Category: ମୁଖ୍ୟ ଖବର

ସରିଲା ରିମାଣ୍ଡ, ଜେଲ୍ ଗଲେ ନବରଙ୍ଗପୁରର ପୂର୍ବତନ ଅତିରିକ୍ତ ଉପ ଜିଲ୍ଲାପାଳ ପ୍ରଶାନ୍ତ

ପାଞ୍ଚ ଦିନିଆ ରିମାଣ୍ଡ ଅବଧି ଶେଷ ହେବା ପରେ ଆଜି ନବରଙ୍ଗପୁରର ପୂର୍ବତନ ଅତିରିକ୍ତ ଉପଜିଲ୍ଲାପାଳ ପ୍ରଶାନ୍ତ କୁମାର ରାଉଚଙ୍କୁ ଜେଲକୁ ପଠାଇ ଦେଇଛନ୍ତି ସୁନ୍ଦରଗଡ ସ୍ବତନ୍ତ୍ର ଭିଜିଲାନ୍ସ କୋର୍ଟ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ତାଙ୍କୁ ଗିରଫ କରାଯାଇଥିଲା। ସେ ଆୟଠାରୁ ୫୦୬ ପ୍ରତିଶତ ଅଧିକ ସମ୍ପତ୍ତି ଠୁଳ କରିଥିବା ପ୍ରାଥମିକ ତଦନ୍ତ ପରେ ସାମ୍ନାକୁ ଆସିଥିଲା। ଜେରା ପରେ ଆଉ ୩ଟି ପ୍ଲଟ ରାଉଚଙ୍କ ନାମରେ ଥିବା ବେଳେ ସେଥିରୁ ଦୁଇଟି ବେନାମୀ ପ୍ଲଟ ରହିଛି। ସେହିପରି ୧.୨ କୋଟି ଟଙ୍କା ଜମା ଥିବା ୬ଟି ବେନାମୀ ଆକାଉଣ୍ଟକୁ ପତ୍ତା ଲଗାଇଛି ଭିଜିଲାନ୍ସ।

ଯାଞ୍ଚ ବେଳେ ମିଳିଥିବା ୩ ପ୍ଲଟ ମଧ୍ୟରୁ ୨ଟି ପ୍ଲଟ ବେନାମୀ ଥିବା ବେଳେ ଗୋଟିଏ ଭଦ୍ରକରେ ୦.୪୭ ଡିସିମିଲର ଓ ଗୋଟିଏ ମାଳିପଡା,ଭୁବନେଶ୍ବରରେ ୦.୧୬ ଡିସିମିଲର ରହିଛି। ସେହିପରି ବିଭିନ୍ନ ଲୋକଙ୍କ ନାମରେ ସେ ୬ଟି ବେନାମୀ ଆକାଉଣ୍ଟ ଖୋଲି ୧.୨ କୋଟି ଟଙ୍କା ଡିପୋଜିଟ କରିଥିବା ଜେରା ସମୟରେ କହିଛନ୍ତି ରାଉତ। ସେହିପରି ଭଦ୍ରକସ୍ଥିତ ୟୁକୋ ବ୍ୟାଙ୍କରେ ଏକ ଲକର ଠାବ କରିଛି ତଦନ୍ତକାରୀ ସଂସ୍ଥା।

ଗତ ଜୁନ ୨୩ ତାରିଖରେ ନବରଙ୍ଗପୁରର ପୂର୍ବତନ ଅତିରିକ୍ତ ଉପଜିଲ୍ଲାପଳ ପ୍ରଶାନ୍ତ ରାଉତଙ୍କ ଘର ଉପରେ ଭିଜିଲାନ୍ସ ଚଢାଉ କରିଥିଲା। ଏହା ପରେ ୨୪ ତାରିଖରେ ତାଙ୍କୁ ଗିରଫ କରିଥିଲା। ତାଙ୍କଠାରୁ ୫କୋଟି ୨୧ଲକ୍ଷ ୦୯ହଜାର ୬୫୯ ଟଙ୍କା ଜବତ ହୋଇଥିଲା, ଯାହା ତାଙ୍କ ଆୟର ୫୦୬ ପ୍ରତିଶତ ଥିବା ଜଣା ପଡିଥିଲା। ଚଢାଉ ବେଳେ ତାଙ୍କ ଘରୁ କେବଳ ୩ କୋଟି ୨ଲକ୍ଷ ୩୦ହଜାର ୮୦୦ଟଙ୍କା ନଗଦ ଜବତ କରିଥିଲା। ,ଯାହା ରାଜ୍ୟ ଭିଜିଲାନ୍ସ ଇତିହାସରେ ଜବତ ନଗଦ ଟଙ୍କା ମଧ୍ୟରେ ଦ୍ୱିତୀୟ ସର୍ବାଧିକ ।

ପ୍ରାଶାନ୍ତ ରାଉତଙ୍କର ଭୁବନେଶ୍ୱରର କାନନ ବିହାର ଅଂଚଳରେ ଏକ ଦୁଇ ମହଲା କୋଠା, କଟକ ଓ ଭୁବନେଶ୍ୱରର ପ୍ରମୁଖ ସ୍ଥାନରେ ୪ଟି ମୂଲ୍ୟବାନ ପ୍ଲଟ୍ ଓ ଉମରକୋଟରେ ଗୋଟିଏ ବେନାମୀ ପ୍ଲଟ୍ ରହିଛି। ଦୁଇ ପିଲାଙ୍କ ପାଠପଢ଼ାରେ ପ୍ରଶାନ୍ତ ମୋଟ ୮୭ଲକ୍ଷ ଟଙ୍କା ଖର୍ଚ୍ଚ କରିଥିବାବେଳେ ତାଙ୍କର ୨ଟି ଚାରିଚକିଆ ଓ ଗୋଟିଏ ଦୁଇ ଚକିଆ ଗାଡ଼ି ରହିଛି। ଏହି ତିନିଟି ଗାଡ଼ିର ମୂଲ୍ୟ ହେଉଛି ୩୭ ଲକ୍ଷ ଟଙ୍କା। ତାଙ୍କ ଠାରୁ ୨୭.୨୭ଲକ୍ଷ ଟଙ୍କାର ସୁନା-ରୁପା ଅଳଙ୍କାର ଓ ଘରୋଇ ଉପକରଣ ଜବତ କରାଯାଇଛି।

ଭିଜିଲାନ୍ସ ସୂଚନା ଅନୁସାରେ ପ୍ରଶାନ୍ତ ୨୦୧୮ ମସିହାରେ ବିଶ୍ରା ବ୍ଲକ ବିଡିଓ ଥିବାବେଳେ ଏକ ଲକ୍ଷ ଟଙ୍କା ଲାଞ୍ଚ ନେବା ଅଭିଯୋଗରେ ଭିଜିଲାନ୍ସ ହାତରେ ଧରାପଡ଼ି ଗିରଫ ହୋଇଥିଲେ । ୨୦୧୮ ନଭେମ୍ବର ୬ରେ ପ୍ରଶାନ୍ତଙ୍କୁ ଚାକିରିରୁ ନିଲମ୍ବିତ ହେବାକୁ ପଡ଼ିଥିଲା। ତେବେ ୨୦୨୦ ଜାନୁୟାରୀ ୧୮ରେ ନିଲମ୍ବନ ହଟିଥିଲା ତଥା ସେ ନବରଙ୍ଗପୁର ଅତିରିକ୍ତ ଉପଜିଲ୍ଲାପାଳ ଭାବେ ପୁନଃ ଅବସ୍ଥାପିତ ହୋଇଥିଲେ ।

ଏହି ମାମଲାରେ ତାଙ୍କୁ ରାଉରକେଲା ଭିଜିଲାନ୍ସରେ ୧୫/୨୦୨୩ରେ ଏକ ମାମଲା ରୁଜୁ କରାଯାଇ ଗିରଫ କରାଯାଇଥିଲା। ସୁନ୍ଦରଗଡ ଭିଜିଲାନ୍ସ କୋର୍ଟରେ ରାଉଚଙ୍କୁ ରିମାଣ୍ଡ ଆବେଦନ କରିଥିଲା ତଦନ୍ତକାରୀ ସଂସ୍ଥା। କୋର୍ଟ ସଂସ୍ଥାକୁ ୫ ଦିନିଆ ରିମାଣ୍ଡ ପ୍ରଦାନ କରିଥିଲେ। ଆଜି ତାଙ୍କ ରିମାଣ୍ଡ ଅବଧି ଶେଷ ହୋଇଛି ଓ ତାଙ୍କୁ ନ୍ୟାୟିକ ହାଜତକୁ ପଠାଇ ଦେଇଛନ୍ତି କୋର୍ଟ। ସେ ଗିରଫ ହେବା ପରେ ତାଙ୍କୁ ଚାକିରିରୁ ବାଧ୍ୟତାମୂଳକ ଅବସର ଦେଇଛନ୍ତି ରାଜ୍ୟ ସରକାର।
କେନ୍ଦୁଝର: ନେଲୁଙ୍ଗ ହୁଡ଼ିରେ ଭାଲୁଙ୍କ ଗହଣରେ ବିତୁଛି ବାବୁ’ଙ୍କ ଜୀବନ

କେମିତି ଲାଗିବ ବନ୍ୟଜନ୍ତୁ, ହିଂସ୍ରଜନ୍ତୁଙ୍କ ସମ୍ପର୍କରେ ଆଲୋଚନା କଲେ । ମନରେ, ହୃଦୟରେ ସୃଷ୍ଟି ହେବ କମ୍ପନ । ଭୟର ବାତାବରଣ ସୃଷ୍ଟି ହେବ । ଲୋକେ ଭୟଭୀତ ହେବେ । କିନ୍ତୁ ବେଳେ ବେଳେ ଏମିତି ଚିତ୍ର ଆସେ ଯାହା ମଣିଷକୁ ଚିନ୍ତାରେ ପକାଏ । ମଣିଷ ଓ ହିଂସ୍ରଜନ୍ତୁଙ୍କ ମଧ୍ୟରେ ସମ୍ପର୍କର ଡୋରି ଯାହା ଆମର ମାନସିକତାରେ ପରିବର୍ତ୍ତନ ଆଣେ । କେଉଁଠି ହାତୀ-ମଣିଷର ସମ୍ପର୍କ ତ କେଉଁଠି ମଣିଷ-ବାଘର ସମ୍ପର୍କ ଦେଖିବାକୁ ମିଳେ । ମଣିଷ-ଭାଲୁ ସମ୍ପର୍କ ଆଉ ଟିକେ ମଜାଦାର ହୋଇଥାଏ । ପାହାଡ଼, ଜଙ୍ଗଲ ଭଳି ପରିବେଶକୁ ଭଲ ପାଇ, ପଶୁପକ୍ଷୀଙ୍କ ଗହଣରେ ଜୀବନ ବିତାଇବା ଟିକେ ନିଆରା । ଆଜି କେନ୍ଦୁଝର ଜିଲ୍ଲା ନେଲୁଙ୍ଗ ଗାଁ ନିକଟରେ ଥିବା ନେଲୁଙ୍ଗ ହୁଡ଼ି ପାହାଡ଼କୁ ଯିବା, ଆଉ ଦେଖିବା ଭିନ୍ନ ଏକ ମଣିଷର ଚିତ୍ର ।

ନେଲୁଙ୍ଗର ମୋଗଲି । ବାବୁ ଓରଫ ସାଗର । କେନ୍ଦୁଝର ଜିଲ୍ଲା ନେଲୁଙ୍ଗ ଗାଁର ବାବୁ ନାଏକ । ବାପାଙ୍କ ମୃତ୍ୟୁ ପରେ ଗାଁ ମୋହ ତୁଟାଇ ନିକଟସ୍ଥ ପାହାଡ଼ରେ କଟୁଛି ଜୀବନ । ବନ୍ୟଜନ୍ତୁଙ୍କ ଗହଣରେ ନେଲୁଙ୍ଗ ହୁଡ଼ିରେ ଦୁଇ ବର୍ଷରୁ ଅଧିକ ସମୟ ହେଲା ଜୀବନ ବିତାଉଛନ୍ତି ବାବୁ । ପାହାଡ଼ର ଏକ ଗୁମ୍ପା ମଧ୍ୟରେ ସେ ରୁହନ୍ତି ଯାହାର ଅତି ନିକଟରେ ରହିଛି ଭାଲୁଙ୍କ ଗୁମ୍ପା । ଭାଲୁଙ୍କ ଯାଆସ ଲାଗି ରହେ ହେଲେ ବାବୁଙ୍କୁ ଆକ୍ରମଣ କରନ୍ତି ନାହିଁ । ଗାଁ ଭିତରକୁ ଅନେକ ଥର ଭାଲୁ ପଲ ପଶିଛନ୍ତି । ଗାଁ ଲୋକେ ଗୋଡ଼ାଇବାରୁ ପୁଣି ନିଜ ଗୁମ୍ପାକୁ ଫେରି ଆସିଛନ୍ତି । ହେଲେ ପାହାଡ଼ିଆ ମଣିଷ ବାବୁକୁ କେବେ ବି ଆକ୍ରମଣ କରିନାହାଁନ୍ତି ।

ହିଂସ୍ର ଜନ୍ତୁଙ୍କ ଭୟରେ ଲୋକେ ନେଲୁଙ୍ଗ ହୁଡ଼ିକୁ ଯାଆନ୍ତି ନାହଁ । ଭାଲୁଙ୍କ ଚଳପ୍ରଚଳ ଅଧିକ ଥିଲେ ହେଁ ସେଠାରେ ଜୀବନ ବିତାଇ ଚାଲିଛନ୍ତି ବାବୁ । ୩ ବର୍ଷ ପୂର୍ବେ ବାପାଙ୍କ ମୃତ୍ୟୁ ପରେ ତାଙ୍କୁ ସାଂସାରିକ ଜୀବନ ଭଲ ଲାଗିନଥିଲା । ସେ ଲୋଭ, ମୋହ, ମାୟା ଠାରୁ ଦୂରେଇ ଯାଇ ପାହାଡ଼ରେ ରହୁଛନ୍ତି । ପଶୁପକ୍ଷୀଙ୍କୁ ଭଲ ପାଇ ନେଲୁଙ୍ଗର ମୋଗଲି ଭାବେ ପରିଚୟ ପାଇଛନ୍ତି । ପ୍ରତି ଦୁଇ ଦିନରେ ମା’ଖାଇବାକୁ ନେଇ ଦେଇଥାନ୍ତି । ସେତିକି ହିଁ ମା’-ପୁଅର ସମ୍ପର୍କ ।

ନେଲୁଙ୍ଗ ହୁଡ଼ିରେ ଭାଲୁ ଅଧିକ ଥିବାବେଳେ ଜୀବନ ପ୍ରତି ବିପଦ ରହିଛି । ଖରାଦିନେ ନିଆଁ ଲାଗିବାର ଆଶଙ୍କା ବି ରହୁଛି । ଏଭଳି ଥରେ ନିଆଁ ଲାଗିଥିବା ବେଳେ ବନ ଟିମ୍ ପହଞ୍ଚିଥିଲା । ବାବୁଙ୍କୁ ଗାଁକୁ ଫେରିବାକୁ ଅନୁରୋଧ କରାଯାଇଥିଲେ ସୁଦ୍ଧା ସେ ଫେରିବାକୁ ନାରାଜ ବୋଲି କହିଛନ୍ତି ଫରେଷ୍ଟଗାର୍ଡ ।
ରାଇରଙ୍ଗପୁର: ଯଶୀପୁରରେ ହାତୀ ଦାନ୍ତ ବିକ୍ରି ବେଳେ ମାଡ଼ିବସିଲା ବନ ବିଭାଗ

ମଣିଷ ଓ ହାତୀ ଲଢ଼େଇରେ କେତେବେଳେ କାହାର ଜୀବନ ଯାଉଛି । ହାତୀ ଆକ୍ରମଣରେ ମଣିଷର ମୃତ୍ୟୁ ହେଉଥିବା ବେଳେ କେତେବେଳେ ନିଜ ସ୍ୱାର୍ଥ ପୂରଣ ପାଇଁ ହାତୀ ଶିକାର କରୁଛି ମଣିଷ । ହାତୀ,ମଣିଷ ଲଢ଼େଇ ପ୍ରାୟତଃ ଦୈନନ୍ଦିନ ଘଟଣା ପାଲଟିଲାଣି । ଏବେ ଯଶୀପୁରରୁ ୪ଟି ହାତୀ ଦାନ୍ତ ଜବତ ପରେ ବନ ବିଭାଗ ଘଟଣାକୁ ନେଇ ଖୋଳତାଡ଼ ଜାରି ରଖିଛି ।

ଶିମିଳିପାଳ ଅଭୟାରଣ୍ୟରେ ବନ୍ୟଜନ୍ତୁ ଶିକାର ବଢ଼ିବାରେ ଲାଗିଛି । ଶିକାରୀ, ମାଫିଆ, ଦଲାଲମାନେ ବନ୍ୟଜନ୍ତୁ ଶିକାର କରି ନିଜର ସ୍ୱାର୍ଥ ପୂରଣ କରୁଛନ୍ତି । ଶିମିଳିପାଳ ଅଭୟାରଣ୍ୟରେ ଅବାଧରେ ପଶୁ ଶିକାର ହେଉଥିବା ବେଳେ ଏମିତି ଏକ ଘଟଣା ଏବେ ସାମ୍ନାକୁ ଆସିଛି । ୪ଟି ହାତୀ ଦାନ୍ତ ଜବତ କରିଛି ବନ ବିଭାଗ । ଏଭଳି ମୂଲ୍ୟବାନ ଜିନିଷର ବିକ୍ରି ପାଇଁ ଡିଲ୍ ହେଉଥିବା ବେଳେ ଅଭିଯୁକ୍ତମାନଙ୍କୁ ଧରିଛି ବନ ବିଭାଗ ।

ହାତୀ ଦାନ୍ତ ବିକ୍ରି ପାଇଁ ଯୋଜନା ଚାଲିଥିବା ଖବର ପାଇଥିଲା ବନ ବିଭାଗ । ତେଣୁ ବିଳମ୍ବ ନକରି ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ କ୍ଷେତ୍ର ଉପନିର୍ଦେଶକ ସମ୍ରାଟ ଗଉଡ଼ାଙ୍କ ନେତୃତ୍ୱରେ ଏକ ଟିମ୍ ରେଡ୍ କରିଥିଲା । ଉତ୍ତର ଶିମିଳିପାଳର ଉପନିର୍ଦେଶକ ସାଇ କିରଣ, ରାଇରଙ୍ଗପୁର ବନଖଣ୍ଡର କିଛି ଅଧିକାରୀ ଯଶୀପୁର ଅଞ୍ଚଳରେ ଅତର୍କିତ ଚଢ଼ାଉ କରିଥିଲେ । ଘଟଣାସ୍ଥଳରୁ ୪ଟି ହାତୀ ଦାନ୍ତ ଜବତ କରାଯାଇଥିଲା । ସେଠାରୁ ୫ ଜଣଙ୍କୁ ଗିରଫ କରିଥିଲା ଟିମ୍ । ଗିରଫ ଅଭିଯୁକ୍ତମାନେ ଦାଶାଇ ସିଂ, ମଣ୍ଡା ସିଂ, ମନମୋହନ ହେମ୍ବ୍ରମ, ମନ୍ତ୍ରୀ ସିଂ ଓ ନର୍ସିଂ ସିଂ । ସେମାନେ ସମସ୍ତେ ଯଶୀପୁର ଥାନା ଶିମିଳିପାଳ ବଫର ଅଞ୍ଚଳ ଚାକିଡ଼ି ଗାଁର ବାସିନ୍ଦା । ସେମାନଙ୍କ ଠାରୁ ୫ଟି ମୋବାଇଲ, ଦୁଇଟି ବାଇକ୍ ମଧ୍ୟ ମିଳିଥିଲା ।

ଜବତ ହାତୀଦାନ୍ତ ଗୁଡ଼ିକର ଓଜନ ୬ କେଜିରୁ ଅଧିକ ହେବ । ହାତୀଗୁଡ଼ିକ ମଧ୍ୟମ ବୟସ୍କର ହୋଇଥିବା ଅନୁମାନ କରାଯାଉଛି । ଦୁଇଟି ହାତୀକୁ ଶିମିଳିପାଳ କୋର ଏରିଆରେ ଶିକାର କରାଯାଇଛି । ତେବେ ଏମାନଙ୍କ ସଂପୃକ୍ତି ଅଛି ନା ନାହିଁ ସେ ନେଇ ତଦନ୍ତ ଜାରି ରହିଛି ।
ଝାରପଡ଼ା: ଗୁଳିମାଡ଼ ଘଟଣାର ମୁଖ୍ୟ ଅଭିଯୁକ୍ତକୁ ଧରିଲା ପୋଲିସ

ଭୁବନେଶ୍ୱର ଝାରପଡ଼ା ଗୁଳିମାଡ଼ ଘଟଣାରେ ପୋଲିସକୁ ସଫଳତା ମିଳିଛି । ଗୁଳିକାଣ୍ଡର ମୁଖ୍ୟ ଅଭିଯୁକ୍ତ ପ୍ରଭାତ ମାର୍ଥାକୁ ଗିରଫ କରିଛି ପୋଲିସ । ଗତ ବୁଧବାର ଗାଡ଼ି ସାଇଡ୍ କରିବାକୁ ନେଇ ବଚସା ପରେ ଗୁଳିକାଣ୍ଡ ଘଟିଥିଲା । ସେହିଦିନ ଠାରୁ ଫେରାର୍ ଥିଲା ମୁଖ୍ୟ ଅଭିଯୁକ୍ତ ।

ବୁଧବାର ରାତିରେ ଝାରପଡ଼ା ଜଗନ୍ନାଥନଗର ଲେନ୍ ୱାନ୍ ପ୍ରଜାପତି ମଣ୍ଡପରେ ବିବାହ ଭୋଜିର ଆୟୋଜନ ହୋଇଥିଲା । ସେଠାରେ ଭୋଜି ଖାଇ ରିଙ୍କୁ ଜେନା ଏକ କାରରେ ଫେରୁଥିବା ବେଳେ ଅନ୍ୟ ଏକ କାରରେ ଥିବା ପ୍ରଭାତ ମାର୍ଥାଙ୍କ ସହ ଯୁକ୍ତିତର୍କ ହୋଇଥିଲା । ଗାଡ଼ି ସାଇଡ୍ କରିବାକୁ ନେଇ ବଚସା ପରେ ଗୁଳିମାଡ଼ କରିଥିଲା ପ୍ରଭାତ ଏବଂ ତାଙ୍କ ସହଯୋଗୀ । ଘଟଣାରେ ରିଙ୍କୁ ଏବଂ ତାଙ୍କ ବାପା ଶିଖର ଆହତ ହୋଇ ମେଡିକାଲରେ ଭର୍ତ୍ତି ହୋଇଥିଲେ ।

ପୋଲିସ ରାଜା ସାହୁ ଓ ଦିବାକର କଳସ ଦୁଇ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ମୁଖ୍ୟ ଅଭିଯୁକ୍ତ ପ୍ରଭାତ ଓ ଅନ୍ୟ ଜଣେ ସହଯୋଗୀ ଚମ୍ପଟ ମାରିଥିଲା । ଘଟଣାସ୍ଥଳରୁ ୨ଟି ବନ୍ଧୁକ ଓ ୯ଟି ଖୋକା ଜବତ କରାଯାଇଥିଲା । ଉଭୟ ପକ୍ଷରୁ ଥାନାରେ ଏତଲା ଦିଆଯାଇଥିବା ବେଳେ ଘଟଣାର ତଦନ୍ତ ଜାରି ରଖିଥିଲା ପୋଲିସ । ପୋଲିସ ଏବେ ମୁଖ୍ୟ ଅଭିଯୁକ୍ତ ପ୍ରଭାତ ମାର୍ଥା ଏବଂ ତାର ଅନ୍ୟ ଜଣେ ସହଯୋଗୀଙ୍କୁ ଗିରଫ କରିଛି । ଏହି ମାମଲାରେ ଗିରଫ ସଂଖ୍ୟା ଏବେ ୪ରେ ପହଞ୍ଚିଛି । କର୍ପୋରେଟର ଶ୍ରୀଧର ଜେନାଙ୍କ ଭାଇ ଶିଖର ଓ ପୁତୁରା ରିଙ୍କୁ । ଗିରଫ ପ୍ରଭାତ ଗତ ପୌର ନିର୍ବାଚନରେ ବିଜେପିର କର୍ପୋରେଟର ପ୍ରାର୍ଥୀ ଥିଲେ ।
ନାଇରୋବି: ଭାରସାମ୍ୟ ହରାଇ ମାଡ଼ିଗଲା ଟ୍ରକ୍, ୪୮ ମୃତ

ପଶ୍ଚିମ କେନିଆ ଲୋଣ୍ଡିଆନିରେ ବଡ଼ ଧରଣର ଟ୍ରକ୍ ଦୁର୍ଘଟଣା ଘଟିଛି । ଗୋଟାଏ ଟ୍ରକ୍‌ ହଠାତ୍‌ ଡ୍ରାଇଭରଙ୍କ ନିୟନ୍ତ୍ରଣରୁ ବାହାରିଯାଇ ଯାନବାହନ ଓ ପଥଚାରୀଙ୍କ ଉପରେ ମାଡ଼ିଯିବାରୁ ୪୮ ଜଣଙ୍କ ମୃତ୍ୟୁ ଘଟିଛି । ସ୍ଥାନୀୟ ପୋଲିସ କମାଣ୍ଡର ଜେଫରୀ ମୟେକଙ୍କ ସୂଚନା ଅନୁସାରେ ୪୮ ଜଣଙ୍କ ମୃତ୍ୟୁ ଘଟିଛି । ଆଉ କିଛି ଲୋକଙ୍କ ମୃତ୍ୟୁ ହେବା ଆଶଙ୍କା ରହିଛି । କେରିକୋ ଏବଂ ନାକୁରୁ ନଗରୀକୁ ସଂଯୋଗ କରୁଥିବା ରାଜପଥରେ ସିପିଙ୍ଗ୍‌ କଣ୍ଟେନର୍‌ ନେଇ ଯାଉଥିବା ଟ୍ରକ୍‌, ଏକ ଜଙ୍କ୍‌ସନ୍‌ରେ ଦୁର୍ଘଟଣାଗ୍ରସ୍ତ ହୋଇଥିଲା ।

ଦୁର୍ଘଟଣାସ୍ଥଳ ଅଞ୍ଚଳରେ ପ୍ରବଳ ବର୍ଷା ହେଉଥିବାରୁ ଉଦ୍ଧାର ଅଭିଯାନରେ ବିଳମ୍ବ ହୋଇଥିଲା । ସେପଟେ ଟମ୍‌ ଓଡେରା ନାମରେ ଆଉ ଜଣେ ପୋଲିସ କମାଣ୍ଡର୍‌ କହିଛନ୍ତି ଯେ, କେରିକୋ ଆଡ଼କୁ ଚଳାଇ ନିଆଯାଉଥିବା ଟ୍ରକ୍‌ ନିୟନ୍ତ୍ରଣ ହରାଇବା ପରେ ବସ୍‌ଷ୍ଟପ୍‌ରେ କେତେଗୁଡ଼ିଏ ମିନି ବସ୍ ଉପରେ ଚଢ଼ିଯାଇଥିଲା । ଫଳରେ ବସ୍ ଯାତ୍ରୀ ଏବଂ ଛିଡ଼ା ହୋଇଥିବା ପଥଚାରୀମାନେ ମୃତାହତ ହୋଇଥିଲେ ।

ଭାରସାମ୍ୟ ହରାଇ ଟ୍ରକଟି ବଜାରରେ ମାଡ଼ିଯିବାରୁ ପ୍ରାୟ ୪୮ ଜଣଙ୍କ ମୃତ୍ୟୁ ଘଟିଛି । ଏକାଧିକ ଲୋକ ଆହତ ହୋଇଥିବା ବେଳେ ସେମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ଏହି ଦୁର୍ଘଟଣାରେ ବହୁ କାର୍ ଓ ବାଇକ୍ ଭାଙ୍ଗିଯାଇଛି ।
ରସଗୋଲା ଖୁଆଇ ମା ଲକ୍ଷ୍ମୀଙ୍କ ମାନ ଭଞ୍ଜନ କରିବେ ଶ୍ରୀହରି

ଆଜି ରସଗୋଲା ଦିବସ । ମିଠା ଭିତରେ ରସଗୁଲା କଥା ଭିନ୍ନ। ଏହି ମିଠା ସମସ୍ତ ଓଡିଆଙ୍କର ଅତି ପ୍ରିୟ । ଖାଲି ଓଡିଆଙ୍କ ପ୍ରିୟ ନୁହେଁ, ସେମାନଙ୍କ ପ୍ରାଣର ଦେବତାଙ୍କୁ ପ୍ରିୟ ବୋଲି। ଶ୍ରୀଜଗନ୍ନାଥ ସଂସ୍କୃତିରେ ରସଗୋଲାର ବେଶ୍ ଗୁରୁତ୍ୱ ରହିଛି । ଏହି ମିଠା ମା ଲକ୍ଷ୍ମ ଓ ମହାପ୍ରଭୁଙ୍କ ଭିତରେ ସୃଷ୍ଟି ହୋଇଥିବା ମତାନ୍ତର ଦୂର କରିବାର ମାଧ୍ୟମ ହୋଇଥାଏ। ୯ ଦିନାତ୍ମକ ଗୁଣ୍ଡିଚା ଯାତ୍ରାରେ ପ୍ରଭୁ ମା ଲକ୍ଷ୍ମୀଙ୍କୁ ଶ୍ରୀମନ୍ଦିରରେ ଏକାକୀ ଛାଡି ମାଉସୀ ମା’ଙ୍କ ମନ୍ଦିରକୁ ଭାଇ ବଳଭଦ୍ର ଓ ଭଉଣୀ ସୁଭଦ୍ରାଙ୍କୁ ନେଇ ଚାଲିଯାଇଥାନ୍ତି। ସ୍ବାମୀଙ୍କ ଏତାଦୃଶ କାର୍ଯ୍ୟରେ କ୍ରୋଧିତ ହୋଇଥାନ୍ତି ମା। ତେଣୁ ଯେଉଁଦିନ ଭାଇ ଭଉଣୀଙ୍କୁ ନେଇ ମହାପ୍ରଭୁ ଶ୍ରୀମନ୍ଦିରକୁ ଫେରି ଆସନ୍ତି। ଦେଢଶୂର ଓ ନଣନ୍ଦଙ୍କ ମନ୍ଦିର ପ୍ରବେଶ ପରେ ଅଭିମାନ ଓ ରାଗ ଜର୍ଜରିତା ମା ଲକ୍ଷ୍ନୀ ପ୍ରଭୁଙ୍କ ମନ୍ଦିର ପ୍ରବେଶ ପୂର୍ବରୁ ବନ୍ଦ କରିଦିଅନ୍ତି ମନ୍ଦିର ଦ୍ୱାର। ଶେଷରେ ମହାପ୍ରଭୁ ରସଗୋଲା ଦେଇ ମା’ଙ୍କ ମାନ ଭଞ୍ଜନ କରନ୍ତି ଓ ମନ୍ଦିରକୁ ପ୍ରବେଶ କରିଥାନ୍ତି। ତେଣୁ ନୀଳାଦ୍ରିବିଜେ ଦିନ ଓଡିଶା ବାସୀ ପାଳନ କରିଥାନ୍ତି ରସଗୋଲା ଦିବସ।

ରସଗୋଲାକୁ ବିଶ୍ୱବ୍ୟାପୀ ଆଦୃତ କରିବା ଲକ୍ଷ୍ୟ ନେଇ ଏହି ଦିବସକୁ ଏକ ସାମାଜିକ କ୍ରାନ୍ତିରେ ପରିଣତ କରାଯାଇଛି। ୨୦୧୫ ଜୁଲାଇ ୪ ତାରିଖରେ ଏହା ପ୍ରଥମେ ଆରମ୍ଭ ହୋଇଥିଲା । ପରେ ସୋସିଆଲ ମିଡିଆରେ ଏହାର ପ୍ରଚାର ଓ ପ୍ରସାର ଆରମ୍ଭ ହୋଇଥିଲା । ଏହାପରେ ୨୦୧୬ ଜୁଲାଇ ୧୭ ଠାରୁ ଏହି ଦିବସ ପାଳନ ହେଉଛି । ତେବେ କାହିଁ କେଉଁ କାଳରୁ ରସଗୋଲା ଓ ଶ୍ରୀଜଗନ୍ନାଥ ସଂସ୍କୃତିର ନିବିଡ ସମ୍ପର୍କ ରହିଥିବା ବେଳେ କିନ୍ତୁ ପଶ୍ଚିମବଙ୍ଗ ଓ ଓଡିଶା ମଧ୍ୟରେ ଆରମ୍ଭ ହୋଇଥିଲା‘ମିଠାଯୁଦ୍ଧ’ । ପଶ୍ଚିମବଙ୍ଗ ‘ରସଗୁଲ୍ଲା’ ତାଙ୍କର ବୋଲି ଦାବି କରିଥିଲା । ୧୮୬୮ ମସହାରେ କଲିକତାରେ ନବୀନ ଚନ୍ଦ୍ର ଦାସ ପ୍ରଥମେ ‘ରସଗୁଲ୍ଲା’ ତିଆରି କରିଥିଲେ ବେଲି ଯୁକ୍ତି କରିଥିଲା ପଶ୍ଚିମବଙ୍ଗ । ତେବେ ୨୦୦୯ ମସିହା ଜୁଲାଇ ୨୯ ତାରିଖରେ ଓଡିଶାର ରସଗୋଲାକୁ ମିଳିଥିଲା ଜିଆଇ ଟ୍ୟାଗ୍ ।
ସରିଲା ବିଶ୍ୱପ୍ରସିଦ୍ଧ ଘୋଷଯାତ୍ରା, ଆଜି ମହାବାହୁଙ୍କ ନୀଳାଦ୍ରି ବିଜେ

ଶେଷ ହୋଇଛି ବିଶ୍ୱପ୍ରସିଦ୍ଧ ଘୋଷଯାତ୍ରା । ୧୨ ଦିନର ମାନବୀୟ ଲୀଳାଖେଳା ଶେଷ କରିଛନ୍ତି ମହାବାହୁ । ଆଜି ସିଂହଦ୍ୱାରରେ ଚତୁର୍ଦ୍ଧା ମୂର୍ତ୍ତି ଶ୍ରୀମନ୍ଦିରକୁ ବିଜେ କରିବେ । ରଥାରୂଢ଼ ଠାକୁର ଗୋଟି ପହଣ୍ଡିରେ ରତ୍ନସିଂହାସନକୁ ଫେରିବେ । ଏତେ ଦିନ ଧରି ଅଭିମାନ କରି ରହିଥିବା ମା’ଲକ୍ଷ୍ମୀ ସାଆନ୍ତାଣୀଙ୍କୁ ରସଗୋଲା ଦେଇ ମାନଭଞ୍ଜନ କରିବେ ମହାପ୍ରଭୁ । ଏଥିପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି କରାଯାଇଛି ।

ଗତକାଲି ବିଳମ୍ୱିତ ରାତିରେ ଅଧର ନୀତି ଶେଷ ହୋଇଥିଲା । ଆଜି ସକାଳୁ ସକାଳୁ ନୀତିକାନ୍ତି ଆରମ୍ଭ ହୋଇଛି । ଆଜି ଭୋର ୪ଟାରେ ତିନି ରଥରେ ମଙ୍ଗଳ ଆଳତି ପରେ ସାଢ଼େ ୪ଟାରେ ମଇଲମ ଓ ତଡ଼ପଲାଗି, ସକାଳ ୫ଟାରେ ଅବକାଶ ନୀତି ପରେ ସକାଳ ସାଢ଼େ ୫ଟାରେ ବେଶ ଶେଷ ହୋଇଛି । ସେହିପରି ସାଢ଼େ ୬ଟାରେ ଗୋପାଳବଲ୍ଲଭ, ୭ଟାରୁ ୮ଟା ସକାଳଧୂପ ମଧ୍ୟ ଦିଆଯାଇଛି ।

ଦିନ ୧୧ଟା ୪୫ରୁ ୧୨ଟା ଭିତରେ ମଇଲମ ଓ ବେଶ ଏବଂ ୧୨ଟା ୧୫ରେ ସଂଧ୍ୟା ଆଳତି ହେବ । ସେହିପରି ସାଢ଼େ ୧୨ଟାରୁ ସାଢ଼େ ଗୋଟାଏ ସଂଧ୍ୟାଧୂପ ନୀତି ଅନୁଷ୍ଠିତ ହେବ । ଅପରାହ୍ଣ ସାଢ଼େ ଗୋଟାଏରୁ ସାଢ଼େ ୩ଟା ଭିତରେ ତିନି ରଥରେ ଚାରବନ୍ଧା ସରିବା ପରେ ସାଢ଼େ ୩ଟାରେ ସିଂହାସନ ମାଜଣା କରାଯିବ ।

ଅପରାହ୍ଣ ୩ଟା ୫୦ରେ ପୁଷ୍ପାଞ୍ଜଳି ପରେ ଅପରାହ୍ଣ ୪ଟାରେ ପହଣ୍ଡି ଆରମ୍ଭ ହେବ । ରାତି ୧୦ଟା ସୁଦ୍ଧା ପହଣ୍ଡି ଶେଷ ପରେ ରୁନ୍ଧା କାର୍ଯ୍ୟ ସମାପନ ହେବ ବୋଲି ମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ ହୋଇଛି । ରାତି ସାଢ଼େ ୧୨ଟା ସୁଦ୍ଧା ରୁନ୍ଧା ସରିବା ପରେ ଗୋଟାଏରୁ ଦଇତାପତି ସର୍ବାଙ୍ଗ, ଶ୍ରୀମୁଖ ଖଣ୍ଡୁଆ, ଚାରମାଳ ଫିଟା ନୀତି ଅନୁଷ୍ଠିତ ହେବ । ରାତି ସାଢ଼େ ୨ଟାରେ ସୁଦର୍ଶନ ସିଂହାସନକୁ ବିଜେ କରିବେ ମହାବାହୁ । ୪ଟା ୪୫ରେ ବଡ଼ସିଂହାର ଭୋଗ ହୋଇ ସକାଳ ୫ଟାରେ ରାତ୍ର ପହୁଡ଼ ହେବ ।
ମହାରାଷ୍ଟ୍ର: ଚକା ଫାଟି ଓଲଟିଲା ବସ୍, ଜଳିଗଲେ ୨୬ ଯାତ୍ରୀ

ମୁମ୍ବାଇର ମହାରାଷ୍ଟ୍ର ସମୃଦ୍ଧି ମହାମାର୍ଗ ଏକ୍ସପ୍ରେସ୍‌ୱେ’ରେ ମର୍ମନ୍ତୁଦ ସଡ଼କ ଦୁର୍ଘଟଣା । ରାସ୍ତାରେ ଯାଉଥିବା ବସ୍‌ରେ ନିଆଁ ଲାଗିଯିବାରୁ ଅନେକ ଯାତ୍ରୀ ବସ୍ ଭିତରେ ହିଁ ଜଳିଯାଇଛନ୍ତି । ଅନେକ ଗୁରୁତର ହୋଇ ମେଡିକାଲରେ ଭର୍ତ୍ତି ହୋଇଛନ୍ତି ।

ସୂଚନା ଅନୁସାରେ ଗତକାଲି ଏକ ବସ୍ ଯବତମାଲ୍‌ରୁ ପୁନେ ଯାଉଥିବା ବେଳେ ରାତି ପ୍ରାୟ ୨ଟା ବେଳେ ବୁଲଢାଣା ଜିଲ୍ଲାରେ ଦୁର୍ଘଟଣାଗ୍ରସ୍ତ ହୋଇଥିଲା । ବସ୍‌ରୁ ୨୫ଟି ଶବ ବାହାର କରାଯାଇଥିବା ବୁଲଢାଣା ଡେପୁଟି ପୋଲିସ କମିଶନର ବାବୁରାଓ ମହାମୁନି କହିଛନ୍ତି । ବସ୍‌ରେ ସମୁଦାୟ ୩୩ ଜଣ ଲୋକ ଥିବାବେଳେ ୮ ଜଣ ଗୁରୁତର ହୋଇ ବୁଲଢାଣା ସିଭିଲ୍‌ ହସ୍ପିଟାଲରେ ଭର୍ତ୍ତି ହୋଇଥିଲେ । ହେଲେ ସେଠାରେ ଆଉ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଏବେ ଦୁର୍ଘଟଣାରେ ମୃତ୍ୟୁ ସଂଖ୍ୟା ୨୬କୁ ବୃଦ୍ଧି ପାଇଛି ।

ଦୁର୍ଘଟଣାରୁ ବଞ୍ଚିଯାଇଥିବା ବସ୍ ଡ୍ରାଇଭରଙ୍କ କହିବାନୁସାରେ ବସର ଗୋଟାଏ ଟାୟାର୍‌ ଫାଟି ଓଲଟି ପଡ଼ିବାରୁ ସେଥିରେ ନିଆଁ ଲାଗିଯାଇଥିଲା । ଯାତ୍ରୀମାନେ ବସ୍ ଭିତରେ ହିଁ ଜଳିଗଲେ । ସେପଟେ ଟାୟାର୍‌ ଫାଟିଯିବାରୁ ଘରୋଇ ବସ୍‌ଟି ସିନ୍ଦଖେଡ଼ରାଜା ନିକଟରେ ରାସ୍ତା ଡିଭାଇଡର୍‌ ଆଡ଼କୁ ମାଡ଼ିଯାଇ ଓଲଟି ପଡ଼ିଥିଲା ବୋଲି ସ୍ଥାନୀୟ ପୋଲିସ ମଧ୍ୟ କହିଛି ।

ଦୁର୍ଘଟଣାରେ ଅଧିକ ଲୋକଙ୍କ ମୃତ୍ୟୁ ହୋଇଛି । ଏଭଳି ଘଟଣାକୁ ନେଇ ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ଏକନାଥ ସିନ୍ଦେ । ମୃତ ବ୍ୟକ୍ତିମାନଙ୍କ ପରିବାର ପାଇଁ ୫ ଲକ୍ଷ ଟଙ୍କା ଲେଖାଁଏ ଅନୁକମ୍ପାମୂଳକ ସହାୟତା ଘୋ‌ଷଣା କରିଛନ୍ତି ମୁଖ୍ୟମନ୍ତ୍ରୀ ।

ଏଥିସହ ଘଟଣାର ତଦନ୍ତ ପାଇଁ ସେ ନିର୍ଦ୍ଦେଶ ଦେଇଛନ୍ତି । ଆଜି ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାବିସ ଘଟଣାସ୍ଥଳକୁ ଯିବେ ବୋଲି ସୂଚନା ମିଳିଛି । ସେପଟେ, ଏଭଳି ଘଟଣାକୁ ନେଇ ଶୋକ ବ୍ୟକ୍ତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ୟୁପି: ମାଫିଆଙ୍କ ଜବତ ସମ୍ପତ୍ତିରେ ଗରିବଙ୍କ ପାଇଁ ଫ୍ଲାଟ୍ ନିର୍ମାଣ କଲେ ଯୋଗୀ

ଗ୍ୟାଙ୍ଗଷ୍ଟରରୁ ରାଜନେତା ପାଲଟିଥିବା ଅତିକ ଅହମ୍ମଦର ହତ୍ୟା ପରେ ଏବେ ତାର ସମ୍ପତ୍ତି ଜବତ ହୋଇଛି । ତା ନାଁରେ ଥିବା ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତି ଜବତ କରିଛନ୍ତି ରାଜ୍ୟ ସରକାର । ଜବରଦଖଲ ଜାଗାରେ କୋଠା ନିର୍ମାଣ କରି ଗରିବଙ୍କ ମଧ୍ୟରେ ବାଣ୍ଟିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।

ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଆଉ ଏକ ମହାନତା । ଗରିବଙ୍କୁ ଫ୍ଲାଟ ଯୋଗାଇ ବେଶ୍ ପ୍ରଶଂସିତ ହୋଇଛନ୍ତି ୟୁପି ସିଏମ୍ । ଏକ କାର୍ଯ୍ୟକ୍ରମରେ ହିତାଧିକାରୀଙ୍କ ପାଇଁ ନିର୍ମିତ କୋଠା ଚାବି ପ୍ରଦାନ କରି ପ୍ରଶଂସା ସାଉଁଟିଛନ୍ତି ଯୋଗୀ । ହେଲେ ଆପଣ ଜାଣିଛନ୍ତି ଜମି କାହାର, ଆଉ ଘର ନିର୍ମାଣ କଲା କିଏ ।

ଗରିବଙ୍କ ପାଇଁ ସାହାରା ବନିଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ । ପ୍ରଧାନମନ୍ତ୍ରୀ ଆବାସ ଯୋଜନା ଅଧିନରେ ନିର୍ମିତ ହୋଇଛି ଆପାର୍ଟମେଣ୍ଟ । ୪୧ ସ୍କ୍ୱାର ମିଟର ବିଶିଷ୍ଟ ପ୍ରତି ଫ୍ଲାଟରେ ରହିଛି ୨ଟି ରୁମ୍, ଗୋଟିଏ ରୋଷେଇ ଗୃହ ସମେତ ଟଏଲଟ୍ ବ୍ୟବସ୍ଥା । ପ୍ରୟାଗରାଜ ଉନ୍ନୟନ କର୍ତ୍ତୃପକ୍ଷଙ୍କ ନିକଟରେ ୬୦୦୦ ହିତାଧିକାରୀ ଆବେଦନ କରିଥିବା ବେଳେ ୧୫୯୦ ଜଣ ଯୋଗ୍ୟ ବିବେଚିତ ହୋଇଛନ୍ତି ।

ଲଟେରୀ ପ୍ରୋସେସରେ ଯୋଗ୍ୟ ଘୋଷଣା କରାଯାଇଥିବା ବେଳେ ପ୍ରଥମ ପର୍ଯ୍ୟାୟରେ ୭୬ଟି ଫ୍ଲାଟ୍ ଚାବି ପ୍ରଦାନ କରିଛନ୍ତି ଯୋଗୀ ଆଦିତ୍ୟନାଥ । ଗତ ଏପ୍ରିଲରେ ୟୁପି ଡନ୍ ଅତିକ ଅହମ୍ମଦର ହତ୍ୟା ହୋଇଥିଲା । ତା ନାଁରେ ଥିଲା ଅପର୍ଯ୍ୟାପ୍ତ ସମ୍ପତ୍ତି, ଅନେକ ଜବରଦଖଲ ଜମି ଆଉ କୋଠା । ଅତିକ’ର କୋଠା ଭାଙ୍ଗି ରାଜ୍ୟ ସରକାର ନିର୍ମାଣ କରିଛନ୍ତି ନୂଆ ଫ୍ଲାଟ୍ ଯାହା ଗରିବଙ୍କ ମଧ୍ୟରେ ବଣ୍ଟାଯାଇଛି ।

ଉତ୍ତରପ୍ରଦେଶରେ ହିଂସାରେ ଲାଗିଛି ବ୍ରେକ୍, ରାଜ୍ୟକୁ ଫେରିଛି ଶାନ୍ତି । ସବୁଠି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଜୟଗାନ । ଧୀରେ ଧୀରେ ମାଫିଆଙ୍କ ମୂଳପୋଛ ହେଉଛି । ସରକାରଙ୍କ ଚାପ, ପୋଲିସର କାର୍ଯ୍ୟାନୁଷ୍ଠାନ ଆଗରେ ହାର୍ ମାନୁଛନ୍ତି ମାଫିଆ । ଉତ୍ତରପ୍ରଦେଶ ସେହି ରାଜ୍ୟ ଯେଉଁଠି ଚାଲିଥିଲା ଗୁଣ୍ଡାରାଜ । ୨୦୧୭ ପୂର୍ବରୁ ଚାଲିଥିଲା ମାଫିଆଙ୍କ ଦାଦାଗିରି । ଗ୍ୟାଙ୍ଗଷ୍ଟରରୁ ରାଜନେତା ପାଲଟିଥିବା ଅତିକ ଅହମ୍ମଦର ରାଜ୍ ଚାଲିଥିଲା । କେଉଁଠି ଆକ୍ରମଣ ତ ଆଉ କେଉଁଠି ହତ୍ୟା । ଗରିବ, ଶିଳ୍ପପତି, ପୁଞ୍ଜିପତି ଏବଂ ସରକାରୀ ଜମି ଜବରଦଖଲ କରିଥିଲା ଅତିକ ।

ଧମକ ଦେଇ ଅବା ହତ୍ୟା କରି ବେଆଇନ୍ ଭାବେ ସମସ୍ତଙ୍କ ଜମି ନିଜ ନାଁରେ କରିଥିଲା ଗ୍ୟାଙ୍ଗଷ୍ଟର ଅତିକ । ଅତିକ, ତାର ଭାଇ ଓ ପୁଅର ଜୀବନ ଗଲା, ଏବେ ସମ୍ପତ୍ତି ବି ରହିଲାନି । ଆଜି ଉତ୍ତରପ୍ରଦେଶ ସ୍ଥିତି ବଦଳିଛି । ମାଫିଆଙ୍କ ଜବରଦଖଲ ଜମି, ସମ୍ପତ୍ତି ଏବେ ସରକାରଙ୍କ କବଜାରେ । ଲୋକଙ୍କ ମନରୁ ଦୂର ହୋଇଛି କୋକୁଆ ଭୟ, କାହିଁକିନା ୟୁପିରେ ଚାଲିଛି ଯୋଗୀ ରାଜ୍ । ଏକ କାର୍ଯ୍ୟକ୍ରମରେ ଯୋଗଦେଇ ଫ୍ଲାଟ୍ ଚାବି ପ୍ରଦାନ କରିବା ସହ ଉତ୍ତରପ୍ରଦେଶକୁ ମାଫିଆ ମୁକ୍ତ ରାଜ୍ୟ କରିବାକୁ ସଂକଳ୍ପ ନେଇଥିବା କହିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।
କଲମା ବ୍ୟାରେଜରୁ ମହାନଦୀକୁ ଆସୁଛି ୧ ଲକ୍ଷ ୧୮ ହଜାର କ୍ୟୁସେକ ଜଳ

ଛତିଗଡର ମନମୁଖି କାର୍ଯ୍ୟ। ବର୍ଷା ଆରମ୍ଭରୁ କଲମା ବ୍ୟାରେଜର ୬୪ଟି ଗେଟ୍ ଖୋଲି ଦେଇଛି ଛତିଶଗଡ଼ ସରକାର। ଫଳରେ ହୀରାକୁଦ ଜଳଭଣ୍ଡାରର ଜଳସ୍ତର ଧୀରେ ଧୀରେ ବୃଦ୍ଧି ପାଉଛି। ଉପରମୁଣ୍ଡରେ ପ୍ରବଳ ବର୍ଷା ହେଉଛି। ତେଣୁ କଲମା ବ୍ୟାରେଜ ଖୋଲି ଦିଆ ଯାଇଛି।

ବ୍ୟାରେଜର ଏତେ ସଂଖ୍ୟକ ଗେଟ ଖୋଲିବା ଦ୍ୱାରା ସକାଳ ୯ଟା ସୁଦ୍ଧା ହୀରାକୁଦକୁ ୭୨ ହଜାର କ୍ୟୁସେକ୍ ଜଳ ପ୍ରବେଶ କରିଥିଲା ଓ ମଧ୍ୟାହ୍ନ ୧୨ ଟା ସୁଦ୍ଧା ହୀରାକୁଦ ଡ୍ୟାମକୁ ପ୍ରବେଶ କରିଥିଲା ୭୯ ହଜାର କ୍ୟୁସେକ୍ ଜଳ । ଏବେ ହୀରାକୁଦ ଜଳଭଣ୍ଡାରର ଜଳସ୍ତର ୬୦୩.୫୦ ଫୁଟ୍ ରହିଛି। କଲମା ବ୍ୟାରେଜ ଦେଇ ମହାନଦୀକୁ ପଶୁଛି ୧ ଲକ୍ଷ ୧୮ ହଜାର କ୍ୟୁସେକ ଜଳ।

ପ୍ରତିବର୍ଷ ମୌସୁମୀ ଆସିଲେ ଛତିଶଗଡ଼ ଓଡିଶା ସହ ବିନା ବିଚାର ବିମର୍ଷରେ ଏମିତି ମନଇଛା କଲମା ବ୍ୟାରେଜର ଗେଟ ସବୁ ଖୋଲିଦିଏ ଫଳରେ ରାଜ୍ୟରେ ଏକାଧିକ ଥର ବନ୍ୟା ଆସିଥାଏ। ସେପଟେ ଅଣ ମୌସୁମୀ ସମୟରେ ବ୍ୟାରେଜର ସବୁ ଗେଟ୍‌ ବନ୍ଦ କରିଦିଏ। କିନ୍ତୁ ଏଥର ଅଣ ମୌସୁମୀ ସମୟରେ କଲମା ବ୍ୟାରେଜର ୬୪ ଗେଟ୍‌ ଖୋଲି ଦେଇଛି ଛତିଶଗଡ। ମହାନଦୀ ଟ୍ରିବ୍ୟୁନାଲ ଟିମର ଯାଞ୍ଚ ବେଳେ ଚାଲାକି ଦେଖାଇ କିଛି ଗେଟ୍ ଖୋଲି ଦେଇଥିଲା। ପରବର୍ତ୍ତୀ ସ୍ଥରରେ ତାକୁ ବନ୍ଦ କରିଥିଲା।