିଁ । କେବଳ କ୍ଷମତାରେ ବସିଥିବା ବିଜେପି ଲୋକଙ୍କ ତଦନ୍ତ ହେବ ।

ସମୟକୁ ଅପେକ୍ଷା କରିବାକୁ କହିଛନ୍ତି ଜମ୍ମୁକାଶ୍ମୀରର ପୂର୍ବତନ ରାଜ୍ୟପାଳ । ଏହାର କିଛି ଦିନ ପୂର୍ବେ ସେ କହିଥିଲେ ଯେ ପୁଲୱାମା ଆତଙ୍କବାଦୀ ଆକ୍ରମଣ ବେଳେ ସୈନିକମାନଙ୍କ ଶରୀର ଉପରେ ୨୦୧୯ ନିର୍ବାଚନ ଲଢ଼ାଯାଇଥିଲା । ଏଥିରେ ବାଜି ମାରିଥିଲା ବିଜେପି । ସେହି ଘଟଣାର ତଦନ୍ତ ହୋଇଥିଲେ ‌ତତ୍କାଳୀନ ଗୃହମନ୍ତ୍ରୀଙ୍କୁ ଇସ୍ତଫା ଦେବାକୁ ପଡ଼ିଥାନ୍ତା । ଆକ୍ରମଣ ଘଟଣା ପରେ ପ୍ରଧାନମନ୍ତ୍ରୀ ମୋଦିଙ୍କୁ ଅବଗତ ପରେ ସେ ଚୁପ୍ ରହିବା ପାଇଁ କହିଥିଲେ । ସେପଟେ, ଏହି ଆକ୍ରମଣ ଘଟଣାର ଏଯାଏ କୌଣସି ତଦନ୍ତ ହୋଇନାହିଁ ।
ନୂଆଦିଲ୍ଲୀ: ଆମେରିକା ପରେ ଇଜିପ୍ଟ ଗସ୍ତରେ ପ୍ରଧାନମନ୍ତ୍ରୀ ମୋଦି

ଯୁକ୍ତରାଷ୍ଟ୍ର ଆମେରିକା ପରେ ଏବେ ପ୍ରଧାନମନ୍ତ୍ରୀ ମୋଦି ଦୁଇଦିନିଆ ଷ୍ଟେଟ୍‌ ଭିଜିଟ୍‌ରେ ଇଜିପ୍ଟ ଗସ୍ତ କରିଛନ୍ତି । ଇଜିପ୍ଟକୁ ପ୍ରଧାନମନ୍ତ୍ରୀ ମୋଦିଙ୍କ ଏହା ପ୍ରଥମ ଗସ୍ତ । ରା‌ଷ୍ଟ୍ରପତି ଅବ୍‌ଦେଲ୍‌ ଫତା ଏଲ୍‌-ସିସିଙ୍କ ଆମନ୍ତ୍ରଣ ପରେ ଇଜିପ୍ଟ ଗସ୍ତରେ ଯାଇଛନ୍ତି ପିଏମ୍ । ୧୯୯୭ ପରେ ସେ ପ୍ରଥମ ପ୍ରଧାନମନ୍ତ୍ରୀ ଭାବେ ଦ୍ୱିପାକ୍ଷିକ ଆଲୋଚନା ନିମନ୍ତେ ଇଜିପ୍ଟ ଯାଇଛନ୍ତି ।

ଆଜି ସନ୍ଧ୍ୟାରେ ଇଜିପ୍ଟର ରାଜଧାନୀ କାଇରୋରେ ପହଞ୍ଚିବେ ପ୍ରଧାନମନ୍ତ୍ରୀ ମୋଦି । ଇଜିପ୍ଟ ପ୍ରଧାନମନ୍ତ୍ରୀ ମୋସ୍ତାଫା ମଦବୌଲିଙ୍କ ସହିତ ତାଙ୍କର ଗୋଲ୍‌ ଟେବୁଲ୍‌ ବୈଠକ ବସିବ । ଏହାପରେ ଉପସ୍ଥିତ ଭାରତୀୟ ସମ୍ପ୍ରଦାୟଙ୍କ ସହିତ ଆଲୋଚନା କରିବେ ମୋଦି । ରାତି ପ୍ରାୟ ସାଢ଼େ ୧୦ଟାରେ ଇଜିପ୍ଟର ଗ୍ରାଣ୍ଡ ମୁଫ୍‌ତିଙ୍କୁ ଭେଟି ଇଜିପ୍ଟୀୟ ଚିନ୍ତାନାୟକମାନଙ୍କ ସହିତ ଆଲୋଚନା କାର୍ଯ୍ୟକ୍ରମ ରହିଛି । ସେହିପରି ଆସନ୍ତାକାଲି ଦିନ ପ୍ରାୟ ୧ଟା ବେଳେ ପ୍ରଧାନମନ୍ତ୍ରୀ, ଦାଉଦି ବୋରା ସମ୍ପ୍ରଦାୟ ଦ୍ୱାରା ପୁନରୁଦ୍ଧାର ୧୧ଶ ଶତାବ୍ଦୀର ଅଲ୍‌ ହକିମ୍‌ ମସ୍‌ଜିଦ୍‌ ପରିଦର୍ଶନ କରିବେ ।

ଅପରାହ୍ଣ ୨ଟାରେ ହେଲିଓପଲିସ୍‌ ୱାର୍‌ ସିମେଟେରିକୁ ଯିବେ ପିଏମ୍ । ସେଠାରେ ପ୍ରଥମ ବିଶ୍ୱଯୁଦ୍ଧରେ ଇଜିପ୍ଟ ପାଇଁ ସହିଦ ଭାରତୀୟ ସୈନିକମାନଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିବେ । ଏସବୁ କାର୍ଯ୍ୟ ଶେଷ ପରେ ରାଷ୍ଟ୍ରପତି ଭବନରେ ଇଜିପ୍ଟ ରାଷ୍ଟ୍ରପତି ଅବ୍‌ଦେଲ୍‌ ଫତା ଏଲ୍‌-ସିସିଙ୍କୁ ଭେଟିବେ ମୋଦି । ଦ୍ୱିପାକ୍ଷିକ ଆଲୋଚନା ହେବା ସହ ରାଜିନାମାରେ ସ୍ୱାକ୍ଷର କରିବେ ଦୁଇ ନେତା । ଏଥିସହ ସନ୍ଧ୍ୟା ପ୍ରାୟ ସାଢ଼େ ୫ଟାରେ ମିଳିତ ପ୍ରେସ୍ ବିବୃତିରେ ଉଦ୍‌ବୋଧନ ଦେବେ ପିଏମ୍ । ସନ୍ଧ୍ୟା ସାଢ଼େ ୬ଟାରେ ନୂଆଦିଲ୍ଲୀ ଫେରିବେ ପ୍ରଧାନମନ୍ତ୍ରୀ ମୋଦି ।
ନବରଙ୍ଗପୁର: ଅତିରିକ୍ତ ଉପଜିଲ୍ଲାପାଳ ଗିରଫ, ନିଜ ଆୟର ୫୦୬% ଅଧିକ ସମ୍ପତ୍ତି ଠାବ

ଶେଷରେ ନବରଙ୍ଗପୁର ଅତିରିକ୍ତ ଉପଜିଲ୍ଲାପାଳ ପ୍ରଶାନ୍ତ କୁମାର ରାଉତଙ୍କୁ ଗିରଫ କରିଛି ଭିଜିଲାନ୍ସ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ତାଙ୍କୁ ବାନ୍ଧିଛି ଟିମ୍ । ତାଙ୍କ ଘରୁ କୋଟି କୋଟି ଟଙ୍କା ଜବତ ହୋଇଥିବା ବେଳେ ୫ କୋଟିରୁ ଅଧିକ ପରିମାଣର ସମ୍ପତ୍ତି ଠାବ ହୋଇଛି । ନିଜ ଆୟର ୫୦୬ ପ୍ରତିଶତ ଅଧିକ ସମ୍ପତ୍ତି ଠାବ କରିଛି ଭିଜିଲାନ୍ସ ବିଭାଗ । ଏ ନେଇ ଭିଜିଲାନ୍ସ ଏସପି ଏମ.ରାଧାକ୍ରିଷ୍ଣନ୍ ସୂଚନା ଦେଇଛନ୍ତି ।

ଗତକାଲି ଅତିରିକ୍ତ ଉପଜିଲ୍ଲାପାଳଙ୍କ ଘରେ ରେଡ୍ ହୋଇଥିଲା । ଏକକାଳୀନ ୯ଟି ଜାଗାରେ ଚଢ଼ାଉ କରିଥିଲା ଭିଜାଲାନ୍ସ । ପ୍ରଶାନ୍ତଙ୍କ ଘରୁ ନଗଦ ୩ କୋଟି ୨ ଲକ୍ଷ ଜବତ କରିଥିଲା ଟିମ୍ । ଭୁବନେଶ୍ବର, ନବରଙ୍ଗପୁର ସରକାରୀ କ୍ବାର୍ଟର୍ସ ଭଳି ସ୍ଥାନରୁ ଏସବୁ ଟଙ୍କା ଜବତ କରାଯାଇଛି ।

ପ୍ରଶାନ୍ତ କୁମାର ମୋଟ ୯୨ ଲକ୍ଷ ୩୪ ହଜାର ଟଙ୍କା ଡିପୋଜିଟ୍ କରିଛନ୍ତି । ବ୍ୟାଙ୍କରେ ୩୮ ଲକ୍ଷ ଥିବାବେଳେ ବେନାମୀ ଆକାଉଣ୍ଟରେ ବାକି ଟଙ୍କା ଡିପୋଜିଟ୍ ରହିଥିବା କହିଛି ଭିଜିଲାନ୍ସ ବିଭାଗ ।

ସେହିପରି ପିଲାଙ୍କ ପାଠ ପଢ଼ାରେ ୮୭ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି ପ୍ରଶାନ୍ତ । ତାଙ୍କର ୫ଟି ପ୍ଲଟ୍ ଥିବା କହିଛି ଭିଜିଲାନ୍ସ ଟିମ୍ ।

ବେଆଇନ୍ କାରବାର ପାଇଁ ଜଙ୍ଗଲ ମାଫିଆ, ଉନ୍ନୟନ କାମ ବାବଦରେ ବାଲିମାଫିଆ,ଖଣି ମାଫିଆ ଏବଂ ଠିକାଦାରମାନଙ୍କ ଠାରୁ ଚାନ୍ଦା ଆଦାୟ କରୁଥିଲେ । ବେଆଇନ୍ ଭାବେ ଲାଞ୍ଚ ନେଇ ଆୟ ବହିର୍ଭୂତ ସମ୍ପତ୍ତି ଠୁଳ କରିଥିଲେ । କୋଟି କୋଟି ଟଙ୍କା ଆୟ କରିବା ପରେ ଶେଷରେ ଏବେ ଭିଜିଲାନ୍ସ ଜାଲରେ ଛନ୍ଦି ହୋଇଛନ୍ତି । ତଦନ୍ତ ପରେ ହିଁ ସବୁ କିଛି ସ୍ପଷ୍ଟ ହେବ ବୋଲି ଭିଜିଲାନ୍ସ ଅଧିକାରୀ ସୂଚନା ଦେଇଛନ୍ତି । ଚଢ଼ଉରେ ୯ଟି ଟିମ୍ ସାମିଲ ହୋଇଥିଲେ ।
ସାରା ଓଡ଼ିଶାକୁ ଛୁଇଁଲା ମୌସୁମୀ, ପ୍ରବଳ ବର୍ଷିବା ନେଇ ସୂଚନା

ଶେଷରେ ସାରା ଓଡ଼ିଶାକୁ ଛୁଇଁଛି ମୌସୁମୀ । ଗତକାଲି ରାଜଧାନୀ ସମେତ କିଛି ସ୍ଥାନରେ ପ୍ରବଳ ବର୍ଷା ହୋଇଥିଲା । ଆଜି ମଧ୍ୟ କିଛି ସ୍ଥାନରେ ବର୍ଷା ହୋଇଛି । ଅଧିକାଂଶ ସ୍ଥାନରେ ମେଘୁଆ ପାଗ ରହିଛି ।

ରାଜ୍ୟର ସବୁ ଜିଲ୍ଲାକୁ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଅଗ୍ରସର ହେଉଥିବା ନେଇ ଭୁବନେଶ୍ୱର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ମିଳିଛି । ମୌସୁମୀ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେଉଛି । ଆସନ୍ତା ୫ ଦିନ ଯାଏ କିଛି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷିବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ । ବର୍ଷା ଯୋଗୁଁ ଟ୍ୱିନ୍ ସିଟି ପାଇଁ ମଧ୍ୟ ଆଲର୍ଟ ଜାରି କରାଯାଇଛି । ବିଜୁଳି, ଘଡ଼ଘଡ଼ି ସହ ପ୍ରବଳ ବର୍ଷା ହେବାର ସମ୍ଭାବନା ରହିଥିବାରୁ ସତର୍କତା ଜାରି କରିଛି ପାଣିପାଗ କେନ୍ଦ୍ର ।

ବର୍ଷା ଯୋଗୁଁ ଆଜି ପାଇଁ ଖୋର୍ଦ୍ଧା,ଗଜପତି, ପୁରୀ ଓ ଗଞ୍ଜାମ ଜିଲ୍ଲା ଗୁଡ଼ିକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଦକ୍ଷିଣ ଓ ଉପକୂଳ ଓଡ଼ିଶାରେ ବର୍ଷାର ପରିମାଣ ଆଗକୁ ବଢ଼ିବ । ଦକ୍ଷିଣ-ପଶ୍ଚିମ ମୌସୁମୀ ବାୟୁ ଏବେ ରାଜ୍ୟରେ ଅଗ୍ରସର ହେଉଛି । ଏହା ମୌସୁମୀ ପାଇଁ ଅନୁକୂଳ ପରିସ୍ଥିତି ସୃଷ୍ଟି କରିବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ମିଳିଛି ।
ଆଡ଼ପ ମଣ୍ଡପରେ ମହାପ୍ରଭୁଙ୍କୁ ଦର୍ଶନ କରୁଛନ୍ତି ଶ୍ରଦ୍ଧାଳୁ

ଆଡ଼ପ ମଣ୍ଡପ ରେ ବିଜେ କରିଛନ୍ତି ଶ୍ରୀଜୀଉ। ଆଡ଼ପ ମଣ୍ଡପରେ ମହାପ୍ରଭୁ ଙ୍କ ଦୁର୍ଲ୍ଲଭ ଦର୍ଶନ ନିମନ୍ତେ ଶ୍ରୀ ଗୁଣ୍ଡିଚା ମନ୍ଦିରରେ ଲାଗିଚି ଭକ୍ତଙ୍କ ଭିଡ। ସକାଳେ ମହାପ୍ରଭୁଙ୍କ ମଙ୍ଗଳ ଆଳତୀ ନୀତି ପରେ ଶ୍ରୀ ଜିଉଙ୍କ ଦର୍ଶନ ଆରମ୍ଭ ହୋଇଛି । ଏହି ଦର୍ଶନ ଆଜି ସନ୍ଧ୍ୟା ପର୍ଯ୍ୟନ୍ତ ଚାଲୁ ରହିବ। ଦିତୀୟ ଭୋଗ ମଣ୍ଡପ ନିତି ପରେ ମହାପ୍ରଭୁଙ୍କ ବନକ ଲାଗି ନୀତି ଆରମ୍ଭ ହେବ। ଏହା ଏକ ଗୁପ୍ତ ନୀତି ହୋଇଥିବାରୁ ଦର୍ଶନ ବନ୍ଦ ରହିବ। ଆସନ୍ତାକାଲି ମହାପ୍ରଭୁଙ୍କ ହେରା ପଞ୍ଚମୀ ନିତି ଅନୁଷ୍ଠିତ ହେବ। ଏ ନେଇ ସମସ୍ତ ପ୍ରସ୍ତୁତି ଶେଷ ହୋଇଛି। ଆଜି ମହାପ୍ରଭୁ ଙ୍କ ପ୍ରଥମ ଆଡ଼ପ ଅବଢ଼ା ବାହାରିବ। ଯାହାକୁ ପାଇବାକୁ ହଜାର ହଜାର ଭକ୍ତ ଅପେକ୍ଷା ରେ ଅଛନ୍ତି। ଶ୍ରୀ ମନ୍ଦିର ରେ ଯେଉଁ ଅବଢ଼ା ବାହାରି ଥାଏ ତାହା ଲକ୍ଷ୍ନୀ ଠାକୁରାଣୀ ତିଆରି କରିଥାନ୍ତି। କୁନ୍ତୁ ଶ୍ରୀ ଗୁଣ୍ଡିଚା ମନ୍ଦିର ହେଉଚି ମହାପ୍ରଭୁ ଙ୍କ ଜନ୍ମ୍ ସ୍ଥାନ। ଏଠାରେ ମା ହାତ ରେ ଅବଢ଼ା ପ୍ରସ୍ତୁତି ହେଇଥାଏ। ଯାହାର ସ୍ୱତନ୍ତ୍ରତା ରହିଚି। ଭକ୍ତ ମାନେ ଆଡ଼ପ ଅବଢ଼ା ବ୍ରାହ୍ମଣ ଙ୍କୁ ସେବନ କରିବାକୁ ଦିଅନ୍ତି। ଯାହା ଦ୍ଵାରା ଅନେକ ପୁଣ୍ୟ ମିଳିଥାଏ।