ପୁଣି ମହାପ୍ରଭୁଙ୍କ ପୂଜା ନାଁରେ ଅନଲାଇନରେ ଠକେଇ । ବିଭିନ୍ନ ଆପ୍ ମାଧ୍ୟମରେ ଭକ୍ତଙ୍କୁ ମନେଇବା ପାଇଁ ଉଦ୍ୟମ ଜାରି ରହିଛି । ଏହି ଆପ୍ ଜରିଆରେ ମାଲେମାଲ ହେଉଛନ୍ତି ଦଲାଲ ଯାହାକୁ ନେଇ ଚିନ୍ତା ବଢ଼ିଛି ।

ଶେଷରେ ମହାପ୍ରଭୁ ଜଗନ୍ନାଥଙ୍କୁ ବି ଛାଡ଼ିଲେନି ଦଲାଲ । ତାଙ୍କୁ ମାଧ୍ୟମ କରି ବେଶ୍ କିଛି ଅର୍ଥ ରୋଜଗାର କରୁଛନ୍ତି । ଉତ୍ସବ ପରେ ପୁଣି ଥରେ ମହାପ୍ରଭୁଙ୍କ ନାଁରେ ଆଉ ଏକ ଆପ୍ ଦେଖିବାକୁ ମିଳିଛି । ‘ଶାଲିଗ୍ରାମ ଶାଲ’ଆପ୍‌ ଜରିଆରେ ଶ୍ରଦ୍ଧାଳୁଙ୍କୁ ମନାଯାଉଛି । ଶାଲିଗ୍ରାମ୍‌ ଡଟ୍‌ କମ୍‌ ନାଁରେ ୱେବସାଇଟରେ ବ୍ରାହ୍ମଣ ଭୋଜନବେଳର ଏକ ଫଟୋ ପକାଯାଇ ଦର ମଧ୍ୟ ସ୍ଥିର ହୋଇଛି । ୧୧ ଜଣ ବ୍ରାହ୍ମଣଙ୍କୁ ଭୋଜନ ଦେଲେ ଆପଣଙ୍କୁ ୬ ହଜାର ଅର୍ଥାତ୍ ୭୯ ଆମେରିକୀୟ ଡଲାର ଦେବାକୁ ପଡ଼ିବ ବୋଲି ଉଲ୍ଲେଖ ରହିଛି । ଏହା ପୁଣି ୫୦ ପ୍ରତିଶତ ଡିସ୍‌କାଉଣ୍ଟ ରେଟ୍‌ରେ ମିଳିବ । ଜଗନ୍ନାଥଙ୍କ ପୂଜା, ମନ୍ତ୍ର, ଜପ ଓ ଯଜ୍ଞ ପାଇଁ ୫୦ ପ୍ରତିଶତ ରିହାତିରେ ରେଟ୍‌ ରହିଛି ୪ ହଜାର ୫୦୦ ଟଙ୍କା ଅର୍ଥାତ୍ ପ୍ରାୟ ୫୯ ଡଲାର । ସେହିପରି ତିନି ବିଗ୍ରହଙ୍କ ପୂଜା ପାଇଁ ୧୧୫୦୦ ଟଙ୍କା, ୩ ଜଣ ପୂଜକଙ୍କ ଦ୍ୱାରା ଗୋଟିଏ ଦିନ ସିଦ୍ଧ ପୂଜା ପାଇଁ ୧୨ ହଜାର ଟଙ୍କା ଅର୍ଥାତ୍ ୧୫୯ ଡଲାର ଲାଗିବ ବୋଲି ମୂଲ୍ୟ ସ୍ଥିର ହୋଇଛି ।

ମହାପ୍ରଭୁଙ୍କ ପୂଜା, ବ୍ରାହ୍ମଣ ଭୋଜନ, ହୋମ, ଯଜ୍ଞ ନାଁରେ ଅନ୍‌ଲାଇନରେ ବିଜ୍ଞାପନ ଦେଇ ବଡ଼ ଧରଣର ଠକେଇ ଚାଲିଛି । ସମ୍ପୃକ୍ତ ଠକ ସଂସ୍ଥା ବିରୋଧରେ ସିଂହଦ୍ୱାର ଥାନାରେ ଲିଖିତ ଅଭିଯୋଗ କରିଛନ୍ତି ଶ୍ରୀମନ୍ଦିର ସେବାୟତ । ଜଗନ୍ନାଥ ଭକ୍ତଙ୍କ ଭାବାବେଗ ସହ ବଡ଼ ଧରଣର ଠକେଇ ଚାଲିଛି । ବିଶ୍ୱସ୍ତରରେ ମହାପ୍ରଭୁଙ୍କ ଛବିକୁ ନିନ୍ଦିତ କରାଯାଉଛି । ଏଭଳି କାର୍ଯ୍ୟରେ ସଂପୃକ୍ତ ସଂସ୍ଥା, ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ସେବାୟତ ପକ୍ଷରୁ ଦାବି ହୋଇଛି ।

ସେପଟେ ବରିଷ୍ଠ ଦଇତାପତି ସେବାୟତଙ୍କ କହିବାନୁସାରେ ଶ୍ରୀମନ୍ଦିର ପ୍ରଶାସନ ଓ ପୁରୀ ଜିଲ୍ଲା ପ୍ରଶାସନର ସାହାଯ୍ୟ ନେଇ ଭକ୍ତମାନେ ଦାନ କରିପାରିବେ । ଶ୍ରଦ୍ଧାଳୁମାନେ ଏମିତି କୌଣସି ଆପ୍ ଜରିଆରେ ଟଙ୍କା ନ ଦେବାକୁ ଆହ୍ୱାନ କରାଯାଇଛି । ଶ୍ରୀମନ୍ଦିର ପ୍ରଶାସନ ଏପରି ଅନ୍‌ଲାଇନ୍‌ ଠକେଇକୁ ଗୁରୁତର ସହ ନେଇଛି । ତେଣୁ ଏ ଦିଗରେ ତୁରନ୍ତ ପଦକ୍ଷେପ ନିଆଯିବ ବୋଲି ବରିଷ୍ଠ ସେବାୟତମାନେ କହିଛନ୍ତି । ଗତ ମାସରେ ‘ଉତ୍ସବ’ ଆପ୍ ଧରାପଡ଼ିଥିଲା । ଭକ୍ତଙ୍କ ଠାରୁ ମୋଟା ଅଙ୍କର ଅର୍ଥ ଆଦାୟ କରି ଚାଲିଥିଲା । ସିଂହଦ୍ୱାର ଥାନାରେ ଏତଲା ପରେ ଆସନ୍ତା ୭ ତାରିଖରେ ସଂସ୍ଥାର କର୍ତ୍ତୃପକ୍ଷ,ପୋଲିସ ନିକଟରେ ହାଜର ହେବାକୁ ନୋଟିସ କରାଯାଇଛି ।

ଏଭଳି ଅନଲାଇନ୍ ସେବା କେବେଠାରୁ ଆରମ୍ଭ ହୋଇଛି । ପୂଜା କରିବା ପାଇଁ ଦେଶୀବିଦେଶୀ ଭକ୍ତଙ୍କ ଠାରୁ ମୋଟା ଅଙ୍କର ଅର୍ଥ ନିଆଯାଉଛି । ଏଥିରେ କାହାର କ୍ଷତି ହେଉଛି, କିଏ ବଦନାମ ହେଉଛି ରାଜ୍ୟବାସୀ, ଜଗନ୍ନାଥପ୍ରେମୀ ଜାଣିବା ଉଚିତ ।